Mai te tamaiti iti

’Ua ha’amata Iesu i te matahiti hope’a o tōna orara’a tāhuti nei ma te tūra’i rahi i te ha’api’ipi’ira’a o tāna mau ’āpōsetolo. ’Ia ora mai tāna poro’i ’e tāna ’Ēkālesia, e rahi atu ā ïa tei tītauhia ’ia nene’i i roto i te ’ā’au o teie 12 ta’ata noa, tei mātau iāna e 24 noa a’e ’āva’e te maoro.

I te hō’ē mahana, ’ua ’ite Iesu i te māniania i rotopū i te Tino ’Ahuru Ma Piti ’e ’ua ui atu ra : « E aha tā ’outou i mārō noa ia ’outou iho ? » E au ē ’ua ha’amā rātou ’e « māmū noa ihora », tē parau ra te pāpa’ira’a. ’Ua ta’a rā i teie ’orometua rahi i te mau ’orometua ato’a i te mana’o i tō rātou ’ā’au, ’e tē huru ’ite ra ’oia i te tāpa’o mātāmua nō te te’ote’o o te ta’ata. Nō reira, « ’ua parau atu ra [’oia] i te hō’ē tamaiti iti […]

« ’Ua parau atu ra, ’Oia mau tā’u e parau atu ia ’outou nei, ’Ia ’ore ’outou ’ia fa’ahuru-’ē-hia ’e ’ia riro mai te tamari’i ri’i ra, e ’ore roa ’outou e ō i te bāsileia ra o te ao.

« ’E teienei, ’o tei fa’aha’aha’a iāna iho ē mai teie nei tamaiti iti, ’oia te rahi i te bāsileia o te ao ra. »

’Ia ta’a ato’a ia tātou ē, nā mua ato’a i te fānaura’a o te Mesia, tei roto i te parau fa’atau aroha a te ari’i Beniamina teie parau hōhonu nō ni’a i te ha’eha’a o te tamari’i. Tē parau nei : « ’E ’ua riro te ta’ata nātura nei ’ei ’enemi nō te Atua […] ’e e vai noa ho’i ē a muri ē a muri noa atu, maori rā […] ’ia riro ’ei ta’ata mo’a nā roto i te tāra’ehara a te Mesia ra te Fatu, ’e ’ia riro ho’i mai te hō’ē tamari’i ra i te auraro […] te ha’eha’a […] te ’ī i te aroha […] mai te hō’ē tamari’i e [pāhono] i tōna ra metua tāne. »

I teienei, e mea pāpū e mau peu ri’i tamari’i tā tātou e ’ore e fa’aitoito nei. ’A 25 matahiti i ma’iri, ’ua hōhoni tō’u mo’otua tamāroa toru matahiti, i tōna tuahine pae matahiti, i ni’a i te rima. Nā tā’u hunō’a tāne e ha’apa’o i te tamari’i i terā pō, ’ua ha’aviti ’oia i te a’o atu i tāna tamāhine i te mau ha’api’ira’a ato’a nō ni’a i te fa’aorera’a hapa, ’o tāna e nehenehe e feruri, ma te parau i te hope’a ē, pāpū ē ’aita tōna taea’e iti e ta’a ra e aha te huru ’ia hōhonihia te rima. Hō’ē minuti paha te maoro, pēnei a’e e minuti ’e te ’āfa te manuiara’a teie ha’api’ira’a metua tāne, e hape mau, pa’a’ina mai nei te ta’i mai roto mai i te piha o te tamari’i ’e te reo hau ato’a o tō’u mo’otua tamāhine i te tuōra’a : « ’Ua ta’a iāna i teienei. »

Nō reira, e aha ïa te faufa’a e tano ’ia hi’o mai i roto i te orara’a o hu’a mā ? E aha te mea i fa’atahe i te roimata o te Mesia iho i roto i te ’ohipa poihere roa a’e o te Buka a Moromona tā’āto’a ? E aha tā Iesu i ha’api’i ’a pi’i ai ’oia i te auahi o te ra’i ’e i te mau melahi pāruru nō te fa’a’ati i te reira mau tamari’i, ma te fa’aue i te feiā pa’ari ’ia « hi’o na i tā [rātou] mau tamari’i ri’i » ?

’Aita tātou i ’ite e aha tei ’ume mai i teie mau mea ato’a, ’ua feruri rā vau ē, nō tō rātou paha ateate ’e tō rātou hara ’ore, ’e tō rātou ha’eha’a mai te fānaura’a mai ā, ’e te mea tā te reira e nehenehe e fa’atae mai i roto i tō tātou orara’a mai te mea e tāpe’a mai tātou i te reira.

Nō te aha pa’i i parau ai te hō’ē ta’ata nō te mau mahana tapineva ē e « faufa’a ’ore rahi teie ? » E aha ho’i ’o « te mau mana’o faufa’a ’ore […] ’e te te’ote’o o te mau tamari’i a te ta’ata nei » te mau parau ’e te tāpa’o nō te fare rahi ’e te ’ā’ano ’e te pohe roa i te pae vārua, i roto i te ’ōrama a Lehi ? ’E te ’āti Zorama ïa, terā pupu i pure ma te rima pu’u ? ’Ua parau Alama nō rātou : « E te Atua, tē [pure] nei rātou ia ’oe i tō rātou vaha, ’ua ’ī roa rā rātou […] i te mau mea faufa’a ’ore o te ao nei. »

I te tahi atu pae, e mea ānei tei au a’e, tei ateate a’e ’e tei ha’eha’a a’e i te tamari’i e pure ra ? Mai te huru ē ’o te ra’i tei pārahi i roto i te piha. E parau pāpū roa ho’i te Atua ’e te Mesia nō rātou, nō vetahi rā i muri mai, e nehenehe te reira e riro mai ’ei ’ohipa ānia noa.

Mai tā Elder Richard L. Evans i fa’ahiti ’a 60 ti’ahapa matahiti i ma’iri : « E rave rahi o tātou e fāfā’i nei e keresetiano tātou […] ’aita rā tātou e ti’aturi māite nei iāna […] Tē fa’atura nei tātou iāna, ’aita rā e pe’e nei iāna […] Tē fa’ahiti nei tātou i tāna mau parau, ’aita rā e ora nei i te reira. » « Tē fa’ahiahia nei tātou iāna, ’aita rā e ha’amori nei iāna. »

E aha pa’i te maita’i ta’a ’ē o te orara’a ’āhani tō te ao nei e mana’o hau atu ia Iesu, ’eiaha pa’i nō te mau parau tuhi noa, i terā ’e terā taime.

E mea here mau rā te mau tamari’i iāna, ’e e nehenehe i terā here e mani’i mai i roto i te tahi atu mau tā’amura’a nō rātou i ni’a i te tahua o te orara’a nei. Tei mātauhia, i tō rātou ’āpīra’a iho, e mea ’ōhie roa nō te tamari’i ’ia here, e mea fa’aore ’ōhie roa rātou i te hapa, ’e e mea au roa ho’i tō rātou ’ata e tāmarū te reira i te ’ā’au to’eto’e roa a’e, te mea ’eta’eta roa a’e.

E’ita e fa’aea teie tāpura. Te ateate ? Te ti’aturi ? Te itoito ? Te mana’o pa’ari ?

E haere tātou e hi’o i te ha’eha’a i mua i te Atua o te hō’ē taure’are’a e hoa iti rahi nō’u.

I te 5 nō Tēnuare ra 2025—’a 91 mahana i teienei—’ua hōro’ahia ia Easton Darrin Jolley te Autahu’ara’a a Aarona ’e ’ua fa’atōro’ahia ’ei diakono i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei.

I tīa’i maoro noa na Easton ’ia ’ōpere i te ’ōro’a nō te Tāmā’ara’a a te Fatu, mai iāna e ha’amana’o ra. ’Ua ’āpe’ehia rā teie tīa’ira’a mo’a e te ahoaho o te ’ā’au nō te manuia ’ore, ’oi topa mai ’oia, e fa’ao’ō’o mai te ta’ata ’e e ha’amā roa ïa ’oia ’e tōna ’utuāfare ato’a.

’Ia ’ite ’outou, e ma’i varavara ’e te ’ino rahi tō Easton, ’o te ma’i puna uaua ra nō Ullrich. ’Ua ’āpapa haere noa mai te mau fifi ri’ari’a mau i roto i tōna orara’a tamari’i, ’a vāvāhi ato’a ai i tōna mau tīa’ira’a ’e te mau moemoeā nō ananahi. E’ita e maoro roa e mau tāmau ’oia i roto i te pārahira’a tūra’i. ’Aita te ’utuāfare e paraparau nei i te mea e tīa’i ra iāna i muri mai.

Te sābati i muri i tōna fa’atōro’ara’ahia, e ’ōpere Easton i te ’ōro’a nō te taime mātāmua. Te fa’aitoitora’a rahi nōna, ’o te ti’ara’a ïa ma teie mau tāpa’o mo’a i mua i tōna metua tāne, ’o ’oia te ’episekōpo o te pāroita. I te ferurira’a ’oia i teie hōpoi’a, ’ua tāparu ’oia ’e ’ua ha’apehapeha, ’e ’ua ta’i ’e ’ua tāparu, ’ia ha’apāpūhia mai ē, e’ita te ta’ata, e’ita hō’ē a’e, e tāmata i te tauturu mai iāna. E mau tumu e rave rahi, ’ōmo’e iāna iho, i hina’aro ai ’oia e rave i te reira ’o ’ōna ana’e ’e ma te tauturu-’ore-hia.

I te otira’a te tahu’a i te vāvāhi i te pāne ’e i te ha’amaita’i i te reira—te tāpa’o nō te tino fati o te Mesia—’ua tūte’ite’i Easton i tōna tino fati nō te fa’ari’i mai i te fāri’i pāne. Terā rā ho’i, e toru ta’ahira’a huru rahi i roto i teie fare purera’a nō te tae atu i terā tahua i ni’a. Nō reira, i muri iho i te ravera’a i tāna fāri’i, ’ua toro ’oia i tōna rima i ni’a ’a tu’u ai i te fāri’i i ni’a atu i te ’āuri tāpe’ara’a. ’Ei reira, ’ua pārahi ’oia i raro, i ni’a i te ta’ahira’a ’āvae teitei roa a’e, ’e ma tōna rima ’ua huti mai i tōna ’āvae ’atau i ni’a i te ta’ahira’a mātāmua. I muri iho ’ua huti ato’a mai i tōna ’āvae ’aui, ē nā reira noa ē tāpae atu ra ma te tauto’ora’a rahi i ni’a i te tupu’ai mou’a o tōna iho mou’a Everest e toru ta’ahira’a.

’Ua ne’e atu ra i pīha’i i te hō’ē pou i reira ’oia i te hutira’a iāna i ni’a nō te ti’a mai. Ho’i mai nei ’oia i te vāhi tei reira te fāri’i. Ē ma’a ta’ahira’a ri’i atu ā, tei mua ’oia i te ’episekōpo, tōna metua tāne, tei ha’apa’ari noa, ma te roimata e mani’i noa i ni’a i tōna mata, nō te ’ore e tauahi mai i teie tamaiti itoito hope ’e te fa’aro’o hope. ’E nō Easton, ma te mana’o tāmarū ’e te ’ata’ata i tūrama i tōna mata, e ti’a roa iāna ’ia parau ē : « ’Ua ha’amaita’i au [i to’u metua tāne ’e] ’ua oti iā’u te ’ohipa [tāna] i hō mai nā’u e rave ra. »

Te fa’aro’o, te atati’a, te ateate, te ti’aturi, te tura, ’e i te hope’a, te here nō terā metua tāna i hina’aro roa ’ia ha’amāuruuru. Nō teie nei ’e te tahi atu rahira’a maita’i tātou e parau ato’a ē : « ’O tei fa’aha’aha’a iāna iho ē mai teie nei tamaiti iti, ’oia te rahi i te bāsileia o te ao ra. »

Te mau tuahine ’e te mau taea’e ’e te mau hoa ē, te nūmera hō’ē roa i ni’a i te tāpura o te mau hōho’a nehenehe roa a’e, ’ua ’ite au ’o te mau pēpe ïa ’e te mau tamari’i ’e te feiā ’āpī, mai rātou tā tātou i fa’ahiti i teie mahana, i te mea ha’apa’o maita’i ’e te hau a’e i te maita’i. Tē parau pāpū nei au ē ’o rātou te mau hōho’a nō te bāsileia o te Atua e ’ūa’a nei i ni’a i te fenua nei, i tōna pūai tā’āto’a ’e tōna nehenehe tā’āto’a.

Ma taua vārua ra nō te ’itera’a pāpū, tē hōro’a nei au i tō’u ’itera’a pāpū ē, ’ua ’ite Iosepha Semita i te mea tāna i parau ē ’ua ’ite ’oia, ’e ’ua paraparau ia rātou tāna i parau ’ua paraparau ’oia. Tē parau pāpū nei au ē, ’o te ta’ata ha’eha’a ra ’e te ateate, ’o Russell M. Nelson te peropheta ’e te hi’o ’aravihi tei fa’atōro’ahia e te Atua. Mai roto mai i tā’u mau tai’ora’a i roto i te orara’a nei, tē hōro’a nei au i tō’u ’itera’a pāpū ē ’o te Buka a Moromona te buka faufa’a roa a’e tā’u i tai’o, ’e ’o te ’ōfa’i tāpe’a ’apu o tā’u nohora’a iti i roto i te bāsileia e rave rahi aora’i. Tē hōro’a nei au i tō’u ’itera’a pāpū ē, tē fa’aho’i mai nei te autahu’ara’a ’e te pure i tō’u ora—te autahu’ara’a a te Mesia ’e tā ’outou mau pure. ’Ua ’ite au e parau mau ana’e te reira ’e te hōro’a nei au i tō’u ’itera’a pāpū nō te reira nā roto i te i’oa o te tamaiti auraro roa a’e ’e te ha’eha’a o te mau tamaiti ato’a a te Atua—te Alepha ’e te Omega, te Tē vai nei au rahi, tei fa’asataurohia, te ’ite ha’apa’o maita’i—’oia ho’i te Fatu Iesu Mesia, ’āmene.