Haʼamanaʼo i te māmoe

’O Iesu Mesia te tīa’i māmoe maita’i. E mea faufa’a rahi te nana tāta’itahi nōna. ’Ua fa’anaho ’oia i te tīa’ira’a māmoe ’e ’ua ha’api’i ia tātou nā roto i te parau ’e te ’ohipa i te mau maita’i o te hō’ē tīa’i māmoe maita’i, mai te ’itera’a i te i’oa o tā tātou mau māmoe, te herera’a ia rātou, te ’imira’a i te feiā i mo’e, te fa’a’amura’a ia rātou, ’e, i te pae hope’a, te fa’aho’ira’a mai ia rātou i te fare. Tē tīa’i nei ’oia ia tātou ’ia rave i te hō’ē ā ’ohipa ’ei tāna mau tīa’i māmoe.

E nehenehe tātou e ha’api’i rahi mai nō ni’a i te tāvinira’a mai tā te Fatu nā roto mai i te peropheta tahito—’e te hō’ē tīa’i māmoe fa’ahiahia—Moroni. ’Ua ora ’oia i roto i te hō’ē tau fifi roa, ’aita ’oia i fāna’o i te mau maita’i o te mau niuniu ’āfa’ifa’i, te mau mātini roro uira, ’e te ’itenati. ’Ua manuia rā ’oia i te ha’apa’ora’a i te mau māmoe. Nāhea teie ’ohipa i tupu ai ? Tē vai nei te hō’ē hi’ora’a nō tāna rāve’a i roto i te Moroni 6. Tē tai’o nei tātou ē « ’ua tai’ohia [te mau melo] i rotopū i te mau ta’ata o te ’ēkālesia a te Mesia ; ’e ’ua pāpa’ihia tō rātou mau i’oa, ’ia ha’amana’ohia ’e ’ia fa’a’amuhia rātou i te parau maita’i a te Atua, nō te tāpe’a ia rātou i ni’a i te ’ē’a ti’a ». ʼUa « ha’aputuputu pinepine tō te ’ēkālesia, nō te haʼapae i te māʼa ’e nō te pure, ʼe nō te paraparau te tahi i te tahi nō ni’a i te maitaʼi o tō rātou ra mau vārua » (Moroni 6:4–5 ; e mea ’āpī te ha’afaufa’ara’a).

Nō Moroni, te faufa’a nō ni’a ïa i te mau ta’ata—’oia ho’i tō rātou maui’oa ! ’Ua fa’a’ohipa ’oia i te parau tumu nō te tai’ora’a ’e te tāpurara’a ’ia ha’amana’ohia te tā’āto’ara’a o te mau ta’ata. ’Ua ’itehia te mau ta’ata ato’a tei fifi ’e ’aore rā tei ’ōvere ’ē, ’e ’ua ti’a i te Feiā Mo’a ’ia ’āparau nō ni’a i tō rātou maita’i i roto i te mau ’āpo’ora’a. Mai te tīa’i māmoe tei fa’aru’e i te iva ’ahuru ma iva (’ua pāpū iā’u ē ’ua maita’i ’e ’ua fa’aorahia) ’e ’ua haere e ’imi i tei mo’e (hi’o Luka 15:4–7), ’ua anihia ia tātou ’ia ara maita’i i ni’a i tā tātou mau nana—’ia hi’o ’e ’ia ha’amana’o ’e ’ia haere ’e ’ia nā reira ato’a.

’Ei ti’a fa’atere misiōni i te fenua ’Inidia, tē ha’amana’o nei au i tō’u anira’a i te hō’ē peresideni ’āma’a ’āpī nō ni’a i tāna mau ’ōpuara’a nō te matahiti i muri nei : « E hia rahira’a tāne tā ’oe e fa’aineine nō te fa’ari’i i te Autahu’ara’a ’a Melehizedeka ? » ’Ua pāhono ’oi’oi mai ’oia ē « Hitu ! »

’Ua uiui au e nō hea mai taua nūmera ta’a ’ē ra ! Hou vau ’a nehenehe ai e pāhono atu, ’ua tātara mai ’oia i te hō’ē ’api parau tei pāpa’ihia te mau nūmera hō’ē e tae atu i te hitu i te hiti. I ni’a i nā rēni e pae mātāmua tē vai ra te mau i’oa—te mau ta’ata mau tāna ’e tā tāna pupu peresibutero e haere e tītau manihini ’e e fa’aitoito ’ia fa’ari’i i te ha’amaita’ira’a o te autahu’ara’a i roto i tō rātou orara’a. ’Oia mau, ’ua ani au iāna nō ni’a i te rēni ono ’e te hitu ’aita e i’oa ta’ata i ni’a iho. « Peresideni, » ’ua parau mai ’oia, ma te tā’iri’iri i tōna upo’o ma te aroha, « e mea pāpū e bāpetizo mau ā mātou e piti a’e ta’ata i te taime mātāmua o te matahiti ’o tē nehenehe e fa’ari’i i te autahu’ara’a i te hope’a o te matahiti. » ’Ua māramarama teie ti’a fa’atere fa’ahiahia i te parau tumu nō te tai’ora’a ’e te tāpurara’a.

’Ua fa’anahonaho te Mesia i tāna ’Ēkālesia ’ia riro te ha’amo’era’a i te hō’ē vārua ’ei mea fifi roa, nō te mea e mea faufa’a te ta’ata tāta’itahi nōna. Tē vai ra tō te mau ta’ata tāta’itahi i roto i te pāroita, noa atu tō rātou matahiti ’e ’aore rā tō rātou ’āpeni, e rave rahi mau ti’a’au—te mau tīa’i māmoe—’o tei mā’itihia nō te ha’apa’o ia rātou, nō te ha’amana’o. ’Ei hi’ora’a, ’ua hōro’ahia i te hō’ē taure’are’a tamāroa te hō’ē ’episekōpora’a, te mau taea’e utuutu, te mau tauturu feiā ’āpī pa’ari, te mau ’orometua ha’api’i nō te ha’api’ira’a ’evanelia, te mau peresidenira’a pupu, ’e e rave rahi atu ā—’o tē riro pauroa nei ’ei ’ūpe’a pāruru, tei tā’amuhia i raro a’e i taua taure’are’a ra nō te haru iāna mai te mea e topa ’oia. Noa atu e hō’ē ana’e ’ūpe’a tei tu’u-maita’i-hia, e pāruruhia teie taure’are’a, e ’itehia, ’e e ha’amana’ohia ’oia. Teienei rā, e pinepine tātou i te ’ite ē ’aita e ’ūpe’a i tu’uhia. Tē mo’e pinepine nei te ta’ata i roto i te rūpehu—’e ’aita e ta’ata e tāu’a nei. Nāhea e ti’a ai ia tātou ’ia riro mai ’ei mau tīa’i māmoe maita’i atu ā ? E nehenehe tātou e ha’api’i mai ’ia tai’o ’e ’ia tāpura.

Tē hōro’a mai nei te ’Ēkālesia ia tātou i te mau parau fa’a’ite ’e te mau mauha’a nō te rave i te reira—’ia ha’amana’o. ’Ua riro te parau fa’a’ite e toru ’āva’e (rapport trimestriel) ’ei hi’ora’a maita’i nō te reira. Maoti te reira e nehenehe tātou e tai’o ’e e tāpura i te melo tāta’itahi e rave rahi taime ’e ’ia ’ite i te feiā e mo’e ra ’e ’aore rā, e hina’aro nei i tā tātou tauturu ’e tō tātou here. Tē fa’a’ite nei te tāpura ’ohipa ’e te mau uiuira’a (liste d’actions et d’entretiens) i te mau ta’ata e hina’aro nei i tā tātou ha’apa’ora’a i teie taime, mai te parau fa’a’ite nō ni’a i te huru o te mau parau fa’ati’a nō te hiero ’e te tahi atu mau mea. Tē fa’atumu nei teie mau mauha’a tai’ora’a ’e tāpurara’a ia tātou i ni’a i te mau ta’ata. ’O vai tē hina’aro i te hō’ē pi’ira’a, te hō’ē fa’atōro’ara’a i roto i te autahu’ara’a ’e ’aore rā te tauturu nō te hōpoi i te hō’ē i’oa ’utuāfare i te hiero ? ’O vai tā tātou e nehenehe e tauturu ’ia fa’aineine nō te hō’ē misiōni rave tāmau ? ’O vai tei mo’e i teie ’āva’e ? E tauturu teie mau mauha’a ia tātou ’ia ha’amana’o i te mau ta’ata.

’Ua mātau vau i te hō’ē ’utuāfare nō te fenua Marite tei fa’ari’i i te hō’ē misiōni i ’Āfirita. I te Sābati mātāmua, ’ua tomo rātou i roto i te ’Ēkālesia hō’ē roa o te fenua, i reira tō rātou fa’ari’i-’oa’oa-ra’a-hia. I te hope’a o te po’ipo’i, ’ua pi’ihia te vahine a taua ta’ata ra ’ei peresideni nō te Sotaiete Tauturu ’e ’o taua ta’ata ra te ti’a fa’atere nō te Feiā ’Āpī Tamāroa ! ’Ua ani ’oia i te hō’ē peresideni ’āma’a i rohirohi e hia rahira’a feiā ’āpī tamāroa e vai ra. ’Ua fa’atoro teie ti’a fa’atere ’āpī ha’apa’o maita’i i muri i te piha ’ōro’a ’e ’ua parau, « Terā nā ta’ata to’opiti. » ’Ua fē’ā’a taua ta’ata ra, nō reira ’ua fa’aho’i ’oia i te hō’ē tāpura a te ’āma’a i te fare, ma te ’ite ’oi’oi ē tē vai ra e 20 feiā ’āpī tamāroa i ni’a i te tāpura. ’Ua ho’i ’oia i pīha’i iho i te peresideni ’āma’a ’e ’ua ani e piti nā feiā ’āpī pa’ari itoito tei ’ite e piti reo ’ia tāvini ’ei mau tauturu nōna ’e i muri iho ’ua pārahi i pīha’i iho ia rāua ’e nā tamāroa e piti nō te hi’opo’a fa’ahou i te mau i’oa.

I muri iho ’ua ha’amata teie mau taure’are’a itoito i te rave i te ’ohipa. Tau ’āva’e i ma’iri, ’ua ’itea rātou i te mau tamāroa ato’a i tāpurahia. Ma te i’oa i muri i te tahi, ’ua fa’ari’ihia teie mau māmoe i mo’e e tō rātou mau hoa ’e ’ua fa’a’amuhia rātou i te pae vārua ’e i te pae tino ! I roto i te roara’a e hō’ē matahiti, i te mau Sābati ato’a, e 21 feiā ’āpī tamāroa tei tae mai. Mauruuru i te Atua nō te feiā ’āpī tamāroa tei tai’o ’e tei tāpura.

’Ua haere te hō’ē hoa rahi tō’u ’e tōna ’utuāfare i te hō’ē ’oire rahi i te fenua Marite nō te tāmau i tāna ha’api’ira’a. ’Ua pi’ihia ’oia i reira iho nō te peresideni i te pupu peresibutero. Nō tōna taiā ri’i nō ni’a i tāna uiuira’a mātāmua ’e te peresideni titi, ’ua fa’aoti pāpū ’oia ’ia fa’aineine. ’Ua parau ’oia i te peresideni titi e toru tāna ’ōpuara’a nō te matahiti i muri nei : (1) 90 i ni’a i te hānere utuutura’a, (2) hō’ē ha’api’ira’a ’evanelia rahi i te hepetoma tāta’itahi, ’e (3) te hō’ē ’ātivite pupu tē fa’anaho-maita’i-hia i te ’āva’e tāta’itahi.

Ma te ’ata’ata i ni’a i tō’u hoa, ’ua ani teie peresideni titi pa’ari iāna, « E nehenehe ānei ’oe e fa’ahiti i te i’oa o te hō’ē melo paruparu o te pupu ’o tā ’oe e nehenehe e tauturu ’ia haere i te hiero ’e tōna ’utuāfare i teie matahiti ? » ’Ua hitimahuta roa tō’u hoa i te reira taime. ’Ua feruri maita’i ’oia ’e ’ua ’ite ’oia i te hō’ē i’oa. « ’A pāpa’i i te reira », ’ua fa’aue te peresideni titi. I muri iho ’ua ui teie ti’a fa’atere ’aravihi i te hō’ē ā uira’a e toru taime—’e ’ua hope te uiuira’a. ’Ua haere teie taure’are’a i rāpae i terā uiuira’a ma te ha’api’i mai i te hō’ē o tāna mau ha’api’ira’a rahi roa a’e nō ni’a i te fa’aterera’a ’e te tāvinira’a. ’Ua haere ’oia i te uiuira’a ’e te mau fa’anahora’a, te mau ha’api’ira’a, ’e te mau ’ātivite. ’Ua haere atu ’oia ’e te mau i’oa ! I muri a’e ’ua riro mai teie nā i’oa e maha ’ei tumu rahi nō tāna tāvinira’a ’e nō tāna piha autahu’ara’a.

’Ei ti’a fa’atere misiōni, ’ua haere au e fārerei i te hō’ē o tā’u mau ’āma’a i te hō’ē po’ipo’i Sābati. ’Ua ’ite au ē ’ua tāmau noa te peresideni ’āma’a i te huti mai i te hō’ē tāreta ’api parau mai roto mai i tōna pūtē ’e ’ua pāpa’i i ni’a iho. ’Ua fa’aoti a’era vau e ani iāna nō ni’a i te reira i muri a’e i te pure hope’a. I muri a’e i te putuputura’a, e hou ’a nehenehe ai iā’u ’ia ani nō ni’a i te tāreta, ’ua haere rū te ti’a fa’atere misiōni o te ’āma’a i ni’a i te tahua ’e ’ua hōro’ahia te ’api parau iāna. ’Ua ’āpe’e vitiviti au i teie ti’a fa’atere ’ana’anatae i tāna ’āpo’o-fa’aau-ra’a tāhepetoma nō te ’ohipa misiōnare i te ’āma’a. Hou rātou ’a ha’amata ai, ’ua tātara ’oia i te ’api parau mai roto mai i tōna pūtē. ’Ua ’ī te reira i te mau i’oa o te mau melo tei ma’iri i te purera’a ’ōro’a. Tau minuti noa, ’ua mā’iti te melo tāta’itahi ’o te ’āpo’ora’a i te hō’ē ’e ’aore rā e piti i’oa, ma te fafau e haere e fārerei ia rātou i taua iho mahana nō te ha’apāpū ē e mea maita’i rātou ’e nō te fa’a’ite ia rātou ē ’ua mo’emo’ehia rātou. ’O te reira te tai’ora’a ’e te tāpa’ora’a maita’i.

Tē ha’amana’o nei au i te hō’ē vāhi nohora’a, e rave rahi hora nā te manureva i te ātea i te hiero fātata roa a’e, i reira te fa’a’āpīra’a i te parau fa’ati’a e riro ai ’ei ’ohipa mātāmua roa, noa atu e’ita paha te reira e fa’a’ohipahia. I te Sābati mātāmua o te ’āva’e tāta’itahi, e fa’a’ohipa te feiā fa’atere i tā rātou mau mauha’a tai’ora’a nō te tai’o i tā rātou mau melo tei fa’ari’i i tō rātou ’ōro’a hiero. Mai te mea e ’ite rātou ē ’ua fātata te hō’ē parau fa’ati’a i te hope, e fa’anaho te pāpa’i parau fa’atere (secrétaire exécutif) i te hō’ē uiuira’a nō te fa’a’āpīra’a. Te feiā ’ua hope tā rātou parau fa’ati’a, ’ua paraparauhia nō ni’a ia rātou i roto i te mau ’āpo’ora’a, i muri iho e ’imihia rātou ’ia tauturu ia rātou ’ia ho’i mai i ni’a i te ’ē’a o te fafaura’a. ’Ua ani au e hia rahira’a o tō rātou mau melo tei fa’ari’i i tō rātou ’ōro’a hiero e parau fa’ati’a tā rātou. Te pāhonora’a e tāpa’o maita’i roa e 98,6%. I tō rātou anira’ahia nō ni’a i nā ta’ata e ono tei hope tā rātou parau fa’ati’a, ’ua nehenehe i te feiā fa’atere ’ia fa’a’ite i tō rātou i’oa ’e ’ia fa’ata’a i te mau tūtavara’a tā rātou e rave nō te fa’aho’i mai ia rātou !

Tau matahiti i ma’iri a’enei, ’ua ho’i tō’u ’utuāfare i te fenua Marite. ’Ua ’oa’oa roa mātou i te haerera’a i te purera’a i ’ō nei i muri a’e e 26 matahiti i roto i te mau pupu na’ina’i, ’e te ātea. ’Ua pi’ihia vau ’ei misiōnare pāroita. E ti’a fa’atere misiōni pāroita maita’i tō mātou ’e ’ua rave mātou i te mau mea fa’ahiahia ’e ’ua ha’api’i i te mau ta’ata fa’ahiahia. ’Ua ani au ’ia haere i te hō’ē ’āpo’ora’a pāroita nō te hi’opo’a ’e nō te ani i tā rātou tauturu i te mau hoa tā māua e rave ra i te ’ohipa. ’Ua māere roa vau i te ’itera’a ē ’o te hō’ē noa ’ātivite pāroita i mua nei tei paraparauhia. I muri iho ’ua parau vau i te ti’a fa’atere misiōni pāroita ē ’aita tāna e rāve’a nō te ho’i mai nō te fa’a’ite i te parau nō tō mātou mau ta’ata. Tāna pāhonora’a ? « ’Ā, ’aita vau i rave a’enei i te parau fa’a’ite. »

’Ua fa’aau vau i te reira i te hō’ē ’āpo’ora’a ’āma’a i Lahore, Pātitane, tā’u i haere tau hepetoma nā mua atu. ’Ua pārahi teie pupu iti ’ati a’e i te hō’ē ’amura’a mā’a na’ina’i, ’e tā rātou e ’āparau noa nō te mau ta’ata ïa. Te mau i‘oa. ’Ua paraparau te feiā fa’atere tāta’itahi nō ni’a i tāna fa’aterera’a ’e te mau ta’ata ’e te mau ’utuāfare tāna e ha’ape’ape’a nei. ’Ua fāna’o rātou pā’āto’a i tō rātou mau mana’o nō ni’a i te mau rāve’a maita’i roa a’e nō te ha’amaita’i i te mau ta’ata tā rātou e fa’ahiti ra. ’Ua fa’aineinehia te mau fa’anahora’a ’e ’ua hōro’ahia te mau misiōni. ’Auē ïa ha’api’ira’a fa’ahiahia nō ni’a i te tai’ora’a ’e te tāpurara’a i te i’oa nō roto mai i tō tātou mau taea’e ’e mau tuahine nō te u’i mātāmua.

I roto i te ’Ēkālesia a Iesu Mesia, ’ua ha’api’ihia tātou e te mau peropheta i tahito ra ’e i teie mahana—’e nā roto ato’a i te hōho’a ’o tō tātou Fa’aora—nāhea ’ia aupuru. E rave tātou i te mau i’oa, e ha’amana’o tātou, ’e e paraparau tātou nō ni’a i te maita’i o te mau vārua. Te feiā fa’atere ’o tē rave i te reira e ’ore ïa tā rātou mau tumu parau e pau i roto i tā rātou tāpura ’ohipa i roto i tā rātou mau ’āpo’ora’a tōmite ! E tupu maita’i te parau tumu nō te tai’ora’a ’e te tāpurara’a. Te rāve’a teie a te Fatu. E nehenehe tātou e ha’amaita’i atu ā. Nō te Atua, tei hāmani i te ao nui ’e tei fa’atere i te mau mea ato’a, teie ’ohipa—tāna ’ohipa ’e te hanahana—nāna iho mau ïa. ’E ’ia ti’a ato’a te reira nō tātou tāta’itahi, ’ei mauha’a i roto i tōna rima i roto i tāna ’ohipa māere nō te fa’aorara’a ’e te fa’ateiteira’a. E fa’atupu te reira i te mau semeio i roto i te orara’a o te mau ta’ata mau. I te i’oa ’o Iesu Mesia, ’āmene.