’A haere ’e ’a nā reira ato’a
Tē hina’aro nei au e tūra’i i te parau nō te mau misiōnare tei pi’ihia i te tōro’a tāvini. E mau hi’ora’a rātou nō tātou.
I tō te Fa’aora haerera’a i Betesaida, ’ua arata’i mai te tahi mau ta’ata i te hō’ē ta’ata matapō iāna. Pēnei a’e ’ua ti’aturi rātou e ’ite mata roa i te hō’ē semeio. ’Ua « rave atu ra [te Faaora] i te rima o taua ta’ata mataru’i ra, ’arata’i atu ra iāna i rāpae ’au mai i taua ’oire ra » nō te fa’aora iāna ana’e. I te ha’amatara’a, e au ra ē ’aita te rapa’aura’a i manuïa. ’Ua « nana a’era [taua ta’ata ra] i ni’a, ’ua nā ’ō maira, tē ’ite nei au i te ta’ata mai te rā’au ra te huru iā’u, maori rā ’o tē haere. » Ma te aumihi, « ’ua tu’u fa’ahou [Iesu] i te rima i ni’a iho i tōna mata, ’ua fa’anana-fa’ahou atu ra iāna i ni’a. » Nā roto i te tahi atu fa’ati’a’ia a te rima o te Fa’aora, ’ua « ’ite te ta’ata matapō i teie nei … ma te pāpū maita’i. »
Teie te hō’ē noa hi’ora’a nō te huru ha’eha’a o te tāvinira’a i roto i te orara’a o te Fa’aora. Tē fa’aha’amana’o mai nei ’oia ia tātou ē « ’aita oia i haere mai ’ia tāvinihia oia, ’ei tāvini rā » ’e i muri iho, ’ua ani manihini mai ia tātou ’ia pe’e i tōna hi’ora’a nā roto i te haerera’a i te tahi atu ā maile, ma te hōro’a i te feiā e ani mai ia tātou, ’e ma te aroha i tō tātou ta’ata tupu. I tōna uira’ahia : « ’O vai ho’i tō’u ta’ata tupu ? » ’Ua fa’ati’a te Mesia i te parabole nō te ta’ata Sāmāria ma te fa’aue « e haere ’oe, e nā reira ato’a. »
E hi’ora’a nō te tau ’āpī te mau misiōnare a Te ’Ēkālesia a Iesu Mesia i te Feiā Mo’a i te mau Mahana Hope’a nei, nō te ta’ata Sāmāria maita’i tā te Mesia e ani nei ia tātou ’ia riro mai. Tē hina’aro nei au e tūra’i i te parau nō te mau misiōnare tei pi’ihia i te tōro’a tāvini. E hi’ora’a rātou nō tātou, nō te huru te tāvinira’a (1) e ha’amāhorahora i te ’ā’au i te ’evanelia a Iesu Mesia, (2) e fa’ati’a ia tātou pā’āto’a ’ia tāvini noa atu tō tātou vaira’a, ’e (3) e hōpoi mai i te mana o te Mesia i roto i tō tātou orara’a.
’A tahi, e ha’amāhorahora te tāvinira’a i te ’ā’au i te ’evanelia a Iesu Mesia
I te ārea matahiti 91 hou te Mesia, ’ua fa’a’ite te misiōnare nō te Buka a Moromona ’o Amona iāna i te Ari’i Lamoni ma te parau ē : « Tē hina’aro nei au ’ia pārahi i rotopū i teie nei feiā nō te hō’ē taime ri’i [’e ’ia riro] ’ei tāvini nō ’oe » Nō tāna tāvinira’a i te ari’i, ’ua hōro’ahia ia Amona te rāve’a nō te parau « ma te mata’u ’ore [i te Ari’i Lamoni] nā roto i tō vai mana » ’oia i te ravera’a i tāna tāvinira’a. ’Ei fa’aho’ira’a, ’ua fafau mai te ari’i ē « te mau mea ato’a tā [Amona] e hina’aro … [nā te ari’i ïa] e hōro’a atu. » Te anira’a noa ’a Amona maori rā ’ia fa’aro’o te ari’i i te parau poro’i o te ’evanelia ’a Iesu Mesia. Maoti te tāvinira’a ’a Amona « e mau ta’ata e rave rahi tauatini [tei] tātarahapa ».
I teie mahana, tē tāmau nei te tāvinira’a i te arata’i i te ta’ata i te ’evanelia. Tē tāvini ra te tuahine Bevan ’ei misiōnare tōro’a ha’api’i ’a ha’amata ai ’oia i te ro’ohia i te ma’i, ’e ’ua tītauhia ’ia ho’i i te fare nō te rapa’aura’a. ’Aita ’oia i ha’amāuruuruhia, ’ua nehenehe rā ’oia e tāmau noa i te tāvini ’ei misiōnare tōro’a tāvini i tōna fare.
’A haere ai rāua te hō’ē hoa i te hō’ē ’āua, ’ua fa’auruhia te tuahine Bevan rāua te hō’ē hoa ’ia paraparau i te hō’ē metua vahine e maha tamari’i na’ina’i, ’ua taiā ri’i rā rāua ’e reva atu ra te ’utuāfare. I te po’ipo’i a’e, ’ua ho’i mai rāua i terā ’āua, ma te pure ē ’ia haere fa’ahou mai teie ’utuāfare i reira. Ma te semeio, tē pārahi ra te metua vahine i te hō’ē ā vāhi mai te mahana nā mua atu. I taua taime ra, ’ua ha’afātata te tuahine Bevan ’e tōna hoa i te metua vahine, ’ua ha’amātau iāna, ’e ’ua ’ite a’era ē tē hina’aro rahi ra ’oia i te tauturu pae mātēria. ’Ua hōro’a rāua i te tauturu ’e ’ua ani manihini iāna ’ia ’apo atu ā nō ni’a i te ’evanelia.
Nā roto i terā tāvinira’a ’e te anira’a manihini, ’ua bāpetizohia te metua vahine ’e tāna tamari’i matahiapo, ’āpe’ehia e te piti o te tamari’i pa’ari a’e hō’ē matahiti i muri mai. Tē vai itoito noa nei rātou i teie mahana. ’Ua ’ite te tuahine Bevan e ’ohipa fa’auruhia teie nā te ra’i tei « ha’apāpū [iāna] ē tei te vāhi mau [’oia] tā te Atua i hina’aro ’ia ti’a atu [’oia]. »
Mai ia Amona ’e te tuahine Bevan, mai te mea e tāvini tātou ia vetahi ’ē, « e fa’a’ite tātou i te hi’ora’a maita’i ia rātou » ’e e hina’aro rātou ’ia ’ite i te « tumu o te ti’aturira’a i roto ia [tātou] ».
Tē ani manihini nei Iesu ia tātou « e haere ’oe, e nā reira ato’a. »
Te piti, e fa’ati’a te tāvinira’a ia tātou pā’āto’a ’ia tāvini noa atu tō tātou vaira’a
’Ua pi’i te peresideni Russell M. Nelson i « te feiā ’āpī tāne ti’a mā ato’a ’e ’o tē nehenehe, ’ia fa’aineine nō te tāvini i te hō’ē misiōni » ’e i te feiā ’āpī tamāhine ’o tē nehenehe ’ia « pure nō te ’ite e hina’aro ānei te Fatu ’ia rave [rātou] i te hō’ē misiōni. » ’Ua fafau mai ’oia ē nā « tā ’outou fa’aotira’a ’ia tāvini i te hō’ē misiōni, ’oia ho’i te [tōro’a ha’api’i] ānei ’aore rā te [tōro’a tāvini], e riro ïa te reira ’ei ha’amaita’ira’a nō ’outou ’e nō te feiā e rave rahi. » ’Ua taui roa te mau misiōni tōro’a tāvini i te aura’a o te parau ’o tē nehenehe. I teienei, ’o te feiā ’āpī tamāroa ’e te feiā ’āpī tamāhine ti’a mā ato’a ’o tē hina’aro e tāvini i te hō’ē misiōni rave tāmau nō te Fatu tē nehenehe e rave i te reira, e mea varavara roa e’ita e nehenehe.
E hi’ora’a Elder Holgado nō te ta’ata ’o tē nehenehe e tāvini noa atu tōna vaira’a. ’Ua fānauhia ’oia ma te hō’ē ma’i tupuna varavara ’o tei ’ōpani iāna ’ia tāvini i te misiōni tōro’a ha’api’i. ’Ua pi’ihia o Elder Holgado ’ei misiōnare tōro’a tāvini ’e ’ua hōro’a i tōna taime i te fare vaira’a tao’a a te ’episekōpo, i reira ’oia i te tauturura’a i te ta’ata ’ia fa’ari’i i te tauturu tā rātou i hina’aro. ’Ua fa’a’ī ’oia i te mau pa’epa’e, ’ua tāpūtē i te mau pota, ’e ’ua ha’aperehū i te mau ’āfata parau pa’ari.
’A paraparau ai Elder Holgado i roto i te purera’a ’ōro’a i muri a’e i tāna misiōni, ’ua fa’a’ite mai ’oia ē « tē hina’aro nei te Atua i te mau misiōnare tōro’a tāvini. Tē hina’aro nei ’oia i te ta’ata nō te here ’e nō te tāvini ia vetahi ’ē. E ha’aputu teie mau ta’ata i te pāpie haumitira’a, e tāpūtē i te pota, e hāmani i te mau tauiha’a fare, ’e e mea maita’i rātou i ni’a i te ta’ata. »
’Aita e tītauhia ’ia fa’ari’i i te hō’ē fa’auera’a tāvinira’a ’aore rā i te hō’ē tāreta i’oa nō te rave i te maita’i. Tē ’itehia nei te mau ’ohipa tāvinira’a ato’a e te Fa’aora. E nehenehe tātou pā’āto’a e tauturu ia vetahi ’ē ’ia haere mai i te Mesia maoti te tāvinira’a ma te aroha. E nehenehe tātou pā’āto’a e tāvini ia vetahi ’ē nā roto i te i’oa o te Mesia nā roto i te mana o te Vārua Maita’i ’e ’ia ora ’ei hi’ora’a nō te fa’aro’o ia Iesu Mesia. E fa’ati’a te tāvinira’a ia tātou ’ia fa’a’ite ia tātou iho ’ei tusia ora e fa’ari’ihia e te Atua.
Tē ani manihini nei Iesu ia tātou « e haere ’oe, e nā reira ato’a. »
Te toru, e hōpoi mai te tāvinira’a i te mana o te Mesia i roto i tō tātou orara’a
’Ua tāfifi te hō’ē misiōnare ’āpī tei tauihia mai te tōro’a ha’api’i i te tōro’a tāvini, i te tahi mau tāmatara’a ’ōna iho ’e ’ua tītauhia te mana fa’aora māuiui o te Mesia. Nā te tāvinira’a ha’amo’ahia i hōpoi mai i terā mana i roto i tōna orara’a. ’Ua parau ’oia : « ’Ua ’ite au ē ’ia tāfifi ana’e au, e nehenehe au e putapū i te Mesia i te fa’aitoitora’a iā’u. Tē vai ra te tahi mea ta’a ’ē i roto i te ’itera’a iāna i te ha’amaita’ira’a i te ta’ata nā roto i te hō’ē vaira’a mā’a, i roto i te hiero, ’e nā roto i tāna ’evanelia. »
’Ua ha’amata teie misiōnare i te ’ite i te ’oa’oa hōhonu a’e, ’e ’ua ha’amaita’i tōna ’ana’anatae ’āpī iāna ’e i tōna ’utuāfare tā’āto’a. ’Ua tomo rahi atu ā te Vārua i roto i tō rātou ’utuāfare, ’ua haere tāmau noa rātou i te hiero, ’e ’ua riro atu ra te Mesia ’ei tumu rahi a’e i roto i tō rātou ’utuāfare. Tē ti’aturi nei teie misiōnare ē ’ua fa’aora te Mesia i tōna orara’a ’e ’ua ha’amaita’i i tōna ’utuāfare nā roto i te tāvinira’a.
’Ua ha’api’i mai te peresideni Nelson : « ’Ua riro te hina’aro ’ia tāvini ’e ’ia ha’apūai ia vetahi ’ē ’ei tāpa’o nō tōna ineinera’a ’ia fa’aorahia » nā roto i te mana fa’aora o te Fa’aora.
Tē ani manihini nei Iesu ia tātou « e haere ’oe, e nā reira ato’a. »
E mau hi’ora’a te mau misiōnare tōro’a tāvini nō te mau pipi i ha’amo’ahia nā Iesu Mesia
’Ia ha’amaita’ihia ’outou ’aore rā te hō’ē melo o tō ’outou ’utuāfare i te hō’ē pi’ira’a misiōnare tōro’a tāvini, e taime te reira e fa’ahanahana. I teienei, e ti’a fa’ata’ahia a te Fatu Iesu Mesia e ora ra i tō ’outou ’utuāfare. E taui te reira ia ’outou pā’āto’a nō te maita’i. ’Eiaha roa e ’ino’ino i roto i te hō’ē noa atu pi’ira’a ’ia tāvini. E hīmene tātou : « E pe’e au ia ’oe » ’e « E riro vau mai tā ’oe e hina’aro ». Teie te hō’ē rāve’a nō te fa’a’ite ē tē ha’apa’o nei tātou i tā tātou parau !
Ia ’outou pā’āto’a ’o tē tāvini nei, ’e i te feiā ’āpī misiōnare tōro’a tāvini iho ā rā e 4 000, ’ua here mātou ia ’outou ! Mai te mea ’o te mau misiōnare tōro’a ha’api’i te vaha o te Fatu, ’o ’outou ïa, te mau misiōnare tōro’a tāvini, te mau rima a te Fatu, ’e e ’ere ’outou i te mau misiōnare fāito piti. E mea faufa’a ’outou tāta’itahi nō te ha’aputuputura’a o ’Īserāʼela. Tē ha’api’i nei te peresideni Nelson « i te mau taime ato’a e rave tātou i te hō’ē mea ’o tē tauturu i te hō’ē ta’ata … nō te rave ’e nō te ha’apa’o i tā rātou mau fafaura’a i mua i te Atua, tē tauturu nei tātou i te ha’aputuputu ia ’Iserā’ela »
Tē ha’aputuputu nei ’outou te mau misiōnare tōro’a tāvini ia ’Īserā’ela nā roto i te mau rāve’a e rave rahi, ’e tē taui nei tā ’outou tāvinira’a i te orara’a. E mea pinepine ’outou i te ’ore e ’ite ē ’o vai te ta’ata e fāna’o i tā ’outou tāvinira’a, ’ua ’ite rā te Atua. ’A ha’amana’o noa ē, « ’o ’outou [e tāvini] i te hō’ē taea’e iti ha’iha’i roa […] ’ua [tāvini] mai ’ïa ’outou [iāna]. » Tē fa’aro’o nei mātou i tō ’outou reo ’a hōro’a ai ’outou i tō ’outou taime i te mau pū niuniura’a a te ’Ēkālesia ; tē ’ite nei mātou i tō ’outou mata ’ata’ata ’a tauturu ai ’outou i te mau pupu huira’atira ; ’e tē ’ite nei mātou i tō ’outou māramarama ’a tāvini ai ’outou i roto i te mau hiero. Tē fa’a’amu nei ’outou i tei po’ia, tē fa’a’ahu nei i tei taha’a noa, ’e tē hōro’a nei i te inu i tei poihā.
Tītauhia ia tātou pā’āto’a ’ia haere ’e ’ia nā reira ato’a.
’O te tāvinira’a te toto ora nō te mau pipi a Iesu Mesia
E mana tō te tāvinira’a ’ia ha’amahora i te ’ā’au i te ’evanelia ’e e fa’ati’a ia tātou pā’āto’a ’ia hōro’a i tō tātou vārua ato’a i te Mesia. E taui te reira i tō tātou ’ā’au ’ia riro mai iāna te huru, ’e nā roto i te reira, e fa’aitoito tātou ia vetahi ’ē. ’Ua ui te peresideni Nelson i te hō’ē taime, « I roto i teie ao tei tā’irihia e te ’ino pae vārua, e nehenehe ānei i te mau ta’ata … e fa’atupu i te hō’ē ta’a-ē-ra’a ?» Tāna pāhonora’a : « ’E ! […] ‘Te nūna’a fafauhia e te Fatu […] e mauha’a tama’i […] nā roto i te mana o te Atua i roto i te hanahana rahi’ […] ’e nehenehe e fa’ateitei i te orara’a o te mau ta’ata ato’a ». Nā roto i te tāvinira’a, e taui tātou i te ’ā’au—’e i te ao nei.
’Ua « hāmani maita’i haere te Mesia. » ’Ua utuutu ’oia i te feiā ma’i, ’ua fa’ahi’o i te matapō, ’ua haere e fārerei i tei ta’ata’ahihia. ’Ua tunu ’oia i te mā’a, ’ua tauturu i te mau ’ōro’a fa’aipoipora’a, ’e ’ua fa’a’amu i te tauasini ta’ata tei po’ia. ’A pūpū ai tātou i tā tātou tāvinira’a nā roto i te i’oa o te Mesia, e rahi atu ā tō tātou mo’a ’e te ti’amā nō te hōro’a ’o te ora mure ’ore. Tē ora nei Iesu Mesia. ’O ’oia tō’u Fa’aora ’e tō ’outou. ’O ’oia tō tātou Tāra’ehara. ’O ’oia tō tātou hi’ora’a rahi roa a’e nō te aupurura’a. Tē ani manihini nei au ia tātou tāta’itahi ’ia haere ’e ’ia nā reira ato’a. I te i’oa o Iesu Mesia, ’āmene.