ទ្រង់ជាព្រះគ្រីស្ទ
( ម៉ាថាយ ១៦:១៦ )
យើងចង់ឲ្យកូនៗរបស់យើងជឿលើព្រះយេស៊ូវគ្រីស្ទ ជាសមាជិករបស់ព្រះយេស៊ូវគ្រីស្ទ និងសាសនាចក្ររបស់ទ្រង់តាមរយៈសេចក្តីសញ្ញា និងខិតខំប្រែក្លាយដូចជាព្រះយេស៊ូវគ្រីស្ទ ។
នៅពេលកូនប្រុសរបស់យើង អ៊ីឡាយរៀនថ្នាក់ទីបួន ថ្នាក់របស់គាត់បានបង្កើតរដ្ឋាភិបាលសាកល្បងមួយ ដែលគាត់ត្រូវបានបោះឆ្នោតដោយមិត្តភក្តិរបស់គាត់ឲ្យបម្រើជាចៅក្រមក្នុងថ្នាក់ ។ ថ្ងៃមួយ ចៅក្រមមួយរូបមកពីតុលាការមណ្ឌលទី២ រដ្ឋយូថាហ៍បានមកធ្វើទស្សនកិច្ច ហើយយកឯកសណ្ឋានផ្លូវការរបស់គាត់ពាក់ឲ្យអ៊ីឡាយ ហើយបន្ទាប់មកបានប្រកាសពីការចូលកាន់តំណែងសម្រាប់ថ្នាក់របស់ពួកគេ ។ រឿងនេះបានបញ្ឆេះចំណាប់អារម្មណ៍នៅក្នុងព្រលឹងដ៏ក្មេងខ្ចីរបស់អីឡាយ ឲ្យមានចំណង់សិក្សាផ្នែកច្បាប់ ហើយព្រះយេស៊ូវគ្រីស្ទទ្រង់ផ្ទាល់ជាអង្គបង្កើតច្បាប់ ។
បន្ទាប់ពីការខិតខំប្រឹងប្រែងសិក្សាជាច្រើនឆ្នាំ អ៊ីឡាយបានទទួលការអញ្ជើញឲ្យសម្ភាសជាមួយសាលាច្បាប់ជម្រើសកំពូលមួយ ។ គាត់បានប្រកាសថា « ម៉ាក់ គេបានសួរខ្ញុំ ១០ សំណួរ ។ សំណួរចុងក្រោយគឺ ‹ តើអ្នកទទួលបានត្រីវិស័យដែលដឹកនាំអ្នកឲ្យដឹងខុសត្រូវនៅឯណា ? › ខ្ញុំបានថ្លែងថានៅទូទាំងប្រវត្តិសាស្រ្តមនុស្សជាតិបានទទួលប្រព័ន្ធនៃការអប់រំផ្នែកសីលធម៌តាមរយៈការដាក់លំនាំជីវិតរបស់ពួកគេចេញពីគំរូទាំងឡាយ ។ គំរូទាំងឡាយនៃសីលធម៌ដែលខ្ញុំខិតខំយកលំនាំតាមសម្រាប់ជីវិតរបស់ខ្ញុំគឺព្រះយេស៊ូវគ្រីស្ទ ។ ខ្ញុំបានថ្លែងថា ប្រសិនបើមនុស្សជាតិទាំងអស់គោរពតាមការបង្រៀនរបស់ព្រះយេស៊ូវគ្រីស្ទនៅក្នុងទេសនកថានៅលើភ្នំនោះពិភពលោកនឹងក្លាយជាកន្លែងដ៏ល្អប្រសើរជាង មានភាពសុខសាន្ដជាងមុន » ។ បន្ទាប់មកបទសម្ភាសនោះបានបញ្ចប់ ហើយគាត់បានគិតក្នុងចិត្តថា « ក្ដីសុបិនពីកុមារភាពរបស់ខ្ញុំរលាយអស់ហើយ ។ គ្មាននរណាម្នាក់នៅក្នុងវិស័យសិក្សាអប់រំខាងលោកិយចង់ឮអំពីព្រះយេស៊ូវគ្រីស្ទនោះទេ » ។
ពីរសប្តាហ៍ក្រោយមក អ៊ីឡាយត្រូវបានសាលាផ្ដល់អាហារូបករណ៍ឲ្យចូលសិក្សា ។ មុនចូលរៀន ពួកយើងបានទៅមើលបរិវេណសាលា ។ សាលាច្បាប់នោះមើលទៅដូចជាវិមានមួយ ហើយវាស្ថិតនៅលើកំពូលភ្នំដែលមើលឃើញបឹងដ៏ស្រស់ស្អាតមួយ ។ អ្វីគួរឲ្យកត់សម្គាល់នោះ គឺនៅពេលដែលយើងដើរឆ្លងកាត់បណ្ណាល័យដ៏ស្កឹមស្កៃ និងច្រករបៀងដ៏វែង យើងបានឃើញនៅលើបដា និងចម្លាក់នៅលើថ្មគឺមាននូវកាយវិការដកស្រង់ចេញពីទេសនកថាលើភ្នំ ។
ទេសនកថាលើភ្នំ គឺជាសុន្ទរកថាពិសេសដ៏គួរឲ្យកត់សម្គាល់ដែលមិនធ្លាប់មានពីមុនមក ។ ជាទេសនកថាបង្រៀនដ៏វិសេសបំផុត ។ គ្មានទេសនកថាណាផ្សេងទៀតអាចជួយយើងឲ្យយល់កាន់តែច្បាស់អំពីបុគ្គលិកលក្ខណៈរបស់ព្រះយេស៊ូវគ្រីស្ទ គុណលក្ខណៈដ៏ទេវភាពរបស់ទ្រង់ និងគោលបំណងដ៏ធំរបស់យើងដើម្បីក្លាយដូចជាទ្រង់ឡើយ ។
ភាពជាសិស្សពេញមួយជីវិតរបស់ព្រះយេស៊ូវគ្រីស្ទចាប់ផ្តើមនៅក្នុងគេហដ្ឋានរបស់យើង—និងនៅក្នុងអង្គការបឋមសិក្សាលឿនបំផុតនៅអាយុ ១៨ ខែ ។ យើងចង់ឲ្យកូនៗរបស់យើងជឿ លើព្រះយេស៊ូវគ្រីស្ទ ជាសមាជិក របស់ព្រះយេស៊ូវគ្រីស្ទ និងសាសនាចក្ររបស់ទ្រង់តាមរយៈសេចក្តីសញ្ញា និងខិតខំ ប្រែក្លាយ ដូចជាព្រះយេស៊ូវគ្រីស្ទ ។
ជឿលើព្រះយេស៊ូវគ្រីស្ទ
ទីមួយ ជឿលើព្រះយេស៊ូវគ្រីស្ទ ។
បន្ទាប់ពីទេសនកថាស្តីពីនំបុ័ងជីវិត « សិស្ស[ របស់ព្រះអម្ចាស់ ]ជាច្រើន » មើលឃើញថាវាជាការលំបាកសម្រាប់ពួកគេដើម្បីទទួលយកការបង្រៀន និងគោលលទ្ធិរបស់ទ្រង់ ហើយពួកគេបាន « ដកខ្លួនថយចេញ មិនតាមទ្រង់ទៀតទេ ។ » បន្ទាប់មកព្រះយេស៊ូវបានងាកទៅពួកដប់ពីរនាក់ ហើយបានសួរសំណួរដែលចាក់ជាប់ក្នុងចិត្តថា « អ្នករាល់គ្នាចង់ថយទៅដែរឬ ? »
ពេត្រុសបានទូលថា ៖
« ព្រះអម្ចាស់ អើយ តើយើងខ្ញុំនឹងទៅឯអ្នកណាវិញ ? គឺទ្រង់ហើយ ដែលមានព្រះបន្ទូលនៃជីវិតដ៏នៅអស់កល្បជានិច្ច ។
« …យើងខ្ញុំក៏បានជឿ ហើយដឹងថា ទ្រង់ជាព្រះគ្រីស្ទ ជាព្រះរាជបុត្រានៃព្រះដ៏មានព្រះជន្មរស់ពិត » ។
ដូចការបកស្រាយរបស់ពេត្រុស ជំនឿគឺ « មានសេចក្ដីជំនឿជឿដល់អ្នកណាមួយ ឬក៏ទទួលស្គាល់អ្វីមួយថាពិត។ » ។ ហើយដើម្បីឲ្យសេចក្តីជំនឿរបស់យើងដឹកនាំទៅរកសេចក្តីសង្គ្រោះ វាត្រូវតែផ្តោតសំខាន់ទៅលើព្រះអម្ចាស់ព្រះយេស៊ូវគ្រីស្ទ ។ « យើង … អនុវត្តសេចក្តីជំនឿលើ[ ព្រះយេស៊ូវ ]គ្រីស្ទ នៅពេលយើងបានទទួលការអះអាងមួយថា ពិតជាមានទ្រង់មែន [ ការយល់ដឹង ]អំពីលក្ខណៈ[ ពិត ] [ និងនិស្ស័យ ]របស់ទ្រង់ និងចំណេះដឹងដែលយើងកំពុងព្យាយាមរស់នៅស្របតាមព្រះហឫទ័យរបស់ទ្រង់ ។
ព្យាការីជាទីស្រឡាញ់របស់យើង ប្រធាន រ័សុល អិម ណិលសុន បានប្រកាសថា « សេចក្តីជំនឿលើព្រះយេស៊ូវគ្រីស្ទគឺជាគ្រឹះនៃជំនឿទាំងអស់ និងជារបៀបដើម្បីទទួលបានព្រះចេស្ដារបស់ព្រះ » ។
តើយើងអាចជួយពង្រឹងសេចក្តីជំនឿរបស់កុមារលើព្រះយេស៊ូវគ្រីស្ទ និងទទួលបានព្រះចេស្តាដ៏ទេវភាពរបស់ទ្រង់ដោយរបៀបណា ? យើងត្រូវការផ្តោតលើព្រះអង្គសង្គ្រោះតែមួយអង្គប៉ុណ្ណោះ ។
« [ ព្រះអម្ចាស់ ] បានមានព្រះបន្ទូលទៅកាន់ប្រជាជន ៖
« មើលចុះ យើងគឺព្រះយេស៊ូវគ្រីស្ទ …
« ចូរក្រោកឡើង ហើយមករកយើងចុះ …
« ហ្វូងមនុស្សបានដើរទៅមុខ ហើយបានលូកដៃទៅឯចំហៀងព្រះអង្គ ហើយបានស្ទាបស្នាមដែកគោលនៅត្រង់ព្រះហស្ត និងព្រះបាទារបស់ព្រះអង្គ ហើយពួកគេបានយ៉ាងនេះ គឺបានដើរទៅមុខម្ដងម្នាក់ៗ … ហើយបាន ឃើញ ដោយភ្នែកគេផ្ទាល់ ហើយបាន ស្ទាប ដោយដៃគេផ្ទាល់ និងបាន ដឹង យ៉ាងជាក់ច្បាស់ និងបាន ធ្វើបន្ទាល់ ថាគឺជាព្រះអង្គមែន » ។
ខ្ញុំសូមអញ្ជើញបងប្អូនឲ្យពិចារណា តើគោលការណ៍នេះអាចអនុវត្ដនៅក្នុងជីវិតរបស់ក្មេងតូចៗដោយរបៀបណា ។ តើពួកគេ បានឮ ទីបន្ទាល់នៃព្រះយេស៊ូវគ្រីស្ទ និងដំណឹងល្អរបស់ទ្រង់ឬទេ ? តើពួកគេ មើលឃើញ រូបភាពដែលមានគារវភាព និងគួរឲ្យថ្វាយបង្គំនៃការងារបម្រើរបស់ព្រះអង្គសង្គ្រោះ និងភាពជាព្រះរបស់ទ្រង់ឬទេ ? តើពួកគេ ទទួលអារម្មណ៍ និងស្គាល់ព្រះវិញ្ញាណបរិសុទ្ធដែលធ្វើបន្ទាល់អំពីភាពពិត និងទេវភាពរបស់ទ្រង់ដែរឬទេ ? តើពួកគេ ដឹង អំពីសារលិខិត និងបេសកកម្មរបស់ទ្រង់ឬទេ ?
ជាសមាជិករបស់ព្រះយេស៊ូវគ្រីស្ទ និងសាសនាចក្ររបស់ទ្រង់
ទីពីរ ជាសមាជិករបស់ព្រះយេស៊ូវគ្រីស្ទ និងសាសនាចក្ររបស់ទ្រង់ ។
ប្រជារាស្ដ្ររបស់ស្ដេចបេនយ៉ាមីនបានមានបទពិសោធន៍ពីការផ្លាស់ប្ដូរយ៉ាងធំក្នុងដួងចិត្ដ ហើយតាមរយៈសេចក្ដីសញ្ញាបានថ្វាយជីវិតរបស់ពួកគេក្នុងធ្វើតាមព្រះឆន្ទៈរបស់ព្រះ ។ ដោយសារតែសេចក្តីសញ្ញាដែលពួកគេបានចុះជាមួយព្រះ និងព្រះយេស៊ូវគ្រីស្ទ នោះពួកគេ « នឹងត្រូវបានហៅថា ជាកូនចៅនៃព្រះគ្រីស្ទ គឺជាបុត្រារបស់ទ្រង់ និងបុត្រីរបស់ទ្រង់ » ។ ក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ យើងមានទំនួលខុសត្រូវក្នុងសេចក្តីសញ្ញា ដើម្បីកសាងនគររបស់ទ្រង់ និងរៀបចំសម្រាប់ការយាងត្រឡប់មកវិញរបស់ទ្រង់ ។
តើយើងអាចជួយកុមារដើម្បីធ្វើ និងរក្សាសេចក្តីសញ្ញាដ៏ពិសិដ្ឋនេះដោយរបៀបណា ? នៅក្នុងឧបសម្ព័ន្ធ ក និង ខ នៃសៀវភៅសិក្សា ចូរមកតាមខ្ញុំ យើងរកឃើញការសន្ទនានៅខាងដើម និងមេរៀនដែលនឹងផ្តល់អំណាចដល់ក្រុមគ្រួសារ និងគាំទ្រគ្រូបង្រៀន និងថ្នាក់ដឹកនាំក្នុងទំនួលខុសត្រូវដ៏ពិសិដ្ឋរបស់ពួកគេ ដើម្បីរៀបចំកុមារសម្រាប់ការស្ថិតនៅលើផ្លូវនៃសេចក្ដីសញ្ញារបស់ព្រះពេញមួយជីវិត ។
ប្រែក្លាយដូចជាព្រះយេស៊ូវគ្រីស្ទ
ទីបី ប្រែក្លាយដូចជាព្រះយេស៊ូវគ្រីស្ទ ។
នៅក្នុងព្រះគម្ពីរមរមន ព្រះអង្គសង្គ្រោះបានព្រមានសិស្សដែលទើបហៅថ្មីរបស់ទ្រង់ឲ្យធ្វើតាមទ្រង់ឲ្យកាន់តែដូចកាន់តែល្អ ៖ « តើអ្នករាល់គ្នាគួរធ្វើជាមនុស្សបែបណាទៅ ? យើងប្រាប់អ្នករាល់គ្នាជាប្រាកដថា ត្រូវឲ្យបានដូចជាយើង » ។
តើយើងអាចជួយកុមារដែលបានធ្វើបុណ្យជ្រមុជទឹក និងបានទទួលពិធីបញ្ជាក់ឲ្យបំពេញទំនួលខុសត្រូវក្នុងសេចក្ដីសញ្ញារបស់ពួកគេ ដើម្បីប្រមូលផ្តុំ ខ្លួនពួកគេ និងអ្នកដទៃទៀតទៅកាន់ព្រះយេស៊ូវគ្រីស្ទដោយរបៀបណា ? ភាពជាសិស្សពេញមួយជីវិតតម្រូវឲ្យយើង « ចូរឲ្យ…ប្រព្រឹត្តតាមព្រះបន្ទូលទៅ កុំឲ្យគ្រាន់តែស្តាប់ប៉ុណ្ណោះ » ។
នៅពេលយើងបន្តផ្តល់ការអញ្ជើញដល់សិស្សវ័យក្មេងបំផុតរបស់ព្រះអម្ចាស់ សូមទាញយកគ្រប់ឱកាសដើម្បីដឹកនាំពួកគេ ណែនាំពួកគេ ដើរនៅក្បែរពួកគេ និងជួយពួកគេស្វែងរកផ្លូវ ។ សូមផ្តល់ដំបូន្មានដល់កុមារតូចៗដ៏មានតម្លៃទាំងនេះ កាលពួកគេរៀបចំខ្លួនដើម្បីបង្រៀន ថ្លែងទីបន្ទាល់ អធិស្ឋាន ឬធ្វើការបម្រើ ដូច្នេះទើបពួកគេមានទំនុកចិត្ត និងទទួលនូវបទពិសោធន៍ដ៏រីករាយក្នុងការបំពេញការទទួលខុសត្រូវរបស់ពួកគេ ។ ស្វែងរករបៀបដ៏បំផុសគំនិតដើម្បីជួយពួកគេឲ្យដឹងថានេះគឺជាសាសនាចក្ររបស់ពួកគេ ហើយពួកគេមានតួនាទីសំខាន់ក្នុងការរៀបចំសម្រាប់ការយាងត្រឡប់មកវិញរបស់ព្រះអង្គសង្គ្រោះ ។
នៅពេលព្រះយេស៊ូវគ្រីស្ទក្លាយជាចំណុចសំខាន់នៅក្នុងជីវិតរបស់យើងនោះអ្វីដែលយើងប្រាថ្នាចង់បាន និងរបៀបដែលយើងប្រាថ្នាចង់បានវា គឺមានការផ្លាស់ប្តូរជារៀងរហូត ។ ការប្រែចិត្តជឿ ផ្លាស់ប្តូរអ្វីៗគ្រប់យ៉ាង ! វាផ្លាស់ប្តូរធម្មជាតិរបស់យើង « ដែលធ្វើឲ្យយើងខ្ញុំពុំមានបំណងនឹងប្រព្រឹត្តអំពើទុច្ចរិតទៀតឡើយ ប៉ុន្តែចង់ប្រព្រឹត្តអំពើល្អជានិច្ចវិញ » ។ វាផ្លាស់ប្តូររបៀបដែលយើងចំណាយពេលវេលារបស់យើង ធនធានរបស់យើង អ្វីដែលយើងអាន មើល ស្តាប់ និងចែកចាយ ។ វាថែមទាំងផ្លាស់ប្តូររបៀបដែលយើងឆ្លើយតបនៅក្នុងបទសម្ភាសសម្រាប់អាជីពដែលល្បីល្បាញ និងដែលមានការសិក្សាអប់រំខ្ពស់ផងដែរ ។
យើងត្រូវបញ្ចូលពន្លឺនៃព្រះយេស៊ូវគ្រីស្ទ នៅគ្រប់ជ្រុងទាំងអស់ក្នុងជីវិតរបស់យើង ។ បើយើងពុំបានថ្លែងទីបន្ទាល់ដោយស្មោះអំពីភាពជាព្រះមុនជីវិតលើផែនដីរបស់ទ្រង់ អំពីបេសកកម្មដ៍ទេវភាពរបស់ទ្រង់ និងការមានព្រះជន្មរស់ឡើងវិញពីគុកនៃសេចក្ដីស្លាប់ នៅក្នុងគេហដ្ឋាននិងនៅគ្រប់ក្នុងការប្រជុំនៃសាសនាចក្រនេះនោះទេ នោះសារលិខិតរបស់យើងអំពីសេចក្តីស្រឡាញ់ ការបម្រើ ភាពស្មោះត្រង់ ការបន្ទាបខ្លួន ការមានអំណរគុណ និងសេចក្តីមេត្តាករុណានឹងពុំមានន័យអ្វីក្រៅពីតែជាសារលិខិតដែលលើកទឹកចិត្ដឲ្យរស់នៅប្រកបដោយការគិតពិចារណានោះឡើយ គ្មានអំណាចពិតប្រាកដទេ ។ បើគ្មានព្រះយេស៊ូវគ្រីស្ទទេនោះពុំមានព្រះចេស្តាដើម្បីផ្លាស់ប្តូរ គ្មានគោលបំណងដើម្បីជោគជ័យ ហើយក៏គ្មានការផ្សះផ្សាក្នុងដំណើរជីវិតដ៏លំបាកនេះឡើយ ។ បើយើងធ្វើធម្មតាៗ ក្នុងភាពជាសិស្សនៃព្រះយេស៊ូវគ្រីស្ទរបស់យើង នោះវានឹងក្លាយជាមហន្តរាយសម្រាប់កូនចៅរបស់យើង ។
នៅពេលយើងប្រាប់កូនៗរបស់យើងថាយើងស្រឡាញ់ពួកគេ តើយើងក៏ប្រាប់ពួកគេថាព្រះបិតាដែលគង់នៅស្ថានសួគ៌ និងព្រះអង្គសង្គ្រោះព្រះយេស៊ូវគ្រីស្ទក៏ស្រឡាញ់ពួកគេផងដែរឬទេ ? សេចក្តីស្រឡាញ់របស់យើងអាចលួងលោម និងបំផុសគំនិត ប៉ុន្ដែសេចក្តីស្រឡាញ់ របស់ទ្រង់ទាំងទ្វេ អាចញែកចេញជាបរិសុទ្ធ លើកតម្កើង និងព្យាបាល ។
ព្រះយេស៊ូវមិនមែនជាព្រះយេស៊ូវប្រឌិត ឬជាព្រះយេស៊ូវដ៏សាមញ្ញ ឬជាព្រះយេស៊ូវដែលគ្មានរូបកាយ ឬជាព្រះយេស៊ូវធម្មតាៗ ឬជាព្រះយេស៊ូវដែលមិនល្បីល្បាញនោះទេ ប៉ុន្ដែជាព្រះរាជបុត្រាតែមួយគត់នៃព្រះដែលបានតម្កើង ដ៏អស្ចារ្យ ដែលបានមានព្រះជន្មរស់ឡើងវិញ ដែលបានលើកឡើង ដែលទទួលបានការថ្វាយបង្គំ មានព្រះចេស្ដា ជាព្រះរាជបុត្រាតែមួយគត់នៃព្រះ ជា អង្គដែលមានឥទ្ធិឫទ្ធិដើម្បីសង្គ្រោះ ។ ហើយដូចដែលកុមារតូចម្នាក់នៅប្រទេសហ្វីលីពីនបានថ្លែងទីបន្ទាល់គួរឲ្យទាក់ទាញដល់ខ្ញុំនៅថ្ងៃមួយថា « យើងមានតម្លៃក្នុងការត្រូវបានសង្គ្រោះ ! » នៅក្នុងព្រះនាមដ៏ពិសិដ្ឋ និងបរិសុទ្ធរបស់ទ្រង់ « ដែលព្រះបានតាំងទ្រង់ទុកជាទីសន្តោសប្រោស [ ដ៏អស្ចារ្យ ] » ក្នុងព្រះនាមនៃព្រះយេស៊ូវគ្រីស្ទ អាម៉ែន ៕