« E fāriu mai iā’u […] ’ia fa’aorahia ’outou e au ra »

I te hō’ē tau ’ua ora na mātou i roto i te hō’ē fare tei hā’atihia e te mau tumu rā’au teitei. I pīha’i iho i te vāhi tomora’a tē vai rā te hō’ē tumu rā’au ārope (Saule). I te hō’ē pō pe’ape’a, ’ua puhi mai te hō’ē vero pūai ’e ’ua mā’iri te tumu ārope. ’Ua tārava noa ’oia i ni’a i te repo, ’ua hutihia mai te mau a’a, e hi’ora’a pe’ape’a mau.

’Ua ineine au nō te fa’a’ohipa i te mātini tāpū rā’au ’e ’ia tāpūpū i te tumu rā’au ’ei rā’au tahu auahi, ’a horo mai ai tō mātou hoa tāpiri mai i tō mātou fare nō te tāpe’a iā’u. ’Ua fa’ahapa ’oia iā’u i te fa’aru’era’a i te tumu rā’au ’e ’ua fa’aitoito ’ū’ana mai ’oia ia mātou ’eiaha e tāpūpū. ’Ua fa’atoro mai ’oia i muri iho i te hō’ē a’a e vai fa’ahou ra i roto i te repo ’e ’ua parau ē. mai te mea e turu tātou i te tumu rā’au, e tāpūpū i tōna mau ’āma’a ’e ’atu’atu maita’i iāna, e tupu fa’ahou mai te mau a’a.

’Ua tapitapi ri’i tō’u mana’o ’e te fē’a’a ē nāhea te hō’ē tumu rā’au e mea pāpū ’ua topa ’e tē fifi nei ’ia ora mai ’e ’ia ho’i fa’ahou mai i te ora. ’Ua feruri vau iho ē, noa atu pa’i e tupu fa’ahou mai te reira, e mea pāpū e’ita ’oia e ora mai i te vero nō muri iho. Terā rā ma te ’itera’a ’ua ti’aturi tō mātou ho’a tāpiri mai ē e orara’a fa’ahou tō te tumu rā’au i muri mai, ’ua rave mātou i tāna fa’anahora’a.

’E te hope’ara’a ? I muri mai ma’a taime, ’ua ’ite atu mātou i te mau tāpa’o nō te ora : ’ua ha’amata te tumu rā’au i te a’ahia. I teienei, 12 matahiti i muri mai, ’ua ruperupe rahi roa te tumu rā’au, ma te mau ’a’a pūai ’e ’ua hōro’a fa’ahou mai i te nehenehe o te fenua.

’A fārerei ai au i te feiā mo’a nā te ao ato’a nei, tē ha’amana’o nei au i teie tumu ārope ’e mea nāhea te tīa’ira’a e vai noa ai, e au ra ’ua mo’e te mau mea ato’a. E ’itera’a pāpū nō te ’evanelia tō vetahi i nā mua a’enei e mea pūai ’e te ruperupe mai tō te ārope. I muri iho, nō te mau tumu ta’a ’ē o te ta’ata iho, ’ua ha’aparuparu teie mau ’itera’a pāpū, tei arata’i atu i te mo’era’a o te fa’aro’o. Vetahi e tāpe’a ri’i ra, ma te tāipura’a i roto i te repo o te ’evanelia.

Fa’ahou ’e fa’ahou ā, ’ua fa’auruhia vau e te mau ’ā’amu nō e rave rahi ta’ata tei mā’iti ’ia fa’a’āpī i tō rātou ti’ara’a pipi ’e ’ua ho’i mai i tō rātou fare, te ’Ēkālesia. O’i i te fa’aru’era’a i tō rātou fa’aro’o ’e tō rātou ti’aturira’a mai te vahie faufa’a ’ore, ’ua pāhono mai rātou i te muhumuhura’a pae vārua ’e te mau anira’a o te here ’ia ho’i mai.

’Ua haere atu vau i te hō’ē ’āmuira’a titi i Korea, i reira te hō’ē melo tei ho’i mai ’a fa’a’ite ai : « Tē ha’amāuruuru nei au i te mau taea’e nō tō rātou hina’aro ’ia fa’ari’i i tō’u ’erera’a i te fa’aro’o ’e tō’u paruparu, i te torora’a mai i te rima iā’u, ’e nō te mau melo tei hāmani maita’i noa iā’u. Tē vai fa’ahou rā tō’u mau hoa ’ati a’e iā’u e ’ere i te mea itoito roa. E mea ’ārearea, tē parau nei rātou i te tahi ’e te tahi ’ia ho’i mai i te ’Ēkālesia nō te ’ite fa’ahou mai i tō rātou fa’aro’o. Tē mana’o nei au ē rātou pā’āto’a tē hina’aro nei i te fa’aro’o ».

I te feiā ato’a ē hina’aro nei i te fa’aro’o, tē ani manihini atu nei mātou ia ’outou ’ia ho’i mai. Tē parau fafau atu nei au ē, e nehenehe tō ’outou fa’aro’o e ha’apūaihia ’a ha’amori fa’ahou mai ai ’outou ’e te feiā mo’a.

’Ua pāpa’i te hō’ē misiōnare tahito nō ’Āfirita mai i te hō’ē ti’a fa’atere pa’ari o te ’Ēkālesia, nō te tātarahapa ’e nō te tītau i te fa’a’orera’a hara i te vaira’a te ’ino’ino i tāna mau ha’api’ira’a nō ni’a te tahi peu tumu, ’o tei tūra’i iāna ’ia fa’aru’e i te ’Ēkālesia. ’Ua fa’a’ite ’oia ma te haeha’a : « Te mea ’oto rā, nō tō’u vai ’ino’inora’a e 15 matahiti, ’ua fa’aaufau iā’u i te hō’ē ho’o teiaha mau. E mea rahi mau tā’u i ’ere—hau atu i tā’u e ’ore e nehenehe e feruri. Tē ha’amā hōhonu nei au i te māuiui tā’u i fa’atupu i te roara’a o te ’ē’a, terā rā nā ni’a i te mau mea ato’a, tē ’oa’oa nei au i te ’itera’a mai i tō’u ’ē’a o te ho’ira’a mai ».

Nō te feiā ato’a tei ’ite i te mea tā rātou i ’ere, tē ani manihini atu nei mātou ia ’outou ’ia ho’i mai, ’ia tāmata fa’ahou i te mau hotu ’oa’oa o te ’evanelia.

Hō’ē tuahine i te fenua Marite tei fa’aru’e i te ’Ēkālesia e rave rahi matahiti. I roto i tōna ’ā’amu nō te ho’ira’a mai, ’ua faufa’ahia e te mau ha’api’ira’a pūai nō te mau metua ’e nō te mau melo o te ’utuāfare hepohepo nō te pohera’a te hō’ē tei herehia. ’Ua pāpa’i ’oia :

« E nehenehe vau e tāpura e rave rahi tumu vau nō te aha vau i fa’aru’e ai i te ’Ēkālesia, te ’evanelia, ’e mai te huru ra tō’u ’utuāfare. ’Aita rā te reira i te mea faufa’a roa. ’Aita vau i rave i te hō’ē fa’aotira’a rahi ’ia fa’aru’e i te ’Ēkālesia—’ua rave paha vau e tauasini mā’itira’a. Terā rā, hō’ē mea tā’u i ’ite noa na, ’oia ho’i ’ua rave tō’u nā metua hō’ē noa fa’aotira’a rahi, ’e ’ua fa’aea noa rāua i ni’a i te reira. ’Ua fa’aoti rāua ’ia here iā’u.

« ’Aita vau i ’ite e hia rahira’a roimata tei tahe, e hia pō ’aita i ta’oto, ’aita ato’a e hia rahira’a pure ’ā’au tae ’e te tāparura’a tei fa’ahitihia nō’u. ’Aita rāua i tu’ufa’a’ite i tā’u mau hara ; ’ua huti mai ra rāua iā’u i roto i tō’u huru ta’ata hara. ’Aita rāua i fa’a’ite mai iā’u i tō rāua au ’ore i tō rāua fare ’aita ato’a i te mau rurura’a ’utuāfare ; ’aita vau i riro ’ei tia’au nō teie mau nīno’a mana’o. Maoti rā, ’ua tāmau noa rāua i te fa’ari’i mai iā’u. ’Ua ti’a ia rāua ’ia ’ite i tō’u māramarama i te mohimohira’a i te roara’a o te tau. ’Ua ’ite rā rāua ē te ta’ata tā’u i riro na i mūta’a ra e ata noa ïa nō te ta’ata tā’u e ti’a ’ia riro mai.

« Mai tō’u ’ē’a fifi nō te haere mai i rāpae i te ’Ēkālesia, mai te reira ato’a nō tō’u ho’ira’a mai. Te hō’ē mea rā e ’ere i te mea fifi i tō’u ho’ira’a mai, ’o te nīno’a mana’o ïa ’ia ho’i mai iō’ū i te vāhi vau te rirora’a ».

Tā’u poro’i i teie mahana, nō te mau ta’ata ato’a ïa tei putapū i te Vārua i te hō’ē taime, ’e ’o tē uiui nei tē vai rā ānei te hō’ē ’ē’a ho’ira’a ’aore rā te hō’ē vāhi nō rātou i roto i te ’Ēkālesia a Iesu Mesia tei fa’aho’i-fa’ahou-hia mai. Teie poro’i nō rātou ato’a e fifi nei ’ia tāpe’a māite ’aore rā ’o tē tāmatahia nei ’ia fa’aātea ’ē atu.

E ’ere teie poro’i i te hō’ē fa’ahepora’a, ’e e ’ere ato’a i te hō’ē fa’ahapara’a. E anira’a ra teie, e fa’ataehia atu ma te here ’e te hina’aro ’ā’au tae, ’ia fa’ari’i poupou fa’ahou ia ’outou i roto i tō ’outou fare pae vārua.

’Ua pure au ’ia putapū ’outou i te ’itera’a pāpū o te Vārua Maita’i ’a fa’aro’o ai ’outou i teie anira’a tei ’ī i te here ’e teie parau fafau fa’ahiahia a tō tātou Fa’aora ’o Iesu Mesia :

« Aita ānei ’outou e fāriu mai iā’ui teienei, ’e ’ia tātarahapa ho’i i tā ’outou mau hara, ’e ’ia fa’afāriuhia mai, ’ia fa’aorahia ’outou e au ra ? »

I te mau hepetoma ato’a, e rave rahi ’o rātou e pāhono nei i te anira’a a te Fa’aora ma te ravera’a i tō rātou ti’ara’a pipi, ma te mā’imira’a māmū ’e te ha’eha’a i te fa’aorara’a tā Iesu i parau fafau mai. ’E ’eiaha mai te mau nīno’a parau i te tahi taime e parare nei, te hō’ē nūmera rahi o tā tātou feiā ’āpī tei mā’iti ’ia vai pūai noa ’e ’ia fa’ananea i tō rātou fa’aro’o ia Iesu Mesia.

I te taime ’a ’ite ai te tahi mau pipi a Iesu i tāna mau ha’api’ira’a pa’ari i Kaperenaumi ’e ’ua fa’aoti e haere ’ē atu, ’ua fāriu a’e ra ’oia i ni’a i tāna mau ’āpōsetolo ’e ’ua ui atu, « e haere ato’a ānei ’outou ? »

’O teie te uira’a e ti’a ia tātou tāta’itahi ’ia pāhono ’a fa’aruru ai tātou i tō tātou mau taime tāmatara’a. E mea mure ’ore ’e te pīna’ina’i te pāhonora’a a Petero ia Iesu : « E haere ti’a mātou ’ia vai ra ? Tei ia ’oe ho’i te parau o te ora mure ’ore ra ».

Nō reira, ma te ferurira’a i te anira’a a te Fa’aora ’ia ho’i mai iāna ra, e aha tā ’outou e nehenehe e ha’api’i mai nā roto mai i teie ’ā’amu o te tumu rā’au ārope ?

1. Pinepine e ’ere te ’ē’a ho’ira’a mai i te mea ’ōhie ’aore rā i te mea au maita’i, e mea ho’ona rā te reira. I te fa’ati’ara’ahia tā mātou tumu ārope i tōna vāhi, ’ua tāpūpūhia tōna mau ’āma’a. E ’ere te reira i te mea nehenehe. ’O tātou ato’a, e nehenehe tātou e putapū i te pārurura’a ’ore, ’ia fa’aru’e ana’e tātou i tā tātou mau peu tahito ’e ma te ’īriti-’ē-ra’a atu i tō tātou te’ote’o. Te fa’atumura’a i tō ’outou fa’aro’o i ni’a ia Iesu Mesia ’e i tāna ’evanelia—te tumu ’e te mau a’a—e hōro’a mai ia ’outou i te tīa’ira’a ’e te itoito nō te rave i teie ta’ahira’a mātāmua ’ia ho’i mai.

2. ’Ua tītauhia e rave rahi matahiti nō tā mātou tumu ārope ’ia ’ite fa’ahou mai i tōna pūai ’e tōna nehenehe nā mua a’e. I teienei, e mea pūai atu ā ’oia ’e te nehenehe atu ā i nā mua a’enei. ’A fa’a’oroma’i ’a tupu rahi noa ai tō ’outou fa’aro’o ’e tō ’outou ’itera’a pāpū. Tei roto ato’a, ’eiaha ’ia vai te mana’o ’ino’ino i roto ia ’outou i te mau parau māuiui mai teie, « i hea ho’i ’oe i terā rahira’a matahiti ? »

3. E’ita te ārope e ora mai ’aita ana’e i ’atu’atuhia ’e i fa’a’amu-tāmau-hia. E ti’a ia ’outou e fa’a’amu i tō ’outou fa’aro’o ’e tō ’outou ’itera’a pāpū, ’a tāma’a ai ’outou i te ’aira’a mā’a o te ’ōro’a mo’a i te mau hepetoma ato’a ’e ’a ha’amori ai ’outou i roto i te fare o te Fatu.

4. Mai te tumu ’ārope tei hina’aro i te mahana nō tōna mau ’āma’a ’e tōna mau rau’ere ’ia tupu fa’ahou, e tupu rahi tō ’outou ’itera’a pāpū ’a vai hiā’oto ai ’outou i te mau nīno’a mana’o ’e i te ’itera’a o te Vārua. ’A ha’api’i mai nā roto mai ia Amuleka ’o tei fa’ata’a mai i tōna taime ’ei melo paruparu ma te parau ē, « i parauhia vau e rave rahi taime, ’e e ’ore roa vau e fa’aro’o ».

5. ’Ua ’ite tō’u ta’ata tāpiri mai i tō’u fare i te mea tā te ārope e nehenehe e riro fa’ahou mai. Hō’ē ā ato’a, ’ua ’ite te Fatu i tō ’outou fāito pūai hanahana ’e i te mea tā to ’outou fa’aro’o ’e tō ’outou ’itera’a pāpū e nehenehe e riro fa’ahou mai. E’ita roa ’oia e fa’aru’e ia ’outou. Nā roto i te tāra’ehara a Iesu Mesia, e nehenehe te mau mea ato’a tei pararī e fa’aorahia.

Tē ha’apāpū atu nei au ē, tē vai ra te ’oa’oa i te ra’i nō te feiā e ho’i mai. E mea hina’arohia ’outou ’e ’ua herehia ’outou. Tē fa’a’ite pāpū nei au ē, ’o Iesu Mesia tō tātou Fa’aora ’e e fa’aora ’oia i te ta’ata ato’a ’o tē ho’i mai iāna ra ma te hō’ē hau rahi a’e ’e te ’oa’oa rahi a’e. ’Aita tōna nā rima aroha i tūfetuhia, e vai matara noa rā ’e tē toro nei ia ’outou na. ’Aita ā i taere roa nō ’outou nō te ho’i mai. Ma te here tā’āto’a o tō mātou ’ā’au, e fa’ari’i poupou mātou ia ’outou i te fare I te i’oa o Iesu Mesia, ’āmene.