Te fa’aitoitora’a i te tahi ’e te tahi

I tai’o a’enei au i te hō’ē ’ohipa tei tupu ’o tei ha’aputapū roa iā’u. ’Ua tupu te reira i te tata’ura’a ’aito hanamā’ona nā te ao nei i te fenua Marite—e tata’ura’a nā te mau piri’a.

Hō’ē o te mau mā’ona nō te horo ātea e 1 500 mētera, ’o Orville Rogers ïa 100 matahiti te pa’ari. ’Ua pāpa’i te tāparau :

« Te pa’ainara’a te pūpuhi horora’a, ’ua ha’amata te mau mā’ona i te horo, ’oi’oi roa Orville i te rave i te ’āna’ira’a hōpe’a, ’ua vai ’ōna ana’e i te roara’a o te horora’a, ma te nu’u mārū noa. I te taime ’a tae ai te mā’ona hōpe’a hou Orville ’a tāpae atu ai, te toe fa’ahou ra ia Orville e piti ’e te ’āfa fa’a’ohura’a nō te haere. Fātata e 3 tauatini feiā māta’ita’i tei pārahi ma te muhu ’ore, ma te hi’o iāna i te haere marū-noa-ra’a e ha’ati i te tahua horora’a—hope roa, muhu noa ’e te au ’ore ri’i ’o ’ōna ana’e tē horo ra.

« I te taime rā, ’a ha’amata ai ’oia i tāna fa’a’ohura’a hōpe’a, ’ua ti’a te naho’a rahi nō te huro iāna ’e i te pōpō iāna. I te taime ’a tāpae ai ’oia i te rēni hōpe’a, ’ua tūtu’o haere te naho’a rahi. Nā roto i te fa’a’itoitora’a ’oa’oa a te tauatini feiā māta’ita’i, ’ua tu’u fa’ahope Orville i te pūai e toe ra i roto iāna. ’Ua pahō te ’oa’oa o te feiā māta’ita’i ’a tae ai ’oia i te rēni tāpaera’a ’e ’ua fa’ari’i-pōpou-hia ’oia e tōna mau hoa horo. ’Ua aroha Orville i te rahira’a ta’ata ma te ha’eha’a ’e te ’ā’au mēhara, ’e ’ua fa’aru’e mai ra i te tahua horora’a ’e tōna mau hoa ’āpī ».

’O te paera’a teie te tata’ura’a horo a Orville ’e i roto i te horora’a tāta’itahi, ’o ’oia ato’a te ta’ata hōpe’a. ’Ua nehenehe roa ia vētahi i te ’imi e ha’avā ia Orville, mā te mana’o ē e’ita e ti’a iāna ’ia tāta’u nō tōna pa’ari—’aita tōna e pārahira’a i ni’a i te tahua nō te mea e ha’amaoro roa atu ā ’oia i tāna mau tāta’ura’a nō te tahi atu mau ta’ata.

Noa atu rā ’o ’oia noa te hōpe’a e fa’aoti, ’ua roa’a ia Orville te pae o te fāito teitei nā te ao nei i taua mahana ra. ’Aita hō’ē ta’ata tei hi’o iāna i te horora’a i ti’aturi e tupu te reira, e ’ere rā te feiā māta’ita’i ’aita ato’a tōna mau hoa horo i riro ’ei mau ha’avā. ’Aita Orville i ’ōfati hō’ē noa a’e ture ’e ’aita ato’a te mau ti’a fa’atere i fa’aiti mai te fāito i tītauhia. ’Ua horo ’oia i te hō’ē ā horora’a ’e ’ua fa’atura i te mau tītaura’a mai te tahi atu mau mā’ona. Tōna rā fāito fifi—i roto i teie huru, tōna matahiti ’e tōna ’aravihi i te pae tino i tā’ōtiahia—’ua ravehia mai ïa ma te tu’ura’a iāna i roto i te fāito ti’ara’a hau atu i te 100 matahiti. ’E i roto i teie ti’ara’a, ’ua roa’a iāna e pae fāito teitei nā te ao nei.

Mai ia Orville ’ua tītauhia iāna i te hō’ē itoito rahi nō te haere atu nā ni’a i teie tahua horora’a i te mau taime ato’a, e ti’a ato’a ’ia noa’a te itoito rahi nō te tahi ’o tō tātou mau tuāhine ’e mau taea’e ’ia tomo atu i roto i te tahua o te orara’a i te mau mahana ato’a, ma te ’itera’a e nehenehe rātou e ha’avā tano-’ore-hia noa atu tē rave nei rātou mai te nehenehe ia rātou, mai tei tītauhia ’ia pe’e i te Fa’aora ’e ’ia ha’apa’o i tā rātou mau fafaura’a ’e ’ōna.

Noa atu te vāhi tā tātou e ora nei nā te ao nei, te huru o tō tātou matahiti, e hō’ē hina’aro niu o te ta’ata nō tātou pā’āto’a ïa, ’ia putapū i te nīno’a mana’o nō vai tātou, te ’itera’a ’ua hina’arohia tātou ’e te tītauhia ’e e fā tō tō tātou orara’a ’e e aura’a, noa atu tō tātou huru orara’a ’aore rā mau tā’oti’ara’a.

I te fa’a’ohura’a hōpe’a o te horora’a, ’ua fa’aitoito te naho’a rahi ia Orville, ma te hōro’a iāna i te pūai ’ia tāmau noa i te haere. Noa atu ’ua tāpae ’oia i te hōpe’a. Nō te mau mā’ona ’e te nāhoa ta’ata, ’ua riro hau atu te reira i te hō’ē noa tata’ura’a. ’Ia hi’ohia ra, ’ua riro te reira ’ei hō’ē hi’ora’a nehenehe nō te here o te Fa’aora i roto i te ’ohipa. I te fa’aotira’a Orville te horora’a, ’ua ’oa’oa ’āmui rātou pā’āto’a.

Mai te tata’ura’a ’aito hanamā’ona, e nehenene tā tātou mau ’āmuira’a ’e tō tātou ’ūtuafare e riro ’ei mau vāhi putuputura’a i reira tātou e fa’aitoito ai i te tahi ’e te tahi—te mau huira’atira o te fafaura’a i fa’a’amahia e te here o te Mesia nō te tahi ’e te tahi—te tauturura’a i te tahi ’e te tahi ’ia fa’a’oroma’i i te mau tāmatara’a ato’a tā tātou e fa’aruru nei, mā te hōro’a i te tahi ’e te tahi te pūai ’e te fa’aitoitora’a mā te ’ore e ha’avā. E hina’aro tātou i te tahi ’e te tahi. E tae mai te pūai hanahana nā roto i te hō’ēra’a, ’e nō te reira tumu Sātane e ’ōpua ai i te fa’a’amahamaha ia tātou.

Te mea ’oto, nō te tahi o tātou, te haerera’a i te purera’a e nehenehe i te tahi taime e riro ’ei mea fifi nō e rave rahi tumu ta’a ’ē. ’O te hō’ē paha ta’ata e ’aro nei nō te parau o te fa’aro’o, ’aore rā hō’ē ta’ata e fifi nei i te pae anoaho tōtiare ’aore rā te ’aravī. ’O te hō’ē paha ta’ata nō te hō’ē fenua ’ē’ē ’aore rā te hō’ē nūna’a ’ē, ’aore rā hō’ē ta’ata e ’itera’a ’ē i te orara’a ’aore rā e hi’ora’a ta’a ’ē tō rātou i te mau ’ohipa, e au ra ’aita e tano ra i te mau tītaura’a. E nehenehe ato’a e riro e mau metua nō te mau pēpē ’e te mau tamari’i ’āpī ’aita i taoto maita’i ’e te fifi nei i te pae ’aehuehu, ’aore rā hō’ē ta’ata ’ōtahi i roto i te hō’ē ’āmuira’a feiā fa’aipoipo ’e te mau ’utuāfare. E nehenehe ato’a e riro hō’ē ta’ata tei ’ite mai i te itoito nō te ho’i mai i muri a’e e rave rahi matahiti te mo’era’a, ’aore rā hō’ē ta’ata e nīno’a mana’o onoono e’ita roa ’oia e tāpa’e ’e ’aita i ’ite i tōna vaira’a.

’Ua parau te peresideni Nelson : « Mai te mea e ta’a ’ē te hō’ē nā ta’ata fa’aipoipo o tā ’outou pāroita, ’aore rā e fa’aho’ihia te hō’ē misiōnare i te fare, ’aore rā tē fea’a nei te hō’ē taure’a ’āpī i tōna ’itera’a pāpū, ’aita rātou e hina’aro i tā ’outou ha’avāra’a. E hina’aro rātou ’ia ’ite i te here mau o Iesu Mesia e pura mai nā roto mai i tā ’outou mau parau ’e mau ’ohipa ».

Te mau ’ohipa e tupu i te fare purera’a e fa’atano i te ha’amaura’a i te mau aura’a faufa’a hina’arohia ’e te Fatu ’e te tahi ’e te tahi, e tītauhia nō tō tātou maita’i i te pae manava ’e i te pae vārua. Tā tātou hōpoi’a ’ia here ’e ’ia aupuru i te tahi ’e te tahi e mea tītauhia e te mau fafaura’a o tā tātou i rave ’e te Atua, e ha’amata nā te bāpetizora’a, ’ei melo nō te ’utuāfare o te Atua, e melo nō te tino o te Mesia,, ’e ’eiaha noa nō te tāpa’o ’ua oti i te ravehia.

Te here ’e te aupurura’a mai te huru Mesia e mea teitei ïa ’e te mo’a a’e. Te here mau o te Mesia ’o te aroha ïa. Mai tā peresideni Nelson i ha’api’i, « e tūra’i te aroha ia tātou ‘’ia amo i te hopoi’a a te tahi ’e te tahi’ [Mosia 18:8] ’eiaha rā te fa’ateimahara’a rahi i ni’a i te tahi ’e te tahi ».

’Ua parau te Fa’aora, « ’o te mea teie e ’ite ai te ta’ata ato’a ē, e pipi ’outou nā’u, ’ia aroha ’outou ia ’outou iho ». ’E ’ua nā ’ō fa’ahou te peresideni Nelson : « Te aroha ’o te huru mātāmua ïa o te hō’ē pipi mau nā Iesu Mesia ». E mea māramarama te ha’api’ira’a a te Fa’aora : Tāna mau pipi mau e patu rātou, e fa’ati’a, e fa’aitoito, ’e e fa’auru […] E mea faufa’a roa tā tātou huru paraparau ’e nō ni’a ato’a ia vetahi ’ē ».

Te ha’api’ira’a a te Fa’aora nō ni’a i te reira, e mea ’ōhie roa. ’Ua ha’apotohia te reira i roto i te Ture Auro : Mai ia ’outou e hina’aro ’ia nā-reira-hia mai ’outou ’a nā reira ato’a ia vetahi ’ē. ’A tu’u ia ’outou i te vaira’a ’o te reira ta’ata ’e ’a rave ia rātou mai te au i tā ’outou e hina’aro ’ia nā reira-ato’a-hia ’outou i tōna vaira’a.

Te ravera’a ia vetahi ’ē mai te huru Mesia, ’ua nā ni’a a’e i tō tātou mau ’ūtuāfare ’e mau ’āmuira’a. Tei roto tō tātou mau tuāhine ’e mau taea’e nō te tahi atu mau ha’apa’ora’a fa’aro’o ’aore rā ’aita e ha’apa’ora’a fa’aro’o. Tei roto tō tātou mau taea’e ’e mau tuahine nō te tahi mau fenua ’e mau tā’ere ’e’ē ’e tae noa atu te feiā nō te pupu poritita ’ē. E tūha’a tātou pā’āto’a nō te ’utuāfare o te Atua ’e ’ua here ’oia i te tā’āto’ara’a o tāna mau tamari’i. Tē hina’aro nei ’oia ’ia here tāna mau tamari’i iāna ’e i te tahi ’e te tahi ato’a.

E hi’ora’a te orara’a o te Fa’aora nō te here, te tāhō’ē ’e te fa’ateiteira’a ’oia ato’a nō te feiā tā te tōtaiete e vahavaha nei ’e e fa’ariro nei ’ei mea vi’ivi’i. ’O tōna hi’ora’a tei fa’auehia ia tātou e pe’e. Tei i’ōnei tātou nō te fa’ananea i te mau huru mai tō te Mesia ’e i te hōpe’a ’ia riro mai tō tātou Fa’aora. E ’ere tāna ’evanelia i te hō’ē tāpura ’ohipa ; e ’evanelia rā nō te rirora’a mai—rirora’a mai, mai iāna ra ’e te herera’a mai iāna i here. ’Ua hina’aro ’oia ’ia riro mai tātou ’ei nūna’a nō Ziona.

I te pae hope’a o te 20ra’a ’o tō’u matahiti, ’ua fa’aruru vau i te ma’i ’oroeā ino roa ’e i taua taime ra, e au ē ’ua mōrohi ’oi’oi tō’u ’itera’a ē tē ora nei te Atua. E’ita e haere iā’u i te tātara maite i te reira huru maori rā i te paraura’a ē, tei roto roa vau i te reru. Mai tō’u na’ina’ira’a mai, ’ua ’ite-noa-na vau ē, tei pīha’i iho noa mai tō tātou Metua i te ao ra ’e e nehenehe au e paraparau iāna. I taua rā taime ra, ’ore roa tō’u ’ite tē vai ra te hō’ē Atua. ’Aita roa vau i ora na i te reira huru i roto i tō’u orara’a, ’e e au ē tē he’e atu ra tō’u mau niu ato’a.

’E i te pae hope’a, e mea fifi roa nō’u ’ia haere i te purera’a. ’Ua haere au nō tō’u taiā ’ia tītirohia vau ’ei mero « māuiui » ’aore rā « mea ha’apa’o ri’i » ’e ’ua taiā vau ’ia riro mai ’ei fā fa’aitoitora’a nā te melo. Te mea i hia’ai-roa-hia e au i reira ra, ’o te ’itera’a ïa i te here, te hāro’aro’a ’e te turu mau o te mau melo e hā’ati ra iā’u, ’eiaha rā ’ia ha’avāhia.

Te tahi o te mau mana’o i taiāhia e au ’ia rave te ta’ata nō’u, ’ua nā reira ato’a na vau iho nei nō rātou ’o tei ’ore e haere tāmau nei i te purera’a. Teie ’itera’a ’oto i fa’aruruhia e au, ’ua riro ïa ’ei ha’api’ira’a tao’a rahi nō’u i te tumu i fa’auehia ai tātou ’eiaha e ha’avā hape ia verā mā.

Tē vai ra ānei i rotopū ia tātou ’o tē ’oto-’ōmo’e-nei, ’oi ’ite mai verā mā i tā rātou mau arora’a huna nō tō rātou ’ite ’ore i te huru ta’ata ’ia ’ite-noa-hia atu ?

’O te Fatu ana’e tei ’ite maite i te fāito mau o te fifi ’ō tā tātou tāta’itahi e amo nei i roto i te horora’a o te orara’a—te teimaha, te tītaura’a ’e te mau patu tā tātou e fa’aruru ’e ’o tā vetahi ’ē e ’ore e ’ite nei i te rahira’a o te taime. ’O ’oia ana’e tē hāro’aro’a maite i te mau pēpē ’e te mau māuiui ’o tei fa’aruruhia e tātou i mua ra ’e ’o tē tāmau noa nei ā i te ha’ape’ape’a ia tātou i teie mahana.

Pinepine tātou i te ha’avā ia tātou iho ma te ’eta’eta ’e te mana’ora’a ē ’o tātou tē tano e ti’a i mua roa i ni’a i te ’ē’a. ’O te Fatu āna’e tei ’ite maite i tō tātou mau ’ōti’a ’e ’aravihi tāta’itahi ’e nō reira ’o ’oia āna’e tei mau i te tura tā’ātō’a nō te fāito i tō tātou ’aravihi.

Te mau tuahine ’e te mau taea’e, ’ia riro tātou mai terā feiā māta’ita’i o te ’ā’amu ’e ’a fa’aitoito ana’e i te tahi ’e te tahi i roto i tā tātou horora’a ’ei pipi, ta’a ’ē noa atu te huru o te mau hete ! E’ita te reira e fa’ahepo ia tātou ’ia ’ōfati i te ture, ’aore rā ’ia fa’ahaere i te fāito ti’a i raro. ’O te piti ïa o te fa’auera’a rahi—’ia here i tō tātou ta’ata tupu mai ia tātou iho. ’E mai tei parau-ato’a-hia e tō tātou Fa’aora : « ’O ’outou i nā reira i te hō’ē taea’e iti ha’iha’i roa i roto i tā’u mau taea’e nei, ’ua nā reira mai ïa ’outou iā’u nei », nō te maita’i ’aore rā nō te ’ino. ’Ua parau ato’a ’oia ia tātou, « ’e mai te mea ’aita ’outou e riro ’ei hō’ē ra, e ’ere ïa ’outou nā’u nei ».

Tē vai ra te taime i roto i tō tātou orara’a tāta’itahi e riro ai tātou ’o te hō’ē ’o tē hina’aro i te tauturu ’e te fa’aitoitora’a. Fafau ana’e i teienei i te rave tāmau i te mea e au nō te tahi ’e te tahi. ’A nā reira ai tātou, e fa’atupu tātou i te hō’ēra’a rahi atu ā ’e e fa’anaho ho’i i te hō’ē vāhi nō te Fa’aora nō te rave i tāna ’ohipa mo’a nō te fa’aorara’a ’e nō te taui ia tātou tāta’itahi.

’Ia ’outou tāta’itahi ’o tē mana’o nei ē, tei muri roa ’outou i teie horora’a o te orara’a tāhuti nei, ’a haere tāmau noa. ’O te Fa’aora ana’e tē ha’avā maite i te vāhi e ti’a ia ’outou ’ia ti’a i teie taime, ’ua ’ī ’oia i te aroha ’e te parauti’a. ’O ’oia te Ha’ava Rahi o te horora’a o te orara’a ’e ’o ’oia ana’e tē hāro’aro’a māite i te fāito o te fifi ’o tā ’outou e fa’aruru nō te horo, ’aore rā nō te haere ’aore rā nō te fa’ataere. E tau’a ’oia i tō ’outou mau paruparu, tō ’outou ’aravihi, tō ’outou mau ’ite i te huru o te orara’a ’e te mau hōpoi’a ’ōmo’e tā ’outou e amo nei, ē tae noa atu i te mau hina’aro ’o tō ’outou ’ā’au. E nehenehe ato’a ’outou e tūpa’i i te tai’o ūati māere nā te ao nei. ’Eiaha e fa’aea i te ti’aturi. ’A tāmau i te horo ! ’A fa’aea mai ! E faufa’a tō ’outou. Tē hina’aro nei te Fatu ia ’outou, ’e tē hina’aro nei mātou ia ’outou !

E aha noa atu te vāhi e orahia nei e ’outou i te ao nei, e aha noa atu te āteara’a, ’a ha’amana’o ē ’ua mātau maite tō ’outou Metua i te ao ra ia ’outou, ē tae noa atu i tō ’outou Fa’aora ’e ’ua here maite rāua ia ’outou. ’Outou, e’ita roa ïa e mo’ehia ia Rāua. Tē hina’aro nei Rāua ’ia ho’i mai ’outou i te fare.

’A tūtonu i ni’a i te Fa’aora. ’O ’oia tō ’outou ’āuri tāpe’ara’a. ’Eiaha e fa’aru’e iāna. Tē fa’a’ite pāpū nei au ē, tē ora nei ’oia ’e e nehenehe ’outou e ti’aturi iāna. Tē fa’a’ite pāpū ato’a nei au ē, tē fa’aitoito nei ’oia ia ’outou.

’Ia ha’amaita’ihia tātou pā’āto’a i te pe’era’a i te hi’ora’a o te Fa’aora ’e ’ia fa’aitoito i te tahi ’e te tahi ’o tā’u ïa pure i te i’oa o Iesu Mesia, ’āmene.