’Ia fa’ateiteihia te tā’āto’ara’a

’Ei mero nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ha’amaita’ihia e te ’āpe’e o te hō’ē melo nō te Atuara’a, e nehenehe tātou e fāna’o i te tauturu a te ta’ata arata’i maita’i roa a’e. ’Ua ’ite te Vārua Maita’i i te mau mea ato’a, e fa’a’ite pāpū i te parau mau, ’e e « fa’a’ite fa’ahou mai ’oia ia ’outou i te mau mea ato’a ». Pinepine te peresideni Russell M. Nelson i te parau mai nō te faufa’a rahi ’ia fa’aro’o i te reo o te Fatu. ’Ua ha’api’i ’oia ia tātou e nāhea ’ia ani i te arata’ira’a a te Vārua Maita’i ’e ’ua tāparu ia tātou e rave rahi taime ’ia fa’arahi atu i tō tātou ’aravihi pae vārua nō te fa’ari’i i te heheura’a.

I teienei mahana, tē ’ani nei au ia ’outou ’ia mātutu i te ti’ara’a o te Vārua Maita’i, i roto ihoā ra i te ’apora’a mai ’e te ha’api’ira’a i te ’evanelia i te ’utuāfare ’e i te fare purera’a. E hōro’ahia mai te Vārua Maita’i nā roto i te pure o te fa’aro’o ’e tā tātou tūtavara’a ’ia ora ma te ti’amā i teie hōro’a tao’a rahi. Tē fa’a’ite nei te buka ha’api’ira’a fa’auruhia a te ’Ēkālesia, Te Ha’api’ira’a mai tā te Fa’aorae rave rahi parau tumu tā te Fatu i ha’amau ’o tē tauturu ’ia ani i te fa’aurura’a a te Vārua Maita’i.

Hō’ē o teie mau parau tumu ’o te ani-manihini-ra’a ïa ’ia ’apo itoito mai. I mūta’a ra, ’ua nehenehe ia tātou e feruri i te ha’api’ira’a mai te hō’ē rāve’a nō te hō’ē metua ’aore rā, te ’orometua ha’api’i ’ia ani manihini i te Vārua i roto i tā rātou iho fa’a’ine’inera’a ’e i muri iho te fa’a’itera’a i te mea tā rātou i ’apo mai i te mau tamari’i ’aore rā i te mau melo o te piha, tō rātou ti’ara’a o te fa’aro’ora’a ïa. Terā rā e mea manuia roa atu ā mai te peu tātou, te mau pīahi, e haere ineine ato’a mai ’e ’ia fa’atupu ana’e te mau ’orometua i te mau ’ohipa i tupu o te ’apora’a mai ’o te ha’afaufa’a i te heheura’a o te ta’ata iho ’āfaro roa i tō tātou ’ā’au ’e tō tātou ferurira’a. I muri iho, ’ia roa’a ana’e ia tātou te rāve’a nō te fa’a’ite i te mea tā tātou i ’apo mai nō roto i tā tātou ’imira’a maite ’e nā roto mai i te Vārua Maita’i, e tauturu tātou i te tahi ’e te tahi ’ia ha’api’ihia ’e ’ia fa’ateiteihia. ’A fa’a’ohipa ai tātou i te mau parau tumu o te ’evanelia, e fa’a’ite pāpū fa’ahou mai te Vārua i tō rātou parau mau.

Mai te mau mea ato’a, ’o Iesu Mesia te hi’ora’a parauti’a roa a’e. ’Ua ani mai ’oia ia tātou tāta’itahi ’ia riro ’ei mau pīahi itoito ’e ’ia amo i te hōpoi’a nō tā tātou iho ’itera’a pāpū. ’Ua ani mai ’oia i tāna mau pipi ’ia fa’a’ine’ine nō te ’apo mai, ’ia fa’a’ite i te mea tā rātou i ’apo mai, ’e ’ia ’ohipa ma te fa’aro’o. ’Ua pure ’oia nō rātou, ’ua ’ite i tō rātou fāito pūai hanahana, tē fa’aro’o nei ia rātou, ’e tē tauturu nei ia rātou ’ia ’ite ē, ’ua here-mau-hia rātou ’e e hina’arohia rātou.

’Ei ’orometua, e nehenehe tātou e rōtahi atu ā i ni’a i te nu’ura’a i mua o te feiā ’apo mai, te pāhonora’a i tō rātou mau hina’aro, ’e te tauturura’a ia rātou ’ia fa’ananea i te mau huru pae vārua nō te roara’a o te ti’ara’a pipi. ’Ei mau pīahi, ’ia fa’a’ohipa ana’e tātou i tō tātou ti’amāra’a i roto i te fa’anahora’a nō te ’apora’a mai, ha’api’ira’a, e fa’a’ite tātou i te Vārua Maita’i i tō tātou hina’aro ’ia ha’api’ihia tātou e āna.

’Ua mauruuru vau nō te hō’ē ’orometua tei ani mai iā’u ’ia riro ’ei pīahi maita’i a’e. I tō’u ha’amatara’a te ha’api’ira’a tuatoru, ’ua mana’o hape au ē ’ua riro te fare ha’api’ira’a ’ei hō’ē tāmatara’a e fa’aruru ’ia nehenehe e rave i te ’ohipa tū’aro. I te hō’ē mahana, i muri a’e i te tai’ora’a i te hō’ē ’ohipa ha’api’ira’a ’o tā’u i pāpa’i, ’ua parau tō’u ’orometua ha’api’i iā’u ē, tē mana’o nei ’oia e mea ’aravihi au nō te hi’opo’a. ’Aita roa vau i ta’a e aha te aura’a o te reira. ’Ua nā ’ō mai ’oia ē, nā roto i te mau tauto’ora’a pāpū, e nehenehe au e riro mai ’ei pīahi maita’i. ’Aita roa teie mana’o i nā roto mai i tō’u ferurira’a. ’Ua taui tōna tāu’ara’a iā’u, tāna mau fa’aitoitora’a ’e tāna mau anira’a manihini i te roara’a o tā’u ha’api’ira’a ’e ’ua ha’amaita’i-rahi-hia tō’u orara’a.

Te tahi atu parau tumu tano maita’i nō te ani manihini i te Vārua Maita’i ’o te ha’api’ira’a ïa i te ha’api’ira’a tumu mau. Te aura’a o te reira, ’ia a’ahia tā tātou ’imi-maite-ra’a ’e tā tātou ha’api’ira’a i te ’evanelia i roto i te parau a te Atua ’e ’eiaha tātou e rave i te fa’ahuru-’ē-ra’a ’aore rā i te parau-ti’a-’ore-ra’a nō ni’a i te mea tā te Fatu i ’ore i heheu mai. Maori rā, ’ia fa’atumu tātou i ni’a i te mau parau tumu o te ’evanelia faufa’a a’e ’e te mure ’ore, ’o te fa’ati’a i te Vārua ’ia fa’a’ite pāpū mai i te parau mau. Fa’ahou ā, tē pe’e nei tātou i te hi’ora’a o te Fa’aora. ’Ua parau mai ’oia, « e ’ere i tā’u tā’u e ha’api’i nei, nāna rā nā tei tono mai ’iā’u nei ».

E ’itehia te ha’api’ira’a tumu mau i roto i te mau pāpa’ira’a mo’a ’e te mau ha’api’ira’a a te mau peropheta nō teie ’anotau. Te a’ora’a a te Fatu ’ia ’imi maite te ta’ata hō’ē i te mau pāpa’ira’a mo’a ’e ’ei ’utuāfare ’e e haere i te purera’a i te mau hepetoma tāta’itahi nō te ’imi maite i tāna ’evanelia, e hōpoi mai i te hō’ē fa’anahora’a fa’ahiahia nō te ’apo mai i tāna ha’api’ira’a tumu ’e te fa’aro’ora’a i tōna reo. E pā’imi tātou i te mau pāpa’ira’a mo’a ’ia māramarama i te parau pāpa’i, te parau tumu tā rātou e ha’api’i nei, ’e te fa’a’ohipara’a i teie mau parau mau i roto i tō tātou orara’a. ’Auē ïa ha’amaita’ira’a ’ia fa’ari’i i te mau pāpa’ira’a mo’a i roto i tō tātou rima. ’A feruri na ia Adamu rāua Eva, ’o Abinadi, ’aore rā ’oia ato’a te ’Orometua nui ’o Iesu Mesia, e haere mai ra i tō tātou fare ’aore rā i te piha ha’api’ira’a nō te ha’api’i ia tātou. E nehenehe rātou e na reira ’ia fa’a’amua tātou ia tātou i te mau parau a te Atua. Ma te tauto’ora’a tāmau, e nehenehe tātou e ’apo mai nō te hāro’aro’a ’e nō te here i te mau pāpa’ira’a mo’a ’e ’ia ti’aturi ē tē vai nei te mau pāhonora’a i te mau uira’a o tō rātou vairua.

I te hō’ē taime hou tō māua fa’aipoipora’a, ’a tūtava ai tā’u vahine ’o Kristi nō te putapū i te aroha o te Metua i te ao ra ’e ’ia hāro’aro’a i tāna ’ōpuara’a nōna. ’A pure ai ’oia nō te arata’ira’a, ’ua fā mai te hō’ē mana’o iāna e tītauhia iāna ’ia ’āmui atu i te institut, nō reira ’ua tāpa’o atu ’oia iāna i roto i te piha nō te Faufa’a ’āpī. Tē huru ra ’a ha’api’i ai tāna ’orometua o te institut nā roto mai i te mau pāpa’ira’a mo’a, oia ato’a te huru ’a paraparau ai nō te reira, e fa’a’ite pāpū ra i tōna here nō te parau a te Atua. ’A haere noa ai ’oia i te institut, ’ua muhumuhu mai te Vārua Maita’i iāna ē tē vai ra te tahi mea i roto i te pāpa’ira’a mo’a ’o tāna e hina’aro nei. ’Ua fa’atupu te here o tāna ’orometua nō te mau pāpa’ira’a mo’a ’e te mau fa’aurura’a a te Vārua Maita’i, i te hina’aro iāna ’ia rave i te hō’ē ’imira’a maite hōhonu i te parau a te Atua—’o tei riro mai ’ei hō’ē rāterera’a nō te orara’a tā’āto’a ’o tei fa’ahōhonu i te fa’afāriura’a ’e te tāvinira’a ha’amo’ahia.

Te hōpe’a, mai tā te Ha’api’ira’a mai tā tē Fa’aora e parau nei, tā tātou ha’api’ira’a ’e tā tātou ’apora’a mai e ti’a roa ’ia fa’atumuhia i ni’a ia Iesu Mesia. E nehenehe tātou e paraparau pinepine atu ā nōna ’e ma te tura atu ā ’e ’ia ’imi hau atu i te mau rāve’a nō te fa’a’ite i tō tātou ’itera’a pāpū, te māuruuru ’e te here nōna. Ta’a noa atu te tupura’a ’ohipa, ’a ha’amana’o ai tātou iāna, e nehenehe tātou e fa’ari’i i « tōna Vārua i pīha’i iho ia [tātou] ».

Hō’ē rāveʼa nō te tuʼu ia Iesu Mesia i rōpū i tā tātou haʼapiʼiraʼa ʼo te ha’apāpūra’a ïa ē ʼo ʼoia te hiʼoraʼa maitaʼi roa a’e, te faʼaʼiteraʼa ’e te haere’a o te mau parau tumu atoʼa o te ʼevanelia. Noa atu ē, ʼaita ’oia i faʼahiti-tiʼa-hia i roto i te hōʼē ʼāʼamu o te pāpa’ira’a mo’a, e nehenehe tātou e fa’ahiti iāna mai te hi’ora’a nō te parau tumu e ha’api’ihia ra. E nehenehe noa tātou e ui atu, « e nehenehe ānei ’outou e feruri i te hō’ē taime ’a fa’ahōho’a ai Iesu Mesia i teie parau tumu ? »

E nehenehe ato’a tātou e fa’atumu i ni’a iāna ma te ’apora’a mai i tōna upo’o parau, tōna ti’ara’a ’e tōna mau huru, ma te ’imira’a ’eiaha noa nō te ’apo mai i te mea tāna i rave ’oia ato’a rā ’ia māramarama maita’i a’e ’o vai ’oia. ’Ei hi’ora’a, ’ia ’imi maite ana’e tātou i te parau tumu nō te tātarahapa, mea faufa’a roa ’ia haro’aro’a e nāhea ’ia tātarahapa. Terā rā, e mea faufa’a ato’a ’ia ha’amana’o i te mea tā Iesu Mesia i rave nō te fa’ariro i te tātarahapa ’ia tupu ’e ’ia hāro’aro’a i te mea tā tē tātarahapa e ha’api’i nei ia tātou nō ni’a iāna, tōna nātura mau ’e tōna huru ta’a ’ē. E aha tā tātou rāve’a nō te tātarahapa e parau nei nō ni’a i tōna here, tōna ha’eha’a ’e tōna aroha, tōna ti’aturira’a i roto i tō tātou fāito pūai hanahana, tōna hina’aro ’ia tusia iāna nō tā tātou mau hara, ’e te ’oa’oa tāna e ’ite nei i roto i te fa’a’orera’a hapa ? ’E te hāro’aro’ara’a i tōna upo’o parau—mai te māmoe a te Atua, te Fa’aora, ’e te Tāote—e tauturu ia tātou i te hi’o ’e te tātarahapa ’o tāna ïa anira’a nō te tāmā, nō te taui ’e nō te fa’aora ia tātou. Te fa’atumura’a i ni’a i te mea tāna i rave nō tātou ’e te mea tā te reira e parau nei ’o vai ’oia, e nehenehe e tauturu ia tātou ’ia fa’ari’i te « fa’aro’o o te arata’i atu i te tātarahapa ».

I te tahi taime, e’ita tātou e ’ite vave i te mau huru o te Fa’aora tei fa’ata’ahia i roto i te hō’ē ’ā’amu o te pāpa’ira’a mo’a. ’Ei hi’ora’a, ’ia taio ana’e tātou nō tō Nephi hāmanira’a i te pahī, e fa’atumu noa tātou i ni’a ia Nephi. Te fa’atumura’a rā i ni’a i te Fa’aora e nehenehe e tauturu ia tātou ’ia hi’o ē ’aita teie ’ā’amu i fa’ata’ahia nō te ha’api’i ia tātou i te tura o Nephi, nō te fa’a’ite rā ia tātou i te huiari’i o te Atua—’ua hōro’a mai ’oia ia tātou te pūai nō te ha’apa’o i tāna mau fa’auera’a ’e ’ua fa’aora ia tātou i te mau taime fifi.

E nehenehe ato’a tātou e fa’atumu i ni’a i te ti’ara’a niu a Iesu Mesia i roto i te fa’anahora’a maita’i roa a’e o te ’oa’oa a te Metua i te ao ra. E nehenehe te reira e taui te terera’a o tō tātou orara’a ’ia hi’o i tō tātou huru orara’a nā roto i te hi’ohipa o te fa’anahora’a mure ’ore a te Atua, maori ra te hi’ora’a i te fa’anahora’a nā roto i te hi’ohipa o tō tātou orara’a i te pae tino nei. E ʼere te ʼevanelia i te hōʼē tābula nō te mau tītaura’a ; ʼe parau ’āpī maita’i rā ē ʼua upo’oti’a Iesu Mesia i ni’a i te hara ʼe te pohe Mea nā roto i tōna aroha rahi maoti te ha’apa’ora’a i tā tātou mau fafaura’a ’e te Atua, tātou e nehenehe ai e ora i roto i te ’oa’oa i teienei ’e ’ia fa’aineine nō te orara’a ’e tō tātou Metua i te ra’i ra i roto i te ao mure ’ore. ’A ha’api’i mai ai tātou i te hi’o i te Metua i te ao ra ’e te Fa’aora i roto i te mau pāpa’ira’a mo’a, e mātau maita’i a’e tātou ia rāua ’e ’e ’ite mai tātou i tō rāua here ’e tō rāua fa’aurura’a tāmau ’e te pūai atu ā i roto i tō tātou orara’a.

E ha’amana’o tāmau noa vau i te Vārua ’o tā’u i putapū ’ei taure’a, i te taime ’a ha’api’i ai tō mātou ’orometua nō te mau mahana hōpe’a o te orara’a o te Fa’aora. ’Ua tauturu ’oia ia mātou ’ia hi’o i te aura’a o te mau tupura’a ’ohipa i roto i te piha i ni’a, i Gesetemane, i Kalavari ’e te menema ta’ata ’ore. ’Ua fa’a’ite mai ’oia i tōna māuruuru hōhonu nō te Fa’aora ’e tōna hina’aro mau ’ia pe’e iāna. ’Ua riro tāna ha’api’ira’a ’ei anira’a i te Vārua Maita’i ’ia fa’a’ite pāpū mai nō Iesu Mesia. ’E te Vārua ’o tā’u i putapū i roto i taua piha ha’api’ira’a ra ’ua fa’ahōhonu i tō’u fa’aro’o ’e te fa’arahi i tō’u here ’e tō’u māuruuru nō te Fa’aora. ’Ua vai noa te fa’aurura’a a teie ’orometua ha’api’i i roto iā’u i te roara’a o tō’u orara’a. Mai tā te tahi atu ’orometua ha’api’i i parau, « ’ua nehenehe ia mātou ’ia tāmahanahana i tō mātou mau rima i te auahi nō tōna fa’aro’o ».

I roto i tō tātou fare ’e tā tātou mau purera’a a te ’Ēkālesia, ’a fa’atumu ai tātou i ni’a ia Iesu Mesia, te ha’api’i nei tātou i tāna ha’api’ira’a tumu, ’e e ’apo mai ma te itoito, e ’ani tātou i te Vārua Maita’i ’ia fa’ahōhonu i tō tātou fa’aro’o i roto ia Iesu Mesia ’e e tauturu ia tātou ’ia riro hau atu ā mai iāna te huru, ’o te fā ïa o te ha’api’ira’a ’e te ’apora’a mai i te ’evanelia.

Tē māuruuru nei au nō te mau ’orometua ato’a i roto i tō’u nei orara’a, mai te mau metua maita’i ’e te feiā fa’atere o te fenua iho ’e te mau ’orometua ha’api’i te mau taea’e ’e te mau tuahine ’o tei pi’ihia nō te ha’api’i ’e nō te fa’a’ite pāpū mai ni’a i teie purupiti, ’o tē tauturunei ia tātou ’ia ’ite ’e ’ia pe’e ia Iesu Mesia. ’E ’ua māuruuru vau nō te Vārua Maita’i, te ta’ata arata’i maita’i roa a’e. Mea nā roto i te Vārua Maita’i i ’ite ai au ē ’ua here te Metua i te ao ra ia tātou ’e e fa’anahora’a maita’i roa a’e tāna nō tātou, ē ’o Iesu ’o te Mesia ïa, te Fa’aora ’e te Tāra’ehara o te ao nei, ’e ’ua fa’aho’i-fa’ahouihia mai tāna ’evanelia ’e tāna ’Ēkālesia. Tē fa’a’ite pāpū nei ma te māuruuru nō teie mau mea ato’a i te i’oa mo’a ’o Iesu Mesia, ’āmene.