ទទួលយកអំណោយរបស់ទ្រង់

ដោយអែលឌើរ ផាទ្រីក ខៀរ៉ុន

ក្នុងកូរ៉ុមនៃពួកសាវកដប់ពីរនាក់

បងប្អូនជាបុត្រីជាទីស្រឡាញ់របស់ព្រះ បងប្អូនជាបុត្រាជាទីស្រឡាញ់របស់ព្រះ ហើយទ្រង់បានប្រទានអំណោយឲ្យដល់បងប្អូន គឺជាព្រះរាជបុត្រាដ៏វិសុទ្ធដ៏ឥតខ្ចោះរបស់ទ្រង់ ។

ការផ្ដល់អំណោយទាន

ការផ្ដល់អំណោយគឺជាទំនៀមទម្លាប់សង្គមមួយដែលរីកសុះសាយនៅគ្រប់វប្បធម៌ អរិយធម៌ និងសហស្សវត្សរ៍ ។ នៅគ្រប់សម័យកាល មនុស្សបានផ្ដល់អំណោយដល់គ្នាទៅវិញទៅមកដើម្បីពង្រឹងទំនាក់ទំនង បង្ហាញសេចក្តីស្រឡាញ់ និងអំណរគុណ និងបង្ហាញនូវព្រឹត្តិការណ៍សំខាន់ៗដូចជា អាពាហ៍ពិពាហ៍ ថ្ងៃខួបកំណើត និងបុណ្យឈប់សម្រាក ។ ហើយមនុស្សមិនគ្រាន់តែជាការបង្កបង្កើតតែមួយគត់របស់ព្រះ ដែលផ្ដល់អំណោយឲ្យគ្នាទៅវិញទៅមកនោះឡើយ ! ក្នុងចំណោមឧទាហរណ៍ជាច្រើន យើងអាចលើកឡើងពីសត្វភេនឃ្វីនត្រូវបានគេដឹងថា វាចេះឲ្យដុំក្រួសថ្លាៗទៅឲ្យដៃគូអនាគតដែលវាពេញចិត្ត សត្វស្វាបូនូបូស ( បងប្អូនជីដូនមួយរបស់សត្វស្វាឪ ) ឲ្យផ្លែឈើដើម្បីពង្រឹងរង្វង់មិត្តភាពរបស់ពួកវា ។

តើបងប្អូនបានឲ្យអំណោយអ្វី ? សូមគិតពីគ្រាមួយជាពេលដែលបងប្អូនបានរកឃើញ—ឬបានធ្វើ—អំណោយដ៏ឥតខ្ចោះសម្រាប់នរណាម្នាក់ដែលបងប្អូនស្រឡាញ់ ។ បងប្អូនបានដឹងហើយថា អំណោយគឺជាអ្វីដែលមនុស្សជាទីស្រឡាញ់នេះចង់បាន និងជាអ្វីដែលបងប្អូនឲ្យតម្លៃ ។ តើអំណោយនោះគឺជាអ្វី ? តើវាសម្រាប់ម្តាយរបស់បងប្អូនឬ ? សម្រាប់មិត្តភក្តិឬ ? សម្រាប់កូនរបស់បងប្អូនឬ ? សម្រាប់អ្នកគ្រូលោកគ្រូឬ ? សម្រាប់ជីតារបស់បងប្អូនឬ ? តើបងប្អូនមានអារម្មណ៍យ៉ាងណា នៅពេលបងប្អូនបានរកឃើញអំណោយនេះ ? តើបងប្អូនមានអារម្មណ៏បែបណា នៅពេលដែលបងប្អូនបានគិតអំពីបុគ្គលដែលបងប្អូនស្រឡាញ់រូបនេះ បើកមើលអំណោយ ? ស្រដៀងគ្នានេះដែរ តើនៅពេលណាដែលនរណាម្នាក់ឲ្យ បងប្អូន នូវអំណោយដ៏ឥតខ្ចោះ ហើយតើវាមានអារម្មណ៍យ៉ាងណាដើម្បីទទួលអំណោយនេះ ?

អំណោយឪពុករបស់ខ្ញុំឲ្យមកខ្ញុំ

នៅពេលខ្ញុំមានអាយុប្រហែលប្រាំពីរឆ្នាំកំពុងរស់នៅជាមួយឪពុកម្តាយរបស់ខ្ញុំនៅប្រទេសអារ៉ាប់ ខ្សែភាពយន្តរបស់កុមារមួយមានចំណងជើងថា Chitty Chitty Bang Bang បានចេញផ្សាយ ។ ខ្សែភាពយន្តនេះគឺនិយាយអំពីឡានវេទមន្តដែលអាចបើកដោយខ្លួនឯង អណ្តែតនៅលើទឹក ហើយថែមទាំងអាចហោះបានទៀតផង ! ខ្ញុំបានដឹងថានៅស្រុកកំណើតប្រទេសអង់គ្លេសរបស់ខ្ញុំ គេបានបង្កើតឡានក្មេងលេងតូចមួយគឺដូចជា Chitty Chitty Bang Bang ។ ឱ ! ខ្ញុំពិតជាចង់បានឡាននោះណាស់ ! យើងអាចទាញចង្កឹះលេខ ហើយស្លាបរបស់ឡាននឹងបើកឡើង ! ឪពុករបស់ខ្ញុំបានទៅប្រទេសអង់គ្លេសដើម្បីធ្វើការងាររបស់គាត់ ហើយបានសួរខ្ញុំបើខ្ញុំចង់ឲ្យគាត់ទិញអ្វីផ្ញើដែរឬទេ ហើយខ្ញុំបានជម្រាបគាត់ថាខ្ញុំពិតជាចង់បានឡាន Chitty Chitty Bang Bang ខ្លាំងប៉ុនណា ។

គាត់បានត្រឡប់មកវិញ ហើយពុំមានឃើញឡាននោះទេ ។ ខ្ញុំសោកស្ដាយជាខ្លាំង ហើយគិតថាគាត់ច្បាស់ជាភ្លេចហើយ ។ ប៉ុន្តែប្រហែលជា ១០ថ្ងៃក្រោយមក គឺដល់ថ្ងៃកំណើតរបស់ខ្ញុំ កញ្ចប់តូចមួយដែលបានរុំយ៉ាងស្អាត បានកំពុងរង់ចាំខ្ញុំ ។ ដោយមានចិត្តអន្ទះសាជាខ្លាំង ហើយមិនហានស្រមៃខ្លាំងពេក ខ្ញុំបានបើកអំណោយនោះ ហើយបានឃើញឡានរបស់ខ្ញុំ ។ ខ្ញុំមានចិត្តសប្បាយជាខ្លាំងរហូតដល់ស្រក់ទឹកភ្នែក ។ ខ្ញុំបានទាញចង្កឹះលេខ ហើយស្លាបឡានបានបើកឡើង គឺដូចជាឡាននៅក្នុងខ្សែភាពយន្តនោះអ៊ីចឹង ! ខ្ញុំបានអរគុណដល់ឪពុកខ្ញុំជាខ្លាំងសម្រាប់អំណោយដ៏មានតម្លៃបំផុតនេះ ។ ខ្ញុំបានលេងឡាននោះអស់ជាច្រើនឆ្នាំ ហើយបានរក្សាវាទុកជាច្រើនឆ្នាំទៀត ។ ខ្ញុំគិតថា ប៉ាខ្ញុំពេញចិត្តឲ្យឡាននោះមកខ្ញុំណាស់ យ៉ាងហោចណាស់ស្មើទំហំដែលខ្ញុំពេញចិត្តនឹងទទួលឡាននោះដែរ ។

ការជូន ការទទួលយក និងការបើក ព្រមទាំងការទទួលបាន

យើងអាចគិតអំពីការឲ្យអំណោយមានបីផ្នែកនៅក្នុងនោះ ៖

ការជូន អំណោយ ដែលម្ចាស់អំណោយជ្រើសរើស ធ្វើ ឬរៀបចំ ហើយឲ្យទៅមនុស្សជាទីស្រឡាញ់ ។ ការណ៍នេះទាក់ទងនឹងចេតនាប្រកបដោយការគិតរបស់អ្នកផ្ដល់ឲ្យ ដើម្បីផ្ដល់ឲ្យអ្វីមួយដែលមានអត្ថន័យ ។
ការទទួលយក និង ការបើកអំណោយ កើតឡើងនៅពេលអ្នកទទួលយកពីម្ចាស់អំណោយ ជាញឹកញាប់ជាមួយនឹងការបង្ហាញនូវអារម្មណ៍ភ្ញាក់ផ្អើល អំណរគុណ និងក្តីរំភើប—មុនពេលបើកអំណោយនោះ ដោយការស្រាយខ្សែបូ និងបើកកាដូដើម្បីមើលថាតើអំណោយនោះជាអ្វី ។
ហើយប្រហែលមកទៀត ផ្នែកដ៏សំខាន់បំផុតគឺ ការទទួលបាន អំណោយ ។ ដើម្បីទទួលអំណោយដ៏ស្មោះត្រង់គឺលើសពីការទទួលយក ហើយបន្ទាប់មកបើកវា ។ វាលើសពីការទទួលស្គាល់តម្លៃនៃអំណោយ និងបង្ហាញពីការដឹងគុណចំពោះម្ចាស់អំណោយ ។ ដើម្បីទទួលបានអំណោយ យើងត្រូវឲ្យតម្លៃអំណោយនោះសម្រាប់ខ្លួនយើងប្រើប្រាស់វាឲ្យបានពេញលេញនៅក្នុងជីវិតរបស់យើង ហើយចងចាំដោយអំណរគុណដល់ម្ចាស់អំណោយ ។

ការទទួលអំណោយមិនមែនជាទង្វើអកម្មនោះទេ ប៉ុន្តែវាគឺជាដំណើរការប្រកបដោយគោលបំណង និងប្រកបដោយអត្ថន័យ ដែលវាលើសពីការបើកកាដូធម្មតា ។ ការទទួលគឺដើម្បីអរគុណ និងភ្ជាប់ទាំងអំណោយព្រមទាំងបេះដូងរបស់ម្ចាស់អំណោយ ក្នុងរបៀបមួយដែលពង្រឹងចំណងរវាងម្ចាស់អំណោយ និងអ្នកទទួល ។ សូមគិតពីឡានក្មេងលេងដែលនាំមកនូវអនុស្សាវរីយ៍ដ៏ល្អ ដែលធ្វើឲ្យខ្ញុំទទួលអារម្មណ៍ជាថ្មីម្តងទៀតនូវសេចក្តីស្រឡាញ់ និងការយកចិត្តទុកដាក់ដ៏ជ្រាលជ្រៅរបស់ឪពុកខ្ញុំចំពោះខ្ញុំ ដែលតំណាងដោយអំណោយនោះ និងទង្វើដ៏សប្បុរសមិនអាចផ្ទឹមបាន ។

អំណោយរបស់ព្រះវរបិតាសួគ៌របស់យើង

ព្រះវរបិតាសួគ៌ របស់យើងមានអំណោយនៃពន្លឺ និងសេចក្តីពិតដ៏រាប់មិនអស់ដែលបានរៀបចំដើម្បីប្រទានមកដល់យើងម្នាក់ៗ ដែលជាបុត្រាបុត្រីដ៏មានតម្លៃរបស់ទ្រង់ ។ អំណោយទាំងនោះហូរមកពីអង្គជាម្ចាស់អំណោយដ៏សប្បុរស ដូចជាអណ្ដូងទឹកនៅក្នុងទីរហោស្ថាន ចេញពីដួងចិត្តដ៏សប្បុរសរបស់ទ្រង់ ។ « គ្រប់ទាំងរបស់ដ៏ល្អ ដែលព្រះប្រទានមក និងអស់ទាំងអំណោយទានដ៏គ្រប់លក្ខណ៍ នោះសុទ្ធតែមកពីស្ថានលើ គឺមកពីព្រះវរបិតានៃពន្លឺ » ។ នៅក្នុងសេចក្តីសញ្ញាដែលបានចងជាមួយព្រះវរបិតា ទ្រង់គឺជាអង្គម្ចាស់អំណោយដ៏និរន្តរ៍ ហើយយើងជាអ្នកទទួលដ៏បន្ទាបខ្លួន ។

អំណោយដ៏មហិមាបំផុតនៃអំណោយរបស់ព្រះវរបិតាដែលអំណោយផ្សេងទៀតទាំងអស់នឹងអាចមាន

ប៉ុន្តែយើងមិនអាចទទួលអ្វីទាំងអស់ បើគ្មានអំណោយដ៏មហិមាជាងគេបំផុតរបស់ព្រះវរបិតា គឺជាអំណោយនៃកូនចៀមសំណព្វរបស់ទ្រង់ ជាព្រះរាជបុត្រាទ្រង់ គឺព្រះយេស៊ូវគ្រីស្ទ ។ អំណោយទាំងអស់របស់ព្រះវរបិតាកើតមានមក ហើយត្រូវបានសម្រេចដោយការស្ម័គ្រព្រះទ័យរបស់ព្រះអង្គសង្រ្គោះថ្វាយនៅក្នុងសួនច្បារគែតសេម៉ានី និងនៅលើឈើឆ្កាង និងការឈ្នះលើការមានព្រះជន្មរស់ឡើងវិញរបស់ទ្រង់ ។ ព្រះយេស៊ូវគ្រីស្ទដែលជាព្រះប្រោសលោះដ៏ប្រកបដោយមេត្តាករុណា គឺជាអំណោយដ៏ធំបំផុតមកពីព្រះវរបិតានៃពន្លឺរបស់យើង ។ « ដោយអំណោយនៃព្រះរាជបុត្រារបស់ទ្រង់ នោះព្រះទ្រង់បានរៀបចំផ្លូវមួយ[ សម្រាប់យើង ]ដ៏ប្រសើរលើសលែងទៅទៀត » ។

អំណោយមួយដែលគ្របដណ្ដប់គ្រប់ទាំងសេចក្តីពិតដ៏នៅអស់កល្បជានិច្ច

ខ្ញុំចង់និយាយអំពី អំណោយមួយដែលគ្របដណ្ដប់គ្រប់ទាំងសេចក្តីពិតដ៏នៅអស់កល្បជានិច្ច ដែលគាំទ្រដល់សមត្ថភាពរបស់យើងក្នុងការទទួលបានអ្វីៗផ្សេងទៀត ដែលព្រះវរបិតាយើងចង់ប្រទានឲ្យយើង—គឺជាអំណោយដ៏សំខាន់នៃចំណេះដឹងដែលនៅពេលយល់ព្រមទទួលនិងទទួលយកយ៉ាងជ្រៅពេញលេញទៅក្នុងព្រលឹងផ្ដល់ឲ្យនូវអំណរ និងសម្រាលការលំបាកនៃជីវិត ហើយឆ្លើយសំណួរដែលមិនមានចម្លើយរបស់យើង ៖ គឺថា យើងពិតជាបុត្រាបុត្រីរបស់ព្រះប្រាកដមែន សេចក្តីពិតនោះ គួរឲ្យភ្ញាក់ផ្អើលណាស់ ! អស្ចារ្យណាស់ ! ហើយសេចក្តីពិតនេះគឺ ការពិត ។

សូមស្រមៃថា បងប្អូនកំពុងស្តាប់ឮការណ៍នេះជាលើកដំបូង ។ បងប្អូនគឺពិតជាបុត្រីជាទីស្រឡាញ់របស់ទ្រង់មែន ។ បងប្អូនគឺពិតជាបុត្រាដ៏មានតម្លៃរបស់ទ្រង់ ។ ហើយផ្លូវដែលបងប្អូនកំពុងដើរនេះគឺជាផែនការនៃសុភមង្គលរបស់ទ្រង់ ។ ដោយក្តីស្រឡាញ់ដ៏ឥតខ្ចោះរបស់ទ្រង់ ទ្រង់ជ្រាបដឹងយ៉ាងជាក់ថាបងប្អូនជានរណា ពីមុនបងប្អូនត្រូវបានបញ្ជូនមកកាន់ផែនដីនេះ ហើយជ្រាបពីអ្វីដែលបងប្អូនជួបប្រទះកន្លងមកនៅក្នុងជីវិតរមែងស្លាប់របស់បងប្អូន ហើយទ្រង់មានផែនការពេញដោយក្តីមេត្តាករុណាសម្រាប់ថ្ងៃនីមួយៗរបស់បងប្អូន ។ ឱ ទ្រង់ពិតជាចង់ឲ្យបងប្អូនត្រឡប់ទៅរកទ្រង់វិញនៅថ្ងៃណាមួយខ្លាំងណាស់ ដើម្បីទទួលគោលបំណងដ៏ខ្ពង់ខ្ពស់បំផុតនៃអំណោយដ៏ស្រស់ស្អាតរបស់ទ្រង់គឺជីវិតដ៏នៅអស់កល្បជានិច្ចជាមួយទ្រង់ ។

សំណួរនោះគឺមិនថាអំណោយនៃសេចក្តីពិតនេះពិតឬអត់នោះទេ ប៉ុន្តែថាតើយើងនឹងស្វែងរក ហើយទទួលយកវាឬអត់ ។ ព្រះវរបិតាបានប្រទានអំណោយនេះមកដល់យើងទៅហើយ ។ ព្រះអង្គសង្រ្គោះបានបង់ថ្លៃសម្រាប់គោលបំណងដ៏ធំនៃអំណោយនោះរួចទៅហើយ ។ ប៉ុន្តែប្រសិនបើបងប្អូនបានបង្រៀន បាននិយាយ បានច្រៀងពីសេចក្តីពិតនេះអស់ជាច្រើនឆ្នាំ ប្រហែលជា ភាពអស្ចារ្យ របស់វាបានរសាត់អស់ជាយូរមកហើយ ហើយបងប្អូនលែងទទួលអារម្មណ៍នៃអំណាច និងសេចក្តី សុខសាន្តរបស់សេចក្តីពិតនេះទៀតហើយ ។

ប្រសិនបើអំណោយដ៏មិនអាចកាត់ថ្លៃបាននៃការយល់ដឹងនេះ—និងសេចក្តីល្អ សេចក្តីសុខសាន្ត និងសេចក្តីសង្ឃឹមទាំងអស់ដែលហូរមកពីទ្រង់—ត្រូវបានទុកចោលមិនទទួលយក មិនបើក និងមិនទទួលបាន នោះវាជាការខាតបង់ខ្លាំងណាស់ ! ជាការគួរឲ្យសោកសៅសម្រាប់អង្គដែលជាម្ចាស់អំណោយណាស់ ! « ដ្បិតតើមានប្រយោជន៍អ្វីដល់មនុស្ស បើសិនជាបានប្រទានអំណោយទានមកលើគេ ហើយគេពុំទទួលយកអំណោយទានសោះ ? មើលចុះ អ្នកនោះពុំត្រេកអរចំពោះអ្វីដែលបានប្រទានដល់គេ ឬក៏ត្រេកអរចំពោះម្ចាស់ដែលប្រទានអំណោយទាននោះដែរ » ។

ខ្ញុំសូមអញ្ជើញបងប្អូនឲ្យទទួលយកមិនថាជាលើកដំបូង ឬក្នុងកម្រិតដ៏ធំជាងពេលមុនៗ គឺការដឹងដ៏អស្ចារ្យថា បងប្អូនពិតជាបុត្រជាទីស្រឡាញ់របស់ព្រះប្រាកដមែន ។ បងប្អូនត្រូវតែស្រាយខ្សែបូ ហែកក្រដាសរុំកាដូ បើកប្រអប់ និងទទួលយកដោយសកម្មដោយនូវការបន្ទាបខ្លួនដ៏មានអំណរគុណ ចំពោះការយល់ដឹងដ៏បរិសុទ្ធនៃសេចក្តីពិតជាមូលដ្ឋាននេះ ។ ព្រះវិញ្ញាណបរិសុទ្ធអាចធ្វើសាក្សីក្នុងដួងចិត្តបងប្អូនថា បងប្អូនពិតជាបុត្ររបស់ព្រះដ៏ខ្ពស់បំផុត ។

នៅពេលបងប្អូនស្វាគមន៍ចំពោះការពិតដ៏អស្ចារ្យនេះចូលទៅក្នុងព្រលឹងរបស់បងប្អូន ហើយទទួលអារម្មណ៏លួងលោមផង និងក្តីរំភើបផង នោះទស្សនវិស័យទាំងមូលរបស់បងប្អូននឹងផ្លាស់ប្តូរ ! បងប្អូនអាចទទួលអារម្មណ៏នូវក្តីស្រឡាញ់របស់ទ្រង់ ស្តាប់ឮព្រះសូរសៀងរបស់ទ្រង់ ហើយព្រះហស្តរបស់ទ្រង់ មិនថាមានអ្វីកើតឡើង ឬមិនកើតឡើងនៅក្នុងជីវិតរបស់បងប្អូនក្តី ។ បងប្អូនអាចធ្វើការកំណត់ឡើងវិញនូវរបៀបដែលបងប្អូនមើលឃើញខ្លួនឯង និងអ្នកដទៃយ៉ាងដូចម្ដេច ? សេចក្តីសញ្ញារបស់បងប្អូនចងភ្ជាប់នឹងព្រះអង្គសង្រ្គោះរបស់បងប្អូនធ្វើឲ្យបងប្អូនកាន់តែរឹងមាំ ហើយតាមរយៈទិដ្ឋភាពនៃអំណោយដ៏ផ្អែមល្ហែមនេះ នោះជិវីតនឹងនាំទៅរកភាពភ្លឺថ្លា ស្រស់ស្អាត និងក្តីសង្ឃឹមថ្មី ។

សូមបងប្អូនអធិស្ឋានដើម្បីដឹងថាតើបងប្អូនពិតជាទទួលបានចំណេះដឹងនៃការផ្លាស់ប្តូរនេះជ្រៅទៅក្នុងព្រលឹងរបស់បងប្អូនបានដែរឬទេ ? តើបងប្អូននឹងទទួលយកអំណោយនេះដែរឬទេ ? តើបងប្អូននឹងធ្វើដូច្នេះឲ្យកាន់តែស៊ីជម្រៅ កាន់តែសេរី កាន់តែសម្បូរបែបជាងអ្វីដែលបងប្អូនធ្លាប់មានពីមុនមក ហើយដោយការធ្វើដូច្នេះនឹងទទួលបាននូវអំណោយយ៉ាងហូរហៀរផ្សេងៗទៀតដែរឬទេ ?

ការទទួលបានអំណោយនៃសេចក្តីពិតដ៏នៅអស់កល្បជានិច្ច

បងប្អូនអាចជាងឿងឆ្ងល់ថា « តើខ្ញុំត្រូវ ធ្វើ អ្វីដើម្បីទទួលបានអំណោយនេះពីព្រះ ? តាមពិត មិនបាច់ធ្វើអ្វីសោះ ។ វាជាអំណោយមកពីម្ចាស់អំណោយ ។ វាជាការពិតដ៏សាមញ្ញប៉ុណ្ណោះ ។ គ្រាន់តែយកវាទៅ ។ បងប្អូន គឺជា បុត្ររបស់ទ្រង់ ។ បងប្អូនគឺជាទីសំណព្វរបស់ទ្រង់ ។ សូមកុំធ្វើឲ្យវាពិបាក ។ សូមកុំបង្ខាំងការទទួលអំណោយនេះដោយនូវគំនិតថា បងប្អូនមិនសក្តិសមនឹងទទួលយកវាទេ ។ ការពិតនោះគឺថា គ្មានយើងណាម្នាក់« សក្តិសមទទួលនោះទេ »—អំណោយទាំងអស់របស់ព្រះវរបិតាទទួលបានតែតាមរយៈបុណ្យគុណ សេចក្តីមេត្តាករុណា និងព្រះគុណនៃព្រះមែស៊ីដ៏បរិសុទ្ធប៉ុណ្ណោះ, ប៉ុន្តែ ឱ ព្រះទ័យដ៏សប្បុរសរបស់ទ្រង់ចង់ឲ្យបុត្រាបុត្រីរបស់ទ្រង់ម្នាក់ៗទទួលយកវាជាយូរមកហើយ ។ បន្ទាប់មក នៅពេលដែលបងប្អូនទទួលបានការបំភ្លឺនូវការយល់ដឹងថ្មី ឬសាជាថ្មីម្តងទៀតមកលើបងប្អូន សូមអររីករាយក្នុងការដឹងគុណចំពោះម្ចាស់អំណោយនោះ ។

ចាប់តាំងពីការរកឃើញសេចក្តីជំនឿរបស់ខ្ញុំក្នុងវ័យអាយុ ២០ឆ្នាំជាង ខ្ញុំបានដឹងច្បាស់ពីការពិត ដែលថាខ្ញុំគឺពិតជាបុត្រារបស់ព្រះ ។ កាលណាខ្ញុំឱបក្រសោបអំណោយនេះកាន់តែពេញលេញប៉ុនណា នោះខ្ញុំកាន់តែដឹងយ៉ាងមុតមាំថា ខ្ញុំជានរណា និងរបៀបដែលខ្ញុំបានទទួលសេចក្តីស្រឡាញ់ដ៏ពេញលេញប៉ុនណា ។ រឿងមួយចំនួនដែលបានជួយខ្ញុំឲ្យរីកចម្រើនក្នុងការយល់ដឹង គឺជាព្រះបន្ទូលនៅក្នុងព្រះគម្ពីរ ពររបស់លោកអយ្យកោ ការថ្វាយបង្គំនៅក្នុងព្រះវិហារបរិសុទ្ធ ការបម្រើអ្នកដទៃ បង្ហាញពីការដឹងគុណ និងការអធិស្ថានដ៏ពិសិដ្ឋទៅកាន់ព្រះវរបិតា ។ ខ្ញុំងឿងឆ្ងល់ចំពោះរបៀបដែលភាពសោកសៅ ការឈឺចាប់ និងទុក្ខព្រួយពីមុននៅក្នុងជីវិតខ្ញុំ ត្រូវបានកំណត់ ធ្វើឲ្យស្ងប់សុខ និងយកឈ្នះ កាលខ្ញុំបានដឹងសេចក្តីពិតដ៏ស្រស់ស្អាតនេះ ។

មករកព្រះគ្រីស្ទ ហើយទទួលយក

មរ៉ូណៃបានដាស់តឿនយើង « កុំបដិសេធអំណោយទានទាំងឡាយនៃព្រះ » ប៉ុន្តែឲ្យ « មករកព្រះគ្រីស្ទ ហើយចូរយកនូវអំណោយទានដ៏ល្អទាំងអស់ » ។ បងប្អូនអាចមករកព្រះគ្រីស្ទដោយទំនុកចិត្តលើសេចក្តីសប្បុរសរបស់ទ្រង់ ហើយទទួលអំណោយទាំងអស់នៃអំណរ សេចក្តីសុខសាន្ត ក្តីសង្ឃឹម ពន្លឺ សេចក្តីពិត វិវរណៈ ចំណេះដឹង និងប្រាជ្ញា—ដោយមានទំនុកចិត្ត លាតដៃ ហើយលាដៃរបស់បងប្អូនជាស្រេចដើម្បីទទួល ។ ហើយបងប្អូនអាចទទួលបានអំណោយទាំងនេះ ដោយសារបងប្អូនការពារ និងចាក់គ្រឹះនៅក្នុងចំណេះដឹងថា បងប្អូនជាបុត្រីជាទីស្រឡាញ់របស់ព្រះ បងប្អូនគឺជាបុត្រាជាទីស្រឡាញ់របស់ព្រះ ហើយទ្រង់បានប្រទានអំណោយដល់បងប្អូននូវព្រះរាជបុត្រាដ៏វិសុទ្ធដ៏ឥតខ្ចោះរបស់ទ្រង់ ដើម្បីប្រោសលោះបងប្អូន រាប់ជាសុចរិត និងញែកបងប្អូនជាបរិសុទ្ធ ។

បងប្អូន ជា កូនរបស់ព្រះ ។ នេះពុំមែនគ្រាន់តែជាចម្រៀងដ៏ពិរោះ ដែលយើងច្រៀងទេ ។ តើបងប្អូននឹងព្រមទទួល បើក ហើយទទួលយកអំណោយនៃចំណេះដឹង និងការយល់ដឹងនេះពីទ្រង់ដែរឬទេ ? តើបងប្អូននឹងថែរក្សាឲ្យខ្ជាប់ខ្ជួនទុកវាដូចជាកំណប់ដ៏មានតម្លៃបំផុតដែរឬទេ ? សូមទទួលយកអំណោយនេះម្តងទៀត ឬប្រហែលពិតជាទទួលអំណោយនេះជាលើកដំបូងក្តី នោះសូមអនុញ្ញាតឲ្យវាផ្លាស់ប្តូរគ្រប់ទិដ្ឋភាពនៃជីវិតបងប្អូន ។ នេះគឺជារបៀបដ៏ឥតខ្ចោះដែលព្រះបានរៀបចំសម្រាប់បងប្អូន តាមរយៈអំណោយនៃព្រះរាជបុត្រារបស់ទ្រង់ ។ មានបងប្អូន ដើម្បីឲ្យបងប្អូនមានសេចក្ដីអំណរ ! នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។