’O ’oe te Mesia
(Mataio 16:16)
Tē hina’aro nei tātou i tā tātou mau tamari’i ’ia ti’aturi ia Iesu Mesia, ’ia riro rātou nō Iesu Mesia ’e nō tāna ’Ēkālēsia nā roto i te fafaura’a, ’e ’ia tūtava ’ia riro mai mai ia Iesu Mesia.
I te taime tei roto tā māua tamaiti ’o Eli i te piha ha’api’ira’a fāito maha, ’ua fa’atupu tāna piha i te hō’ē fa’aterera’a hau ha’avare, i reira ’oia i te mā’itira’ahia e tōna mau hoa o te piha ’ia riro ’ei ha’avā. I te hō’ē mahana, ’ua haere mai te hō’ē ha’avā mana nō te mataeina piti nō Utaha e fārerei ia rātou, ’ua fa’a’ō’omo ia Eli i tōna ’ahu ha’avā ’e ’ua fa’ahōreo atu i tāna piha. ’Ua fa’a’ara te reira i roto i te vaerua fa’ahiahia ’āpī ’o Eli i te hō’ē hia’ai nō te ha’api’ira’a i te pae o te ture ’e te ’Īriti ture iho ’o Iesu Mesia.
I muri mai e rave rahi matahiti nō te tauto’ora’a tāmau, ’ua fa’ari’i Eli i te hō’ē anira’a nō te hō’ē uiuira’a ’e te hō’ē o tāna mau mā’itira’a nō te ha’api’ira’a tōro’a o te ture. ’Ua parau ’oia, « māmā, ’ua uihia mai iā’u 10 uira’a ». Te uira’a hōpe’a ’oia ho’i, ‘nō hea mai tō ’oe mana’o itoito ?’ ’Ua ha’apāpū atu vau ē, i te roara’a o te ’ā’amu, ’ua patu te ta’ata i te mau rāve’a nō te ha’apa’ora’a ma te tarai i tō rātou orara’a i ni’a i te mau hōho’a fāitoti’a. Te hōho’a fāitoti’a o te ha’apa’ora’a tā’u e tūtava nei e tārai i roto i tō’u orara’a, ’o terā ïa tō Iesu Mesia. ’Ua ha’apāpū atu vau ’ahiri te ta’ata ato’a e fa’atura nei i te mau ha’api’ira’a a Iesu Mesia, i roto i te A’ora’a i ni’a i te Mou’a, e riro te ao nei ’ei vāhi ma’ita’i a’e ’e te hau ». I muri iho ’ua hope te uiuira’a, ’e ’ua parau ’oia iāna iho, « ’o te hōpe’ara’a ihoā ïa o tō’u mau moemoeā tamari’i. ’Aita e ta’ata i roto i te ha’api’ira’a tuatoru ti’amā e hina’aro e fa’aro’o nō ni’a ia Iesu Mesia ».
Piti hepetoma i muri mai, ’ua fa’ari’ihia Eli i te fare ha’api’ira’a ma te hō’ē moni putē. Hou te fa’aōra’a, ’ua haere atu mātou e māta’ita’i i te fare ha’api’ira’a tōro’a. E au te fare ha’api’ira’a tōro’a o te ture i te hō’ē parenui ’e tei ha’amauhia i ni’a i te hō’ē ’āivi, i ni’a a’e i te hō’ē roto nehenehe. Ma te fa’ahiahia, ’a haere ai mātou nā roto i te piha vaira’a buka hanahana rahi ’e te mau āroa nehenehe, ’ua ’ite atu mātou i ni’a i te mau reva ’e te mau ’ōfa’i i nana’ohia te mau taipe nō roto mai i te A’ora’a i ni’a i te Mou’a.
Te A’ora’a i ni’a i te Mou’a ’o te a’ora’a fa’ahiahia roa a’e tei ’ore ā i fa’ahitihia a’enei, e pionie i roto i tāna mau ha’api’ira’a. ’Aita atu e a’ora’a e nehenehe e tauturu ia tātou ’ia hāro’aro’a maita’i a’e i te nātura o Iesu Mesia, tōna mau huru hanahana, ’e tā tātou fā hōpe’a ’ia riro mai, mai iāna te huru.
Te rirora’a ’ei pipi nā Iesu i te roara’a o te orara’a, e ha’amata i roto i tō tātou ’utuāfare—’e i roto i te Paraimere i te 18ra’a o te ’āva’e. Tē hina’aro nei tātou i tā tātou mau tamari’i ’ia ti’aturi ia Iesu Mesia, ’ia riro nō Iesu Mesia ’e nō tāna ’Ēkālēsia nā roto i te fafaura’a, ’e ’ia tūtava ’ia riro mai mai ia Iesu Mesia.
Tiʼaturi ia Iesu Mesia
’A tahi, tiʼaturi ia Iesu Mesia.
I muri a’e i te a’ora’a a nō te Pane ora, « rave rahi pipi [a te Fatu] » tei fifi ri’i i te fa’ari’i i tāna mau ha’api’ira’a ’e tāna ha’api’ira’a tumu, ’e « ’ua fa’aru’e mai ra, ’e ’aita i pe’e fa’ahou iāna » Huri atu ra Iesu i ni’a i te nā ’Ahuru ma Piti ’e ui atu ra i te hō’ē uira’a pe’ape’a : « E haere ato’a ānei ’outou ? »
Pāhono mai ra Petero :
« E te Fatu, e haere ti’a mātou ’ia vai ra ? tei ia ’oe ho’i te parau o te ora mure ’ore ra.
« … ’Ua fa’aro’o a’enei ho’i mātou ’e ’ua ’ite ho’i mātou ē ’o ’oe te Mesia, te Tamaiti a te Atua ora ra ».
Mai tei fa’a’itehia mai e Petero, te ti’aturi ’o te « roa’ara’a te fa’aro’o i te hō’ē ta’ata ’aore rā te fa’ari’ira’a i te hō’ē mea ’ei parau mau ». ’E nō te arata’i i tō tātou fa’aro’o i te fa’aorara’a, e ti’a i te reira ’ia fa’atumuhia i ni’a i te Fatu ia Iesu Mesia. « Tē fa’a’ohipa nei tātou i tō tātou fa’aro’o ia Iesu Mesia, ’ia pāpū ana’e ia tātou ē tē vai mau nei ’oia, [te hō’ē hāro’aro’ara’a] nō tōna huru ’e tōna [nātura mau], ’e te hō’ē ’itera’a ē e tūtava tātou ’ia ora mai te au i tōna hina’aro ».
’Ua parau tō tātou peropheta here ’o te peresideni Nelson, « ’ua riro te fa’aro’o i te Fatu ia Iesu Mesia ’ei niu nō te mau ti’aturira’a ato’a ’e te arata’i o te mana hanahana ».
Nāhea tātou ’ia tauturu i te mau tamari’i ’ia ha’apūai i tō rātou fa’aro’o ia Iesu Mesia ’e ’ia fa’ari’i i tōna mana hanahana ? ’Aita e tītauhia ia tātou ’ia ’imi ātea atu, i tō tātou noa Fa’aora iho.
’Ua parau [te Fatu] i te nūna’a, i te nā-’ō-ra’a ē :
« Inaha, ’o vau nei ’o Iesu Mesia […]
« ’A ti’a mai i ni’a, ’e ’a haere mai iā’u nei […]
« … E ’ua haere atu ra te mau ta’ata, ’ua tu’u atu ra i tō rātou rima i tōna ’ao’ao, ’e ’ua fāfā atu ra i te mau puta naero i tōna nā rima ’e tōna nā ’āvae ; ’e ’ua nā reira rātou, ma te haere tāta’itahi atu […] ’e ’ua ’ite atu tō rātou mata ’e ’ua fāfā atu tō rātou rima, ’e ’ua ’ite pāpū roa rātou ’e ’ua fa’a’ite pāpū ho’i ē, ’o ’oia mau ».
Tē ani nei au ia ’outou ’ia feruri, e aha tā te reira e nehenehe e fa’ahōho’a i roto i te orara’a o te mau tamari’i. Tē fa’aro’o ra ānei rātou i te mau ’itera’a pāpū nō Iesu Mesia ’e nō tāna ’evanelia ? Tē ’ite mata ra ānei rātou i te mau hōho’a fa’atura ’e te ha’amorira’a o tāna misiōni ’e tōna Atuara’a ? Tē putapū ra ānei rātou ’e tē ’ite mau ra ānei rātou i te Vārua Maita’i e fa’a’ite pāpū ra nō tōna vaira’a mau ’e tōna Atuara’a ? Tē ’ite ra ānei rātou i tāna parau pōro’i ’e tāna misiōni ?
Nō Iesu Mesia rātou ’e nō tāna ’Ēkālesia
’A piti, nō Iesu Mesia rātou ’e nō tāna ’Ēkālesia
’Ua fa’ari’i te nūna’a o te ari’i Beniamina i te hō’ē tauira’a rahi o te ’ā’au ’e nā roto i te fafaura’a ’ua ha’amo’a rātou i tō rātou orara’a nō te ha’apa’o i te hina’aro o te Atua. Nō te fafaura’a tā rātou i rave ’e te Atua ’e Iesu Mesia, « i parauhia ai [rātou] e mau tamari’i nā te Mesia, ’oia ho’i tāna mau tamari’i tamāroa ’e tāna mau tamāhine ». ’Ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, e hōpoi’a nā tātou nā roto i te fafaura’a, ’ia patu i tōna bāsileia ’e ’ia fa’aineine i tōna ho’ira’a mai.
Nāhea tātou ’ia tauturu i te mau tamari’i ’ia rave ’e ’ia ha’apa’o i te mau fafaura’a mo’a ? I roto te buka ha’api’ira’a Mai, pe’e mai i roto te parau hi’u A ’e B, e ’ite mai tātou te mau tumu parau nō te ’āparaura’a ’e te mau ha’api’ira’a nō te ha’apūai i te mau ’ūtuāfare ’e nō te turu i te mau ’orometua ’e i te feiā fa’atere i roto i tā rātou ti’a’aura’a mo’a, nō te fa’aineine i te mau tamari’i nō te hō’ē orara’a i ni’a i te ’ē’a o te fafaura’a a te Atua.
Riro, mai ia Iesu Mesia te huru
’A toru, riro, mai ia Iesu Mesia te huru.
I roto i te Buka a Moromona, tē a’o nei te Fa’aora i tāna mau pipi tei pi’i-’āpī-hia ’ia riro mai iāna ato’a te huru : « E aha tō ’outou huru e au ai ? Nō reira, e parau atu vau ia ’outou, mai tō’u nei ïa ».
Nāhea tātou ’ia tauturu i te mau tamari’i tei bāpetizohia ’e tei ha’amauhia ’ia rave i tā rātou hōpoi’a o te fafaura’a, ’ia ha’aputuputu ia rātou iho ’e ia vetahi ’ē ia Iesu Mesia ra ? Te rirora’a ’ei pipi i te roara’a o te orara’a e tītauhia ia tātou ’ia « riro… ’ei feiā rave i te parau ’e ’eiaha ’ei feiā fa’aro’o noa ».
’Ia ani manihini ana’e ’outou i te mau pipi ’āpī a’e a te Fatu, ’a rave i te mau taime ato’a nō te fa’atere ia rātou, nō te arata’i ia rātou, nō te haere nā pīha’i iho ia rātou, ’e nō te tauturu ia rātou ’ia ’ite mai i te ’ē’a. ’A a’o atu i teie mau tamari’i na’ina’i faufa’a rahi ’a fa’aineine ai rātou nō te ha’api’i, nō te fa’a’ite pāpū, nō te pure, ’aore rā nō te tāvini, ’ia ti’aturi rātou iho ’e ’ia putapū i te ’oa’oa ’a rave fa’aoti ai rātou i tā rātou mau hōpoi’a. ’A ’imi i te mau rāve’a fa’auru nō te tauturu ia rātou ’ia hāro’aro’a, teie tā rātou ’ēkālesia ’e e ti’ara’a faufa’a roa tō rātou i roto i te fa’aineinera’a nō te ho’ira’a mai o te Fa’aora.
’A riro ai Iesu Mesia ’ei pū nō tō tātou orara’a, te mea tā tātou e hina’aro ’e te rāve’a e roa’a ai te reira. E fa’ataui te fa’afāriura’a i te mau mea ato’a ! E fa’ataui te reira i tō tātou nātura « i ’ore ai mātou i hina’aro fa’ahou ai i te rave i te ’ino, ’ia rave tāmau noa rā i te maita’i ». E fa’ataui te reira e nāhea tātou ’ia fa’a’ohipa i tō tātou tāime, tā tātou mau rāve’a, te mea tā tātou e tai’o, e hi’o, e fa’aro’o ’e e ’ōpere. E fa’ataui ato’a te reira e nāhea tātou ’ia pāhono i roto i te hō’ē uiuira’a nō te tihepura’a nō te ha’api’ira’a tōro’a, te fare ha’api’ira’a teitei fa’ahiahia.
E ti’a ia tātou e pūhi i te māramarama o Iesu Mesia i roto i te mau poro ato’a o tō tātou orara’a. Mai te peu ’aita tātou e fa’a’ite pāpū i te parau mau o tōna Atuara’a hou teie orara’a, nō tāna misiōni hanahana, ’e nō tōna ti’afa’ahoura’a ’o tei vāvahi i te mau fare tāpe’ara’a, i roto i tō tātou mau fare ’e tā tātou mau rurura’a ato’a a teie ’Ēkālēsia, e riro noa ïa tā tātou mau parau poro’i o te here, te tāvinira’a, te ha’avare ’ore, te ha’eha’a, te ’ā’au mehara ’e te aroha ’ei hō’ē a’ora’a tāhitohito o te hō’ē orara’a pāutuutu. ’Aita ana’e Iesu Mesia, ’aita ïa e mana nō te tauira’a, ’aita e fā nō te tāpae atu, ’aita e fa’ahaura’a i te mau tāfifira’a o te orara’a. Mai te peu e tau’a ’ore tātou i roto i tō tātou ti’ara’a pipi nā Iesu Mesia, e riro te reira ’ei ’ati rahi nō tā tātou mau tamari’i.
’Ia parau ana’e tātou i tā tātou mau tamari’i ē ’ua here tātou ia rātou, tē parau ra ato’a ānei tātou ē, ’ua here tō tātou Metua i te ao ra ’e tō tātou Fa’aora o Iesu Mesia ia rātou ? E nehenehe tō tātou here e tāmahanahana ’e e fa’auru, e nehenehe rā tō Rāua here e ha’amo’a, e fa’ateitei, ’e e fa’aora.
’Eiaha teie Iesu ’ia riro ’ei Iesu ha’avare, ’aore rā ’ei Iesu faufa’a ’ore, ’aore rā ’ei Iesu tino ’ore, ’aore rā ’ei Iesu nō te tahi noa taime, ’aore rā ’ei Iesu ’itea-’ore-hia, terā rā ’o tei fa’ahanahanahia, te manahope, tei ti’afa’ahou mai, tei fa’ateiteihia, tei ha’amorihia, te mana rahi, ’ei Tamaiti fānautahi nā te Atua, ’o tei pūai nō te fa’aora. ’E mai te hō’ē tamari’i ’āpī nō Philipino tei fa’a’ite pāpū mai iā’u ma te rāve’a hahi ’ore i te hō’ē mahana, « e ti’a roa tātou ’ia fa’aorahia ! » I te i’oa mo’a ’e te pōra’o ’ore « ’o ’Oia [tei pūai] nō te fa’aora », ’o Iesu Mesia, ’āmene.