ហើយ យើងនិយាយអំពីព្រះគ្រីស្ទ

ដោយអែលឌើរ ហ្គែរី អ៊ី ស្ទីវ៉ែនសុន

ក្នុងកូរ៉ុមនៃពួកសាវកដប់ពីរនាក់

យើងជាអ្នកដើរតាមព្រះយេស៊ូវគ្រីស្ទ ហើយយើងស្វែងរកដើម្បីទទួលផង និងចែកចាយផងនូវពន្លឺរបស់ទ្រង់ ។

សេចក្តីផ្ដើម

នៅចុងបញ្ចប់នៃការចាត់តាំងរយៈពេលវែងនៅក្រៅប្រទេស ភរិយារបស់ខ្ញុំ លីសា និងខ្ញុំបានឈានជើងចូលទៅក្នុងច្រកទ្វារអាកាសយានដ្ឋាន ដើម្បីរៀបចំសម្រាប់ការហោះហើរតែមួយទៀតប៉ុណ្ណោះ—ជាជើងហោះហើរនៅទាបភ្លឺ—ដើម្បីត្រឡប់ទៅផ្ទះវិញ ។ កាលយើងឈរជាមួយអ្នកផ្សេងទៀតនៅក្នុងជួរដ៏វែងដែលកំពុងតែដើរទៅមុខយ៉ាងយឺតៗនោះ យើងអាចទទួលអារម្មណ៍នៃការថប់បារម្ភរបស់អ្នកដំណើរផ្សេងទៀត ដែលភ័យព្រួយអំពីការហោះហើរ ការឆ្លងកាត់ការត្រួតពិនិត្យលិខិតឆ្លងដែន និងទិដ្ឋាការ ហើយនិងការឆ្លងកាត់ទៅដល់កន្លែងត្រួតពិនិត្យសុវត្ថិភាពដោយជោគជ័យ ។

នៅទីបំផុត យើងបានទៅដល់ស្ថានីយ៍មួយដែលមានមន្ដ្រីគយប្រចាំការ ដែលមើលទៅហាក់មិនរងឥទ្ធិពលពីភាពតានតឹង និងការថប់បារម្ភដ៏ខ្លាំងដែលមាននៅក្នុងបន្ទប់នោះសោះ ។ គាត់ធ្វើការតាមទម្លាប់របស់គាត់ ដោយមិនមើលមុខខ្ញុំសោះ គាត់បានឈោងយកឯកសាររបស់ខ្ញុំ ផ្ទៀងផ្ទាត់រូបថតខ្ញុំ បើកមើលឯកសារមួយសន្លឹកម្ដងៗហើយចុងបញ្ចប់បោះត្រាមួយទំហឹងលើលិខិតឆ្លងដែនរបស់ខ្ញុំ ។

បន្ទាប់មក គាត់ឈោងយកឯកសាររបស់លីសាម្ដង ។ គាត់ឱនក្បាលចុះ ហើយផ្ដោតលើការងាររបស់គាត់ដោយមិនបង្ហាញអារម្មណ៍អ្វីសោះ គាត់ពិនិត្យមើលឯកសារមួយទំព័រម្ដងៗយ៉ាងជំនាញ ដោយការផ្ដោតលើព័ត៌មានលម្អិតក្នុងឯកសារដែលនៅពីមុខគាត់ ។ យើងបានភ្ញាក់ផ្អើលនៅពេលគាត់បញ្ឈប់ការងារភ្លាមៗ ងើបមុខឡើង ហើយសម្លឹងមើលភ្នែករបស់លីសា ដោយក្រសែភ្នែកដែលពេញដោយការពិចារណា និងភាពកក់ក្ដៅ ។ ជាមួយនឹងស្នាមញញឹមដ៏ទន់ភ្លន់ គាត់បានបោះត្រាលើលិខិតឆ្លងដែនរបស់លីសាយ៉ាងថ្នម ហើយហុចឯកសារទៅឲ្យលីសាវិញ ។ ភរិយារបស់ខ្ញុំញញឹមតបវិញ ទទួលឯកសារ ហើយនិយាយពាក្យលាយ៉ាងកក់ក្ដៅ ។

« តើមានអ្វីបានកើតឡើង ? » ខ្ញុំបានសួរដោយភាពភ្ញាក់ផ្អើល ។

ភ្លាមនោះ លីសាបានបង្ហាញខ្ញុំនូវអ្វីដែលភ្នាក់ងារនោះបានមើលឃើញ—ជាប័ណ្ណតូចមួយដែលមានរូបថតរបស់ព្រះអង្គសង្គ្រោះ ។ ប័ណ្ណនោះបានធ្លាក់ចេញពីកាបូបរបស់លីសា ចូលទៅក្នុងសំណុំឯកសារលិខិតឆ្លងដែនរបស់នាងដោយចៃដន្យ ។ នេះគឺជាអ្វីដែលមន្ដ្រីគយរូបនោះបានរកឃើញ ។ នេះគឺជាអ្វីដែលបានផ្លាស់ប្ដូរអាកប្បកិរិយារបស់គាត់ទាំងស្រុង ។

រូបភាពរបស់ព្រះយេស៊ូវគ្រីស្ទនៅក្នុងលិខិតឆ្លងដែន<nb/>។

រូបភាពដ៏តូចរបស់ព្រះអង្គសង្គ្រោះបានភ្ជាប់ដួងចិត្ដរបស់មនុស្សមិនស្គាល់គ្នាពីរនាក់ដែលគ្មានទំនាក់ទំនងអ្វីនឹងគ្នាសោះ ។ វាបានផ្លាស់ប្ដូរការប្រាស្រ័យទាក់ទងធម្មតាមួយឲ្យទៅជាអ្វីដែលមានភាពផ្ទាល់ខ្លួនជាង ដោយចាប់យកនូវភាពស្រស់ស្អាត អព្ភូតហេតុ និងភាពពិតនៃពន្លឺរបស់ព្រះយេស៊ូវគ្រីស្ទ ។ ពេញមួយថ្ងៃនោះ ហើយជាញឹកញាប់ចាប់ពីពេលនោះមក ខ្ញុំបានគិតពិចារណាពីពេលដ៏សាមញ្ញ និងផ្អែមល្ហែមនោះដោយភាពស្ងើចអស្ចារ្យ ហើយបានអររីករាយនៅក្នុងឥទ្ធិពលដ៏រុងរឿងនៃពន្លឺរបស់ព្រះគ្រីស្ទដែលមានមកលើបុត្រាបុត្រីរបស់ព្រះ ។

យើងនិយាយអំពីព្រះគ្រីស្ទ

យើងជាអ្នកដើរតាមព្រះយេស៊ូវគ្រីស្ទ ហើយយើងស្វែងរកដើម្បី ទទួល និង ចែកចាយ ពន្លឺរបស់ទ្រង់ ។ ឈ្មោះរបស់សាសនាចក្របង្កប់អត្ថន័យនៃជំនឿរបស់យើងអំពី « ព្រះយេស៊ូវគ្រីស្ទនោះឯង ទ្រង់ជាថ្មជ្រុងយ៉ាងឯក » ។ តាមរយៈពួកព្យាការីបុរាណ និងព្យាការីនៅរស់ ព្រះវរបិតាសួគ៌របស់យើងបានបង្គាប់យើងឲ្យ « ចូរស្ដាប់តាមទ្រង់ចុះ ! » ហើយឲ្យ « ចូរមករកព្រះគ្រីស្ទ » ។ « យើងនិយាយអំពីព្រះគ្រីស្ទ យើងអររីករាយក្នុងព្រះគ្រីស្ទ យើងផ្សាយអំពីព្រះគ្រីស្ទ [ ហើយ ] យើងព្យាករអំពីព្រះគ្រីស្ទ » ។

យើង បង្រៀន ថាព្រះយេស៊ូវគ្រីស្ទគឺជាព្រះរាជបុត្រានៃព្រះ ហើយអំឡុងការងារបម្រើលើផែនដីរបស់ទ្រង់ ព្រះយេស៊ូវបានបង្រៀនដំណឹល្អរបស់ទ្រង់ ហើយបានស្ថាបនាសាសនាចក្ររបស់ទ្រង់ ។

យើង ថ្លែងទីបន្ទាល់ ថានៅចុងបញ្ចប់នៃព្រះជន្មរបស់ទ្រង់ ព្រះយេស៊ូវបានធួនសម្រាប់អំពើបាបរបស់យើង នៅពេលទ្រង់បានរងទុក្ខនៅក្នុងសួនច្បារគែតសេម៉ានី ត្រូវបានគេឆ្កាងលើឈើឆ្កាង ហើយបន្ទាប់មកបានរស់ឡើងវិញ ។

យើង អររីករាយ ថាដោយសារតែពលិកម្មដ៏ធួនរបស់ព្រះអង្គសង្គ្រោះ យើងអាចត្រូវបានអភ័យទោស និងបានស្អាតពីអំពើបាបរបស់យើង នៅពេលយើងប្រែចិត្ត ។ ការណ៍នេះនាំមកនូវសេចក្តីសុខសាន្តដល់យើង ហើយវាធ្វើឲ្យយើងអាចត្រឡប់ទៅកាន់វត្តមានរបស់ព្រះវិញ ហើយទទួលបានភាពពេញលេញនៃអំណរ ។

យើង ព្យាករ ថាដោយសារតែការមានព្រះជន្មរស់ឡើងវិញរបស់ព្រះយេស៊ូវ សេចក្ដីស្លាប់គឺពុំមែនជាចុងបញ្ចប់នោះទេ ប៉ុន្ដែជាជំហានឆ្ពោះទៅមុខមួយយ៉ាងសំខាន់ ។ « យើងទាំងអស់គ្នានឹងរស់ឡើងវិញបន្ទាប់ពីយើងស្លាប់ ។ ការណ៍នេះមានន័យថា វិញ្ញាណ និងរូបកាយរបស់មនុស្សម្នាក់ៗនឹងបានរួបរួមគ្នាឡើងវិញ ហើយរស់នៅជារៀងរហូត » ។

ចូរមករកព្រះគ្រីស្ទ

ព្យាការីនៅរស់នៅជំនាន់របស់យើង—ដែលទទួលវិវរណៈពីព្រះឲ្យបង្រៀន និងដឹកនាំយើង—គឺបានបង្កើនការអញ្ជើញយើងឲ្យមករកព្រះគ្រីស្ទ ។ ពួកលោកកំពុងជួយយើងឲ្យកាន់តែផ្ដោតដួងចិត្ដ ត្រចៀក និងភ្នែករបស់យើងទៅលើទ្រង់ ។ យើងអាចដកស្រង់នូវឧទាហរណ៍នៃការកែសម្រួល និងការរីកចម្រើនជាច្រើនដែលបានប្រកាសដោយគណៈប្រធានទីមួយ ដែលបានរៀបរៀងឡើងដើម្បីឲ្យយើងផ្ដោតលើព្រះយេស៊ូវគ្រីស្ទ ។ កិច្ចការទាំងនេះមួយចំនួនរួមមាន ៖

ការសម្រេចចិត្ដដើម្បីបញ្ឈប់ការប្រើឈ្មោះ « ព្រះវិហារមរមន » ហើយប្ដូរវាមកជាឈ្មោះត្រឹមត្រូវគឺ សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
មាននូវសិល្បៈគំនូរដែលថ្មីៗ និងបំផុសគំនិតដែលផ្ដោតលើព្រះគ្រីស្ទ ដាក់តាំងបង្ហាញនៅក្នុងសាលាប្រជុំនានា ។
តន្ដ្រី និងបាវចនារបស់ក្រុមយុវនារី និងកូរ៉ុមបព្វជិតភាពអើរ៉ុន ដែលផ្ដោតលើព្រះយស៊ូវគ្រីស្ទ ដូចជា « ខ្ញុំជាសិស្សម្នាក់នៃព្រះយេស៊ូវគ្រីស្ទ » និង « មើលទៅព្រះគ្រីស្ទ » ។
ការសង្កត់ធ្ងន់កាន់តែខ្លាំងលើដង្វាយធួន និងការមានព្រះជន្មរស់ឡើងវិញដ៏ពិតនៃព្រះយេស៊ូវគ្រីស្ទ ថាជាព្រឹត្ដិការណ៍ដ៏រុងរឿងបំផុតនៅក្នុងប្រវត្ដិសាស្ដ្រ ។
ការប្រារព្ធរដូវបុណ្យអ៊ីស្ទើរ ហើយមិនគ្រាន់តែចាត់ទុកវាថាជាថ្ងៃបុណ្យមួយថ្ងៃ ដោយសង្កត់ធ្ងន់លើព្រះយស៊ូវគ្រីស្ទ ។
ការណែនាំអំពីនិមិត្ដសញ្ញាសម្គាល់នៃសាសនាចក្រនៃព្រះយេស៊ូវគ្រីស្ទ និងអត្ថន័យនៃនិមិត្ដរូបនោះ ។

ចូរយើងមើលឲ្យកាន់តែជាក់ច្បាស់ទៅលើឥទ្ធិពលនៃការណ៍មួយចំនួនទាំងនេះ ។ ទីមួយ និមិត្ដរូបរបស់សាសនាចក្រ ។

និមិត្ដរូបរបស់សាសនាចក្រ

នៅក្នុងឆ្នាំ២០២០ ប្រធាន រ័សុល អិម ណិលសុន បានណែនាំនិមិត្តសញ្ញាសម្គាល់ថ្មីសម្រាប់សាសនាចក្រ ។ និមិត្ដរូបនេះឆ្លុះបញ្ជាំងអំពីសេចក្ដីពិតដែលថា ព្រះគ្រីស្ទគឺជាចំណុចសំខាន់នៃសាសនាចក្ររបស់ទ្រង់ ហើយគួរតែជាចំណុចសំខាន់នៅក្នុងជីវិតយើងផងដែរ ។ ឥឡូវនេះ យើងឃើញនិមិត្ដរូបដែលយើងស្គាល់នេះនៅលើប័ណ្ណចូលព្រះវិហារបរិសុទ្ធ គេហទំព័រ និងទស្សនាវដ្ដីរបស់សាសនាចក្រ ជារូបតំណាងនៅលើកម្មវិធីបណ្ណាល័យដំណឹងល្អ ហើយថែមទាំងនៅលើស្លាកបញ្ជាក់អត្ដសញ្ញាណកងទ័ពរបស់សមាជិកនៃសាសនាចក្រជាច្រើននាក់ដែលកំពុងបម្រើនៅក្នុងកងទ័ពផងដែរ ។ និមិត្ដរូបនេះរួមបញ្ចូលនូវឈ្មោះរបស់សាសនាចក្រដែលមានក្នុងថ្មជ្រុង ជាការំឭកថាព្រះយេស៊ូវគ្រីស្ទ គឺ ទ្រង់ជាថ្មជ្រុងយ៉ាងឯក ដែលបានបង្ហាញនៅទីនេះជាភាសាខ្មែរ និងប្រើប្រាស់នៅក្នុង ១៤៥ ភាសា ។

នៅកណ្ដាលនៃនិមិត្ដរូបនោះគឺជាតំណាងមួយនៃរូបសំណាក ព្រះគ្រីស្ទ ពីថ្មកែវដ៏ជាទីស្រឡាញ់របស់ ប៊ើថេល ថលវ៉ាលដ៏សិន ដែលមានទំនាក់ទំនងយ៉ាងទូលំទូលាយជាមួយសាសនាចក្រ ហើយក៏មាននៅមជ្ឈមណ្ឌលអ្នកទស្សនា និងនៅបរិវេណរបស់ព្រះវិហារបរិសុទ្ធនៅជុំវិញពិភពលោកផងដែរ ។ ភាពលេចធ្លោរបស់រូបសំណាកនេះនៅក្នុងនិមិត្ដរូបរបស់សាសនាចក្រសម្គាល់ថា ព្រះគ្រីស្ទគួរតែជាចំណុចសំខាន់នៅក្នុងគ្រប់កិច្ចការទាំងអស់ដែលយើងធ្វើ ។ ដូចគ្នានេះដែរ ព្រះពាហុដ៏លាតសន្ធឹងរបស់ព្រះអង្គសង្គ្រោះចង្អុលបង្ហាញពីការសន្យារបស់ទ្រង់ក្នុងការឱបក្រសោបអស់អ្នកដែលមករកទ្រង់ ។ និមិត្ដរូបនេះគឺជាការបង្ហាញនៃសេចក្ដីស្រឡាញ់របស់ព្រះអង្គសង្គ្រោះព្រះយេស៊ូវគ្រីស្ទ និងជាការរំឭកដ៏ខ្ជាប់ខ្ជួនអំពីព្រះគ្រីស្ទដ៏មានព្រះជន្មរស់ ។

ដោយការចង់ដឹងចង់ឮ ខ្ញុំបានសួរនាំគ្រួសារ និងមិត្ដភក្ដិជាច្រើន ទាក់ទងនឹងធាតុដ៏សំខាន់មួយនៃនិមិត្ដរូបរបស់សាសនាចក្រ ។ ជារឿងគួរឲ្យភ្ញាក់ផ្អើល មនុស្សជាច្រើនពុំដឹងអំពីលក្ខណៈពិសេសនៃភាពបរិសុទ្ធដែលនិមត្ដរូបនេះតំណាងឲ្យនោះទេ ។ ព្រះយេស៊ូវគ្រីស្ទគង់ នៅក្រោម ក្លោងទ្វារមួយ ។ រូបនេះតំណាងឲ្យព្រអង្គសង្គ្រោះដែលបានរស់ឡើងវិញចេញមកពីផ្នូរ ។ យើងពិតជាអបអរដល់ ព្រះគ្រីស្ទដែលមានព្រះជន្ម រស់ឡើងវិញ សូម្បីតែនៅក្នុងការប្រើប្រាស់និមិត្ដរូបរបស់សាសនាចក្រ ។

បុណ្យអ៊ីស្ទើរដ៏ខ្ពស់ជាង និងបរិសុទ្ធជាង

ឥឡូវនេះ ចូរយើងគិតពិចារណាអំពីសារៈសំខាន់នៃបុណ្យអ៊ីស្ទើរ ។ នៅក្នុងសារលិខិតថ្មីៗរបស់គណៈប្រធានទីមួយ ទាក់ទងនឹងបុណ្យអ៊ីស្ទើរ យើងត្រូវបានអញ្ជើញឲ្យ « ប្រារព្ធពិធីបុណ្យនៃការរស់ឡើងវិញរបស់ព្រះអង្គសង្រ្គោះដែលមានព្រះជន្មរស់របស់យើង តាមរយៈការសិក្សាការបង្រៀនរបស់ទ្រង់ និងការជួយបង្កើតទំនៀមទម្លាប់ពិធីបុណ្យអ៊ីស្ទើរនៅក្នុងសង្គមរបស់យើងទាំងមូល ជាពិសេសនៅក្នុងក្រុមគ្រួសាររបស់យើងផ្ទាល់ » ។ និយាយយ៉ាងខ្លី យើងត្រូវបានលើកទឹកចិត្ដឲ្យផ្លាស់ទីទៅកាន់ការប្រារព្ធបុណ្យអ៊ីស្ទើរដែលខ្ពស់ជាង និងបរិសុទ្ធជាង ។

ខ្ញុំស្រឡាញ់វិវរណៈជាបន្ដបន្ទាប់ទាក់ទងនឹងបុណ្យអ៊ីស្ទើរ ហើយខ្ញុំមានអំណរគុណចំពោះកិច្ចខិតខំជាច្រើនរបស់បងប្អូនក្នុងការធ្វើឲ្យបុណ្យអ៊ីស្ទើរជាឱកាសដ៏ពិសិដ្ឋ និងបរិសុទ្ធមួយ ។ ជាការបន្ថែមពីលើការប្រជុំសាក្រាម៉ង់រយៈពេលមួយម៉ោងនៅថ្ងៃអាទិត្យបុណ្យអ៊ីស្ទើរ ឧទាហរណ៍ផ្សេងទៀតអំពីសកម្មភាពដែលមានភាពស័ក្ដិសមរួមមាន ការប្រជុំធម្មនិដ្ឋានវួដ និងស្ដេក និងសកម្មភាពនៅថ្ងៃអាទិត្យធាងចាក ក៏ដូចជាសកម្មភាពនៅអំឡុងសប្ដាហ៍ដ៏បរិសុទ្ធផងដែរ ។ សកម្មភាពនៃការចងចាំទាំងនេះរួមបញ្ចូលសកម្មភាពជាមួយកុមារ និងយុវវ័យ ហើយជារឿយៗក៏មាននូវចម្រៀងពិសេសរួមគ្នាជាមួយសមាជិកនៃជំនឿផ្សេងផងដែរ ។ អ្នកផ្សេងទៀតបានរៀបចំព្រឹត្តិការណ៍នៃ« ព្រះគ្រីស្ទដ៏មានព្រះជន្មរស់ » សម្រាប់សមាជិក និងមិត្ដភក្ដិ និងបានចូលរួមក្នុងព្រឹត្ដិការណ៍បុណ្យអ៊ីស្ទើរដែលបានប្រារព្ធឡើងដោយសហគមន៍សាសនាផ្សេងៗគ្នាផងដែរ ។

សកម្មភាពដូចទាំងនេះគឺស្រដៀងគ្នាទៅនឹងហ្វូងមនុស្សនៅក្នុងទីក្រុងយេរូសាឡិម ដែលចូលរួមនឹងគ្នា ដើម្បីសរសើរតម្កើងដល់ព្រះអង្គសង្គ្រោះអំឡុងការយាងចូលដ៏ជោគជ័យរបស់ទ្រង់ដែរ ។ អ្វីដែលកាន់តែពិសេសដូចគ្នានោះ គឺរបាយការណ៍នៃការឆ្លើយតបរបស់បងប្អូនទៅនឹងការអញ្ជើញរបស់គណៈប្រធានទីមួយ ដែលឲ្យបងប្អូនថ្វាយបង្គំនៅឯផ្ទះជាក្រុមគ្រួសារដើម្បីរំឭកថ្ងៃបុណ្យដល់សំខាន់បំផុតនេះ ។

ខ្ញុំជឿថា ការថ្វាយបង្គំជាគ្រួសារក្នុងអំឡុងបុណ្យអ៊ីស្ទើរ មានការកើនឡើងគួរឲ្យកត់សម្គាល់ ។ ពីរឆ្នាំមុន ខ្ញុំបាននិយាយអំពីការតាំងចិត្ដរបស់គ្រួសារយើងដើម្បីកែលម្អរបៀបដែលយើងប្រារព្ធបុណ្យអ៊ីស្ទើរ ។ និយាយឲ្យត្រង់ទៅ ការណ៍នេះកំពុងស្ថិតក្នុងដំណើរការនៅឡើយទេ ។ យើងតែងតែរីករាយនឹងការញ៉ាំអាហារនៅថ្ងៃអាទិត្យពិសេសនៃបុណ្យអ៊ីស្ទើរ ការស្វែងរកកន្ដ្រកអ៊ីស្ទើរ និងពងមាន់អ៊ីស្ទើរជានិច្ច ហើយយើងនៅតែចូលចិត្ដការណ៍ទាំងនេះ ។ ប៉ុន្ដែ ការបន្ថែមនូវចេតនាខាងវិញ្ញាណដ៏ធំដែលផ្ដោតលើព្រះយេស៊ូវគ្រីស្ទ និងដង្វាយធួនរបស់ទ្រង់បែបនេះ ចូលទៅក្នុងការប្រារព្ធអបអររបស់យើង បាននាំមកនូវតុល្យភាពដ៏ផ្អែមល្ហែមមកកាន់ការរំឭករបស់យើងអំពីព្រឹត្ដិការណ៍ដ៏បរិសុទ្ធទាំងនេះលើសជាងព្រឹត្ដការណ៍ណាទាំងអស់ ។

ការសម្ដែងរបស់គ្រួសារស្ទីវ៉ែនសុន នៅថ្ងៃបុណ្យអ៊ីស្ទើរ<nb/>។

ឆ្នាំនេះនឹងជាការព្យាយាមលើកទីបីរបស់យើងក្នុងការធ្វើឲ្យបុណ្យអ៊ីស្ទើរកាន់តែផ្ដោតលើព្រះគ្រីស្ទ ។ ដូចជាការសម្ដែងពីការប្រសូតនៅរដូវបុណ្យគ្រីស្ទម៉ាសដែរ កម្មវិធីរបស់គ្រួសារយើងក្នុងថ្ងៃបុណ្យអ៊ីស្ទើរគឺរួមមានការតុបតែងខ្លួនសាមញ្ញ ការអានបទគម្ពីរចេញពីព្រះគម្ពីរសញ្ញាថ្មី និងព្រះគម្ពីរមរមន តន្រ្ដី រូបភាពអំពីបុណ្យអ៊ីស្ទើរ ស្លឹកធាងចាក—ហើយមានភាពរញ៉េរញ៉ៃបន្ដិចដែរ បើនិយាយឲ្យត្រង់ទៅ ។ កូនៗ និងចៅៗកំពុងអាន និងទន្ទេញការសរសើរតម្កើងនៃថ្ងៃអាទិត្យធាងចាក « ហូសាណា … ព្រះអង្គដែលយាងមកដោយនូវព្រះនាមព្រះអម្ចាស់ ទ្រង់ប្រកបដោយព្រះពរ ហូសាណា នៅស្ថានខ្ពស់បំផុត » ។ ហើយ « នេះគឺជាហោរាយេស៊ូវ … មកពីស្រុកកាលីឡេ » ដែលសំខាន់ដូចគ្នានឹង « សេចក្ដីសុខសាន្ដនៅផែនដី នៅកណ្ដាលមនុស្ស » នៅរដូវបុណ្យគ្រីស្ទម៉ាសដូច្នោះដែរ ។

ឥឡូវនេះយើងរីករាយនឹងការតុបតែងចម្រុះគ្នា ។ កាលគ្រាមុនៗមនុស្សជាច្រើនតុបតែងផ្ទះរបស់ពួកគេដោយរូបភាពនៃទន្សាយ និងពងមាន់ ឥឡូវនេះពួកគេបានបន្ថែមរូបសំណាក ព្រះគ្រីស្ទ និងរូបភាពផ្នូរដែលនៅទទេ ដែលព្រះអង្គសង្គ្រោះដ៏មានព្រះជន្មរស់លេចមកនៅក្នុងសួនច្បារខាងក្រៅផ្នូរ និងព្រមទាំងការបង្ហាញព្រះកាយរបស់ព្រះអង្គសង្គ្រោះទៅកាន់ពួកសាសន៍នីហ្វៃ ។ យើងក៏ព្យាយាមយ៉ាងខ្លាំងដែរ ដើម្បីធ្វើឲ្យបុណ្យអ៊ីស្ទើរក្លាយជារដូវកាលមួយជាជាងគ្រាន់តែជាថ្ងៃបុណ្យមួយថ្ងៃ ។ យើងកំពុងព្យាយាមឲ្យមានចំណេះដឹង ការគិតគូរជាងមុនក្នុងការប្រារព្ធថ្ងៃអាទិត្យធាងចាក និងថ្ងៃសុក្រល្អ និងព្រឹត្ដិការណ៍ពិសិដ្ឋនានាដែលមាននៅអំឡុងសប្តាហ៏ដ៏បរិសុទ្ធនោះ ។

បុណ្យអ៊ីស្ទើរអនុញ្ញាតឲ្យយើងគោរពនូវពលិកម្មដ៏ធួនរបស់ព្រះយេស៊ូវគ្រីស្ទ និងព្រមទាំងការមានព្រះជន្មរស់ឡើងវិញដ៏ពិត និងដ៏ពេញដោយអំណររបស់ទ្រង់ ។ ដួងចិត្ដយើងមានទុក្ខសោកសៅ កាលយើងគិតស្រមៃដល់ការរងទុក្ខរបស់ព្រះអង្គសង្គ្រោះនៅក្នុងសួនច្បារ និងនៅលើភ្នំកាល់វ៉ារី ប៉ុន្ដែដួងចិត្ដយើងអររីករាយ កាលយើងនឹងគិតដល់ផ្នូរដែលនៅទទេ និងការប្រកាសពីស្ថានសួគ៌ « ទ្រង់មានព្រះជន្មរស់ឡើងវិញហើយ ! »

ការមានព្រះជន្មរស់ឡើងវិញដ៏ពិត

ការលើកទឹកចិត្ដថ្មីៗនេះមកពីគណៈប្រធានទីមួយឲ្យយើង « ទន្ទឹងចាំបុណ្យអ៊ីស្ទើរ និងការមានព្រះជន្មរស់ឡើងវិញនៃព្រះយេស៊ូវគ្រីស្ទ—ជាសារលិខិតដ៏រុងរឿងលើអស់ទាំងសារលិខិតទាំងអស់ទៅកាន់មនុស្សជាតិ » បង្ហាញពីចំណុចសំខាន់ដ៏ធំនៃរដូវកាលនេះ ។ ខណៈដែលវាមើលទៅហាក់ដូចជានិន្នាការដែលកំពុងរីកសាយក្នុងចំណោមពួកអ្នកសិក្សាអំពីភាពជាគ្រីស្ទានជាច្រើន ឲ្យមើលទៅកាន់ការរស់ឡើងវិញថាជាការតំណាង និងនិមិត្ដរូបក្ដី ក៏យើងអះអាងពីគោលលទ្ធិរបស់យើងថា « ការរស់ឡើងវិញមានន័យថា មនុស្សទាំងអស់ដែលធ្លាប់បានរស់នៅ នឹងរស់ឡើងវិញ ហើយការរស់ឡើងវិញគឺពិត » ។ « ព្រោះដូចជាគ្រប់មនុស្សទាំងអស់ បានត្រូវស្លាប់ក្នុងលោកអ័ដាមជាយ៉ាងណា នោះគ្រប់គ្នាក៏នឹងបានប្រោសឲ្យរស់ក្នុងព្រះគ្រីស្ទយ៉ាងនោះដែរ » ។ ព្រះយេស៊ូវគ្រីស្ទបានផ្ដាច់ចំណងនៃសេចក្ដីស្លាប់ដល់គ្រប់ព្រលឹងដែលរស់នៅ ។

យើងពិតជាឆ្ងល់យ៉ាងអស្ចារ្យនូវព្រះគុណដែលព្រះយេស៊ូវប្រទានដល់យើង ។ យើងឱបក្រសោបនូវព្រះបន្ទូលរបស់ទ្រង់ថា « គ្មានអ្នកណាមានសេចក្តីស្រឡាញ់ធំជាងនេះ គឺដែលអ្នកណានឹងប្តូរជីវិត ជំនួសពួកសំឡាញ់របស់ខ្លួននោះទេ » ។

ស៊ី. អេស. លូវីស បានថ្លែងថា « ដើម្បីផ្សាយពីភាពជាគ្រីស្ទាន មានន័យថា [ ទៅកាន់សាវក ] ជាការផ្សាយអំពីការរស់ឡើងវិញជាចម្បង ។ … ការរស់ឡើងវិញគឺជាបាវចនាស្នូលនៅក្នុងគ្រប់ទេសនកថារបស់គ្រីស្ទានទាំងអស់ ដែលមាននៅក្នុងកិច្ចការ ។ ការរស់ឡើងវិញ និងលទ្ធផលរបស់វា គឺជា ‹ ដំណឹងល្អ › ឬការណ៍ល្អដែលពួកគ្រីស្ទាននាំយកមក » ។

ខ្ញុំសូមប្រកាសថា « មានដំណើររស់ឡើងវិញ … ផ្នូរគ្មានជ័យជម្នះលើឡើយ ហើយទ្រនិចនៃសេចក្តីស្លាប់ត្រូវបានលេបបាត់នៅក្នុងព្រះគ្រីស្ទ » ។

សេចក្ដីបញ្ចប់ និងទីបន្ទាល់

ជាចុងបញ្ចប់ ខ្ញុំថ្លែងទីបន្ទាល់ថា អស់អ្នកដែលទទួលយកការអញ្ជើញពីព្យាការីនៅរស់របស់យើង និងទីប្រឹក្សារបស់លោក ដើម្បីរំឭកចងចាំដល់ព្រឹត្ដិការណ៍ដ៏បរិសុទ្ធនានាដែលបុណ្យអ៊ីស្ទើរតំណាងឲ្យដោយចេតនាកាន់តែខ្លាំង នោះនឹងឃើញថាចំណងរបស់ពួកគេជាមួយនឹងព្រះយេស៊ូវគ្រីស្ទនឹងកាន់តែមានភាពរឹងមាំ ។

ប៉ុន្មានថ្ងៃមុននេះ ខ្ញុំបានដឹងអំពីជីដូនម្នាក់ដែលហាត់សមដំណើររឿងនៃបុណ្យអ៊ីស្ទើរជាមួយចៅប្រុសអាយុបួនឆ្នាំរបស់គាត់ ដោយការប្រើរូបភាពតូចៗនៃផ្នូរ ថ្មដែលបាំងទីបញ្ចុះសព ព្រះយេស៊ូវ ម៉ារា ពួកសិស្ស និងទេវតា ។ ក្មេងប្រុសតូចនោះមើល និងស្ដាប់យ៉ាងយកចិត្ដទុកដាក់ កាលយាយរបស់គាត់ចែកចាយអំពីការបញ្ចុះ ការបិទ និងការបើកផ្នូរ និងឈុតឆាកក្នុងសួនច្បារនៃការរស់ឡើងវិញ ។ ក្មេងនោះក្រោយមកក៏និយាយដំណើររឿងនោះឡើងវិញយ៉ាងលម្អិត កាលគាត់លេងរូបនោះតាមដំណើររឿងដែលគាត់កំពុងនិយាយ ។ ក្រោយពីពេលដ៏ផ្អែមល្ហែមនេះ មានគេសួរគាត់ថាតើគាត់ដឹងទេថា ហេតុអ្វីយើងមានបុណ្យអ៊ីស្ទើរ ។ ក្មេងប្រុសនោះងើបមុខឡើង ហើយឆ្លើយក្នុងភាពជាក្មេងរបស់គាត់ « ព្រោះទ្រង់នៅរស់ » ។

ក្មេងប្រុសម្នាក់កំពុងដំណាលប្រាប់ដំណើររឿងបុណ្យអ៊ីស្ទើរ<nb/>។

ខ្ញុំបន្ថែមទីបន្ទាល់របស់ខ្ញុំជាមួយនឹងរបស់ក្មេងតូចនោះ—និងជាមួយទីបន្ទាល់របស់បងប្អូន និងជាមួយទីបន្ទាល់របស់ពួកទេវតា និងពួកព្យាការី—ថាទ្រង់បានរស់ឡើងវិញ ហើយថាទ្រង់មានព្រះជន្មរស់ ខ្ញុំថ្លែងការណ៍ទាំងនេះក្នុងព្រះនាមនៃព្រះយេស៊ូវគ្រីស្ទ អាម៉ែន ។