Te hōro’a mure ’ore o te ’itera’a pāpū

ʼUa ’ite ’oia i te mau mea ato’a ’e e manahope tōna. Nā roto i te māramarama o te Mesia ’e te tāvinira’a a te Vārua Maita’i, tei te mau vāhi ato’a tōna fa’aurura’a. E nātura nōna ’ia ha’amaita’i ia tātou.

Tē hi’o nei ’oia i tō tātou tauāhemo, tō tātou tau i teienei, ’e tō tātou hōpe’ara’a mure ’ore. ’Aore e mea e nehenehe e hunahia iāna.

Te anira’a a te peresideni Russell M. Nelson ’ia « feruri tiretiera » e fa’aitoito ia tātou ’ia pe’e i te hi’ora’a ’e te nātura o te Metua i te ao ra.

Aua’a a’e tōna mau huru hanahana, ’ua hōro’a mai te Metua i te ao ra ia tātou i te mau hōro’a maita’i ato’a, te ta’ata tāta’itahi ma tōna hi’ora’a ātea ’e tāna hi’ora’a i roto i tōna ferurira’a.

’O te hōpoi’a ato’a ’ia mā’iti maita’i.

’Ua ’aufau Iesu Mesia i te ho’o hope’a nō teie fāna’ora’a i tōna toto tao’a rahi.

I te tahi taime, e nehenehe tātou e ti’aturi ē te ti’amāra’a te aura’a, ’o te ravera’a ïa i te mea tā tātou e hina’aro. Nō te mea rā ’ua ’aufauhia te ho’o te aura’a ’ua riro te ti’amāra’a ’ei hōro’a mo’a.

E mau ti’a mana tātou, ’e e hōpoi’a nā te mau ti’a mana nō te tahi mea. I roto i teie hi’ora’a, tei ia tātou te hōpoi’a nō te mau mā’itira’a ’o tā tātou e rave nei mai te au i tō tātou ’itera’a ’e te mau hōro’a ’o tei hōro’ahia mai ia tātou. E’ita e nehenehe ia tātou e rave i te hō’ē mā’itira’a ma te ’ore e fa’aruru i te mau hope’ara’a.

Nō te aha e ti’amāra’a tō tātou ?

Nō te mā’iti i te maita’i.

Nō te mā’iti i te Mesia.

Nō te mā’iti i te ora mure ’ore—fa’ahou ’e fa’ahou.

E mea rahi a’e te ’itera’a nā roto mai i te Vārua Maita’i i te hi’ora’a. ’O ’oia te ’ite rahi roa a’e nō te Metua ’e te Tamaiti. ’Ua ha’api’i te peresideni Nelson, « i te mau mahana i muri nei, e’ita tātou e ora mai i te pae vārua mai te peu ’aita te fa’aurura’a arata’i ’e te fa’atere ’e te tāmāhanahana ’e te tāmau a te Vārua Maita’i ».

Te mau taea’e ’e te mau tuahine, teie te tumu e hina’aro ai tātou tāta’itahi i te mana o te Vārua Maita’i i teie mahana.

E nehenehe te hō’ē ’itera’a pāpū nā roto mai i te Vārua Maita’i e tae mai nā roto e rave rau rāve’a. Mai te hō’ē ’amapura mōrī i roto i te hō’ē piha pōiri, e nehenehe te reira e ’ama ta’ue noa. E nehenehe te reira e tae marū mai ’e te tāmau mai te hitira’a mahana. E nehenehe te reira e tae mai mai te mau hihi o te māramarama, hō’ē fa’a’itera’a maumau i te māramarama mā. Noa atu te rau o te rāve’a, e tae mai te reira nā roto i te Vārua Maita’i.

’Ua pa’ari au i Jāmāïka ; e mea ’ārearea ’e te fa’ahiahia. Terā rā, i tō’u ha’amatara’a i te ha’api’ira’a tuarua, ’aita te tahi mau hoa ha’api’ira’a ’e mau hoa tō’u i māramarama i tā’u fa’aotira’a, ’ia riro ’ei hō’ē melo nō te ’Ēkālesia a Iesu Mesia. « Nāhea i tō ’oe te tomora’a atu i roto i teie ’ēkālesia ? » ’ua ui mai rātou. « Nāhea i tō ’oe te ti’aturira’a atu i teie ’ā’amu ? »—nō ni’a i te ’Ōrama Mātāmua. « Nāhea i tō ’oe te tai’ora’a i teie buka ? »—nō ni’a i te Buka a Moromona. « Tē ti’aturi mau ra ānei ’oe i te reira mau mea ato’a ? » ’E « nō te aha ’oe e ha’amau’a ai i tō ’oe orara’a ? »

E mea māuiui te reira, nā roto mai iho ā rā i te mau ta’ata o tā’u i here.

Te mea rā tā rātou i ’ore i ’ite ’oia ho’i : E ’ohipa tei tupu iā’u ’e te Vārua Maita’i. ’Ua fa’a’ī teie ’itera’a pāpū i tō’u ’ā’au, ’ua tamarū te reira i te māuiui o te mau mahana, ’e « nō te hō’ē taime poto noa, ’ua [fā] mai te ra’i i mua i tō’u mata ».

’Ua ui-a’ena-hia paha ’outou i te tahi o teie mau uira’a. Penei a’e, ’oia ato’a i teienei, ’ua uiui-rahi-hia ’outou mai iā’u nei.

E roa’a te hōro’a ’e te ’itera’a o te Vārua Maita’i i te mau ta’ata ato’a.

E au Jāmāïka nō’u mai ia Palmyra nō Iosepha Semita. ’O tō’u ïa uru rā’au mo’a te reira. ’Aita vau i ’ite te vāhi mau i reira Iosepha i te tūturira’a nō te pure i roto i te uru rā’au mo’a, ’ua ’ite mau rā vau tei hea vau ’a riro mai ai tō’u uru rā’au mo’a ’ei mea mau. ’Ua tupu te reira i Four Grove Road, Mandeville, Jāmāïka, i roto i tō’u vāhi haumitira’a, i te hora 6 i te po’ipo’i i te hō’ē mahana toru, e toru matahiti i muri a’e i tō’u bāpetizora’ahia. ’Ua tupu teie ’ohipa mo’a nō te mea e piti hepetoma nā mua atu, ’ua ani manihini mai te hō’ē tuahine misiōnare fa’auruhia iā’u ’ia tai’o i te Buka a Moromona. ’Ua ’āmui mai te tuahine Audrey Krauss i teie ’āmuira’a i teie mahana ’e tōna ’utuāfare, ’e ’ua here roa vau iāna.

ʼUa taui teie ʼohipa i tupu iāʼu.

Te mau taea’e ’e te mau tuahine, ’aita te ’itera’a pāpū e hōro’ahia nō te hō’ē fa’a’ohipara’a poto noa. Teie hōro’a a tō tātou Metua here i te ao ra e au ra e mea mure ’ore, nō te mea te ta’ata hōro’a i te reira e mea mure ’ore ’oia. ’Aita e tai’o mahana hope’a tō te hō’ē ’itera’a pāpū. ’Aita e ti’a i te reira ’ia paruparu ’aore rā ’ia iti mai nō te mea ’ua taui te tahi ’ohipa i roto i tō’u orara’a ’aore rā ’ua taui te tahi mea i roto i te ao nei. E ti’a i te reira ’ia ha’apūaihia nō te mea, mai te tāvini i roto i te parabole nō te mau tārēni, ’ua riro tō’u iho ’itera’a pāpū ’ei hōro’a ’ia fa’arahihia—’eiaha rā ’ia hunahia.

’Ia hi’ohia i muri, ’ua tauturu teie mau mahana fifi o te tāmatara’a ’e o te hāmani-’ino-ra’a ’o tā’u i fa’aruru i te tamari’ira’a, ’ia tāpa’e atu i te vāhi ’ua ’ite au i teienei nō’u iho. ’Aita vau i vare noa, i tīa’i, ’aore rā, i ti’aturi, noa atu e mau tuha’a faufa’a rahi te reira nō te fa’aro’o i ni’a i te ’ē’a o te hō’ē ’itera’a pāpū. Tē ha’apoupou nei au ia ’outou i te ravera’a i tō ’outou iho ’ē’a ma te uira’a i te mau uira’a, te ’imi-maite-ra’a, te purera’a, te ha’apaera’a i te mā’a ’e te feruri-maite-ra’a. ’A tāmau ā. E ti’a i te mau tauto’ora’a ato’a ’ia ravehia nō te haere tāmau noa i ni’a i teie ’ē’a o te ’itera’a pāpū. ’O vai ’aore rā e aha tā ’outou e fa’ati’a ’ia ’ōpani ia ’outou i te reira ? « E aha te ’itera’a pāpū rahi a’e tā ’outou e nehenehe e fa’ari’i i terā nō ’ō mai i te Atua ra ? »

E nehenehe te tamāroa ’e te tamāhine tāta’itahi a te Atua e fa’ari’i i te hō’ē ’ite hōhonu a’e, pa’ari a’e ’e te pāpū a’e nō rātou iho. Mai ia Iosepha Semita, ’o tei ha’apāpū i tōna ’itera’a pāpū i mua i te pāto’ira’a, e nehenehe tātou e parau ma te itoito, « ’ua ’ite au i te reira, ’e ’ua ’ite au ē ’ua ’ite te Atua i te reira, ’e e’ita e nehenehe iā’u ’ia huna i te reira, ’e e’ita roa vau e nā reira »,

E au mau taea’e ’e mau tuahine here, ’a vaiiho i te huero iti o te ’itera’a pāpū ’ia ’ohipa i roto ia ’outou e tae roa i te taime e tupu mai te reira ’ei hō’ē ’itera’a pāpū hanahana.

Mai te peu e melo bāpetizohia ’outou ’e tei ha’amauhia nō Te ’Ēkālesia a Iesu Mesia i te Feiā Mo’a i te mau Mahana Hope’a nei, terā rā tē fifi noa nei ā ’outou ’ia parau ē, « ’aita vau i pāpū ’ua ’ite au », ’a ha’amana’o i teie parau fafau i roto i te pure o te ’ōro’a mo’a : « ’Ia vai noa tōna Vārua i roto ia rātou ». Nā roto i teie parau fafau, e nehenehe tātou tāta’itahi e haere tāmau noa i ni’a i te ’ē’a o te ’itera’a pāpū ’e te hō’ē ’ite pāpū.

I teienei teie te hō’ē parau mau rahi : Noa atu te huru ’a hōro’ahia ai te hō’ē ’itera’a pāpū—e mea tōpatapata ānei mai te hitira’a mahana ’aore rā ’ua tae mai nā roto i te hō’ē ’ōrama hanahana—e tītau-noa-hia te hō’ē mā’itira’a nō te fa’ari’i i teie hōro’a faufa’a rahi.

Te paraura’a « ’ua mā’iti au e ti’aturi » e fa’a’ōhie te reira ’ia fa’ari’i i te hō’ē ’itera’a nō ’ō mai i te Atua ra. Mai te mea e ’ite mai tātou tē paruparu ra tō tātou ’itera’a pāpū, ’a ha’amana’o ē nā tā tātou mau mā’itira’a e fa’aiti nei i te pūai o te ’itera’a pāpū. ’Aita rā te ’itera’a pāpū i mo’e roa. E ti’a noa ia tātou ’ia mā’iti e tū’ati fa’ahou atu i te reira.

Te mā’itira’a ’ia ti’aturi ’o te rāve’a pa’ari ïa ’e te pūai nō te fa’a’ohipa i tō ’outou ti’amāra’a.

’Aita vau i ’ite i te hō’ē rāve’a maita’i a’e nō te fa’a’ohipa i tō’u ti’amāra’a i te pārurura’a i tō’u ’itera’a pāpū.

’Ua ha’api’i te peresideni Nelson : « Tē tāparu nei au ia ’outou ’ia amo te hōpoi’a o tō ’outou ’itera’a pāpū. ’A ha’a nō te reira. ’A fatu i te reira. ’A ha’apa’o i te reira. ’A aupuru i te reira ’ia tupu i te rahi. ’A fa’a’amu i te reira i te parau mau ».

Nō’u, te mau ta’o amo te hōpoi’a, ha’a, fatu, ha’apa’o, aupuru ’e fa’a’amu e parau ïa nō te hō’ē ti’a mana tei hōro’ahia te hōpoi’a nō te tahi ’ohipa tao’a rahi ’e te faufa’a.

I roto i te ’ōmura’a o te ’Ēkālesia, ’ua māuruuru ’ore Parley P. Pratt ia Iosepha Semita ’e ’ua mā’iti i te fa’a’ino iāna ’e i te ’Ēkālesia. I tō John Taylor ’o tā Parley i ha’api’i i te ’evanelia taera’a atu i te ’oire, ’ua rave fa’aātea Parley iāna ’e ’ua fa’aara iāna ’eiaha e pe’e ia Iosepha. ’Ua parau John Taylor ia Parley :

« Hou ’oe ’a fa’aru’e ai ia Canada, ’ua fa’a’ite ’oe i te hō’ē ’itera’a pāpū pūai ē e peropheta Iosepha Semita nā te Atua, ’e ’ua ha’apāpū ’oe ē ’ua ’ite ’oe i teie mau mea nā roto i te heheura’a ’e te hōro’a a te Vārua Maita’i.

« I teienei, hō’ē ā tō’u ’itera’a pāpū ’o tā ’oe i ’oa’oa i taua taime ra. Mai te peu e parau mau te ’ohipa ’a ono ’āva’e i ma’iri, e parau mau ato’a ïa i teie mahana. Mai te peu e peropheta Iosepha Semita i terā taime, e peropheta ato’a ïa ’oia i teienei ».

Tē fa’a’ite pāpū nei au ē e peropheta Iosepha Semita nā te Atua, ’e tē tāmau noa nei ā te pereue o te peropheta o tāna i fa’ari’i i teie mahana. Tē arata’i nei Iesu i teie ’ohipa.

Tē ani manihini nei au ia ’outou ’ia feruri i tō ’outou ’ē’a e tae atu i te hō’ē ’ite pāpū nō Iesu Mesia ’e tāna ’evanelia. ’A amo te hōpoi’a nō tō ’outou ’itera’a pāpū ; ’a fa’a’ohipa i tō ’outou ti’amāra’a ma te pa’ari ’e ’a ’ite mai i te ta’ata hōro’a ’e tōna mau huru hanahana ato’a. Tē fa’a’ite pāpū nei au ē tei roto te pūai ia ’outou. ’Aita e ta’ata e nehenehe e mā’iti nō ’outou. ’Aita e ta’ata e nehenehe e ’īriti ’ē i teie hōro’a. E nehenehe ’outou e mā’iti ’ia ti’aturi.

Tē parau fafau atu nei au ia ’outou ē, mai te mea e rave ’outou i te reira, e riro tō ’outou ’itera’a pāpū ’ei hō’ē « vaipuna pape ora o tē tahe mai e tae atu i te ora mure ’ore ». E riro te reira ’ei tūtau ’e ’ei tūra’ira’a, ’e e pāturu te reira ia ’outou i roto i te mau taime fifi. E fa’ati’a te reira ia ’outou ’ia fa’ananea i te mau hōro’a pae vārua. E tauturu te reira ia ’outou i roto i tā ’outou iho aupurura’a ’e te tāvinira’a. E riro te reira ’ei mauiha’a i mua ia Sātane ’e tō ’outou mau ’enemi. E riro tō ’outou ’itera’a pāpū ’ei ’oa’oa ’a ’ite ai ’outou i te reira i te hotura’a i roto i tā ’outou mau tamari’i, te mau mo’otua ’e te mau hina ’e i roto i te feiā tā ’outou i here ’e e tāvini nei. E riro te reira ’ei pūai ’ia fa’a’ite ana’e ’outou i te reira ’e ’ia fa’a’ohipa i te reira nō te fa’a’ite pāpū.

Mai te mea ’ua ’ite ’outou, ’ua ’ite ’outou. ’Ua ’ite au ē ’ua ’ite au. E hina’aro atu ā tātou i te mau ’ite pāpū nō Iesu Mesia ’e tāna ’evanelia. ’A rave i te reira ! ’A ’imi i te reira ! E ’ohipa rū te reira ! ’O te tau tu’ura’a hope’a teie—te tau tu’ura’a nō te ’īra’a o te mau tau.

’Ua fa’ahiti Iesu Mesia i teie parau mau : « E mou te ra’i ’e te fenua, ’āre’a tā’u parau e ’ore roa ïa ’oia e mou ».

Te mau taea’e ’e te mau tuahine, ’aita roa atu te hō’ē ’itera’a pāpū nō Iesu Mesia i ’ōpuahia ’ia riro ’ei hōro’a nō te hō’ē taime poto. ’Aita e mea nō te tau poto—’aita nō te ta’ata hōro’a, ’aita nō te hōro’a iho, ’aita nō te ta’ata e fa’aora i te hōro’a, ’aita nō te ta’ata e fa’ari’i i te hōro’a. ’Ia fa’ata’a-ato’a-hia tō ’outou ’itera’a pāpū mai teie te huru. Noa atu e « mou te ra’i ’e te fenua », e’ita roa tō ’outou ’itera’a pāpū ’e te ’ite nō te ’evanelia a Iesu Mesia e mou. Teie te taime nō te haru mai i teie hōro’a tao’a rahi. Nā roto i te i’oa o Iesu Mesia, ’āmene.