Fanomezana ny vatanao!

Samy manana ny habeny, bikany sy ny zavatra hainy hatao ary ny lokony avy ny vatana ara-nofo. Fanomezana mahatalanjona avy amin’ Andriamanitra ny vatana tsirairay ary ampahany manan-danja ao amin’ny drafiny izany!

Mendrika ny hajaina avokoa ny vatana rehetra. Miresaha amin-katsaram-panahy momba ny vatanao sy ny an’ny hafa. Mety hilaza zavatra ratsy momba anao ny olona, saingy tsy voatery hino azy ireny na hifantoka amin’ny tenin’izy ireny ianao.

Ny vatanao no trano fonenan’ny fanahinao. Manan-danja ny sakafo haninao sy ny fampahalalana atsofokao ao amin’ny atidohanao! Afaka mikarakara ny vatantsika isika amin’ny alalan’ny fihinanana sakafo ara-pahasalamana sy fanazaran-tena ary fananana torimaso ampy.

Afaka mikarakara ny fanahintsika isika amin’ny alalan’ny fihainoana ny Fanahy Masina, ny fivavahana ary ny fisafidianana ny tsara.

Ny ankamaroan’ny olona dia manana taolana mihoatra ny 200 isa. Mitazona sy miaro ny vatanao ny taolanao. Manampy anao hihetsika sy handeha ary hihazakazaka ny hozatrao.

Misokatra sy mihidy mihoatra ny in-100.000 isan’andro ireo valvan’ny fonao. Manampy amin’ny fanaparitahana ny rà manerana ny vatana manontolo izany.

Miasa mafy ny atidohanao mba hahatakarana ny zavatra rehetra hitanao sy renao ary tsapanao. Matanjaka sy haingana kokoa noho ny solosaina rehetra izany.

Rehefa mihalehibe ianao dia hitombo ny vatanao. Novolavolain’ny Ray any An-danitra ny vatanao mba hitohy hiova mandritra ny fiainanao manontolo!

Ny zavatra ataonao amin’ny vatanao dia manan-danja lavitra noho ny endrika isehoan’zany. Moa ve izy io ampiasainao mba hitondrano ny tenanao sy ny hafa amin-katsaram-panahy sy hanarahana an’i Jesoa Kristy?”

Aza mampitaha ny vatanao amin’ny an’ny olon-kafa. Tsarovy fa fanomezana avy amin’ny Ray any An-danitra ny vatanao!