Te amora’a i te i’oa o Iesu Mesia

I te matahiti 2018, ’ua hāmani te fare ha’api’ira’a tuatoru nō Utaha i te hō’ē vāhi a’ora’a ta’a ’ē tei pi’ihia te « pūpiti peresidenira’a a te Taote Russell M. Nelson ’e Dantzel W. Nelson i te pūpiti peresidenira’a nō te ihi tāpūra’a māfatu »—cardio, te aura’a « māfatu », ’e thoracic, te aura’a « ’ōuma ». E fa’anahanahara’a te reira i te ’ohipa faufa’a rahi a te peresideni Nelson ’ei taote tāpū māfatu ’e te pāturura’a ’o tāna i fa’ari’i nā roto mai i tāna vahine tei pohe, ’o Dantzel. ’Ua aufauhia teie pūpiti e te hō’ē faufa’a moni tei fa’ata’ahia nō te ananahi. Te ta’ata tei mā’itihia nō teie huru vāhi a’ora’a fa’ahiahia, ’ua fa’ari’i i te ha’amāuruurura’a, te tauturu i te pae aufaura’a ’e te faufa’a moni nō te mā’imira’a.

Te ta’ata tāpū mātāmua tei mā’itihia nō te ti’a i teie pūpiti ’o te Taote Craig H. Selzman ïa, hō’ē taote tāpū māfatu ’aravihi e ’ere i te melo nō te ’ēkālesia. I te ’ōro’a o te ha’amāuruurura’a i teie vāhi a’ora’a nō te taote Selzman, ’ua tae mai e rave rahi manihini faufa’a roa, ’oia ato’a te peresideni Nelson ’e tāna vahine te tuahine Wendy W. Nelson. I roto i te ’ōro’a, ’ua parau te peresideni Nelson ma te au maita’i i tōna tōro’a pionie nō te tāpūra’a.

I muri iho ’ua fa’a’ite mai te Taote Selzman i te aura’a nōna ’ia nōminohia nō teie vāhi a’ora’a. ’Ua fa’ati’a mai ’oia ē e maha mahana nā mua atu, i muri a’e i te hō’ē mahana roa i roto i te piha tāpūra’a, ’ua ’ite mai ’oia ē e tāpū-fa’ahou-hia hō’ē o tāna mau ta’ata ma’i. ’Ua rohirohi roa ’oia ’e te māuruuru ’ore, i te ’itera’a e ti’a iāna ’ia fa’aea fa’ahou ā hō’ē pō i te fare ma’i.

I taua pō ra, ’ua fa’ari’i te Taote Selzman i te hō’ē ’āparaura’a ’ōroto iāna ’o tei fa’ataui i tōna orara’a. I te reira taime, ’ua mana’o ’oia : « Mahana pae, e nominohia vau i te pūpiti tei pi’ihia te Taote Nelson ’Ua mātau-noa-hia ’oia [te Taote Nelson] mai te hō’ē ta’ata hitahita ’ore, ’o tē fa’atura nei i te ta’ata ato’a ’e nō tōna ’āueue ’ore. I teienei e natihia tō’u i’oa i tōna, e ti’a iā’u e tūtava ’ia riro mai iāna te huru ». ’Ua riro a’ena te Taote Selzman ’ei taote tāpū ha’apa’o maita’i roa. Terā rā tē hina’aro nei ’oia ’ia riro ’ei mea maita’i atu ā.

Nā mua a’enei, ’ua ’ite maita’i tāna pupu tāpū i tōna rohirohi ’e tōna ’āehuehu, nō te mea ’ua fa’a’ite mai ’oia i te reira nā roto mai i tōna huru ’e tōna ta’ira’a reo. I roto rā i te piha tāpūra’a i taua pō ra, ’ua tūtava te Taote Selzman i te turu ’e i te hāro’aro’a i tāna pupu. ’Ua ’ite ’oia i roto iāna i te hō’ē ta’a-’ē-ra’a o te reira ’e ’ua fa’aoti e tāmau noa i te tūtava nō te riro hau atu ā mai te Taote Nelson

E pae matahiti i muri mai, ’ua pūpū atu te peresideni Nelson i tāna mau ’ohipa tōro’a i te fare ha’api’ira’a tuatoru nō Utaha. ’Ua haere mai te feiā tōro’a nō te fare ha’api’ira’a tuatoru e ha’amāuruuru mana i te peresideni Nelson. I roto i teie ’ohipa i tupu, ’ua parau fa’ahou te Taote Selzman. Ma te fa’atoro i te ti’ara’a reta i’oa o te peresideni Nelson, RMN, ’ua nā ’ō ’oia, « tē vai nei hō’ē ’ite morare ‘RMN’ i teienei nō te ihi tāpūra’a māfatu i te fare ha’api’ira’a tuatoru nō Utaha.

I roto i te tupura’a ’ohipa fa’a’ere, ’ua fa’ata’a mai te Taote Selzman : « Tē rave nei au i te mea tā mātou e ha’api’i nei i teienei i tā mātou feiā ha’api’ipi’i—’ia tūtonu, ’ia fa’a’oroma’i ’e ’ia rave maita’i a’e i tā ’outou e nehenehe. Tē ora nei teie ’ite morare i roto ia tātou i te mau mahana ato’a. Tē hōro’a nei mātou i te mau pine i te melo tāta’itahi o te tuha’a ’e i te ta’ata ha’api’ipi’i ’āpī tāta’itahi. I raro i te pine tē vai nei te mau reta ‘RMN’. Te ’ite morare RMN ’o te niu ïa nō tā mātou ha’api’ipi’ira’a ; tē ha’api’i nei mātou i te reira i te tā’āto’ara’a ». ’Ua hina’aro mau te Taote Selzman e ha’amaita’i i tōna huru ’e tōna mau hina’aro nā mua a’e, nō te mea ’ua natihia tōna i’oa i teienei i te i’oa o te peresideni Nelson.

Teie ’āna’ira’a ’ōro’a nō te ōra’a atu te Taote Selzman, ’ua hōro’a mai iā’u i te ui iā’u iho, « nāhea vau i te tauihia mai te taime ’a nati ai au i tō’u i’oa i te i’oa o Iesu Mesia ? ’Ua tāvai ānei au i te hō’ē ’ite morare huru Mesia ’ei hō’ē hope’ara’a ? ’Ua tāmata mau ānei au nō te riro maita’i a’e ’e ’ia riro hau atu mai iāna te huru ? »

I roto i te ’ohipa i orahia mai e te Taote Selzman, e nehenehe tātou e hi’o e pae a’e tū’atira’a ’e te ’ohipa tau maoro, nā roto i te reira tātou e rave ai i ni’a ia tātou iho i te i’oa o Iesu Mesia. Noa atu ē e ha’amata teie ’ohipa tau maoro nā roto i te bāpetizora’a, e oti te reira i te taime e riro ai tātou e mea mā a’e ’e e mea mo’a a’e ’e ’ia riro hau a’e mai iāna te huru.

Te tū’atira’a mātāmua ’o te fa’aaura’a ïa. Te nominora’a o te Taote Selzman i te vāhi a’ora’a Nelson ’ua nati i tōna i’oa i tō te peresideni Nelson, ’e ’ua ha’amata te Taote Selzman i te fa’aau iāna i te peresideni Nelson. ’Ia rave ana’e tātou i ni’a ia tātou i te i’oa o Iesu Mesia, e nati tātou i tō tātou i’oa ’e tōna. E fa’aau tātou ia tātou iāna. E ’oa’oa tātou ’ia ’itehia mai tātou ’ei keresetiano. E ’ite pāpū tātou i te Fa’aora ’e e ti’a atu ma te taiā ’ore ’ia fa’arirohia ’ei nōna.

Te tahi atu tū’atira’a piri i te fa’aaura’a—te ha’amana’ora’a. ’Ia tomo ana’e te Taote Selzman i roto i tāna piha tōro’a e ’umehia tōna nā mata e te feti’a, ’o tāna i fa’ari’i i te taime ’a nominohia ai ’oia nō te vāhi a’ora’a Nelson. E fa’aha’amana’o teie feti’a iāna i te mau mahana ato’a i te ’ite morare o te RMN. Nō tātou, te ravera’a i te ’ōro’a mo’a i te hepetoma ato’a, e tauturu ia tātou ’ia ha’amana’o noa ia Iesu Mesia i te roara’a o te hepetoma. ’A rave ai tātou i te ’ōro’a mo’a, tē rave nei tātou ma te ha’amana’o i te ho’o ’o tāna i aufau nō te fa’aora ia tātou. E fafau fa’ahou tātou ’ia ha’amana’o noa iāna, ’ia ta’a maita’i i tōna fāito rahi ’e ’ia māuruuru i tōna maita’i. E ’ite tāmau tātou ē, mea nā roto noa i tōna aroha tātou e fa’aorahia ai i te pohe pae tino ’e i te pohe pae vārua.

Te aura’a o te ha’amana’ora’a, e pe’e tātou i te parau a’o tei hōro’ahia mai e Alama te peropheta o te Buka a Moromona. « Te mau mea ato’a tā [tātou] e rave ra, ’ia ravehia ïa nō te Fatu ra, ’e te mau vāhi tā [tātou] e haere, ’ia haerehia ïa nā roto i te Fatu ra ; […] ’ia vai māite tō [tātou] mana’o i te Fatu ra […] ’ia tu’uhia te aroha o tō [tātou] ’ā’au i ni’a i te Fatu ra ē a muri noa atu ». ’Oia ato’a ’ia ’ohipa-rahi-ana’e-hia tātou e te tahi atu mau mea, e vai noa ’oia i roto i tō tātou ferurira’a, mai tā tātou e ha’amana’o i tō tātou iho i’oa, noa atu te huru o te mea o tā tātou e rōtahi ra.

Te ha’amana’ora’a i te mea tā te Fa’aora i rave nō tātou ’o te toru ïa o te tū’atira’a e tupu mai—te nā-ni’a-ra’a ’Ua ha’amata te Taote Selzman i te nā ni’a a’e i te peresideni Nelson ’e i te ’ite morare RNM Tē ti’aturi nei au ē, te ’ite morare o te peresideni Nelson ’o te hō’ē fa’a’itera’a ’ōhie ïa o tōna orara’a ’ei ti’ara’a pipi nā Iesu Mesia. Nō tātou, hau atu ā tātou i te fa’aau ia tātou ’e i te ha’amana’o ia Iesu Mesia, hau atu ā tātou i te hina’aro i te riro mai iāna te huru. ’Ei mau pipi nāna, e taui tātou nō te maita’i a’e ’ia rōtahi ana’e tātou i ni’a iāna, hau atu ā ’ia rōtahi ana’e tātou i ni’a ia tātou iho. E tūtava tātou ’ia riro mai iāna te huru ’e e tītau ’ia ha’amaita’ihia ma tōna mau huru. Tē pure nei tātou ’ia fa’a’īhia i te aroha, te here mau o te Mesia.

Mai tā te peresideni Nelson i ha’api’i i te ’āvae ’Ēperēra : « ’A riro ai te aroha ’ei tuha’a nō tō tātou nātura, e mo’e tō tātou hina’aro e fa’a’ino ia vetahi ’ē. E fa’aea tātou i te ha’avā ia vetahi ’ē. E fa’a’ite tātou i te aroha mau nō te ta’ata, nō te mau huru orara’a ato’a. Te aroha i te ta’ata ato’a … e mea faufa’a nō tō tātou haerera’a i mua. Te aroha ’o te niu ïa o te hō’ē huru atuara’a ». Te tū’atira’a i te aroha, e ’imi tātou, « i te tanu […] ’e i te fa’ananea » i te tahi atu mau hōro’a pae vārua o te Fa’aora, ’oia ho’i te parauti’a, te fa’a’oroma’i ’e te itoito.

Te pe’era’a ia Iesu Mesia e arata’i atu ia tātou i te maha o te tū’atira’a—te ’āna’ira’a atu ’e tāna mau fā. E ’āmui atu tātou iāna i roto i tāna ’ohipa. ’Ei taote tāpū, ’ua ’itehia te Taote Nelson mai te hō’ē ’orometua, te hō’ē fa’aora ’e te hō’ē ta’ata mā’imi. Te pine tāpa’o tei fa’a’ohipahia i roto i te ’āma’a a te Taote Selzman, e ha’apāpū nei i teie mau tauto’ora’a, ma te mau ta’o ha’api’i, fa’aora, ’e ’ite mai. Nō tātou, te ravera’a i ni’a ia tātou iho i te i’oa o Iesu Mesia ’oia ho’i ïa te ’āna’ira’a i tā tātou mau fā i ni’a i tāna, ma te hina’aro mau, te pāpū maita’i ’e ma te ’oa’oa. E ’āmui atu tātou iāna i roto i tāna ’ohipa, « ’ia here, ’ia fa’a’ite ’e ’ia ani manihini ». E ’āmui atu tātou iāna i roto i tāna ’ohipa, ’ia aupuru ana’e tātou ia vetahi ’ē, i pīha’i iho ihoā rā i te feiā pāruru ’ore, ’e te feiā ’o tei ha’apēpēhia, tei vāvahihia ’aore rā tei ha’amouhia e tō rātou mau ’itera’a i te fenua nei.

E rave hau atu ā tātou i ni’a ia tātou i te i’oa o Iesu Mesia nā roto i te ’ite-pāpū-ra’a, te ha’amana’ora’a, te nā-ni’a-ra’a ’e te ’āna’ira’a atu. Teie nā ravera’a e maha e arata’i atu ia tātou i te pae o te tū’atira’a—te mana. E noa’a ia tātou te mana ’e te mau ha’amaita’ira’a a te Atua i roto i tō tātou orara’a. Tē pūpū nei te vāhi a’ora’a Nelson i te Taote Selzman i te ha’amūruurura’a ’e te turu i te pae faufa’a ’o tāna e fa’a’ohipa nei nō te taui i te ta’ere i roto i tāna tuha’a. ’Ua fa’a’ohipa ’oia i teie « hōro’a o te mana » nō te tauturu ia vetahi ’ē. Hō’ē ā huru, ’ia rave ana’e tātou i ni’a ia tātou i te i’oa o te Fa’aora, e ha’amaita’i te Metua i te ao ra ia tātou i tōna mana, nō te tauturu ia tātou ’ia rave fa’aoti i tā tātou misiōni i te tāhuti nei.

’A rave ai tātou i te mau fafaura’a hau atu ’e te Atua, tē rave ra ïa tātou hau atu ā i ni’a ia tātou i te i’oa o Iesu Mesia. Nā roto i te reira, e ha’amaita’i hau mai te Atua ia tātou i tōna mana. Mai tā te peresideni Nelson i ha’api’i : « Te mau ta’ata ato’a e rave i te mau fafaura’a i roto i te vāhi bāpetizora’a ’e i roto i te hiero—’e e ha’apa’o i te reira—e fa’ana’o rahi rātou i te mana o Iesu Mesia […] Te tao’a hōro’a nō te ha’apa’ora’a i te mau fafaura’a ’e te Atua ’o te mana ïa nō te ra’i […]te mana e ha’apūai ia tātou nō te fa’aruru maita’i a’e i tō tātou mau tāmatara’a, mau fa’ahemara’a, ’e mau māuiui o te ’ā’au ».

E riro tātou i te ara rahi mai ā i te pae vārua E roa’a ia tātou te itoito rahi nō te fa’aruru i te mau huru tupura’a e au ra e’ita e mara’a ? E ha’apūai-rahi-hia tātou i roto i tā tātou fa’aotira’a ’ia pe’e ia Iesu Mesia. E tātarahapa ’oi’oi roa tātou ’e e ho’i iāna ra ’ia rave ana’e tātou i te hara. E riro tātou e mea maita’i a’e i te fa’a’ite atu i tāna ’evanelia ma tōna mana ’e te ha’amanara’a. E tauturu tātou i te feiā tei hina’aro i te tauturu ma te ha’avā ’ore, ma te ha’avā ’ore roa. E tāpe’a noa tātou i te fa’a’orera’a o tā tātou mau hara. E fana’o tātou i te hō’ē hau rahi a’e ’e e ’oa’oa rahi a’e tātou, nō te mea e nehenehe noa tātou e ’oa’oa. E hā’atihia tātou e tōna hanahana ’e e vai ara noa tāna mau melahi i ni’a ia tātou.

Tē tītau manihini nei te Fa’ora ia tātou, « ’ia haere mai i te Metua i roto i tō’u nei i’oa, ’e ’ia fāri’i i tōna ’īra’a i te tau i ha’apa’ohia ». Tē ti’aoro nei au ia ’outou ’ia rave i te reira. ’A haere mai i tō tātou Metua i te ao ra. ’A rave i ni’a ia ’outou iho i te i’oa o Iesu Mesia. ’A ’ite pāpū iāna. ’A ha’amana’o noa iāna. ’A tūtava i te riro mai iāna te huru. ’A ’āmui atu i roto i tāna ’ohipa. ’A fa’ari’i i tōna mana ’e te mau ha’amaita’ira’a i roto i tō ’outou orara’a. ’A nana’o i tōna i’oa i roto i tō ’outou māfatu, ma te hina’aro mau ’e te pāpū maita’i. E hōro’a te reira ia ’outou i te « ti’ara’a » i mua i te Atua ’e ’ia fa’ata’ahia ’outou nō te pārurura’a a te Fa’aora nā ni’a i tō ’outou i’oa. E riro mai ’outou ’ei ta’ata ’āi’a fa’ateiteihia i roto i te bāsileia o tō tātou Metua i te ao ra, ’ei ’aifaufa’a ’e tāna Tamaiti fānau tahi, tō tātou Fa’a’ora ’e Ora here.

Tē ora nei ’oia. ’Ua ’ite maita’i au i te reira. ’Ua here ’oia ia ’outou. ’Ua hōro’a ’oia i tōna ora nō ’outou. Tē tāparu nei ’oia ia ’outou ’ia haere mai i te Metua ra nā roto iāna. I te i’oa o Iesu Mesia, ’āmene.