Mau tauturu hanahana nō te tāhuti nei

Nā roto i te peropheta Iosepha Semita, ’ua heheu mai te Fatu i te tahi mau mea nō ni’a i tō tātou orara’a hou te tāhuti nei. I’ō, ’ua ora na tātou ’ei mau tamari’i vairua nā te Atua. Nō te mea ’ua hina’aro te Atua e tauturu i tāna mau tamari’i ’ia nu’u i mua, ’ua fa’aoti ’oia e poiete i te hō’ē fenua i reira tātou e fa’ari’i ai i te hō’ē tino, e ha’api’i mai nā roto i te mau ’ohipa e tupu, e fa’ananea i te mau huru hanahana, ’e ’ia tāmatahia nō te hi’o e ha’apa’o ānei tātou i te mau fa’auera’a a te Atua. ’O rātou tei ha’apa’o, e « fa’arahihia tō rātou hanahana a muri ’e a muri noa atu » (Aberahama 3:26).

Nō te ha’amau i te mau tītaura’a o teie fa’anahora’a hanahana, ’ua mā’iti te Atua i tāna Tamaiti Fānau Tahi ’ei Fa’aora nō tātou. ’O Lucifero, te tahi atu tei mana’o e tū’ino i te ti’amāra’a o te ta’ata, ’e ’ua riro mai ’o Sātane ’e ’ua « hurihia i raro ». Tei ti’avaruhia i te fenua nei ’e ’ua fa’a’erehia i te ha’amaita’ira’a o te orara’a tāhuti nei, ’ua fa’ati’ahia Sātane « ’ia ha’avare ’e ’ia ha’amatapō i te ta’ata, ’e ’ia arata’i ia rātou ’ei tītī ’ia au i tōna ra hina’aro, ’oia ho’i ia rātou ato’a ’o tē ’ore e fa’aro’o i [tō te Atua] reo » (Mose 4:4).

Te tumu mau o te fa’anahora’a rahi a te Atua nō te tupura’a i te tāhuti nei o tāna mau tamari’i, ’oia ho’i ’ia ’ite rātou i « nā pae e piti i te mau mea ato’a » (2 Nephi 2:11). Mai te reira ato’a nō tō tātou mau uaua pae tino e’ita e rarahi mai e’ita ato’a e tāpe’a mau ’aita ana’e e ’arora’a i mua i te ture o te fa’a’eta’etara’a, e tītau te tupura’a i te tāhuti nei ’ia fa’aitoito tātou i te pāto’ira’a i te mau fa’ahemara’a a Sātane ’e te tahi atu mau arora’a o te tāhuti nei. Hau roa atu i te faufa’a nō te tupura’a pae vārua ’o te tītaura’a ïa ’ia mā’iti i roto i te maita’i ’e te ’ino. ’O rātou tei mā’iti i te maita’i e nu’u ïa i mua i tō rātou tāpaera’a mure ’ore. ’O rātou tei ma’iti i te ’ino—mai te tā’ato’ara’a e rave i mua e rave rau mau fa’ahemara’a o te tāhuti nei—e hina’aro ïa rātou i te tauturu fa’aorara’a tā te hō’ē Atua here i fa’anaho e hōro’a mai.

I mua roa, te tauturu o te tāhuti nei pūai roa a’e a te Atua ’o tāna ïa hōro’a i te hō’ē Fa’aora, ’o Iesu Mesia, ’o tei māuiui nō te ’aufau i te ho’o ’e tei hōro’a mai i te fa’a’orera’a hara i fā’ihia. Tē ha’apāpū mai nei teie tāra’ehara aroha ’e te hanahana nō te aha te fa’aro’o i te Fatu ia Iesu Mesia, i riro ai ’ei parau tumu mātāmua o te ’evanelia. ’Ua « fa’atae mai [tōna tāra’ehara] i te ti’afa’ahoura’a o te feiā pohe ra » (Alama 42:23, ’e « ’ia riro ’oia ’ei tāra’ehara nō tō te ao nei » (Alama 34:8), ma te tūmā i tā tātou mau hara ato’a ’o tā tātou i fā’i ’e ma te hōro’a i tō tātou Fa’aora te mana nō te fa’aora ia tātou i tō tātou mau paruparu i te tāhuti nei.

Hau atu i teie tūmāra’a hanahana o te mau hara tei ravehia ’e te fa’a’orera’a i te reira, tē pūpū nei te fa’anahora’a a te hō’ē Metua here i te ao ra ia tātou e rave rahi atu ā hōro’a, nō te pāruru ia tātou terā iho ā rā i te pārurura’a ia tātou i te hara. E ha’amata noa tō tātou orara’a tāhuti nei ma te hō’ē metua tāne ’e te hō’ē metua vahine. Te tanora’a mau, tei reira rāua to’opiti ma te mau hōro’a ta’a ’ē nō te arata’i i tō tātou tupura’a. ’Aita ana’e, ’ua riro tō rāua ma’irira’a ’ei tuha’a nō nā mea e piti o tā tātou e ti’a ’ia upo’oti’a.

E hōro’a mai te fa’anahora’a a tō tātou Metua i te ao ra ia tātou te tahi atu mau tauturu, nō te arata’i ia tātou i roto i tō tātou tere i te tāhuti nei. E fa’ahiti atu vau e maha ’o te reira. ’Eiaha e tā’ōti’a mai iā’u nō tā’u nūmera e maha, inaha ho’i e mea rahi roa teie mau tauturu. Hau atu ā, tē vai ra te tahi atu ā mau pārurura’a aroha e ’āmuihia mai i teie.

’A tahi, e parau vau nō te māramarama ’aore rā te Vārua o te Mesia. I roto i tāna ha’api’ira’a rahi i roto i te buka a Moroni, tē fa’ahiti nei Moroni i tōna metua tāne ē « ’ua hōro’ahia mai te Vārua o te Mesia i te ta’ata tāta’itahi ’ia ti’a iāna ’ia fa’ata’a ’ē i te maita’i ’e te ’ino » (Moroni 7:16). E tai’o tātou i teie ā ha’api’ira’a i roto i te mau heheura’a ’āpī.

« E nā te Vārua e hōro’a mai i te māramarama i te mau ta’ata ato’a ’o te haere mai i roto i te ao nei ; e nā te Vārua e ha’amāramarama mai i te mau ta’ata ato’a i roto i te ao pā’ātoa nei, ’o tē ha’apa’o mai i te reo o te Vārua » (Te Ha’api’ira’a Tumu ’e te mau Fafaura’a 84:46).

Fa’ahou ā : « Nō te mea ’ua tonohia atu tō’u nei Vārua i roto i te ao nei nō te ha’amāramarama i te feiā ha’eha’a ’e te feiā ’ā’au tātarahapa, ’e nō te fa’ahapara’a i te feiā paieti ’ore ».(Te Ha’api’ira’a Tumu ’e te mau Fafaura’a 136:33).

’Ua fa’ata’a mai te peresideni Joseph Fielding Smith i teie pāpa’ira’a mo’a : « ’Aita te Fatu i vaiiho ’ōtare noa mai te ta’ata (i tō rātou fānaura’ahia mai i te ao nei) ma te pāruru ’ore, ’ia perehahu nō te ’ite mai i te māramarama ’e te parau mau, terā rā ’ua fānauhia te ta’ata tāta’itahi… ma te ti’ara’a ’ia fa’ari’i i te arata’ira’a, te ha’api’ira’a, ’e te parau a’o a te Vārua o te Mesia ’aore rā te Māramarama o te Parau mau ».

Te piti ’o te tauturu rahi tei hōro’ahia mai e te Fatu nō te tauturu ia tātou ’ia mā’iti i te mea maita’i, ’o te hō’ē ïa pu’e arata’ira’a i roto i te mau pāpa’ira’a mo’a ’ei tuha’a nō te fa’anahora’a nō te fa’aorara’a (fa’anahora’a nō te ’oa’oa). Teie mau arata’ira’a e mau fa’auera’a, e mau ’ōro’a ’e e mau fafaura’a ïa.

E fa’a’ite te mau fa’auera’a i te ’ē’a ’o tā tō tātou Metua i te ao ra i rēni nō te fa’ati’a ia tātou ’ia nu’u i mua i te ora mure ’ore. Te feiā e mana’o nei i te mau fa’auera’a mai te hō’ē rāve’a nā roto i te reira te Atua e fa’aoti ai ’o vai te fa’autu’ahia, ’aita ïa i hāro’aro’a i teie fā nō te fa’anahora’a o te ’oa’oa a te Atua here. I ni’a i taua ’ē’a ra, e nehenehe tātou e ha’amau tāmau i te aura’a e hina’arohia ’e tō tātou Fa’aora, ’e ’ia fāna’o i te hō’ē mara’ara’a o tōna mana nō te tauturu ia tātou, ’ia tae i te tāpaera’a ’o tāna e hina’aro nō tātou pā’āto’a. Tē hina’aro nei tō tātou Metua i te ao ra ’ia ho’i tāna mau tamari’i ato’a i te bāsileia tiretiēra, i reira te Atua ’e tō tātou Fa’aora e pārahi ai, ’e ’ia ora mai te feiā e pārahi ra i roto i te reira bāsileia tiretiēra.

E tuha’a te mau ’ōro’a ’e te mau fafaura’a nō te ture, ’o tē fa’a’ite i te ’ē’a o te ora mure ’ore. Te mau ’ōro’a ’e te mau fafaura’a mo’a tā tātou i rave ’e te Atua nā roto mai i te reira, ’ua riro ’ei mau tā’ahira’a e tītauhia ’e ’ei mau pārurura’a e hina’arohia i ni’a i te ’e’a. Mea au nā’u ’ia feruri ē te ti’ara’a o te mau fafaura’a e fa’a’ite mai ra ē, mai te au i te fa’anahora’a a te Atua, e hōro’ahia tāna mau ha’amaita’ira’a rahi roa a’e i te feiā tei fafau nā mua a’e ’ia ha’apa’o i te tahi mau fa’auera’a ’e tei tāpe’a i teie mau fafaura’a.

Te tahi atu mau tauturu a te Atua nō te ravera’a i te mau mā’itira’a maita’i ’o te mau fa’a’itera’a ïa a te Vārua Maita’i. Te Vārua Maita’i ’o te toru ïa o te melo nō te Atuara’a. Tāna ’ohipa, tei fa’a’itehia i roto i te pāpa’ira’a mo’a, ’o tē fa’a’ite-pāpū-ra’a ïa nō te Metua ’e te Tamaiti, ’ia ha’api’i ia tātou ’e ’ia fa’aha’amana’o ia tātou i te mau mea ato’a, ’e ’ia arata’i ia tātou te mau parau mau ato’a. Tei roto i te mau pāpa’ira’a mo’a e rave rahi fa’ata’ara’a nō te mau fa’a’itera’a o te Vārua Maita’i, mai te ’itera’a pāpū pae vārua ’ei pāhonora’a i te hō’ē uira’a nō ni’a i te parau mau o te Buka a Moromona. ’Eiaha ’ia hape i roto i te fa’a’itera’a ’e te hōro’a o te Vārua Maita’i, ’o te hōro’ahia i muri a’e i te bāpetizora’a.

Hō’ē o te mau tauturu fa’ufa’a roa a’e a te Atua nō tāna mau tamari’i ha’apa’o maita’i ’o te hōro’a ïa o te Vārua Maitai. Te faufa’a o teie hōro’a e mea pāpū ïa i te mea ē, e hōro’a-mana-hia te reira i muri a’e i te tātarahapara’a ’e te bāpetizora’a utuhi, « ’e i muri iho [tē fa’ata’a nei te mau pāpa’ira’a mo’a] e tae mai ai te ha’amatarara’a nō tā ’outou ra mau hara nā roto i te auahi ’e te Vārua Maita’i» (2 Nephi 31:17). Te feiā e fāna’o i teie matarara’a o te hara—’e ’o tē fa’a’āpī pinepine i tō rātou tāmāra’a nā roto i te tātarahapara’a i te mau mahana ato’a ’e te orara’a mai te au i te mau fafaura’a tā rātou i rave nā roto i te ’ōro’a mo’a—’ua ti’a ïa rātou ’ia fa’ari’i te parau fafau ē « ’ia vai noa [te Vārua Maita’i, te Vārua o te Fatu] i roto ia rātou » (Te Ha’api’ira’a Tumu ’e te mau Fafaura’a 20:77).

Nō reira, ’ua ha’api’i te peresideni Joseph F. Smith ē, « e ha’amāramarama te Vārua Maita’i i te mau mana’o o te ta’ata ’ia au i te mau mea a te Atua, nō te fa’a’ite pāpū ia rātou i te taime o tō rātou fa’afāriura’a ē, ’ua ha’apa’o rātou i te hina’aro o te Metua, ’e nō te riro i roto ia rātou ’ei hō’ē ’itera’a pāpū tāmau, hō’ē hoa nō te orara’a, ma te ravera’a mai te hō’ē arata’i pāpu ’e te ora i te parau mau tā’āto’a ’e ma te fa’a’īra’a ia rātou i te ’oa’oa ’e te pōpou i te mau mahana ato’a, ma te hina’aro noa e rave i te maita’i nō te ta’ata ato’a, ’ia māuiui i te ’ino ’eiaha rā ’ia rave i te ’ino, ’ia hāmani maita’i ’e ’ia aroha, ’ia fa’a’oroma’i ’e ’ia here mau. Te feiā ato’a e vai ra teie hōro’a fāito rahi mau, teie poe tāo’a rahi, e poihā tāmau noa rātou i te parauti’a. ’Aita ana’e te tauturu a te Vārua Maita’i », ’ua ’ōpani te peresideni Smith, « ’aita hō’ē ta’ata tāhuti e nehenehe e haere nā te ’ē’a ’āfaro ’e te ’oa’oa ».

Ma teie mau tauturu mana pūai e rave rahi nō te arata’i ia tātou i ni’a i tō tātou tere o te tāhuti nei, mea pe’ape’a ’ia ’ite ē e rave rahi ta’ata ’o tei ’ore i ineine nō tō rātou fārereira’a ’e tō tātou Fa’aora ’e Tāra’ehara, ’o Iesu Mesia. Tāna parabole nō nā pāretenia hō’ē ’ahuru, ’o tei fa’ahiti-pinepine-hia i roto i teie ’āmuira’a, e parau nei ē i rotopū i te feiā tei anihia ’ia fārerei atu iāna, ’o te ’āfara’a ana’e tei ineine.

’Ua ’ite tātou pā’āto’a i te mau hi’ora’a nō te feiā tei ineine ’ore : te mau misiōnare tei ho’i ’o tei ha’apoto i tō rātou tupura’a pae vārua nā roto i te mau tau ’ohipara’a ’ore, te feiā ’āpī ’o tei ha’ape’ape’a i tō rātou tupura’a pae vārua ma te fa’ata’a-’ē-ra’a i te mau ha’api’ira’a ’e te mau ’ātivite a te ’Ēkālesia, te mau tāne ’o tei fa’ataime i tō rātou fa’atōro’ara’a i te autahu’ara’a a Melehidezeka, mau tāne ’e mau vahine—i te tahi taime e mau hua’āi nō te mau pionie fa’ahiahia ’e te mau metua ti’a mā—tei fa’aru’e i te ’ē’a o te fafaura’a ma te ’ore i rave ’e i ha’apa’o i te mau fafaura’a i roto i te hiero mo’a.

Rave rahi o teie mau tāivara’a e tupu nei ’ia ’ore ana’e te mau melo e pe’e i te fa’anahora’a niu o te tāpe’a-māite-ra’a i te pae vārua, ’oia ho’i te pure, te tai’o-tāmau-ra’a i te mau pāpa’ira’a mo’a, ’e te tātarahapa-pinepine-ra’a. Maoti ra, tē tau’a ’ore nei vetahi i te fa’a’āpīra’a i te mau fafaura’a ma te ’ore e rave i te ’ōro’a mo’a. Tē parau nei te hō’ē pae ’aita te ’Ēkālesia e pāhono nei i tō rātou mau hina’aro, tē ora nei rātou i te mea tā rātou e fa’ari’i nei mai tō rātou mau hina’aro i muri nei, i te mea tā te Fatu i fa’anaho i roto i tāna mau ha’api’ira’a ’e mau rāve’a e rave rahi ’o tei pūpūhia mai nō tātou nō tā tātou tāvinira’a tītauhia ia vetahi ’ē.

Te ha’eha’a ’e te ti’aturi i roto i te Fatu ’o te mau rā’au fa’aora ïa nō teie mau tāivara’a. Mai tei ha’api’ihia e te Buka a Moromona, e « ha’amaita’i mai ’e e ha’amanuia mai [te Fatu] i te feiā i ti’aturi iāna » (Helamana 12:1). Te ti’aturira’a i te Fatu e mea tītau-ta’a-’ē-hia nō feiā ato’a e fāito hape nei i te mau fa’auera’a a te Atua ’e te mau ha’api’ira’a a tāna mau peropheta, i te māramarama o te mau ’itera’a hope’a ’e te pa’ari o te ta’ata.

’Ua parau atu vau nō ni’a e rave rahi tauturu o te tāhuti nei a tō tātou Metua here i te ao ra i hō mai nō te tauturu i tāna mau tamari’i ’ia ho’i iāna ra. Tā tātou tuha’a i roto i teie fa’anahora’a hanahana ’o te ti’aturira’a ïa i te Atua ’e te ’imira’a ’e te fa’a’ohipara’a i teie mau tauturu hanahana, te Tāra’ehara iho ā rā a tāna Tamaiti Here, tō tātou Fa’aora ’e Ārai ’o Iesu Mesia. Tē pure nei au ’ia ha’api’i tātou ’e ’ia ora i teie mau parau tumu, nā roto i te i’oa o Iesu Mesia ’āmene.