E ara i te piti o te fa’ahemara’a
’Eiaha e tāpuni atu i te feiā e here nei ’e e turu nei ia ’outou ; ’a horo atu rā ia rātou ra.
E rave rahi matahiti i ma’iri, i te 12ra’a o tō’u matahiti, ’ua anihia vau e haere atu i tā’u pūhapara’a mātāmua o te pō a te pupu Autahu’ara’a a Aarona. E anira’a tīa’i-rahi-hia teie, nō te mea e ta’ata fa’atere pupu autahu’ara’a tō’u metua tāne ’e e mea pinepine ’oia i te haere e pūhapa nā muri i te mau tamāroa o te pāroita, ’a fa’aea noa ai au i te fare.
I te taera’a mai taua mahana ra, ’ua ’oa’oa roa vau. ’E e ti’a roa iā’u e parau ē ’ua hina’aro maoro na vau ’ia ’āmui atu i te mau tamāroa pa’ari a’e. ’Ua hina’aro roa vau e fa’a’ite atu i tō’u ’ana’anatae. I roto i teie tauto’ora’a, ’oi’oi roa vau i te tāmatamatara’ahia nō te hi’o e ’āmui ānei au i roto i te peu ha’uti ’e ’ia riro ’ei melo nō teie pupu.
’Ua fa’auehia vau ’ia rave mai i te mau tāviri o te pere’o’o o tō’u metua tāne, nō te tōtōā i te fēia fa’atere. ’Aita vau e ha’amana’o maita’i ra i te mea tā’u i parau atu nō te ’ume te mana’o o tō’u metua tāne, ’ua horo vitiviti rā vau i te pupu tamāroa ra ’e te mau tāviri i roto i te rima, ma te te’ote’o nō te ’ohipa tā’u i rave.
I muri iho, ’ua tae mai te fa’auera’a nō muri mai. E ti’a iā’u e tātara i te ’ōpani o te pere’o’o ’e e tāmau i te hō’ē rā’au i ropū i te tua pārahira’a o te ta’ata fa’ahoro ’e te pū pere’o’o. ’E e ti’a iā’u e pōnao i te ’ōpani o te pere’o’o ’ia ta’i noa te pū pere’o’o e tae roa i te pō, ma te rāve’a ’ore nā te mau ti’a fa’atere nō te tomo atu i roto i te pere’o’o ’e e tātara ’ōhie mai te rā’au.
Teienei, ’o teie te taime o te ’ā’amu e riro ai e mea ha’amā māuiui roa nō’u. I te taime ’a tāmau ai au te rā’au, ’ua pōnao vau i te ’ōpani ’e ’ua horo vitiviti atu mai tā’u e nehenehe nō te tāpuni i roto i te uru ’aihere nā pīha’i mai. I tō’u rā pārahira’a i raro i te repo, ’ua ’ite au i te hō’ē māuiui pūai. I roto i te pōiri ’e i roto i tō’u rūra’a, ’ua pārahi atu vau i ni’a iho i te hō’ē tumu rapahoe (cactus) putaputa.
’Ua tāpo’ihia tā’u mau ’auēra’a e te māniania o te pū pere’o’o, ’e ’aita tā’u e rāve’a ’ē atu maoti rā te ho’i mārū-noa-ra’a atu i te pere’o’o, te fa’īra’a i tā’u mau « hara », ’e te anira’a i te rapa’aura’a ha’eha’a ’e te ha’amā.
I te toe’a o taua pō ra, ’ua vai tīpapa noa vau i roto i te hō’ē fare ’ie ’a ’ōnihi noa ai tō’u metua tāne i te mau tara o te rapahoe i ni’a i tō’u […] i te fa’ahōhoni, e parau pa’i au ē ’aita vau i pārahi maita’i e rave rahi mahana i muri mai.
’Ua feruri fa’ahou ā vau i teie ’ohipa i tupu e rave rahi taime. I teienei e nehenehe au e ’ata nō ni’a i tō’u nevaneva o tō’u ’āpīra’a, noa atu ’ua māramarama mai te tahi mau parau tumu iā’u.
E au rā e rave rahi huru o te ta’ata e mea mātarohia i roto i te ta’ata nātura—te hia’ai ’ia tomo atu i roto, te hia’ai ’ia fa’a’ite iāna iho, te pe’ape’a ’ia ’ore e fa’ati’ahia mai, ’e te hina’aro rū e tāpuni nō te ’ape i te mau utu’a. I ni’a i teie huru hope’a ’o tā’u e rōtahi atu i teie mahana—te tāpunira’a i muri a’e i te ravera’a i te hō’ē ’ohipa ti’a ’ore.
I teienei, ’aita vau e fa’atuea nei i te tōtōā nō tō’u tamari’ira’a i te hara ’ino, e nehenehe rā tātou e tāpe’a mai i te tahi mau fa’atueara’a ’o te nehenehe e riro ’ei tauturu, ’a tāmatahia ai tātou i roto i tō tātou orara’a tahuti nei.
I roto i te ’ō i Edene, e orara’a fa’ahiahia mau tō Adamu ’e tō Eva—te ’ahunera’a te mā’a, te hāviti fa’aau ’ore o te ’ō—’eiaha noa hō’ē ’ō nehenehe hō’ē ’ō rā ’aita e ’aihere ’ino ’e te tātarāmoa.
’Ātīrā noa atu, ’ua ’ite ato’a tātou ē te orara’a i te ’ō e tā’oti’ahia tō rāua hina’aro e nu’u i mua. E ’ere te ’ō i te tīpaera’a hope’a ’o te hō’ē rā tāmatara’a, te mātāmua nō te hō’ē tuha’a roa mau ’o te fa’aineine ’e ’o te fa’ati’a ia rāua ’ia nu’u atu i tō rāua tīpaera’a hope’a nō te ho’i atu i mua i te aro ’o te Metua ’e te Tamaiti.
E ha’amana’o ’outou ē, tē vai ra nā mea e piti i roto i te ’ō. ’Ua fa’ati’ahia Lucifero e tāmata ia Adamu ’e ia Eva. ’Ua fa’ahema mātāmua ’oia ia Adamu ’ia ’amu i te hotu o te tumu rā’au nō te ’ite i te maita’i ’e te ’ino. Ma te ha’amana’ora’a i te fa’auera’a ’eiaha e ’amu i te reira, ’ua pāto’i Adamu. I muri iho tae mai nei ’o Eva i ha’amaita’ihia, ’o tei mā’iti e ’amu i te hotu, ’e ’ua ’ume mai ia Adamu ’ia nā reira ato’a.
I muri mai, ’ua parau Adamu ’e ’o Eva ē, e tītauhia teie fa’aotira’a nō te fa’atupu i te ’ōpuara’a a te Metua i te ao ra. Nā roto rā i te ’amura’a i teie hotu, ’ua ’ōfati rāua i te ture—hō’ē ture ’o tei hōro’a-’āfaro-hia mai e te Metua. Nā te māramaramara’a teiaha o te maita’i ’e te ’ino ’o tei riro ’ei hōpe’ara’a tei arata’i ia rāua i roto i te māinaina, ’a fa’aro’o ai rāua i te reo o te Metua i te fa’aarara’a mai i tōna ho’ira’a mai i te ’ō. ’Ua ’ite atu ra rāua tē vai taha’a noa ra rāua, inaha ’aita ihoā tō rāua e ’ahu, tē ora ra rāua i roto i te orara’a hara ’ore. ’Ua hau atu rā paha tō rāua māuiui i tō rāua vai ’ahu-’ore-noa-ra’a i terā taime, ’ua vai taha’a rāua, i teienei, nō tō rāua harara’a. ’Aita tō rāua e ruru’ara’a ’e e pārurura’a. ’Ua vai taha’a noa rāua ’ia au i te aura’a mau o teie ta’o.
Ma te ’itera’a i tō rāua vai taha’a-noa-ra’a ’e te paruparu, Lucifero te ta’ata rima tōtōā, ’ua fa’ahema fa’ahou ia rāua—i teienei ’ia tāpuni ia rāua i te Atua.
Teie fa’ahemara’a, e pi’i au te reira te « piti o te fa’ahemara’a », ’o te fa’ahemara’a ïa e hōpoi mai i te utu’a rahi a’e mai te peu e hema tātou. ’Oia mau, e mea faufa’a roa ’ia ’ape i te mau fa’ahemara’a mātamua ato’a nō te ’ōfati i te ture a te Atua, ’ua ’ite rā tātou e hema te tā’āto’ara’a i te mau fa’ahemara’a mātamua e rave rau i te fenua nei. ’A nu’u ai tātou i roto i te pa’ari ’e te māramaramara’a, tē ti’aturi nei tātou ē tō tātou pūai nō te ’ape i te mau fa’ahemara’a mātāmua e maita’i tāmau noa mai, ’a tītau ai tātou ’ia riro mai tō tātou Fa’aora ’o Iesu Mesia te huru.
E tāmata te tahi pae i te tāpuni atu i te Atua nō te mea ’aita rātou e hina’aro ’ia ’itehia mai ’aore rā ’ia fa’a’itehia, ’e e ’ite rātou i te ha’amā ’aore rā i te hara. Noa atu rā, e rave rahi tuha’a o te pāpa’ira’a mo’a e ha’api’i nei ia tātou ē, e’ita roa e nehenehe e tāpuni i te Atua. E fa’a’ite atu vau ia ’outou i te tahi.
Tē ha’pi’i nei te Fatu ia Ieremia nā roto i te mau uira’a i muri nei : « E ti’a ia vai ’ia fa’atāpuni iāna iho i te vāhi mo’e ra, e ’ia ’ore ’ia ’itea atu e au ra ? tē parau mai ra Iehova. E ’ere ānei te api te mau ra’i ’e te fenua ato’a iā’u ra ? »
’E ’ua ha’api’ihia Ioba :
« Tē hi’o mai rā ’oia i tō te ta’ata nei haere’a, ’e tē hi’opo’a mai rā i tāna ra mau ta’ahira’a.
« ’Aita e pōuri, ’aita e maru pohe, ’ei tāpunira’a nō te feiā rave parau ’ino ra ».
Tē parau mai ra te Salamo a Davida ma te rohipehe :
« E Iehova, ’ua hi’opo’ahia vau e ’oe ’e ’ua ’iteahia ho’i au.
« ’Ua ’ite ’oe i tā’u pārahira’a i raro ’e tā’u ti’ara’a i ni’a ; ’ua ’ite ’oe i tō’u nei mana’o i te ātea ’ē ra.…
« ’E ’aita roa e parau o roto i tā’u vaha i toe i te ’itea-hua-hia e ’oe , e Iehova. …
« E haere ti’a vau nei i hea e mo’e ai i tō vārua? ’aore rā, e ma’ue ti’a vau i hea e ’ore ’oe e ’ite mai ai ?
« ’Ia pa’i’uma vau i ni’a i te mau ra’i ra, tei reira ’oe ».
Mau melo fa’afāriu ’āpī
Nō ’outou tei ’āmui ’āpī mai i Te ’Ēkālesia a Iesu Mesia i te Feiā Mo’a i te mau Mahana Hope’a nei, e riro te piti o te fa’ahemara’a i te mea fifi roa. Nā roto i tō ’outou bāpetizora’a, ’ua fafau ’outou i te Atua e rave i ni’a ia ’outou i te i’oa o Iesu Mesia, nō ’outou e rave rahi tē vai ra hō’ē tauira’a i roto i te orara’a e tītauhia. Te tauira’a i te hō’ē huru orara’a ’e ’ere ïa i te mea ’ōhie. Pinepine e tītau te reira ia ’outou ’ia tāui i te mau peu ’e te mau ravera’a ’e ’oia ato’a i te mau auhoara’a, nō te nu’u atu i mua i tō ’outou Metua here i te ao ra.
’Ua ’ite te ’enemi e nehenehe ’outou e pāruru-’ore-hia i mua i tāna mau ’arora’a ha’iha’i. E fa’ariro ’oia i tō ’outou orara’a tahito, ’o tei vaiiho ia ’outou i roto i te māuruuru ’ore e rave rahi taime, i teienei rā e au ē e mea au a’e. E fa’ahema te tihotiho, tōna ïa i’oa i roto i te buka a Apokalupo, ia ’outou ma te mau mana’o mai teie te huru : « E ’ere ’oe i te mea pāutuutu roa nō te taui i tō ’oe orara’a, e’ita e haere ia ’oe ; ’aita tō ’oe e ti’ara’a i roto i teie feiā, e’ita roa rātou e fa’ari’i mai ia ’oe ; mea paruparu roa ’oe ».
Mai te mea e au ra ia ’outou e mea mau teie mau mana’o, ’outou tei tomo ’āpī mai i ni’a i te ’ē’a nō te fafaura’a, tē ti’aoro atu nei mātou ia ’outou ’eiaha e fa’aro’o atu i te reo o te tihotiho. Tē here nei mātou ia ’outou, e tāpae ihoā ’outou ; tē fa’ari’i nei mātou ia ’outou ; ’e nā muri i te Fa’aora, e fa’ari’i ’outou i te pūai nō te upo’oti’a. I te taime e hina’aro rahi ai ’outou i tō mātou here ’e tā mātou turura’a, ’eiaha ’outou ’ia hemahia i te mana’ora’a ē e pāto’i mātou ia ’outou mai te mea e ho’i ’outou i tō ’outou orara’a tahito. Nā roto i te mana fāito ’ore o te Tāra’ehara a Iesu Mesia, e nehenehe ’outou e fa’a’āpī-fa’ahou-hia. Mai te peu rā e tāpuni ’outou iāna ’e e fa’aātea ’outou ia ’outou i tā ’outou ’āmuira’a fa’aro’o ’āpī, tē fa’aātea rā ïa ’outou ia ’outou i te puna mau e nehenehe ai ’e e hōro’a ia ’outou te pūai nō te upo’oti’a.
’Ua fa’a’ite mai te hō’ē hoa tō’u, e melo fa’afāriu ’āpī, i te fifi rahi nō te tāpe’a i te fa’aro’o i roto i te ’ōtahira’a. Tē vai ra te pūai rahi i roto i te rirora’a ’e te vaira’a ’ei tuha’a nō te hō’ē ’āmuira’a tauturu—noa atu te mau tāfifira’a, ’oia ato’a ra te mau nu’ura’a tāmau e ha’amaita’ihia ra e te aroha o te Fa’aora ’o Iesu Mesia.
’Ua ha’api’i te peresideni Russell M. Nelson : « E ’ere te upo’oti’ara’a i ni’a i te ao nei i te hō’ē ’ohipa o tē tupu i roto i te hō’ē mahana ’aore rā e piti. E tupu te reira i te roaraa o te hō’ē orara’a ’a ha’apa’o tāmau ai tātou i te ha’api’ira’a tumu a te Mesia. E fa’atupu tātou i te fa’aro’o ia Iesu Mesia nā roto i te tātarahapara’a i te mau mahana ato’a ’e nā roto i te ha’apa’ora’a i te mau fafaura’a o tē hōro’a mai ia tātou i te mana. E fa’aea noa tātou i ni’a i te ’ē’a o te fafaura’a, ’e e ha’amaita’ihia tātou i te maita’i o te pūai i te pae vārua, te heheura’a nā te ta’ata iho, te hō’ē fa’aro’o tupu tāmau noa i te rahi ’e i te aupurura’a a te mau melahi ».
Mai te peu tē fa’aruru nei ’outou i te pēpē pae tino, e fifi atu ā tō ’outou huru ’e e nehenehe e ha’afifi i tō ’outou orara’a mai te peu ’aita ’outou e fārerei i te taote e tano. E tano ato’a te reira nō te mau pēpē pae vārua. O te mau pēpē pae vārua ana’e ’o te ’ore e rapa’auhia e nehenehe e ha’afifi i tō ’outou fa’aorara’a mure ’ore. ’Eiaha e tāpuni atu i te feiā e here nei ’e e turu nei ia ’outou, e horo atu ia rātou ra. E tauturu mai te mau ’episekōpo maita’i, te mau peresideni ’āma’a, ’e te feiā fa’atere ia ’outou ’ia noa’a te mana fa’aora o te Tāra’ehara a Iesu Mesia.
Nō ’outou e tāpuni nei, tē ti’aoro nei au ia ’outou ’ia ho’i mai. Tē hina’aro nei ’outou i te mea tā te ’evanelia ’e te Tāra’ehara a Iesu Mesia e pūpū nei, ’e tē hina’aro nei mātou i te mea tā ’outou e nehenehe e pūpū mai. ’Ua ’ite te Atua i tā ’outou mau hara, e’ita ’outou e nehenehe e tāpuni iāna. ’A fa’afa’ite mai ia ’outou i mua iāna.
’Ei feiā mo’a nōna, tītauhia tātou ’ia ha’apūai i te peu nō te rirora’a ’ei melo o te ’Ēkālesia ’oia ho’i te here, te fa’ari’ira’a ’e te fa’aitoitora’a i te feiā ato’a e hina’aro nei e nu’u i mua i ni’a i tōna ’ē’a.
E ara i te piti ’o te fa’ahemara’a ! ’A pe’e i te parau a’o a te mau peropheta nō te tau tahito ’e nō teie ’anotau, ’e ’a ’ite ē e’ita ’outou e nehenehe e tāpuni i te hō’ē Metua here.
I te tahi atu pae, a ’imi i te mana fa’aora fa’ahiahia o te Tāra’ehara a Iesu Mesia. O teie te fā mau o tō tātou orara’a—’ia fa’ari’i i te hō’ē tino paruparu ’e te tahuti e « ro’ohia i te mau paruparu pae tino nei » ’e e hema nei, e mea ’oto ra, i te mau fa’ahemara’a mātāmua ; ’ia nu’u i mua noa atu e fati tātou i mua i teie mau fa’ahemara’a ; ’e ’ia ’imi i te tauturu hanahana i muri iho, ’ia riro tātou mai tō tātou Fa’aora ’e tō tātou Metua i te ao ra. Nāna teie fa’anahora’a. Teie ana’e te fa’anahora’a mau. Tē fa’a’ite pāpū nei au i teie mau parau mau, nā roto i te i’oa ’o Iesu Mesia, ’āmene.