’Ia fa’afaite atu i te Atua

’A tai’o ai au i te mau pāpa’ira’a mo’a, ’ua ’ite atu vau te mau ta’o ’o tei hāru i tō’u ’ara maita’i, nō te mea ihoā ra e aura’a ta’a ’ē tō te reira ’ei hōpe’ara’a nō te ’ohipa tei tupu i roto i tō’u orara’a. ’Ua ’ohipa tāmau vau ’ei tahu’a mātutu faufa’a a te ha’avāra’a. Ma teie ’itera’a, ’ua hāru teie ta’o fa’afaite i tō’u ’ara maita’i i te tai’ora’a i te mau pāpa’ira’a mo’a. Tā’u ’ohipa ’oia ho’i e fa’afaite i te mau faufa’a moni i fa’a’itehia mai ’e te mau pu’e parau nō te pae faufa’a ma te fa’a’ohipa i te mau ’aravihi nō te nūmerara’a, te hi’opo’ara’a ’e te tītorotorora’a. E nehenehe e parau ē, tā’u fā o te fa’atanora’a ïa i te mau parau fa’a’itera’a i ni’a i te mau pu’e parau nō te pae faufa’a ’ia ti’a ’ia ha’apāpūhia te ’āfarora’a mau ’e te manara’a. ’Ua tūtava vau iho i te fa’atītī’aifaro i te mau ta’a-’ē-ra’a ’e e mea pinepine e rave au e rave rahi taime nō te fa’aotira’a i te mau ta’a-’ē-ra’a ri’iri’i.

’Ua ti’aoro te ’āpōsetolo Paulo i te mau Korinetia « ’ia fa’afa’ite atu i te Atua ». ’Ia fa’afaite atu i te Atua, te aura’a ’o te fa’aho’ira’a mai i te au-maita’i-ra’a ’e te Atua, ’aore rā te ha’amaura’a i te hō’ē aura’a ’e te Atua ’o tei tūrori ’aore rā tei pararī nō tā tātou mau hara ’aore rā tā tātou mau ’ohipa. Te parau ’ōhie, ’ia fa’afaite atu i te Atua te aura’a te ’āna’ira’a i tō tātou hina’aro ’e tā tātou ’ohipa i te hina’aro o te Atua ’aore rā, mai tā te peresideni Russell M. Nelson i ha’api’i, ’ia vaiiho i te Atua ’ia upo’oti’a i roto i tō tātou orara’a.

Mai tā te mau pāpa’ira’a mo’a i ha’api’i, e ti’amāra’a tō tātou ’ia rave nā roto ia tātou iho « ’ia mā’iti i te ’ē’a o te pohe mure ’ore, ’aore rā i te ’ē’a o te ora mure ’ore ». Mai te peu rā e ’ere tātou i te mea itoito, e nehenehe teie ti’amāra’a nō te rave nā roto ia tātou iho e arata’i atu ’ia mo’e ia tātou tō tātou ’āna’ira’a ’e te hina’aro o te Atua.

’Ua ha’api’i te peropheta Iakoba ē, ’ia ’ite ana’e tātou ia tātou iho i roto i te ’āmahamahara’a ’aore rā te ’āna’i-’ore-ra’a ’e te Atua, te rāve’a ana’e nō tātou ’ia tae atu i te fa’afaitera’a « ’ia fa’afa’ite atu [ïa] i te [Atua] nā roto i te tāra’ehara o te Mesia ». E ti’a ia tātou ’ia feruri ē, te fa’afaitera’a tei te huru ïa o te aroha, ’oia ho’i e tupu mau te ’ohipa fa’ahiahia o te tāra’ehara a Iesu Mesia i te fa’afaitera’a.

’A feruri ai ’outou i tō ’outou iho orara’a, ’a feruri nā i te hō’ē taime ’ua ’ite ’outou ia ’outou i te āteara’a i te Metua i te ao ra, nō te mea ’ua fa’a’ātea ’ē ’outou iāna. ’Ei hi’ora’a, penei a’e ’ua iti mai tō ’outou itoito i roto i tā ’outou mau pure iāna ’aore rā i te ha’apa’ora’a i tāna mau fa’auera’a. Mai tā tātou e mā’iti nei i te fa’a’ātea ’ē ia tātou i te Atua, e ti’a ia tātou e mā’iti i te ha’amau i te tauto’ora’a ’ia fa’afaite atu. ’Ua ha’apāpū te Fatu i tā tātou hōpoi’a ’a parau ai ’oia, « ’a ha’afātata mai iā’u nei ’e e ha’afatata atu vau ia ’outou na ; ’a ’imi maite noa mai iā’u nei ’e e ’itehia vau ia ’outou na, ’a ani mai ’e e fa’ari’i ïa ’outou ; ’a pātōtō mai ’e e ’īritihia atu ïa ia ’outou na ».

Nāhea te Fa’aora i te tauturu ia tātou ’ia fa’aho’i mai ’e ’ia fa’afaite atu i teie aura’a faufa’a rahi mau ? Nō’u nei, tē nu’u rahi nei au i roto i tō’u tere ’ia fa’afaite atu i te Atua, ’ia pe’e ana’e au i te mau parau a’o a te peresideni Nelson ’e ’ia tātarahapa i te mau mahana ato’a. Te tumu ’oia ho’i, te aura’a o te fa’afaitera’a ’o te fa’aho’i-fa’ahou-ra’a mai ïa i te aura’a tei pararī, i rotopū ihoā ra i te Atua ’e te ta’ata nei, ma te fa’a’orera’a i te pāruru o te hara.

Hō’ē o te mau fa’afaitera’a rahi ’o tā tātou i tai’o i roto i te mau pāpa’ira’a mo’a ’o terā ïa tō Enosa. Te tahi mea i roto i tōna orara’a ’e ’ere i te mea au maita’i i te Atua. ’Ua fa’ahōho’a ’oia i te tītaura’a ’ia tūru’i i ni’a i te tāra’ehara o Iesu Mesia nō te fa’afaite atu i te Atua. ’Ua fa’ata’a ’oia i tōna hina’aro e tātarahapa, tōna ha’eha’a, tāna rōtahira’a ’e tōna hina’aro mau. ’Ua ha’apāpū mai tōna fa’afaitera’a i te Atua ’a tae mai ai te hō’ē reo iāna i te paraura’a ē, « e Enosa, ’ua fa’a’orehia tā ’oe mau hara ’e e ha’amaita’ihia ’oe ». ’Ua ’ite Enosa i te ’ohipa ’o tā te tātarahapa ’e tā te fa’afaitera’a i fa’atupu i ni’a iāna, ’a parau ai ’oia, « ’e ’ua ’ite ho’i au, ’o Enosa ē, ’aita e ti’a i te Atua ’ia parau i te parau ha’avare ; nō reira, ’ua hōroi-’ē-hia tō’u mana’o ’oto ».

E ’āfa’i mai te fa’afaitera’a ’eiaha noa i te tāmarūra’a o te nīno’a mana’o o te hapara’a, i te hau ’ōroto ato’a rā ’e ia vetahi ’ē. E fa’aora te reira i te aura’a, e tāmarū i te mau ’ā’au ’e e ha’apūai i tō tātou ti’ara’a pipi, ma te ha’amara’ara’a i te ti’aturira’a i te Atua. ’O te reira te mea e hōro’a mai iā’u te tīa’ira’a ’e te ti’aturira’a rahi ’o te tahi atu ïa hotu o te fa’afaitera’a tei fa’ata’ahia e Enosa ’a parau ai ’oia,« ’e ’ia fa’aro’o a’era vau, ’o Enosa, i teienei mau parau, ’ua ha’amata ihora tō’u fa’aro’o i te Fatu i te riro ’ei mea ’āueue ’ore ».

I tō’u ’āpīra’a, tē vai ra tā tō’u pāpā rūau i te pae o tō’u māmā hō’ē fa’a’apu tumu tēri rahi. ’Ua fāna’o vau ’ia rave i te ’ohipa i roto i te fa’a’apu, i te tau ve’ave’a ihoā ra, i te taime ’auhunera’a o te mau tēri. ’Ei taure’a ’āpī roa, tā’u noa ’ohipa i reira, ’ua hōro’ahia mai i te hō’ē pākete ’e ’ua tonohia atu vau i ni’a i te tumu rā’au nō te pāfa’i i te mau tēri.

’Ua taui roa te pāfa’ira’a i te mau tēri i te taime ’a ho’o mai ai tō’u pāpā rūau i te hō’ē mātini tei pi’ihia te fa’a’āueuera’a i te mau tēri. E rave teie mātini i te tumu rā’au ’e e fa’a’āueue i te reira, ma te fa’atopa i te mau tēri i roto i te ’ūpe’a e fa’a’ohipahia nō te ’ōhi mai i te mau tēri. ’Ua ’ite atu vau ē, ’ia fa’a’āueue ana’e te mātini i te tumu rā’au, fātata te tā’āto’ara’a o te mau tēri e topa i roto noa te tahi tau tetoni noa. ’Ua ’ite ato’a atu vau ē, ’ia fa’a’āueue-ana’e-hia te tumu rā’au 10 tetoni ’aore rā 1 minuti te māoro, ’aita vetahi mau tēri e topa mai. ’Aita roa atu te reira e ’āueue.

E nehenehe e fa’a’āueue i te mau tēri nō te fa’atopa mai i te reira i te tumu rā’au, maoti ra te mātarara’a te māhu ’etirane (ethylene). ’Ua ha’aparuparu teie ’oromona i te ’ōie o te tērura i rotopū i te tumu o te tēri ’e te tumu rā’au. Nō reira, e mātara ’ōhie noa te tumu o te tēri para i te tumu rā’au nō te mea ’ua paruparu te tū’atira’a.

I roto i te mau pāpa’ira’a mo’a, e ha’api’i mai tātou ē e fa’ahōho’ara’a te tumu o Iese nō te Mesia, ’o Iesu Mesia, ’o tei tohuhia nō roto mai i te huā’ai o Iese, te metua tāne o te ari’i Davida. Mai te māhu ’etirane e ha’aparuparu i te tū’atira’a o te tumu o te tēri para, e nehenehe te ha’apa’o ’ore, te mau fea’a ’e te māta’u e ha’aparuparu i tō tātou tū’atira’a ’e te tumu o Iese, ’aore rā o Iesu Mesia, ’o te fa’a’ōhie ia tātou ’ia fa’a’āueuehia ’e ’ia fa’ata’a-’ē-hia iāna. ’Ei feiā ha’apa’o maita’i tātou, e ti’a ia tātou ’ia ’ara maita’i i te hō’ē ha’aparuparura’a o tō tātou tū’atira’a ia Iesu Mesia.

I roto i te Ha’api’ira’a Tumu ’e te mau Fafaura’a, e fa’ari’i ato’a te feiā ha’apa’o maita’i i te hō’ē fa’aarara’a : « E nehenehe rā i te ta’ata ’ia hi’a atu mai roto atu i te maita’i ’e ’ia fa’aru’e i te Atua ora ». Tē parau fa’ahou ra te Fatu, « oia ïa, ’e ’ia ara ato’a ho’i te feiā i ha’amo’ahia ra ». Nō te tīnai i te topara’a, tē a’o ra te Fatu, « nō reira, ’ia ara tō te ’ēkālesia ma te tu’utu’u ’ore, ’oi topa rātou i roto i te fa’ahemara’a ».

E nehenehe e fa’aau i te huru ’āueuera’a ’ōhie i tā te mau pāpa’ira’a mo’a e fa’ata’a nei mai te parara’a nō te ha’amoura’a, ’e te mau fa’ahōpe’ara’a e tupu nō te mau ’ohipa. E nehenehe ato’a te fa’ahitira’a e fa’a’ohipa rahi atu ā nō te fa’ata’a i te hō’ē huru pēra’a, te huru-’ē-ra’a ’aore rā te topara’a o te fa’ariro i te hō’ē ’ohipa e nehenehe e hi’a mai ’aore rā e ha’amou.

E aha tā teie parara’a e fa’ahōho’a nei ? Te aura’a o te reira e nehenehe ānei tātou e tae i te hō’ē fāito e’ita roa tātou e nehenehe e taui ? ’Aita, tē mana’o nei au te aura’a o te reira e nehenehe tātou e tae i te hō’ē fāito e ’aita tātou e hina’aro e taui. Te rā’au tina’ira’a i mua i te parara’a nō te ha’amoura’a ’o te ravera’a ïa i te mau mea ’o te ha’apūai i tō tātou aura’a ’e Iesu Mesia. Mai tei fa’ahitihia, te tātarahapa ’o tei arata’i ia Enosa i te hō’ē fa’aro’o ’āueue ’ore. Tei roto te pūai i te tātarahapa—te tātarahapara’a tāmau, te vitiviti ’e mai te au. Mai tā te peresideni Nelson i ha’api’i ia tātou, « ’aita e ’ohipa fa’ati’amā a’e ’e te fa’ahanahana a’e ’e te faufa’a a’e nō tō tātou tāta’itahi haerera’a i mua maori rā te fa’atumura’a tāmau ’e te fa’atumura’a tāmahana i ni’a i te tātarahapa ».

Hau atu te porora’a i te tātarahapara’a, ’ua ha’api’i te peropheta Iakoba ’ia vai ara i te rima o te Atua i roto i tō tātou orara’a, te mā’imira’a ’e te fa’ari’ira’a i te heheura’a, ’e te fa’aro’ora’a i te Atua ’a paraparau ai ’oia, teie mau mea ato’a e tauturu ia tatou ’eiaha ’ia ’āueue. ’Ua ha’api’i ato’a Iakoba, « nō reira, ’ua ’imi mātou i tā te mau peropheta ra, ’e tei ia mātou te mau heheura’a e rave rahi ’e te vārua nō te tohu ; ’e nō te mea, tē vai ra teie mau ’itera’a pāpū ia mātou nei, ’ua roa’a ïa ia mātou te ti’aturi, ’e ’ua riro tō mātou fa’aro’o ’ei mea ’āueue ’ore ». Te fa’aro’ora’a ’e te ravera’a mai te au i te mau parau ’e te ani-manihini-ra’a a te mau peropheta ’e te mau ’āpōsetolo, e nehenehe e fa’a’ī ia tātou i te tīa’ira’a, te ti’aturira’a ’e te pūai, ma te fa’ariro i tō tātou fa’aro’o e mea ’āueue ’ore.

’Ua ha’api’i mai au ē te hina’arora’a ’ia fa’afaite atu i te Atua e ti’a ’ia ’āpitihia e te hō’ē hina’aro mau ’ia tātarahapa. Tē tātarahapara’a ’e te ’itera’a i te mau ha’amaita’ira’a nō te tāra’ehara a Iesu Mesia e ara’ta’i atu i te hō’ē fa’aro’o ’āueue ’ore. E arata’i atu te fa’aro’o ’āueue ’ore i te hina’aro mau ’ia fa’afaite atu i te Atua. E hōho’a fa’a’ōhu teie, ’aore rā te tāmau noa.

Te mau taea’e ’e te mau tuahine, tē ani nei au ia ’outou ’ia fa’afaite atu i te Atua nā roto i te tāra’ehara a Iesu Mesia. Tē fa’a’ite pāpū nei au ē, te ravera’a ’e te ha’apa’ora’a i te mau fafaura’a e ha’apūai i tō tātou aura’a ’e te Fa’aora, ma te ’apera’a ho’i ia tātou ’ia riro mai ’ei mea para nō te ha’amoura’a. Tē fa’a’ite pāpū nei ē teie fa’afaitera’a i te Atua, nā roto i te tāraehara a Iesu Mesia, e arata’i atu i te hō’ē fa’aro’o ’āueue ’ore.

’Ua ’ite au ’ua here te Metua i te ao ra ia ’outou ’e iā’u, ’e ’ua tono mai ’oia i tāna Tamaiti here, ia Iesu Mesia, ’ia riro ’ei tō tātou Fa’aora, te Tāra’ehara, ’e te Fa’afaite nui. Tē fa’a’ite pāpū nei nō Iesu Mesia ’e tē nā reira nei au nā roto i te i’oa o Iesu Mesia, ’āmene.