« Hina’aro ānei ’oe iā’u ? »
Mai te mea e hina’aro tātou e fa’a’ite i tō tātou here i te Atua, e ti’a ia tātou ’ia hāro’aro’a e mea nāhea ’oia e ’ite ai i tō tātou here.
I roto i te parabole nō te tāmaiti i haere i te fenua roa, ’aita te tua’ana i fa’ari’i i tōna teina i te ho’ira’a mai i te ’utuāfare i muri mai i te tahi tau mā’itira’a tāno ’ore ’e « puhura atu ra i tāna tao’a i te ha’apa’o ’ore ». ’Ua riro te te’ote’o o te tua’ana ’e tōna ha’apa’ora’a iāna iho ’ei ’ōpanira’a iāna ’ia tauahi i te ’oa’oa nō te ho’ira’a mai tōna teina tei tātarahapa. E nehenehe ato’a paha tātou e fārerei atu i teie huru ravera’a ma te ’ore e fa’a’ite atu i te feiā tei herehia e tātou, nā roto i tā tātou mau parau ’e tā tātou mau ’ohipa, i tō tātou here aneane nō rātou.
Tē vai nei e rave rahi mau hi’ora’a pūai roa i roto i te mau pāpa’ira’a mo’a nō taua huru here aneane ra tei hōro’ahia ’e tei fa’ari’ihia : ’O Naomi ’e ’o Ruta, Amona ’e te ari’i Lamoni, te tamaiti tei haere i te fenua roa ’e tōna metua tāne, te Fa’aora ’e tāna mau pipi.
’Ia hōro’a-ana’e-hia te here ma ti’amā ’e ’ia fa’ari’ihia ma te ’ā’au tae, e tupu mai te hō’ē aua ha’atira’a mā, ma te hō’ē ha’amara’ara’a o te here i rotopū te ta’ata hōro’a ’e te ta’ata fa’ari’i.
Mea maita’i roa te aroha o te Atua, mea mure ’ore, mea tāmau, ’e e mea « monamona roa ». E fa’a’ī te reira i te vārua ma te « ’oa’oa rahi roa ». Teie rā i te tahi mau taime e mea fifi nō tātou ’ia fa’ari’i i te aroha o te Atua i roto i tō tātou orara’a. Inaha ho’i, tē hina’aro hōhonu roa nei tō tātou Metua here maita’i roa i te ra’i ’ia ora tātou i tōna aroha ’o tāna e « paraparau mai [ia tātou] mai te au ho’i i tō [tātou] ’ite ». E fa’a’ite ’oia i tōna aroha nō tātou ma te mau rāve’a tātou, te ta’ata tāta’itahi, e nehenehe e fa’ari’i. E nehenehe tātou e putapū i te aroha o te Atua nō tātou ’ia hi’o ana’e tātou i te mau ’una’una o te nātura, ’aore rā ’ia fa’ari’i i te mau pāhonora’a nā roto mai i te pure, ’aore rā ’ia tae ana’e mai te mau mana’o i tō tātou ferurira’a i te reira iho taime e hina’arohia ai e tātou, ’aore rā ’ia ora ana’e tātou i te mau taime monamona o te ’oa’oa. Te fa’a’itera’a rahi roa a’e o te aroha o te Metua i te ra’i ra nō tātou, e tāvevo nei i roto i te ferurira’a ’e te ’ā’au, i te taime ïa ’a fa’ati’a ai ’oia i tāna Tamaiti Herehia ’ia pūpū iāna iho ’ei tāra’ehara.
Mai te tua’ana a te tamaiti tei haere i te fenua roa, mea pinepine tātou i te rōtahi i ni’a ia tātou iho. ’Ua tāhiti-roa-hia tātou ma te ’imira’a i te mau ha’apāpūra’a nō te aroha o te Atua nō tātou, ’e e riro tātou i te māuruuru ’ore i te ’orera’a e ’ite mata i te reira. Terā rā te ’una’una o te ha’apāpūra’a ’oia ho’i rahi atu ā tātou i te tītau i te fa’a’itera’a i tō tātouhere i te Atua, rahi atu ā te ’ōhie ia tātou ’ia fa’ari’i i tōna aroha nō tātou. Penei a’e nō reira te Fa’aora i pāhono ai i te uira’a « tei hea te parau rahi i roto i te ture ? » ma teie anira’a ’ōhie ’e te faufa’a rahi : « Hina’aro ’oe i tō Atua ia Iehova ma tō ’ā’au ato’a, ’e ma tō vārua ato’a, ’e ma tō mana’o ato’a ».
I te tahi taime te rāve’a nō tātou ’ia fa’a’ite i tō tātou here i te feiā tā tātou i here rahi roa a’e, ’aita e tītauhia te rāve’a ’ia fa’ari’i rātou i te here. E nehenehe te reira e riro e ’ōminora’a nō nā ta’ata to’opiti ’oia ho’i te ta’ata hōro’a ’e te ta’ata fa’ari’i. E riro te reira ’ei tauturu ia tātou ’ia ui atu i tei herehia e tātou, e mea nāhea rātou ’ia ’ite i te here i fa’a’itehia. Hō’ē ā huru, ’ia hina’aro ana’e tātou e fa’a’ite i tō tātou here i te Atua, e tītauhia ia tātou ’ia hāro’aro’a e mea nāhea ’oia ’ia ’ite i tō tātou here. Aua’a a’e, ’ua fa’a’ite pāpū mai ’oia e rave rau rāve’a i roto i te mau pāpa’ira’a mo’a ’o tē nehenehe ia tātou e fa’a’ite i tō tātou here nōna.
Tē rahi na tō ’oe hina’aro iā’u i teie ?
I roto i teie ha’api’ira’a ’āparaura’a i rotopū ia Petero ’e te Fatu tei ti’afa’ahou i te hiti roto ra o Tiberia, tē ha’api’i mai nei tātou i te mau rāve’a e nehenehe tātou e fa’a’ite i tō tātou here nō te Fatu.
« ’Ua parau atu ra ’o Iesu ia Simona Petero, e Simona a Iona ē, tē rahi na tō ’oe hina’aro iā’u i teie ? ’Ua parau mai ra ’oia iāna, e te Fatu ē, ’ua ’ite ’oe ē, tē hina’aro atu nei au ia ’oe ».
Te uira’a niu i roto i teie tītaura’a a te Fatu ’oia ho’i « tē rahi na tō ’oe hina’aro iā’u i teie ? » Tē fa’a’ite nei tātou i tō tātou here i te Fatu ’ia tu’u ana’e tātou iāna i ni’a a’e i « teie », ’e « teie » e nehenehe e riro vētahi ’ē, te huru o te ’ohipara’a, ’aore rā te mau mea ato’a e ’ōpani nei ’ia riro ’ei fa’aurura’a faufa’a roa a’e i roto i tō tātou orara’a.
E’ita roa e rava’i te taime i roto hō’ē mahana, hō’ē hepetoma, hō’ē ’āva’e, ’aore rā hō’ē matahiti nō te rave fa’aoti i te tā’āto’ara’a o te mea tā tātou e hina’aro ’aore rā e ti’a ’ia fa’aoti. Hō’ē tuha’a o te tāmatara’a nō te orara’a tino nei ’o te fa’a’ohipara’a ïa i te rāve’a faufa’a roa o te taime, nō te mau ’ohipa faufa’a roa a’e o tō tātou maita’i mure ’ore ’e te vaiihora’a i te mau mea faufa’a ’ore.
’Ua parau te peresideni Russell M. Nelson : « Te uira’a nō tātou tāta’itahi hō’ē ā ïa huru. E hina’aro ānei ’outou e vaiiho i te Atua ’ia riro ’ei fa’aurura’a faufa’a roa a’e i roto i tō ’outou orara’a ? E vaiiho ānei ’outou i tāna mau parau, tāna mau fa’auera’a, ’e tāna mau fafaura’a ’ia fa’auru i te ’ohipa tā ’outou e rave i te mahana tāta’itahi ? E vaiiho ānei ’outou i tōna reo ’ia riro ’ei reo mātāmua nā ni’a a’e i te tahi atu ? E hina’aro ānei ’outou e vaiiho i te mau mea ato’a tāna e hina’aro ’ia rave ’outou, ’ia nā ni’a a’e i te tahi atu ā mau hina’aro ? E hina’aro ānei ’outou ’ia horomi’ihia tō ’outou hina’aro i roto i tōna ? » Te fa’a’ite nei tātou i tō tātou ti’ara’a pipi ’e te here nō te Atua, ’ia tu’u ana’e tātou iāna tā tātou ’ohipa mātamua roa.
Fa’a’amu na i tā’u mau māmoe
I roto i te ’īrava i muri iho i roto i teie ā ’āparaura’a i rotopū ia Petero ’e te Fa’aora, tē ha’api’i mai nei tātou i te tahi atu ā rāve’a tā te Fatu e ’ite nei i tā tātou fa’a’itera’a i te here : « ’Ua parau fa’ahou atu ra te Fatu iāna i te pitira’a o te taime, e Simona a Iona ē, te hina’aro nā ’oe iā’u ? ’Ua parau mai ra ’oia, ē, e te Fatu, ’ua ’ite ’oe ē, tē hina’aro atu nei au ia ’oe. ’Ua parau atu ra ’o Iesu iāna, ’a fa’a’amu i tā’u mau māmoe ».
E fa’a’ite tātou i tō tātou here nō te Metua i te ra’i ra ’ia tāvini ana’e tātou, ’ia fa’aro’o,’ia here, ’ia fa’ateitei, ’aore rā ’ia aupuru i tāna mau tamari’i. E nehenehe teie tāvinira’a e riro ’ei mea ’ōhie ma te hi’o-mau-ra’a ia vetahi ma te ha’avā ’ore. I roto i Te Ha’api’ira’a Tumu ’e te mau Fafaura’a tuha’a 76, tē ’ite nei tātou i te hi’ora’a nō te huru o te feiā e fana’o i te ao tiretiera : « E tē hi’o nei rātou i te mau mea ato’a mai te hi’ohia mai, ’e ’ua ’ite rātou i te mau mea ato’a mai te ’itehia mai ». Tē hi’o nei rātou ia vētahi ’ē mai tā te Atua e hi’o nei ia rātou, ’e tē hi’o nei ’oia ia rātou mai te au i tā rātou e nehenehe e riro mai, ma te fāito pūai atuara’a hanahana.
I muri mai i tō’u ho’ira’a nā tā’u misiōni, ’ua rave fa’ahou mai au i te taiete nō te ’atu’atura’a te matie ’o tō’u ’e tō’u mau taea’e i ha’amau i te taure’ara’a. ’Ua ’ohipa roa ato’a vau nō tā’u ha’api’ira’a tuatoru. Hō’ē hepetoma nō te tau tupura’a rā’au, te ua rahi ’e te fātatara’a mai te mau hi’opo’ara’a hōpe’a, ’ua fa’ateimaha roa iā’u ’e tei fa’afao iā’u ’e ’ua fa’ataere i te ’atu’atura’a i te ’āua.
I te ’āfara’a o te hepetoma ’ua teatea mai te ra’i, ’e ’ua ’ōpua vau i te ’atu’atu i te ’āua i muri mai i tā’u ha’api’ira’a. I tō’u ra taera’a atu i te fare, ’ua ravehia tō’u pere’o’o ’e te mau tauiha’a. Ma te pe’ape’a, ’ua haere au e hi’opo’a i te mau ’āua i ’ōpuahia ; e inaha ’ua ’atu’atu-maita’i-hia te ’āua tāta’itahi. I te taera’a atu i te ’āua hōpe’a tei ’ōpuahia, ’ua ’ite atu vau i tō’u teina iti e hāhaere ra ma te tura’i i te mātini tāpu ’aihere. ’Ua ’ite mai ’oia iā’u, ’ua ’ata’ata ’e ’ua tarape mai iā’u. ’Ua ’ī roa vau i te māuruuru, ’ua tauahi atu vau iāna ’e ’ua ha’amāuruuru iāna. Tāna ’ohipa tāvinira’a maita’i ’ua ha’apūai hōhonu i tō’u here ’e tō’u mana’o fa’atura nōna. Te tāvinira’a i te tahi ’e te tahi ’o te hō’ē ïa rāve’a pāpū nō te fa’a’ite i tō tātou here nō te Atua ’e tāna Tamaiti here.
Fa’i mai i tōna rima i roto i te mau mea ato’a
E fa’a’ite ato’a tātou i tō tātou here nō te Atua nā roto i te ’ā’au mēhara. ’Ua parau te Fatu, « ’e ’aore roa te ta’ata nei e fa’a’ino i te Atua i te hō’ē mea, maori rā ia rātou ’o tei ’ore i fā’i mai i tōna rima i roto i te mau mea ato’a ». Tē fa’a’ite nei tātou i tō tātou here nō te Atua nā roto i te ’itera’a iāna ’ei puna o te mau mea maita’i ato’a i roto i tō tātou orara’a.
I roto i te mau mahana ’omuara’a o te ha’amaura’a i te taiete, ’ua pure māua tō’u ’āpiti taiete ma te pāpū hou te mau fārereira’a faufa’a roa, ma te ’anira’a i te tauturu a te Metua i te ra’i. E rave rahi taime, ’ua pāhono te Atua i tā māua mau pure, ’e ’ua maita’i roa tā māua mau fārereira’a. I muri mai i hō’ē fārereira’a, ’ua fa’a’ite mai tō’u ’āpiti taiete ē ’ua ’oi’oi roa māua i te ani i te tauturu, e mea taere ra i te ha’amāuruuru atu. Mai te reira taime, ’ua ha’amātau māua i te pūpū i te mau pure ’ā’au tae o te ha’amāuruurura’a, ma te māuruuru i te rima o te Fatu i roto i tō māua mānuiara’a. ’Ua fa’a’ite māua i tō māua here nō te Atua ma te « hō’ē peu o te ha’amāuruurura’a ? »
’Ua hina’aro ’outou ’iā’u ra, ’a ha’apa’o ïa i tā’u parau
Te tahi rāve’a ’ia fa’a’ite tātou i tō tātou here nō te Metua i te ao ra ’e tāna Tamaiti here, ’o te mā’itira’a ïa ’ia ha’apa’o i tā Rāua parau. Tē parau nei te Fa’aora ē, « ’Ua hina’aro ’outou ’iā’u ra, e ha’apa’o i tā’u parau ». Teie hōho’a o te ha’apa’ora’a e ’ere ïa mai te mātapō e ’ere ato’a e mea fa’ahepohia, terā rā e fa’a’itera’a ’ā’au tae ’e te hina’aro o te here. Tē hina’aro nei te Metua i te ao ra ia tātou ’ia hina’aro i te ha’apa’o. ’Ua pi’i te tuahine Tamara W. Runia i te reira « Te ha’apa’ora’a ma te aumihi ». ’Ua parau ’oia, « noa atu ’aita ā tā tātou e ha’apa’ora’a maita’i roa, tē tāmata nei tātou i teienei te ha’apa’ora’a here, ma te mā’itira’a ’ia fa’aea, fa’ahou ’e fa’ahou ā, nō te mea tē here nei tātou iāna ».
ʼUa hōroʼa mai tō tātou Metua i te ao ra ia tātou i te ti’amāra’a nō te fa’auru ia tātou ’ia hina’aro i te mā’iti iāna. ’Aita tāna ’ohipa ’e tōna hanahana i tāoti’a-noa-hia nō te fa’atupu i tō tātou ora mure ’ore, tē vai ato’a ra rā te tīa’ira’a ’o tā tō tātou hina’aro rahi roa a’e ’ia ho’i atu iāna ra. ’Ātira noa atu, e ’ore roa te Atua e fa’ahepo ia tātou ’ia ha’apa’o. I roto i te buka Himene « ’Ua ti’amā te ta’ata » tē hīmene nei tātou :
’Ei feiā fa’atere misiōni, ’ua fa’auruhia tō’u hoa here ’o Christina ’e o vau nei e e rave rahi mau misiōnare ’o tei mā’iti ’ia ha’apa’o, ’eiaha noa nō te mea e ture misiōnare, ’oia ato’a rā nō te mea ’ua hina’aro rātou e fa’a’ite i tō rātou here nō te Fatu ma te mā’itira’a ha’eha’a ’ia ti’a atu nōna.
’Ua parau Elder Dale G. Renlund : « Te fā a tō tātou Metua i te ao ra ’ei ti’ara’a metua, e ’ere i te ravera’a tāna mau tamari’i i roto i te maita’i ; ’o tē mā’itira’a ra rā rātou ’ia rave i te maita’i ’e ’ia riro mai iāna ra te huru. Nō te mea ’ua hina’aro noa ’oia ’ia ha’apa’o tātou, e fa’a’ohipa ïa ’oia i te mau utu’a maita’i ’e te mau utu’a ’ino nō te ha’ataui i tō tātou haere’a ». Tē fa’a’ite nei tātou i tō tātou here nō te Atua ’ia mā’iti ana’e tātou i te ha’apa’o ’e i te pe’e iāna.
Tē ’ite nei tō tātou Metua i te ao ra ’e tō tātou Fa’aora i tō tātou fa’a’itera’a i te here nō Rāua, ’ia tu’u mātāmua ana’e tātou ia Rāua i roto i tō tātou orara’a, ’ia tāvini i te tahi ’e te tahi, ’ia ’ite ma te māuruuru i te ha’amaita’ira’a tāta’itahi nō ’ō mai ia Rāua ra, ’e ’ia mā’iti i te ha’apa’o ’e i te pe’e ia Rāua.
Tē fa’a’ite pāpū nei au ē, tātou tāta’itahi e tamari’i mau tātou nā te Atua, ’e tē here nei ’oia ia tātou ma te maita’i roa. Te fa’a’ite pāpū nei au ē, tē hia’ai mau nei ’oia ’ia ora mau tātou i tōna here ma te rāve’a e ’ite mau tātou ’e e māramarama. ’E te ha’apāpūra’a nehenehe ’oia ho’i e putapū hōhonu fa’ahou atu ā tātou i tōna here nō tātou, ma te fa’a’ite-pāpū-ra’a iāna i tō tātou here. I te i’oa o Iesu Mesia, ’āmene.