Te mata ’ata’ata ’e te ’ā’au māuruuru
E ’ite-maita’i-roa-hia te ’aravihi o tō tātou feiā mo’a i ’Āfirita, ’a fa’aruru ai rātou i te mau tāmatara’a o te orara’a ’e te mau tītaura’a ’a te hō’ē ’Ēkālesia e tupu ra i te rahi.
Hau ri’i i te hō’ē matahiti i ma’iri a’e nei, ’ua ha’amāuruuruhia vau i tō’u pi’ira’a i roto i te peresidenira’a o te Hitu ’Ahuru, te hō’ē tauira’a tei fa’a’itehia i ’ō nei i te ’āmuira’a rahi. Nō te mea ho’i ’ua tai’ohia tō’u i’oa i pīha’i iho i te i’oa o te huimana fa’atere rahi tei riro mai ’ei feiā fa’aturahia, e rave rahi tei mana’o e tē fa’aoti ato’a ra vau i tā’u taime tāvinira’a. I muri a’e i te ’āmuira’a, ’ua fa’ari’i au e rave rahi poro’i ha’amāuruurura’a ’e te mau mana’o maita’i nō tō’u tuha’a i muri iho i roto i te orara’a. ’Ua pūpū ato’a mai vetahi e ho’o mai i tō’u fare i Roto Miti Apato’erau. E mea au roa ’ia ’ite e mo’ehia vau ’e ’ia ’ite ato’a e e’ita mātou e fifi nō te ho’o atu i tō mātou fare ’ia oti ana’e ta’u tāvinira’a. ’Aita rā vau i tae atu ra i reira.
’Ua ’āfa’i tō’u pi’ira’a ’āpī ia māua ’o Monica i ’Āfirīta nehenehe, i reira te ’Ēkālesia e ruperupe ai. ’Ua riro ’ei ha’amaita’ira’a ’ia tāvini i rotopū i te Feiā Mo’a ha’apa’o maita’i i roto i te Ārea nō ’Āfirīta Apato’a ’e ’ia ’ite i te here o te Fatu ia rātou. E mea fa’auru ’ia hi’o i te mau u’i ’utuāfare nō te mau huru orara’a ato’a, ’e tae noa atu i te mau melo e rave rahi o te ’Ēkālesia ’o tei manuia ’e tei roa’a i te ’ite, ’o tē hōro’a nei i tō rātou taime ’e tō rātou mau tārēni nō te tāvini ia vetahi ’ē.
I te hō’ē ā taime, nō te huira’atira rau o te fenua, e rave rahi ta’ata nava’i ’ore ’o tē tomo mai nei i roto i te ’Ēkālesia ’e ’o tē taui nei i tō rātou orara’a nā roto i te mau ha’amaita’ira’a ’o te ha’apa’o-maita’i-ra’a i te tuha’a ’ahuru ’e te mau rāve’a ha’api’ira’a e pūpūhia nei e te ’Ēkālesia. Te mau fa’anahora’a mai te Succeed in School [Manuiara’a i te Ha’api’ira’a], EnglishConnect, BYU–Pathway, ’e te Faufa’a tāmau nō te ha’api’ira’a, e ha’amaita’i te reira i te mau orara’a e rave rahi, tō te mau u’i ’āpī ihoa rā.
’I parau na te peresideni James E. Faust ē, « ’Ua parauhia ē ’aita teie ’ēkālesia e huti mai nei i te mau ta’ata rarahi, e mea pinepine rā i te fa’ariro i te mau ta’ata ’ei ta’ata rahi. »
E ’ite-maita’i-roa-hia te ’aravihi o tō tātou feiā mo’a i ’Āfirita, ’a fa’aruru ai rātou i te mau tāmatara’a o te orara’a ’e te mau tītaura’a ’a te hō’ē ’Ēkālesia e tupu ra i te rahi. E hi’o noa rātou i te reira ma te mana’o maita’i. E fa’ahōho’a maita’i rātou i te ha’api’ira’a a te peresideni Russell M. Nelson :
« Te ’oa’oa e tae mai, ’aore re’a nō te mea e fa’aruruhia nei pau roa rā nō te mea i ni’a iho e fa’atumuhia ai tō tātou orara’a.
« Tei ni’a te fa’atumura’a o tō tātou orara’a i te fa’anahora’a nō te fa’aorara’a a te Atua […] ’e ia Iesu Mesia ’e i tāna ’evanelia, ’ei reira te ’oa’oa e tae mai ai noa atu te mea e tupu ra—’aore rā ’aita e tupu ra—i roto i tō tātou orara’a. »
E ’ite rātou i te ’oa’oa noa atu tō rātou mau tāmatara’a. ’Ua ha’api’i mai rātou ē nā roto i tō tātou aura’a e te Fa’aora e ti’a ia tātou ’ia fa’aruru i te mau fifi ma te mata ’ata’ata ’e te ’ā’au māuruuru.
Tē hina’aro nei au e fa’a’ite atu i te tahi o tō’u mau ’itera’a i teie feiā mo’a ha’apa’o maita’i ’o tē fa’ahōho’a nei i teie parau tumu, ma te ha’amata nā Mōtāpīa.
Mōtāpīa
Tau ’āva’e i ma’iri a’e nei, ’ua peresideni au i te hō’ē ’āmuira’a titi nō te hō’ē titi hō’ē matahiti te maoro e 10 a’e na fare purera’a. Hau atu i te 2 000 ta’ata tei fa’a’ī i te fare purera’a na’ina’i ’e e toru fare ’ie tei fa’ati’ahia i rāpae. 31 matahiti tō te peresideni titi, e 26 matahiti tō tāna vahine, ’e e piti tā rāua tamari’i na’ina’i. Tē arata’i nei ’oia i teie titi e tupu ra i te rahi ’e te fifi ma te amuamu ’ore, te hō’ē noa hōho’a mata ’ata’ata ’e te ’ā’au māuruuru.
I roto i te hō’ē uiuira’a e te pātereareha, ’ua fa’aro’o vau e e ma’i taiaha tō tāna vahine, ’e ’ua fifi ’oia nō te aupuru iāna. I muri a’e i tō māua ’āparaura’a i te peresideni titi nō ni’a i teie fifi, ’ua hōro’a māua iāna i te hō’ē ha’amaita’ira’a autahu’ara’a. ’Ua ani au i te pātereareha e hia rahira’a ha’amaita’ira’a pātereareha tāna e hōro’a i te fāito au noa.
« E va’u e tae atu i te ’ahuru », tāna ïa parau.
’Ua ani au, « I te ’āva’e ? »
Pāhono mai ra ’oia, « I te hepetoma ! » ’Ua a’o vau iāna e ’ere i te mea pa’ari te ravera’a i terā rahira’a ha’amaita’ira’a i te mau hope’a hepetoma ato’a.
« Elder Godoy », ’ua parau ’oia, « e tāmau noa rātou i te haere mai i te mau hepetoma ato’a, tae noa atu i te mau melo ’āpī ’e te feiā ’āpī e rave rahi. » Fa’ahou ā, ’aita e amuamura’a, e hōho’a mata ’ata’ata noa ’e te ’ā’au māuruuru.
I muri a’e i te tuha’a purera’a o te ’āmuira’a titi i te pō mahana mā’a, ’a haere ai au i te hōtēra, ’ua ’ite au i te mau ta’ata e ho’o ra i te mā’a nā ni’a i te purūmu i te maorora’a pō. ’Ua ani au i tō’u ta’ata fa’ahoro nō te aha rātou e rave ai i te reira i te pō ’eiaha rā i te ao. ’Ua pāhono mai ’oia e rave rātou i te ’ohipa i te ao ’ia noa’a te moni nō te rave i te reira i muri a’e.
« ’Ā, e rave rātou i te ’ohipa i teie mahana nō te tāmā’a ananahi », tā’u ïa parau.
’Ua fa’atītī’āifaro mai rā ’oia iā’u : « Aita, tē rave ra rātou i te ’ohipa i te ao nō te tāmā’a i teie pō. » ’Ua ti’aturi au ē tei roto tō mātou mau melo i te huru orara’a maita’i a’e, ’ua ha’apāpū mai rā ’oia ē e rave rahi tei fa’aruru i te hō’ē ā mau tāmatara’a i roto i taua tuha’a fenua ra. I te po’ipo’i a’e, i roto i tā mātou tuha’a purera’a i te Sābati ’e nō te mea ho’i ē, ’ua ’ite au i tō rātou orara’a, ’ua putapū roa vau nō tō rātou hōho’a mata ’ata’ata ’e tō rātou ’ā’au māuruuru.
Hamepia
’A haere ai māua i te purera’a i te Sābati, ’ua ’ite māua te peresideni titi i nā ta’ata fa’aipoipo e haere ra nā ni’a i te purūmu ’e te hō’ē ’aiū ’e e piti tamari’i na’ina’i. ’Ua tāpe’a māua nō te fa’ahoro ia rātou. ’Ua māere ’e ’ua ’oa’oa roa rātou. I tō’u anira’a e aha te āteara’a e ti’a ia rātou ’ia haere ’āvae i te fare purera’a, ’ua pāhono mai te metua tane ē, e 45 minuti e tae atu i te hō’ē hora te maoro, tei te huru ’o te tere o te mau tamari’i. E nā reira rātou i te haere ’e te ho’i, i te mau Sābati ato’a, ma te amuamu ’ore—e hōho’a mata ’ata’ata noa ’e te ’ā’au māuruuru.
Marāui
I te hō’ē Sābati nā mua a’e i te hō’ē ’āmuira’a titi, ’ua haere au e fārerei e piti ’āma’a ’o tē fa’a’ohipa nei i te mau fare ha’api’ira’a a te hau ’ei fare purera’a. ’Ua hitimahuta vau i te huru ha’eha’a ’e te iti te tao’a o te mau fare, ’aita ato’a te tahi mau tauiha’a tumu. ’A fārerei ai au i te tahi mau melo i reira, ’ua ineine au i te tātarahapa nō te nava’i ’ore o tā rātou fare purera’a, terā rā, ’ua ’oa’oa rātou i te mea ē tē vai ra te hō’ē vāhi tāpiri nō te ha’aputuputu mai, e ha’apae ïa rātou i te haere ātea mai tei mātauhia. Fa’ahou ā, ’aita e amuamura’a—e hōho’a mata ’ata’ata ana’e ’e te ’ā’au māuruuru.
Tīmīpapue
I muri a’e i te hō’ē ha’api’ipi’ira’a nā te feiā fa’atere i te mahana mā’a, ’ua ’āfa’i te peresideni titi iā’u i te mau purera’a i te Sābati tei fa’atupuhia i roto i te hō’ē fare tārahuhia. E 240 ta’ata tei tae mai. I muri iho ’ua fa’a’ite mai te ’episekōpo e 10 melo ’āpī tei bāpetizohia i taua hepetoma ra. ’Ua purarā te ’āmuira’a i roto e piti piha na’ina’i, ē tē pārahi ato’a ra te tahi mau melo i rāpae i te fare, ma te māta’ita’i i te putuputura’a nā roto i te mau ha’amāramarama ’e te mau ’ōpani. Fa’ahou ā, ’aita e amuamura’a—e hōho’a mata ’ata’ata ana’e ’e te ’ā’au māuruuru.
Lesoto
’Ua haere au e māta’ita’i i teie fenua na’ina’i nehenehe, tei pi’i-ato’a-hia « te bāsileia mou’a », nō te hi’o i te hō’ē mata’eina’a a te ’Ēkālesia e fa’aineine ra ’ia riro mai ’ei titi. I muri a’e i te hō’ē purera’a i te mahana mā’a, ’ua haere au i te purera’a i te Sābati i roto i te hō’ē o tā rātou mau ’āma’a i roto i te hō’ē fare tārahuhia. ’Ua ’ī roa te piha ’ōro’a, e tē ti’a ra te ta’ata i rāpae i te ’ūputa nō te ’āmui mai. ’Ua parau vau i te peresideni ’āma’a ē e tītauhia i te hō’ē fare rahi a’e. ’Ua māere roa vau i tōna fa’a’itera’a mai ē ’o te ’āfara’a noa teie o tōna mau melo. Te tahi atu ’āfara’a, e haere ïa i te piti o te purera’a ’ōro’a i muri a’e i te piti o te hora. Fa’ahou ā, ’aita e amuamura’a—e hōho’a mata ’ata’ata ana’e ’e te ’ā’au māuruuru.
’Ua ho’i fa’ahou vau i Lesoto nō te hō’ē ’ati purūmu ’ua fa’aru’e roa mai te tahi o tā tātou feiā ’āpī, ō tā Elder D. Todd Christofferson ïa i fa’ahiti araua a’e nei. I tō’u fārereira’a i te mau ’utuāfare ’e te feiā fa’atere, ’ua mana’o vau e ’ite au i te huru ’oto. ’Ua fārerei rā vau i te feiā mo’a pūai ’e te itoito o tē fa’aruru ra i teie ’ohipa nā roto i te huru fa’ateitei ’e te fa’auru.
E hōho’a teie o Mpho Aniciah Nku, 14 matahiti, ’o te hō’ē ïa ta’ata tei ora mai i roto i te ’ati purūmu, ’ua fa’ahōho’a maita’i ’oia i te reira nā roto i tāna iho mau parau : « ’A ti’aturi ia Iesu ’e ’a hi’o tāmau noa iāna, nō te mea nā roto iāna ’outou e ’ite ai i te hau, ’e e tauturu ’oia ia ’outou i roto i te fa’aorara’a. »
Teie te tahi noa mau hi’ora’a e ’ite ai tātou i tō rātou huru maita’i nō te mea tē fa’atumu nei rātou i tō rātou orara’a i ni’a i te ’evanelia ’a Iesu Mesia. ’Ua ’ite rātou i hea e ’ite ai i te tauturu ’e te tīa’ira’a.
Te mana fa’aora o te Fa’aora
Nō te aha e ti’a ai i te Fa’aora ’ia tauturu ia rātou ’e ia tātou i roto i te mau huru orara’a ato’a o tō tātou orara’a ? E ’itehia te pāhonora’a i roto i te mau pāpa’ira’a mo’a :
« ’E e haere atu ’oia ma te fa’a’oroma’i i te māuiui ’e te ’ati ’e te mau huru fa’ahemara’a ato’a ra […]
« […] ’E e rave ’oia i tō rātou paruparu i ni’a iāna iho, ’ia fa’a’īhia tōna ra ’ā’au i te aroha […] ’ia ’ite ’oia […] i te rāve’a e fa’aora ai i tōna mau ta’ata i tō rātou paruparu. »
Mai tā Elder Bednar i ha’api’i mai, ’aita e māuiui i te pae tino, te pe’ape’a, ’e ’aore rā, te paruparu tā tātou e ’ite nei ’o tā te Fa’aora i ’ore i ’ite. « I roto i te hō’ē taime ’oto rahi, e riro ’outou ’e ’o vau ato’a nei i te ti’aoro ē, ‘’Aore e ta’ata e [hāro’aro’a mai nei iā’u].[…]’ ’Aore iho ā paha e ta’ata e ta’a mai nei. Terā rā, ’ua ’ite ’e ’ua hāro’aro’a pāpū te Tamaiti a te Atua i te reira. » ’E nō te aha ? Nō te mea « ’ua ’ite ’oia ’e ’ua amo ’oia i tā tātou mau hōpoi’a nā mua ia tātou. »
E fa’aoti au nā roto i tō’u ’itera’a pāpū nō ni’a i te mau parau a te Mesia e ’itehia i roto i te Mataio 11 :
« E haere mai ’outou iā’u nei, e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora.
« ’A rave mai i tā’u zugo i ni’a ia ’outou, ’e ’ia ha’api’ihia ’outou e au, tē marū nei ho’i au ’e te ha’eha’a o te ’ā’au : ’e e noa’a ho’i te ora i tō ’outou [vairua].
« Tē marū nei ho’i tā’u zugo ’e tē māmā nei tā’u hōpoi’a. »
Mai taua feiā mo’a ra i ’Āfirīta, ’ua ’ite au e parau mau teie fafaura’a. E parau mau te reira i reira, ’e e parau mau te reira i te mau vāhi ato’a. Tē fa’a’ite pāpū nei au nō teie mau parau i te i’oa o Iesu Mesia, ’āmene.