ការប្រែចិត្តរបស់បងប្អូនមិនមែនជាបន្ទុករបស់ព្រះយេស៊ូវគ្រីស្ទទេ វាធ្វើឲ្យទ្រង់រីករាយ
ការអញ្ជើញឲ្យប្រែចិត្តគឺជាការបង្ហាញនៃសេចក្តីស្រឡាញ់របស់ព្រះ ។ ការនិយាយថា បាទ ឬចាស ចំពោះការអញ្ជើញនោះគឺជាការបង្ហាញរបស់យើង ។
ប៉ុន្មានឆ្នាំមុន ពេលធ្វើដំណើរទៅរដ្ឋផ្លរីដា ខ្ញុំបានអង្គុយនៅខាងក្រៅអានសៀវភៅមួយ ។ ចំណងជើងសៀវភៅនេះផ្ដល់ជាគំនិតថា ទោះបីជាយើងមិនល្អឥតខ្ចោះក៏ដោយ យើងនឹងនៅតែអាចទៅស្ថានសួគ៌បានដែរ ។ ស្ត្រីម្នាក់ដែលដើរកាត់នោះសួរថា « តើបងគិតថាវាអាចទៅរួចទេ ? »
ខ្ញុំងើយមុខឡើង ដោយងឿងឆ្ងល់ ហើយបន្ទាប់មកទើបដឹងថា គាត់កំពុងនិយាយអំពីសៀវភៅដែលខ្ញុំកំពុងអាន ។ ខ្ញុំបាននិយាយអ្វីមួយដែលគួរឲ្យអស់សំណើចថា « តាមពិត ខ្ញុំទើបតែអានវាមិនទាន់បានច្រើនទេ តែខ្ញុំនឹងប្រាប់ប្អូនអំពីចុងបញ្ចប់ក្នុងសៀវភៅនេះ » ។
ឱ ខ្ញុំប្រាថ្នាថា ខ្ញុំអាចធ្វើដំណើរត្រឡប់ទៅពេលវេលានោះវិញ ! នោះខ្ញុំនឹងប្រាប់នាង « ចាស វាអាចទៅរួច ! ព្រោះស្ថានសួគ៌មិនមែនសម្រាប់តែមនុស្សដែលឥតខ្ចោះនោះទេ វាសម្រាប់អ្នកដែលបានទទួលការអភ័យទោស អ្នកដែលជ្រើសរើសព្រះគ្រីស្ទម្តងហើយម្តងទៀត » ។
ថ្ងៃនេះ ខ្ញុំចង់និយាយទៅកាន់បងប្អូនដែលពេលខ្លះមានអារម្មណ៍ថា « ការប្រែចិត្ត និងការអភ័យទោសហាក់ដូចជាអាចធ្វើបានតែចំពោះមនុស្សគ្រប់គ្នា តែមិនចំពោះខ្ញុំនោះទេ » ។ ចំពោះអស់អ្នកដែលងឿងឆ្ងល់រឿងនេះដោយស្ងាត់ៗថា « ដោយសារខ្ញុំបានធ្វើកំហុសដដែលៗ ប្រហែលខ្ញុំនឹងបន្ដនៅអ៊ីចឹងហើយ » ។ ចំពោះអស់អ្នកដែលដូចជាខ្ញុំ ដែលនៅថ្ងៃខ្លះការរក្សាសេចក្តីសញ្ញាពិបាកដូចជាការឡើងភ្នំដែលចោតដូច្នោះដែរ !
អ្នកផ្សព្វផ្សាយសាសនាដ៏ល្អម្នាក់នៅប្រទេសអូស្ដ្រាលី ដែលមានឈ្មោះថា អែលឌើរ ហ្គេងហ្គា មកពីហ្វីជី បានចែកចាយអារម្មណ៍ស្រដៀងគ្នានេះនៅក្នុងកម្មវិធីថ្លែងទីបន្ទាល់ពេលបញ្ចប់បេសកកម្ម ៖ « ខ្ញុំដឹងថា ព្រះស្រឡាញ់ខ្ញុំ ប៉ុន្តែពេលខ្លះខ្ញុំងឿងឆ្ងល់ថា ‹ តើព្រះជ្រាបដឹងថា ខ្ញុំស្រឡាញ់ទ្រង់ដែរឬទេ ? › ព្រោះខ្ញុំមិនឥតខ្ចោះទេ ហើយខ្ញុំនៅតែធ្វើកំហុស » ។
នៅក្នុងសំណួរដែលបង្ហាញពីអារម្មណ៍ពិតនោះ អែលឌើរ ហ្គេងហ្គា បានសង្ខេបដូចនឹងអ្វីដែលខ្ញុំមានការព្រួយបារម្ភជាញឹកញាប់បេះបិត ។ ប្រហែលជាបងប្អូនក៏កំពុងងឿងឆ្ងល់ផងដែរ ដោយគិតថា « ខ្ញុំកំពុងព្យាយាមយ៉ាងខ្លាំង ប៉ុន្តែតើព្រះជ្រាបដឹងថា ខ្ញុំពិតជាព្យាយាមដែរឬទេ ? នៅពេលខ្ញុំបន្តមានចន្លោះខ្វះខាត តើព្រះជ្រាបដឹងថា ខ្ញុំនៅតែស្រឡាញ់ទ្រង់ទេ ? »
វាធ្វើឲ្យខ្ញុំមិនសប្បាយចិត្តដែលនិយាយបែបនេះ តែខ្ញុំធ្លាប់វាស់វែងទំនាក់ទំនងរបស់ខ្ញុំជាមួយព្រះអង្គសង្រ្គោះ តាមរយៈថាតើខ្ញុំរស់នៅបានឥតខ្ចោះប៉ុនណានោះ ។ ខ្ញុំគិតថាជីវិតដែលគោរពប្រតិបត្តិ មាន័យថា ខ្ញុំនឹងមិនចាំបាច់ធ្វើការប្រែចិត្តទេ ។ ហើយនៅពេលដែលខ្ញុំបានធ្វើកំហុសជារៀងរាល់ថ្ងៃ ខ្ញុំបានដកគម្លាតពីព្រះ ដោយគិតថា « ទ្រង់ច្បាស់ជាខកព្រះទ័យជាខ្លាំងចំពោះខ្ញុំ » ។
នោះមិនមែនជាការពិតនោះទេ ។
ខ្ញុំបានរៀនថា ប្រសិនបើបងប្អូនរង់ចាំរហូតដល់បងប្អូនស្អាតស្អំគ្រប់គ្រាន់ ឬឥតខ្ចោះគ្រប់គ្រាន់ដើម្បីទៅរកព្រះអង្គសង្គ្រោះ នោះបងប្អូនបានភាន់ច្រឡំអំពីការផ្ដោតជាចម្បងហើយ !
ចុះបើយើងគិតអំពីបទបញ្ញត្តិ និងការគោរពប្រតិបត្តិតាមរបៀបផ្សេងវិញ ?
ខ្ញុំសូមថ្លែងថា ខណៈដែលព្រះខ្វល់ព្រះទ័យអំពីកំហុសរបស់យើង នោះទ្រង់កាន់តែខ្វល់ព្រះទ័យថែមទៀតអំពីអ្វីដែលកើតឡើង បន្ទាប់ពី យើងបានធ្វើកំហុស ។ តើយើងនឹងបែរទៅរកទ្រង់ម្តងហើយម្តងទៀតដែរឬទេ ? តើយើងនឹងបន្តនៅក្នុងទំនាក់ទំនងនៃសេចក្តីសញ្ញានេះដែរឬទេ ?
ប្រហែលជាបងប្អូនឮព្រះបន្ទូលរបស់ព្រះអម្ចាស់ « បើ[ អ្នក ]រាល់គ្នាស្រឡាញ់ខ្ញុំ ចូរកាន់តាមបញ្ញត្តរបស់ខ្ញុំចុះ » ហើយមានអារម្មណ៍អាប់ឱន ដោយសារបងប្អូនមិនបានកាន់តាមបទបញ្ញត្តិទាំងអស់ ។ សូមឲ្យខ្ញុំរំឭកបងប្អូនថា ការប្រែចិត្តក៏ជាបទបញ្ញត្តិរបស់ព្រះផងដែរ ! តាមពិត ការប្រែចិត្តប្រហែលជាបទបញ្ញត្តិដែលនិយាយម្តងហើយម្តងទៀតច្រើនជាងគេនៅក្នុងព្រះគម្ពីរ ។
នៅក្នុងសម្តីរបស់អាលម៉ា « ឱ បើសិនជាខ្ញុំបានទៅជាទេវតាមួយ ហើយអាចបំពេញបំណងចិត្ត[ របស់ខ្ញុំ ] … ហើយស្រែកហៅឲ្យមានការប្រែចិត្តដល់មនុស្សគ្រប់រូប » លោកមិនបានព្យាយាមធ្វើឲ្យយើងខ្មាសអៀន ដោយការលើកឡើងពីកំហុសរបស់យើងឡើយ ។ លោកចង់អំពាវនាវឲ្យមានការប្រែចិត្ត ដើម្បីបងប្អូន និងរូបខ្ញុំអាចចៀសវាងពីការរងទុក្ខនៃពិភពលោកនេះ ។ ហេតុផលមួយដែលអាលម៉ាស្អប់អំពើបាប គឺដោយសារវាបណ្ដាលឲ្យយើងឈឺចាប់ ។
ពេលខ្លះខ្ញុំត្រូវតែចងចាំ ដូចជាកំណត់ចំណាំសរសេរបិតលើថ្ងាសដើម្បីរំឭកចាំ ថាបទបញ្ញត្តិគឺជាផ្លូវនាំឲ្យនៅឆ្ងាយពីការឈឺចាប់ ។ ហើយការប្រែចិត្តក៏ដូច្នោះដែរ ។ ព្យាការីរបស់យើងបានមានប្រសាសន៍ថា « ព្រះអង្គសង្គ្រោះស្រឡាញ់យើងជានិច្ច ប៉ុន្ដែ ជាពិសេស នៅពេលយើងប្រែចិត្ត » ។
ដូច្នេះនៅពេលព្រះអម្ចាស់បានមានព្រះបន្ទូលថា « ចូរអ្នករាល់គ្នាប្រែចិត្តចុះ » ចុះបើបងប្អូនស្រមៃថា ទ្រង់មានព្រះបន្ទូលថា « យើងស្រឡាញ់អ្នកវិញនោះ ។ យើងស្រឡាញ់អ្នក » ។ សូមស្រមៃថា ទ្រង់កំពុងអង្វរបងប្អូនឲ្យបោះបង់ចោលនូវឥរិយាបថដែលបណ្ដាលឲ្យបងប្អូនឈឺចាប់ ដោយការអញ្ជើញបងប្អូនឲ្យចាកចេញពីសេចក្តីងងឹត ហើយងាកទៅរកពន្លឺរបស់ទ្រង់ ។
នៅក្នុងវួដរបស់កូនស្រីខ្ញុំ ខាលី សង្ឃថ្មីម្នាក់បានលុតជង្គង់ចុះដើម្បីប្រសិទ្ធពរសាក្រាម៉ង់ ហើយជំនួសឲ្យការនិយាយថា « ប្រយោជន៍ឲ្យពួកគេអាចធ្វើយ៉ាងនោះ ដោយនូវការចងចាំដល់ព្រះលោហិត នៃព្រះរាជបុត្រារបស់ព្រះអង្គ » គាត់បាននិយាយដោយអចេតនាថា « ប្រយោជន៍ឲ្យពួកគេអាចធ្វើយ៉ាងនេះ ដោយការចងចាំដល់ សេចក្តីស្រឡាញ់ នៃព្រះរាជបុត្រារបស់ព្រះអង្គ » ។ ខាលីមានទឹកភ្នែករលីងរលោង នៅពេលដែលសេចក្តីពិតទាំងនោះបានត្រដាងឡើង ។
ព្រះអង្គសង្រ្គោះរបស់យើងបានស្ម័គ្រព្រះទ័យដើម្បីទទួលរងនូវការឈឺចាប់នៃដង្វាយធួនរបស់ទ្រង់ ដោយសារទ្រង់ស្រឡាញ់បងប្អូន ។ ការពិតទៅ បងប្អូនគឺជា « សេចក្តីអំណរដែលនៅចំពោះទ្រង់ » ខណៈដែលទ្រង់បានរងការឈឺចាប់ ។
ការអញ្ជើញឲ្យប្រែចិត្តគឺជាការបង្ហាញនៃសេចក្តីស្រឡាញ់របស់ព្រះ ។
ការនិយាយថា បាទ ឬចាស ចំពោះការអញ្ជើញនោះគឺជាការបង្ហាញរបស់យើង ។
សូមស្រមៃពីរូបភាពព្រះគ្រីស្ទដែលបងប្អូនចូលចិត្ត ។ ឥឡូវស្រមៃថា ទ្រង់កំពុងញញឹមយ៉ាងភ្លឺថ្លាដោយអំណររាល់ពេលបងប្អូនប្រើប្រាស់អំណោយទានរបស់ទ្រង់ ដោយសារទ្រង់គឺជា « ការភ្លឺថ្លានៃសេចក្ដីសង្ឃឹមដ៏ឥតខ្ចោះ » ។
ចាស ការប្រែចិត្តរបស់បងប្អូនមិនមែនជា បន្ទុក របស់ព្រះយេស៊ូវគ្រីស្ទទេ វាធ្វើឲ្យ ទ្រង់ រីករាយ ។
សូមឲ្យយើងបានបង្រៀនការណ៍នោះ !
ដោយសារការប្រែចិត្តគឺជាដំណឹងដ៏ល្អរបស់យើង !
យើងមិននៅលើផ្លូវនៃសេចក្តីសញ្ញា ដោយការមិនដែលធ្វើកំហុសនោះទេ ។ យើងនៅលើផ្លូវនេះ ដោយការប្រែចិត្តជារៀងរាល់ថ្ងៃ ។
ហើយនៅពេលយើងប្រែចិត្ត ព្រះអភ័យទោសឲ្យយើងដោយមិនធ្វើឲ្យយើងខ្មាសអៀន ដោយមិនប្រៀបធៀបយើងទៅនរណាផ្សេងទៀតឡើយ ឬស្តីបន្ទោសយើងដោយសារតែកំហុសនេះគឺជាកំហុសដែលយើងបានប្រែចិត្តកាលពីសប្តាហ៍មុននោះដែរ ។
ទ្រង់រំភើបរាល់ពេលទ្រង់ទតឃើញយើងលុតជង្គង់ចុះ ។ ទ្រង់រីករាយដើម្បីអភ័យទោសឲ្យយើង ដោយសារយើងផ្ដល់ភាពរីករាយដល់ទ្រង់ !
តើបងប្អូនមិនគិតថា នោះជាការពិតទេឬអី ?
អ៊ីចឹង ហេតុអ្វីបានជាវាពិបាកឲ្យយើងជឿ ? !
សាតាំងគឺជាមេចោទប្រកាន់ និងជាមេបោកបញ្ឆោតដ៏ពូកែ ប្រើប្រាស់ភាពអាម៉ាស់ដើម្បីឲ្យយើងនៅឆ្ងាយពីព្រះ ។ ភាពអាម៉ាស់គឺជាភាពខ្មៅងងឹត ដ៏ធ្ងន់ វាធ្វើឲ្យមានអារម្មណ៍ថា ប្រសិនបើបងប្អូនយកវាចេញពីរាងកាយបងប្អូន នោះនឹងឃើញទម្ងន់វាពិតប្រាកដ ។
ភាពអាម៉ាស់គឺជាសំឡេងដែលធ្វើឲ្យបងប្អូនមានអារម្មណ៍មិនល្អ ដោយនិយាយថា « តើអ្នកកំពុងគិតអ្វីនៅពេលនោះ ? » « តើអ្នកធ្លាប់ធ្វើអ្វីដែលត្រូវដែរឬទេ ? »
ភាពអាម៉ាស់មិនប្រាប់យើងថាយើង ធ្វើ កំហុសនោះទេ វាប្រាប់យើងថាយើង គឺជា កំហុសរបស់យើង ។ បងប្អូនថែមទាំងប្រហែលជាឮថា « ពួន » ។ មារសត្រូវខិតខំគ្រប់បែបយ៉ាងក្នុងអំណាចរបស់វា ដើម្បីទុកទម្ងន់នោះនៅខាងក្នុងចិត្ត ដោយប្រាប់យើងថា វាមានតម្លៃថ្លៃពេកហើយ ថាវាស្រួលជាងបើទុកភាពខ្មៅងងឹតនោះនៅក្នុងចិត្ត ដោយដកចេញអស់នូវក្តីសង្ឃឹម ។
សាតាំងគឺជាចោរនៃសេចក្តីសង្ឃឹម ។
ហើយបងប្អូនត្រូវតែស្ដាប់ការណ៍នេះ ដូច្នេះខ្ញុំនឹងនិយាយពាក្យទាំងនេះឲ្យឮៗថា ៖ បងប្អូនមិនដូចជាអ្វីដែលបងប្អូនគិតអំពីខ្លួនឯង ឬកំហុសដែលបងប្អូនធ្វើនោះទេ ។ បងប្អូនក៏ប្រហែលជាត្រូវនិយាយបែបនេះឲ្យឮៗដែរ ។ ប្រាប់សាតាំងថា « យើងមិនទទួលយកគំនិតនេះទេ » ។ ដាក់វានៅពីក្រោយបងប្អូន ។
សូមខិតទៅកាន់តែជិតព្រះអង្គសង្រ្គោះ ដោយទុក្ខព្រួយដែលគាប់ព្រះទ័យដល់ព្រះ ដែលនាំឲ្យបងប្អូនងាក ទៅរក ព្រះអង្គសង្រ្គោះរបស់បងប្អូន ហើយសូមមើលព្រះគុណរបស់ទ្រង់ចូលមកក្នុងជីវិតរបស់បងប្អូន និងជីវិតនៃអ្នកដែលបងប្អូនស្រឡាញ់ ។ ខ្ញុំសូមសន្យាថា នៅនាទីដែលយើងនាំមកនូវចិត្តសង្រេងមកកាន់ទ្រង់ដោយក្លាហាន ទ្រង់គឺគង់នៅទីនោះភ្លាមៗ ។
បើបងប្អូនឃើញនរណាម្នាក់លង់ទឹក តើបងប្អូនមិនលូកដៃបងប្អូនឈោងទៅជួយ និងសង្រ្គោះពួកគេទេឬអី ? តើបងប្អូនអាចស្រមៃចេញទេថា ព្រះអង្គសង្រ្គោះរបស់បងប្អូននឹងបដិសេធដៃរបស់បងប្អូនដែលលូកទៅរកជំនួយនោះដែរឬទេ ? ខ្ញុំស្រមៃឃើញទ្រង់ជ្រមុជចូលក្នុងទឹក យាងចុះក្រោមគ្រប់ទាំងអស់ ដើម្បីលើកយើងឡើង ដើម្បីយើងអាចដកដង្ហើមដ៏បរិសុទ្ធ ! គ្មាននរណាម្នាក់អាចលិចទៅជ្រៅជាងពន្លឺនៃព្រះគ្រីស្ទដែលចែងចាំងមកឡើយ ។
ព្រះអង្គសង្រ្គោះនឹងភ្លឺជាងភាពខ្មៅងងឹតនៃភាពអាម៉ាស់ ។ ទ្រង់នឹងមិនដែលវាយប្រហារតម្លៃរបស់បងប្អូនឡើយ ។ ដូច្នេះ សូមមើលដោយយកចិត្តទុកដាក់ ។
-
ស្រមៃថា ដៃនេះតំណាងឲ្យតម្លៃ ។
-
ហើយដៃនេះតំណាងឲ្យការគោរពប្រតិបត្តិ ។ ប្រហែលជាបងប្អូនក្រោកឡើងនៅព្រឹកនេះ ថ្លែងនូវការអធិស្ឋានប្រកបដោយអត្ថន័យ និងស្រាវជ្រាវនៅក្នុងព្រះគម្ពីរដើម្បីបានឮព្រះសូរសៀងរបស់ព្រះ ។ បងប្អូនបានធ្វើការសម្រេចចិត្តត្រឹមត្រូវហើយ ហើយប្រព្រឹត្តចំពោះមនុស្សនៅជុំវិញបងប្អូនដូចជាព្រះគ្រីស្ទ ។ បងប្អូនស្ដាប់សន្និសីទទូទៅ ! ការគោរពប្រតិបត្តិរបស់បងប្អូននៅទីនេះ !
-
ឬប្រហែលជាអ្វីៗមិនដំណើរការទៅរលូននោះទេ ។ បងប្អូនពុះពារនឹងការធ្វើរឿងតូចតាចទាំងនោះនាពេលថ្មីៗនេះ ជាកិច្ចការដ៏ងាយដើម្បីភ្ជាប់ទៅនឹងស្ថានសួគ៌ ។ បងប្អូនបានធ្វើការសម្រេចចិត្តមួយចំនួនដែលបងប្អូនមិនមានមោទនភាពចំពោះ ។
-
តើតម្លៃរបស់បងប្អូនគឺជាអ្វី ? តើដៃនេះមានធ្វើអ្វីខ្លះទេ ?
តម្លៃរបស់បងប្អូនមិនមែនភ្ជាប់ទៅនឹងការគោរពប្រតិបត្តិនោះទេ ។ តម្លៃរបស់បងប្អូនគឺខ្ជាប់ខ្ជួន វាមិនដែលផ្លាស់ប្តូរឡើយ ។ ព្រះប្រទានតម្លៃនេះឲ្យបងប្អូន ហើយមិនមែនបងប្អូន ឬនរណាផ្សេងទៀតអាចផ្លាស់ប្តូរវាបានឡើយ ។ ការគោរពប្រតិបត្តិនាំមកនូវពរជ័យ នោះគឺជាការពិត ។ ប៉ុន្តែតម្លៃនោះមិនមែនមួយក្នុងចំណោមការណ៍នោះទេ ។ តម្លៃរបស់បងប្អូនគឺតែងតែ « មហិមាណាស់ចំពោះព្រះនេត្រនៃព្រះ » មិនថាការសម្រេចចិត្តរបស់បងប្អូន នាំបងប្អូនទៅដល់ណានោះទេ ។
ខណៈដែលខ្ញុំបានធ្វើកំហុស ខ្ញុំចង់ ស្ថិតក្នុង ទំនាក់ទំនងនៃសេចក្តីសញ្ញាជាមួយព្រះគ្រីស្ទ ហើយខ្ញុំនឹងប្រាប់បងប្អូនថាហេតុអ្វី ។
ពេលធំឡើងខ្ញុំចូលរៀនសាលាមុជទឹក ហើយដឹងថា នៅពេលអ្នកដាក់ពិន្ទុ ឲ្យពិន្ទុការមុជទឹក គឺពួកគាត់មើលលើការអនុវត្ត ។ ពេលមុជទៅក្នុងទឹកដងខ្លួនត្រង់ ដោយម្រាមជើងចង្អុលត្រង់ ហើយមានសាចទឹកបន្តិចដែរឬទេ ? បន្ទាប់មក ពួកគេធ្វើអ្វីមួយលើសពីធម្មតា ។ ពួកគេដាក់ពិន្ទុអាស្រ័យលើកម្រិតនៃភាពលំបាក ។
មនុស្សគ្រប់គ្នា មុជទឹកដោយកម្រិតនៃភាពលំបាករបស់ពួកគេផ្ទាល់ ។ ហើយព្រះអង្គសង្រ្គោះរបស់បងប្អូនគឺជាអង្គតែមួយគត់ ដែលពិតជាជ្រាបដឹងពីការលំបាកដែលបងប្អូនកំពុងជ្រមុជខ្លួនចូល ។ ខ្ញុំចង់មានទំនាក់ទំនងជាមួយអ្នកដែលយល់ពីខ្ញុំ ដែលដឹងពីដួងចិត្តខ្ញុំ ហើយដឹងថាតើខ្ញុំខិតខំប៉ុនណា !
ទ្រង់ជ្រាបដឹងពីអ័ព្ទនៃសេចក្ដីងងឹតកំពុងធ្លាក់មកលើយើងជាអ្នកធ្វើដំណើរទាំងអស់គ្នា ហើយថាដំណើររបស់យើងឆ្លងកាត់ទន្លេដែលកខ្វក់—ដូច្នេះ ទោះបីជាយើងកាន់ដំបងដែក ក៏យើងនឹងទទួលរងឥទ្ធិពលដែរ ។
ការមកកាន់ព្រះគ្រីស្ទគឺជាការនិយាយថា « តើអ្នកជួយខ្ញុំបានទេ ? » ប្រកបដោយក្តីសង្ឃឹម ជាការធានាដែលបានបើកបង្ហាញថា ព្រះហស្ដរបស់ទ្រង់កំពុងលាតមកកាន់បងប្អូនជានិច្ច ។ ខ្ញុំជឿថា ទស្សនៈថ្មីស្រឡាងនៃការប្រែចិត្តនេះមានន័យថា ទោះបីជាយើងមិនបានគោរពប្រតិបត្តិឥតខ្ចោះ នៅឡើយក្តី ក៏យើងព្យាយាមគោរពប្រតិបត្តិដោយក្តីស្រឡាញ់ ឥឡូវនេះ ដែរ ដោយការជ្រើសរើសបន្តនៅម្តងហើយម្តងទៀត ដោយសារយើងស្រឡាញ់ទ្រង់ ។
សូមចងចាំប្រជាជនរបស់ស្តេចបេនយ៉ាមីន ដែលមានការតាំងចិត្តថានឹងមិនធ្វើអំពើអាក្រក់ទៀតឡើយ ប៉ុន្តែនឹងបន្តធ្វើតែល្អប៉ុណ្ណោះ ។ តើបងប្អូនគិតថា ពួកគេប្រមូលត្រសាលរបស់ពួកគេត្រឡប់ទៅផ្ទះវិញ ហើយមិនដែលធ្វើខុសទៀតឡើយឬ ? ច្បាស់ជាមិនមែនទេ ! អ្វីដែលខុសគ្នានោះគឺពួកគេលែង ចង់ ប្រព្រឹត្តិអំពើបាបទៀតហើយ ។ ពួកគេគោរពប្រតិបត្តិដោយក្តីស្រឡាញ់ ! ដួងចិត្តរបស់ពួកគេបានងាក និងផ្ដោតទៅលើព្រះ ខណៈ ពួកគេបានពុះពារតស៊ូ !
នៅគ្រាមួយ នៅឯមាត់សមុទ្រ ខ្ញុំបានឃើញសត្វបក្សីហោះនៅកណ្ដាលខ្យល់ ដោយខំទទះស្លាបរបស់វាយ៉ាងខ្លាំង យ៉ាងវីវក់ ប៉ុន្តែនៅតែមួយកន្លែងដដែល ។ បន្ទាប់មក ខ្ញុំបានឃើញសត្វបក្សីផ្សេងទៀត ហោះខ្ពស់ជាង ។ វាយកខ្យល់បក់ពីក្រោមទៅ ហើយបានហើរយ៉ាងស្រួល គ្មានបញ្ហានៅកណ្ដាលខ្យល់នោះទេ ។ នោះគឺជាភាពខុសគ្នារវាងការព្យាយាមធ្វើអ្វីដោយខ្លួនរបស់យើង និងការងាកទៅរកព្រះអង្គសង្រ្គោះ ដោយការទុកឲ្យទ្រង់លើកយើងឡើង ដោយ « ប្រោសឲ្យជា នៅក្នុងចំអេងស្លាប » ទ្រង់ ។
ក្នុងនាមជាថ្នាក់ដឹកនាំបេសកកម្មនៅប្រទេសអូស្រ្ដាលី នៅអំឡុងការចុះសួរសុខទុក្ខអ្នកផ្សព្វផ្សាយសាសនារបស់យើងម្នាក់ៗ យើងបាននិយាយអំពី នីហ្វៃទី៣ ១៧ ដែលមនុស្សបាននៅជិតព្រះអង្គសង្រ្គោះ ហើយអាចឮទ្រង់អធិស្ឋានឲ្យពួកគេ ។ យើងបានសួរថា « បើប្អូនអាចស្ដាប់ឮព្រះអង្គសង្រ្គោះអធិស្ឋានសម្រាប់ ប្អូន តើប្អូនគិតថាទ្រង់នឹងមានបន្ទូលអ្វី ? »
ការស្ដាប់ឮចម្លើយរបស់ពួកគេ គឺជាបទពិសោធន៍ខាងវិញ្ញាណដ៏ពេញលេញបំផុតនៅក្នុងជីវិតរបស់ខ្ញុំ ។ ពួកអ្នកផ្សព្វផ្សាយសាសនាម្នាក់ៗទាំងនោះបានបង្អង់សិន ហើយមានទឹកភ្នែករលីងរលោង នៅពេលយើងរំឭកពួកគេថា « ព្រះអង្គសង្រ្គោះជ្រាបដឹងពីកម្រិតនៃការលំបាកដែលប្អូនកំពុងឆ្លងកាត់ ។ ទ្រង់ជ្រាបដឹង ! »
នេះគឺជាអ្វីដែលពួកអ្នកផ្សព្វផ្សាយសាសនាទាំងនោះបានចែកចាយដោយស្ងប់ស្ងាត់ និងដោយទន់ភ្លន់ ៖ អ្នកផ្សព្វផ្សាយសាសនាស៊ីស្ទើរម្នាក់បាននិយាយថា « ព្រះយេស៊ូវនឹងទូលទៅព្រះវរបិតាថា ‹ នាងខិតខំអស់ពីសមត្ថភាពរបស់នាងហើយ ។ ទូលបង្គំជ្រាបដឹងថា នាងខិតខំប៉ុនណា › ហើយ » ។ អែលឌើរម្នាក់ផ្សេងទៀតនិយាយថា « អ្វីៗដែលកើតឡើងនៅក្នុងជីវិតគាត់ ទូលបង្គំមានមោទនភាពចំពោះគាត់ណាស់ » ។
សូមសាកល្បងការណ៍នេះ ។ នៅយប់នេះ ពីមុនបងប្អូនអធិស្ឋាន សូមស្រមៃថាព្រះយេស៊ូវគ្រីស្ទនៅជិតបងប្អូន ។ ទ្រង់គឺជាអង្គគាំទ្របងប្អូនជាមួយព្រះវរបិតា ។ សូមសួរខ្លួនឯងថា « តើព្រះអង្គសង្រ្គោះនឹងមានបន្ទូលអ្វីខ្លះទៅកាន់ព្រះវរបិតាអំពីខ្ញុំ ? »
ហើយបន្ទាប់មក សូមស្ងាត់ ។
សូមស្ដាប់ព្រះសូរសៀងដែលមានបន្ទូល ល្អៗ អំពីបងប្អូន—ដែលជាព្រះសូរសៀងរបស់ព្រះអង្គសង្រ្គោះ ជាមិត្តដ៏ល្អរបស់បងប្អូន និងព្រះវរបិតាដែលគង់នៅស្ថានសួគ៌របស់បងប្អូន ដែលពិតជាគង់នៅទីនោះ ។ សូមចងចាំថា សេចក្តីស្រឡាញ់ របស់ទ្រង់ទាំងទ្វេ និងតម្លៃ របស់បងប្អូន គឺតែងតែមហិមាជានិច្ច មិនថាមានអ្វីកើតឡើងនោះទេ ។
ខ្ញុំឈរនៅទីនេះដើម្បីធ្វើជាសាក្សីថា ព្រះយេស៊ូវគ្រីស្ទប្រទានពន្លឺដល់អស់អ្នកដែលអង្គុយនៅក្នុងភាពងងឹត ។ ដូច្នេះ នៅថ្ងៃទាំងនោះ នៅពេលបងប្អូនទទួលអារម្មណ៍ពីសំឡេងនោះប្រាប់បងប្អូនឲ្យពួន ថាបងប្អូន គួរតែ ពួននៅក្នុងបន្ទប់ងងឹតនៅតែម្នាក់ឯង នោះខ្ញុំសូមអញ្ជើញបងប្អូនឲ្យមានសេចក្តីក្លាហាន ហើយជឿលើព្រះគ្រីស្ទ ! ដើរទៅ ហើយបើកភ្លើង—ជាពន្លឺដ៏ឥតខ្ចោះនៃសេចក្តីសង្ឃឹម ។
ចូររុំព័ទ្ធដោយពន្លឺរបស់ទ្រង់ នោះបងប្អូននឹងមើលឃើញមនុស្សនៅជុំវិញបងប្អូន ដែលធ្លាប់មានអារម្មណ៍ឯកាដែរ ប៉ុន្តែឥឡូវនេះ ដោយពន្លឺបានបើកនោះ បងប្អូន និង ពួកគេ នឹងងឿងឆ្ងល់ថា « ហេតុអ្វីបានជាយើងខ្លាចក្នុងទីងងឹតដូច្នេះ ? ហើយហេតុអ្វីបានជាយើងនៅទីនោះយ៉ាងយូរដូច្នេះ ? »
« សូមឲ្យពន្លឺរបស់ព្រះអម្ចាស់រុំព័ទ្ធបងប្អូននៅក្នុងព្រះហស្ដរបស់ទ្រង់ និងលួងលោម ហើយស្រឡាញ់បងប្អូនជាបន្ត » ។ សូមឲ្យយើងបន្តស្រឡាញ់ ទ្រង់ ហើយជ្រើសរើសទ្រង់ម្តងហើយម្តងទៀត ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។