« ’A ha’afātata mai iā’u nei »

Tō’u mau taea’e ’e mau tuahine, e ’oa’oa rahi nō’u ’ia fa’atae atu i tō’u here ia ’outou i roto i teie ’āmuira’a rahi a Te ’Ēkālesia a Iesu Mesia i te Feiā Mo’a i te mau Mahana Hope’a nei. Nāna teie ’Ēkālesia. Tē putuputu nei tātou i roto i te mau fare ’e te mau ’utuāfare nā te ao ta’ato’a nei i tōna i’oa.

E rave tātou i tōna i’oa i ni’a iho ia tātou ’ia tomo ana’e tātou i roto i tōna bāsileia nā roto i te fafaura’a. ’O ’oia te Tamaiti ti’afa’ahou ’e te fa’ahanahanahia nā te Atua. E ta’ata tāhuti tātou, e nehenehe tātou e hara ’e e pohe. Teie rā, nō tōna here ia tātou tāta’itahi, tē tītau manihini nei te Fatu ia tātou ’ia ha’afātata atu iāna.

Teie tāna parau : « ’A ha’afatata mai iā’u nei, e ha’afatata atu ïa vau ia ’outou na ; ’a imi itoito noa mai iā’u nei ’e e ’ite mai ho’i ’outou iā’u, ’a ani mai, ’e e fa’ari’i ïa ’outou ; ’a pātōtō mai ’e e ’īritihia atu ïa ia ’outou na ».

E taime iho ā e ’ite tatou’ ē, ’ua fātata roa tātou i te Fa’aora ’o Iesu Mesia. Terā rā, tē ’ite ato’a nei tātou i te tahi āteara’a i roto i tō tātou orara’a tāhuti nei ’e tē hina’aro nei tātou ’ia ha’apāpū ē, ’ua ’ite ’oia ia tātou ’e ’ua here ’oia ia tātou tāta’itahi.

Tē vai ra i roto i te tītau-manihini-ra’a a te Fa’aora te rāve’a nō te ’ite i taua ha’apāpūra’a ra. ’A ha’afātata atu iāna nā roto i te ha’amana’o-noa-ra’a iāna. ’A ’imi itoito iāna nā roto i te tai’ora’a i pāpa’ira’a mo’a. ’A ani nā roto i te pure mā te ’ā’au tae i te Metua i te ao ra, ’ia tupu te ha’afātatara’a i tāna Tamā’iti here.

Tē vai ra hō’ē rāve’a ’ōhie nō te feruri i te reira. ’O te ’ohipa ïa tā ’outou e rave mai te mea ē ’ua fa’ata’a-’e-hia ’outou i te mau hoa rahi. E ’imi ’outou i te rāve’a nō te paraparau ia rātou, e māuruuru ’outou i te mau poro’i ato’a tā ’outou e fa’ari’i mai roto mai ia rātou ’e e rave ’outou i te mau mea ato’a e nehenehe e rave nō te tauturu ia rātou.

Rahi noa atu te ’ohipa e tupu, te roa noa atu te vaira’a o te reira, pūai noa atu te tā’aira’a o te here, ’e e ’ite ’outou ē, te ha’afātata atu ra ’outou. Mai te peu e rahi roa te taime ’aita e paraparaura’a, ’aita e fa’aro’ora’a ’e ’aita e ravera’a i te hō’ē mea nō te tahi ’e te tahi, e paruparu ïa te tā’amura’a.

’Ua here Iesu Mesia ia tātou tāta’itahi. ’Ua pūpū mai ’oia ia tātou i teie rāve’a nō te ha’afātata atu iāna. Mai te hō’ē hoa here, e rave ’outou i te reira ma te paraparaura’a nā roto i te pure i te Metua i te ao ra nā roto i te i’oa o Iesu Mesia, ma te fa’aro’o i te arata’ira’a here a te Vārua Maita’i, ’e te tāvinira’a ma te ’oa’oa ia vetahi ’ē nōna. E’ita e maoro, e ’ite ’outou i taua ha’amaita’ira’a ra nō te ha’afātata atu ā iāna.

I tō’u ’āpīra’a, ’ua ’ite au i te ’oa’oa o te ha’afātatara’a i pīha’i iho i te Fa’aora ’e tōna ha’afātatara’a mai iā’u nā roto i te mau ’ohipa ri’i ha’iha’i o te ha’apa’ora’a i te mau fa’auera’a. I tō’u ’āpīra’a, ’ua hōro’ahia te ’ōro’a mo’a i roto i te hō’ē purera’a i te ahiahi. Tē ha’amana’o noa nei ā vau i te hō’ē pō ta’a ’ē, ’ua hau i te 75 matahiti i teienei, e mea pōiri roa ’e te to’eto’e i rāpae. Tē ha’amana’o nei au i te hō’ē mana’o māramarama ’e te māhanahana i tō’u ’itera’a ē, ’ua ha’apa’o vau i te fa’auera’a ’ia putuputu ’e te feiā mo’a nō te ’amu i te ’ōro’a, ma te fafau i tō tātou Metua i te Ao ra ’ia ha’amana’o tāmau noa i tāna Tamaiti ’e ’ia ha’apa’o i tāna mau fa’auera’a.

I te hope’a o te purera’a i taua ’āru’i ra, ’ua hīmene mātou i te hīmene ra « E iā’u nei e te Fatu », ’e teie mau parau e ’ore e mo’e, « ’Ei iā’u nei ’e te Fatu, terā mai nei te pō »

’Ua fa’atupu teie mau parau i te mana’o pūai o te Varua i roto iā’u, inaha ho’i, e tamaiti ’āpī noa ā vau. ’Ua ’ite au i te here ’e te fātata ’o te Fa’aora i taua ahiahi ra nā roto i te tāmāhanahana a te Vārua Maita’i.

Tau matahiti i muri mai, ’ua hina’aro vau e fa’aiho fa’ahou mai ā i te reira mau mana’o o te here o te fa’aora ’e te fātata iāna tā’u i ’ite i roto i taua purera’a ’ōro’a ra, i roto i tō’u ’āpīra’a. Nō reira, ’ua ha’apa’o vau i te tahi atu fa’auera’a ’ōhie ’e ’ua tai’o vau i te mau pāpa’ira’a mo’a.

I roto i te buka a Luka, ’ua tai’o vau nō ni’a i te toru o te mahana i muri a’e i tōna fa’atātaurora’ahia ’e te hunara’ahia, ’a haere mai ai te mau tāvini ha’apa’o maita’i, ma te here rahi nō te Fa’aora, nō te fa’atāhinu i tōna tino. I tō rātou taera’a mai, ’ua ’ite atu ra rātou ē, ’ua tura’i-’ē-hia te ’ōfa’i i te mēnema, ’e ’aita ato’a tōna tino i reira.

Tē ti’a ra e piti nā melahi i reira ’e ’ua ani maira e aha rātou i mata’u ai :

« E aha ’outou i ’imi ai i tei ora i te vaira’a o te pohe ?

« ’Aore ’oia i ’ō nei, ’ua ti’a ïa i ni’a ; ’a ha’amana’o i tāna i parau mai ia ’outou iāna i pārahi i Galilea ra,

« ’A na ’ō mai ai ra ē, e tu’uhia te Tamaiti a te ta’ata nei i te rima o te feiā rave hara, e fa’asātaurohia, ’e e ti’afa’ahou ’ia tae i te ru’i toru ra ».

I taua ahiahi ra, e piti nā pipi nā Ierusalema mai te haere nā ni’a i te purumu nō Emausa, ’ua fā maira te Mesia ti’afa’ahou ia rāua ’e haere atu ra nā muri iho ia rāua.

Tē fāri’i nei te buka a Luka ’ia haere tātou nā muri iho ia rātou i taua ahiahi ra :

« E te paraparau noa ra rāua, ’e tē feruri noa ra rāua rāua iho, ’ua ta’ati ato’a maira Iesu ia rāua, haere ato’a atu ra rātou.

« ’Ua fa’a’orehia rā te ’ite i tō rāua mata, ’aita atu ra rāua i ’ite iāna.

« ’Ua parau maira ’oia ia rāua, e aha tena na parau tā ’ōrua i paraparau noa na ma te mata huru ’oto ?

« ’Ua parau atu ra te hō’ē o rāua ra iāna ’o Keleopa te i’oa, nā ’ō atu ra, ’O ’oe ana’e na paha te ta’ata ’ē i Ierusalema nei ’aore i ’ite i te mau mea i tupu i reira i teie nei pu’e mahana? »

’Ua fa’a’ite atu ra rāua i tō rāua pe’ape’a i te mea ē, ’ua pohe Iesu i te taime ho’i ’a ti‘aturi ai rātou ē, e riro ’oia ’ei tāra’ehara nō ’Īserā’ela.

E mea pāpū ē, e reo here tō te Fatu ti’a fa’ahou ’a paraparau atu ai ’oia i teie nā pipi pe’ape’a e te oto ho’i.

’A tāmau noa ai au i te tai’o, ’ua tae mai teie mau parau iā’u tei tāmāhanahana i tō’u ’ā’au, mai tā’u i ’ite i tō’u tamari’i-ri’i-ra’a:

« E fātata maira ia raua taua ’oire haerehia e rāua ra, ’ua fa’ahua haere roa ’oia.

« Tāpe’a atu ra rāua iāna, nā ’ō atu ra, e fa’aea na tātou, ’ua huru ahiahi ho’i, ’ua mure te mahana. Haere atu ra ’oia i roto e pārahi ato’a rātou. »

’Ua fāri’i te Fa’aora i taua pō ra i te anira’a manihini ’ia tomo i roto i te fare o tāna nā pipi. ’Ua tāmā’a ’oia ’e ’o rāua ato’a ra. ’Ua rave ’oia i te faraoa, ha’amaita’i ihora i te reira, vāvāhi ihora, ’e hōro’a atu ra ia rāua ra. ’Ua ’ara’ara tō rāua mata ’e ite atu ra iāna. ’E i muri iho, mo’e atu ra ’oia.

’Ua pāpa’i ’o Luka nō tātou i te mau mana’o o taua mau pipi ha’amaitaihia ra : « ’Ua parau ihora rāua rāua iho, e ’ere, e hoa, i ’ana’anatae tō tāua ’ā’au iāna i paraparau mai ia tāua i te arati’a ra, ’a fa’a’ite mai ai ia tāua i te aura’a i te mau parau i pāpaihia ra ? »

’Ua ho’i ’oi’oi atu ra nā pipi e piti i Ierusalema nō te fa’a’ite i nā ’ahuru ma hō’ē ’āpōsetolo i te ’ohipa i tupu. A fa’a’ite ai rāua i tō rāua ’itera’a, ’ua fā fa’ahou maira te Fa’aora.

’Ua ti’a ’oia i rotopū ia rātou ’e « nā ’ō maira, ’Ia ora nā outou ». ’Ua hi’o fa’ahou a’era ’oia i te mau parau tohu nō tāna misiōni nō te mau hara a te mau tamari’i tā’āto’a a tōna Metua ’e ’ia ’ōfati i te tāpe’a o te pohe.

« ’Ua nā ’ō maira ’oia ia rātou, i nā reirahia taua parau ra i te pāpa’i, ’e ’ia nā reirahia tō te Mesia pohe e ti’a ai, ’e ’ia ti’a fa’ahou mai te pohe mai i te ru’i toru :

« e ia poro-haere-hia te tatarahapa e te faaoreraa i te hara i to’na ra i‘oa, na Ierusalema’tu nei â, e ati noa‘e te mau fenua atoa e tia’i.

« E teie nei, ’ei ’ite ’outou i teie nei mau parau ».

Mai tāna mau pipi here, te mau tamari’i ato’a a tō tātou Metua i te Ao ra ’o tei ma’iti i te tomo nā roto i te ’ūputa ’o te bāpetizora’a, ’ua fafau ïa rātou ’ia riro ’ei ’ite nō te Fa’aora ’e ’ia ha’apa’o i te feiā e hina’aro i te tauturu i roto i tō rātou orara’a i te pae tino. ’Ua fa’a’ite mai ’o Alama, te peropheta nō te Buka a Moromona, i teie fafaura’a ia tātou i te mau pape nō Moromona e rave rahi tenetere i ma’iri a’e nei :

« Nō te mea ’ua hina’aro ’outou ’ia ō i te ’āua ’o te Atua, ’e ’ia parauhia i tōna ra mau ta’ata, ’e ’ua hina’aro ’outou ’ia tauturu te tahi i te tahi i te hōpoi i ta’ ’outou mau hopoi’a, ’ia māmā te reira ;

« ’Oia ïa, ’ua au ’ia ’outou ’ia ’oto, ’a ’oto ai te feiā ’oto ra ; ’oia ïa, ’e ’ia ha’amāhanahana ia rātou i tei au ’ia ha’amāhanahanahia ra, ’e ’ia ti’a ’ei ’ite o te Atua i te mau mahana ato’a, ’e i te mau mea ato’a, ’e i roto i te mau vāhi ato’a tā ’outou e pārahi ra […] ’e ’ia tae noa atu i te pohera’a […] ’ia noa’a te ora mure ’ore ia ’outou ».

Mai te mea e ha’apa’o maita’i ’outou i teie mau parau fafau, e ’ite ’outou ē, e ha’apa’o te Fatu i tāna parau fafau ’ia riro ’ei hō’ē ’e ’o ’outou i roto i tā ’outou ’ohipa, ma te ha’amāmā i tā ’outou hopoi’a. E ’ite ’outou iāna, ’e a muri a’e, e riro ’outou mai iāna te huru ’e e « maitai roa outou iāna ». Nā roto i te tauturura’a ia vetahi ’ē e ’ite ’outou ē, tē ha’afātata ra ’outou iāna.

E rave rahi ’outou tē vai nei te mau ta’ata tā ’outou i here ’o tē ’ōvere haere nei nā rāpae i te ’ē’a o te ora mure ’ore. Tē uiui nei ’outou ē, e aha atu ā te ti’a iā’u ’ia rave nō te fa’aho’i mai ia rātou. E nehenehe ’outou e turu’i i ni’a i te Fatu nō te ha’afātata atu ia rātou ’a tāvini ai o’utou iāna ma te fa’aro’o.

Tē ha’amana’o ra ’outou i te fafaura’a a te Fatu ia Iosepha Semita ’e ia Sidney Rigdon, i te taime tei te ātea ’ē rāua i tō rāua ’utuāfare nō te rave i tāna ’ohipa : « ’O tā’u na hoa ra ’o Sidene ’e ’o Iosepha, tē ora maita’i nei tō ’ōrua na ’utuāfare ; tei roto rātou i tō’u pue rima, ’e nā’u ïa e ha’apa’o ia rātou mai te au i te mana’o i roto iā’u nei ; nō te mea tei roto iā’u nei te mana ato’a ».

Mai te mea ē, e tāpo’i ’outou i te mau pēpē ’o te feiā veve, e pāturu te mana ’o te Fatu ia ’outou. E fa’atorohia tōna nā rima ’e tō ’outou nō te fa’aora ’e nō te ha’amaita’i i te mau tamari’i a tō tātou Metua i te Ao ra.

Te mau tāvini ato’a ’o tei fafau ia Iesu Mesia, e fa’ari’i rātou i tāna arata’ira’a ’a ha’amaita’i ai ’e ’a tāvini ai rātou ia vetahi ’ē nōna. ’Ei reira rātou e fāri’i ai i tōna here, ’e i te ’oa’oa i te ha’afātatara’a atu iāna.

E ’ite au nō te Ti’afa’ahoura’a o te Fatu mai te huru ē, tei reira vau i te ahiahi i pīha’i iho i nā pipi to’opiti i roto i te fare i ni’a i te ’ē’a nō Emausa. ’Ua ’ite au ē, tē ora nei ’oia.

Teie te ’Ēkālesia mau, te ’Ēkālesia a Iesu Mesia. ’Ia tae i te mahana ha’avāra’a, e ti’a atu tātou i mua i te Fa’aora, mata ’e mata. E riro ïa ’ei taime ’oa’oa rahi nō te feiā, i roto i teie orara’a, tei ha’afātata atu iāna i roto i tāna ’ohipa, ’e ’o tē nehenehe e tīa’i ma te fa’a’oroma’i ’ia fa’aro’o i teie mau parau : « ’Ua ti’a roa e teie nei tāvini maita’i ’e te ha’avare ore ».

Tē fa’a’ite pāpū nei au ’ei ’ite nō te Fa’aora ’e te Tāra’ehara ti’afa’ahou, nā roto i te i’oa o Iesu Mesia ra, ’āmene.