Autahu’ara’a hanahana, feiā ’āpī tamāroa fa’ahiahia

Māuruuru e Elder Andersen, nō terā parau fa’ahiahia nō ni’a i te mana autahu’ara’a ’e te mana nō te tāra’ehara a te Fa’aora.

I te hō’ē po’ipo’i sābati, i teie ’āva’e Tēnuare, ’ua pārahi au i roto i te purera’a ’ōro’a, ’ua hau i te ’ahuru ma piti feiā ’āpī tamāroa tei pāturuhia nō te nu’u i mua i roto i te Autahu’ara’a a Aarona. Mai te huru ē tē taui ra te ao nei i raro a’e i tō tātou ’āva’e.

’Ua puta mai i roto i tō’u ferurira’a ē, ’ati a’e te ao nei, te hō’ē pēha’a hora i muri i te tahi, i roto i te mau purera’a ’ōro’a mai teie iho ā, e tau ’ahurura’a tauatini diakono, ha’api’i ’e tahu’a—mai te hoa o te peresideni Holland i teie po’ipo’i, ’o Easton—tei pāturuhia ’ia fa’atōro’ahia i roto i te mau tāvinira’a autahu’ara’a nō te orara’a tā’āto’a, nō te roara’a ’e te ’ā’anora’a o te ha’aputuputura’a o ’Īserā’ela.

I te ’āva’e Tēnuare tāta’itahi, e tu’uhia te rima i ni’a i te upo’o o te feiā ’āpī tamāroa, e 100 000, nō te tū’ati ia rātou, nā roto i te ’ōro’a, i te hō’ē rēni autahu’ara’a māramarama e ho’i roa, nā roto i te tau o te Fa’aho’i-fa’ahou-ra’a, i ni’a ia Iosepha ’e Oliver, i ni’a ia Ioane Bāpetizo ’e ia Iesu Mesia.

I teienei, e ’ere tō tātou ’ēkālesia i te mea fa’a’ite hua roa iāna. E fa’ahiti ri’i noa tātou ’ō nei.

Noa atu rā, i te ’itera’a vau i teie harurura’a pātiri nō te mau fa’atōro’ara’a ’āpī i te autahu’ara’a e parare ’ati a’e te ao, ’ua uiui tō’u mana’o—i roto pa’i i te hō’ē « ’ēkālesia nō te ’oa’oa » mai teie—’aita ānei i te mea tano ’ia tuōhia te reira nā ni’a i te mau tāpo’i fare. « I teie mahana e mea tano paha te pū ’e te tūmeparo pa’a’ina ’e te ahitiri ’ana’ana mau. E mea tano ato’a te tahi porotēra’a ! »

Nō tō tātou ’ite i te mana o te Atua i tōna vaira’a mau, ’ua ’ite tātou i te fa’ataupupūra’a o te mau hōho’a iho o tō teie nei ao maoti te ha’amanara’a a te Atua e parare nā te ao nei.

Tē ha’amau nei teie mau fa’atōro’ara’a i teie feiā ’āpī tamāroa i roto i te hō’ē orara’a tāvinira’a, inaha e ti’a atu rātou i roto i te mau taime ’e te mau vāhi rarahi, e mea faufa’a roa ’ino rātou i reira ’e tā rātou pure ’e te mana nō te autahu’ara’a a te Atua tā rātou e mau nei.

’Ua ha’amata teie pāpa’ara’a ’ohipa huanane ’ore ma te tahi melahi aupuru tei tonohia mai e te Atua. ’Ua fā Ioane Bāpetizo nō te tau tahito ra tei ti’afa’ahou mai, ia Iosepha ’e ia Oliver, ’ua tu’u ’oia i tōna rima i ni’a i tō rāua upo’o ’a parau ai : « I ni’a iho ia ’ōrua, e tō’u nei nā tāvini taea’e, i te i’oa o te Mesia, tē hōro’a atu nei au i te Autahu’ara’a a Aarona, ’o tei mau i te mau tāviri nō te utuutura’a a te mau melahi, ’e nō te ’evanelia nō te tātarahapa, ’e nō te bāpetizo nā roto i te utuhira’a, ’ia matara te hara » (Te Ha’api’ira’a Tumu ’e te mau Fafaura’a 13:1).

’Ua parau Ioane i teie ha’amanara’a te « Autahu‘araa a Aarona », ’ia au i te taea’e ’e te hoa autahu’ara’a o Mose. I te tau tahito ra, te feiā tei mau i teie autahu’ara’a a Aarona, nō te ha’api’i ïa ’e nō te tauturu i te pae nō te mau ’ōro’a—e mau ’ōro’a tei fa’arōtahi i te ti’ara’a pipi i ni’a i te Mesia e tae mai, ’oia ho’i te Fatu Iesu Mesia (hi’o Deuteronomi 33:10).

Tē hōro’a pāpū nei te buka Numera i te feiā tei mau i te autahu’ara’a a Aarona i te hōpoi’a e tāpe’a i te mau fāri’i nō te mau ’ōro’a. « E fa’ata’a rā ’oe ’ia Aarona ’e tāna pu’e tamari’i […] ’e tā rātou fa’aitoitora’a, ’o […] te papa […] ’e te mau mea ato’a o te vāhi mo’a i tā rātou e rave i te tōro’a ra » (Numera 3:10, 31).

’Ua fa’ati’ahia ’e ’ua monohia te ’ōro’a o te Faufa’a Tahito nō te tūsia ’ānimara nā roto i te orara’a ’e te tāra’ehara a te Fa’aora. ’Ua monohia te ’ōro’a tahito i te ’ōro’a tā tātou e parau nei te ’ōro’a nō te Tāmā’ara’a a te Fatu.

Tē tu’u nei te Fatu i tōna ti’aturi i ni’a i te feiā nō teie tau tei mau i te autahu‘araa a Aarona ’ia rave i te hō’ē ā mau mea tā rātou i rave i tahito ra : e ha’api’i ’e e fa’atere i te mau ’ōro’a—te tā’āto’ara’a nō te fa’aha’amana’o ia tātou i tāna tāra’ehara.

’Ia tauturu ana’e te mau diakono, te mau ha’api’i ’e te mau tahu’a i te ’ōro’a, e fa’ari’i rātou i tō te reira mau ha’amaita’ira’a mai te tahi atu mau pu’era’a : nā roto i te ha’apa’ora’a i te fafaura’a tā rātou e rave i te ravera’a te ta’ata tāta’itahi i te pāne ’e te pape. Nā roto rā i te ravera’a i teie mau hōpoi’a mo’a, tē ha’api’i rahi ato’a nei rātou nō ni’a i tā rātou mau ’ohipa ’e mau hōpoi’a nō te autahu’ara’a.

Tē parauhia nei te Autahu’ara’a a Aarona te autahu’ara’a fa’aineinera’a, i te hō’ē pae nō te mea i tō te reira mau ’ōro’a e ti’a ai ia rātou ’ia ’ite i te teimaha ’e te ’oa’oa nō te ravera’a i te ’ohipa a te Fatu, ma te fa’aineine ia rātou nō te tāvinira’a autahu’ara’a nō ananahi, ’a pi’ihia ai rātou nō te tāvini ma te rāve’a mana’o-’ore-hia—mai te paraura’a i te ha’amaita’ira’a fa’auruhia i te taime e ’opa’opa ataata ai te tīa’ira’a ’e te moemoeā, ’e tae noa atu te ora ’e te pohe.

E tītauhia te fa’aineinera’a pāpū nō teie mau tītaura’a pāpū.

Tē fa’ata’a nei Te Ha’api’ira’a Tumu ’e te mau Fafaura’a ē, nā te mau diakono ’e te mau ha’api’i e « fa’aara, [e] tātara i te parau, [e] fa’aitoito, ’e [e] ha’api’i, ’e [e] ani atu i te mau ta’ata ato’a ’ia haere mai i te Mesia ra » (Te Ha’api’ira’a Tumu ’e te mau Fafaura’a 20:59). Hau atu i teie mau rāve’a tāvinira’a, nā te mau tahu’a e « a’o […] ’e [e] bāpetizo » (Te Ha’api’ira’a Tumu ’e te mau Fafaura’a 20:50).

’Oia, ’ia fa’aro’ohia, e mea huru rahi, i roto rā i te orara’a mau nei, tē tupu iho nei te reira, ’e nā te ao ato’a nei.

E ’episekōpo tei ha’api’i i tāna peresidenira’a diakono ’āpī i tā rātou hōpoi’a. Nō reira ’ua ha’amata teie peresidenira’a ’āpī i te paraparau mai te aha pa’i te huru te reira i roto i tō rātou pupu autahu’ara’a ’e tā rātou pāroita. Fa’aoti a’era rātou e ha’amata i te hāhaere i te mau melo ruhiruhiā o te pāroita, nō te hi’o mai e aha tō rātou mau hina’aro ’a rave atu ai.

I roto i te mau ta’ata tā rātou i tāvini, tē vai nei ’o Alan, e veutupu ’eta’eta ’e te mea tuhi pinepine i te ta’ata, ’e i te tahi taime e au roa ’oia i te ’enemi. ’Ua riro mai te vahine o Alan, ’o Wanda, ’ei melo nō te ’Ēkālesia, ’o Alan rā, e parau pa’i tātou ē, e ma’a rā’au pa’ari mau.

Noa atu rā, ’ua rave noa te diakono, ma te ha’avarevare ’ite i tāna mau parau tuhi, i te opera’a i te hiona ’e te hutira’a i te fāri’i pehu i rāpae. E ’ere ato’a rā i te mea ’ōhie ’ia riri atu i te mau diakono, ’e i te hope’a, ’ua ha’amata ’o Alan i te au mai ia rātou. Ē i te hō’ē taime ’ua tītau manihini rātou iāna ’ia haere mai i te purera’a.

« ’Aita vau e au roa i te purera’a », ’ua pāhono atu ’oia.

« E mea au ho’i ’oe ia mātou », ’ua parau rātou. « ’A haere mai ïa nā muri ia mātou. E nehenehe ’oe e haere mai i tā mātou rurura’a pupu autahu’ara’a mai te mea ’ua hina’aro ’oe. »

’E ma te parau fa’ati’a a te ’episekōpo, ’ua haere mai ’oia—’e ’ua tāmau noa ’oia i te haere mai.

Riro mai nei te mau diakono ’ei ha’api’i, ’e ’ua tāmau rātou i te tāvini iāna, ’e ’ua ha’api’i ’oia ia rātou ’ia tātā’i i te mau pere’o’o ’e ’ia patu i te tahi mau mea. Mai te rirora’a mai nā ha’api’i ’e nā diakono tahito ’ei tahu’a, ’ua pi’i Alan ia rātou « tā’u nā tamaiti. »

Tē fa’aineine mau ra rātou nō te misiōni, ’e ’ua ani atu rātou iāna e nehenehe ānei tā rātou e ha’api’ipi’i i te mau ha’api’ira’a misiōnare i ni’a iāna. ’Ua tāora atu ’oia e’ita roa atu ’oia e fa’aro’o ’e e ti’aturi atu, e nehenehe rā tā rātou e ha’api’ipi’i i tōna fare.

’E ro’ohia atu ra Alan i te ma’i. ’E marū ri’i mai nei ’oia.

’E i te hō’ē mahana, i roto i te rurura’a pupu autahu’ara’a, ’ua ani marū atu ’oia ’ia pure rātou nōna, ’ia fa’aea mai ’oia i te pūpuhi i te ’ava’ava, ’e ’ua nā reira rātou. ’Āpe’e atu ra rā rātou iāna i tōna fare ’e haru mai nei i tāna ’ava’ava ato’a.

’A topatopa noa ai tōna ea ’e ’a mau roa ai Alan i te fare ma’i ’e i te mau pū rapa’aura’a, ’ua tāvini « tāna nā tamaiti » iāna, ma te fa’aite mū noa i te mau mana nō te autahu’ara’a ’e nō te here ha’avare ’ore (hi’o Te Ha’api’ira’a Tumu ’e te mau Fafaura’a 121:41).

’Ua tāmau ā te semeio i te anira’a Alan ’ia bāpetizohia ’oia—’ua fa’aru’e mai rā hou te reira i te tupura’a. I tāna anira’a, nā tōna mau tahu’a-’e-diakono-tahito i amo i tōna ’āfata ’e i paraparau i tōna purera’a hunara’a ma’i, i reira rātou—e mea tano roa—i te fa’aarara’a, i te tātarara’a i te parau, i te fa’aitoitora’a, i te ha’api’ira’a ’e i te anira’a i te ta’ata ato’a ’ia haere mai i te Mesia.

Ē i muri mai, i roto i te hiero, ’o te hō’ē o « nā tamaiti nā Alan » tei bāpetizo i terā peresideni pupu diakono tahito ra, ’ei mono nō Alan.

Te mau mea ato’a tā Ioane Bāpetizo i parau e rave, ’ua nā reira rātou. ’Ua rave rātou i te mea tā te mau diakono, te mau ha’api’i ’e te mau tahu’a e rave nei ’ati a’e te ’Ēkālesia ’e ’ati a’e teie ao.

Hō’ē o te mau mea tei fa’auehia te feiā tei mau i te autahu’ara’a a Aarona ’ia rave, ’o te ’ōro’a mo’a ïa.

I te matahiti i ma’iri, ’ua fārerei au i te hō’ē ’episekōpo fa’auruhia ’e tāna vahine. I te hō’ē po’ipo’i mahana mā’a a’enei, tē tere ra rātou i te bāpetizora’a o tā rāua tamaiti ’e ro’ohia atu ra rātou i te mo’e ’oto rahi ’e te tā’ue o tā rāua tamāhine iti piti matahiti, ia Tess.

’Ia po’ipo’i a’e, ’ua putuputu te mau melo o tā rāua pāroita nō te purera’a ’ōro’a, ma te ’ī i te aumihi, ma te mamae ato’a i te mo’era’a teie tamāhine iti maita’i roa. ’Aita te ta’ata i mana’o ē e tae mai te ’utuāfare o te ’episekōpo i te purera’a i terā po’ipo’i, terā rā ma’a minuti noa nā mua a’e i te ha’amatara’a te purera’a, ’ua tomo muhu ’ore mai rātou ’e ’ua haere i tō rātou pārahira’a.

’Ua ta’uma te ’episekōpo i ni’a ’e ’ua haere nā pīha’i iho i tōna pārahira’a ra, i rōpū i tōna nā tauturu, ’e ’ua pārahi i rōpū i nā tahu’a, i te ’aira’amā’a nō te ’ōro’a.

I terā pō ’ā’au fāfati mau ’e te topa ’ore te ta’oto i te ’imira’a ’ia māramarama ’e ’ia tae mai te hau, tae mai nei te hō’ē mana’o pūai nō te mea e tītau-rahi-hia nō tōna ’utuāfare—’e te mea e tītau-rahi-hia nō tāna pāroita. ’Oia ho’i ’ia fa’aro’o i te reo o tō rātou ’episekōpo, te peresideni nō te Autahu’ara’a a Aarona o tā rātou pāroita, tō rātou pāpā ’oto, ’ia fa’ahiti i te mau parau fafau nō te fafaura’a o te ’ōro’a.

’E nō reira, i te taime tano, ’ua tūturi ’oia ’e tōna mau tahu’a ’e ’ua paraparau ihora i tōna Metua. I roto i te aroha o terā taime, ’ua fa’ahiti ’oia i te mau parau mana rahi roa a’e tei fa’ati’ahia i te hō’ē ta’ata ’ia parau pūai i roto i tōna orara’a.

E mau parau ma te fa’ahope’ara’a mure ’ore.

E mau parau nō te ’ōro’a.

E mau parau nō te fafaura’a.

E arata’ira’a ’o tē fa’atū’ati ia tātou i te tumu rahi o teie orara’a—’e i te mau fa’ahope’ara’a rahi fa’ahiahia roa a’e o te fa’anahora’a a te Metua i te ao ra nō tātou.

E ti’a ānei ia ’outou ’ia feruri i te mea tā te ’āmuira’a i fa’aro’o i terā fare purera’a i terā mahana—te mea tā rātou i putapū i te mau parau tā tātou e fa’aro’o nei i te mau sābati ato’a i te fare purera’a ?

« E te Atua, te Metua mure ’ore, tē ani atu nei mātou ia ’oe nā roto i te i’oa o tō Tamaiti, ’o Iesu Mesia, e ha’amaita’i mai ’e e ha’amo’a mai i teie nei pāne nā te mau vārua o te feiā ato’a ’o tē rave mai nei, ’ia ’amu rātou i te reira ma te ha’amana’o i te tino o tō Tamaiti, ’e ’ia fa’a’ite rātou ia ’oe, e te Atua, te Metua mure ’ore, e ti’a ia rātou i te rave i te i’oa o tō Tamaiti i ni’a iho ia rātou, ’e i te ha’amana’o ā iāna ē a muri noa atu, ma te ha’apa’o maita’i i tāna mau fa’aue tāna i hōro’a mai ia rātou ra ; ’ia vai noa tōna Vārua i roto ia rātou ē a muri noa atu. ’Āmene. » (Te Ha’api’ira’a Tumu ’e te mau Fafaura’a 20:77).

’E i muri iho : « E te Atua, te Metua mure ’ore, tē ani atu nei mātou ia ’oe nā roto i te i’oa o tō Tamaiti, ’o Iesu Mesia, e ha’amaita’i mai ’e e ha’amo’a mai i teie nei [pape] nā te mau vārua o te feiā ato’a ’o tē inu mai nei, ’ia inu rātou i te reira ma te ha’amana’o i te toto o tō Tamaiti i ha’amani’ihia nō rātou ra ; ’ia fa’a’ite rātou ia ’oe, ’e te Atua, te Metua mure ’ore, e ha’amana’o ā rātou iāna ē a muri noa atu, ’ia vai noa tōna Vārua i roto ia rātou. ’Āmene. » (Te Ha’api’ira’a Tumu ’e te mau Fafaura’a 20:79).

Tē parau pāpū nei teie metua tāne maita’i ’e teie metua vahine ē, ’ua fa’ati’ahia terā parau fafau. ’Oia mau nō tō rātou tāmāhanahanara’a mure ’ore, e « vai noa tōna Vārua i roto ia rātou. »

E māuruuru a muri noa atu vau i te mea ē, tē ha’amaita’i mau nei te feiā tei mau i te Autahu’ara’a a Aarona, ma tō te reira mau mana ’e mau ’ōro’a ’e mau hōpoi’a, ia tātou pā’ātso’a nā roto i te mau tāviri nō te « utuutura’a a te mau melahi, ’e nō te ’evanelia nō te tātarahapa, ’e nō te bāpetizo nā roto i te utuhira’a, ’ia matara te hara » (Te Ha’api’ira’a Tumu ’e te mau Fafaura’a 13:1). I te i’oa o Iesu Mesia, ’āmene.