Te ’oa’oa i te rirora’a ’ei pipi nō te fafaura’a

I te hō’ē mahana i te matahiti 2023, tē ’ohipa ra ’o Uyanga Altansukh i Darkhan, e ’oire apato’erau nō Monetōria, ’a tomo mai ai te peresideni vahine misiōni nō Monetōria i roto i tāna vāhi ’ohipara’a. Teie te mau parau a te vahine :

« ’Ua hi’o vau iāna ’e ’ua ’ite atu vau ’ua māramarama tōna hōho’a mata i te ’oa’oa. E ta’ata maita’i roa ’oia ’e te ’ārearea i ni’a i te mau ta’ata e hā’ati ra iāna ’e ’ua putapū vau i te māhanahana. Hou ’oia ’a haere ’ē atu ai, ’ua ui atu vau iāna i te tahi mau uira’a. Tau mahana i muri iho, ’ua haere mai ’oia i tā’u ’ohipa ’e ’ua ani mai e nehenehe ānei au e haere i tāna fare purera’a. ’Ua mana’o vau e tauturu paha te reira iā’u. ’Ua ha’ape’ape’a vau nō te ananahi o tā’u mau tamari’i, e au ra ’ua ’ī te tōtaiete i te hepohepo ’e te pōuri. ’Ua hina’aro vau ’ia riro tā’u mau tamari’i mai teie ta’ata i te mata ’oa’oa, ’e ’ia ha’aparare i te ’oa’oa ’ati a’e ia rātou.

« I te hō’ē mahana, ’ua ha’api’i mai te mau misiōnare ia mātou i te ture nō te tuha’a ’ahuru. ’Ua parau mai tā’u mau tamari’i ma te ’oa’oa, ‘e ti’a ia tātou ’ia ’aufau i te tuha’a ’ahuru, e māmā.’ ’Ua nehenehe iā’u ’ia ’ite i te fa’aro’o o tā’u mau tamari’i i taua taime ra. Hou vau ’a tomo ai i roto i te ’Ēkālesia, ’ua māta’ita’i au i te ’āmuira’a rahi ’e ’ua fa’aro’o i te Peresideni Russell M. Nelson. ’Ua fa’aara ’oia i te mau hiero ’āpī nā te ao ato’a nei ’e ’ua parau ē e patuhia te hō’ē hiero ’āpī i Ulaanbaatar, Monetōria. ’Ua ’oa’oa vau ’e ’ua tahe tō’u roimata, noa atu ē ’aita vau i ta’a nō te aha. Ma teie ’oa’oa, ’ua putapū vau ē tē tupu rahi ra tō’u fa’aro’o ’e tō’u ’itera’a pāpū ».

Tē ’āmui nei Uyanga, mai te rahira’a mirioni ta’ata, i te ha’aputuputura’a rahi o ’Īserā’ela, ma te fa’aineinera’a i te Tae-piti-ra’a mai o Iesu Mesia. ’Ua ha’amata ’oia i tōna tere i ni’a i te ’ē’a o te fafaura’a ’e ’ua riro mai ’ei pipi nā te Mesia. E aha te aura’a ’ia riro ’ei pipi nā te Mesia ? Mea au nā’u te ta’o Tāpōne nō te pipi—deshi—de te aura’a, te taea’e iti, ’e shi te aura’a tamari’i.

’Ua parau Iesu Mesia, « i te Metua ra vau i te mātāmua ra, ’e ’o vau te Matahiapo » Nō te mea ’o vai ’oia ’e e aha tāna i rave, e ha’amori ai tātou iāna, e fa’ahanahana ai tātou iāna, e ’ārue ai tātou iāna, ’e e pe’e ai tātou iāna. ’Ua fa’aora te Mesia ia tātou, ’e ’ua māuruuru hope roa tātou nō tāna tusia tāra’ehara ’e te hope ’ore.

E Metua i te ao ra tō tātou, ’o tei here ia tātou mai tāna mau tamari’i. E mea maita’i roa tōna here ia tātou. E fa’ahōho’a Iesu Mesia ’e tāna misiōni i te here o te Atua nō tātou. Mai tā Ioane i pāpa’i, « i aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe tē fa’aro’o iāna ra, ’ia roa’a rā te ora mure ’ore ».

I roto i tā tātou ’imira’a ’ia māramarama i te mea tā tātou i ’ore i ’ite, e nehenehe tātou i te tahi taime e tūru’i i ni’a i tō tātou mau ’itera’a mātarohia o te tāhuti nei ’aore rā, i ni’a i te mea tā tātou i ’ite. ’Ei hi’ora’a, e nehenehe tātou e ha’api’i ri’i mai nō ni’a i te Atua te Metua nā roto mai i tō tātou iho mau aura’a metua ’e ’utuāfare i te tāhuti nei. Terā rā, e ti’a ia tātou ’ia ’ara maita’i hou ’a fa’a’ohipa ai i teie mau fa’aaura’a ātea roa, i roto i tā tātou tāmata’a ’ia hāro’aro’a i tō tātou Metua i te ao ra. Tei ni’a a’e te mau huru o te Atua te Metua i te mau huru maita’i ’ore ato’a ’o te ta’ata hi’a. ’O te Atua te Metua te Metua maita’i roa a’e. E ta’ata here maita’i roa ’oia, te hāmani maita’i, te fa’a’oroma’i, te hāro’aro’a, ’e mea hanahana hope roa ’oia. E nehenehe tātou e ti’aturi hope roa iāna. E fa’a’ite te here o te Mesia i te here o te Atua te Metua ’e e hōho’ara’a te reira nō taua here ra.

’O Iesu Mesia te hi’ora’a ’e te rāve’a ato’a. I roto i te Mesia, e nehenehe tātou e māramarama maita’i a’e i te mau huru maita’i roa o te Metua ’e tāna fa’anahora’a. Nā roto i te Mesia, e hōro’ahia mai ia tātou te mana fa’atupu nō te upo’oti’a i ni’a i te mau hina’aro, o te mau tāne ’e te mau vahine tino nei nō te riro hau atu ā mai te Metua.

Mai tō tātou Metua i te ao ra, ’ua riro Iesu Mesia ’ei ta’ata aroha hope ’ore ’e te parauti’a. ’Aita teie mau huru hanahana o te parauti’a ’e te aroha i roto i te pāto’ira’a. Tē turu nei rāua i te tahi e te tahi. Tē fa’ahōho’a nei te parauti’a ’e te aroha rāua to’opiti i te here maita’i roa ’o te Atua nō tāna mau tamari’i. E nehenehe tātou e ti’aturi i te Atua te Metua ’e ia Iesu Mesia, nō te mea e mea parauti’a ’e te ’āfaro ti’a i ni’a ia tātou pā’āto’a.

’Ua hō’ē maita’i roa te Atua te Metua e tāna Tamaiti o Iesu Mesia i roto i te ’ōpuara’a ’e te here. Nō te mea ’ua here te Atua ’e ’o Iesu Mesia ia tātou, tei ia tātou te rāve’a ’e te ha’amaita’ira’a ’ei mau pipi mau ’ia rave i te mau fafaura’a ’e rāua. Ma te ravera’a i te reira, e ’ā’ano atu ā tō tātou aura’a e te Mesia : « ’E i teienei, nō te fafaura’a tā ’outou i fafau mai, e parauhia ai ’outou e mau tamari’i nā te Mesia, ’oia ho’i tāna mau tamari’i tamāroa ’e tāna mau tamāhine ; inaha ho’i, i teie mahana ’ua fānau-vārua-hia ’outou e ana ; nō te mea tē nā ’ō mai ra ’outou ē ’ua fa’ahuru-’ē-hia tō ’outou ’ā’au nā roto i te fa’aro’o i tōna ra i’oa ; nō reira ’ua fānauhia ’outou e ana ’e ’ua riro ’outou ’ei mau tamari’i tamāroa ’e ’ei mau tamari’i tamāhine nāna ».

’Ei mau pipi, ’ia rave ’e ’ia ha’apa’o ana’e tātou i te mau fafaura’a mo’a, e ha’amaita’ihia tātou ma te mana pae vārua. E nātihia tātou i te Mesia ’e i te Atua te Metua nō roto i te hō’ē aura’a ta’a ’ē ’e e nehenehe tātou e tāmata i tō rāua here ’e tō rāua ’oa’oa ma te hō’ē fāito i fa’ata’ahia nō te feiā i rave ’e i ha’apa’o i te mau fafaura’a. Tō tātou ’aravihi ’ia putapū hope roa i te here o te Atua, ’aore rā ’ia tāpe’a mā’ite i roto i tōna here, tei te huru ïa o tō tātou mau hina’aro ’e tā tātou mau ’ohipa parauti’a.

I roto i te pene 15 o te Ioane, ’īrava 9, tē tai’o nei tātou, « mai te Metua i here mai iā’u nei ra, ’ua here ato’a atu ho’i au ia ’outou ». ’E i muri iho ’ua fa’ari’i tātou i te anira’a manihini : « ’Ia vai herehia atu ā ’outou e au ».

I roto i te ’īrava i muri mai, tē fa’a’ite nei ia tātou i te rāve’a ’ia tāmau noa i roto i tōna here : « I ha’apa’o ’outou i tā’u ra parau, e vai-here-hia atu ’outou e au ; mai iā’u i ha’apa’o i te parau a tā’u Metua ra, ’e tē vai-here-hia nei ā vau e ana ».

I reira tātou e ’ite ai i te tumu nō te ha’apa’ora’a i te mau fa’auera’a i roto i te ’īrava 11 : « I parau atu vau ia ’outou i teie nei mau parau, ’ia vai ā tō’u ’oa’oa ia ’outou, ’e ’ia ti’a ato’a ho’i tō ’outou ’oa’oara’a ».

’Ia riro ana’e tātou ’ei mau pipi mau nō te fafaura’a, e ha’amata tātou i te māramarama maita’i a’e i te nātura o te Atua ’e te ’oa’oa tāna e hina’aro ’ia tāmata tāna mau tamari’i pā’āto’a. E nehenehe ato’a tātou e ha’amata i te ta’a i te tahi mau parau tumu e au ra i te ’ōmuara’a e mea fifi ’ia ta’a maita’i. ’Ei hi’ora’a, nāhea te Atua e nehenehe ai e fa’ari’i i te ’īra’a o te ’oa’oa, ’ia māuiui rahi ai te tahi o tāna mau tamari’i ? Tei roto te pāhonora’a i te hi’ora’a maita’i roa ’e te fa’anahora’a maita’i roa a te Atua. Tē hi’o nei ’oia ia tātou mai te ha’amatara’a mai e tae roa i tō tātou fāito pūai hanahana i muri nei. Nā roto i tāna Tamaiti ’o Iesu Mesia, ’ua ’īriti ’oia i te hō’ē ’ē’a nō tātou pā’ātoa, tāna mau tamari’i, ’ia upo’oti’a i te mau māuiui, te mau mamae, te mau hara, te mau mana’o fa’ahapa ’e te mo’emo’e o tō tātou orara’a tāhuti nei. ’Ua hōro’a mai te Atua ia tātou i te ’ē’a ’e te mā’itira’a.

E nehenehe te mau hi’ora’a o te mau ta’ata ’o tei ’ite i te ’oa’oa o te ti’ara’a pipi e tauturu ia tātou ’ia ta’a maita’i a’e i teie mana’o. Penei a’e ’ua fa’aro’o a’ena ’outou i te pereota ē, tō tātou ’oa’oa tei te huru ïa o tā tātou tamari’i e mea ’oto roa a’e. ’Ua ’ite au ē e ’ere mai te reira roa te huru. Tō’u metua vahine e 94 matahiti, ’ua hau i te 200 hua’ai tōna e ora nei. I te hō’ē taime, hō’ē a’e o teie e 200 hua’ai e ’ore e ’oa’oa. Mai te mea e parau mau teie ha’apāpūra’a, tei roto ïa tō’u metua vahine i te ’oto e ’ore roa e mo’e, e ’ere roa atu ’oia mai te reira. Te feiā tei mātau iāna ’ua ’ite rātou i tōna ’oa’oa rahi.

Tē hina’aro nei au i teienei e fa’a’ite atu i te tahi atu ’ohipa i tupu. I te ’āva’e Tēnuare 2019, ’ua ani-manihini-hia mai māua tā’u vahine ’o Debbie i te piha tōro’a a te peresideni Nelson. ’Ua tu’u ’oia i te hō’ē pārahira’a i pīha’i iho ia māua, ’e ’ua pārahi mātou fātata te turi ’e te turi. I muri a’e i tōna fa’ata’ara’a mai i tō māua pi’ira’a i teie taime, ’ua fāriu atu te peresideni Nelson i ni’a ia Debbie ’e ’ua fa’atumu i ni’a iāna. E ta’ata maita’i ’oia, te here, te marū ’e te ’ī i te ’oa’oa, mai te hō’ē metua tāne ’aore rā hō’ē pāpā rū’au maita’i roa. ’Ua tāpe’a ’oia i te rima ’o Debbie ’e ’ua pa’ipa’i i te reira, ma te tāmarū i tōna ’ā’au ē e maita’i te mau mea ato’a, ’e e ha’amaita’ihia tō māua ’utuāfare. I taua taime ra e au ra ia māua ē ’o māua te nā ta’ata faufa’a roa a’e nōna ’e ’ua rave ’oia i tōna taime tā’āto’a nō māua. ’Ua fa’aru’e atu māua i tāna piha tōro’a i taua mahana pae avatea ra ma te tāmarūhia, te herehia, ’e te ’ī i te ’oa’oa.

I te mōnirē, ’ua ’ite atu māua i te parau ’āpī. I taua mahana ra i fa’aea ai te peresideni Nelson i piha’i iho ia māua, ’ua pohe te hō’ē o tāna mau tamāhine i te ma’i māriri ’aita’ata. ’Ua māere roa māua. ’Ua ’ī tō māua ’ā’au i te ’oto ’a ta’i ai māua nōna ’e nō tōna ’utuāfare. ’Ua ’ī ato’a tō māua ’ā’au i te māuruuru nō tōna tāu’ara’a mai te Mesia te huru ’o tāna i fa’a’ite mai, ’a ’oto ai nō tāna tamāhine e māuiui ra.

’A feruri noa i teie ’ohipa i tupu, ’ua uiui māua ia māua iho, « nāhea e ti’a ai iāna ’ia riro ’ei ta’ata hāmani maita’i, te here ’e ’oia ato’a ’ia ’oa’oa i roto i te hō’ē taime fifi ? » Te pāhonora’a nō te mea ’ua ’ite ’oia. ’Ua ’ite ’oia ē ’ua upo’otia te Mesia. ’Ua ’ite ’oia e pārahi fa’ahou ’oia i pīha’i iho i tāna tamāhine ’e e fa’aea ’oia e a muri noa atu ’e ’ōna. E tupu te ’oa’oa ’e te hi’ora’a mure ’ore i mua nā roto i te nātira’a i te Fa’aora ma te ravera’a ’e te ha’apa’ora’a i te mau fafaura’a ’e nā roto i te ti’ara’a pipi mai te Mesia te huru.

’Ua ha’api’i te peresideni Nelson : « Mai tā te Fa’aora i pūpū mai i te hau ’o ‘te hau ’ē atu i te ’ite ta’ata nei’ [Philipi 4:7], ’ua pūpū ato’a mai ’oia i te hō’ē ’oa’oa pūai, te hōhonu ’e te ’ā’ano ’o tei hau atu i te mana’o ’aore rā i te hāro’aro’ara’a o te ta’ata tino nei. ’Ei hi’ora’a, e au ra e’ita e nehenehe e ’ite i te ’oa’oa ’ia ro’o-ana’e-hia tā ’outou tamari’i i te ma’i e’ita e ora ’aore rā ’ia ’ere ’outou i tā ’outou ’ohipa ’aore rā ’ia ha’avare tō ’outou hoa fa’aipoipo ia ’outou. ’O te reira mau rā te ’oa’oa tā te Fa’aora e pūpū nei ».

’A rave ai ’e ’a ha’apa’o ai tātou i te mau fafaura’a, e fāriu ihoā tātou i rāpae mai ’e e hina’aro e tauturu ia vetahi ’ē ’ia putapū i te fāito o te ’oa’oa ’e te here tā tātou e putapū nei i roto i tā tātou mau aura’a o te fafaura’a. E nehenehe tātou e ’āmui atu i te tumu rahi roa a’e o te fenua nei i teie mahana—te ha’aputuputura’a ’o ’Īserā’ela. E nehenehe tātou e tauturu ’ia ’āfa’i mai i te mau tamari’i a te Atua i te Mesia ra. Mai tā te peropheta Iakoba i ha’api’i, « ’e e ao tō ’outou ; nō te mea ’ua itoito ’outou i te ’ohipara’a i pīha’i iho iā’u i roto i tā’u ’ō vine, ’e ’ua ha’apa’o ’outou i tā’u mau fa’auera’a, ’e ’ua fa’atupu fa’ahou ’outou i te mā’a mau iā’u […] e noa’a te ’oa’oa ia ’outou i pīha’i iho iā’u nei, nō te mā’a o tā’u ’ō vine ».

’A nāti ai tātou ia tātou iho nō te rave ’ei pipi nō te fafaura’a, noa atu te huru o tō tātou fāito ’aravihi, e ha’afaufa’ahia tō tātou aura’a e te Metua ’e te Tamaiti, e rahi atu ā tō tātou ’oa’oa ’e e ’ā’ano tō tātou hi’ora’a mure ’ore i mua. I reira tātou e ’ahuhia ai i te mana ’e e putapū ai i te ’oa’oa i te fāito i fa’ata’ahia nō te mau pipi mau o te fafaura’a a te Atua. Nā roto i te i’oa mo’a ’o Iesu Mesia, ’āmene.