គ្រាតាំងរបស់ទាំងអស់ឡើងវិញ
( កិច្ចការ ៣:២១ )
« ដំណឹងល្អ » ដ៏សំខាន់ និងរុងរឿងបំផុត គឺជាសារលិខិតដែលព្រះអម្ចាស់ព្រះយេស៊ូវគ្រីស្ទបានស្ដារដំណឹងល្អ និងសាសនាចក្ររបស់ទ្រង់ឡើងវិញនៅក្នុងថ្ងៃចុងក្រោយនេះ ។
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយត្រូវបានបង្កើតឡើង ១៩៥ ឆ្នាំកន្លងមកហើយ នាថ្ងៃទី៦ ខែមេសា ឆ្នាំ១៨៣០ ។
ក្រុមជំនុំនៃពួកអ្នកជឿតូចមួយ និងមិត្តភក្តិបានប្រមូលផ្ដុំគ្នាសម្រាប់ឱកាសដ៏សំខាន់ និងសប្បាយរីករាយនេះ ។ ព្រះវិញ្ញាណដែលចាក់ស្រោចមកដ៏មហិមា បានប្រទានពរដល់មនុស្សទាំងអស់ដែលចូលរួម នៅពេលដែលពិធីសាក្រាម៉ង់ត្រូវបានធ្វើឡើង អំណោយទាននៃព្រះវិញ្ញាណបរិសុទ្ធត្រូវបានប្រគល់ឲ្យ ពិធីបរិសុទ្ធនៃបព្វជិតភាពត្រូវបានធ្វើឡើង និងសេចក្តីពិតនៃដំណឹងល្អនៃព្រះយេស៊ូវគ្រីស្ទត្រូវបានផ្សព្វផ្សាយ ។
នៅក្នុងសាសនាចក្រដែលបានស្ថាបនាឡើងវិញរបស់ទ្រង់ ព្រះអម្ចាស់បានតែងតាំង យ៉ូសែប ស្ម៊ីធ ដែលមានអាយុ ២៤ឆ្នាំ តាមរយៈវិវរណៈ ធ្វើជាអ្នកដឹកនាំសាសនាចក្រនៅលើផែនដី ៖ « ជាអ្នកមើលឆុត ជាអ្នកបកប្រែ ជាព្យាការី ជាសាវកនៃព្រះយេស៊ូវគ្រីស្ទ ជាអែលឌើរនៃសាសនាចក្រតាមព្រះហឫទ័យនៃព្រះដ៏ជាព្រះវរបិតា និងព្រះគុណនៃព្រះអម្ចាស់របស់អ្នក ដ៏ជាព្រះយេស៊ូវគ្រីស្ទ » ។
ខ្ញុំអធិស្ឋានដោយស្មោះទូលសុំជំនួយពីព្រះវិញ្ញាណបរិសុទ្ធ នៅពេលយើងពិចារណាពីសារៈសំខាន់ និងឥទ្ធិពលដែលកំពុងបន្តនៃព្រឹត្តិការណ៍ដ៏ពិសេសនេះ នៅក្នុងប្រវត្តិសាស្រ្តពិភពលោក ។
ការនិមិត្តដំបូង
ការបង្កើតឡើងជាផ្លូវការនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាលំដាប់លំដោយនៃបទពិសោធន៍ដ៏អព្ភូតហេតុ ។ បទពិសោធន៍ដំបូងនៃបទពិសោធន៍ទាំងនេះបានកើតឡើង ១០ឆ្នាំមុន នៅប៉ែកខាងជើងនៃរដ្ឋញូវយ៉ក ។
នៅនិទាឃរដូវឆ្នាំ១៨២០ យុវជនម្នាក់ដែលមានឈ្មោះថា យ៉ូសែប ស្ម៊ីធ បានទៅក្នុងព្រៃក្បែរផ្ទះរបស់លោកដើម្បីអធិស្ឋាន ។ លោកមានសំណួរទាក់ទងនឹងសេចក្តីសង្រ្គោះនៃព្រលឹងរបស់លោក ហើយលោកចង់ដឹងថា « [ ព្រះវិហារ ]ណាមួយទៅដែលត្រូវ ដើម្បីឲ្យបានដឹងថា [ លោក ] គួរចូលរួមព្រះវិហារណាមួយ » ។ យ៉ូសែបបានទុកចិត្តថា ព្រះនឹងឆ្លើយតបការអធិស្ឋានរបស់លោក ហើយដឹកនាំលោក ។
សូមជ្រាបថា យ៉ូសែបមិនបានអធិស្ឋានគ្រាន់តែចង់ដឹងអ្វីដែលត្រឹមត្រូវនោះទេ ។ ផ្ទុយទៅវិញ លោកបានអធិស្ឋានដើម្បីដឹងថាអ្វីដែលត្រូវ ដូច្នេះលោកអាចធ្វើអ្វីដែលត្រឹមត្រូវ ។ យ៉ូសែបបានទូលសួរដោយសេចក្តីជំនឿ ហើយបានប្តេជ្ញាចិត្តដើម្បីធ្វើតាមចម្លើយដែលលោកបានទទួល ។
« នៅក្នុង[ ការឆ្លើយតប ]ចំពោះការអធិស្ឋានដោយ[ ស្មោះត្រង់ ]របស់លោក ព្រះដ៏ជាព្រះវរបិតា និងព្រះរាជបុត្រាទ្រង់ ព្រះយេស៊ូវគ្រីស្ទ បានលេចមកជួបយ៉ូសែប ហើយបានផ្ដើម ‹ តាំងរបស់ទាំងអស់ឡើងវិញ › ( កិច្ចការ ៣:២១ ) ដូចបានទាយទុកក្នុងព្រះគម្ពីរប៊ីប ។ នៅក្នុងការនិមិត្តនេះ លោកបានរៀនថា បន្ទាប់ពីការស្លាប់របស់ពួកសាវកជំនាន់ដើម នោះព្រះវិហាររបស់ព្រះគ្រីស្ទក្នុងគម្ពីរសញ្ញាថ្មីត្រូវបានបាត់បង់ពីផែនដី » ។ យ៉ូសែប ស៊្មីធ នឹងធ្វើជាឧបករណ៍នៅក្នុងការស្ដារឡើងវិញនូវគោលលទ្ធិ សិទ្ធិអំណាច និងសេចក្តីសញ្ញា ព្រមទាំងពិធីបរិសុទ្ធទាំងឡាយនៃសាសនាចក្រពីបុរាណរបស់ព្រះអង្គ សង្រ្គោះសាជាថ្មីម្តងទៀត ។
យ៉ូសែបបានបញ្ជាក់ថា ៖ « ខ្ញុំបានឃើញតួអង្គពីរ ដែលមានរស្មី និងសិរីរុងរឿងដែលពុំអាចពិពណ៌នាបានឡើយ ឈរនៅលើអាកាសពីលើរូបខ្ញុំ ។ តួអង្គមួយមានព្រះបន្ទូលមកខ្ញុំ ដោយហៅខ្ញុំតាមឈ្មោះ ហើយចង្អុលទៅតួអង្គមួយទៀត ដោយមានព្រះបន្ទូលថា—នេះជាព្រះរាជបុត្រាដ៏ស្ងួនភ្ងារបស់យើង ។ ចូរស្តាប់តាមទ្រង់ចុះ ! »
តាមរយៈការនិមិត្តនេះ និងបទពិសោធន៍កើតឡើងដ៏ទេវភាពបន្តបន្ទាប់មកទៀត យ៉ូសែប ស៊្មីធ ចាប់ផ្ដើមយល់ថា ព្រះ និងព្រះយេស៊ូវគ្រីស្ទបានស្គាល់លោកដោយផ្ទាល់ ខ្វល់ខ្វាយអំពីសេចក្តីសង្រ្គោះដ៏នៅអស់កល្បជានិច្ចរបស់លោក ហើយមានបេសកកម្មមួយសម្រាប់លោកធ្វើ ។ លោកក៏បានរៀនមេរៀនដ៏សំខាន់មួយអំពីគុណលក្ខណៈ ចរិកលក្ខណៈ និងភាពល្អឥតខ្ចោះនៃក្រុមព្រះផងដែរ—ហើយថា ព្រះវរបិតា និងព្រះរាជបុត្រាគឺជាអង្គដាច់ដោយឡែក និងផ្សេងពីគ្នា ។ ព្រះយេស៊ូវគ្រីស្ទគឺជាព្រះរាជបុត្រារបស់ព្រះពិតប្រាកដទាំងនៅក្នុងវិញ្ញាណ និងនៅក្នុងសាច់ឈាម ។
យ៉ូសែប ស្ម៊ីធ បានប្រកាសថា ព្រះវរបិតាសួគ៌ និងព្រះយេស៊ូវគ្រីស្ទគឺជាតួអង្គដែលមានរូបកាយ ។ លោកបានមានប្រសាសន៍ថា « ព្រះវរបិតា ទ្រង់មានព្រះកាយជាសាច់ និងឆ្អឹង ដែលជាក់ស្ដែងដូចជារូបកាយមនុស្ស ព្រះរាជបុត្រាក៏ដូច្នោះដែរ ប៉ុន្តែព្រះវិញ្ញាណបរិសុទ្ធពុំមានព្រះកាយជាសាច់ និងឆ្អឹងឡើយ តែមានរូបជាវិញ្ញាណវិញ » ។
ខ្ញុំសូមថ្លែងទីបន្ទាល់ពីការយាងមករបស់ព្រះវរបិតា និងព្រះរាជបុត្រាទៅកាន់ យ៉ូសែប ស្ម៊ីធ ថាជាព្រឹត្តិការណ៍ដែលផ្ដួចផ្ដើមដ៏ធំ« នូវការសាងឡើងវិញនៃរបស់ទាំងអស់ ដែលបានពោលដោយមាត់នៃពួកព្យាការីបរិសុទ្ធ ចាប់តាំងពីដើមមក » ។
ព្រះគម្ពីរមរមន
លំដាប់លំដោយនៃបទពិសោធន៍ដ៏អព្ភូតហេតុទីពីរ ដែលបានដឹកនាំទៅរកការបង្កើតឡើងជាផ្លូវការនៃការស្ដារឡើងវិញនូវសាសនាចក្ររបស់ព្រះអង្គសង្រ្គោះ គឺជាការបកប្រែ និងការលេចចេញមកនៃព្រះគម្ពីរមរមន ។
« យ៉ូសែប ស៊្មីធត្រូវបានប្រគល់អំណោយទាន និងអំណាចនៃព្រះដើម្បីបកប្រែកំណត់ត្រាពីបុរាណគឺព្រះគម្ពីរមរមន ៖ សក្ខីបទមួយ—ទៀតអំពីព្រះយេស៊ូវគ្រីស្ទ ។ … អត្ថបទដ៏ពិសិដ្ឋនេះ រួម [ មាន ]នូវដំណើររឿងនៃការបម្រើដោយផ្ទាល់របស់ព្រះយេស៊ូវគ្រីស្ទនៅក្នុងចំណោមរាស្ត្រនៅអឌ្ឍគោលខាងលិចភ្លាមបន្ទាប់ពីការរស់ឡើងវិញរបស់ទ្រង់ ។ [ ព្រះគម្ពីរមរមន ] បង្រៀនអំពីគោលបំណងជីវិត ហើយពន្យល់អំពីគោលលទ្ធិនៃព្រះគ្រីស្ទដែលសំខាន់ចំពោះគោលបំណងនោះ ។ ជាដៃគូគម្ពីរទៅនឹងគម្ពីរប៊ីប ព្រះគម្ពីរមរមនថ្លែងទីបន្ទាល់ថា មនុស្សគ្រប់រូបគឺជាបុត្រាបុត្រីនៃព្រះបិតាសួគ៌ជាទីស្រឡាញ់ ថាទ្រង់មានផែនការដ៏ទេវភាពសម្រាប់ជីវិតរបស់យើង ហើយថាព្រះរាជបុត្រាទ្រង់ ព្រះយេស៊ូវគ្រីស្ទ មានបន្ទូលនៅសព្វថ្ងៃនេះ ក៏ដូចជាពីជំនាន់មុនដែរ » ។
ក្នុងនាមជាសមាជិកនៃសាសនាចក្រដែលបានស្ដារឡើងវិញរបស់ព្រះអង្គសង្រ្គោះ « យើងខ្ញុំជឿថា ព្រះគម្ពីរប៊ីបគឺជាព្រះបន្ទូលនៃព្រះ បើសិនជាបានបកប្រែត្រឹមត្រូវ យើងខ្ញុំក៏ជឿដែរថា ព្រះគម្ពីរមរមនជាព្រះបន្ទូលនៃព្រះ » ។ ព្រះគម្ពីរមរមនគឺជាសក្ខីបទមួយទៀតអំពីព្រះយេស៊ូវគ្រីស្ទ បញ្ជាក់ភាពពេញលេញនៃព្រះគម្ពីរប៊ីប ហើយស្ដារឡើងវិញនូវសេចក្ដីពិតដ៏ច្បាស់ និងពិសេសៗជាច្រើន ដែលបានបាត់បង់ពីព្រះគម្ពីរប៊ីប ។
បព្វជិតភាពបានស្តារឡើងវិញ
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយបង្រៀនថា សាសនាចក្រដើមដែលបានបង្កើតឡើងដោយព្រះអង្គសង្រ្គោះ ដោយនូវសិទ្ធិអំណាច គោលលទ្ធិ និងសេចក្តីសញ្ញា និងពិធីបរិសុទ្ធទាំងឡាយរបស់ខ្លួន ត្រូវបានបាត់បង់ពីផែនដី ។ ដោយជាផ្នែកនៃការស្ដារឡើងវិញដែលបានព្យាករនៃអ្វីៗទាំងអស់នៅក្នុងថ្ងៃចុងក្រោយ ពួកព្យាការី និងពួកសាវកពីបុរាណ បានប្រគល់សិទ្ធិអំណាចដល់ យ៉ូសែប ស្ម៊ីធ ដោយផ្ទាល់ ហើយបានប្រគល់ឲ្យនូវកូនសោបព្វជិតភាពដល់លោក ។ នេះគឺជាលំដាប់លំដោយនៃបទពិសោធន៍ដ៏អព្ភូតហេតុទីបី ដែលបានដឹកនាំទៅរកការបង្កើតឡើងជាផ្លូវការនៃការស្ដារឡើងវិញនូវសាសនាចក្ររបស់ព្រះអង្គសង្រ្គោះ ។
សិទ្ធិអំណាចបព្វជិតភាពអនុញ្ញាតឲ្យពួកអ្នកបម្រើរបស់ព្រះដើម្បី « ធ្វើជាអ្នកតំណាងឲ្យ[ ទ្រង់ ] និងប្រព្រឹត្តនៅក្នុងព្រះនាមទ្រង់ » ។ « កូនសោទាំងឡាយនៃបព្វជិតភាពគឺជាសិទ្ធិអំណាចដើម្បីដឹកនាំការប្រើប្រាស់បព្វជិតភាពជំនួសឲ្យបុត្រាបុត្រីរបស់ព្រះ » ។
ក្រោមការដឹកនាំរបស់ព្រះវរបិតា និងព្រះរាជបុត្រា យ៉ូហាន បាទីស្ទដែលបានរស់ឡើងវិញបានស្ដារសិទ្ធិអំណាចដើម្បីធ្វើពិធីបុណ្យជ្រមុជទឹកដោយការពន្លិចសម្រាប់ការផ្ដាច់បាប នៅឆ្នាំ១៨២៩ ។ នៅឆ្នាំដដែលនោះ ពួកសាវកបីនាក់ក្នុងចំណោមពួកសាវកដប់ពីរនាក់កាលពីដើម—ពេត្រុស យ៉ាកុប និងយ៉ូហាន—បានស្ដារភាពជាសាវក និងសិទ្ធិអំណាចបព្វជិតភាព និងកូនសោទាំងឡាយឡើងវិញ ។
ប្រាំមួយឆ្នាំក្រោយពីការបង្កើតសាសនាចក្រជាផ្លូវការ នៅក្នុងព្រះវិហារបរិសុទ្ធខឺឡង់ ម៉ូសេ អេលីយ៉ាស និងអេលីយ៉ា បានប្រគល់ឲ្យនូវសិទ្ធិអំណាចបន្ថែមដល់យ៉ូសែប ដែលចាំបាច់ដើម្បីសម្រេចកិច្ចការរបស់ព្រះនៅក្នុងសម័យចុងក្រោយ ។
ម៉ូសេបានប្រគល់ឲ្យនូវកូនសោនៃការប្រមូលផ្ដុំអ៊ីស្រាអែល ។
អេលីយ៉ាសបានប្រគល់ឲ្យនូវគ្រាកាន់កាប់ត្រួតត្រានៃដំណឹងល្អរបស់អ័ប្រាហាំ ដោយរួមទាំងការស្ដារឡើងវិញនៃសេចក្តីសញ្ញាអ័ប្រាហាំ ។
អេលីយ៉ាបានប្រគល់ឲ្យនូវកូនសោនៃអំណាចផ្សារភ្ជាប់ ដែលផ្ដល់នូវសិទ្ធិអំណាចដែលអនុញ្ញាតឲ្យពិធីបរិសុទ្ធទាំងឡាយដែលបានធ្វើឡើងនៅលើផែនដី ត្រូវចងដល់ភាពអស់កល្បជានិច្ចដូចជា ការភ្ជាប់ក្រុមគ្រួសារជាមួយគ្នានៅក្នុងទំនាក់ទំនងដ៏នៅអស់កល្បជានិច្ច ដែលឆ្លងកាត់សេចក្តីស្លាប់ ។
សាសនាចក្រនៃព្រះយេស៊ូវគ្រីស្ទត្រូវបានរៀបចំឡើង
នៅពេល យ៉ូសែប ស្ម៊ីធ បានបកប្រែព្រះគម្ពីរមរមន លោកបានទទួលវិវរណៈដែលបង្ហាញថា សាសនាចក្រនៃព្រះយេស៊ូវគ្រីស្ទនឹងត្រូវបានស្ថាបនាឡើងវិញ ។ ប៉ុន្តែព្រះអម្ចាស់បានណែនាំយ៉ូសែបមិនឲ្យបង្កើតសាសនាចក្ររបស់ទ្រង់ភ្លាមៗនោះទេ ។ ផ្ទុយទៅវិញ « ដោយវិញ្ញាណនៃការព្យាករណ៍ និងវិវរណៈ » ព្រះអម្ចាស់បានបើកសម្តែងដល់យ៉ូសែបនូវ « ថ្ងៃដ៏ជាក់ … [ លោក ] គប្បីចាប់កសាងសាសនាចក្ររបស់ទ្រង់[ ម្តងទៀត ]នៅលើផែនដី » ។
សាសនាចក្រត្រូវបានបង្កើតឡើងតាមលំដាប់លំដោយដ៏ត្រឹមត្រូវ តែបន្ទាប់ពីការស្ដារឡើងវិញនៃបព្វជិតភាព និងការបោះពុម្ពនៃព្រះគម្ពីរមមរនប៉ុណ្ណោះ ។ ព្រះគម្ពីរមរមនដែលបានបោះពុម្ពជាលើកទីមួយ មានសម្រាប់ប្រើប្រាស់នៅថ្ងៃទី២៦ ខែមីនា ឆ្នាំ១៨៣០ ហើយសាសនាចក្រត្រូវបានបង្កើតឡើងនៅថ្ងៃទី៦ ខែមេសា ។
« សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ … គឺជាសាសនាចក្ររបស់ព្រះគ្រីស្ទនៅក្នុងគម្ពីរសញ្ញាថ្មីដែលបានស្ដារឡើងវិញ ។ សាសនាចក្រនេះគឺជាយុថ្កានៅក្នុងជីវិតដ៏ឥតខ្ចោះនៃថ្មជ្រុងយ៉ាងឯក គឺព្រះយេស៊ូវគ្រីស្ទ និងនៅក្នុងដង្វាយធួនដ៏និរន្ដរ៍ និងការរស់ឡើងវិញដ៏ពិតរបស់ទ្រង់ ។ ព្រះយេស៊ូវគ្រីស្ទបានហៅពួកសាវកជាថ្មីម្ដងទៀត ហើយបានប្រគល់សិទ្ធិអំណាចបព្វជិតភាពដល់ពួកគេ ។ ទ្រង់អញ្ជើញយើងទាំងអស់គ្នាឲ្យមករកទ្រង់ និងសាសនាចក្ររបស់ទ្រង់ ដើម្បីទទួលព្រះវិញ្ញាណបរិសុទ្ធ ពិធីបរិសុទ្ធនៃសេចក្ដីសង្គ្រោះ និងដើម្បីទទួលបានអំណរដ៏ខ្ជាប់ខ្ជួន » ។
សម័យកាន់កាប់ត្រួតត្រានៃពេលពេញកំណត់
ការបង្ហាញព្រះកាយនៃព្រះវរបិតា និងព្រះរាជបុត្រាចំពោះ យ៉ូសែប ស្ម៊ីធ ការបកប្រែ និងការលេចចេញមកនៃព្រះគម្ពីរមរមន និងការស្ដារឡើងវិញនៃកូនសោ និងសិទ្ធិអំណាចបព្វជិតភាព គឺជាតម្រូវការចាំបាច់ដើម្បីបង្កើតសាសនាចក្រដែលបានស្ដារឡើងវិញរបស់ព្រះអម្ចាស់កាលពី ១៩៥ ឆ្នាំកន្លងទៅ មកទល់នឹងសព្វថ្ងៃនេះ ។
នៅក្នុងគម្ពីរសញ្ញាចាស់ ព្យាការីដានីយ៉ែលបានបកស្រាយសុបិនអំពីថ្មដែលដាប់ផ្ដាច់ចេញពីភ្នំឥតដៃណាធ្វើ និងបានពេញផែនដីទាំងមូល ។ មួយឆ្នាំបន្ទាប់ពីការបង្កើតសាសនាចក្រ ព្រះអម្ចាស់បានណែនាំ យ៉ូសែប ស្ម៊ីធ ថាកូនសោនគរនៃព្រះ « ត្រូវបានផ្ទុកផ្ដាក់ដល់មនុស្សនៅលើផែនដី » ហើយ « ដំណឹងល្អ[ នៃព្រះយេស៊ូវគ្រីស្ទនឹង ]ត្រូវរមៀលចេញទៅដល់ទីបំផុតផែនដី ដូចជាថ្មដែលដាប់ផ្ដាច់ចេញពីភ្នំឥតដៃណាធ្វើ នឹងរមៀលចេញទៅរហូតដល់បានពេញផែនដីទាំងមូល » ជាថ្មីម្តងទៀត ។
ខ្ញុំសូមថ្លែងទីបន្ទាល់ថា ៖ព្រះអម្ចាស់បានបំពេញការសន្យារបស់ទ្រង់ ។ សាសនាចក្រដែលបានស្ដារឡើងវិញរបស់ព្រះអង្គសង្រ្គោះ គឺត្រូវបានស្ថាបនាឡើងនៅទូទាំងពិភពលោក ហើយជាឧបករណ៍ដែលព្រះនឹង « បំព្រួមគ្រប់ទាំងអស់ក្នុងព្រះគ្រីស្ទ ទាំងរបស់នៅស្ថានសួគ៌ និងរបស់នៅផែនដីផង » ។
កិច្ចការនៅថ្ងៃចុងក្រោយរបស់ព្រះអម្ចាស់ « គឺជាបុព្វហេតុដែលប្រជារាស្ត្ររបស់ព្រះចាប់អារម្មណ៍នៅក្នុងគ្រប់សម័យកាល វាគឺជាប្រធានបទមួយដែលព្យាការី សង្ឃ និងស្តេចបានរស់នៅក្នុងគ្រាដ៏រីករាយអស្ចារ្យ ពួកគេបានទន្ទឹងចាំដោយអំណរនាជំនាន់ដែលពួកយើងរស់នៅ ហើយបានរីករាយដោយអំណរ និងសេចក្ដីសង្ឃឹមពីសួគ៌ារហូតដល់ពួកគេបានច្រៀង ហើយសរសេរ ព្រមទាំងបានព្យាករពីជំនាន់របស់យើងនេះ » ។
នៅគ្រាកាន់កាប់ត្រួតត្រានៃដំណឹងល្អដ៏មហិមា និងចុងក្រោយបំផុត « ទាំងមូល និងពេញលេញ និងល្អឥតខ្ចោះនៃការកាន់កាប់ត្រួតត្រា និងកូនសោ និងអំណាច និងសិរីល្អទាំងឡាយបានកើតឡើង ហើយបានបើកសម្ដែងប្រាប់ តាំងពីសម័យលោកអ័ដាម រហូតមកដល់ពេលនេះ ។ ហើយមិនតែប៉ុណ្ណេះសោត ប៉ុន្តែពីការណ៍ទាំងនោះផង ដែលពុំដែលបានបើកសម្ដែងប្រាប់ តាំងពីកំណើតលោកិយមកម្ល៉េះ … នឹងត្រូវបានបើកសម្ដែង … នៅក្នុងសម័យនេះ គឺជាការកាន់កាប់ត្រួតត្រានៃពេលពេញកំណត់ » ។
ព្យាការី យ៉ូសែប ស្ម៊ីធ បានពន្យល់បន្តទៀតថា « ពិធីបរិសុទ្ធ និងភារកិច្ចទាំងអស់ ដែលតម្រូវដោយបព្វជិតភាព នៅក្រោមការដឹកនាំ និងបទបញ្ញត្តិនៃព្រះដែលមានមហិទ្ធិឫទ្ធិនៅក្នុងគ្រាកាន់កាប់ត្រួតត្រាណាមួយ គួរតែមាននៅក្នុងសម័យកាន់កាប់ត្រួតត្រាចុងក្រោយបង្អស់ … ដែលនាំមកនូវការស្ដារឡើងវិញ ដែលបាននិយាយដោយមាត់នៃពួកព្យាការីបរិសុទ្ធទាំងអស់ » ។
ការសន្យា និងទីបន្ទាល់
ខ្ញុំបានព្យាយាមសង្ខេបពីចំណុចគ្រឹះនៃ « ដំណឹងល្អ » ដ៏សំខាន់ និងរុងរឿងបំផុត ដែលមនុស្សគ្រប់គ្នានៅកន្លែងណាមួយក្នុងពិភពលោកនេះអាចទទួលបាន—នោះគឺសារលិខិតដែលព្រះអម្ចាស់ព្រះយេស៊ូវគ្រីស្ទបានស្ដារដំណឹងល្អ និងសាសនាចក្ររបស់ទ្រង់ឡើងវិញនៅក្នុងថ្ងៃចុងក្រោយនេះ ។
ខ្ញុំសូមអញ្ជើញមនុស្សទាំងអស់ឲ្យរៀនអំពី ហើយបញ្ជាក់សារលិខិតនេះ ។ ខ្ញុំសន្យាថា បុគ្គលទាំងឡាយដែល « សិក្សាសារលិខិតអំពីការស្ដារឡើងវិញប្រកបដោយការអធិស្ឋាន ហើយធ្វើសកម្មភាពដោយក្តីជំនឿ នឹងត្រូវប្រទានពរ[ តាមរយៈព្រះចេស្ដានៃព្រះវិញ្ញាណបរិសុទ្ធ ]ឲ្យទទួលបានសាក្សីផ្ទាល់ខ្លួនអំពីទេវភាព និងគោលបំណងរបស់វាដើម្បីរៀបចំពិភពលោកសម្រាប់ការយាងមកជាលើកទីពីររបស់ព្រះអម្ចាស់ និងព្រះអង្គសង្គ្រោះ ព្រះយេស៊ូវគ្រីស្ទរបស់យើង ដូចដែលបានសន្យា » ។ នៅពេលបងប្អូនអធិស្ឋានដោយស្មោះសរ ដោយមានការរំពឹងទុក ទាំងទទួល និងធ្វើតាមចម្លើយមកពីព្រះ ដូចជាយុវជន យ៉ូសែប ស្ម៊ីធ បានធ្វើ នោះសមត្ថភាពរបស់បងប្អូនដើម្បីរៀបចំ និងឆ្លើយតបទៅនឹងសាក្សីដ៏ទេវភាពនោះនឹងកើនឡើង ។
ខ្ញុំធ្វើជាសាក្សីថា ព្រះដែលជាព្រះវរបិតាដ៏អស់កល្បគឺជាព្រះបិតារបស់យើង ។ ខ្ញុំថ្លែងទីបន្ទាល់ និងជាសាក្សីថា ព្រះយេស៊ូវគ្រីស្ទគឺជាព្រះរាជបុត្រាបង្កើតតែមួយគត់ និងជាបុត្រដ៏ស្ងួនភ្ងារបស់ព្រះវរបិតានៅក្នុងសាច់ឈាម ។ ទ្រង់គឺជាព្រះអង្គសង្រ្គោះ និងព្រះប្រោសលោះរបស់យើង ។
ហើយខ្ញុំក៏សូមធ្វើជាសាក្សីដ៏មានអំណរផងដែរថា ព្រះវរបិតា និងព្រះរាជបុត្រា បានបង្ហាញព្រះកាយដល់យុវជន យ៉ូសែប ស្ម៊ីធ ហើយនោះគឺជាការចាប់ផ្ដើមនៃការស្ដារឡើងវិញ នូវដំណឹងល្អរបស់ព្រះយេស៊ូវគ្រីស្ទនៅថ្ងៃចុងក្រោយនេះ ។ ព្រះគម្ពីរមរមនគឺជាសក្ខីបទមួយទៀតអំពីព្រះយេស៊ូវគ្រីស្ទ ហើយមានបន្ទូលរបស់ព្រះ ។ សិទ្ធិអំណាចបព្វជិតភាពដើម្បីធ្វើជាតំណាងឲ្យព្រះអង្គសង្រ្គោះ និងប្រព្រឹត្តនៅក្នុងព្រះនាមទ្រង់ម្តងទៀត គឺមាននៅលើផែនដីនេះ ។ ហើយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្ររបស់ព្រះគ្រីស្ទនៅក្នុងគម្ពីរសញ្ញាថ្មីដែលបានស្ដារឡើងវិញ ។ ខ្ញុំសូមថ្លែងសាក្សីដ៏ច្បាស់លាស់របស់ខ្ញុំថា អ្វីៗទាំងនេះគឺពិត នៅក្នុងព្រះនាមដ៏ពិសិដ្ឋនៃព្រះអម្ចាស់ព្រះយេស៊ូវគ្រីស្ទ អាម៉ែន ។