’Eiaha e fa’a’eta’eta i tō ’outou ’ā’au

’Ua ha’amata te Fa’aho’i-fa’ahou-ra’a mai o te ’evanelia ’a Iesu Mesia i te taime ’a fā mai ai te Atua te Metua ’e Tāna Tamaiti Here ia Iosepha Semita, ’ei pāhonora’a i tāna pure ha’eha’a. ’Ei tuha’a nō te Fa’aho’i-fa’ahou-ra’a mai, ’ua ’īriti Iosepha Semita i te mau pāpa’a parau tahito nā roto i te hōro’a ’e te mana o te Atua. Tei roto i teie mau pāpa’a parau « te mau ravera’a a te Atua i ni’a i te mau ta’ata nō Amerika i tahito ra ’e te ’īra’a o te ’evanelia mure ’ore. »

I tō’u ’āpīra’a, ’ia tai’o ana’e au i te Buka a Moromona, e mea pinepine au i te uiui nō te aha ’aita ’o Lamana ’e ’o Lemuela i ti’aturi i te mau parau mau i hōro’ahia ia rāua, noa atu ’ua fā mai te hō’ē melahi a te Fatu ia rāua ’e ’ua paraparau ’āfaro mai ia rāua. Nō te aha ’aita i nehenehe ia Lamana ’e Lemuela ’ia riro ’ei nā ta’ata ha’eha’a a’e ’e te ha’apa’o i te mau ha’api’ira’a a tō rāua metua tāne, ’o Lehi, ’e tō rāua teina ’o Nephi ?

’Ua ’itehia iā’u te hō’ē o te mau pāhonora’a i teie uira’a i roto i te 1 Nephi, o tē parau nei e « ’ua tupu te ’oto [’o Nephi] nō te ’eta’eta o tō rāua ’ā’au. » ’Ua ani Nephi i tōna nā tua’ana, « Nō te aha ho’i i ’eta’eta ai tō ’ōrua ’ā’au, ’e i pōiri ai tō ’ōrua mana’o ? »

E aha te auraʼa te ʼetaʼeta o te ’ā’au ?

Te ’īritira’a Korea nō te « ’eta’eta » i roto i te Buka a Moromona ’o 완악 (Wan-Aak: 頑惡). Tē fa’a’ohipa nei teie parau i te ta’o tinitō « Wan » (頑), ’oia ho’i « ’eta’eta, » ’e « Aak » (惡), ’oia ho’i « ’ino. » ’Ia fa’a’eta’eta ana’e tātou i tō tātou ’ā’au, e ha’apōurihia tātou, ’e e’ita te mau mea maita’i e ō i roto i tō tātou ’ā’au ’aore rā i tō tātou ferurira’a. E riro tātou ’ei feiā ’eta’eta ’e te fa’atumu rahi a’e i ni’a i te mau hina’aro o te ao nei, ma te tāpiri i tō tātou ’ā’au i te mau mea a te Atua. E mā’iti tātou ’ia fa’atumu noa i ni’a i tō tātou iho mau mana’o ma te ’ore e fa’ari’i i te mana’o ’e te a’ora’a a vetahi ’ē. E mā’iti tātou ’eiaha e ’īriti i tō tātou ’ā’au i te mau mea a te Atua, i te fa’aurura’a rā a te mau mea o te ao nei ’e a te ’ēnemi. ’Ia ’eta’eta ana’e tō tātou ’ā’au, e pāto’i ïa tātou i te fa’aurura’a a te Vārua Mo’a. E « mea tāere tātou i te ha’amana’o i te Fatu, » ’e i te roara’a o te tau, e ’ere tātou i te « fa’ari’ira’a » i Tāna mau parau.

’Ua ha’api’i Alama i te nūna’a nō Ammoniha ē e « pāto’i te tahi pae i te Vārua o te Atua nō te ’eta’eta o tō rātou ’ā’au. » ’Ua ha’api’i ato’a ’oia « ’E ’o rātou ho’i ’o tē fa’a’eta’eta i tō rātou ’ā’au, e hōro’ahia ia rātou te tufa’a iti nō te parau ē tae noa atu ’aita rātou e ’ite fa’ahou i tāna ra mau parau ’aro. » I te pae hope’a e fa’aātea ’ē atu te Vārua, ’e « e rave ’ē atu [te Fatu] i [tāna] mau parau » i te feiā i fa’a’eta’eta i tō rātou ’ā’au, mai ia Lamana ’e Lemuela. Nō te mea ho’i ’ua tāmau noa ’o Lamana ’e ’o Lemuela i te fa’a’eta’eta i tō rāua ’ā’au, ’ua pāto’i i te mau mana’o o te Vārua Maita’i, ’e ’ua mā’iti ’eiaha e fa’ari’i i te mau parau ’e te mau ha’api’ira’a a tō rāua metua tāne ’e ’a Nephi, ’ua pāto’i rāua i te pae hope’a i te mau parau mau mure ’ore a te Atua.

Ta’a ’ē atu ia Lamana ’e ia Lemuela, ’ua tāmau noa ’o Nephi i te fa’aha’eha’a iāna, i te ’imira’a i te arata’ira’a a te Vārua o te Fatu. ’Ei fa’aho’ira’a, ’ua tāmarū te Fatu i te ’ā’au ’o Nephi. ’Ua parau ’o Nephi ē « ’ua ti’aoro atu [’oia] i te Fatu ; ’E inaha, ’ua fā mai ra ’oia iā’u, ’e ’ua ha’amarū ho’i i tō’u ’ā’au ’e ’ua ti’aturi ihora vau i te mau parau ato’a i parauhia e tō’u ra metua tāne. » ’Ua tauturu te Fatu ia Nephi ’ia fa’ari’i, ’ia māramarama, ’e ’ia ti’aturi i te mau parau ’aro ato’a a te Atua ’e a Tāna mau parau. ’Ua ti’a ia Nephi ’ia fa’ari’i i te auhoara’a tāmau o te Vārua Maita’i.

E aha tā tātou e nehenehe e rave ’eiaha ’ia fa’a’eta’eta i tō tātou ’ā’au ?

’A tahi, e nehenehe tā tātou e tātarahapa i te mau mahana ato’a.

’Ua ha’api’i tō tātou Fa’aora ē, « ’O ’oia ’o tē tātarahapa ’e ’o tē haere mai iā’u nei mai te tamari’i ’aru’aru ra, ’o ’oia ïa tā’u e fa’ari’i. » ’Ua ha’api’i mai tō tātou peropheta here, Russell M. Nelson ē :

Te tātarahapara’a, ’o te tāviri ïa nō te haerera’a i mua. Nā te fa’aro’o mā e fa’ahaere ia tātou i mua i ni’a i te ’ē’a nō te fafaura’a.

’Eiaha na e mata’u ’aore rā e fa’atāere i te tātarahapara’a. E ’oa’oa Sātane i tō ’outou ’ati. ’A ha’amata i teie ihoā mahana nō te tāmata i te ’oa’oa nō te fa’aru’e i te ta’ata tino. Tē here tāmau noa ra te Fa’aora ia tātou ’ia tātarahapa ana’e iho ā rā tātou. »

’Ia tāmata tātou i te ’oa’oa ’ia tāmarū i tō tātou ’ā’au ’e ’ia haere mai i te Fatu ra, e riro ïa tātou « mai te hō’ē tamari’i ra i te auraro, te marū, te ha’eha’a, te fa’a’oroma’i, te ’ī i te aroha, te hina’aro ’ia auraro i te mau mea ato’a tā te Fatu e hina’aro ’ia tu’u mai i ni’a iāna, mai te hō’ē tamari’i e auraro i tōna ra metua tāne. »

’A piti, e nehenehe tātou e fa’a’ohipa i te ha’eha’a.

E hōpoi mai te tātarahapa i te mau mahana ato’a i te ha’eha’a i roto i tō tātou ’ā’au. E hina’aro tātou e fa’aha’eha’a ia tātou i mua i te Fatu, mai te hō’ē tamari’i ’aru’aru e fa’aro’o i tōna metua tāne. E vai noa ïa te Vārua Maita’i i roto ia tātou, ’e e marū mai tō tātou ’ā’au.

’Ua mātau māua tā’u vahine ’o Sue i te hō’ē tāne ’e tāna vahine fa’ahiahia mau ’a maha matahiti i teienei. I tō māua fārereira’a ia rāua, e melo ’āpī te tāne nō te ’Ēkālesia, ’e e fārereira’a tā tāna vahine ’e te mau misiōnare nō te tuatāpapa i te ’evanelia. E rave rahi misiōnare tei fārerei iāna nō te tauturu iāna ’ia haere mai i te Mesia ra. ’Ua mana’o māua e ’itera’a pāpū ora tōna nō ni’a i te ’evanelia ’e ’ua ’ite ’oia e parau mau te ’Ēkālesia. E mea pinepine ’oia i te fa’ari’i i te Vārua i roto i tā mātou mau fārereira’a ’e ’ua ’āmui mai ’oia i roto i te mau purera’a ato’a. E mea au nāna ’ia fa’ahoa i te mau melo fa’ahiahia o te pāroisa. Teie rā, e mea fifi nōna ’ia fafau nō te tomo i roto i te pape o te bāpetizora’a. I te hō’ē mahana, tē tai’o ra ’oia i te Moroni 7:43–44 ’o tē nā ’ō ra ē :

« E inaha, e parau atu vau ia ʼoutou ē, e ʼore e roaʼa te faʼaroʼo ʼe te tīaʼi ia ʼoutou maori rā ʼo te ha’ehaʼa ʼe te marū te ʼāʼau.

« ’Āhiri ē ’aita, ’ua riro ïa tō [’outou] fa’aro’o ’e tō [’outou] ti’aturira’a ’ei mea faufa’a ’ore, ’e ’aore roa ho’i ïa te ta’ata e ’itehia i mua i te Atua, maori rā te feiā marū ’e te ’ā’au ha’eha’a. »

I muri a’e i tōna tai’ora’a i teie mau ’īrava, ’ua ’ite a’era ’oia i tē ti’a iāna ’ia rave. ’Ua mana’o ’oia ē ’ua māramarama ’ōna i te aura’a o te marū ’e te ha’eha’a. Terā rā, ’aita tōna ’ite i nava’i nō te fa’ari’i i te fa’aro’o ’e te ti’aturira’a nō te ha’apa’o i te mau f’ā’auera’a a te Atua. ’Ua ti’a iāna ’ia fa’aru’e i tōna mana’o ’eta’eta ’e tōna iho pa’ari. ’Ua ha’amata ’oia i te fa’aha’eha’a iāna nā roto i te tātarahapara’a mau. ’Ua ha’amata ’oia i te ta’a i te ha’eha’a ’ia au i te mana’o ’o te Atua. ’Ua ti’aturi ’oia i te Metua i te Ao ra ’e ’ua pure nō te tāmarū i tōna ’ā’au. Nā roto i teie mau pure, ’ua ’ite ’oia i te Vārua i te fa’a’ite-pāpū-ra’a iāna ē ’ua hina’aro te Metua i te Ao ra ’ia bāpetizohia ’oia.

’Ua fa’ata’a mai te tāne ’e te vahine ē, rahi noa atu tō rāua haeha’a, rahi noa ato’a atu tō rāua māramaramara’a i te mau parau a te Atua, ’e ’ua marū tō rāua ’ā’au nō te pe’e i te mau ha’api’ira’a a tō tātou Fatu, ’o Iesu Mesia.

’A toru, e nehenehe tā tātou e ti’aturi ’e e tūru’i i ni’a i tō tātou Fa’aora.

’Ua riro Nephi ’ei hi’ora’a rahi nō te hō’ē ta’ata tei fa’ati’a i tōna ’ā’au ’ia marū nā roto i te ti’aturira’a i te Fatu. ’Ua ha’api’i ’oia : « E te Fatu, ’ua ti’aturi au ia ’oe, ’e e ti’aturi au ia ’oe ē a muri noa atu. E ’ore au e tu’u i tō’u ti’aturira’a i roto i te rima tāhuti nei .» ’Oia ato’a, i roto i te hō’ē heheura’a i hōro’ahia i te Peropheta Iosepha Semita, ’ua parau te Fatu ē, « ’A ti’aturi i terā Vārua ’o tē fa’auru mai ’ia rave i te ’ohipa maita’i—’oia ïa, ’ia rave i te parauti’a, ’ia haere noa ma te ha’eha’a.» Mai te mea e tu’u tātou i tō tātou ti’aturira’a i ni’a i te Fatu ’e e tūru’i tātou i ni’a iāna, e tāmarū ’Oia i tō tātou ’ā’au ’e e pāturuhia tātou i roto i tō tātou mau tāmatara’a, te mau fifi, ’e te mau ’ati.

Mai te mea e tātarahapa mau tātou, e fa’aha’eha’a, e ti’aturi i te Fatu, ’e e tūru’i i ni’a iāna, e marū tō tātou ’ā’au. I reira ’Oia e nīni’i mai ai i tōna Vārua ’e e fa’a’ite mai ai ia tātou i te mau parau ’aro nō te ra’i mai. E ti’aturi tātou i te mau parau ato’a tāna i ha’api’i mai, ’e e hōhonu atu ā tō tātou māramarama.

’Ua riro tō tātou Fa’aora ’o Iesu Mesia ’ei hi’ora’a rahi nō te marū. I roto i te 2 Nephi 31:7 tē tai’o nei tātou, « ’E noa atu ā e mea mo’a ’oia, tē fa’a’ite mai ra ’oia i te mau tamari’i a te ta’ata nei ē, tē fa’aha’eha’a ra ’oia iāna iho i te pae tino nei i mua i te Metua, ’e tē fa’a’ite ato’a ra ho’i i te Metua ē, e auraro ’oia iāna ra i te ha’apa’ora’a i tāna ra mau fa’auera’a. » Noa atu tōna mo’a ’e tōna ti’a roa, ’ua fa’aha’eha’a ’oia iāna iho i mua i te Metua ’e ’ua auraro iāna nā roto i te bāpetizora’a iāna.

I te hope’a o tōna orara’a i te tāhuti nei, ’ua tu’u ’o Iesu Mesia i tōna hina’aro i te hina’aro o tōna Metua nā roto i te inura’a i te ’āu’a maramara. Nā te reira mamae rahi i fa’atupu i roto iāna « i te rurutaina nō te māuiui, ’e ’ua tahe mai ra te toto nā te mau poa ato’a, ’e ’ua māuiui i te tino ’e te vārua ato’a ho’i. » ’Ua ani te Fa’aora « ’ia ’ore ’ia inu i te ’āu’a maramara ’e ’ōriorio atu. » « ’Āre’a rā. », ’ua parau ’oia, « ’ei te Metua te hanahana, ’e ’ua inu [’oia] ’e ’ua fa’aoti ho’i i [tāna] mau fa’aineinera’a nō te mau tamari’i a te ta’ata nei. »

E a’u mau taea’e e a’u mau tuahine, ’ua hōro’ahia ia tātou te ti’amāra’a mōrare. E nehenehe tātou e mā’iti ’ia fa’a’eta’eta i tō tātou ’ā’au ’aore rā ’ia tāmarū i te reira. I roto i tō tātou orara’a i te mau mahana ato’a, e nehenehe tātou e mā’iti ’ia rave i te mau mea e ti’a ai i te Vārua o te Fatu ’ia tomo i roto i tō tātou ’ā’au ’e ’ia parahi i reira. ’Ua ’ite au ē i roto i teie mau mā’itira’a, tē vai ra te hau ’e te ’oa’oa.

E pe’e ana’e tātou i te hi’ora’a o tō tātou Fa’aora, ’o Iesu Mesia, tei pe’e i te hina’aro o te Metua. Mai te mea e nā reira tātou, ’ua fafau mai te Fatu ia tātou ē, « Inaha ho’i, e ha’aputu mai au ia rātou mai te moa e ha’aputuputu i tōna mau fanau’a i raro a’e i tōna pererau, mai te mea ē ’aita rātou e fa’a’eta’eta i tō rātou ra mau ’ā’au. » I te i’oa ’o Iesu Mesia, ’āmene.