’A fa’atano atu i tō ’oe māfatu ia Iesu Mesia :Te hōro’a mo’a o te pehe Paraimere

E nehenehe ato’a te mau hīmene a te Paraimere e riro ’ei mau mauiha’a pūai nō te ha’api’ira’a i te ha’api’ira’a tumu. Tē fa’ati’a nei te tahi mau hīmene i te mau ’ā’āmu o te orara’a o te Fa’aora ’e tāna misiōni. Te tahi atu e ha’api’i nei i tōna huru, mai tōna fa’aro’o, tōna ti’aturira’a ’e tōna aroha. ’E te mau hīmene mo’a roa a’e e fa’a’ite pāpū nei i tāna tāra’ehara hope ’ore ’e te here ’o te tahe mai nā roto mai i teie ’ohipa o te fa’aorara’a.

’Ua ha’api’i mai te perophetao te Fatu, te peresideni Russell M. Nelson ē : « E nehenehe [te pehe] e fa’atupu i te hō’ē fa’aurura’a maita’i e vai tāmau noa i ’ō atu i te tau tamari’iri’ira’a […] [E] mana [tōna] ’ia fa’a’amu i te pae vārua. E mana tōna nō te fa’aora. [E] mana [tōna] ’ia fa’a’ōhie i te ha’amorira’a, e fa’ati’a te reira ia tātou e hi’o i te tara’ehara [a te Fa’aora] ’e te fa’aho’i-fa’ahou-ra’a mai o te ’evanelia, ’e tāna mau parau tumu o te fa’aorara’a ’e te mau ’ōro’a o te fa’ateiteira’a. E hōro’a mai te pehe ia tātou i te mana nō te fa’a’ite i te mau mana’o o te pure ’e ’ia fa’a’ite pāpū i te mau parau mau mo’a ».

’Ei mau metua, ’ei feiā fa’atere ’e ’ei ’orometua, tē tūtava nei tātou i te tauturu i te mau tamari’i ’ia roa’a teie ha’amaita’ira’a tei parau-fafau-hia, ma te ha’api’ira’a ma te hina’aro mau i te mau parau mau o te ’evanelia e vai ra i roto i te pehe. ’Ua ha’api’i ato’a te peresideni Nelson ē « e nehenehe te mau tamari’i e ha’api’i mai i te ha’api’ira’a tumu ’ia ha’api’i ana’e mai rātou i te hīmene, mai tā rātou e ha’api’i ato’a mai nei i te ha’api’ira’a tumu i roto i te piha ha’api’ira’a ». E nehenehe teie mau hīmene e riro ’ei hō’ē ha’apuna a’ora’a tei ’ī i te fa’aro’o ’o tē fa’ahaere atu i te mau tamari’i i te Fa’aora ra, ’e e tauturu ia rātou ’ia fa’ananea i tō rātou itoito i tāna ’evanelia.

Tē ha’api’i nei te mau pāpa’ira’a mo’a ē, te hīmene a te feiā parauti’a, nō roto mai i te ’ā’au, e puna ïa o te ’oa’oa nō te Fa’aora. E nehenehe noa iā’u e ha’afa’ahiahia i te ’oa’oa tā te mau reo o te mau pipi ’āpī roa a’e a te Fa’aora e hōpoi mai. ’Ua ’ite au e tae tā rātou mau hīmene o te pure i te ra’i, ’ei fa’a’itera’a o te fa’aro’o ’o te ani i te Vārua Maita’i ’ia ha’apāpū mai i te mau parau mau mure ’ore, ’e e ani mārū ’e te maita’i ia vetahi ’ē ’ia fa’ari’i i te pi’i a tō tātou Fa’aora ’ia pe’e iāna ’e ’ia ho’i mai i te fare. Mai tā Elder Henry B. Eyring i fa’aha’amana’o mai ia tātou, tei roto i te reira mau taime ’a putapū ai tātou i te Vārua, tātou e fa’ari’i ai i te ha’apāpūra’a nō te tāra’ehara a te Fa’aora e ’ohipa nei i roto i tō tātou orara’a.

E nehenehe te pehe a te Paraimere e riro ’ei temeio ’o tē ’āpe’e i tā tātou mau tamari’i i te roara’a o tō ratou tere i te pae vārua. Hō’ē hīmene tei ha’api’ihia i te onora’a o te matahiti, e mana tōna ’ia vai mai ia tātou ra—’e e nehenehe e ho’i mai ’ahuru matahiti i muri mai i roto i te mau taime o te fa’aotira’a, te tāmatara’a, te pe’ape’a ’aore rā te ’oa’oa. Penei a’e i roto i te mau matahiti i muri nei, e riro te mau parau « Je veux suivre le plan de Dieu [E ’āpe’e au i te fā] » ’ei tūtau pae vārua ’o tē fa’atāvevo i te ’itera’a pāpū o te ’āposetōlo Paulo nō te pāpūra’a o te parau fafau a te Atua nō tātou. ’Aore rā e fa’aha’amana’o mai ia tātou ē, nō te mea ’ua ha’apa’o te Atua i tāna parau fafau, e pupu mai tāna mau fafaura’a i te tāmahanahanara’a pūai ’e hō’ē ha’apūra’a, ’e e ani ia tātou ’ia tu’u pāpū i tō tātou ti’aturira’a ’e te pāpūra’a i ni’a ia Iesu Mesia ’e i tāna tāra’ehara mana.

Nā te ao ato’a nei, i roto i te mau taime fifi, e ha’amana’o pinepine te mau melo pa’ari i te mau hīmene a te Paraimere tā rātou i ha’api’i mai i te tamari’iri’ira’a. Nō te rahira’a, ’ua turu teie mau hīmene i te patura’a i tō rātou fa’aro’o ia Iesu Mesia ’e ’ua riro pinepine ’ei tuha’a mātāmua nō te ha’amata i te fa’afāriura’a i tāna ’evanelia. ’Ua fa’a’amu te mau metua, te feiā fa’atere ’e te mau ’orometua i teie fa’aro’o i te roara’a o te mau matahiti, nā roto i te ha’api’ira’a, te hīmenera’a ’e te fa’a’ite-pāpū-ra’a i te mau tamari’i ma te hina’aro mau.

’Ua fa’a’ite mai te hō’ē tuahine iā’u, ’ua here roa ’oia i te pehe a te Paraimere ’e i muri a’e e 20 matahiti, tē parau nei ’oia ’ua ha’avitiviti te reira i tōna fa’afāriura’a i te ’evanelia a Iesu Mesia. ’Ua fa’a’ite pāpū te tahi atu melo ē, ’ua ueue te Paraimere i te hō’ē huero tīnapi o te fa’aro’o i tōna ’āpīra’a ’e maoti te reira ’ua nehenehe ia rātou e ho’i mai i te ’Ēkālesia a te Fatu. ’Ua parau fafau te Fa’aora, « nā te Fa’aa’o … e ha’api’i mai ia ’outou i te mau mea ato’a ; ’e e fa’a’ite fa’ahou mai ho’i ia ’outou i te mau parau ato’a ». E nehenehe te pehe a te Paraimere e riro ’ei hō’ē rāve’a nō te rave fa’aoti i teie parau fafau.

Te tahi atu hīmene herehia a te Paraimere e haru mai i te mana o te fa’aro’o ’ōhie ’e te ’itera’a pāpū vai maoro :

’A hīmene ai te mau tamari’i, tē fa’a’ite ra rātou i te hina’aro o te hō’ē pipi ’e e ha’api’i mai i te hōho’a o te orara’a nō te fafaura’a. E fa’a’ohipa te Vārua i te pehe nō te nana’o i te mau parau mau mure ’ore i roto i tō rātou ’ā’au mārū. ’E, i roto i te tau, e nehenehe te mau tamari’i e mā’iti ’ia fāriu atu i tō rātou ’ā’au ’e tō rātou orara’a i ni’a ia Iesu Mesia, ma te ravera’a ’e te ha’apa’ora’a i te mau fafaura’a mo’a ’e ’ōna.

E tauturu te pehe mo’a ’ia pāpa’i i te ha’api’ira’a tumu a te Mesia i roto i te vāirua ’e ’ia fa’aineine ia tātou nō te fa’ari’i i tāna mau ’ōro’a. E tū’ati te reira i te ha’api’ira’a tumu a te Fa’aora i tō tātou mēharo ’e teie mēharo i tō tātou ti’ara’a pipi iāna.

’Ei feiā fa’atere o te Paraimere, e rāve’a nā tātou ’e e hōpoi’a mo’a ’ia vai ara noa ē e ha’api’ihia te pehe i roto i te Paraimere ma te ’oa’oa, ma te hāro’aro’ara’a i te ha’api’ira’a tumu ’e ma te Vārua. Teie ato’a te anira’a i te mau tamari’i ’ia ’ite pāpū i te mea tā rātou e putapū nei ’a hīmene ai rātou, ’e te tauturura’a ia rātou ’ia ’ite ē nō roto mai teie mau nīno’a mana’o i te Vārua Maita’i. E tauturu teie mau tauto’ora’a ’ia fa’aineine i tā tātou mau tamari’i nō te mau ’ōro’a mo’a, mai te bāpetizora’a ’e te ha’amaura’a, ’e ’ia fa’auru ia rātou ’ia ha’amana’o ’a fa’a’āpī tāmau ai rātou i tā rātou parau fafau i te Atua.

I te tāmā’ara’a hōpe’a, i muri a’e ’a ha’amau ai te Fa’aora i te ’ōro’a mo’a, ’ua pāpa’i Mataio ē, « e oti a’era te hīmene, haere atu ra rātou i rāpae i te mou’a ra i Oliveta ». I te hepetoma tāta’itahi, e fa’aineine te mau melo tei bāpetizohia ’e tei ha’amauhia o te ’Ēkālesia a te Fatu tei fa’aho’ihia mai, ’oia ato’a te mau tamari’i tei bāpetizohia ’e tei ha’amauhia mai te va’ura’a o te matahiti, nō te rave i te ’ōro’a mo’a a te Fatu. Nā roto i te hīmenera’a i te pehe mo’a, e rāve’a nā te ’āmuira’a a te mau tamari’i a te Atua ’ia fa’aineine i tō rātou ’ā’au nō teie ’ōro’a mo’a, ’ia amo i tōna ’ioa, ’ia ha’amana’o noa iāna ’e ’ia ha’apa’o i tāna mau fa’auera’a.

Te mau hoa here ē, tē fa’a’ite pāpū nei au ē e ha’api’i te mau hīmene o te Paraimere i te mau parau mau mure ’ore ’e te ha’api’ira’a tumu ’o te arata’i ia tātou ia Iesu Mesia ra ’e i tāna ’evanelia. Tē ani nei au ia ’outou ’ia feruri i te mau parau mau niu ’o tei nana’ohia i roto i tō ’outou ’ā’au maoti te mau ha’api’ira’a ’ōhie o teie mau hīmene ’e ’ia fa’a’ite pāpū i teie mau parau mau i te mau pipi ’āpī a’e a te Fa’aora, ’a ha’api’i ai ’outou ia rātou i te mau parau ’āpī maita’i o te ’evanelia nā roto i te hīmene.

’Ua ’ite au ē, te Atua tō tātou Metua, i roto i tōna here hope ’ore, ’ua tono mai ’oia i tāna Tamaiti here i te fenua nei nō te ha’api’i ia tātou, nō te fa’a’ite ia tātou i te ’ē’a ’e nō te fa’aora ia tātou nā roto i tāna tāra’ehara.

’Ua ’ite au ē, e mea mau te ora ’e te tāvinira’a a te Fa’aora ’e nō te ta’ata iho. ’Ua ’ī te mau pāpa’ira’a mo’a i te mau ’ā’amu o tāna fa’aorara’a, tāna hāmani maita’i ’e tāna mau temeio.

’Ua ’ite au ē, tē fa’aro’o nei ’e tē pāhono nei te Metua i te ao ra i te mau pure ’ā’au tae a tāna mau tamari’i, noa atu te huru o tō rātou matahiti, tō rātou huru orara’a ’aore rā tō rātou reo. Tē fa’aro’o nei ’oia i te fa’atenira’a māmū o tō tātou ’ā’au.

Tē fa’a’ite pāpū nei ē, i Getesemane, ’ua amo Iesu Mesia i te teimaha o tā tātou mau hara, mau ’oto ’e mau māuiui. ’Ua mamae ’oia ma te hina’aro mau nō tōna here ia tātou ’e ’ua fa’ati’a ia tātou ’ia fa’a’orehia tā tātou hapa ’e ’ia ho’i i te fare.

’Ua ’ite au ē, e mau tāmari’i mau tātou nā te Atua, hāmanihia i tōna hōho’a, tei ’ahuhia i te fāito pūai hanahana ’e tei anihia ’ia ho’i nō te ora ’e ’ōna, mai te mea e mā’iti tātou i te pe’e ia Iesu Mesia.

’Ua ’ite au ē, ’o Iesu Mesia tō tātou hi’ora’a parauti’a ’e ’a pe’e ai tātou iāna ma te tāvinira’a, te fa’a’orera’a i te hara ’e te herera’a ia vetahi ’ē, e riro hau atu tātou mai iāna te huru i terā mahana e terā mahana.

’E ’ua ’ite au ē, te mau hiero mo’a a te Fatu ’o tōna ïa mau fare i’ō nei i te fenua nei. I roto i te reira, tē rave nei tātou i te mau fafaura’a mo’a, e fa’ari’i i te mau ha’amaita’ira’a mure ’ore ’e e ha’api’i rahi mai ā nōna ’e e putapū rahi atu ā i tōna vaira’a mai. Te hiero ’o te hō’ē ïa vāhi o te ha’api’ira’a, te hau ’e te fa’aineinera’a nō tō tātou orara’a.

Tē fa’a’ite pāpū nei au ē, te mau tauto’ora’a tā tātou e rave nei nō te ha’api’i ’e nō te hīmene i teie mau hīmene a te Paraimere i tā tātou mau tamari’i, e ’ere noa i te hō’ē tuha’a fa’ahiahia o tā tātou taere ha’apa’ora’a fa’aro’o. E mau a’ora’a teie nā te mau pipi a Iesu Mesia, e mau ’itera’a pāpū o te ’evanelia mau tei fa’aho’i-fa’ahou-hia mai ’e e mau pure tei ha’apehehia. E nehenehe te pehe mo’a e fa’a’ana’ana i te ta’ata fa’aro’o i te māramarama o te Mesia ’e ’ia fa’a’atutu i te reira i roto i te ’ā’au o te ta’ata hīmene. E te mau hoa here ē, tē hina’aro tāmau nei Iesu ’ia riro tātou ’ei hihi mahana. Tē fa’a’ite pāpū nei au i te reira i te i’oa mo’a o Iesu Mesia, ’āmene.