’Are’a ’o Iehova e hi’o ïa i te ’ā’au

« Te vāhi ho’i i vaiihohia ai tā ’outou tao’a ra, e riro ato’a i reira tō ’outou ’ā’au », ’ua ha’api’i Iesu. Te tao’a ’o te hō’ē ïa mea faufa’a roa nō tātou, te hō’ē mea o tā tātou e hōro’a nei te pūai ’e te ha’apa’o maita’i. Te vāhi ’o tā tātou e mā’iti ’ia ha’amau’a i tō tātou taime ’e ’ia rōtahi i tō tātou ha’apa’o maita’i, ’oia ato’a ’o te mea o te fa’aitoito ia tātou e rave, e parau-rahi-hi’a nō ni’a i tō tātou ’ā’au. ’Ua fa’aara te Fa’aora ē, mai te peu e mea rahi tei pi’ihia e āna, e mea iti tei mā’itihia « nō te mea ’ua fa’atumuhia tō rātou ’ā’au i ni’a i te mau mea nō teie nei ao, ’e tē tītau nei rātou ’ia fa’aturahia rātou e te ta’ata ». Tē fa’ariro ra ānei au i te Fa’aora ’ei mea mātāmua roa i roto i tō’u orara’a ? Tē hi’o tūtonu ra ānei au i tōna hanahana i roto i te mau mea ato’a tā’u e rave nei ?

I te roara’a o te mau pāpa’ira’a mo’a, ’ua tū’ati te Fatu ’e tāna mau peropheta i te te’ote’o ’e te ha’apa’o ’ore i te fa’a’eta’etara’a o te ’ā’au. ’Ua a’o Nephi i tōna nau taea’e, i te paraura’a : « Nō te aha ho’i ’aita ’ōrua e ha’apa’o i te mau fa’auera’a a te Fatu ? Nō te aha ho’i ’ōrua i hina’aro ai ’ia pohe, nō te ’eta’eta o tō ’ōrua ’ā’au ? » ’Ua fa’aara te Fatu i te feiā mo’a nō Missouri, « ’āre’a rā ’o ’oia ’o tē ’ore e rave i te hō’ē mea ē tae noa atu i te taime ’oia e fa’auehia ai, ’e ’ia fāri’i ho’i i te hō’ē fa’auera’a ma te ’ā’au fē’a’a, ’e ’ia ha’apa’o i te reira ma te fa’atau ra, ’ua fa’autu’ahia ïa ’oia ». Noa atu ē ’aita te Fatu e tītau nei i te maita’i roa i roto i te ha’apa’ora’a i tāna mau fa’auera’a, tē ’ani nei ’oia ia tātou ’ia hina’aro mau ’e ’ia tūtava tātou i te ha’pa’ora’a i te reira ma tō tātou ’ā’au ato’a.

’Ua a’o te Fatu ia Oliver Cowdery « ’ia ha’aputu māite i teie nei parau ’ei faufa’a rahi i roto i tō ’oe na ’ā’au ». ’Ua anihia tātou ’ia ’imi itoito i te mau pāpa’ira’a mo’a ’e, nā roto i te mana nō te Vārua Maita’i, ’ia ’imi ’ia fa’ari’i i te hāro’aro’ara’a ’e te ’itera’a pāpū nō te parau mau o te ’evanelia i roto i tō tātou ’ā’au.

’Ua ’avau te peropheta Abinadi i te mau tahu’a a te ari’i ’ino ’o Noa nō te ’orera’a rātou i rave i te reira, ma te paraura’a, « ’aita tō ’outou ’ā’au i tītau i te māramarama ; nō reira, ’aita ’outou i rave ma te pa’ari ». Tē fa’aitoito ra ānei au ma te ’ā’au tae i te ’imi maite i te mau pāpa’ira’a mo’a i te mau mahana ato’a ’e ’ia fa’a’ohipa i tō’u ’ā’au nō te hāro’aro’a i te reira nā roto i te pure ?

’Ua ha’api’i te Fa’aora ē « nō roto mai ho’i i te ’ā’au te mana’o ’ī’ino » ’e « nō te ’ī o te ’ā’au ho’i i parau ai te vaha ». ’Ua riro te ’aravihi o tō tātou ferurira’a ’e tā tātou mau parau ’ei hō’ē fa’a’itera’a maita’i nō te mā o tō tātou ’ā’au. Tē fa’a’amu rahi ra ānei au i te mau ferurira’a tano ’ore nō ni’a i te mau ’ohipa ’aore rā te mau fa’aitoitora’a a vetahi ’ē, ’aore rā ’oia ato’a nō’u iho ? Mea vitiviti ’ānei au i te ha’avā ’aore rā i te fa’autu’a ia vetahi ’ē ? Tē ’imi ra ānei au i te mau ’apera’a ’aore rā i te fa’ati’ara’a i tā’u mau hape ? ’E e aha te huru nō tā’u mau parau ? Tē fa’aitoito ra ’ānei ’e tē fa’auru ra ’ānei te reira i te feiā e ha’ati nei iā’u ? ’Aore rā ’ua riro pinepine ra ānei te reira ’ei puna nō te umeumera’a mana’o ’e te riri ?

I muri a’e i tā’u hi’opo’ara’a tino, ’ua parau mai tō’u tāote iā’u, i roto te tā’āto’ara’a, e ea maita’i roa tō tō’u māfatu—terā rā tē vai ra te tahi mau ha’ape’ape’ara’a e ti’a ’ia fa’a’āfaro-’oi’oi-hia, hou te reira ’ia fifi roa. ’Ua pāpa’i mai ’oia i muri iho i te tahi mau tāuira’a nō te huru orara’a. Mai te reira ato’a, mai te peu e fa’a’ohipa ’outou i teie hi’opo’ara’a pae vārua o tō ’outou ’ā’au, ’e e ’itehia mai te tahi mau fa’a’itera’a ’ino, ’eiaha e māta’u ! ’Ua hōro’a mai te Fa’aora i te mau rā’au ’e te mau rāpa’aura’a pae vārua nō te tauturu ’ia ’outou. ’Ua parau fafau ato’a mai ’oia i te hōro’a mai ia ’outou te hō’ē māfatu ’āpī ! Teie te tahi mau ’ohipa ’o tē nehenehe e ha’amaita’i i te pūai pae vārua o tō ’outou ’ā’au.

’A hōro’a ai tātou i te taime i te mau mahana ato’a ’ia ha’afātata atu i te Mesia, e tauihia tō tātou ’ā’au. Te ’imi-maite-ra’a i te mau pāpa’ira’a mo’a, ma te ’āpe’ehia e te pure ’ā’au tae ’e te ha’apaera’a mā’a tāmau, e ha’amara’ahia tō ’outou here nō te Fa’aora ’e e ha’apūaihia tō ’outou fa’aro’o ’e tō ’outou hina’aro ’ia tātarahapa ’e ’ia hōro’a atu ma te ha’eha’a i tō ’outou ’ā’au i te Atua. ’A feruri na i teie hi’ora’a nō roto mai ia Nephi : « Nō reira ’ua ti’aoro atu vau i te Fatu ; ’E inaha, ’ua fā mai ra ’oia iā’u, ’e ’ua ha’amarū ho’i i tō’u ’ā’au ’e ’ua ti’aturi ihora vau i te mau parau ato’a i parauhia e tō’u ra metua tāne ».

’A tāmau noa ai tātou i te fa’a’āmu i te huero o te fa’aro’o nā roto i tō tātou mau hina’aro ’e te mau ’ohipa paieti, e ’ite mai tātou i te hō’ē ā ha’amo’ara’a o tō tātou ’ā’au mai tō tē ’āti Nephi : « ’Āre’a rā ’ua ha’apae pinepine ’e ’ua pure pinepine rātou, ’e ’ua tupu pūai roa a’era tō rātou ha’eha’a, ’e ’ua pa’ari roa a’era tō rātou fa’aro’o i te Mesia, ē tae noa atu ’ua ’ī tō rātou vārua i te ’oa’oa ’e te hau, ’oia ïa, ē tae noa atu ’ua mā roa ’e ’ua mo’a tō rātou ’ā’au, ’e ’ua noa’a mai taua mo’ara’a ra nō te mea ’ua hōro’a rātou i tō rātou ’ā’au i te Atua ».

’Ua ha’api’i te Fa’aora, « ’ua hina’aro ’outou ’iā’u ra, e ha’apa’o i tā’u parau ? » Tē ani nei ’oia ia tātou ’ia fa’a’ite atu i tō tātou here ma te ravera’a ’e te ha’apa’ora’a i te mau fafaura’a ’e ’ōna. ’A tūtava ai tātou i te mau mahana ato’a ’ia ha’apa’o i tāna mau fa’auera’a, ’ia tātarahapa ma te ’ā’au tae i tā tātou mau hara, ’e ’ia tāmau noa i te rave i tōna i’oa i ni’a ia tātou ’e ’ia fa’atū’ati i tō tātou hina’aro i tōna hina’aro, e nehenehe tātou e fana’o i te pārahi-tāmau-ra’a mai o te Vārua Maita’i.

Tē fa’a’ite pāpū nei Nephi, « ’ua ’ite au ē, mai te mea e pe’e ’outou i te Tamaiti, ma te ’ā’au tae mau, ma te fa’ahua ’ore ’e te ha’avare ’ore i mua i te Atua, ’āre’a rā ma te hina’aro mau, i te tātarahapara’a i tā ’outou na mau hara, ma te fa’a’ite pāpū atu i te Metua ē, ’ua ti’a ia ’outou ’ia rave i ni’a iho ia ’outou i te i’oa o te Mesia, nā roto i te bāpetizora’a […] i reira ’outou e fāri’i ai i te Vārua Maita’i ». E arata’i te Vārua Maita’i ia ’outou ’e e tauturu ia ’outou ’ia ’ite i te hina’aro o te Fatu ’e ’ia rave i te mau mā’itira’a maita’i.

Tē ani nei te Fatu i te tā’āto’ara’a « ’ia tāvini iāna ma tō ’outou ’ā’au ato’a ». ’Ia mā’iti ana’e tātou i te rave i te ’ohipa tāta’itahi tā te Fatu i ani mai ia tātou—mai te ha’apa’ora’a i te mau fa’auera’a, te ravera’a i te ’ōro’a mo’a, te ha’amōrira’a i roto i te hiero, ’e te tāvinira’a ia vetahi ’ē—ma te ’ā’au tae ’e te hina’aro mau, e riro te ’ohipa tāvinira’a tāta’itahi ’e te ha’amōrira’a ’ei hō’ē ’itera’a pae vārua pūai roa ’o te ha’apūai i tō tātou fa’aro’o ’e tō tātou ’itera’a pāpū ’e e fa’a’ī i tō tātou ’ā’au i te ’oa’oa ’e te here nō te Atua ’e tō tātou ta’ata tupu.

Tē tāvevo fa’ahou nei te uira’a a te peropheta Alama i teie mahana : « ’Ua fānau-vārua-hia ānei ’outou i tā te Atua ra ? ’Ua fāri’i ānei ’outou i tōna hōho’a i roto i tō ’outou nā mata ? ’Ua ’itea ānei ia ’outou teie tauira’a rahi i roto i tō ’outou na ’ā’au ? »

Te mau taea’e ’e te mau tuahine, tē ani atu nei au ia ’outou ’ia hōro’a i te tā’āto’ara’a o tō ’outou ’ā’au i te Fa’aora i teie mahana. ’Ia riro te ’ohipa tāta’itahi o te ha’amōrira’a ’e te tāvinira’a ’ei mea ’ā’au tae ’e te hina’aro mau. ’A tu’u i te hiti te mau fa’aoa’oara’a o te ao nei ’e ’a tūtava i te hōro’a i tō ’outou taime i te Fatu i te mau mahana ato’a o tō ’outou orara’a. ’A tātarahapa ’e ’a ho’i mai iāna ra ma tō ’outou ’ā’au ato’a, ’e e fa’a’ore mai ’oia i tā ’outou mau hara ’e e tauahi ia ’outou i tōna nā rima o tōna here. ’Eiaha e ’imi i te mau mea o teie nei ao, ’a mā’iti rā i te hi’o atu i tōna hanahana ’e ’ia ’imi i te mau mea nō te hō’ē ao maita’i roa a’e. ’Ua ’ite ’oia i tō ’outou ferurira’a ’e te mau hina’aro o tō ’outou ’ā’au, ’e ’a haere ai ’outou iāna ra, e ha’amaita’i ’oia ia ’outou ma te pūai, te ti’aturira’a, te hau ’e te ’oa’oa i roto i teie orara’a ’e hō’ē parahira’a i roto i tōna bāsileia tiretiera nō te ao mure ’ore.

’Ua ’ite au tē ora nei Iesu Mesia. ’O ’oia tō tātou Fa’aora. ’E ’ua here ’oia ia ’outou ’e iā’u ma tōna ’ā’au ato’a. I te i’oa o Iesu Mesia, ’āmene.