’A fa’ari’i i tāna tao’a hōro’a

E peu tōtiare te hōro’ara’a i te tao’a hōro’a nā roto i te mau ta’ere ato’a, te mau māramarama ’e te mau manohiti. I roto i te tau, ’ua hōro’a na te ta’ata i te tao’a hōro’a i te tahi ’e te tahi nō te ha’apūai i te tā’amura’a, nō te fa’a’ite i te here ’e te māuruuru ’e nō te fa’ahanahana i te mau ’ōro’a faufa’a rahi mai te mau fa’aipoipora’a, te mau fānaura’a ’e te mau mahana ’ōro’a. ’E e ’ere rā te ta’ata ana’e te mau hāmanira’a a te Atua ’o tē hōro’a i te mau tao’a hōro’a i te tahi ’e te tahi ! Te tahi mau hi’ora’a, tē vai nei te mau torora tei mātauhia i te hōro’a i te ’ōfa’i tāvai ’ana’ana i tō rātou ’āpiti pāruru, tē vai nei te mau ’ūrīta’ata bonobo (e fēti’i nō te hīpane) ’o tē hōro’a i te mā’a hotu nō te fa’a’ā’ano i tō rātou auhoara’a.

E aha te mau tao’a hōro’a tā ’outou i hōro’a ? ’A feruri i te hō’ē taime ’ua ’itehia mai ia ’outou—’aore rā ’ua hāmani ’outou—i te tao’a hōro’a maita’i roa a’e nō tei herehia. E ta’a noa ia ’outou ē terā te tao’a hōro’a mau tā tei herehia i hina’aro, e tao’a tāna e poihere. E aha terā tao’a hōro’a ? E aha nō tō ’outou metua vahine ? nō te hoa ? nō tā ’outou tama ? nō te hō’ē ’orometua ? nō tō ’outou tupuna tāne ? E aha te mana’o i tupu mai ’a ’ite ai ’outou i teie tao’a hōro’a ? E aha te mana’o i tupu mai ’a feruri ai ’outou i teie ta’ata iti tē hōhora ra i te tao’a hōro’a ? Nā reira ato’a, e aha te taime i hōro’ahia mai ia ’outou te tao’a hōro’a maita’i roa a’e, ’e e aha te huru i te fa’ari’ira’a i te reira ?

I te hitura’a o tō’u matahiti, tē ora ra vau ’e tō’u nā metua i Arabia, e hōho’a nā te tamari’i tei matara mai, te i’oa ’o Chitty Chitty Bang Bang. E hōho’a nō te hō’ē pere’o’o manamana e tere ’o ’ōna ana’e, e tere nā ni’a i te pape ’e ’o tē rere ato’a ! I fa’aro’o vau ē, i te fenua Peretāne, e tao’a ha’uti tei hāmanihia mai te pere’o’o Chitty Chitty Bang Bang, ’e ’ua hina’aro roa vau i te reira ! E pana ’oe i te tahi mea, e hohora mai te mau pererau o te pere’o’o ! Reva a’era tō’u metua tāne i Peretāne nō te ’ohipa ’e ’ua ani mai ’ua hina’aro ānei au i te hō’ē mea i reira, i nā ’ō atu vau ē, ’ua hina’aro roa vau i te hō’ē o te mau pere’o’o Chitty Chitty Bang Bang.

’Ua ho’i mai ’oia mai tōna tere, ’aita te pere’o’o i fa’aura mai. ’Ua ’oto roa vau ma te mana’o ē, ’ua mo’ehia iāna. ’O tō’u rā mahana fānaura’a 10 mahana i muri mai, ’e e pū’ohu nehenehe i reira nō’u. Ma te ’oa’oa, ’e ma te ’ore rā e tīa’i rahi roa, ’ua ’īriti au i te pū’ohu ’e tei reira tā’u pere’o’o. Nō tō’u ’oa’oa rahi ’ua ta’i ihora vau. ’Ua pana vau i terā mea e ’ua hohora mai te pererau, mai te pere’o’o i roto i te hōho’a ! ’Ua ha’amāuruuru roa vau i tō’u metua tāne nō teie tao’a hōro’a poihere-roa-hia. Tau matahiti vau i te ha’utira’a i terā pere’o’o, ’e ’ua fa’aherehere e rave rahi atu ā matahiti. Iā’u nei, ’ua au roa tō’u metua tāne i te hōro’ara’a mai i terā pere’o’o, mai tā’u i au roa i te fa’ari’ira’a i te reira.

E nehenehe e feruri i te hōro’ara’a i te tao’a hōro’a ’ei toru tuha’a :

1. Te hōro’ara’a i te tao’a hōro’a, i reira te ta’ata hōro’a e mā’iti ai, e hāmani ai ’aore rā e fa’aineine ai i te tao’a hōro’a ’a pūpū atu ai i tei herehia. E tītau te reira i te ’ōpuara’a ferurihia i te pae o te ta’ata hōro’a, nō te hōro’a i te hō’ē mea e aura’a tōna.

2. Te ravera’a ’e te ’īritira’a i te tao’a hōro’a, i reira te ta’ata fa’ari’i e rave mai ai i te tao’a hōro’a mai roto mai i te ta’ata hōro’a, pinepine ma te hitimahuta, te māuruuru ’e te ’ana’anatae hou ’a ’īriti ai i te reira, i te tahi taime e tātara i te tāpona ’e te pū’ohu nō te ’ite mai e aha te tao’a hōro’a.

3. ’Ei reira, tē vai nei te tuha’a faufa’a roa paha, te fa’ari’ira’a i te tao’a hōro’a. Te fa’ari’ira’a i te tao’a hōro’a tei hōro’ahia ma te hina’aro mau, e hau roa atu ïa i te ravera’a ’e i te ’īritira’a i te reira. E hau roa atu ato’a i te ’itera’a i te moni rahi o te tao’a hōro’a ’e i te ha’amāuruurura’a i te ta’ata hōro’a. Nō te fa’ari’i mau i te hō’ē tao’a hōro’a, e ha’afaufa’a tātou i te reira nō tātou iho, ma te fa’a’ohipa hope i te reira i roto i tō tātou orara’a, ’ei reira e ha’amana’o ai ma te māuruuru i te ta’ata hōro’a.

Te fa’ari’ira’a i te hō’ē tao’a hōro’a, e ’ere ïa i te ’ohipa ma te ha’a ’ore, e ’ohipa rā ma te ’ōpua mau ’e te aura’a mau, tei hau roa atu i te ’īritira’a i te hō’ē pū’ohu. Te fa’ari’ira’a, ’o te māuruurura’a ïa ’e te natira’a iāna i te tao’a hōro’a ’e i te ’ā’au o te ta’ata hōro’a e pūai mai ai te mau tā’amu i rotopū i te ta’ata hōro’a ’e te ta’ata fa’ari’i. I te ferurira’a vau i terā pere’o’o ha’uti, ’ua hōho’i mai te mau ha’amana’ora’a poihere roa ’ino, ’e ’ua putapū fa’ahou vau i te here hōhonu ’e te aupuru o tō’u metua tāne iā’u, fa’ahōho’ahia e terā tao’a hōro’a ’e te tahi atu mau ’ohipa rima here e’ita e nehenehe e tai’o.

E’ita e nehenehe e tai’o i te mau tao’a hōro’a o te māramarama ’e te parau mau a tō tātou Metua i te ao ra tei fa’aineinehia nō te nīni’i mai i ni’a ia tātou tāta’itahi, tāna mau tamari’i poiherehia. E mani’i mai te reira mai roto mai i tō tātou Ta’ata hōro’a rahi, mai te hō’ē pape tahe ra i roto i te mēdēbara, mai roto mai i tōna ’ā’au hāmani maita’i. « Te mau mea maitata’i i hō-mai-hia mai, ’e te mau mea ti’a roa e maita’i roa ai, nō ni’a ïa, mai ni’a mai ïa i te Metua o te māramarama. » I roto i tō tātou tā’amu fafaura’a ’e te Metua, ’o ’oia noa te Ta’ata hōro’a ’e ’o tātou te fāri’i ha’eha’a.

E’ita rā tā tātou e nehenehe e fa’ari’i i te hō’ē noa atu mea ’aita ana’e te rahi roa a’e o te mau tao’a hōro’a ato’a a te Metua, ’oia ho’i tāna ’Ārenio here, tāna Tamaiti here. E mani’i mai te mau tao’a hōro’a ato’a a te Metua mai roto mai, ’e ’ua ha’amatara-ato’a-hia mai, i te pūpūra’a mana’o tae o te Fa’aora i Getesemane e i ni’a i te satauro, ’e tae noa atu tōna ti’afa’ahoura’a upo’oti’a. ’O Iesu Mesia, tō tātou Tāra’ehara aroha, te tao’a hōro’a rahi roa a’e nō ’ō mai i tō tātou Metua nō te māramarama. « Nā roto i te hōro’ara’a i tāna iho Tamaiti, ’ua fa’aineine te Atua [nō tātou] i te hō’ē rāve’a maita’i a’e. »

Tē hina’aro nei au e paraparau nō ni’a i te hō’ē tao’a hōro’a ’āmuitahi nō te parau mau mure ’ore, ’o tē turu nei i tō tātou ’aravihi ’ia fa’ari’i i te tā’āto’ara’a o te tahi atu mau mea tā te Metua e hina’aro e hō mai ia tātou—e tao’a hōro’a nō te ’ite e ora ai tātou, ’ia rave-hope-hia ana’e ’e ’ia fa’ari’ihia i te hōhonu o te vairua, e māramaramahia ïa te vaira’a o te ’oa’oa ’e te mau fifi o te orara’a, nā reira ato’a tā tātou mau uira’a pāhono-’ore-hia : E tamari’i mau tātou nā te Atua. E parau mau e mutu te hutira’a aho ! E mea ’ōna mau ! ’E e ’ere i te fa’ahōho’ara’a noa.

’Āhani pa’i e fa’aro’o ’outou i teie parau nō te taime mātāmua ! E tamāhine poihere mau ’outou nāna. E tamaiti here mau ’outou nāna. ’E te ’ē’a tā ’outou e haere nei, ’o tāna ïa fa’anahora’a nō te ’oa’oa. Maoti tōna here ’ite hope, ’ua ’ite pāpū ’oia ’o vai ’outou hou ’a tonohia ai ’outou i te fenua nei, ’e te mea tā ’outou i fa’aruru ē tae mai i teienei i roto i te orara’a tāhuti nei, ’e ’ua fa’anaho ’oia ma te aroha i tō ’outou mau ananahi ato’a. ’E ’oia mau, tē hia’ai roa nei ’oia ’ia ho’i mai ’outou iāna ra, ’ia tae i te hō’ē mahana, nō te fa’ari’i i te fā hope rahi o tāna mau tao’a hōro’a nehenehe ato’a, te ora mure ’ore ’e ’ōna.

E ’ere roa te uira’a ē, e mea pāpū ānei teie tao’a hōro’a o te parau mau, maoti rā e ’itehia ānei ia tātou ’e e fa’ari’i ānei tātou i te reira. ’Ua tu’u-a’ena-hia mai teie tao’a hōro’a i ni’a ia tātou e te Metua. ’Ua ’aufau-a’ena-hia te ho’o nō te fā hope’a roa o teie tao’a hōro’a e te Fa’aora. Terā rā, mai te peu ’ua ha’api’ihia ia ’outou, ’ua parauhia ’e ’ua hīmenehia teie parau mau e tau matahiti te maoro, pēnei a’e ïa ’ua mōrohi a’ena roa te au ’e te fa’ahiahia au o te reira, ’e ’aita fa’ahou ’outou e putapū nei i tō te reira mana ’e te hau.

Mai te peu e vaiiho-noa-hia teie tao’a hōro’a hau a’e i te faufa’a nō te māramaramara’a—’e te tā’āto’ara’a o te maita’i, te hau ’e te tīa’ira’a e tahe mai roto mai i te reira—’aita e ravehia, ’aita e ’īritihia te pū’ohu ’e ’aita e fa’ari’ihia, ’auē ïa ’erera’a nō tātou ! ’Auē ïa ’otora’a nō te Ta’ata hōro’a ! « Nō te mea e aha ihora ïa te ta’ata e faufa’ahia ai mai te mea e tu’uhia mai te tao’a hōro’a iāna, ’e ’aita ’oia e fa’ari’i mai i te reira ? Inaha, e ’ore roa ’oia e ’oa’oa i te reira mea ’o tei hōro’ahia mai iāna ra, ’e e ’ore ato’a e māuruuru iāna ’o tei tu’u mai i te tao’a hōro’a. »

Tē tītau manihini nei au ia ’outou ’ia fa’ari’i, nō te taime mātāmua ānei, ’aore rā i te fāito rahi atu ā, i te ’itera’a rahi fa’ahiahia ē, e tamari’i here mau ’outou nā te Atua. E tātara ’outou i te tāpona, e pāhae i te pāpie pū’ohu, e ’īriti i te ’āfata, ’e fa’ari’i ma te ha’a ’e ma te ha’eha’a ’e te māuruuru i te māramaramara’a mau ’e te tāfetafeta ’ore o teie parau mau niu. E ti’a i te Vārua mo’a ’ia fa’a’ite pāpū i tō ’outou ’ā’au ē e tama mau ’outou nā te Teitei.

’Ia fa’ari’i poupou ’outou i teie parau pāpū hanahana i roto iho i tō ’outou vairua, ma te putapū i te tāmāhanahanara’a ’e te nave o te reira, e taui roa tā ’outou huru hi’ora’a ! E ti’a ia ’outou ’ia putapū i tōna here, ’ia fa’aro’o i tōna reo, ’e ’ia ’ite mai i tōna rima i roto i tō ’outou orara’a, noa atu ā te mea e tupu ’e ’o tē ’ore e tupu. E ti’a ia ’outou ’ia fa’ata’a ’āpī i tā ’outou hi’ora’a ia ’outou iho ’e ’ia vetahi ’ē. E pūai atu ā tō ’outou tā’amura’a fafaura’a i tō ’outou Fa’aora, ’e nā roto i te hi’o o teie tao’a hōro’a au, e ’ana’ana, e nehenehe ’e e tīa’ira’a ’āpī tō te orara’a.

E pure na nō te māramarama ē, tē fa’ari’i mau ra ānei ’outou i teie ’ite fa’ataui rahi, i te hōhonu o tō ’outou ’ā’au ? E rave ānei ’outou i teie tao’a hōro’a ? E nā reira ānei ’outou ma te hōhonu atu ā, ma te fa’ahepo ’ore atu ā, ma te rahi atu ā, i tā ’outou i nā reira a’enei—’e ’a nā reira ai ’outou ’ia nīni’ihia mai te tā’āto’ara’a o te tahi atu mau tao’a hōro’a e ’āpe’e mai i te reira ?

Tē ui ra paha ’outou : « E aha tā’u e rave nō te fa’ari’i i teie tao’a hōro’a a te Atua ? » ’Ua ’ite ’outou, ’aita hō’ē mea. E tao’a hōro’a nō ’ō mai i te Ta’ata hōro’a. E parau pāpū, ’aita atu ai e parau. E vaiiho noa i te reira ’ia tomo mai. E tamari’i ’outou nāna. E mea herehia ’outou e ana. ’Eiaha e fa’ataupupū i te reira. ’Eiaha e ’ōpani i te fa’ari’ira’a i teie tao’a hōro’a ma te mana’o feruri ē e ’ore ’outou e au ’ia hōro’ahia mai. Te mea pāpū, e ’ore e au i te hō’ē a’e o tātou ’ia hōro’ahia mai—e fa’ari’ihia te mau tao’a hōro’a ato’a a te Metua nā roto noa i te itoito ’e te aroha ’e te maita’i rahi o te Mesia Mo’a, ’auē rā te hia’ai rahi o tōna ’ā’au rima here nō tāna tamari’i tāta’itahi ’ia fa’ari’i i te reira ! I reira, ’a hiti mai ai teie māramaramara’a ’āpī, ’aore rā tei fa’a’āpīhia nō ’outou, ’a ’oa’oa nō te māuruuru i te Ta’ata hōro’a o teie tao’a hōro’a.

Mai tō’u ’itera’a i tō’u fa’aro’o i te 20ra’a ti’ahapa o tō’u matahiti, ’ua araara vau i terā mana’o pāpū ē e tamaiti mau vau nā te Atua. Hope noa atu vau i te ’apo i roto iā’u i teie tao’a hōro’a, hōhonu noa ato’a atu to’u ’itera’a ē ’o vai au ’e ’auē au i te here-hope-hia nei. Te tahi mau mea tei tauturu mai iā’u ’ia ha’apa’ari i tō’u māramaramara’a, ’o te mau parau ïa o te pāpa’ira’a mo’a, tō’u ha’amaita’ira’a patereareha, te ha’amorira’a i roto i te hiero, te tāvinira’a i te ta’ata, te paraura’a i tō’u māuruuru ’e te mau pure mo’a ’e tō’u Metua. ’Ua māere au i te ’oi’oi te ’oto ’e te māuiui ’e te pe’ape’a i roto i tō’u orara’a i te tauihia te hi’ora’a, i te tāmarūhia ’e i te upo’oti’ahia nō te rahira’a, nō tō’u noa ’itera’a i teie parau mau nehenehe.

Tē a’o mai nei Moroni « ’eiaha roa ’outou e huna i te mau hōro’a a te Atua », e « haere mai [rā] i te Mesia, ’e ’ia tāpe’a i te mau hōro’a maitata’i ato’a. » E ti’a ia ’outou ’ia haere mai i te Mesia ma te ti’aturi i tōna hāmani maita’i ’e te here, ’e ’ia fa’ari’i i te tā’āto’ara’a o tāna mau tao’a hōro’a o te ’oa’oa, te hau, te tīa’ira’a, te māramarama, te parau mau, te heheura’a, te ’ite ’e te pa’ari—ma te upo’o ti’aturi, te rima toro ’e te hōhora, ineine nō te fa’ari’i mai. ’E e ti’a ia ’outou ’ia fa’ari’i i teie mau tao’a hōro’a nō te mea ’ua pāpū ’e ’ua niuhia ’outou i roto i te ’ite ē, e tamāhine herehia ’outou nā te Atua, e tamaiti poihere ’outou nā te Atua, ’e ’ua hōro’a ’oia ia ’outou i tāna Tamaiti mo’a ’e te maita’i roa a’e nō te ’aufau nō ’outou, nō te fa’ati’a ia ’outou ’e nō te ha’amo’a ia ’outou.

E tamari’i ’outou nā te Atua. E ’ere te reira i te hīmene au noa tā tātou e hīmene. E rave ānei ’outou, e ’īriti ’e e fa’ari’i i teie tao’a hōro’a nō te ’ite ’e te māramaramara’a mai roto mai iāna ? E poihere ānei ’outou i te reira mai te tao’a rahi nei ? ’A fa’ari’i fa’ahou i teie tao’a hōro’a, ’aore rā, pēnei a’e e fa’ari’i mau i te reira nō te taime mātāmua, ’e ’ia taui te reira i te mau tuha’a ato’a o tō ’outou orara’a. ’O teie te rāve’a maita’i a’e tā te Atua i fa’aineine nō ’outou nā roto i te hōro’ara’a i tāna Tamaiti. Tē vai mau nei ’outou ’ia noa’a tō ’outou ’oa’oa ! Nā roto i te i’oa o Iesu Mesia, ’āmene.