Tē rave ’oi’oi nei te Fatu i tāna ’ohipa

’Ua ha’amata ’o Charles Dickens i tāna ’ā’amu moeānihi tu’iro’o Le conte des deux cités [Te ’ā’amu nō nā ’oire e piti] ma teie fa’a’itera’a pāpū ē « ’o te tau maita’i roa a’e, ’o te tau ’ino roa a’e. » ’Ia ferurihia, e parau mau teie i tō tātou nei ’anotau.

Tē ora nei tātou i te hō’ē tau ’āhoahoa ’ua « ’ārepurepu roa te ao pā’āto’a nei. » ’Ua tūra’i-nehenehe-hia te a’o a te peresideni Russell M. Nelson ’ia riro tātou te feiā ’āpe’e ia Iesu Mesia ’ei feiā fa’atupu hau, e Elder Gary E. Stevenson i teie po’ipo’i. E tuha’a faufa’a tumu teie nō te fa’aitoito i te parau nō te hō’ēra’a, te hau ’e te fa’aorara’a māuiui i te « tau ’ino roa a’e. »

Tē ora ato’a nei tātou i roto i « te tau maita’i roa a’e », ’o tā’u ïa e vauvau atu. I roto i te ’ōmura’a parau o Te Ha’api’ira’a Tumu ’e te mau Fafaura’a, i te tuha’a 1, ’ua fa’a’ite te Fatu nō te ’īra’a o te ’evanelia e « porohia atu […] i te mau hope’a o te ao nei. » Tē rave ’oi’oi mau nei te Fatu i tāna ’ohipa i tō tātou nei tau. E mea tano tātou ’ia māuruuru roa ’ino nō te rave-’oi’oi-ra’a, ’o tei tupu ’e ’o tē tupu nei noa atu teie mau tau fifi. Tē ora nei tātou i te hō’ē mahana ’ua fāna’o te feiā ’āpe’e i te Fatu i te fa’aro’o i tōna reo ’e i te pāhono ma te ’ā’au māhorahora ’e te ferurira’a matara. Tē ’ite nei te mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, tei pūpū ia rātou i te Fa’aora ’e i tāna mau fa’auera’a, i te tumu ’e te hau hōhonu nō rātou.

I terā ’e terā tau o te ’ā’amu o te ’Ēkālesia, ’ua ’itehia te mara’ara’a rahi i roto i te feiā e tomo i ni’a i te ’ē’a nō te fafaura’a. E tau mai te reira tei ’itehia mai te matahiti 1837 ē i te matahiti 1850. E mau ’āpōsetolo mātāmua nō te ’Ēkālesia a te Fatu i fa’aho’ihia mai tei tāvini i te misiōni i te fenua Peretāne. I te hope’a o teie mau misiōni, tau tauatini ta’ata tei ’āmui mai i roto i te ’Ēkālesia, ’e ’a tae atu ai i te matahiti 1850, e rahi a’e te mau melo o te ’Ēkālesia e ora i te fenua Peretāne, i te Fenua Marite. I taua tau ra, ’ua fa’aue te Fatu i teie feiā mo’a ’ia putuputu i Utaha. E pu’e ta’ata tei reva ’ē atu, vetahi tei turuhia e te tārahu i te ’āfata tāmau nō te reva-’ē-ra’a.

E mea au nā’u te fa’ati’ara’a nō te tāpaera’a i te ’āfa’a nō Roto Miti te naho’a feiā fa’afāriu nō nā pae rōpū ē apato’a, ’e te tō’o’a o te rā nō Peretāne, i te matahiti 1852 ra. ’Ua fa’ari’ihia te pupu e te Peresidenira’a Mātāmua i te tomora’a o te fa’a tāhoni ra Emigration Canyon, ’āpe’ehia e te pupu ’upa’upa a Tāpena Pitt. ’Ua pāpa’i te Deseret News nō rātou ē « e pupu rātere mo’a [ma te] mau tuahine ’e te mau tamari’i, tei nā raro, tei pa’apa’ai te mahana ’e tei tā’irihia e te reva, ’aita rā e autāmū ; e ’ā’au māmā tō rātou ’e te ’ana’anatae, tei ’ite-pāpū-hia i ni’a i tō rātou mata ’ata’ata ’e te ’oa’oa. »

’A « nā mua ai rātou i te pū fare o te hiero […] ’ua putuputu tau tauatini tāne ’e vahine ’e tamari’i, mai te mau tuha’a rau o te ’oire, nō te tāhō’ē i teie mānavara’a hanahana ’e te ’oa’oa. » ’Ua paraparau te peresideni Brigham Young ia rātou : « ’Ia ha’amaita’i te Fatu te Atua nō ’Īserā’ela ia ’outou […] ’Ua pure tāmau mātou nō ’outou : e rave rahi tauatini pure tei pūpūhia nō ’outou, i terā mahana ’e terā mahana, iāna tei fa’aue ia tātou ’ia ha’aputuputu ia ’Īserā’ela, ’ia fa’aora i te mau tamari’i a te ta’ata nei nā roto i te porora’a i te ’evanelia, ’e ’ia fa’aineine ia rātou nō te taera’a mai o te Mesia. »

I roto i te vārua o terā taime ’oa’oa rahi, e ha’apāpū fa’ahou atu vau i te feiā fa’afāriu ’āpī ato’a, ’e i te feiā e ho’i mai nei i te ’Ēkālesia a te Fatu : ’Ua here mātou ia ’outou ; ’ua hina’aro mātou ia ’outou ; ’ua hina’aro te Fatu ia ’outou. E’ita paha mātou e mānava ia ’outou ma te porotē a te ’upa’upa, tē pure nei rā mātou ’ia pa’epa’e te mau ha’amaita’ira’a o te ra’i i tā ’outou mau tauto’ora’a nō te haere i mua i ni’a i te ’ē’a nō te fafaura’a, ’o tē arata’i atu i te Atua te Metua ’e ia Iesu Mesia i te bāsileia tiretiera.

Tē vai nei te fa’a’itera’a pāpū ē tē mara’a ra te fa’aro’o ia Iesu Mesia i tō tātou nei ’anotau. I roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ua ’itehia te mara’ara’a fa’ahiahia o te feiā fa’afāriu ’e tā rātou ’ohipara’a. I nā ’āva’e e 36 i ma’iri, fātata i te 900 000 feiā fa’afāriu tei ’āmui mai i te ’Ēkālesia. Fātata roa te tuha’a o teie feiā fa’afāriu e 5 i ni’a i te hānere o te tā’āto’ara’a o te mau melo o te ’Ēkālesia. Tē mānava nei mātou i te mau melo ’āpī ma te rima fa’ari’i ’e te māuruuru hōhonu nō te ’ē’a tā rātou i mā’iti.

’Ua hau atu teie 900 000 feiā fa’afāriu o nā ’āva’e e 36 i ma’iri i te tā’āto’ara’a o te mau melo o te ’Ēkālesia i te ’ōro’a nō te 110ra’a matahiti nō 1940, tei hau ri’i noa atu ïa i te 860 000 melo. ’O te matahiti ïa mātou Elder Jeffrey R. Holland ’e ’o Elder Dieter F. Uchtdorf te fānaura’ahia.

Nā te mau tuha’a ato’a o te ao nei teie nau feiā fa’afāriu ’āpī ’e te fa’ahiahia. I nā ’āva’e mātāmua e ono o teie matahiti, ’ua maraa’a te fa’afāriura’a, ’ua hau atu i te 20 i ni’a i te hānere, ’ia fa’aauhia i te matahiti i ma’iri, i Europa, ’Āfirita, ’Ātia, Pātifita ’e Amerika Rātino. I Amerika Apato’erau ’ua ’itehia te mara’ara’a e 17 i ni’a i te hānere. Tē tāmau nei te ’ohipa a te Fatu i te haere i mua ma te rāve’a pūai rahi. E fa’a’itera’a pāpū teie mau nūmera mara’a ē tē ha’aputapū nei te ’evanelia i te mau ’ā’au ’e te taui nei i te mau orara’a i te mau vāhi ato’a.

I tō tātou nei ’anotau, ’aita teie feiā fa’afāriu e putuputu fa’ahou i te hō’ē vāhi pū. Nō te fa’aro’o ’e te ha’amo’ara’a o te mau melo o te ’Ēkālesia, tē vai nei te mau rāve’a nō te turu i te mau ’āmuira’a—mai te patura’a i te mau fare pure ’e te mau hiero—’ati a’e te ao nei. Maoti te mau tāviri autahu’ara’a e tītauhia ’e te mau rāve’a e fa’afāna’ohia, e noa’a i teienei te mau ’ōro’a fa’aora i te rahira’a o te mau tuha’a o te ao nei.

Noa atu ā te vāhi tā tātou e ora nei, tītauhia i te mau melo nei ’ia mānava i te hānerera’a tauatini melo ’āpī mai tā tātou i rave nō te feiā mo’a nō Peretāne i te mātāmua ra, mai tā’u i fa’ati’a i te ’ā’amu. ’Ua au roa vau i te a’ora’a a Elder Gerrit W. Gong i roto i teie tuha’a purera’a, ’ua ha’api’i mai ’oia ia tātou ’eiaha te hō’ē ’ia pārahi ’āta’a i te pae manava ’e i te pae vārua.

Nā tātou te hōpoi’a mo’a e fa’ari’i ’e e mānava i te mau melo ’āpī ’e rātou e ho’i mai nei. ’A rave ’oi’oi ai te Fatu i tāna ’ohipa, e mea tano tātou ’ia here, ’ia aupuru ’e ’ia tāvini i te feiā e fa’ari’i i tāna ’evanelia. E nehenehe tātou e tauturu i te patu i te ta’ata nō Ziona, i te vāhi tei reira tātou « hō’ē ā […] ’ā’au ’e hō’ē ā […] ferurira’a, ’e ’ua ora noa […] ma te parauti’a. » ’Ia hō’ē tātou ’e te Fatu, tītau-roa-hia ia hō’ē tātou i mua iāna. E hōpoi’a ’āmui nō te mau melo ato’a, noa atu ā te tai’o mahana bāpetizora’a, ’ia mānava i te tahi.

Tā’u nei parau a’o i te mau melo nō te ’Ēkālesia, ’oia ho’i e tauahi i tō tātou rima ’ati a’e i teie mau ta’ata tao’a rahi ’e tei mā’itihia, ’o tei fa’ari’i i te ’evanelia a Iesu Mesia.

’Ua ha’api’i te peresideni Gordon B. Hinckley ia tātou ē e tītauhia nō te feiā fa’afāriu ’āpī « hō’ē hoa, hō’ē hōpoi’a ’e ’ia fa’a’amuhia i ‘te parau maita’i a te Atua’ (Moroni 6:4). » E ti’a ia tātou ’ia ti’a i rotopū i te mau hoa ’o tē ha’apāpū i teie nau feiā fa’afāriu ’āpī ē e tā’amura’a tō rātou ’e e ’ere rātou i te manihini noa. E nehenehe tātou e tauturu ia rātou ’ia māramarama ē e pipi rātou nā Iesu Mesia ’o tē nehenehe e aupuru i te tahi ’e e fa’ari’i i te mau pi’ira’a ’ia tāvini. E mea tano te feiā ’āpī fa’afāriu ’ia ’ōpua e tāvini i te hō’ē misiōni rave tāmau. E mea tano te tā’āto’ara’a ’ia fa’aoti pāpū e tūtava i te ora i te hō’ē orara’a mai te Mesia te huru.

E rave rahi e ’āmui nei i te ’Ēkālesia ma te tūsia rahi nō rātou ’e te hina’aro rahi roa i te here ’e i te pāturu a tō rātou hoa feiā mo’a.

’Outou te ta’ata ’āpī ’aore rā ’outou tē ho’i mai nei i te fa’aro’o, e mau fifi paha tā ’outou e fa’aruru. ’A fa’a’oroma’i ia ’outou iho. ’Ua ha’api’i te mau misiōnare ia ’outou i te ha’api’ira’a tumu ’e ’ua fa’ata’a atu i te mau fafaura’a ’e te mau ’ōro’a o te bāsileia tei vauvauhia i roto i te mau pāpa’ira’a mo’a ’e i roto i te ’Ia poro haere i tā’u nei ’Evanelia.

E mea faufa’a tumu ’ia fa’ari’i i te mau ’ōro’a ’e i te mau fafaura’a ’e ’ia ora i te mau fa’auera’a. ’A rōtahi i ni’a i te mau fafaura’a tei tītauhia nō te fa’ateiteira’a. Nā roto i te ’evanelia e matara ai te fa’ateiteira’a, ’o tē tītau i te ravera’a ’e i te ha’apa’ora’a i te mau fafaura’a mo’a ’e te Atua. Ta’a ’ē atu te bāpetizora’a, te ha’amaura’a ’e te hōro’ara’a i te Autahu’ara’a a Melehizedeka i te mau tāne, e ravehia te mau fafaura’a tā tātou e tomo atu, i roto i te hiero. Nō te feiā i pohe, e rave-noa-hia teie mau ’ōro’a fa’aora i roto i te hiero. Nō reira, e mea tano ’ia riro te fa’aineinera’a ia ’outou nō te hiero ’ei fā i reira ra.

I te tahi taime e tupu tō ’outou mana’o tū’ati ’ore i te mea tā ’outou i ’ite. E ha’amaita’ira’a rahi te ’ite nō te ’evanelia ’o tē noa’a rahi mai i te roara’a o te tau, e ’ere rā i te ’ōro’a fa’aora. E ’ere te ’evanelia i te hi’opo’ara’a nō te ’ite. Terā rā ’ua parau fafau te peresideni Nelson : ’Ua fafau mai te peresideni Russell M. Nelson ē : « ’Ia tuatāpapa ’outou i te Buka a Moromona nā roto i te pure i te mau mahana ato’a, e rave ïa ’outou i te mau fa’aotira’a maita’i a’e—i te mau mahana ato’a […] ’Ia feruri māite ’outou i tā ’outou i tuatāpapa, e matara mai te mau ha’amāramarama o te ra’i ’e e fāri’i mai ’outou i te pāhonora’a i tā ’outou iho mau uira’a ’e te arata’ira’a nō tō ’outou iho orara’a. »

Hau atu, i te matahiti tāta’itahi, e fa’a’ohu te fa’anahora’a ha’api’ira’a a te ’Ēkālesia nō te mau rurura’a i te Sābati nō te ha’api’i i te Faufa’a Tahito, te Faufa’a ’Āpī, te Buka a Moromona ’e Te Ha’api’ira’a Tumu ’e te mau Fafaura’a. I te roara’a o te tau e pāpū atu ā ’outou ’a rahi ai tō ’outou ’ite o te ’evanelia. E ha’amaita’i ’e e fa’atao’a te ’imira’a tāmau i te mau pāpa’ira’a mo’a i tō ’outou orara’a, i te fa’ahōhonu-atu-ā-ra’a i tō ’outou fa’afāriura’a i te ’evanelia a Iesu Mesia.

Te ha’api’ira’a i te ha’api’ira’a tumu ateate a Iesu Mesia, e tītaura’a ïa nō te orara’a tā’āto’a, nō te māramaramara’a i te ha’api’ira’a tumu ’e nō te orara’a i te orara’a mai te Mesia te huru. E hōro’a te mau fafaura’a tumu i te pu’e ture tā tātou e fa’ahōho’a nei i te ’ē’a nō te fafaura’a. ’Ua ha’api’i-pūa’i-hia teie mau parau tumu e te peresideni Nelson. E ha’amaita’ihia te tā’āto’ara’a o te mau melo, te mea ’āpī iho ā rā ’e te feiā e ho’i mai nei, nā roto i te ha’api’ira’a ’e i te fa’a’ohipara’a i tāna mau a’ora’a peropheta nō ni’a i te mau fafaura’a ’e te ’ē’a nō te fafaura’a.

Mai te mea e ha’amau ’outou i te fā ’ia fa’ari’i ma te ti’a mā i te fafaura’a tāta’itahi tītauhia nō te fa’ateiteira’a, ’ei ni’a ’outou i te ’ē’a e arata’i atu i te bāsileia tiretiera. ’Ia riro te hiero ’e te mau ’ōro’a o te hiero ’ei rōtahira’a nō tātou. ’Ua matara te rahira’a o te mau fafaura’a i te ta’ata tāta’itahi. Hō’ē fafaura’a, te fa’aipoipora’a mure ’ore, e tītauhia ïa ’ia tāhō’ē i tā ’outou tauto’ora’a i te tahi hoa. E fā tano nō tātou ’ia ’imi i terā hoa mure ’ore.

Terā rā, ’eiaha e ha’aparuparu i te mana’o mai te peu ’aita ā te fa’aipoipora’a mure ’ore e nehenehe e tupu i teie taime. ’Ua ha’api’i te mau peropheta ē, ’aita e ha’amaita’ira’a e pāto’ihia i te mau melo ha’apa’o maita’i ’o tē ha’apa’o i te mau fa’auera’a. E peropheta nō te Buka a Moromona, te ari’i Beniamina, tei fa’ahiti nehenehe i te reira : « Te feiā e ha’apa’o i te mau fa’auera’a a te Atua […] ’ua ha’amaita’ihia rātou i roto i te mau mea ato’a […] ’e mai te mea e ha’apa’o maita’i noa rātou ē tae noa atu i te hope’a ra […] e pārahi rātou i pīha’i iho i te Atua i roto i te ’oa’oa hope ’ore ra. »

E ’ite ’outou ē, ’ua ’ite a’ena paha ’outou, ’aita te mau melo i tae i terā fāito maita’i roa. ’Ua ha’apāpū te ha’api’ira’a tumu heheuhia ē, i roto i tō tātou tere i’ō nei i te fenua nei, e hape tātou. Tē ora nei tātou i roto i te hō’ē ao hapehape ’e te hi’a, e ’ere i te ao tiretiera. E tau tāmatara’a teie orara’a, ma te rāve’a tāmau nō te tātarahapa ’e nō te fa’a’ite i tō tātou pūai.

Tātou pauroa tē ’ite i tō tātou tū’ati ’ore ’a tūtava ai i te riro mai ia Iesu Mesia te huru. Maoti tāna tāra’ehara e ti’a ia tātou ’ia tātarahapa i te mahana tāta’itahi ’ia hape tātou. Mai tā Nephi, te tahi fa’ahou peropheta o te Buka a Moromona, i parau : « ’Ia haere māite [tātou] i mua i te ti’a-māite-ra’a i te Mesia, ma te ti’aturi pāpū roa, ’e te here i te Atua e te ta’ata ato’a. Nō reira, mai te mea e haere māite ’outou i mua ma te rave i te fa’a’amu’a i te parau a te Mesia, ’e ma te fa’aitoito ē tae noa atu i te hope’a ra, inaha, tē nā ’ō mai ra te Metua : E fāri’i ’outou i te ora mure ’ore. »

’Ia hi’o tātou i te mau fifi i tō tātou nei ’anotau, tītau-roa-hia ia tātou ’ia ha’amana’o ē ’ua ora ato’a te Fa’aora, i roto i tāna tāvinira’a i te fenua nei, i te tahi tau hue noa ’e te ’āhitahita. E ’ere tāna rōtahira’a i ni’a i te mau fifi poritita o terā tau ; tei ni’a i te ha’amaita’ira’a i te feiā mo’a.

E ’ere iho ā i te mea ’ōhie ’ia pe’e i te Fa’aora ’e i tāna ha’api’ira’a tumu ’e i tāna mau ha’api’ira’a i roto i te hō’ē ao ’ārepurepu tāmau. E ’ere i te mea ’ōhie nō te Fa’aora i roto i te hō’ē ao ’āueue i tōna tere tāhuti nei, e ’ere i te mea ’ōhie nō tō tātou feiā fa’atere ’e te mau melo mātāmua, e ’ere i te mea ’ōhie nō tātou. ’Aua’a a’e te mau peropheta ora e hōro’a nei i te arata’ira’a tei tītau-ta’a-’ē-hia nō tō tātou ’anotau. E tāmau ā te peresideni Dallin H. Oaks i teie faufa’a hōpoi’a pae vārua ’e te mana rahi.

Tē parau pāpū nei au ē e mea mure ’ore ’e te parau mau te ha’api’ira’a tumu a te ’Ēkālesia a Iesu Mesia. Tē hōro’a nei au i tō’u ’itera’a ’āueue ’ore ’e te pāpū ē, tē ora nei Iesu Mesia ’e nō tāna tāra’ehara e nehenehe tātou e hō’ē iāna ra. Nā roto i te i’oa mo’a o Iesu Mesia, ’āmene.