Te Buka a Moromona—E tao’a rahi i ni’a i tō tātou tere

Nā Elder Ozani Farias

Nō te Hitu ’Ahuru

’Ia fa’a’amu’a ana’e tātou i te mau parau a te Mesia i ’iteahia i roto i te Buka a Moromona, e tauturu mai te Vārua ia tātou ’ia hāro’aro’a i te mau parau mau mure ’ore.

E nehenehe ’oe e ha’amana’o i te hō’ē taime i hōro’a ai te hō’ē ta’ata ia ’oe i te hōro’a ’o tei taui i tō ’oe orara’a ? I teie ’āva’e ’Atopa, ’ua ma’iri te 40 matahiti i tō’u fa’ari’i-ra’a i te hō’ē o te mau hōro’a rahi a’e i roto i tō’u orara’a. I tō’u haerera’a i te ha’api’ira’a tuarua, ’ua hi’o atu vau ē e māramarama ta’a ’ē tō te hō’ē o tō mātou mau hoa ’ia fa’aauhia i te tahi atu mau feiā ’apī. ’Ua au roa vau ’ia fa’aea i pīha’i iho iāna. I te hō’ē mahana, ’ua fa’a’ite mai ’oia iā’u Ee melo ’oia nō Te ʼĒkālesia a Iesu Mesia i te Feiā Mo’a i te mau Mahana Hopeʼa nei. ’Ua pūpū ihora ’oia i te hō’ē hōro’a iā’u : te hō’ē Buka a Moromona. ’E ’ua ani mai ’oia iā’u ’ia tai’o i te tahi mau ’api ’e ’ia fārerei e piti nā hoa nō te pāhono i tā’u mau uira’a. E mau misiōnare te reira nau hoa.

I tō’u fārereira’a i te mau misiōnare, ’ua ha’api’i mai rāua iā’u i te parau tumu a te Mesia ’e ’ua ani mai iā’u ’ia pe’e i te tītaura’a a te peropheta ’o Moroni : « ’E ’ia fa’ari’i ’outou i teie mau mea, tē a’o atu nei au ia ’outou ’ia ani atu ’outou i te Atua, i te Metua mure ’ore, nā roto i te i’oa o te Mesia, e ’ere ānei teie mau mea i te parau mau ; ’e mai te mea e ani atu ’outou ma te ’ā’au hina’aro mau, ma te mana’o pāpū, ’e ma te fa’aro’o i te Mesia, e fa’a’ite mai ïa ’oia i te parau mau nō te reira ia ’outou, nā roto i te mana o te Vārua Maita’i » (Moroni 10:4).

’Ua tai’o vau i te tahi mau tuha’a o te hō’ē Buka a Moromona ’e ’ua pure ato’a. Noa atu ’aita vau i hāro’aro’a roa i te mau mea tā te mau misiōnare i ha’api’i mai iā’u, ’ua ’ite au i roto i tō’u ’a’au ē e mea maita’i te mea tā’u e tai’o nei ’e nō ’o mai i te Atua. ’Ua fa’ari’i au i te ha’apāpūra’a a te parau tapu a Moroni : « ’E nā roto i te mana o te Vārua Maita’i e ’ite ai ’outou i te parau mau i te mau mea ato’a ra » (Moroni 10:5).

I te bāpetizora’ahia vau i roto i te ’Ēkālesia a Iesu Mesia i te Feiā Mo’a i te Mau Mahana Hope’a nei, ’ua tāmata te tahi o tō’u mau hoa i te parau mai ē ’ua hape tā’u fa’a’otira’a. I te tāime tāta’itahi vau i fa’aruru ai i te reira huru fē’a’ara’a ’aore rā pāto’ira’a, ’ua fa’ari’i fa’ahou vau i te ha’apāpūra’a nā roto i te ’imira’a i te mau pāpa’ira’a mo’a ’e te purera’a ’ia tāpe’a noa i te mau fafaura’a tā’u i rave ’e te Atua. Mai reira mai, ’ua riro te Buka a Moromona ’ei hoa nō’u ’e ’ua riro ’ei tao’a fāito ’ore i roto i tō’u tere i te tāhuti nei.

E ’ere te Buka a Moromona i te hō’ē noa buka. E ’ite hau atu rā nō Iesu Mesia, i pāpa’ihia e rave rahi mau peropheta nā roto i te vārua nō te tohu ’e te heheura’a.

Te ’ohipa faufa’a roa a’e i tupu tei pāpa’ihia i roto i te Buka a Moromona ’o te tere fārerei ïa o te Fatu ’o Iesu Mesia i te mau ’āti Nephi i muri noa mai i tōna ti’afa’ahoura’a. Tē ha’amāramarama ra te Buka a Moromona « i te mau ha’api’ira’a tumu nō te ’evanelia, tē hōhora ra i te ’ōpuara’a nō te fa’aorara’a, ’e tē fa’a’ite ra ho’i i te mau ta’ata i te mau mea e tano ia rātou ’ia rave nō te fa’ari’i i te hau i roto i teie orara’a ’e i te fa’aorara’a mure ’ore i roto i te ao a muri atu » (’Ōmuara’a i te Buka a Moromona).

’Ua piahia te nene’ira’a mātāmua o te Buka a Moromona : Te tahi fa’ahou ’ite nō Iesu Mesia i roto i te hō’ē ’oire na’ina’i nō te tuha’a fenua ’o New York i te ’āva’e nō Mati 1830. E 23 noa matahiti tō Iosepha Semita ’a fa’ahope ai ’oia i te tātarara’a o teie buka i te matahiti 1829. ’Ua fa’aoti ’oia i te tātarara’a fātata i te buka tā’āto’a i te 75 ri’i noa mahana, ’e ’ua fa’aotihia te fa’anahora’a nene’i piri i te 7 ’āva’e.

I teie mahana, fātata e 80 000 misiōnare tāmau e tāvini hōro’a noa nei i roto i nā fenua 150, mā te pūpū i tō rātou orara’a nō te fa’a’ite pāpū ē e mea mau te Buka a Moromona ’e tē fa’a’ite pāpū nei te reira nō Iesu Mesia.

I te rurura’a i hope a’enei nā te feiā fa’atere misiōni i te ’āva’e nō Tiunu o teie matahiti, ’ua fa’a’ite mai te peresideni Russell M. Nelson i tōna ’itera’a pāpū pūai mau : « Te Buka a Moromona ’o te parau ïa a te Atua. Tē ha’api’i mai nei te reira i te ha’api’ira’a tumu a te Mesia ’e te fa’ata’ata’a mai nei nō ni’a i te tara’ehara a te Fa’aora hau atu i te tahi atu buka. »

Tē hina’aro nei au e tu’u atu i nā mana’o e toru ’o tē nehenehe e tauturu ’ia fa’ahōhonu atu ā i tō tātou fāriura’a ia Iesu Mesia nā roto i te tai’o-māite-ra’a i te Buka a Moromona :

1. ’A vai itoito noa ’e te pāpū i roto i tō ’outou ’imi-māite-ra’a tāmahana.

Mai ia Alama ’e te mau tamaiti a Mosia, tītauhia tātou ’ia « ’imi māite i te mau pāpa’ira’a mo’a, ’ia ’ite [tātou] i te parau a te Atua » ’e ’ia ha’apūaihia i roto i te parau mau (Alama 17:2).

’A tāvini ai māua tā’u vahine ’ei nā ti’a fa’atere misiōnare i te misiōni nō Georgia Atlanta, ’ua fa’aitoito māua i te mau misiōnare ato’a ’ia tai’o māite i te Buka a Moromona i te mau mahana ato’a e 30 minuti ’aore rā hau atu ā. ’Ua fa’arahi teie ’ohipa i tō mātou fa’aro’o ’e ’ua tauturu ia mātou ’ia ’imi ’e ’ia tīa’i i te mau semeio.

E riro iho ā ē, i muri mai i te misiōni, ’aita te reira fāito tāime nō tātou nō te tai’ora’a pāpa’ira’a mo’a tāmahana ato’a, tē hōreo atu nei rā vau ē ’ia nā mua ana’e ’outou i te tai’o māite i te Buka a Moromona nā roto i te pure, e ’itea ia ’outou te pūai pae vārua ’e te ti’aturira’a pāpū i te Fatu ’e i tāna mau parau fafau.

2. ’A fa’ariro i tā ’outou ’imira’a ’ei mea faufa’a a’e nā roto i te fa’a’amu’a i te mau parau a te Mesia.

’Ua ha’api’i ’o Nephi, « ’A rave i te fa’a’amu’a i te mau parau a te Mesia ; inaha ho’i, e fa’a’ite te mau parau a te Mesia ia ’outou i te mau mea tā ’outou e ti’a ’ia rave. » (2 Nephi 32:3).

’Ia rave i te fa’a’amu’a, ’ua hau atu te aura’a i te tai’ora’a—’o te ha’apoupoura’a, te ferurira’a, ’e te fa’a’ohipara’a ïa. ’A tai’o ai ’outou i te Buka a Moromona, ’a feruri i te mau rāve’a rau nō te ha’afaufa’a a’e i tā ’outou tuatāpapara’a i te pāpa’ira’a mo’a. ’Ei hi’ora’a :

’A fa’a’ohipa i te mau tauturu ha’api’ira’a i roto i te fa’aaura’a rorouira Médiathèque de l’Évangile.
’A ’imi i te mau parau mau mure ’ore ’o tē tauturu ’ia hāro’aro’a i te fa’anahora’a a te Atua ’e ’ia arata’i ia tātou ’ia rave ’e ’ia ha’apa’o i te mau fafaura’a ’e tō tātou Metua i te ao ra.
’A tū’ana i te mau ’āhe’e faufa’a ’e ’a tāpa’o i tō ’outou mau nīno’a nō te ha’aputu i tā ’outou i ha’api’i mai i roto i tā ’outou tai’ora’a.

E mana tō te Buka a Moromona nō te pahonora’a i te mau uira’a a tō tātou mau vairua. Mai tā Nephi i parau, e tītauhia ’ia « fa’aau ho’i i te mau parau pāpa’ira’a mo’a ato’a ia [tātou], ’ia riro te reira ’ei maita’i ’e ’ei ha’api’ira’a ho’i nō [tātou] » (1 Nephi 19:23).

’Ia fa’a’amu’a ana’e tātou i te mau parau a te Mesia, e ’īriti mai te reira i te ’ūputa nō te heheura’a ’e e fa’a’ite mai i te mea e au ia tātou ’ia rave i te mau tāime ato’a nō tō tātou orara’a ’ia ha’afātata atu ā iāna.

3. ’A fa’a’ite i tō ’outou ’itera’a pāpū nō te parau mau o te Buka a Moromona.

Mai ia Lehi i hina’aro e ’ōpere i te hotu nō te tumu ra’au nō te ora i tōna ’utuāfare (hi’o 1 Nephi 8:12), ’ia fa’ari’i ana’e tātou i te hō’ē ’itera’a pāpū nō te Buka a Moromona, e ’āne’e tātou i te hina’aro ’ia ’ōpere i te ’oa’oa nō ’ō mai i te ’itera’a i te ’evanelia a Iesu Mesia.

Te hō’ē o tō māua mau misiōnare, te Tuahine Benson, ’o tē pārahi i ’ō tātou i teie nei taime ’āmuira’a, ’ua fa’a’ite mai ’oia iā’u i tōna hina’aro ia tauturu i tōna tu’āne ’āpī a’e. I te reira taime, tē fa’aineine ra tōna tu’āne ’ia haere i te fare ha’api’ira’a tuatoru ’e ’aita ’oia i pāpū i te tāvinira’a i te hō’ē misiōni. ’Ua fa’auruhia vau ’ia ani i te Tuahine Benson ’ia tai’o i te Buka a Moromona i nā ’āva’e mātāmua e maha o tāna tau misiōni, ma te tāpa’opa’o i tāna mau ’īrava au roa a’e, ’e i muri mai ’ia fa’areva atu i taua buka ra i tōna tu’āne.

’Ua fa’areva te Tuahine Benson i te Buka a Moromona ’e ’ua ani i tōna tu’āne ’ia tai’o i te reira i te pō tāta’itahi. ’Ua fa’a’ite mai ’oia iā’u ē : « Hou tā’u misiōni, ’aita tō’u tu’āne i pāpū ē ’ua hina’aro ānei ’oia e tāvini i te hō’ē misiōni tāmau. Nā roto i te tau aunu’u, ’a tāi’o ai ’oia i te Buka a Moromona, ’ua ’itea iāna te ’oa’oa tāmau i roto i tōna orara’a ’e ’ua ha’amata i te feruri nō ni’a i te tāvinira’a i te hō’ē misiōni ».

E piti hepetoma hou te hōpe’ara’a o te misiōni a te Tuahine Benson, ’ua fa’ari’i a’era tōna tu’āne i tāna pi’ira’a misiōnare. Tē tāvini nei ’oia i roto i te misiōni nō Mexico Tuxtla Gutiérrez. ’Aua’a te Buka a Moromona, ’ua ha’amata ’o Elder Benson ’ia ’ite i te tōna orara’a ma te aneane pae vārua, ’o tei arata’i ïa iāna ’ia tāvini atu i te Fatu ’e ’ia ti’aturi ē e maita’i te mau mea ato’a. E semeio mau te reira fa’aotira’a—tei arata’ihia e te mana nō te mau parau a te Mesia.

E au mau taea’e ’e au mau tuahine here, tē ha’apoupou atu nei au ia ’outou ’ia fa’ahōhonu i tā ’oe tai’ora’a i te Buka a Moromona. ’Ua ’ite au, ’a fa’a’amu ai tātou i te mau parau a te Mesia nō roto mai i te Buka a Moromona, e tauturu te Varua ia tātou ’ia hāro’aro’a i te mau parau mau ’e ’ia fa’a’ite i tō tātou mau ’itera’a pāpū ma te ti’aturira’a mau iā rātou ’o tā te Fatu i fa’aineine e fa’aro’o i tāna parau poro’i. ’Ua nā ’ō mai te Fatu : « E fa’aro’o tō’u nei feiā i mā’itihia ra i tō’u reo ma te fa’a’eta’eta ’ore i tō rātou ra mau ’ā’au (Te Ha’api’ira’a Tumu ’e te mau Fafaura’a 29:7). Tē fa’a’ite pāpū nei au ē ’o rātou ’o tē ani i te Atua ma te fa’aro’o e fa’ari’i ïa rātou i te hō’ē ’itera’a pāpū nō te parau mau ’e te huru atuara’a o te Buka a Moromona nā roto i te mana o te Vārua Maita’i. Tē fa’a’ite pāpū nei au i te reira nā roto i te i’oa ’o Iesu Mesia, ’āmene.