ពរជ័យនៃការបង់ថ្លៃជំនួស
ខណៈដែលស្ថានភាពជាច្រើននៅក្នុងជីវិតអាចនឹងហួសពីអ្វីដែលយើងគ្រប់គ្រងបាន នោះគ្មានគ្នាយើងណាម្នាក់ទៅហួសផុតពីការទទួលបានពរជ័យជានិរន្តរ៍របស់ព្រះអម្ចាស់នោះទេ ។
ការបម្រើនៅក្នុងគណៈប៊ីស្សពជាអធិបតី ខ្ញុំមានឯកសិទ្ធិជួបជាមួយនឹងពួកបរិសុទ្ធថ្ងៃចុងក្រោយនៅជុំវិញពិភពលោកនៅតាមទីតាំង និងវប្បធម៌ផ្សេងៗ ។ ខ្ញុំត្រូវបានបំផុសគំនិតជាបន្ដបន្ទាប់តាមរយៈសេចក្ដីជំនឿ និងការលះបង់ដ៏ខ្ជាប់ខ្ជួនរបស់បងប្អូនចំពោះព្រះអម្ចាស់ ព្រះយេស៊ូវគ្រីស្ទ ។ ប៉ុន្តែខ្ញុំរំជួលចិត្តពីព្រោះតែស្ថានភាពលំបាក និងស្ថានភាពផ្សេងៗដែលបងប្អូនជាច្រើនបានជួបប្រទះជាញឹកញាប់—ដែលបញ្ហាមានដូចជា ជំងឺ ពិការភាព កង្វះធនធាន ឱកាសរៀបការ និងការងារតិចតួច ការរំលោភបំពានពីអ្នកដទៃ និងការដាក់កំហិត ឬការរឹតត្បិតផ្សេងៗ ។ ជួនកាល ការលំបាកទាំងនេះហាក់ដូចជារារាំងដល់ការរីកចម្រើន និងធ្វើឲ្យការខិតខំដ៏ស្មោះត្រង់របស់បងប្អូនមានការលំបាកក្នុងការរស់នៅតាមដំណឹងល្អពេញលេញ ធ្វើឲ្យវាកាន់តែពិបាកក្នុងការបម្រើ ការថ្វាយបង្គំ និងការបំពេញកាតព្វកិច្ចនានា ។
មិត្តជាទីស្រឡាញ់ បើបងប្អូនធ្លាប់មានអារម្មណ៍ដាក់កំហិត ឬស្ថានភាពក្នុងជីវិតពុំល្អ ខ្ញុំចង់ឲ្យបងប្អូនដឹងរឿងនេះថា ៖ ព្រះអម្ចាស់ស្រឡាញ់បងប្អូនដោយផ្ទាល់ ។ ទ្រង់ស្គាល់ស្ថានភាពរបស់បងប្អូន ហើយច្រកទ្វារទៅកាន់ពរជ័យរបស់ទ្រង់នៅតែបើកចំហសម្រាប់បងប្អូន មិនថាបងប្អូនជួបនឹងបញ្ហាអ្វីនោះទេ ។
ខ្ញុំបានដឹងសេចក្ដីពិតនេះតាមរយៈបទពិសោធន៍ផ្ទាល់ខ្លួន ដែលហាក់ដូចជាមិនសំខាន់ តែបានធ្វើឲ្យខ្ញុំចងចាំមកជាយូរ ។ កាលពីអាយុ ២២ឆ្នាំ ពេលកំពុងបម្រើនៅកងទ័ពអាកាសរបស់បារាំងនៅទីក្រុងប៉ារីស ខ្ញុំរីករាយដែលបានដឹងថា អែលឌើរ នែល អេ ម៉ាកស្វែល ជាសាវករបស់ព្រះអម្ចាស់ នឹងថ្លែងនៅក្នុងសន្និសីទមួយនៅ Champs-Élysées ។ ប៉ុន្តែនៅពីមុនព្រឹត្តិការណ៍បន្ដិច ខ្ញុំបានទទួលបញ្ជាឲ្យបើកឡាននាំមន្ត្រីជាន់ខ្ពស់ទៅព្រលានយន្ដហោះចំពេលដែលសន្និសីទត្រូវធ្វើឡើង ។
ខ្ញុំបានខកចិត្តយ៉ាងខ្លាំង ។ ខ្ញុំបានដាក់មន្ត្រីរូបនោះចុះនៅព្រលាន ហើយប្រញាប់មកកាន់សន្និសីទវិញ ព្រោះតាំងចិត្តថាចង់មកចូលរួម ។ បន្ទាប់ពីរកកន្លែងចតឡានហើយ ខ្ញុំបានប្រញាប់រត់ទៅកន្លែងប្រជុំនៅ Champs-Elysées ហើយបានទៅដល់មុនពេលការប្រជុំចប់តែប្រាំនាទីប៉ុណ្ណោះ ។ ពេលខ្ញុំចូលដល់ ខ្ញុំបានស្ដាប់ឮអែលឌើរ ម៉ាកស្វែល មានប្រសាសន៍ថា « ឥឡូវ ខ្ញុំនឹងផ្ដល់ពរជ័យជាសាវកដល់បងប្អូនទាំងអស់គ្នា » ។ នៅក្នុងគ្រានោះ ខ្ញុំបានទទួលបទពិសោធន៍ខាងវិញ្ញាណដ៏ស្រស់ស្អាត និងមិនអាចបំភ្លេចបាន ។ ខ្ញុំត្រូវបានគ្របដណ្ដប់ដោយព្រះវិញ្ញាណ ហើយពាក្យនៃពរជ័យហាក់ដូចជាចាក់ទំលុះគ្រប់សរសៃក្នុងព្រលឹងខ្ញុំ វាហាក់ដូចជាពាក្យទាំងនោះថ្លែងមកកាន់ខ្ញុំផ្ទាល់អញ្ចឹង ។
អ្វីដែលខ្ញុំជួបនៅថ្ងៃនោះ គឺជាការបើកសម្ដែងតូចមួយ ប៉ុន្តែមានអានុភាព គឺជាទិដ្ឋភាពដែលផ្ដល់ការលួងលោមមកពីផែនការរបស់ព្រះចំពោះកូនចៅរបស់ទ្រង់ ៖ នៅពេលស្ថានភាពហួសពីការគ្រប់គ្រងរបស់យើងរារាំងយើងពីការបំពេញបំណងប្រាថ្នាសុចរិតនៃដួងចិត្តរបស់យើង នោះព្រះអម្ចាស់នឹងបង់ថ្លៃជំនួសតាមរបៀបដែលអនុញ្ញាតឲ្យយើងទទួលពរជ័យដែលបានសន្យារបស់ទ្រង់ ។
សេចក្ដីពិតដ៏អះអាងនេះ មានមូលដ្ឋាននៅក្នុងគោលការណ៍គ្រឹះចំនួនបីនៅក្នុងដំណឹងល្អ ដែលបានស្ដារឡើងវិញរបស់ព្រះយេស៊ូវគ្រីស្ទ ។
-
ព្រះស្រឡាញ់យើងម្នាក់ៗយ៉ាងឥតខ្ចោះ ។ « ទ្រង់អញ្ជើញ[ យើង ]ទាំងអស់គ្នាឲ្យមករកទ្រង់ ហើយទទួលទាននូវសេចក្ដីល្អសប្បុរសរបស់ទ្រង់ » ។ ផែនការនៃការប្រោសលោះរបស់ទ្រង់គឺប្រាកដថាមនុស្សគ្រប់រូប ដោយគ្មានការលើកលែង នឹងទទួលបានឱកាសយុត្តិធម៌មួយ ដែលថ្ងៃមួយទទួលបានពរជ័យនៃសេចក្ដីសង្គ្រោះ និងភាពតម្កើងឡើង ។
-
ដោយសារតែព្រះមានសេចក្ដីយុត្តិធម៌ និងក្ដីមេត្តាករុណា ហើយផែនការទ្រង់គឺល្អឥតខ្ចោះ នោះទ្រង់នឹងមិនឲ្យយើងទទួលខុសត្រូវចំពោះអ្វីដែលហួសពីការគ្រប់គ្រងរបស់យើងឡើង ។ អែលឌើរ នែល អេ ម៉ាកស្វែល បានពន្យល់ថា « ព្រះ … ទទួលយក មិនត្រឹមតែបំណងប្រាថ្នា និងកិច្ចការរបស់យើងប្រកបដោយសេចក្ដីមេត្តាករុណាប៉ុណ្ណោះទេ ប៉ុន្តែក៏ទទួលយកនូវកម្រិតនៃការលំបាកដែលមានដាក់មកលើយើងតាមស្ថានភាពផ្សេងៗគ្នាផងដែរ » ។
-
តាមរយៈព្រះយេស៊ូវគ្រីស្ទ និងដង្វាយធួនរបស់ទ្រង់ នោះយើងអាចស្វែងរកកម្លាំងដើម្បីស៊ូទ្រាំ ហើយនៅទីបំផុតយកឈ្នះទៅលើឧបសគ្គជីវិតទាំងអស់ ដូចជាអាលម៉ាបានបង្រៀន ព្រះអង្គសង្គ្រោះបានយកដាក់មកលើព្រះអង្គទ្រង់ មិនគ្រាន់តែអំពើបាបរបស់អ្នកប្រែចិត្តនោះទេ តែថែមទាំង « ការឈឺចាប់ និងជំងឺទាំងឡាយនៃរាស្ត្រទ្រង់ » និង « ជំងឺឈឺចាប់របស់ពួកគេ » ផងដែរ ។ ដូច្នេះ ក្រៅពីការប្រោសលោះយើងពីកំហុសទាំងឡាយ នោះក្ដីមេត្តា និងព្រះគុណរបស់ព្រះអម្ចាស់ គាំទ្រយើងឆ្លងកាត់ភាពអយុត្តិធម៌ ភាពខ្វះខាត និងដែនកំណត់ ដែលបានដាក់មកលើយើងដោយបទពិសោធន៍នៃជីវិតរមែងស្លាប់ ។
ការទទួលបាននូវពរជ័យនៃការបង់ថ្លៃជំនួសទាំងនេះ កើតមានមកជាមួយនឹងលក្ខខណ្ឌជាក់លាក់ ។ ព្រះអម្ចាស់សុំឲ្យយើងធ្វើ « អ្វីៗទាំងអស់ដែលយើងអាចធ្វើបាន » ហើយត្រូវ « ថ្វាយព្រលឹង[ របស់យើង ]ទាំងមូល ជាដង្វាយថ្វាយដល់ទ្រង់ » ។ ការណ៍នេះតម្រូវឲ្យមានបំណងប្រាថ្នាដ៏មុតមាំ ដួងចិត្តស្មោះ និងពិតត្រង់ ព្រមទាំងភាពឧស្សាហ៍ព្យាយាមដ៏ខ្លាំងរបស់យើងនៅក្នុងការរក្សាបទបញ្ញត្តិរបស់ទ្រង់ ហើយសម្របឆន្ទៈរបស់យើងទៅតាមទ្រង់ ។
នៅពេលការខិតខំយ៉ាងខ្លាំងរបស់យើងត្រូវធ្លាក់ចុះដោយសារតែស្ថានភាពដែលយើងមិនអាចគ្រប់គ្រងបាន នោះព្រះអម្ចាស់នៅតែទទួលយកបំណងប្រាថ្នានៃដួងចិត្តរបស់យើង ថាជាដង្វាយដោយស័ក្ដិសម ។ ប្រធាន ដាល្លិន អេច អូក បានបង្រៀនថា « យើងនឹងទទួលបានពរជ័យចំពោះបំណងប្រាថ្នាសុចរិតនៃដួងចិត្តរបស់យើង ទោះជាស្ថានភាពខាងក្រៅធ្វើឲ្យយើងមិនអាចធ្វើឲ្យបំណងប្រាថ្នានោះចេញជាសកម្មភាពក្ដី » ។
ដូចជាព្យាការី យ៉ូសែប ស្ម៊ីធ បារម្ភអំពីបងប្រុសរបស់លោក អាលវិន ដែលបានស្លាប់ដោយពុំបានទទួលពិធីបរិសុទ្ធនៃដំណឹងល្អដ៏សំខាន់ដូច្នោះដែរ លោកបានទទួលនូវវិវរណៈដ៏លួងលោមចិត្តនេះថា « មនុស្សទាំងអស់ដែលនឹងស្លាប់ពីអំណឹះតទៅ ដោយគ្មានការចេះដឹងអំពី[ ដំណឹងល្អ ] គឺជាពួកអ្នកដែលប្រាកដជានឹងទទួលដំណឹងល្អដោយអស់ពីចិត្ត នោះនឹងទៅជាពួកអ្នកគ្រង[ នគរសេឡេស្ទាលរបស់ព្រះ ]ទុកជាមរតកដែរ » ។ បន្ទាប់មក ព្រះអម្ចាស់បានបន្ថែមថា « ដ្បិតយើងជាព្រះអម្ចាស់ នឹងជំនុំជំរះមនុស្សលោកទាំងអស់ ស្របតាមកិច្ចការរបស់ពួកគេ គឺស្របតាមសេចក្ដីប៉ងប្រាថ្នានៃដួងចិត្តរបស់ពួកគេ » ។
អ្វីដែលសំខាន់ចំពោះព្រះអម្ចាស់ គឺមិនគ្រាន់តែជា លទ្ធភាព របស់យើងប៉ុណ្ណោះ ប៉ុន្តែជាអ្វីដែលយើង មានឆន្ទៈ ដើម្បីធ្វើនូវអ្វីៗទាំងអស់ដែលយើងអាចធ្វើតាមទ្រង់ដែលជាព្រះអង្គសង្គ្រោះរបស់យើង ។
មានមិត្តម្នាក់បានលួងលោមចិត្តដល់អ្នកផ្សព្វផ្សាយសាសនាវ័យក្មេងមួយរូបដែលមានទុក្ខព្រួយចំពោះការដោះលែងមុនកំណត់របស់គាត់ ដោយសារតែបញ្ហាសុខភាព ទោះជាគាត់បានអធិស្ឋានដោយស្មោះ និងមានបំណងប្រាថ្នាចង់បម្រើខ្លាំងក៏ដោយ ។ គាត់បានចែកចាយខគម្ពីរមួយដែលព្រះអម្ចាស់បានប្រកាសថា នៅពេលកូនចៅរបស់ទ្រង់ « ចេញទៅដោយអស់ពីកម្លាំងពួកគេ » និង « ព្យាយាមដោយមិនឈប់ឈរ » ដើម្បីបំពេញតាមបទបញ្ញត្តិរបស់ទ្រង់ « ហើយពួកខ្មាំងសត្រូវរបស់គេ [ ដែលអាចរួមមានស្ថានភាពមិនអនុគ្រោះនានាក្នុងជីវិតយើង ] បង្ខាបង្ខាំងពួកគេមិនឲ្យធ្វើកិច្ចការនោះឡើយ មើលចុះ គឺជាការចាំបាច់ដល់យើងនឹងមិនតម្រូវកិច្ចការនោះពីដៃនៃពួក[ មនុស្ស ]ទាំងនោះទៀតឡើយ ប៉ុន្តែ ត្រូវទទួលនូវដង្វាយទាំងឡាយរបស់ពួកគេវិញ
មិត្តរបស់ខ្ញុំបានថ្លែងទីបន្ទាល់ទៅកាន់យុវជននោះថា ព្រះបានដឹងថាគាត់បានធ្វើល្អបំផុតដើម្បីឆ្លើយតបទៅតាមការហៅបម្រើរបស់គាត់ហើយ ។ គាត់អះអាងនឹងយុវជននោះថា ព្រះអម្ចាស់បានទទួលយកការថ្វាយរបស់គាត់ ហើយពរជ័យដែលបានសន្យាចំពោះអ្នកផ្សព្វផ្សាយសាសនាស្មោះត្រង់គ្រប់រូបនឹងពុំត្រូវបានដកចេញនោះទេ ។
ពរជ័យនៃការបង់ថ្លៃជំនួសរបស់ព្រះអម្ចាស់ ជាញឹកញាប់កើតមានមកពីការមានសណ្ដានចិត្តល្អ និងការបម្រើដល់អ្នកដទៃ ដែលជួយយើងសម្រេចនូវអ្វីដែលយើងមិនអាចធ្វើដោយខ្លួនយើង ។ ខ្ញុំចាំពីគ្រាមួយដែលរស់នៅឆ្ងាយពីកូនស្រីម្នាក់របស់យើងនៅប្រទេសបារាំង យើងមានអារម្មណ៍ថាចង់ជួយនាងណាស់ក្រោយពីនាងសម្រាលកូនដោយលំបាក តែមិនអាចទៅបាន ។ នៅសប្ដាហ៍ដដែលនោះ វួដរបស់យើងនៅរដ្ឋយូថាហ៍ ស្វែងរកជំនួយសម្រាប់ម្ដាយម្នាក់ដែលទើបតែសម្រាលកូនភ្លោះ ។ ភរិយាខ្ញុំ វ៉ាឡឺរី បានស្ម័គ្រចិត្តដើម្បីយកអាហារទៅឲ្យស្ត្រីនោះ ដោយអធិស្ឋានក្នុងចិត្តនាងសម្រាប់ទាំងម្ដាយថ្មីនេះ និងកូនស្រីរបស់យើងដែលកំពុងត្រូវការជំនួយ ។ មិនយូរប៉ុន្មាន យើងបានដឹងថាបងប្អូនស្រីនៅក្នុងវួដកូនស្រីរបស់យើងនៅប្រទេសបារាំងនោះ បានរៀបចំផ្ដល់អាហារដល់គ្រួសាររបស់នាង ។ ចំពោះពួកយើង ព្រះបានឆ្លើយការអធិស្ឋានរបស់ពួកយើង ដោយបញ្ជូនពួកទេវតារបស់ទ្រង់ដើម្បីទៅជួយលួងលោម នៅពេលដែលយើងពុំអាចទៅបាន ។
នៅពេលជួបនឹងការដាក់កំហិត និងឧបសគ្គនានា សូមឲ្យយើងទទួលស្គាល់ពរជ័យ ផ្ទាល់ខ្លួន របស់យើង—អំណោយទាន ធនធាន និងពេលវេលារបស់យើង—ហើយប្រើវាដើម្បីបម្រើដល់អ្នកទាំងឡាយដែលកំពុងត្រូវការជំនួយ ។ ពេលធ្វើដូច្នោះ នោះយើងនឹងមិនគ្រាន់តែផ្ដល់ពរដល់អ្នកដទៃប៉ុណ្ណោះទេ ប៉ុន្តែនៅក្នុងជីវិតយើងផ្ទាល់នឹងទទួលបានការព្យាបាល និងការតបស្នងវិញ ។
របៀបដ៏មានអានុភាពបំផុតមួយដែលយើងអាចបរិច្ចាគចំពោះពរជ័យនៃការបង់ថ្លៃជំនួសរបស់ព្រះ គឺតាមរយៈកិច្ចការផ្សេងៗដែលយើងធ្វើសម្រាប់បុព្វការីជនរបស់យើងនៅក្នុងដំណាក់របស់ព្រះអម្ចាស់ ។ នៅពេលយើងធ្វើពិធីបរិសុទ្ធនានាជំនួសពួកគាត់ នោះយើងចូលរួមយ៉ាងសកម្មនៅក្នុងកិច្ចការនៃសេចក្ដីសង្គ្រោះដ៏មហិមារបស់ព្រះអម្ចាស់ ដោយការប្រើទេពកោសល្យ និងសមត្ថភាពរបស់យើងដើម្បីផ្ដល់ពរជ័យចំពោះអ្នកទាំងឡាយដែលពុំមានឱកាសដើម្បីទទួលបានអំឡុងជីវិតរមែងស្លាប់របស់ពួកគេ ។
ការបម្រើប្រកបដោយក្ដីស្រឡាញ់ដែលយើងផ្ដល់ឲ្យនៅក្នុងព្រះវិហារបរិសុទ្ធដ៏ពិសិដ្ឋ រំឭកយើងថាព្រះគុណរបស់ព្រះអង្គសង្គ្រោះបានលាតហួសពីជីវិតនេះទៅទៀត ។ នៅក្នុងជីវិតខាងមុខ យើងអាចទទួលបានឱកាសថ្មីដើម្បីសម្រេចនូវអ្វីដែលយើងពុំអាចធ្វើនៅក្នុងជីវិតរមែងស្លាប់នេះ ។ ប្រធាន ឡូរែនសូ ស្នូ បានថ្លែងទៅកាន់ស្ត្រីដែលពុំទាន់រកបានដៃគូអស់កល្បជានិច្ចប្រកបដោយក្ដីស្រឡាញ់ថា ៖ « គ្មានពួកបរិសុទ្ធថ្ងៃចុងក្រោយណាម្នាក់ដែលស្លាប់ទៅ បន្ទាប់ពីបានរស់នៅយ៉ាងស្មោះត្រង់ត្រូវបាត់បង់អ្វីគ្រប់យ៉ាង ដោយសារតែពុំបានធ្វើកិច្ចការមួយចំនួន ព្រោះតែពួកគេគ្មានឱកាសនោះឡើយ ។ … ពួកគេនឹងមានគ្រប់ពរជ័យ ភាពតម្កើងឡើង និងសិរីល្អដែលបុរសស្ត្រីគ្រប់រូបនឹងមាន ដែលបានមានឱកាសនេះ » ។
សារលិខិតនៃក្ដីសង្ឃឹម និងការលួងលោមចិត្តនេះ គឺមានសម្រាប់យើងទាំងអស់គ្នា ដែលជាកូនចៅរបស់ព្រះ ។ ពុំមានគ្នាយើងណាម្នាក់អាចចៀសផុតពីឧបសគ្គ និងការដាក់កំហិតនៅក្នុងជីវិតរមែងស្លាប់នេះទេ ។ បន្ទាប់នោះ យើងទាំងអស់គ្នាកើតមកជាមួយនឹងភាពអសមត្ថភាពដើម្បីសង្គ្រោះខ្លួនយើង ។ ប៉ុន្តែយើងមានព្រះអង្គសង្គ្រោះជាទីស្រឡាញ់ ហើយ « យើងដឹងថា មានតែដោយព្រះគុណ [ របស់ទ្រង់ ]ទេ ទើបយើងបានសង្គ្រោះ បន្ទាប់ពីអ្វីៗទាំងអស់ដែលយើងអាចធ្វើបាន » ។
ខ្ញុំថ្លែងទីបន្ទាល់ថា ខណៈដែលស្ថានភាពជាច្រើននៅក្នុងជីវិតអាចនឹងហួសពីអ្វីដែលយើងគ្រប់គ្រងបាន នោះគ្មានគ្នាយើងណាម្នាក់ទៅហួសផុតពីការទទួលបានពរជ័យជានិរន្តរ៍របស់ព្រះអម្ចាស់នោះទេ ។ តាមរយៈពលិកម្មដ៏ធួនរបស់ទ្រង់ ព្រះអង្គសង្គ្រោះនឹងបង់ថ្លៃជំនួសអស់ភាពពុំគ្រប់គ្រាន់ និងអយុត្តិធម៌ទាំងអស់ ប្រសិនបើយើងថ្វាយព្រលឹងរបស់យើងទាំងស្រុងទៅកាន់ទ្រង់ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។