Ilay fahagagana momba ny biscuit

Nosoratan’i Julia A. Anderson

“Ry Ray any An-danitra ô, tsy manana sakafo hariva izahay. Mba ampio izahay.”

Tantara marina avy any Etazonia.

Sary tapaka maneho ankizivavy mpamaky lay iray sy sarina biscuit mafy be mifanindry

Nifofofofo ny rivotra mamanala, ary nihodinkodina manodidina ny sarety tarihin-tanana ny oram-panala. Nosintonin’i Jane mafy kokoa manodidina ny sorony ilay bodofotsy manifiny. Tsapany fa ngoly ny tongony, kanefa nanohy nandeha an-tongotra izy. Teny an-dalana ho any Salt Lake City, Utah izy ireo.

Tany Angletera no nahafantaran’i Jane sy ny fianakaviany momba Ny Fiangonan’ i Jesoa Kristy Ho An’ Ny Olomasin’ Ny Andro Farany. Rehefa nangataka ireo mpikamban’ny Fiangonana handeha any Utah ny mpaminany dia nanangona ny vola rehetra azon’izy ireo nangonina izy sy ny fianakaviany mba hanaovana ilay dia. Niondrana an-tsambo niampita ny ranomasimbe izy ireo. Teto izy ireo dia nandeha namakivaky ireo lohasaha tamin’ny alalan’ny sarety tarihin-tanana. Efa nandeha an-tongotra nandritra ny volana maro izy ireo, ary tsy nanana sakafo intsony.

Nirotsaka teo amin’ny takolak’i Jane ny ranomaso. “Noana be aho,” hoy izy tamin’i Thomas zokiny lahy. “Tsy ho vitako intsony angamba ny hamindra!”

Nanapaka hodi-biby niendaka teo amin’ny kodiaran’ilay sarety i Thomas. “Inty, tsakoy ity,” hoy izy. “Tsy hampaninona anao iny.”

“Misaotra,” hoy i Jane nibitsibitsika teo am-pitsakoany ilay sombina hoditra mafy be.

Vetivety dia tonga ny fotoana hilasiana mandritra ny alina. Nandeha nihaza omby dia ny sasany tamin’ireo lehilahy. Nanantena i Jane fa hahita vitsivitsy izy ireo. Nahatsapa ho tena mosarena izy. Teo am-piandrasan’izy ireo dia nifampisisika nanodidina ny afo kely iray i Jane sy ny fianakaviany, izay reraka sy noana ary nangatsiaka.

“Andao hivavaka,” hoy i Jane.

Niara-nandohalika ilay fianakaviana dia nivavaka i neny. “Ry Ray any An-danitra ô, tsy manana sakafo hariva izahay. Mba ampio izahay.”

Nipetraka tamim-pahanginana nandritra ny fotoana fohy i Jane sy ireo anadahiny sy ireo rahavaviny. Avy eo dia nitraka nahitsy teo am-pipetrahana i neny.

“Fa misy inona?” Hoy i Thomas nanontany.

“Misy zavatra tadidiko fotsiny.” Nandeha haingana teo amin’ilay sarety i neny dia nanokatra ny vata nisy ny entan’ny fianakaviana. Dia nisintona boaty vy kely avy tao izy ary nanokatra izany. Nisy biscuit roa mafy be tao anatin’ilay izy. Sisan-tsakafo tamin’ny dian’izy ireo teny amin’ny ranomasimbe volana maromaro talohan’izay izany.

Nahatsapa fientanentanana niboiboika tao anatiny i Jane. Nanana sakafo mihitsy izy ireo! “Azontsika tapatapahina izany mba hifampizarantsika,” hoy izy.

Saingy rehefa nanandrana nanao izany izy ireo dia tsy nety notapahina ireo biscuit na dia hoe hozaraina roa aza satria mafy loatra.

“Andao izao no hatao,” hoy i Neny. Napetrany tao anaty lafaoro Hôlandey (lafaoro vilany) ireo biscuit dia norarahany rano kely teo amboniny. Avy eo dia napetrany ny sarom-bilany ary napetrany teo ambony vainafo ilay vilany mavesatra.

Fianakaviana mpamaky lay mitangorona manodidina ny vilany iray eo ambony afo

Nivavaka indray i Jane sy ny fianakaviany. Nieritreritra ilay tantaran’i Jesoa Kristy tao amin’ny soratra masina izy, rehefa namahana ireo olona dimy arivo tamin’ny alalan’ny mofo sy hazandrano vitsy fotsiny Izy. Fantany fa afaka manampy azy ireo koa ny Ray any An-danitra.

Rehefa afaka kelikely dia nosokafan’i Neny tsimoramora ilay vilany. Feno sakafo hatreo amin’ny vavany ilay izy! Feno sakafo hamahanana ny fianakavian’izy ireo manontolo tao anatiny.

Nofihinin’i Jane mafy ny reniny. “Fahagagana izany!”