Te arata’ira’a nō te parau ’āpī maita’i

’Ahiri ē ’ua haere a’ena ’ōutou i tō’u fenua nō Louisiane, ’ua ’ite ïa ’outou i te raura’a o tā mātou mau mā’a mōmona : gombo, jambalaya, étouffée ’e tē vai fa’ahou ā.

I te tahi mau taime, e mea au nā’u ’ia tunu i te hō’ē o te reira mau mā’a mōmona. Te tuha’a hope’a i muri mai i te ’āno’ino’ira’a i te mau mā’a ota ’e te pe’era’a i te mau arata’ira’a, ’o te tāmatara’a hope’a ïa nō te ’ite ē ’aita ānei e mea e ma’iri ra. I terā tāime, mai te au ra ē tē fa’aro’o ra vau i te mau tūtu ’aravihi ’ia muhumuhu mai « ’A tu’u atu ā i te Tony’s i roto ». E poapoa creole te Tony’s tei hāmanihia i Opelousas, Louisiane, tō’u ’oire ’āi’a. E fa’a’ōhipa-pinepine-hia te reira « mā’a ’ōmo’e » nō te fa’a’āfaro i te mau hapehape i ravehia ’a pe’e ai i te parau arata’ira’a.

’Ua fāna’o roa māua tā’u vahine ’o Michelle ’ia tāvini ’ei fa’atere misiōni i Louisiane. E peu tumu nā māua ’ia ha’api’i atu i te mau misiōnare ’ia tunu i tāna jambalaya tā’a ’e i te ru’i hope’a nō rātou hou ’a ho’i atu ai i tō rātou mau ’utuāfare. Hau atu i tō rātou mau ’itera’a pāpu nō ni’a i te ’evanelia i fa’aho’ihia mai a Iesu Mesia, e ho’i atu tā māua mau misiōnare ma te au maita’i i te mau mā’a.

Tau ’āva’e i ma’iri a’enei, tē fefeu ra vau i te Vaira’a buka nūmeri a te ’Ēkālesia ’e ’ua ’ite atu vau i te hō’ē pū’oi numeri nō te ha’aputura’a vīteo poto Mau ’āparaura’a ’e te peresideni Russell M. Nelson. ’Ua haru tō’u mata i te upo’o parau o taua mau vīteo poto ra ’e ’ua ’ata’ata vau. ’Oia ho’i « Te mau pāpa’ira’a mo’a, e mau arata’ira’a [recettes] ïa nā te Atua nō te orara’a ’oa’oa ». ’Ua pata ’oi’oi atu vau i taua video ra e piti minuti te roa ’e ’ua māta’ita’i au i te peresideni Nelson ’ia ha’api’i atu i te hō’ē pupu tamari’i Paraimere i te hō’ē poro’i ’ōhie ’e te pūai nō nāhea ’ia ora ’oa’oa. ’Ua ha’api’i ’oia : « ’Ia hāmani ’outou i te farāoa monamona e pe’e ’outou i te mau arata’ira’a, e ’ere ānei ? ’E e roa’a mai te farāoa maita’i, e ’ere ānei ? »

’Ua parau ā oia, nō ni’a i te 95ra’a o tōna matahiti e fātata mai ra: « E parau mai te ta’ata, ‘E aha tā ’oe e ’amu ? E aha tā ’oe rāve’a ’ōmo’e’ ? » ’Ua pāhono ’ōia : « Te rāve’a ’ōmo’e o te mau pāpa’ira’a mo’a ïa » E ti’a ia ’outou ’ia tai’o ’e ’ia tāmata ».

Nō reira, terā ïa. Te tāviri ’ōhie nō te hō’ē orara’a ’oa’oa ’o te pe’e-noa-ra’a ïa i te arata’ira’a a te Atua i fa’a’ite-maita’i-hia i roto i te mau pāpa’ira’a mo’a. E parau vau i te reira « Te arata’ira’a nō te parau ’āpī maita’i ».

E aha tā ’oe e rave ’ia hape ana’e te hō’ē vāhi ’a pe’e ai ’oe i te arata’ira’a ? ’Aua’a a’e, tē vai nei i roto i te arata’ira’a nō te parau ’āpī maita’i « te mea huna » e ha’amanuia noa ia ’ōe i te pae hope’a. ’O Iesu Mesia iho te pāhonora’a i te mau taime ato’a.

I tō’u mana’o, tē vai nei te mau tāime e mana’o tātou ē ’āita tā tātou mau mā’a nō te tūtu [ingrédients] i tano maita’i, ’aore rā tē fifi nei tātou ’ia pe’e i te mau arata’ira’a, ’aore rā tē rave nei paha tātou i te hō’e mea ma te nanera’a, ’aore rā tē tupu nei te hō’e mea nā rāpae atu i tā tātou fa’anahora’a, ’e rau atu ā.

E aha te rāve’a ? ’Oia ho’i te tu’u-fa’ahou-ra’a ïa i te mea e fa’aō mai ia Iesu Mesia i roto i tō ’oūtou orara’a.

Nō reira, mea nāhea ’ia tu’u fa’ahou atu ā ia Iesu Mesia i roto i tō ’oūtou orara’a ?

’Ei peresideni misiōni, e ’oa’oara’a ta’a ’ē nō’u i te fārerei-tāmau-ra’a i te mau misiōnare tāta’itahi i te mau hepetoma e ono ato’a. I roto i taua mau fārereira’a, e mea mātauhia nō te mau misiōnare ’ia ’imi i te mau arata’ira’a nō ni’a i te ha’amaita’ira’a i tō rātou mau hoara’a.

I te hō’ē taime, ’ua haere mai te hō’ē misiōnare i tāna uiuira’a ’e ’ua pārahi mai. Nā roto noa i tōna huru tino, ’ua ’ite au ē tē teimaha nei tōna ferurira’a. ’Ua ui atu vau: « Elder, e aha tā ’ōe e hina’aro ’ia ’āparau tāua ? » ’Ua fa’a’ite mai ra ’oia i te mau tāmatara’a tāna e fa’aruru ra i pīha’i iho i tōna hoa misiōnare ’e te paura’a tō rāua itoito i roto i te ’ōhipa misiōnare. Ma te roimata i roto i tōna mata, ’ua hi’o mai ’oia iā’u ma te ui mai : « Peresideni, e aha vau nei e rave ? »

I terā tāime, ’aita roa vau i ’ite ’ia pāhono atu. Te hō’ē tāime poto i muri mai, ’ua ani au e au ānei nāna ’ia pure ’āmui māua nō te arata’ira’a a te Vārua. ’Ua fa’ari’i ’oia ’e ’ua tūturi māua ’e ’ua pure ’ia fa’auruhia.

I muri mai i te pure, ’ua vai tūturi noa māua ’e ’ua pārahi i ni’a i tō māua parahira’a ma te hi’o mata te tahi i te tahi. ’Ua ui au e au ānei ’ia tai’o māua i te hō’ē ’īrava. I tō māua tātarara’a i tā māua mau buka pāpa’ira’a mo’a, ’ua fa’aea vau e ’ua parau atu iāna, « Elder, ’ia tāi’o ana’e tāua, ’a ui ia ’oe iho i teie uira’a i muri nei : Mai te mea e ora vau i teie mau mea, e maita’i ānei tō māua hoara’a ’e tā māua tāvinira’a misiōnare ? »

I reira ’ua ’itea ia māua Moroni 7:45 ’e ’ua tai’o pūai : « E fa’a’oroma’ira’a roa tō te aroha ’e te hāmani maita’i, e ’ore te aroha e fe’i’i, e ’ore te aroha e fa’arahi, e’ita e ’imi i te maita’i nōna iho, e’ita e riri vave, e’ita e mana’o ’ino ia vetahi ’ē, e’ita e ’oa’oa i te parauti’a ’ore e ’oa’oa rā i te parau mau, e fa’a’oroma’i i te mau mea ato’a ra, e fa’aro’o i te mau mea ato’a ra, e tīa’i i te mau mea ato’a ra, e ha’amahu i te mau mea ato’a ra.

Fāriu mai ra te elder iā’u ma te roimata i tōna mata ’e ’ua parau mai, « ’Oia mau e peresideni, terā rā e mea fifi ’ia rave ». ’Ua fa’ari’i au i tōna mana’o ’e ’ua fa’aha’amana’o atu ē e tamaiti ’oia nā Te Atua, ma te rāve’a hanahana nō te rave atu i te reira ’e Te Fatu.

I muri mai ’ua paraparau poto māua i te parabole nō te ’ē’a pa’i’uma i ha’api’ihia mai e Elder Clark G. Gilbert, tei fa’aha’amana’o mai ia tātou i te tītaura’a ’ia ha’amata i te vāhi i reira tātou ’e, ma te ’āpe’ehia ’e Te Fatu, ’ia haere i mua ’e i ni’a ma te poupou. ’Ua ta’a iā’u ē tē vai teimaha noa ā ra ’oia i te mau tītaura’a i muri mai, nō reira ’ua ani au iāna ’ia fa’ata’a mai i tōna hāro’aro’ara’a i te parau pāpa’i « nā roto i te mau mea iti ’e te pāpū e fa’atupuhia ai te mau mea rarahi ». ’Ua ha’apāpū mai ra ’oia i te aura’a o te reira ha’api’ira’a ’oia ho’i, ’ia rave ana’e i te mau mea iti ’e te pāpū, e tupu mai te mea rarahi. ’Ua ani au iāna ’ia feruri ’e ’ia fa’a’ite mai e piti nā mea iti ’e te pāpū tāna e rave nō te riro mai ’ei hoa maita’i nō tōna hoa misiōnare.

Tau tāime i muri mai, ’ua fa’a’ite mai ’oia i tōna mau mana’o. I reira, ’ua ani au iāna ’ia feruri ’e ’ia fa’a’ite mai e piti nā mea iti ’e te pāpu tāna e rave nō te fa’a’oroma’i i pīha’i iho i tōna hoa. ’Ua fa’a’ite ’oi’oi roa mai ’oia i tōna mau mana’o. E mea māramarama ē ’ua feruri na ’oia i te reira hou tō māua fārereira’a. ’Ua ani atu vau iāna ’ia pure i te Atua nō taua mau mea nei ’e ’ia ani i te ha’apāpūra’a, te arata’ira’a ’e te fa’aurura’a nō te fa’atupu i tāna fa’a’otira’a ma te hina’aro mau. ’Ua fa’ari’i ’oia i te reira. Hou māua ’a ta’a ’ē ai, ’ua ani au ’ia fa’atae mai i te hō’ē parau fa’a’ite poto noa nā roto i tāna rata tāhepetoma.

I te mau hepetoma i muri iho, ’ua ’ite au i te huru maita’i mai ra te mau mea nā roto i tāna mau rata tāhepetoma. ’Eiaha noa i roto i tāna mau rata tāhepetoma, i roto ato’a rā i te mau rata tāhepetoma a tōna hoa. I tō māua uiuira’a i muri mai, ’ua ’ite au i te ta’a-’e-ra’a hōhonu i roto i tōna hōho’a mata ’e te vārua. ’Ua ui atu vau iāna : « ’A parau mai na, Elder, mea mau ānei ē e ’ore roa te aroha e mou » ? ’Ua pāhono mai ’oia ma te mata ’ata’ata, « ’Oia mau, ’e nā roto i te mau mea iti ’e te pāpū ra e fa’atupuhia ai te mau mea rarahi ».

’A ha’apa’o noa ai ’outou i te arata’ira’a nō te parau ’āpī maita’i nō te orara’a ’oa’oa, ’a ha’amana’o i te ha’api’ira’a a te peresideni Nelson, « Noa atu te huru o tā ’outou mau uira’a ’aore rā tō ’outou mau fifi, e ’ite-tāmau-hia te pāhonora’a i roto i te orara’a ’e te mau ha’api’ira’a a Iesu Mesia. » ’A ha’api’i hau atu nō ni’a i tāna Tāra’ehara, tōna here, tōna maita’i, tāna ha’api’ira’a tumu, ’e tāna ’evanelia i fa’aho’i-fa’ahou-hia mai nō te fa’aora ’e nō te haere i mua. ’A fāriu atu i ni’a iāna ! ’A pe’e iāna ! »

’Ia hina’aro ’outou e « fa’aro’o iāna » ’e ’ia ’ite nāhea ’ia fa’ahaere mai ia Iesu Mesia i roto i tō ’outou orara’a, ’a feruri i te mau ta’ahira’a tā te peresideni Nelson i ha’api’i mai nō ni’a i te heheura’a o te ta’ata iho :

« ’A ’imi i te hō’ē vāhi hau i reira e ti’a ia ’outou ’ia haere tāmau ai. E fa’aha’eha’a ia ’outou iho i mua i te Atua. ’A nīni’i atu i tō ’outou ’ā’au i tō ’outou Metua i te ao ra. ’A fāriu i ni’a iāna nō te pāhonora’a ’e te tāmāhanahanara’a.

« E pure nā roto i te i’oa o Iesu Mesia nō ni’a i tō ’outou mau māna’ona’ora’a, mau mata’u ’e mau paruparu—’oia, te hia’ai mau o tō ’outou ’ā’au. ’Ei reira e fa’aro’o ai ! ’A pāpa’i i te mau mana’o e tae mai i roto i tō ’outou ferurira’a. ’A pāpa’i i tō ’outou mau mana’o ’e ’a pe’e i te reira nā roto i te ’ohipa tei fa’auruhia ’outou ’ia rave. Mai te mea e tāmau noa ’outou i teie ’ohipa i terā mahana ’e terā mahana, i terā ’āva’e ’e terā ’āva’e, i terā matahiti ’e terā matahiti, ’e tupu ïa ’outou i te rahi i roto i te parau tumu o te heheura’a ».

Tē fa’a’ite pāpū nei au ē, ’o Iesu Mesia tō tātou Fa’aora ’e tō tātou Tāra’ehara. « ’Ua fa’aoti [’oia] i te mau mea ato’a i tītauhia ’ia ho’i tātou i tō [tātou] Metua i te ra’i ». Na roto i te i’oa o Iesu Mesia, ’āmene.