« គេនឹងដឹងថាអ្នករាល់គ្នាជាសិស្សរបស់ខ្ញុំ ដោយសារសេចក្ដីនេះឯង »
សេចក្ដីស្រឡាញ់របស់យើងចំពោះព្រះ និងបុត្រាបុត្រីរបស់ទ្រង់ គឺជាទីបន្ទាល់ដ៏មានអានុភាពទៅកាន់ពិភពលោកថា នេះគឺជាសាសនាចក្ររបស់ព្រះគ្រីស្ទដ៏ពិត ។
ជាច្រើនឆ្នាំកន្លងទៅ ស៊ីស្ទើរ អុជដូហ្វ និងខ្ញុំបានធ្វើដំណើរទៅភាគខាងត្បូងនៃប្រទេសអាល្លឺម៉ង់ ។ នៅពីមុនថ្ងៃបុណ្យអ៊ីស្ទើរ យើងបានអញ្ជើញមិត្តល្អម្នាក់ ដែលពុំមែនជាសមាជិកនៃសាសនាចក្រ ឲ្យចូលរួមកម្មវិធីថ្វាយបង្គំនៅថ្ងៃអាទិត្យជាមួយពួកយើង ។ ពួកយើងស្រឡាញ់មិត្តដ៏ល្អនេះ ដូច្នេះវាគឺជារឿងធម្មតាដើម្បីចែកចាយនឹងគាត់ថាតើពួកយើងមានអារម្មណ៍អំពីព្រះអង្គសង្គ្រោះ និងសាសនាចក្ររបស់ទ្រង់យ៉ាងណាខ្លះ រួចហើយក៏បានអញ្ជើញគាត់ឲ្យមកមើល ! គាត់បានទទួលយកការអញ្ជើញ ហើយបានចូលរួមក្នុងការប្រជុំជាមួយពួកយើងនៅសាខាជិតនោះ ។
បើបងប្អូនធ្លាប់នាំមិត្តមកព្រះវិហារជាលើកដំបូង នោះបងប្អូនអាចនឹងដឹងថាខ្ញុំមានអារម្មណ៍យ៉ាងណានៅព្រឹកថ្ងៃអាទិត្យនោះ ។ ខ្ញុំចង់ឲ្យអ្វីៗដំណើរការទៅយ៉ាងល្អបំផុត ។ មិត្តរបស់យើងជាមនុស្សមានចំណេះដឹង និងខាងវិញ្ញាណខ្ពស់ ។ ខ្ញុំសង្ឃឹមថាការប្រជុំនៅសាខានេះនឹងធ្វើឲ្យគាត់មានអារម្មណ៍ល្អ ហើយធ្វើជាតំណាងឲ្យសាសនាចក្របានល្អ ។
សាខានោះបានជួបជុំគ្នានៅបន្ទប់ជួលនៅជាន់ទីពីរនៅពីលើហាងទំនិញ ។ ដើម្បីទៅដល់ទីនោះ ពួកយើងត្រូវដើរឡើងជណ្ដើរនៅខាងក្រោយអគារ ដើរកាត់កន្លែងដាក់ទំនិញដែលមានក្លិនខ្លាំង ។
នៅពេលការប្រជុំសាក្រាម៉ង់ចាប់ផ្ដើម ខ្ញុំបានគិតអំពីបទពិសោធន៍នេះដែលមិត្តខ្ញុំបានជួបជាលើកដំបូង ហើយខ្ញុំឃើញថាខ្លួនឯងមានអារម្មណ៍ខ្មាសអៀនបន្ដិច ។ ឧទាហរណ៍ ការច្រៀងចម្រៀងគឺពុំដូចជាក្រុមចម្រៀងរោងឧបោសថទេ ។ មានឮកុមារតូចៗឡូឡាមិនឈប់អំឡុងម៉ោងសាក្រាម៉ង់ ។ អ្នកឡើងនិយាយបានខំអស់ពីលទ្ធភាព ប៉ុន្តែពួកគេពុំពូកែនិយាយជាសាធារណៈទេ ។ ខ្ញុំបានអង្គុយនៅក្នុងការប្រជុំទាំងមិនស្រណុកចិត្ត ដោយសង្ឃឹមថាថ្នាក់សាលាថ្ងៃអាទិត្យនឹងបានល្អជាងនោះ ។
វាពុំដូច្នោះទេ ។
ពេញមួយព្រឹក ខ្ញុំបានបារម្ភអំពីការគិតរបស់មិត្តយើងអំពីព្រះវិហារនេះដែលពួកយើងបាននាំគាត់ឲ្យទៅចូលរួមនោះ ។
បន្ទាប់មក នៅពេលយើងបើកឡានទៅផ្ទះ ខ្ញុំបានងាកទៅនិយាយនឹងមិត្តរបស់យើង ។ ខ្ញុំចង់ពន្យល់ថានេះគឺជាសាខាតូចមួយប៉ុណ្ណោះ ហើយវាពុំតំណាងឲ្យសាសនាចក្រទាំងមូលនោះទេ ។ ប៉ុន្តែពីមុនខ្ញុំនិយាយ គាត់បាននិយាយមុន ។
គាត់បាននិយាយថា « វាល្អណាស់ » ។
ខ្ញុំគ្មានអ្វីតបទេ ។
គាត់បានបន្ដថា « ខ្ញុំពិតជាកោតសរសើរចំពោះរបៀបដែលសមាជិកក្នុងព្រះវិហាររបស់អ្នកប្រព្រឹត្តចំពោះគ្នាទៅវិញទៅមក ។ ពួកគេហាក់ដូចមានដើមកំណើតខុសៗគ្នា ប៉ុន្តែពួកគេមានសេចក្ដីស្រឡាញ់ដោយស្មោះចំពោះគ្នា ។ នេះគឺជាអ្វីដែលខ្ញុំស្រមៃថាព្រះគ្រីស្ទចង់ឲ្យមាននៅក្នុងសាសនាចក្ររបស់ទ្រង់ » ។
មែនហើយ ខ្ញុំបានប្រែចិត្តពីការវិនិច្ឆ័យរបស់ខ្ញុំភ្លាម ។ ខ្ញុំចង់បានរូបភាពការប្រជុំដ៏ល្អឥតខ្ចោះដើម្បីទាក់ចិត្តមិត្តរបស់ខ្ញុំ ។ ប៉ុន្តែអ្វីដែលសមាជិកនៅក្នុងសាខានោះបានធ្វើយ៉ាងជោគជ័យគឺជាស្មារតីនៃក្ដីស្រឡាញ់ ចិត្តល្អ ការអត់ធ្មត់ និងក្ដីមេត្តាករុណាចេញពីដួងចិត្តដ៏ល្អឥតខ្ចោះ ។
ដើម្បីឲ្យសេចក្ដីជំនឿអាចបានកើនឡើងនៅលើផែនដី
បងប្អូនប្រុសស្រី មិត្តជាទីស្រឡាញ់ ខ្ញុំស្រឡាញ់សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ វាគឺជាសាសនាចក្ររស់រវើកពិតរបស់ព្រះអង្គសង្គ្រោះ ហើយវាបង្រៀនអំពីភាពពេញលេញនៃដំណឹងល្អរបស់ព្រះយេស៊ូវគ្រីស្ទដែលបានស្ដារឡើងវិញ ។ អំណាច និងសិទ្ធិអំណាចបព្វជិតភាពរបស់ទ្រង់គង់នៅទីនេះ ។ ព្រះយេស៊ូវគ្រីស្ទដឹកនាំសាសនាចក្រនេះដោយផ្ទាល់ តាមរយៈពួកអ្នកបម្រើដែលទ្រង់បានហៅ និងអនុញ្ញាត និងតាមរយៈព្យាការីនៅរស់ គឺប្រធាន រ័សុល អិម ណិលសុន ។ ព្រះអង្គសង្គ្រោះបានប្រទានដល់ពួកបរិសុទ្ធថ្ងៃចុងក្រោយនូវបេសកកម្មដ៏ពិសេសមួយដើម្បីប្រមូលកូនចៅរបស់ព្រះ ហើយរៀបចំពិភពលោកសម្រាប់ការយាងមកជាលើកទីពីររបស់ព្រះអង្គសង្គ្រោះ ។ ខ្ញុំថ្លែងជាសាក្សីថាការណ៍ទាំងអស់នេះគឺជាការពិត ។
ប៉ុន្តែវាសំខាន់ដើម្បីចងចាំថា នៅពេលមនុស្សភាគច្រើនទទួលបទពិសោធន៍ជាមួយនឹងសាសនាចក្រនៃព្រះយេស៊ូវគ្រីស្ទជាលើកដំបូង នោះពួកគេពុំបានគិតអំពីសិទ្ធិអំណាចបព្វជិតភាព ឬពិធីបរិសុទ្ធ ឬការប្រមូលផ្ដុំនៃអ៊ីស្រាអែលនោះទេ ។ អ្វីដែលពួកគេកត់សម្គាល់លើសពីអ្វីៗទាំងអស់នោះ គឺអារម្មណ៍ដែលពួកគេមាន នៅពេលពួកគេនៅជាមួយនឹងយើង និងរបៀបដែលយើងប្រព្រឹត្តចំពោះគ្នាទៅវិញទៅមក ។
ព្រះយេស៊ូវបានមានព្រះបន្ទូលថា « ចូរស្រឡាញ់គ្នាទៅវិញទៅមក » ។ « គេនឹងដឹងថាអ្នករាល់គ្នាជាសិស្សរបស់ខ្ញុំ ដោយសារសេចក្ដីនេះឯង » ។ ជាញឹកញាប់ ទីបន្ទាល់ដំបូងរបស់មនុស្សម្នាក់អំពីព្រះយេស៊ូវគ្រីស្ទកើតមាននៅពេលគាត់ ឬនាងទទួលអារម្មណ៍ក្ដីស្រឡាញ់នៅក្នុងចំណោមពួកសិស្សរបស់ព្រះយេស៊ូវគ្រីស្ទ ។
ព្រះអង្គសង្គ្រោះបានប្រកាសថា ទ្រង់បានស្ដារសាសនាចក្ររបស់ទ្រង់ « ដើម្បីឲ្យសេចក្ដីជំនឿអាចបានកើនឡើងនៅលើផែនដី… » ។ ដូច្នេះ នៅពេលមានអ្នកមកទស្សនាការប្រជុំក្នុងសាសនាចក្រយើង នោះព្រះអង្គសង្គ្រោះមានព្រះទ័យចង់ឲ្យពួកគេចាកចេញទៅវិញដោយមានជំនឿកាន់តែរឹងមាំទៅលើទ្រង់ ! ក្ដីស្រឡាញ់ដែលមិត្តពួកយើងទទួលបាននៅក្នុងពួកយើង នឹងលើកពួកគេឲ្យខិតទៅកាន់តែជិតនឹងព្រះយេស៊ូវគ្រីស្ទ ! នោះគឺជាគោលដៅដ៏សាមញ្ញរបស់យើង នៅគ្រប់ពេលដែលយើងជួបជុំគ្នា។
នរណាដែលកំពុងស្វែងរកជំនឿកាន់តែខ្លាំងទៅលើព្រះគ្រីស្ទ ឬមានទំនាក់ទំនងកាន់តែជិតស្និតទៅនឹងព្រះវរបិតាសួគ៌ គួរតែដឹងថាវាមាននៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ការអញ្ជើញពួកគេឲ្យមកកាន់ការប្រជុំរបស់យើង អាចជារឿងសាមញ្ញតាមធម្មជាតិ ដូចជាការអញ្ជើញពួកគេមកក្នុងផ្ទះរបស់យើងផងដែរ ។
ភាពឥតខ្ចោះ និងភាពពិត
ឥឡូវ ខ្ញុំបានដឹងថា ខ្ញុំកំពុងពិពណ៌នាអំពីភាពឥតខ្ចោះ ។ ហើយនៅក្នុងជីវិតរមែងស្លាប់នេះ យើងកម្រជួបបទពិសោធន៍នៃភាពឥតខ្ចោះណាស់ ។ ហើយ « រហូតដល់ថ្ងៃបានល្អឥតខ្ចោះ » នោះនឹងតែងតែមាននូវភាពខ្វះខាតនៅចន្លោះភាពឥតខ្ចោះ និងភាពពិត ។ ដូច្នេះ តើយើងគួរធ្វើអ្វីខ្លះ នៅពេលដែលសាសនាចក្រ ពុំ មានអារម្មណ៍ថាដូចជាថ្ងៃល្អឥតខ្ចោះនោះ ? មិនថាដោយមូលហេតុអ្វីនោះទេ តើនៅពេលណាដែលវួដរបស់យើងពុំ ទាន់បីបាច់សេចក្ដីជំនឿ ឬសេចក្ដីស្រឡាញ់ដ៏ល្អឥតខ្ចោះនោះ ? ឬតើនៅពេលណាដែលយើងមានអារម្មណ៍ថាយើងពុំចុះចំណោមគេនោះ ?
រឿងមួយដែលយើងពុំគួរធ្វើគឺបោះបង់ភាពឥតខ្ចោះ !
ទំព័រចំណងជើងនៃព្រះគម្ពីរមរមន មានដាក់បញ្ចូលនូវការព្រមានដ៏សំខាន់នេះថា « ប្រសិនបើមានកំហុសណាមួយ គឺជាសេចក្ដីភាន់ច្រឡំរបស់មនុស្សទេ ហេតុដូច្នេះហើយ សូមកុំថ្កោលទោសដល់វត្ថុដែលជារបស់ផងព្រះឡើយ » ។
តើសៀវភៅ—ឬព្រះវិហារ ឬមនុស្សម្នាក់— មាន « ការខុសឆ្គង » និង « កំហុស » អាចនៅតែធ្វើការឲ្យព្រះបានឬទេ ?
ចម្លើយរបស់ខ្ញុំគឺលាន់រំពងថា បាន !
ដូច្នេះខណៈដែលយើងកាន់តាមបទដ្ឋានដ៏ខ្ពស់របស់ព្រះអម្ចាស់ ចូរយើងអត់ធ្មត់ចំពោះគ្នាទៅវិញទៅមកផងដែរ ។ ពួកយើងម្នាក់ៗគឺជាកិច្ចការមួយដែលកំពុងរីកចម្រើន ហើយយើងទាំងអស់គ្នាពឹងផ្អែកទៅលើព្រះអង្គសង្គ្រោះដើម្បីយើងមានការរីកចម្រើន ។ រឿងនោះគឺជាការពិតចំពោះយើងម្នាក់ៗ ហើយវាជាការពិត ចំពោះនគររបស់ព្រះនៅលើផែនដី ។
ព្រះអម្ចាស់អញ្ជើញយើង មិនគ្រាន់តែចូលរួមនៅក្នុងនគររបស់ទ្រង់ប៉ុណ្ណោះទេ ប៉ុន្តែក៏ចូលរួមយ៉ាងសកម្មនៅក្នុងការស្ថាបនានគរផងដែរ ។ ព្រះទតមើលឃើញមនុស្សដែលមាន « ចិត្តតែមួយ និងគំនិតតែមួយ » ។ ដើម្បីមានដួងចិត្ត តែមួយ នោះយើងត្រូវតែមានដួងចិត្ត បរិសុទ្ធ ហើយវាតម្រូវឲ្យមាន ការផ្លាស់ប្ដូរក្នុងដួងចិត្តដ៏ធំ ។
ប៉ុន្តែនោះពុំមានន័យថាត្រូវផ្លាស់ប្ដូរដួងចិត្តរបស់ខ្ញុំដើម្បីឲ្យត្រូវនឹងបងប្អូននោះទេ ។ ហើយក៏ពុំមានន័យថាត្រូវផ្លាស់ប្ដូរដួងចិត្តរបស់បងប្អូនឲ្យត្រូវនឹងខ្ញុំនោះដែរ ។ វាមានន័យថាយើងទាំងអស់គ្នាផ្លាស់ប្ដូរដួងចិត្តរបស់យើងដើម្បីឲ្យត្រូវទៅនឹងព្រះអង្គសង្គ្រោះ ។
ប្រសិនបើយើងពុំទាន់ទៅដល់កម្រិតនោះទេ សូមចងចាំថា ដោយមានជំនួយពីព្រះអម្ចាស់ នោះគ្មានអ្វីដែលធ្វើពុំបានទេ ។
ការសម និងការមានចំណែក
ហើយបើសិនជាបងប្អូនមានអារម្មណ៍ថាបងប្អូនមិនចុះចំណោមគេ សូមដឹងថាបងប្អូនពុំឯកោឡើយ ។ តើយើងទាំងអស់គ្នាមិនស្ថិតនៅក្នុងស្ថានភាពជីវិត ដែលយើងមានអារម្មណ៍ថាយើងដូចជាមនុស្សចម្លែកនៅក្នុងបន្ទប់ទេឬអី ? ខ្ញុំធ្លាប់ជួបជាច្រើនដងមកហើយ ។ នៅពេលខ្ញុំមានអាយុ ១១ឆ្នាំ គ្រួសាររបស់ខ្ញុំត្រូវបានបង្ខំឲ្យចាកចេញពីផ្ទះ ហើយផ្លាស់ទៅតំបន់ដែលមិនស្គាល់ ។ គ្រប់យ៉ាងគឺខុសប្លែកពីអ្វីដែលខ្ញុំធ្លាប់រស់នៅ ។ ហើយការនិយាយរបស់ខ្ញុំ បង្ហាញដល់ក្មេងៗដទៃទៀតថាខ្ញុំខុសប្លែកពីពួកគេ ។ ជួនកាល នៅពេលខ្ញុំត្រូវការមិត្តភាព និងភាពមានចំណែកយ៉ាងខ្លាំង នោះខ្ញុំបានមានអារម្មណ៍ឯកោ និងពុំមានចំណែក ។
នៅលើផែនដីនេះ ភាពខុសគ្នាច្រើនបំផុតដែលយើងកត់សម្គាល់ឃើញ—ជាភាពខុសគ្នាដែលយើងមួយចំនួនប្រើដើម្បីចាត់ថ្នាក់គ្នាទៅវិញទៅមក— គឺជារឿងខាងលោកិយ ៖ រូបរាងខាងក្រៅ សញ្ជាតិ ភាសា សម្លៀកបំពាក់ ទំនៀមទម្លាប់ ជាដើម ។ ប៉ុន្តែ « ព្រះទ្រង់មិនទតចំពោះសេចក្តី ដែលមនុស្សលោកពិចារណាមើលទេ ។ ឯមនុស្សលោក តែងមើលតែឫកពាខាងក្រៅប៉ុណ្ណោះ តែព្រះយេហូវ៉ាទ្រង់ទតចំពោះក្នុងចិត្តវិញ » ។
តាមទស្សនៈរបស់ទ្រង់ មានការចាត់ថ្នាក់មួយដែលដាក់មុនអ្វីៗទាំងអស់គឺ ៖ កូនរបស់ព្រះ ។ ហើយយើងទាំងអស់គ្នាត្រូវសមយ៉ាងល្អឥតខ្ចោះនៅក្នុងផ្នែកនេះ ។
វាជារឿងធម្មតាទេដែលយើងចង់នៅជិតនឹងមនុស្សដែលមានរូបរាង និយាយ មានទង្វើ និងគិតដូចជាយើង ។ មានកន្លែងមួយសម្រាប់រឿងនោះ ។
ប៉ុន្តែនៅក្នុងសាសនាចក្ររបស់ព្រះអង្គសង្គ្រោះ យើងប្រមូលផ្ដុំកូនចៅទាំងអស់របស់ព្រះ ដែលមានឆន្ទៈដើម្បីមកជួបជុំ ហើយស្វែងរកសេចក្ដីពិត ។ វាពុំមែនជារូបរាងខាងក្រៅរបស់យើង ទស្សនៈខាងនយោបាយរបស់យើង វប្បធម៌របស់យើង ឬជាតិសាសន៍របស់យើងដែលនាំឲ្យយើងប្រមូលផ្ដុំគ្នានោះទេ ។ វាពុំមែនជាប្រវត្តិរបស់យើងដែលនាំឲ្យយើងរួបរួមគ្នានោះទេ ។ វាគឺជាគោលដៅរួមរបស់យើង សេចក្ដីស្រឡាញ់របស់យើងចំពោះព្រះ និងអ្នកជិតខាង ការតាំងចិត្តរបស់យើងចំពោះព្រះយេស៊ូវគ្រីស្ទ និងដំណឹងល្អដែលបានស្ដារឡើងវិញរបស់ទ្រង់ទេតើ ដែលនាំឲ្យយើងរួបរួមគ្នា ។ ពួកយើងគឺ « រួមមកតែមួយ នៅក្នុងព្រះគ្រីស្ទ » ។
ភាពរួបរួមដែលយើងចង់បាន គឺពុំមែនឲ្យមនុស្សគ្រប់រូបឈរនៅកន្លែងដូចគ្នានោះទេ ប៉ុន្តែឲ្យមនុស្សគ្រប់រូបបែរទៅរកទិសដៅដូចគ្នា—ឆ្ពោះទៅរកព្រះយេស៊ូវគ្រីស្ទ ។ យើងរួបរួមគ្នាតែមួយ ពុំមែនដោយសារតែកន្លែងដែលយើងធ្លាប់នៅនោះទេ ប៉ុន្តែជាកន្លែងដែលយើងកំពុងព្យាយាមទៅ ពុំមែនព្រោះតែយើងជានរណាទេ ប៉ុន្តែជាមនុស្សដែលយើងព្យាយាមប្រែក្លាយ ។
នោះហើយគឺជាសាសនាចក្រពិតរបស់ព្រះគ្រីស្ទ ។
រូបកាយតែមួយ
បើបងប្អូនស្រឡាញ់ព្រះ បើបងប្អូនចង់ស្គាល់ទ្រង់ឲ្យកាន់តែល្អប្រសើរតាមរយៈការធ្វើតាមព្រះរាជបុត្រារបស់ទ្រង់ នោះបងប្អូនមានចំណែកនៅទីនេះហើយ ។ ប្រសិនបើបងប្អូនព្យាយាមរក្សាបទបញ្ញត្តិរបស់ព្រះអង្គសង្គ្រោះដោយស្មោះ— ទោះជាបងប្អូនពុំល្អឥតខ្ចោះនៅឡើយក្ដី—នោះបងប្អូននឹងបានសមយ៉ាងឥតខ្ចោះចំពោះសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ហើយចុះបើបងប្អូនខុសប្លែកពីមនុស្សដែលនៅជុំវិញបងប្អូនវិញនោះ ? រឿងនោះពុំធ្វើឲ្យបងប្អូនពុំសមនោះឡើយ—វាធ្វើឲ្យបងប្អូនក្លាយជាផ្នែកដ៏សំខាន់មួយនៃរូបកាយរបស់ព្រះគ្រីស្ទវិញ ។ អវយវៈទាំងអស់គឺចាំបាច់នៅក្នុងរូបកាយនៃព្រះគ្រីស្ទ ។ ត្រចៀកអាចស្ដាប់ឮដែលភ្នែកពុំអាចធ្វើបាន ។ ជើងធ្វើនូវអ្វីដែលដៃមិនអាចធ្វើបាន ។
នោះពុំមានន័យថា ការងាររបស់បងប្អូនគឺត្រូវផ្លាស់ប្ដូរមនុស្សគ្រប់រូបដើម្បីឲ្យក្លាយដូចជាបងប្អូននោះទេ ។ ប៉ុន្តែវាមានន័យថា បងប្អូនមានអ្វីមួយសំខាន់ដើម្បីចូលរួមចំណែក—ហើយថាបងប្អូនមានអ្វីមួយសំខាន់ដើម្បីរៀនសូត្រ !
សំឡេងតែមួយ
នៅគ្រប់សម័យប្រជុំនៃសន្និសីទទូទៅ ពួកយើងមានពរជ័យដើម្បីស្ដាប់តន្ត្រីដ៏បំផុសគំនិតមកពីក្រុមចម្រៀងដ៏មានទេពកោសល្យ ។ នៅពេលបងប្អូនស្ដាប់ បងប្អូនអាចកត់សម្គាល់ថា អ្នកច្រៀងពុំច្រៀងចម្រៀងទាំងអស់ដោយខ្ទង់ភ្លេងដូចគ្នានោះទេ ។ ពេលខ្លះវគ្គមួយមានបទភ្លេង ពេលខ្លះវគ្គផ្សេង ។ ប៉ុន្តែពួកគេទាំងអស់គ្នាចូលរួមចំណែកឲ្យមានសំឡេងពិរោះ ហើយពួកគេរួបរួមគ្នាទាំងស្រុង ។ សមាជិកក្រុមចម្រៀងម្នាក់ៗមានគោលដៅរួមដូចគ្នា ៖ គឺដើម្បីសរសើរតម្កើងព្រះ ហើយបង្វែរដួងចិត្តយើងទៅរកទ្រង់ ។ ម្នាក់ៗត្រូវតែមានគំនិត និងដួងចិត្តផ្ដោតទៅលើគោលបំណងដ៏ទេវភាពដូចគ្នា ។ ហើយនៅពេលធ្វើដូច្នោះ នោះពួកគេពិតជាមានសំឡេងតែមួយបាន ។
ប្រសិនបើបងប្អូនពុំទាន់ជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយទេ ពួកយើងសូមអញ្ជើញបងប្អូនឲ្យចូលរួមនឹងពួកយើង នៅពេលពួកយើងរីករាយនៅក្នុង « ចម្រៀងនៃសេចក្ដីស្រឡាញ់ដែលប្រោសលោះ » របស់ព្រះអង្គសង្គ្រោះ ។ ពួកយើងត្រូវការបងប្អូន ។ យើងស្រឡាញ់បងប្អូន ។ សាសនាចក្រនឹងបានកាន់តែល្អប្រសើរនៅពេលបងប្អូនខិតខំបម្រើព្រះអម្ចាស់ និងកូនចៅរបស់ទ្រង់ ។
ប្រសិនបើបងប្អូនបានបង្ហាញរួចហើយ តាមរយៈពិធីបុណ្យជ្រមុជទឹក តាមរយៈការធ្វើសេចក្ដីសញ្ញាជាមួយព្រះ នោះបំណងប្រាថ្នារបស់បងប្អូនដើម្បី « ចូលរួមក្នុងក្រោលនៃព្រះ ហើយដើម្បីឲ្យបានហៅថាជារាស្ត្ររបស់ទ្រង់ » អរគុណបងប្អូនដែលបានចូលរួមនៅក្នុងកិច្ចការដ៏សំខាន់ និងទេវភាពនេះ និងដែលបានជួយធ្វើឲ្យសាសនាចក្រនៃព្រះយេស៊ូវគ្រីស្ទក្លាយជាអ្វីដែលព្រះអង្គសង្គ្រោះសព្វព្រះទ័យចង់បាន ។
ដូចដែលខ្ញុំបានរៀនមកពីមិត្តខ្ញុំនៅអាល្លីម៉ង់ សេចក្ដីស្រឡាញ់របស់យើងចំពោះព្រះ និងបុត្រាបុត្រីរបស់ទ្រង់ គឺជាទីបន្ទាល់ដ៏មានអានុភាពទៅកាន់ពិភពលោកថា នេះគឺជាសាសនាចក្ររបស់ព្រះគ្រីស្ទដ៏ពិត ។
សូមឲ្យព្រះប្រទានពរដល់យើងឲ្យព្យាយាមយ៉ាងអត់ធ្មត់ ប៉ុន្តែដោយឧស្សាហ៍ព្យាយាមដើម្បីរស់នៅតាមភាពដ៏ល្អឥតខ្ចោះដែលព្រះអង្គសង្គ្រោះ ព្រះប្រោសលោះ និងចៅហ្វាយនាយរបស់យើងបានកំណត់សម្រាប់យើង— ដើម្បីឲ្យមនុស្សទាំងអស់នឹងដឹងថាយើងគឺជាពួកសិស្សរបស់ទ្រង់ ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។