នៅចំពោះមុខយើង

ដោយអែលឌើរ រ៉ូណល អេ រ៉ាសបាន

ក្នុងកូរ៉ុមនៃពួកសាវកដប់ពីរនាក់

សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មាននូវកំណើនចំនួនសមាជិក និងក្រុមគ្រួសារ បេសកកម្ម និងពួកអ្នកផ្សព្វផ្សាយសាសនា សាលាប្រជុំ និងព្រះវិហារបរិសុទ្ធ ។

បងប្អូនប្រុសស្រី ខ្ញុំមានអំណរគុណដែលមានវត្តមានជាមួយបងប្អូន ។ យើងស្រឡាញ់បងប្អូន យើងមានអំណរគុណចំពោះបងប្អូន ហើយយើងមានពរតាមរយៈការអធិស្ឋានរបស់បងប្អូន ។

ប្រធាន រ័សុល អិម ណិលសិន បានមានប្រសាសន៍នៅសន្និសីទលើកមុនរបស់យើងថា ៖ « តើបងប្អូនមើលឃើញអ្វីដែលកំពុងកើតឡើងនៅចំពោះមុខយើងដែរឬទេ ? ខ្ញុំសូមអធិស្ឋានកុំឲ្យយើងខកខាននូវភាពដ៏អស្ចារ្យនៃគ្រានេះ ! ព្រះអម្ចាស់ពិតជាកំពុងពន្លឿនកិច្ចការទ្រង់ » ។

ការពន្លឿនកិច្ចការរបស់ទ្រង់ ។ « ពន្លឿន » គឺជាពាក្យដែលសំខាន់ ។ ពន្លឿនមានន័យថាការផ្លាស់ទីទៅមុខយ៉ាងឆាប់រហ័ស ការបន្ថែមល្បឿន និងថែមទាំងការប្រញាប់ប្រញាល់ផងដែរ ។ នៅក្នុងការរីកចម្រើនរបស់សាសនាចក្រ និងផែនការនៃព្រះគ្រីស្ទ ការពន្លឿនគឺកំពុងតែប្រព្រឹត្តឡើង ។ ហើយយើងគឺជាផ្នែកមួយនៃកិច្ចការនេះ ។

ក្នុងខែមេសា ឆ្នាំ១៨៣៤ នៅទីក្រុងខឺតឡង់ រដ្ឋអូហៃអូ ព្យាការី យ៉ូសែប ស៊្មីធ បានប្រមូលផ្ដុំអស់អ្នកដែលកាន់បព្វជិតភាពនៅក្នុងអគារសាលារៀនតូចមួយ មានទំហំប្រហែល ១៤ ហ្វីត ( ៤.៣ ម ) ការ៉េ ។ នៅក្នុងមជ្ឈមណ្ឌលសន្និសីទនេះយើងអាចផ្ទុកអគារសាលាទាំងនោះបានយ៉ាងច្រើន ហើយនៅសល់កន្លែងទំនេរទៀតផង ។ យ៉ូសែប ស្ម៊ីធ បានមានប្រសាសន៍ថា « បងប្អូនឃើញបព្វជិតភាពមានចំនួនតិចនៅយប់នេះ ប៉ុន្តែសាសនាចក្រនេះនឹងបំពេញនៅអាមេរិកខាងជើង និងខាងត្បូង—វានឹងមាននៅទូទាំងពិភពលោក » ។

ការព្យាករនោះគឺបានបំពេញ « នៅចំពោះមុខយើង » ។ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មាននូវកំណើនចំនួនសមាជិក និងក្រុមគ្រួសារ បេសកកម្ម និងពួកអ្នកផ្សព្វផ្សាយសាសនា សាលាប្រជុំ និងព្រះវិហារបរិសុទ្ធ ហើយនិងការចុះឈ្មោះចូលរៀនថ្នាក់សិក្ខាសាលា វិទ្យាស្ថាន និងសាកលវិទ្យាល័យរបស់យើងនៅទូទាំងពិភពលោក ។

យើងមានអំណរគុណដែលបាននៅលើផែនដី នៅពេលដែលសាសនាចក្រមានកំណើនតួលេខ និងមានឥទ្ធិពលកាន់តែខ្លាំង ប៉ុន្ដែអ្វីដែលសំខាន់ជាងនេះនោះគឺឥទ្ធិពលដែលសាសនាចក្របានមាននៅក្នុងដួងចិត្ដ និងជីវិតរបស់សមាជិកទាំងឡាយ ។ យើងត្រូវបានហៅថាជាពួកសិស្សរបស់ព្រះយេស៊ូវគ្រីស្ទ ។ យើងមានទីបន្ទាល់អំពីទ្រង់ សាសនាចក្ររបស់ទ្រង់ របៀបរបស់ទ្រង់ និងផ្លូវនៃសេចក្ដីសញ្ញារបស់ទ្រង់រួមគ្នា ។ យើងគឺជារាស្ដ្ររបស់ទ្រង់ ហើយទ្រង់គឺជាព្រះអង្គសង្គ្រោះរបស់យើង ។

ខ្ញុំស្ញប់ស្ញែងនូវអ្វីដែលប្រធាន ណិលសុន ហៅថា « ភាពដ៏អស្ចារ្យនៃគ្រានេះ » ហើយខ្ញុំសូមបង្ហាញនូវអំណរគុណយ៉ាងជ្រាលជ្រៅចំពោះព្រះអម្ចាស់សម្រាប់កិច្ចការរបស់ទ្រង់ ។ ខ្ញុំសូមលើកទឹកចិត្ដយើងទាំងអស់គ្នាឲ្យឈរឲ្យខ្ពស់ក្នុងនាមជាពួកសិស្សរបស់ទ្រង់ ជាសាក្សីផ្ទាល់ភ្នែកចំពោះការបំពេញនៃការព្យាករ ទាំងនៅសម័យបុរាណ និងសម័យទំនើប ។

មានពួកអ្នកដែលចំអកឡកឡឺយដែលស្រែកថា « មើលន៏ នៅទីនេះ ហើយ … មើលន៏ នៅទីនោះ ! » ដូចដែលពួកគេបានធ្វើនៅជំនាន់របស់ព្យាការី យ៉ូសែប ស្ម៊ីធអ៊ីចឹងដែរ ។ ទោះជាយ៉ាងនេះក្ដី ពួកគេមានផលប៉ះពាល់តិចតួចណាស់នៅក្នុងកិច្ចការដ៏ឱឡារិកនេះ ។ សូមចងចាំប្រសាសន៍របស់ យ៉ូសែប ស្ម៊ីធ ថា ៖ « គ្មានដៃដែលមិនស្អាតស្អំណាអាចបញ្ឈប់កិច្ចការនេះពីការរីកចម្រើនឡើយ ការធ្វើទុក្ខបុកម្នេញអាចកញ្ជ្រោលឡើង … តែសេចក្ដីពិតនៃព្រះនឹងឆ្ពោះទៅមុខដោយក្លៀវក្លា ថ្លៃថ្នូរ និងឯករាជ្យរហូតទាល់តែវាបានដល់គ្រប់ទាំងទ្វីប គ្រប់តំបន់ គ្រប់ប្រទេស និងបានឮដល់គ្រប់ត្រចៀករហូតដល់គោលបំណងនៃព្រះនឹងបានសម្រេច ហើយព្រះយេហូវ៉ាដ៏អស្ចារ្យនឹងមានបន្ទូលថា កិច្ចការបានចប់ហើយ » ។

នៅក្នុងការចាត់តាំងរបស់ខ្ញុំនៅឆ្នាំនេះ ខ្ញុំស្ថិតនៅក្នុងតួនាទីមួយដែលធ្វើជាសាក្សីមុនគេអំពីព្រះអម្ចាស់ ពន្លឿនកិច្ចការរបស់ទ្រង់ ។ សាសនាចក្រកំពុងសាងសង់ព្រះវិហារបរិសុទ្ធទាំងឡាយនៅក្នុងល្បឿនមួយដែលមិនធ្លាប់មានពីមុនមក ដែលបានផ្ដល់ឱកាសដល់សមាជិកដើម្បីថ្វាយបង្គំនៅក្នុងដំណាក់នៃព្រះអម្ចាស់ ។ ទីពីរ កិច្ចការផ្សព្វផ្សាយសាសនាកំពុងនាំមនុស្សយ៉ាងច្រើនចូលមកក្នុងក្រោលនៃអ្នកគង្វាលល្អ គឺព្រះយេស៊ូវគ្រីស្ទ ។ ហើយទីបី ការអប់រំរបស់សាសនាចក្រដែលមានតាមបែបសណ្ឋានជាច្រើន នៅកម្រិតខ្ពស់ថ្មីមួយកំពុងបង្រៀនអស់អ្នកដែល « ស្វែងរកព្រះយេស៊ូវគ្រីស្ទ » ។

សព្វថ្ងៃនេះសាសនាចក្រមានព្រះវិហារបរិសុទ្ធចំនួន ៣៦៧ ដែលស្ថិតក្នុងដំណាក់កាលនៃការរចនា សាងសង់ ឬដំណើរការ ។ ហើយសម្រាប់គោលបំណងអ្វី ? ចម្លើយគឺជាការប្រកាសដែលមាននៅលើព្រះវិហារបរិសុទ្ធនីមួយៗ ៖ « បរិសុទ្ធភាពថ្វាយព្រះអម្ចាស់ » ។ ព្រះវិហារបរិសុទ្ធបើកផ្លូវទៅកាន់ពរជ័យដ៏ខ្ពស់បំផុត ដែលព្រះវរបិតាដែលគង់នៅស្ថានសួគ៌របស់យើងមានសម្រាប់យើងម្នាក់ៗ ។ បងប្អូនប្រុសស្រី យើងកំពុងពន្លឿនបរិសុទ្ធភាពរបស់យើង នៅពេលយើងរស់នៅដោយស័ក្ដិសមសម្រាប់ព្រះវិហារបរិសុទ្ធ នៅពេលយើងថ្វាយបង្គំក្នុងដំណាក់នៃព្រះអម្ចាស់ និងនៅពេលយើងធ្វើសេចក្ដីសញ្ញាជាមួយព្រះសម្រាប់ខ្លួនយើង និងសម្រាប់បុព្វការីជនរបស់យើងដែលនៅម្ខាងទៀតនៃវាំងនន ។

ប្រធាន ណិលសុន បានមានប្រសាសន៍ ៖ « ការវាយប្រហាររបស់មារសត្រូវកំពុងតែមានភាពខ្លាំងឡើងៗយ៉ាងក្លៀវក្លា និងមានគ្រប់មធ្យោបាយ ។ តម្រូវការរបស់យើងដើម្បីនៅក្នុងព្រះវិហារបរិសុទ្ធជាទៀងទាត់ គឺចាំបាច់នៅក្នុងពេលនេះ ជាងពេលណាៗទាំងអស់ ។ ខ្ញុំសូមអង្វរបងប្អូនឲ្យពិចារណាទៅលើការចំណាយពេលវេលារបស់បងប្អូនប្រកបដោយការអធិស្ឋាន » ។ នៅក្នុងដំណាក់របស់ទ្រង់ យើងអាចទទួលអារម្មណ៍នៃវត្ដមានដ៏បរិសុទ្ធរបស់ព្រះអម្ចាស់ និងភាពសុខសាន្ដដ៏ធំធេង ។

អែលឌើរ និងស៊ីស្ទើររ៉ាស់បាន នៅឯព្រះវិហារបរិសុទ្ធ មែនដូស្សា អាហ្សង់ទីន<nb/>។

ឆ្នាំមុន ខ្ញុំមានអភ័យឯកសិទ្ធិធ្វើជាអធិបតីនៅក្នុងការឧទ្ទិសឆ្លងព្រះវិហារបរិសុទ្ធ មែនដូស្សា អាហ្សង់ទីន ។ នៅក្នុងសារលិខិតរបស់ខ្ញុំ ខ្ញុំបានយោងទៅលើការព្យាកររបស់អែលឌើរ មែលវិន ចេ បាឡឺដ នៅឆ្នាំ១៩២៦ ដែលថាកិច្ចការនៃព្រះអម្ចាស់នឹងរីកចម្រើនយ៉ាងសន្សឹមៗនៅក្នុងរយៈពេលខ្លីមួយនៅអាមេរិកខាងត្បូង « ដូចជាដើមអូក ដែលដុះយ៉ាងយឺតៗចេញពីផ្លែអូកយ៉ាងដូច្នោះដែរ ។ កិច្ចការរបស់ព្រះនឹងមិនកើតឡើងភ្លាមត្រឹមមួយថ្ងៃនោះទេ « ប៉ុន្ដែមនុស្សរាប់ពាន់នាក់នឹងចូលរួមក្នុងសាសនាចក្រ ហើយប្រទេសនានាក្នុងអាមេរិកខាងត្បូងនឹងក្លាយជា « អំណាចនៅក្នុងសាសនាចក្រ » ។ ខ្ញុំបានឃើញការព្យាករនោះបានបំពេញនៅចំពោះមុខខ្ញុំ ។

មែនដូស្សា ដែលធ្លាប់ជាផ្លែអូកដ៏តូច បានក្លាយជាដើមអូកដ៏ធំមហិមា ។ ការរីកចម្រើននោះគឺបានកើតឡើងម្ដងហើយម្ដងទៀតនៅទូទាំងទ្វីបទាំងឡាយ និងស្រុកក្បែរសមុទ្រ ។

យើងមើលឃើញព្រះអម្ចាស់ពន្លឿនកិច្ចការរបស់ទ្រង់នៅក្នុងបេសកកម្មទាំងឡាយ ។ នៅឆ្នាំ២០២៤ ពួកអ្នកផ្សព្វផ្សាយសាសនា ៨០,០០០នាក់បានបម្រើនៅក្នុងបេសកកម្មចំនួន ៤៥០ ។ ក្នុងចំណោមនោះ សាមសិបប្រាំមួយបេសកកម្ម គឺជាបេសកកម្មថ្មី ។ ឆ្នាំមុន កិច្ចការផ្សព្វផ្សាយសាសនាបាននាំសមាជិកថ្មីចំនួន ៣០៨,០០០ នាក់ចូលមកក្នុងសាសនាចក្រ ។ សំខាន់ជាងតួលេខ គោលបំណងនៃការប្រមូលផ្ដុំគឺការនាំព្រលឹងទាំងអស់មករកព្រះយេស៊ូវគ្រីស្ទ និងដំណឹងល្អរបស់ទ្រង់ ។

ខ្ញុំគិតអំពីសាវក ព្រិកហាំ យ៉ង់ និង ហ៊ីប៊ើរ ស៊ី ឃិមបឹល ដែលនៅក្នុងឆ្នាំ១៨៣៩ បានចេញជាអ្នកផ្សព្វផ្សាយសាសនាទៅកាន់កោះនៃចក្រភពអង់គ្លេស ។ ពួកលោកបានឈឺ ពួកលោកបានចាកចេញពីក្រុមគ្រួសារដែលកំពុងឈឺ និងខ្វះខាតយ៉ាងខ្លាំងរបស់ពួកលោក ។ ទោះជាយ៉ាងនេះក្ដី ពួកលោកទាំងពីរបានឡើងជិះរទេះ ហើយខណៈដែលមនុស្សជាទីស្រឡាញ់អាចមើលឃើញពួកលោក ហ៊ីប៊ើរបានមានប្រសាសន៍ថា « ចូរយើងក្រោកឡើង ហើយលើកទឹកចិត្ដពួកគេ » ។ លោកទាំងពីរប្រឹងឈរឡើង ហើយស្រែកថា « ជយោ ជយោ អ៊ីស្រាអែល » ។

ការជួបជាមួយអ្នកផ្សព្វផ្សាយសាសនានៅ លីម៉ា ពេរូ

ខ្ញុំបានឃើញភាពស្វាហាប់ដូចគ្នានេះសម្រាប់កិច្ចការរបស់ព្រះអម្ចាស់នៅ លីម៉ា ពេរ៉ូ នៅពេលខ្ញុំបានជួបពួកអ្នកផ្សព្វផ្សាយសាសនាចេញពីមជ្ឈមណ្ឌលបំពាក់បំប៉នអ្នកផ្សព្វផ្សាយសាសនា និងបេសកកម្មនៅ លីម៉ា ។ ឱ ! ជាការជួបជុំដ៏អស្ចារ្យអ្វីម៉្លេះ ! ខ្ញុំបានឃើញការពន្លឿននៅចំពោះមុខខ្ញុំ ។ ឥឡូវនេះមានបេសកកម្មថ្មីចំនួនប្រាំពីរទៀត នៅក្នុងទីក្រុង លីម៉ា ។

នៅចុងបញ្ចប់នៃការប្រជុំរបស់យើង ពួកអ្នកផ្សព្វផ្សាយសាសនាបានមាននូវការភ្ញាក់ផ្អើលមួយសម្រាប់ខ្ញុំ ។ ពួកគេបានឈរឡើង ហើយស្រែកថា « ជយោ អ៊ីស្រាអែល » ។ ខ្ញុំនឹងមិនភ្លេចពេលវេលានោះឡើយ ខ្ញុំប្រាថ្នាថាយើងទាំងអស់គ្នាបាននៅទីនោះដែរ ។ នៅចំពោះមុខខ្ញុំគឺជាពួកអ្នកផ្សព្វផ្សាយសាសនាដែលបានទុកចោលនូវ « អ្វីៗនៃលោកិយនេះ » ដើម្បីបម្រើព្រះអម្ចាស់ និងជួយពន្លឿនការយាងមករបស់ទ្រង់ ។

យើងមើលឃើញព្រះអម្ចាស់ពន្លឿនឱកាសការអប់រំសម្រាប់សមាជិករបស់យើង និងសូម្បីតែសម្រាប់អ្នកមិនមានជំនឿដូចយើង នៅជុំវិញពិភពលោកផងដែរ ។ រឿងមួយដែលធ្វើឲ្យយើងមានភាពពិសេសក្នុងនាមជាសាសនាចក្រនោះគឺការសង្កត់ធ្ងន់របស់យើងលើការអប់រំ ។ ព្រះអម្ចាស់បានបញ្ជានៅគ្រាដំបូងនៃការស្ដារឡើងវិញឲ្យ « ស្វែងរកការរៀនសូត្រគឺដោយសារការសិក្សា និងដោយសារសេចក្ដីជំនឿ » ។ ការណ៍នោះកំពុងកើតឡើងនៅសព្វថ្ងៃនេះ ហើយស័ក្ដិសមសម្រាប់ការហ៊ោថា « ជយោ » ។

ថ្មីៗនេះ សិស្សជាង ៨០០,០០០ នាក់នៅទូទាំងពិភពលោក បានចុះឈ្មោះចូលរៀនថ្នាក់សិក្ខាសាលា និងវិទ្យាស្ថាន ជាតួលេខនៃការចុះឈ្មោះដ៏ខ្ពស់បំផុតមិនធ្លាប់មាននៅក្នុងប្រវត្ដិសាសនាចក្រ ។ យុវវ័យរបស់យើងប្រមូលផ្ដុំគ្នាតាមរបៀបផ្សេងៗគ្នា មានតាំងពីថ្នាក់រៀនផ្ទាល់ និងអនឡាញនៅពេលព្រឹកព្រលឹម ពេលថ្ងៃ និងពេលល្ងាច និងការសិក្សានៅគេហដ្ឋានផងដែរ ។ ពួកគេគឺជាកងទ័ពចម្បាំងដ៏មានអំណាច និងសុចរិត ដែលទទួលនូវកម្លាំងពីគ្នាទៅវិញទៅមក កាលពួកគេរៀនអំពីព្រះយេស៊ូវគ្រីស្ទ ធ្វើតាម និងថ្លែងអំពីទ្រង់ថាជាព្រះរាជបុត្រានៃព្រះ ។

ការនិយាយទៅកាន់សិស្សថ្នាក់សិក្ខាសាលានិងថ្នាក់វិទ្យាស្ថាន<nb/>។

នៅរដូវស្លឹកឈើជ្រុះឆ្នាំមុន ខ្ញុំបានថ្លែងនៅការប្រជុំធម្មនិដ្ឋានមួយដែលមានសិស្សថ្នាក់សិក្ខាសាលា និងវិទ្យាស្ថានជាច្រើន ព្រមទាំងឪពុកម្ដាយរបស់ពួកគេផងដែរនៅឯសាកលវិទ្យាល័យយូថាហ៍ ។ វត្ដមានរបស់ពួកគេបានបង្ហាញពីបំណងប្រាថ្នាដ៏ខ្លាំងរបស់ពួកគេដើម្បីស្គាល់ និងធ្វើតាមព្រះយេស៊ូវគ្រីស្ទ ។ សារលិខិតរបស់ខ្ញុំទៅកាន់សិស្សទាំងនោះគឺច្បាស់លាស់ ៖ សូមផ្ដល់ពេលវេលាទៅដល់ព្រះអម្ចាស់ឲ្យបានសមរម្យ ។ ខ្ញុំបានប្រឹក្សាពួកគេឲ្យដាក់ការសិក្សារបស់ពួកគេឲ្យមានតុល្យភាពជាមួយនឹងការរៀនសូត្រដែលពិត បរិសុទ្ធជាង ជាការសិក្សាអំពី « ព្រះរាជបុត្រានៃព្រះដ៏មានព្រះជន្មរស់ » ។

ខ្ញុំសុំដូចគ្នាចំពោះបងប្អូនគ្រប់គ្នានៅថ្ងៃនេះ ៖ មិនថាមានអ្វីនៅក្នុងបញ្ជី « ដែលត្រូវធ្វើ » របស់បងប្អូនឡើយ សូមផ្ដល់ពេលវេលាដូចគ្នានឹងកិច្ចការផ្សេងទៀតដល់ព្រះអម្ចាស់ មិនមែនពេលវេលាទំនេរនោះទេនៅក្នុងការសិក្សាព្រះគម្ពីរផ្ទាល់ខ្លួន ការសិក្សា ចូរមកតាមខ្ញុំជាគ្រួសារ ការអធិស្ឋាន ការហៅបម្រើក្នុងសាសនាចក្រ ការងារបម្រើ ការទទួលទានសាក្រាម៉ង់ ការថ្វាយបង្គំក្នុងព្រះវិហារបរិសុទ្ធ និងការជញ្ជឹងគិតពីកិច្ចការទាំងឡាយនៃព្រះ ។ ព្រះអម្ចាស់ និងព្រះអង្គសង្គ្រោះរបស់យើងបានមានបន្ទូលថា « រៀននឹងខ្ញុំចុះ … នោះអ្នករាល់គ្នានឹងបានសេចក្តីសម្រាកដល់ព្រលឹង » ។ សូមជឿ និងធ្វើតាមព្រះបន្ទូលរបស់ទ្រង់ ។ ហើយផ្ដល់ពេលវេលាដូចគ្នានឹងកិច្ចការផ្សេងទៀតដល់ទ្រង់ ។

ប្រធាន ណិលសុន បានមានប្រសាសន៍ថា « ខ្ញុំសូមអង្វរបងប្អូនឲ្យទុកឲ្យព្រះឈ្នះនៅក្នុងជីវិតបងប្អូន ។ សូមថ្វាយពេលវេលារបស់បងប្អូនទៅទ្រង់ឲ្យបានសមរម្យ ។ កាលបងប្អូនធ្វើដូច្នោះ សូមកត់សម្គាល់អំពីអ្វីដែលនឹងកើតឡើងដល់សន្ទុះវិជ្ជមានខាងវិញ្ញាណរបស់បងប្អូន » ។

យើងមើលឃើញសន្ទុះនោះកំពុងស្ថាបនាឡើងនៅឯថ្នាក់សិក្ខាសាលា វិទ្យាស្ថាន និងសាកលវិទ្យាល័យរបស់សាសនាចក្រ ។ នៅក្នុងបរិយាកាសទាំងនេះ ព្រះអម្ចាស់គឺជាអាទិភាព ។ ដូចនេះទ្រង់គួរតែជាអាទិភាពនៅក្នុងជីវិតរបស់យើងម្នាក់ៗ ។

ផ្នែកមួយផ្សេងទៀតដែលបង្ហាញពីការរីកចម្រើននៃផ្នែកអប់រំនៅក្នុងសាសនាចក្រនោះ គឺ BYU–Pathway Worldwide ។ នៅទូទាំងពិភពលោក ការចុះឈ្មោះចូលរៀនបានកើនជិត ៧៥,០០០ ហើយបន្ដកើនឡើងជាបន្ដបន្ទាប់ ។ ភាគច្រើនជាសមាជិក ហើយច្រើនជាងមួយភាគបីគឺនៅទ្វីបអាហ្វ្រិក ។ កម្មវិធី Pathway គឺ ផ្ដល់នូវឱកាសកាន់តែច្រើនសម្រាប់ការទទួលបានការអប់រំ ។ ការបញ្ចប់វគ្គសិក្សាទាំងឡាយមានន័យថាការទទួលបានការងារ ហើយការទទួលបានការងារមានន័យថាជីវិតល្អប្រសើរសម្រាប់ក្រុមគ្រួសារ និងឱកាសបន្ថែមទៀតដើម្បីបម្រើព្រះអម្ចាស់ ។

ការជួបប្រជុំជាមួយថ្នាក់ដឹកនាំស្តេកនៅអ៊ុយហ្គាន់ដា<nb/>។

ពេលខ្ញុំនៅក្នុងការប្រជុំជាមួយថ្នាក់ដឹកនាំស្ដេកនៅអ៊ុយហ្គាន់ដា ខ្ញុំបានដឹងថាគណៈប្រធានស្ដេកទាំងមូលបានចុះឈ្មោះរៀន BYU–Pathway ។ ពេលយើងកាន់តែបានរៀបចំខ្លួនខាងសាច់ឈាម និងខាងវិញ្ញាណ យើងកាន់តែអាចរារាំងការវាយប្រហារដ៏បោកបញ្ឆោតរបស់មារសត្រូវ ។ សូមចងចាំពាក្យសម្ដី របស់ពេត្រុស ៖ « ខ្មាំងសត្រូវ វាតែងដើរក្រវែល ទាំងគ្រហឹមដូចជាសិង្ហ ដើម្បីរកអ្នកណាដែលវានឹងត្របាក់លេបបាន » ។

ខ្ញុំទទួលស្គាល់ថានៅក្នុងការណ៍ដ៏ល្អៗនៃដំណឹងល្អ មាននូវអ្នកដែលពុះពារ អ្នកដែលមានបញ្ហាសេចក្ដីជំនឿ ការសង្ស័យ និងសំណួរដែលហាក់ដូចជាគ្មានចម្លើយ ។ បងប្អូនប្រុសស្រី ព្រះយេស៊ូវគ្រីស្ទគឺជាចម្លើយ ។ សូមចាប់ផ្ដើមពីទ្រង់ ។ សូមរកមើលព្រះហស្ដរបស់ទ្រង់ក្នុងជីវិតរបស់បងប្អូន ។ សូមស្ដាប់តាមទ្រង់ចុះ ។ « កុំឲ្យចិត្ដអ្នករាល់គ្នាថប់បារម្ភឡើយ » ទ្រង់បានមានបន្ទូលនៅម៉ោងចុងក្រោយរបស់ទ្រង់ទៅកាន់ពួកសិស្សរបស់ទ្រង់នៅសួនច្បារគែតសេម៉ានី ពីមុនពេលការលីឈើឆ្កាងរបស់ទ្រង់កាត់ផ្លូវនៃក្រុងយេរូសាឡិម មុនការរងទុក្ខរបស់ទ្រង់នៅ គាល់កូថា ជាកន្លែងដែលទ្រង់បំពេញការពលិកម្មធួនរបស់ទ្រង់—ជាអ្វីដែលមានតែទ្រង់ ជាព្រះរាជបុត្រាព្រះតែមួយ អាចធ្វើបាន ។

សូមដឹងថាទ្រង់ជា្របដឹង ។ ទ្រង់បានលើកដាក់លើអង្គទ្រង់នូវអំពើបាប កំហុស ការទុក្ខសោក និងពេលទាំងឡាយនៃការសាកល្បងទាំងអស់របស់យើង ដើម្បីយើងអាចរស់នៅម្ដងទៀតជាមួយព្រះវរបិតានៅស្ថានសួគ៌របស់យើងនៅក្នុងភាពអស់កល្បជានិច្ច ។ ទ្រង់មានបន្ទូលថា « ចូរមើលមកឯយើងដោយនូវគ្រប់ទាំងគំនិត ចូរកុំសង្ស័យ ចូរកុំខ្លាចឡើយ » ។ សេចក្ដីជំនឿលើព្រះយេស៊ូវគ្រីស្ទអាចលើកបងប្អូនឡើង ហើយព្យាបាលព្រលឹងដែលមានរបួសរបស់បងប្អូន ។ សូមទីពឹងលើទ្រង់ ហើយបងប្អូននឹងពន្លឿនការត្រឡប់ទៅវិញរបស់បងប្អូនទៅរក « ព្រះពាហុនៃសេចក្ដីស្រឡាញ់របស់ទ្រង់ » ។

ខ្ញុំសូមបញ្ជាក់ឡើងវិញម្ដងទៀតនូវប្រសាសន៍របស់ព្យាការីនៅរស់របស់យើង ៖ « តើបងប្អូនមើលឃើញអ្វីដែលកំពុងកើតឡើង នៅចំពោះមុខយើងដែរឬទេ ? ខ្ញុំសូមអធិស្ឋានកុំឲ្យយើងខកខាននូវភាពដ៏អស្ចារ្យនៃគ្រានេះ ! ព្រះអម្ចាស់ពិតជាកំពុងពន្លឿនកិច្ចការទ្រង់ » ។ សូមឲ្យយើងជាពួកសិស្សរបស់ទ្រង់នៅគ្រារបស់យើងនេះស្រែកថា « ជយោ អ៊ីស្រាអែល » កាលយើងរៀបចំខ្លួនសម្រាប់ការយាងត្រឡប់មកវិញរបស់ព្រះអម្ចាស់ និងព្រះអង្គសង្គ្រោះរបស់យើង ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕