Te ’evanelia a Iesu Mesia fa’atumuhia i ni’a i te ’utuāfare

’Ua fa’atumuhia te ha’api’ira’a tumu a Te ’Ēkālesia ’a Iesu Mesia i te Feiā Mo’a i te Mau Mahana Hope’a Nei i ni’a i te ’utuāfare. E mea faufa’a te hiero nō tā tātou ha’api’ira’a tumu nō ni’a i te ’utuāfare. Nā roto i te mau ’ōro’a e fa’ari’ihia i reira, e ti’a ia tātou ’ia ho’i fa’ahou ’ei ’utuāfare mure ’ore i mua i tō tātou Metua i te ao ra.

I te ’āmuira’a rahi nō ’Ēperēra 2025, ’a 200 hiero ’āpī tā te peresideni Russell M. Nelson i fa’aara e patuhia. E mea au nāna ’ia fa’aara i te mau hiero ’āpī i te hope’a o te ’āmuira’a rahi tāta’itahi, ’e ’ua ’oa’oa tātou pā’āto’a. Terā rā, nō te rahira’a hiero i roto noa ā i te ’ōmuara’a o te fa’anahonahora’a ’e te hāmanira’a, e mea ti’a ’ia fa’ataime ri’i i te fa’aarara’a i te mau hiero ’āpī. Nō reira, ma te parau fa’ari’i a te pupu nō te Tino ’Ahuru Ma Piti ’āpōsetolo, e’ita mātou e fa’aara atu i te mau hiero ’āpī i roto i teie ’āmuira’a. Mai teie atu taime e fa’afāna’o tātou i te mau ’ōro’a o te hiero i te mau melo o te ’Ēkālesia nā te ao ato’a nei, ’e tae noa atu te mau taime ’e te mau vāhi e fa’aara i te hāmanira’a o te mau hiero ’āpī.

’Ua pāpa’ihia teie tuha’a o tā’u a’ora’a i muri a’e i te pohera’a o tō tātou peresideni here o Russell M. Nelson. Te mau mea i muri nei, ’ua pāpa’ihia ïa ’e ’ua ha’amanahia e rave rahi hepetoma nā mua atu, e mau ha’api’ira’a te reira nā’u tei fa’auruhia e te Fatu.

Tē parau nei te poro’i nō ni’a i te ’utuāfare, tei fa’a’itehia ’a 30 matahiti i teienei ē « ’ua ha’amauhia te ’utuāfare e te Atua » ’e e « tumu nō te ’ōpuara’a a Tei Hāmani nō te hope’a mure ’ore o tāna mau tamari’i. » ’Ua parau ato’a te reira ē « te fa’auera’a a te Atua i tāna mau tamari’i nō te fānau fa’arahi ’e nō te fa’a’ī i te fenua, tē mana noa nei ā ïa. » ’E « tē fa’a’ite atu nei ā mātou ē, ’ua fa’aue mai te Atua ē, te mana mo’a nō te hāmanira’a i te ta’ata ’ia fa’a’ohipahia ïa i rotopū ana’e iho i te tāne ’e i te vahine ’o tei fa’aipoipohia mai te au i te ture. » Mai tā Elder Russell M. Nelson i terā taime, i ha’api’i i te mau ta’ata i te fare ha’api’ira’a tuatoru nō Brigham Young nō ni’a i te ’utuāfare ē « e mea faufa’a rahi nō te ’ōpuara’a a te Atua […] Inaha, te hō’ē fā nō te fa’anahora’a ’o te fa’ateiteira’a ïa i te ’utuāfare. »

I te tahi taime, ’ua mātauhia Te ’Ēkālesia a Iesu Mesia i te Feiā Mo’a i te mau Mahana Hope’a nei ’ei ’Ēkālesia tei fa’atumuhia i ni’a i te ’utuāfare. ’O te reira iho ā ! ’Ua fa’ata’ahia tō tātou tā’amura’a ’e te Atua ’e te tumu o tō tātou orara’a tāhuti nei nā roto i te parau nō te ’utuāfare. E fa’anahora’a te ’evanelia a Iesu Mesia nā te Metua i te ao ra nō te maita’i o tāna mau tamari’i vārua. E nehenehe tātou e parau pāpū ē ’ua ha’api’i-mātāmua-hia mai te fa’anahora’a o te ’evanelia ia tātou i roto i te ’āpo’ora’a nō te hō’ē ’utuāfare mure ’ore, ’e tē fa’a’ohipahia nei te reira nā roto i tō tātou ’utuāfare tāhuti nei, ’e tō te reira hope’ara’a ’o te fa’ateiteira’a ïa i te mau tamari’i a te Atua i roto i te mau ’utuāfare mure ’ore.

Noa atu teie huru ha’api’ira’a tumu, tē vai ra te pāto’ira’a. I te Fenua Marite, tē māuiui nei tātou i te ’ino o te fa’aipoipora’a ’e te fānaura’a tamari’i. Fātata hō’ē hānere matahiti te maoro, ’ua topa mai te fāito o te mau ’utuāfare e arata’ihia ra e te feiā fa’aipoipohia, ’e tae noa atu te fāito fānaura’a. Mea maita’i a’e te mau fa’aipoipora’a ’e te fānaura’a o te mau melo o te ’Ēkālesia, ’ua topa rahi ato’a rā te reira. E mea faufa’a roa ’ia ’ore te Feiā Mo’a i te mau Mahana Hope’a nei ’ia mo’e i tō rātou hāro’aro’ara’a nō ni’a i te tumu o te fa’aipoipora’a ’e te faufa’a o te mau tamari’i. Teie te ananahi tā tātou e tūtava nei. « E ’ohipa ’utuāfare te fa’ateiteira’a », ’ua ha’api’i mai te peresideni Nelson ia tātou. « Nā roto ana’e i te mau ’ōro’a fa’aora o te ’evanelia a Iesu Mesia e ti’a ai i te mau ’utuāfare ’ia fa’ateiteihia. »

E ta’ahia te mau tumu nō te topara’a o te fa’aipoipora’a ’e te fānaura’a tamari’i i te fenua nei ’ia hi’ohia te ’ā’amu, terā rā e mea tano te mau parau tumu ’e te mau peu a te Feiā Mo’a i te mau Mahana Hope’a nei ’ia ha’amaita’i mai—’eiaha rā ’ia pe’e—i terā mau peu.

I tō’u tamari’ira’a ’a 80 matahiti i ma’ir, ’ua ora vau i te fare fa’a’apu a tō’u nā metua rūau, e fa’anahora’a fātata te mau mea ato’a e tupu i te hō’ē mahana, tei raro a’e ïa i te arata’ira’a a te ’utuāfare. ’Aita e ’āfata teata ’e ’aore rā te tahi atu mau mātini rorouira nō te fa’anevaneva i te mau ’ohipa a te ’utuāfare. I te tahi pae, i roto i te sōtaiete ’oire i teie mahana, ’ua iti roa te mau melo e rave nei i te mau ’ohipa fa’atumuhia i ni’a i te ’utuāfare. Nā roto i te orara’a ’oire ’e te faura’o ’āpī, te fa’a’ana’anataera’a tei fa’anahohia, ’e te tūreiara’a vitiviti, ’ua fa’ariro te feiā ’āpī i tō rātou fare nohora’a mai te hō’ē fare tīpaera’a i reira rātou e ta’oto ’e e tāmā’a ai i te tahi taime, ’aita rā e arata’ira’a metua nō te mau ’ohipa tā rātou e rave.

’Ua iti ato’a te fa’aurura’a a te mau metua nā roto i te rāve’a ’imira’a moni a te rahira’a o te mau melo o te ’Ēkālesia i teienei. I muta’a ra, te hō’ē o te mau fa’aurura’a rahi tei tāhō’ē i te mau ’utuāfare, ’o te ’aro-’āmui-ra’a ïa nō te tītau i te hō’ē fā ’āmui—mai te fa’a’apura’a i te fenua ano ’aore rā te ’imira’a i te ora. ’Ua riro na te ’utuāfare ’ei pū fa’ahotu faufa’a tei fa’anahohia ’e tei fa’aterehia. I teie mahana, ’ua riro te rahira’a o te mau ’utuāfare ’ei pū ’aimamau faufa’a, ’aita te reira e tītau i te fāito teitei nō te fa’anahora’a ’e nō te rave-’āmui-ra’a i roto i te ’utuāfare.

’A iti noa ai te mana o te mau metua, tei te Feiā Mo’a i te mau Mahana Hope’a nei ā te hōpoi’a tei hōro’ahia mai e te Atua ’ia ha’api’i i tā rātou mau tamari’i ’ia fa’aineine nō tō tātou hope’ara’a ’utuāfare ē a muri noa atu (hi’o Te Ha’api’ira’a Tumu ’e te mau Fafaura’a 68:25). E rave rahi o tātou e nā reira, ’aita rā ho’i tō tātou hōho’a ’utuāfare mai tei mātauhia. Tē vai nei te tāne tei ta’a i tāna vahine, te pohe ’e te fa’ata’a-’ē-ra’a. ’Ua ’ite au i te reira i roto i te ’utuāfare au i pa’ari ai.

’Ua pohe tō’u metua tāne i te hitura’a o tō’u matahiti, nō reira, ’ua pa’ari māua tō’u teina, tō’u tuahine ’e te hō’ē metua vahine ’ivi. I roto i te mau taime fifi roa a’e, ’ua fa’aitoito noa ’oia. ’O ’oia ana’e ’e tōna ’oto, terā rā maoti te tauturu a te Fatu, nā tāna ha’api’ira’a pūai nō ni’a i te ha’api’ira’a tumu o te ’Ēkālesia i fa’aho’i-fa’ahou-hia mai i arata’i ia mātou. ’Ua pure rahi ’oia nō te ani i te tauturu a te ra’i i roto i te ha’api’ira’a i tāna mau tamari’i, ’e ’ua ha’amaita’ihia ’oia ! ’Ua pa’ari mātou i roto i te hō’ē ’utuāfare ’oa’oa ma te metua tāne mau, noa atu ’ua pohe ’oia. ’Ua ha’api’i mai ’oia ia mātou ē e metua tāne tō mātou ’e e tāne fa’aipoipo tāna ’e e riro noa ā mātou ’ei ’utuāfare nō te mea ’ua fa’aipoipohia rāua i roto i te hiero. ’Ua reva noa tō mātou metua tāne nō te tahi taime nō te mea ’ua pi’i te Fatu iāna nō te tahi atu ’ohipa.

’Ua ’ite au ē e rave rahi ’utuāfare ’aita e ’oa’oa ra, terā rā e nehenehe te mau metua vahine ’ōtahi ato’a e ha’api’i nō ni’a i te here o te hō’ē Metua i te ao ra ’e nō ni’a i te mau ha’amaita’ira’a e roa’a mai nā roto i te hō’ē fa’aipoipora’a hiero. E nehenehe ato’a ’outou e rave i te reira ! Tē ha’apāpū nei te fa’anahora’a a te Metua i te ao ra i teie rāve’a nō te mau ta’ata ato’a. Tē māuruuru nei tātou pā’āto’a nō te fa’aipoipora’a hiero ’e te mau ha’amaita’ira’a tā tātou e fa’ari’i atu nō te mea ’ua tā’atihia tātou ’ei ’utuāfare mure ’ore. Mai tō’u metua vahine, mea au nā tātou ’ia fa’ahiti i te fafaura’a a Lehi i tāna tamaiti ’o Iakoba ē e « ha’amo’a [te Atua] i tō ’oe mau ’ati ’ei maita’i nō ’oe » (2 Nephi 2:2). E tano te reira nō te mau ’utuāfare ato’a o te Feiā Mo’a i te mau Mahana Hope’a nei, tei reira te tā’āto’ara’a ’aore rā ’aita. E ’ēkālesia ’utuāfare tātou.

Nā tā tātou ha’api’ira’a tumu ’e tō tātou ti’aturira’a i te mau ’utuāfare mure ’ore e ha’apūai ’e e ru’uru’u ia tātou. E’ita roa e mo’ehia iā’u te parau fafau a tō’u pāpā rū’au Harris, i te pae o tō’u metua vahine, ’a ora ai mātou i tōna fare fa’a’apu piri ia Payson, i Utaha. ’Ua fa’a’ite mai ’oia iā’u i te parau ’āpī ’oto ē ’ua pohe tō’u metua tāne i Denver, i Colorado. ’Ua horo vau i roto i te piha ta’otora’a ’e ’ua tūturi i pīha’i iho i te ro’i, ma te ta’i rahi. ’Ua ’āpe’e mai ’o pāpā rū’au iā’u ’e ’ua tūturi i pīha’i iho iā’u ’e ’ua parau mai : « ’O vau tō ’oe metua tāne i teienei. » E hi’ora’a maita’i teie parau fafau aroha nō tā te mau metua rū’au e nehenehe e rave nō te fa’a’ī i te mau ārea ’ia mo’e ’e ’aore rā ’ia ’ere te hō’ē melo o te ’utuāfare.

Te mau metua, te ’ōtahi ’aore rā tei fa’aipoipohia—’e te tahi atu, mai te mau metua tupuna, ’o tē rave i teie hōpoi’a nō te mau tamari’i—’o rātou te mau ’orometua ha’api’i rahi. Tā rātou ha’api’ira’a maita’i roa a’e, ’o te hi’ora’a maita’i ïa. E vāhi maita’i roa te ha’amenemenera’a ’utuāfare nō te fa’a’ite ’e nō te ha’api’i mai i te mau faufa’a mure ’ore, mai te faufa’a rahi o te fa’aipoipora’a ’e te mau tamari’i, te tumu o te orara’a, ’e te puna mau o te ’oa’oa. ’O te reira ato’a te vāhi maita’i roa a’e nō te ha’api’i mai i te tahi atu mau ha’api’ira’a faufa’a rahi o te orara’a, mai te hāmani maita’i, te fa’a’orera’a hapa, te ha’avīra’a iāna iho, ’e te faufa’a o te ha’api’ira’a ’e te ’ohipa parauti’a.

’Ua ta’a iho ā ïa ia tātou ē, e rave rahi melo o te ’Ēkālesia e mau melo ’utuāfare here tō rātou ’o tē ’ore e fa’ari’i nei i te mau parau tumu ’e te mau tītaura’a a te ’evanelia. ’O tō tātou here ’e tō tātou fa’a’oroma’i tei tītauhia nō taua mau melo ra. I roto i tō tātou mau aura’a te tahi i te tahi, e ti’a ia tatou ’ia ha’amana’o ē ’aita te maita’i-roa-ra’a tā tātou e ’imi nei i tā’ōti’a-noa-hia i te vaira’a hepohepo o te tāhuti nei. Tē ha’apāpū mai nei te ha’api’ira’a rahi i roto i Te Ha’api’ira’a Tumu ’e te mau Fafaura’a 138:57–59 ē e nehenehe te tātarahapa ’e te tupura’a pae vārua e tāmau noa i roto i te ao vārua i muri a’e i te tāhuti nei. Te mea faufa’a roa atu, ’ia tāhō’ē ana’e te mau ’utuāfare nō te ha’apūai i te tahi ’e te tahi, e mea tano tātou pā’āto’a ’ia ha’amana’o ē e nehenehe te mau hara ’e te mau hapehape e’ita tā tātou e nehenehe e ’ape i roto i te tāhuti nei, e fa’a’orehia nā roto i te tātarahapara’a maoti te tāra’ehara hanahana ’e te fa’aora a Iesu Mesia.

’O tō tātou Fa’aora, ’o Iesu Mesia, tō tātou hi’ora’a hope roa. E ha’amaita’ihia tātou mai te mea e ha’amau tātou i tō tātou orara’a i ni’a i tāna mau ha’api’ira’a ’e tōna fa’atūsiara’a iāna iho. ’Ua riro te pe’era’a i te Mesia ’e te hōro’ara’a ia tātou iho i roto i te tāvinira’a i te tahi ’e te tahi, ’ei rā’au maita’i roa a’e nō te peu pipiri ’e te mana’ora’a iāna iho, ’o tei huru mātauhia i teienei.

E hōpoi’a ato’a nā te mau metua ’ia ha’api’i i tā rātou mau tamari’i i te tahi mau ’ohipa ri’i, ta’a ’ē atu i te mau parau tumu o te ’evanelia. E hō’ē te mau ’utuāfare ’ia rave ’āmui ana’e rātou i te mau mea faufa’a. E patu te mau fa’a’apu ’utuāfare i te mau tā’amura’a ’utuāfare. E ha’apūai te mau ’ohipa ’oa’oa a te ’utuāfare i te mau tā’amura’a ’utuāfare. E mea faufa’a ta’a ’ē te pūhapara’a, te mau ’ohipa tū’aro, ’e te tahi atu mau ’ohipa fa’a’ana’anataera’a nō te fa’atupu i te mau tā’amura’a i rotopū i te mau ’utuāfare. E mea tano te mau ’utuāfare ’ia fa’atupu i te mau putuputura’a fēti’i nō te ha’amana’o i te mau tupuna, ’o tē arata’i atu i te hiero.

E mea tano te mau metua ’ia ha’api’i i te mau tamari’i i te mau ’aravihi tumu nō te orara’a, mai te ravera’a i te ’ohipa i roto i te ’āua ’e i te fare. E fa’aineinera’a maita’i te ha’api’ira’a i te mau reo nō te tāvinira’a misiōnare ’e nō te orara’a i teie tau ’āpī. Te mau ’orometua e nehenehe e ha’api’i i teie mau tumu parau, ’oia ho’i ïa te mau metua, te mau metua tupuna, ’aore rā te tahi atu fēti’i. E ruperupe te mau ’utuāfare ’ia ha’api’i ana’e rātou ’ei pupu ’e ’ia ’āparau ’āmui rātou nō ni’a i te mau mea ato’a nō rātou ’e nō tō rātou mau melo.

E parau paha te tahi pae ē : « ’Aita rā tō mātou e taime nō te reira mau mea ato’a. » Nō te ’ite mai i te taime nō te rave i te mea faufa’a mau, e rave rahi metua tē ’ite ē e nehenehe tā rātou e tū’ama i tō rātou ’utuāfare mai te mea e tūpohe rātou i tā rātou mau rāve’a rorouira ’āpī ato’a. ’E te mau metua ē, ’a ha’amana’o ē, te mea tā teie mau tamari’i e hina’aro mau nei nō te tāmā’ara’a, ’o te taime ïa i pīha’i iho ia ’outou.

E fa’ari’i te mau ’utuāfare i te mau ha’amaita’ira’a rahi mai te mea e pure ’āmui rātou, ma te tūturi i te pō ’e i te po’ipo’i nō te ha’amāuruuru nō te mau ha’amaita’ira’a ’e nō te pure nō ni’a i te mau māna’ona’ora’a ’āmui. E ha’amaita’i-ato’a-hia te mau ’utuāfare ’ia ha’amori ’āmui rātou i roto i te mau purera’a a te ’Ēkālesia ’e i roto i te tahi atu mau huru purera’a. E ha’apūai-ato’a-hia te mau tā’amura’a ’utuāfare nā roto i te mau ’ā’amu ’utuāfare, te ha’amaura’a i te mau peu tumu ’utuāfare, ’e te fa’a’itera’a i te mau ’itera’a mo’a. ’Ua fa’aha’amana’o mai te peresideni Spencer W. Kimball ia tātou ē « te mau ’ā’amu fa’aurura’a mai roto mai i tō tātou iho orara’a ’e te orara’a o tō tātou mau tupuna […] e mau mauha’a ha’api’ira’a pūai ïa. » E mea pinepine te reira i te riro ’ei puna maita’i roa a’e nō te fa’aurura’a nō tātou ’e nō tō tātou hua’ai.

Tē parau pāpū nei au nō te Fatu Iesu Mesia, ’oia ho’i te Tamaiti Fānau tahi a te Atua, tō tātou Metua mure ’ore. Tē ani nei ’oia ia tātou ’ia pe’e i te ’ē’a nō te fafaura’a ’o tē arata’i atu i te putuputura’a ’utuāfare i te ao ra. Nā te mau mana tā’atira’a o te autahu’ara’a, fa’aterehia e te mau tāviri tei fa’aho’i-fa’ahou-hia mai i roto i te hiero nō Kirtland, e fa’atāhō’ē i te mau ’utuāfare ē a muri noa atu (hi’o Te Ha’api’ira’a Tumu ’e te mau Fafaura’a 110:13–16). Tē fa’a’ohipahia nei te reira i roto i te mau hiero o te Fatu, ’o tē rahi noa atu ra, nā te ao ato’a nei. E parau pāpū te reira. E mata na tātou i te riro ’ei tuha’a nō te reira, nā roto i te i’oa o Iesu Mesia, ’āmene.