’Ōmuara’a

E tō’u mau taea’e ’e tuahine here, tē putuputu nei tātou ’a ’oto ai tātou nō te fa’aru’era’a mai tō tātou peresideni here ’o Russell M. Nelson. Tē paraparau atu nei au ia ’outou nā ni’a i tō’u ti’ara’a Peresideni nō te pupu nō te Tino ’Ahuru Ma Piti ’āpōsetolo, te ti’ara’a i pāturu-noa-hia na vau i te mau ’āmuira’a pāroita ’e titi ’e i te ’āmuira’a rahi—nō nā matahiti e hitu ’e te ’āfa i ma’iri a’enei.

Tē haere nei tātou i mua i teie ’āmuira’a rahi ’āfa matahiti, mai tei ’ōpuahia, ’e te feiā a’o ’e te pehe tei fa’ata’ahia e te peresideni Nelson, i muri a’e i te mau ’āva’e fa’aineinera’a e rave rahi. Te mea noa i tu’u-’āpī-hia, ’oia ho’i tā’u fa’ata’ara’a mātāmua, ’e tā’u paraparaura’a ’ei mono nō te peresideni Nelson i te tuha’a purera’a hope’a i te avatea sābati.

Teie te taime mātāmua, fātata e 75 matahiti i teienei, ’a pohe ai te hō’ē peresideni nō te ’Ēkālesia ma’a mahana noa nā mua a’e i te hō’ē ’āmuira’a rahi. ’Ua tītau te reira ia mātou ’ia fa’anaho nāhea e ti’a ai ’ia fa’atere i te mau putuputura’a nō te ’āmuira’a rahi ’e tae noa atu i te mau tuha’a purera’a rahi o te ’āmuira’a, ma te fa’anaho ’oi’oi ato’a i tōna hunara’a. ’Ua ’ite te peresideni Nelson i te faufa’a o te ’āmuira’a rahi nō te hōro’a i te arata’ira’a i te Feiā Mo’a i te mau ’āva’e i muri nei. Tē fa’atura nei tātou iāna nā roto i te pe’era’a i te fa’anahora’a o te ’āmuira’a i ’ōpuahia, ’o tāna i ha’amana.

I roto i teie taime hevara’a, ’ua fa’atupu a’ena tātou i te hō’ē putuputura’a nō te ha’amāuruuru i te peresideni Russell M. Nelson nā mua a’e i tā tātou mau putuputura’a nō te ’āmuira’a rahi, ’e i muri iho ’ua fa’anaho mātou i tōna hunara’a i muri noa a’e i te ’āmuira’a. ’Ua ravehia teie mau mea ato’a maoti te parau fa’ari’i a te ’utuāfare o te peresideni Nelson ’e a te Pupu nō te Tino ’Ahuru Ma Piti.

Nō te mea ho’i ē, mātou pā’āto’a tei fa’ata’ahia nō te paraparau i roto i te ’āmuira’a rahi, tei hina’aro e rave i te hō’ē taime nō te pūpū i te ha’amāuruurura’a i te peresideni Nelson, ’ua ani ïa mātou i te feiā a’o ato’a ’ia ha’apoto noa i te reira mau ha’amāuruurura’a, ma te fa’ananea roa atu i te reira i te hunara’a, tā mātou i ha’amata a’ena i te fa’anaho.

Tā’u iho ha’amāuruurura’a poto—tei tano i teie ’āmuira’a ’e i te mau ha’amāuruurura’a tā tātou i hōro’a a’ena—’o teie ïa ē, ’ua here au ia Russell M. Nelson ’e ’ua hau atu tā’u i ha’api’i mai nō ni’a i te ’evanelia ’e te arata’ira’a ’evanelia nā roto i tō’u auhoara’a roa iāna, i te tahi noa atu ti’a fa’atere tā’u i mātau. ’O ’oia tō tātou hōho’a e pe’e ’ei tāvini ’e ’ei ta’ata pe’e i te Fatu ’o Iesu Mesia. I teie mau mea, tē fa’a’ite pāpū nei au i te i’oa o Iesu Mesia, ’āmene.