Vonona ny hitombo hatrany

Nipetraka teo amin’ny seza tao amin’ny efitrano fandraisana ny fanasan’ny Tompo niaraka tamin’ny ray aman-dreniny sy ny rahalahiny i Jewel. Nanao sarina tantara ao amin’ny soratra masina izy. Niezaka nihaino ilay mpandahateny izy, saingy toy ireny hoe nisy lolo kely feno tebiteby ireny ny kibony!

Androany no andro voalohany handehanan’i Jewel ao amin’ny kilasin’ny Zatovovavy fa tsy ao amin’ny Kilonga. Tsy te handao ireo namany tao amin’ny Kilonga izy. Tiany ny mihira sy mamaky soratra masina miaraka amin’izy ireo.

Saingy feno 12 taona i Jewel amin’ity taona ity. Tonga ny fotoana hifindrana ao amin’ny fandaharan’asa Zatovovavy.

Nakipin’i Jewel ny masony ka nanao vavaka mangina izy. Ry Ray any An-danitra ô, ampio aho mba hanana kilasin’ny Zatovovavy tsara.

Taorian’ny vavaka famaranana nandritra ny fivoriana fanasan’ny Tompo dia nisento lalina i Jewel ary nandeha tany amin’ny kilasy. Efa tao ireo ankizivavy efa zokinjokiny. Efatra no isan’izy ireo. Niresaka sy niomehy izy ireo.

“Manahoana,” hoy i Jewel.

Nitsiky izy ireo. “Manahoana!”

Niditra ilay mpampianatra ka niarahaba tongasoa an’i Jewel. Dia nanomboka ny lesona izy avy eo.

Ny ankabeazan’ny kilasy dia nahatsapa ho irery i Jewel. Natahotra ny hiresaka izy satria tsy mbola fantany ireo ankizivavy hafa. Mila hoe ao amin’ny Zatovovavy mandritra ny fotoana lava izy. Toy ny mandrakizay izany! Hahatsapa ho irery foana ve izy ato?

Avy eo dia nisy feno malefaka tonga tao an-tsainy. Tsy ho ao amin’ny Zatovovavy mandrakizay ianao. Feno taona fotsiny ianao ka afaka niroso sy nianatra bebe kokoa momba ny maha-mpianatr’i Jesoa Kristy.

Nahatsapa fankaherezana avy tamin’ireo teny ireo i Jewel. Tsapany fa izany dia ny Fanahy Masina niezaka nanampy azy. Na dia tsy nanana namana betsaka tao amin’ny Zatovovavy aza izy dia tsy irery. Nanana ny Fanahy Masina izy.

Rehefa tapitra ny kilasy dia hitan’i Jewel ny fianakaviany.

“Nanao ahoana ny kilasin’ny Zatovovavy?” Hoy i neny nanontany.

Nofihinin’i Jewel izy. “Nandeha tsara ka. Manina ny Kilonga aho ary tsy mbola fantatro ireo ankizivavy ao. Saingy nahatsapa ny Fanahy Masina nankahery ahy aho.”

Nitsiky i Neny. “Tsara ny mandre izany! Ary angamba ho tsara kokoa amin’ny fotoana manaraka.”

Naneho fanekena tamin’ny lohany i Jewel. Nanantena izy fa marina ny nolazain’i Neny.

Nony nanatrika kilasin’ny Zatovovavy indray izy dia niarahaba ireo ankizivavy indray.

“Manahoana Jewel”, hoy ny iray tamin’izy ireo. “Tokony hipetraka eo akaikiko ianao!”

Nitsiky i Jewel ary nipetraka teo akaikin’ilay ankizivavy. Ellie no anarany. Niresaka betsaka izy ireo talohan’ny nanombohan’ny lesona. Tsara fanahy i Ellie ary nahatonga azy hahatsapa ho voaray tsara.

Nandritra ny lesona dia nanontany ilay mpampianatra raha toa ka nisy olona niaina zavatra niaraka tamin’ny Fanahy Masina.

Nanangan-tanana i Jewel. “Nahatsapa ny Fanahy Masina nanampy ahy aho rehefa natahotra ny hiditra tato amin’ny Zatovovavy,” hoy izy. “Manampy ahy ny Fanahy Masina rehefa mitombo sy miatrika fanamby aho.”

Nieritreritra ny fomba nankaherezan’ny Fanahy Masina azy fony izy nahatsapa ho irery i Jewel. Nahafinaritra ny nizara ny traikefany tamin’ireo ankizivavy tao amin’ny Zatovovavy.

Rehefa avy nizara izany izy dia nizara ihany koa ny ankizivavy vitsivitsy hafa. Tian’i Jewel ny nandre ny zavatra izay nolazain’izy ireo.

Mbola manimanina ny Kilonga i Jewel indraindray. Saingy noho ny Fanahy Masina dia vonona ny hitombo hatrany izy.

Hanokatra ny PDF

Sary nataon’i Liz Brizzi