E ’ere tō ’outou tātarahapa i te hopoi’a nō Iesu Mesia; Tē ha’amāramarama nei te reira i Tōna ’oa’oa

E rave rahi matahiti i i teienei, i roto i te hō’ē tere i Floride, ’ua pārahi au i rāpae ’a tai’o noa ai i te hō’ē buka. Tē fa’a’ite ra te ’upo’o parau o teie buka ē, e ti’a ia tātou ’ia tāpae i te ra’i, noa atu ’aita tātou i i tāpae atu ra i te hō’ē fāito maita’i roa. ’Ua ui mai te hō’ē vahine tē haere mai ra nā reira: «’Ia mana’o ’oe, e ti’a anei? »

’Ua hi’o atura vau ma te māere ’e ’ua ’ite a’era vau ē, tē parau ra ’oia nō ni’a i te buka tā’u e tai’o ra. Parau atura vau i te tahi parau ma’ama’a mai teie te huru, «’Aita vau i ātea roa, terā rā, e fa’a’ite atu vau ia ’oe e aha te hope’ara’a o te reira. »

’Auē tō’u hina’aro ’ia ho’i i muri i te tau ! ’Ua parau atu vau iāna, «’Oia, e nehenehele! Nō te mea e ere te ra’i nō te mau ta’ata ti’a roa; nō te mau ta’ata ïa tei fa’a’orehia te hara, ’o tei ma’iti pinepine i te Mesia. »

I teie mahana tē hina’aro nei au e paraparau i te feiā i rotopū ia tātou ’o tē mana’o nei i te tahi mau taime ē, «e ’ohipa te tātarahapa ’e te fa’a’orera’a hara nō te mau ta’ata ato’a ’eiaha rā nō’u. » Te feiā e ui nei ia rātou iho ē, «I te mea ho’i ē, tē rave noa nei au i taua mau hape nei ā, peneia’e o te reira ïa tō’u huru. » Te feiā, mai iā’u nei, ’o tē mana’o nei i te tahi mau mahana e au ra ē, e mea pa’ari roa te ’ē’a o te fafaura’a, fātata roa ïa mai te hō’ē ta’umara’a nō te fafaura’a.

I Auteraria, ’ua fa’a’ite te hō’ē misiōnare fa’ahiahia, ’o Elder QaQanō Fiti, i te hō’ē ā mana’o i roto i tōna ’itera’a pāpū hou tōna ho’ira’a : « ’Ua ’ite au ē, tē here nei te Atua iā’u terā rā, i te tahi mau taime, tē uiui nei au ē, ’ua ’ite ānei te Atua ē, te here nei au iāna ? Nō te mea e ’ere au i te mea ti’a roa, ’e tē rave noa nei ā vau i te mau hape. »

I roto i teie uira’a marū ’e te ha’amata’u, ’ua fa’a’ite poto mai te taea’e QaQa i te mea o tei haape’ape’a pinepine iā’u. Te ui ato’a ra paha ’outou ia ’outou iho i teie uira’a ma te feruri ē, «Te tamata itoito nei au, terā rā, ’ua ’ite anei te Atua ē, tē tāmata mau nei au? ’Ia ’ore ana’e e tae’ahia iā’u, ’ua ’ite anei te Atua ē, te here noa ra ā vau Iāna? »

Tē ’oto nei au ia parau i te reira, terā rā, ’ua fa’a’ohipa ato’a vau i te fāito o tō’u aura’a i te Fa’aora i te huru maita’i roa o tō’u orara’a. ’Ua mana’o vau ē, te aura’a o te hō’ē orara’a ha’apa’o , ’oia ho’i ïa, ’e’ita roa’tu e tītauhia iā’u ’ia tātarahapa. ’E ’ia rave ana’e au i te mau hape, oia ho’i i te mau mahana ato’a, e fa’aātea ’ē au iā’u i te Atua ma te feruri ē, «pāpū maita’i ē, ’ua hepohepo roa oia iā’u. »

E ’’ere roa atu te reira i te parau mau.

’Ua ha’api’i mai au ē, mai te mea e tīa’i ’outou ē tae roa atu i te taime ’ua mā e ’aore rā, ’ua ti’a roa ’outou nō te haere i te Fa’aora ra, ’ua hahi ïa ’outou i te mea faufa’a.

E aha pa’i ’āhani ē, e hi’o tātou i te mau fa’auera’a ’e te ha’apa’ora’a mai te tahi atu huru ta’a’ē?

Tē fa’a’ite pāpū nei au ē, noa’tu ē tē ha’ape’ape’a nei te Atua nō tā tātou mau hape, ’ua hau atu tōna ha’ape’ape’a nō ni’a i te mea e tupu i muri a’e i tō tātou ravera’a i te hape. E fāriu fa’ahou anei tātou iāna? E tāmau noa anei tātou i roto i teie auta’atira’a o te fafaura’a?

Peneia’e tē fa’aro’o ra ’outou i te mau parau a te Fatu ē, «Mai te mea ē, te here nei ’outou iā’u, a ha’apa’o i tā’u mau fa’auera’a » ’e tē hepohepo ra ’outou nō te mea ’aita ’outou i haapa’o i te mau fa’auera’a ato’a. Tē fa’aha’amanao atu nei au ia ’outou ē, e fa’auera’a ato’a te tātarahapa! Peneia’e o te reira te fa’auera’a fa’ahiti-pinepine-hia a’e i roto i te mau pāpa’ira’a mo’a

I roto i te parau a Alama,«ahiri au e melahi ē, ’e e roa’a mai ho’i iā’u te hina’aro o tō’u nei ’ā’au … i te pi’ira’a atu i te tātarahapa, » ’aita ’oia e tāmata nei i te fa’aha’amā ia tātou nā roto i te fa’a’itera’a i tā tātou mau hape. ’Ua hina’aro oia e tītau i te tātarahapa ’ia ti’a ia ’outou ’e iā’u nei ’ia ’ape i te mauiui i roto i te ao nei. Te hō’ē o te mau tumu i riri ai ’o Alma i te hara, nō te mea ïa e fa’atupu te reira i te mauiui i roto ia tatou.

I te tahi mau taime, mai te hō’ē parau pāpa’i i ni’a i tō’u rae, e ti’a ia’u ’ia ha’amana’o ē, o te mau fa’auera’a te ’ē’a nō te fa’aātea i te mauiui. ’Oia ato’a te tātarahapa. ’Ua parau tō tātou peropheta, «Tē here tāmau noa nei te Fa’aora ia tātou ’ia tātarahapa ana’e ihoā rā tātou. »

Nō reira, ’ia parau ana’e te Fa’aora, « ’A tātarahapa ’outou, ’a tātarahapa ’outou », ’a feruri na ’āhani tē parau ra ’oia ē, « ’Ua here au ia ’outou. ’Ua here au ia ’outou ». ’A feruri na ē tē tāparu ra ’oia ia ’outou ’ia fa’aru’e i te haere’a o tē fa’atupu i te māuiui, ma te tītau manihini ia ’outou ’ia haere mai i rāpae i te pouri ’e ’ia fāriu i ni’a i tōna māramarama.

I roto i te pāroita a tā’u tamāhine ’o Carly, ’ua tūturi te hō’ē tahu’a ’āpī nō te ha’amaita’i i te ’ōro’a, ’aita rā ’oia i parau ē, « ’Ia rave rātou i te reira ma te ha’amana’o i te toto o tō Tamaiti », ’ua hape ’oia i te paraura’a, « ’Ia rave rātou i te reira ma te ha’amana’o i te here o tō Tamaiti ». ’Ua tahe te roimata i roto i te mata ’o Caryl i tōna ’itera’a i te parau mau o teie mau parau.

’Ua hina’aro tō tātou Fa’aora ’ia fa’a’oroma’i i te mauiui ’o Tōna Tāra’ehara nō te mea tē here nei ’Oia ia ’outou. Te parau mau, ’o ’outou te «’oa’oa tei fa’ata’ahia nōna » a ro’ohia ai ’oia i te mauiui.

Te tītaura’a manihini ’ia tātarahapa o te hō’ē ïa fa’a’itera’a nō te here o te Atua.

Te paraura’a ē, ’ē i taua tītaura’a ra, o te hō’ē ïa fa’a’itera’a nō tō tātou here.

’A feruri na i te hōho’a o te Mesia tā ’outou e au a’e. I teie nei, ’a feruri na iāna e ’ata’ata ra ma te ’oa’oa i te mau taime ato’a ’a fa’a’ohipa ai ’outou i Tāna ō, nō te mea ’o ’Oia «te vi’ivi’i ’ore hope roa o te ti’aturira’a. »

’Oia mau, e ’ere tō ’outou tātarahapa i te hopoi’a nō Iesu Mesia ; Tē ha’amāramarama nei te reira i tōna ’oa’oa !

E ha’api’i ana’e i te reira!

Nō te mea te tātarahapa o tā tātou ïa parau ’āpī maita’i a’e!

’Aita tātou e fa’aea noa i ni’a i te ’ē’a nō te fafaura’a ma te ’ore roa e rave i te hō’ē hape. E fa’aea noa tātou i ni’a i te ’ē’a nā roto i te tātarahapara’a i te mau mahana atoa.

E ’ia tātarahapa ana’e tātou, e fa’a’ore mai te Atua i tā tātou mau hara ma te fa’aha’amā ’ore ia tātou, ma te ’ore e fa’aau ia tātou i te tahi atu ta’ata, ’e ’aore rā, ma te ’ore e a’o ia tātou nō te mea hō’ē ā teie mea ’e te mea tā tātou i tātarahapa i te hepetoma i ma’iri a’e nei.

E ’oa’oa ’oia i te mau taime ato’a e ’ite ’oia ia tātou i ni’a i tō tātou mau turi. E ’oa’oa ’oia i te fa’a’ore i tā tātou hara nō te mea nōna, e mea ’oa’oa roa tātou !

’Aita anei ’outou e mana’o nei ē, e parau mau te reira?

Nō te aha ïa e mea fifi roa nō tātou ’ia ti’aturi ? !

Tē fa’a’ohipa nei ’o Satane, te ta’ata pari rahi ’e te ha’avare, i te ha’amā nō te fa’aātea ’ē ia tātou i te Atua. ’Ua riro te ha’amā ’ei pouri teimaha roa, mai te huru ra ē, ’ia tātara ’outou i te reira i rāpae i tō ’outou tino, e mea teimaha mau.

Te ha’amā o te reo ïa e tā’iri ia ’outou ’e e parau mai ē, «E aha tā ’oe e mana’o ra? » «’Ua manuïa anei ’outou i te hō’ē mea? »

’E’ita te ha’amā e fa’a’ite mai ia tātou ē, ua rave tātou i te hape; e parau mai te reira ia tātou ē, ’o tātou tā tātou mau hape. E nehenehe ato’a ’outou e fa’aro’o ē, «’A tāpuni. » Te rave nei te enemi i te mau mea ato’a tāna e nehenehe e rave nō te tāpe’a i te teimaha i roto, ma te parau mai ia tātou ē, e mea teitei roa te ho’o, ’e e mea ’ōhie a’e mai te mea ē, e vai noa te reira i roto i te pouri, ma te ’īriti i te ti’aturira’a ato’a.

’O Satane te ta’ata ’eiā i te ti’aturira’a.

E mea ti’a ia ’outou ’ia fa’aro’o i teie mau parau, nō reira, e parau vau i teie mau parau ma te reo pūai: E ’ere ’outou te reo i roto i tō ’outou upo’o, e ’aore rā, te mau hape tā ’outou i rave. E ti’a ia ’outou ’ia fa’ahiti ato’a paha i te reira ma te reo pūai. A parau ia Satane, «’Eiaha i teie mahana. » ’A tu’u iāna i muri ia ’outou.

’A ’ite i taua ’ana’anatae ra, te ’oto o te Atua ’o tē fa’afāriu atu ia ’outou i tō ’outou Fa’aora, ’e ’a hi’o maīte i tōna aroha i te tomora’a i roto i tō ’outou orara’a ’e i te orara’a o te feiā tā ’outou i here. Tē fafau nei au ia ’outou ē, i te taime iho ’a fa’a’ite ai tātou iāna ma te itoito i te hō’ē ’ā’au ’oto, tei reira iho ’oia.

’Ia ’ite ana’e ’outou i te hō’ē ta’ata tē paremo ra, ’e’ita anei ’outou e toro atu i te rima nō te fa’aora mai iāna? Tē feruri ra anei ’outou i tō ’outou Fa’aora i te pāto’ira’a i tō ’outou rima toro? Tē feruri nei au iāna tē ’ou’a ra i roto i te pape, ma te pou i raro a’e i te mau mea ato’a nō te huti mai ia tātou i ni’a ’ia ti’a ia tātou ’ia huti fa’ahou i te aho ! ’E’ita te hō’ē ta’ata e nehenehe e topa i raro atu i te vāhi e ’ana’ana ai te māramarama ’o te Mesia.

E mea ’ana’ana a’e te Fa’aora ē a muri noa atu i te pouri o te ha’amā. ’Eita roa atu ’oia e fa’a’ino i tō ’outou faufa’a. Nō reira, ha’apa’o maita’i.

• ’A feruri na ē, tē fa’ahōho’a ra teie rima i te faufa’ara’a.

• Tē fa’ahōho’a ra teie rima i te ha’apa’o. Penei a’e ’ua ara mai ’outou i teie po’ipo’i, ’ua pure i te hō’ē pure faufa’a, ’e ’ua mā’imi i te mau pāpa’ira’a mo’a nō te fa’aro’o i te reo ’o te Atua. ’Ua rave ’outou i te mau fa’aotira’a maita’i ’e te rave nei ’outou i te mau ta’ata e hā’ati ra ia ’outou mai te Mesia te huru. Te fa’aro’o ra ’outou i te ’āmuira’a rahi! Tei ’ō nei tō ’outou ha’apa’o!

• ’Aore rā ’aita paha te mau mea i tere maita’i roa. ’Aita i maoro a’enei, ’ua ’aro ’outou nō te rave i taua mau mea ha’iha’i roa ra nō te ha’afātata atu i te ra’i. ’Ua rave ’outou i te mau fa’a’otira’a ’o tā ’outou e ’ore e te’ote’o.

• Tei hea tō ’outou faufa’a? ’Ua ha’uti anei teie rima?

’Aita tō ’outou faufa’a i natihia i ni’a i te ha’apa’o. E mea vai tāmau noa tō ’outou faufa’a; ’e’ita roa’tu te reira e taui. ’Ua hōro’a mai te Atua i te reira ia ’outou, ’e ’aita e mea tā ’outou e ’aore ra tā te tahi atu ta’ata e nehenehe e rave nō te taui i te reira. E fa’atupu te ha’apa’o i te mau ha’amaita’ira’a; e parau mau te reira. E ’ere rā te faufa’a i te hō’ē tuha’a o te reira. E vai rahi noa tō ’outou faufa’a i mua i te Atua, » noa’tu ē, i hea tā ’outou mau fa’aotira’a i te arata’ira’a ’ia ’outou.

Noa atu tē rave nei au i te mau hape, tē hina’aro nei au e fa’aea noa i roto i te auta’atira’a fafauhia ’e te Mesia, ’e e fa’a’ite atu vau ia ’outou nō te aha.

’Ua pa’ari mai au ma te ha’api’i i te ’ōu’a pātia i roto i te pape, ’e ’ua ha’api’i mai au ē, ’ia nūmera ana’e te mau ta’ata hi’opo’a i te hō’ē ou’a pātia, ’e hi’o rātou i te huru o te ravera’a o te reira. E mea ’āfaro ti’a roa anei te ’ōu’ara’a, ’e e mea ’āfaro anei te mau manimani ’āvae ’e te tahi noa pahī pape na’ina’i? I muri iho, e rave rātou i te hō’ē ’ohipa faahiahia. E hi’opo’a rātou i te faito o te fifi.

E ’ōu’a te ta’ata tāta’itahi ’e tō rātou iho fāito o te fifi. ’O tō ’outou Fa’aora ana’e tei ’ite mau i te fifi tā ’outou e ’ōu’a nei. Tē hina’aro nei au i te hō’ē auta’atira’a ’e te hō’ē ta’ata ’o te ta’a iā’u, ’o tē ’ite i tō’u ’ā’au ’e tō’u tāmatara’a rahi !

’Ua ’ite ’oia tē topa nei te mau rūpehu o te pouri i ni’a ia tātou pā’āto’a te feiā rātere, ’e e haere tō tātou tere nā roto i te ’ānāvai repo, ’e nō reira, noa atu e tāpe’a tātou i te tāpū ’āuri, e pahīhia tātou i te pape.

Te haerera’a i te Mesia, o te paraura’a ïa ē,: «E ti’a anei ia ’oe ’ia taturu mai iā’u? » ma te ti’aturi, te ha’apāpūra’a i fa’a’itehia mai ē, tē fa’atoro tamau nei tōna nā rima ia ’outou. Tē ti’aturi nei au ē, te aura’a o teie mana’o ’āpī nō ni’a i te tātarahapa, ’oia ho’i, noa’tu ’aita tātou e ha’apa’o maita’i, tē tāmata nei rā tātou i te ha’apa’o i te here i teienei, ma te mā’iti i te fa’aea noa nō te mea tē here nei tātou iāna.

Tē ha’amana’o ra ānei ’outou i te nūna’a o te ari’i Beniamina ’o tei ’ore roa atu i hina’aro e rave i te ’ino, e rave tāmau noa rā i te maita’i ? I tō ’outou mana’o, ’ua ’ohi anei rātou i tō rātou mau fare ’ie, ’ua ho’i i te fare, ’e ’aita roa’tu i rave fa’ahou i te tahi atu hape? ’Aita roa’tu ! Te ta’a’ēra’a, ’aita rātou i hina’aro fa’ahou e rave i te hara. ’Ua fa’a’ite rātou i te ha’apa’ora’a here! ’Ua fāriu tō rātou māfatu i te Atua a ’aro ai rātou!

I te hō’ē taime, i te pae tahatai, ’ua ’ite au i te hō’ē manu e rere ra i roto i te mata’i, ma te tā’iri pūai i tōna mau pererau, ma te riaria roa, terā rā, te vai noa ra ’oia i te hō’ē vāhi. I muri iho, ’ua ’ite au i te tahi atu manu, i ni’a a’e. ’Ua haru mai ’oia i te hō’ē pape pu’e ’e ’ua tere ’ōhie noa ’oia ma te ’ore e ha’afifihia ’e te mata’i. O te ta’a’ēra’a ïa i rotopu i te tāmatara’a i te rave i te reira nā tātou iho ’e te fāriura’a’tu i tō tātou Fa’aora, ma te vaiiho iāna ’ia fa’ateitei ia tātou i ni’a ma te «fa’aora i roto i tōna mau pererau. »

’Ei mau ti’a fa’atere misiōni i Auteraria, i roto i tō mātou tere hope’a ’e te mau misiōnare tāta’itahi, ’ua paraparau mātou nō ni’a i te 3 Nephi 17, i reira te ta’ata i fatata ai i te Fa’aora ’e i fa’aro’o ai Iāna i te purera’a nō rātou. ’Ua ui atu mātou, « ’āhiri ē, ’ua ti’a ia ’oe ’ia fa’aro’o atu i te Fa’aora i te purera’a nō ’oe, i tō ’oe mana’o e aha tāna e parau ? »

Te fa’aro’ora’a i tā rātou mau pāhonora’a, ’o te hō’ē o te mau ’ohipa pae vārua rahi roa a’e o tō’u orara’a. E fa’aea teie mau misiōnare tāta’itahi ’e e ’ī tō rātou mata i te roimata ’a fa’aha’amana’o ai mātou ia rātou ē, «’Ua ’ite tō ’outou Fa’aora i te faito o te fifi tā ’outou e fa’aruru nei. » ’Ua ’ite ’oia i te reira! »

Teie tā teie nau misiōnare i parau marū mai ma te here : ’Ua parau mai hō’ē tuahine ē, « E parau Iesu i te Metua, ‘Te tāmata nei ’oia ma tōna maita’i ato’a. ’Ua ’ite au ē, tē tāmata ’ū’ana nei ’oia.’ » ’Ua parau te tahi misiōnare ē, « Tē ’oa’oa nei au iāna nō te mau mea ato’a tei tupu i roto i tōna orara’a ».

E tāmata ana’e tātou i te reira. I teie pō, hou a pure ai ’outou, a feruri ē, tei pīha’i iho noa Iesu Mesia. ’O ’Oia tō tātou pāruru i mua i te Metua. ’A ui ia ’outou iho, «e aha rā ïa tā tō’u Fa’aora e parau i te Metua nō ni’a iā’u? »

I muri iho, a fa’aea noa ma te mū ore.

’A fa’aro’o i terā reo ’ia parau i te mau mea maita’i nō ni’a ia ’outou—te reo o te Fa’aora, tō ’outou hoa maita’i roa a’e, ’e tō ’outou Metua i te ra’i ra, tei reira mau ’oia. ’A ha’amana’o, tō rāua here ’e tō ’outou ti’amā e mau mea rahi ïa, noa atu te huru.

Tē ti’a nei au i ’ō nei nō te fa’a’ite pāpū ē, tē hōro’a nei Iesu Mesia i te māramarama i te feiā e pārahi nei i roto i te pouri. Nō reira, i taua mau mahana ra ’ia fa’aro’o ana’e ’outou i terā reo ’ia parau mai ia ’outou ’ia tāpuni, ’ia tāpuni ’outou i roto i te hō’ē piha pouri, tē tītau nei au ia ’outou ’ia fa’aitoito ’e ’ia ti’aturi i te Mesia ! Haere i mua ’e ’a fa’a’ama i te mōrī—tō tātou ti’aturira’a i te vi’ivi’i ’ore hope roa.

Ma te hā’atihia i tōna māramarama, e ’ite ’outou ’ati a’e ia ’outou i te mau ta’ata tei feruri ē, ’o rātou ana’e, i teie nei rā, i roto i te māramarama e uiui ’outou ’e ’o rātou ia ’outou iho ē, « nō te aha tātou i ri’ari’a roa ai i roto i te pouri ? ’E nō te aha tātou e fa’aea maoro ai i reira? »

«E ti’a anei i te Fatu o te mau māramarama ’ia hā’ati ia ’outou i roto i tōna nā rima ’e ’ia tāmarū ’e ’ia here tāmau noa ia ’outou. » E ti’a ānei ia tātou ’ia here iāna ’e ’ia mā’iti tāmau noa iāna. Nā roto i te i’oa ’o Iesu Mesia, ’āmene.