’Ua riro tō’u here nō te Fa’aora ’ei « nō te aha » nō’u

’Ua ’ite ānei ’outou ē, tē fa’atae tāmau mai nei tō tātou peropheta here, te peresideni Russell M. Nelson, i te mau anira’a manihini ia tātou ? E ’ere i te mea māere, ’ua ani mai ’oia ia tātou ’ia tai’o ’e ’ia feruri hōhonu i te mau parau poro’i tei hōro’ahia i roto i nā ’āmuira’a e piti i ma’iri a’e nei. I te ’āva’e ’Ēperēra 2024, ’ua parau ’oia, « tē ti’aturi nei au ē, e tuatāpapa maīte ’outou i te mau parau poro’i o teie ’āmuira’a i te roara’a o te mau ’āva’e i muri nei ». I muri iho, i te ’āva’e ’Ātopa 2024, ’ua parau ’oia, « tē fa’aitoito atu nei au ia ’outou ’ia tuatāpapa i te mau parau poro’i [a te feiā a’o]. ’Ia fa’a’ohipa i te reira mai te hō’ē tāmatara’a pāpū e aha te parau mau, ’e e aha e ’ere i te parau mau, i roto i nā ’āva’e e ono i muri nei ».

E nehenehe teie mau anira’a manihini e ’āmuihia i te mau anira’a manihini a te mau peropheta ’o tā tātou i fa’ari’i i te roara’a o tō tātou orara’a, ’oia ato’a ’e ’oia ihoā ra ’o tā tātou i fa’ari’i i te mau matahiti i ma’iri a’e nei. E nehenehe tātou e putapū ’aore rā e feruri ē, teie mau anira’a manihini ’o te tahi atu ïa ’ohipa e tu’u atu i roto i tā tātou tāpura ’ohipa, nō te mea noa ’ua tītauhia ’aore rā ’ua anihia mai ia tātou e rave. E nehenehe rā ānei e vai fa’ahou ā ra ?

Ma te ferurira’a i te reira ’e i te mau anira’a manihini ato’a tā tātou i fa’ari’i, ’ua ha’amana’o vau i te hō’ē ha’api’ira’a tā’u i ha’api’i mai ’e ’ua fa’aoti e mea maoro i teienei. Tē tāmata nei au i te rave i teie mau mea, tei riro ’ei mea faufa’a nō’u, nō te mea ’ua here au iāna ; ’ua here au i tō tātou Fa’aora. ’O teie te tumu mau ’e te pūai rahi a’e nō te aha vau e rave ai i te mea tā’u e rave nei, ’e i muri iho e tū’ati atu i te reira i tō’u here nō ’outou, tō’u mau taea’e ’e mau tuahine here.

’Ei taea’e nō ’outou, tē ti’aturi nei au e fa’ariro ’outou i tā’u mau parau mai te hō’ē anira’a ’ā’au tae, nō te ’imi ’ia māramarama i te rāve’a nō te tū’ati i te mau mea ato’a tā tātou e rave nei ’e tō tātou here nō te Fa’aora.

E tauturu te reira ia tātou ’ia māramarama i te « nō te aha » mau i muri i te mau mea ato’a tā tātou e rave nei ’ei mau pipi nā te Fa’aora. E tauturu te reira ia tātou ’ia ha’apa’ari i tō tātou tā’amura’a o te fafaura’a ’e te Atua, ’ia māramarama i tāna mau parau mau hanahana ’e te mure ’ore, tāna mau parau mau mure ’ore ’e te hope roa o te ’ore roa e taui. Te mau parau mau mure ’ore mai te « i aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe tē fa’aro’o iāna ra, ’ia roa’a rā te ora mure ’ore ».

E mea fa’ahiahia roa ’ia ’ite ē i te tahi taime, nō te mea ’ua rave tāmau noa tātou i te tahi mau mea e tae roa ’ua riro mai ’ei peu tumu, tē fa’ati’a nei tātou i teie mau peu tumu ’aore rā mau ’ohipa ri’i ’ia arata’i i tā tātou mau tauto’ora’a nō te patu i te fa’aro’o ia Iesu Mesia. E au ra ē tē rave nei tātou i te reira mau ’ohipa nō te mea e rave rahi matahiti tō tātou nā reira noa-ra’a, ma te ’ore e feruri i tō te reira hope’ara’a i ni’a i tō tātou aura’a o te fafaura’a ’e te Fa’aora.

I roto i te ao tā tātou e ora nei, e fa’atumu pinepine tātou i ni’a i te mea tā tātou e rave nei ’e te fa’aotira’a tāmau i te mau ’ohipa ’e te mau ’ōpuara’a. I roto i te hō’ē vāhi pae vārua, e rāve’a nō tātou ’ia haere i ni’a atu ā i te rave-noa-ra’a i te mau mea ’aore rā i te fa’aotira’a i te mau fā, ma te ta’ara’a nō te aha tātou e rave ai i te reira. Mai te mea e nehenehe tātou e māramarama ’e e tū’ati te tumu nō tā tātou mau ’ohipa i tō tātou here nō te Fa’aora ’e tō tātou Metua i te ao ra, ma te fāna’ora’a i te reira mau rāve’a, e hāro’aro’a tātou ē noa atu te ravera’a i te mau mea maita’i, mai te fana’ora’a i te mau ’ātivite ’aore rā te mau peu tumu a te ’Ēkālesia ’e te ravera’a i te reira ma te au maita’i e ’ohipa tano ïa, ’ia tū’ati ana’e tātou i te reira i te « nō te aha », e ha’amaita’ihia tātou i te ta’ara’a i te tumu. E ’ere noa te reira i te ravera’a i te mau ’ohipa maita’i ’aore rā i te rave-tano-ra’a i te reira ; e rave ’āfaro ti’a ato’a tātou i te reira.

’Ei hi’ora’a, ’ia ha’amau ana’e ’outou i te hō’ē fā ’ia tai’o i te mau pāpa’ira’a mo’a, ’ia pure ma te ’ā’au tae, ’aore rā ’ia fa’aineine i te hō’ē ’ātivite nō tō ’outou ’utuāfare ’aore rā tā ’outou pāroita, te fā mau ’o te fa’aotira’a noa ānei i teie mau ’ohipa ? ’Aore rā teie mau ’ohipa e mau rāve’a ānei, e mau mauiha’a ’o tā ’outou e mau nei, nō te fa’aoti i te fā mau ? Te fā ’o te fa’anaho-noa-ra’a ānei i te hō’ē ’ātivite nō te mea tē rave nei tātou i te reira e rave rahi matahiti, ’e i muri iho ’ia tāpa’o i te ’oehā ē ’ua rave fa’aoti tātou i te reira ? ’Aore rā, fa’ahou ā ’o te mau rāve’a ānei ’o tā tātou e fa’a’ohipa nō te ha’api’i mai, nō te putapū ’e nō te tū’ati atu i te Fa’aora ?

’Eiaha na ’outou e ha’afifi te mana’o nō te mea tā’u e hina’aro e parau nō te mau ’ātivite ’e te mau peu tumu, ’aore rā i te ha’amaura’a i te mau fā ’e te ha’a-itoito-ra’a nō te fa’atupu i te reira ; ’aita e ’ohipa ’ino te reira. Terā rā, tē ani manihini nei au ia ’outou ’ia ’īriti i tō ’outou ’ā’au ’e tō ’outou ferurira’a i te rāve’a ’e te ha’amaita’ira’a o te hāro’aro’ara’a, nō te aha tātou e rave ai i teie mau ’ohipa ’e e nāhea tātou ’ia fa’a’ohipa i tā tātou ha’apa’ora’a fa’aro’o.

Te hō’ē hi’ora’a maita’i nō te mau peu tumu tei fa’atumuhia i ni’a i te Mesia, ’o te tītaura’a ïa tā te peresideni Dallin H. Oaks i hōro’a mai ia tātou pā’āto’a nā ni’a i te i’oa o te Peresidenira’a Mātāmua. ’Ua parau te peresideni Oaks, « ’a tomo ai tātou i roto i teie matahiti ’āpī, ’a fa’aineine ia tātou nō te fa’ahanahana i te Pāsa te tusia tāra’ehara a Iesu Mesia. Noa atu e aha tā vetahi ’ē e ti’aturi nei ’aore rā e rave nei, e ti’a ia tātou ’ia fa’ahanahana i te ti’afa’ahoura’a o tō tātou Fa’aora ora, ma te ’imi-māite-ra’a i tāna mau ha’api’ira’a ’e te tauturura’a ’ia ha’amau i te mau peu nō te Pāsa i roto i tō tātou tōtaiete tā’āto’a, i roto iho ā rā i tō tātou iho mau ’utuāfare ». Mai tā ’outou e ’ite nei, e ’ere noa i te hō’ē anira’a manihini ’ia fana’o i te mau peu tumu. Tē fa’a’ohipa nei rā tātou i teie mau peu tumu mai te hō’ē rāve’a nō te ha’api’i rahi mai ā, nō ni’a i te Fa’aora ’e nō te ha’amana’o i tōna ti’afa’ahoura’a.

Rahi atu tō tātou tītaura’a e fa’atū’ati i te tumu ’e tō tātou here nō te Fa’aora, rahi atu ā tātou e nehenehe e fa’ari’i i te mea tā tātou e hina’aro ’aore rā e ’imi ra. ’Ua parau te peresideni Nelson, « noa atu te huru o tā ’outou mau uira’a ’aore rā tō ’outou mau fifi, e ’ite-tāmau-hia te pāhonora’a i roto i te orara’a ’e te mau ha’api’ira’a a Iesu Mesia. » ’E i muri iho ’ua hōro’a mai ’oia i teie anira’a manihini : « ’A ha’api’i hau atu ā mai nō ni’a i tāna tāra’ehara, tōna here, tōna aroha, tāna ha’api’ira’a tumu ’e tāna ’evanelia i fa’aho’i-fa’ahou-hia mai o te fa’aorara’a ’e o te haerera’a i mua. ’A fāriu atu i ni’a iāna ! ’A pe’e iāna ! »

’A feruri na i teie i roto i tō ’outou ’ā’au ’e tō ’outou ferurira’a : Tē ti’aturi ra ānei ’outou ē te fā o te anira’a a te peresideni Nelson nō te tauturu ia tātou ’ia fa’aineine i te hō’ē tāpura hi’opo’ara’a, i reira tātou e putu rahi ai i te ’ite ’e e fa’aoti ai i te mau ’ohipa, ’ia nehenehe ia tātou e tāpa’o i tāna anira’a i ni’a i tā tātou tāpura nō te ’ohipa e rave ? ’Aore rā tē ani mai nei ’oia ia tātou ’ia feruri i te mau huru o teie mau parau mau ’e teie mau parau tumu mure ’ore, mai te hō’ē rāve’a nō te hāro’aro’a i te « nō te aha » ’e ’ia fa’atū’ati i te here o te fafaura’a a te Fa’aora nō tātou i tō tātou tere ’ei pipi i te roara’a o te tātou orara’a ?

E fa’ahōho’a atu vau i te parau tumu ’o tā’u e tāmata nei i te hōro’a atu. Hō’ē mā’itira’a, e mea fifi roa paha, ’oia ho’i te tai’ora’a i te mau poro’i ato’a nō roto mai i te ’āmuira’a hō’ē taime, i muri iho ’ia oti ana’e, e tāpa’o vau i teie anira’a i roto i tā’u tāpura ’ohipa e rave ma te ’ore e rave i te tahi atu mea ’e te mea tā’u i tai’o. ’Ua ta’a iā’u e hi’ora’a fifi roa teie, e ’ere rā i te mea maita’i ’ore. Penei a’e e rave rahi ’o tē vai ra i rotopū i te reira ’e i te mana’o maita’i roa.

Te anira’a manihini ’o te tai’ora’a ïa ’e te feruri-māite-ra’a i te mau parau poro’i o te ’āmuira’a rahi, ’e ’ia fa’a’ohipa i te reira nō te fa’ata’a ’e nō te hāro’aro’a, e aha te mea tā tātou tāta’itahi e nehenehe e rave nō te ha’amaita’i atu ā.

Ma te fa’ari’ira’a tātou i te anira’a, te māramaramara’a i te « nō te aha », e fa’ari’i tātou e rave rahi rāve’a nō te ha’afātata atu i te Fa’aora. E ha’amata tātou i te hāro’aro’a ē nō te mea vau i here ai i te Fa’aora, e hina’aro vau e ha’api’i rahi mai nō ni’a iāna ma te ha’api’i i te mau parau a te mau peropheta ora. ’E nō te mea ’ua here au i tō’u ta’ata tupu, e fa’a’ite au i te mau ha’api’ira’a a te mau peropheta, te mau hi’o, ’e te mau heheu parau ia vetahi ’ē, ma te ha’amata nā te feiā tei herehia e au.

I roto i nā hi’ora’a e piti, tē rave nei ’outou i te hō’ē ’ohipa tano. I roto i te hō’ē, e au ra te fā ’o te fa’a’ohipara’a ïa i te mau rāve’a tā te Metua i te ao ra ’e tā te Fa’aora i hōro’a mai ia tātou, ’oia ho’i te mau parau poro’i tei hōro’ahia i roto i te ’āmuira’a rahi. Te piti o te hi’ora’a e pū’ohu i te ha’amaita’ira’a hōhonu ’ia māramarama i te mau tumu niu, ma te pūpū i te hō’ē ’ē’a nō te hāro’aro’ara’a i te parau mau mure ’ore ’e te mau ha’amaita’ira’a i fafauhia i te feiā ato’a, e tu’u i te mau ha’api’ira’a ’e te orara’a o tō tātou Fa’aora ’o Iesu Mesia i rōpū i tō rātou orara’a.

Te mau taea’e ’e te mau tuahine here, tē ti’aturi nei au e nehenehe ’outou e putapū ’e e māramarama i te faufa’a o te tū’atira’a i tā tātou mau ’ohipa ’e tō tātou here nō te Fa’aora. I roto i te hō’ē ao tū’atira’a rau, e rave rahi reo e tāmata i te fa’auru ia ’outou ’e mai te mea e nehenehe, e arata’i ia ’outou ’ia ti’aturi ē e ’ere i te mea faufa’a te tahi mau parau mau niu o te ’evanelia i fa’aho’i-fa’ahou-hia mai a Iesu Mesia. E ha’amata teie mau reo nā ni’a i te parau mau faufa’a rahi o te tītaura’a i te hō’ē fa’aho’i-fa’ahou-ra’a mai i teie mau mahana hope’a nei, ’oia ato’a te tītaura’a ’ia fa’ari’i i te bāsileia o te Atua i te fenua nei, tei fa’ahōho’ahia e te ’Ēkālesia i fa’aho’ihia mai a Iesu Mesia i te Feiā Mo’a i te mau Mahana Hopea nei.

E fa’aro’o paha ’outou i te mau reo onoono nō ni’a e nava’i noa hō’ē aura’a ’aore rā te ta’ara’a o te ta’ata iho ’e te Fa’aora, ’e e ’ere te ha’apa’ora’a fa’aro’o ’aore rā te ’Ēkālesia i fa’aho’i-fa’ahou-hia mai i te mea faufa’a ’aore rā e tītauhia. Tē ani manihini nei au ia ’outou ’ia fa’ataere nō te feruri i teie mau mana’o ha’avare, ’aore rā ’eiaha roa ’outou ’ia fa’ahemahia i teie mau mana’o hape, ’e ’ia ha’amana’o ’oi’oi atu ā i te mea tā te Fa’aora i parau ’e i ha’api’i ia tātou mai tahito mai ā—ma te ha’amata nā te here o te Metua i te ao ra ’e ’o Iesu Mesia nō tātou, ’e te tū’atira’a i tō tātou here nō rāua ’ei tumu nō te pe’e ia rāua.

’Ua haere mai te Atua te Metua ’e tāna Tamaiti e paraparau ia Iosepha Semita nō te fa’aho’i fa’ahou mai i te ’Ēkālesia a Iesu Mesia, ’e nō te ha’amau i te tau tu’ura’a nō te ’īra’a o te mau tau, tōna bāsileia i te fenua nei. Nō reira, Te ’Ēkālesia a Iesu Mesia i te Feiā Mo’a i te mau Mahana Hope’a nei ’o te rāve’a ïa i fa’ata’ahia e te Metua i te ao ra, nō te fa’ari’i i te mau fafaura’a ’o te fa’ati’a ia tātou ’ia ho’i i te fare. I teienei, e hina’aro tātou hau atu i te hō’ē noa aura’a ’e te Metua i te ao ra ’e tāna Tamaiti ; e tītau tātou i te mau ’ōro’a faufa’a mau o te autahu’ara’a nā roto i te reira tātou e rave ai i te mau fafaura’a ’e rāua. E fa’ati’a te reira ia tātou ’ia ha’amau i te hō’ē tā’amura’a o te fafaura’a ’e rāua ’e ’ia fa’ari’i i tō rāua here o te fafaura’a, ’o te fa’ati’a atu ia tātou ’ia roa’a te bāsileia teitei roa a’e o te hanahana tei fa’aineinehia nō te feiā tei ha’apa’o maita’i i tā rātou mau fafaura’a.

Ma te pūai ato’a o tō’u vārua, tē fa’a’ite pāpū nei au i te maura’a ’e te hanahana o tō tātou Fa’aora, ’o Iesu Mesia. ’Ua here ’oia ia ’outou. ’Ua ’ite ’oia e aha te mea e tupu i roto i tō ’outou orara’a. E vai matara noa tōna nā rima, ma te hōro’a mai i te anira’a, « Haere mai ’outou iā’u nei […] ’e nā’u ’outou e fa’aora ».

’Ua here au i te Fa’aora, ’e ’ua riro tō’u here nōna ’ei « nō te aha » nō’ū. Nā roto i te i’oa o Iesu Mesia, ’āmene.