Pa Andisi Kè Ou

Retablisman levanjil Jezikri a te kòmanse lè Bondye Papa a ak Pitit Gason Byeneme L la te parèt devan jèn Joseph Smith, pou te reponn priyè enb li a. Kòm yon pati nan Retablisman an, Joseph Smith te tradui yon ansyen rejis atravè don ak pouvwa Bondye. Rejis sa a genyen “Relasyon Bondye avèk kèk nan ansyen abitan peyi Amerik yo epi li genyen plenitid levanjil etènèl la”

Lè m te yon jèn tigason, pandan m t ap li Liv Mòmon an, mwen te souvan ap mande m poukisa Laman ak Lemyèl pa t kwè nan verite yo te resevwa yo, menm lè yon zanj Senyè a te parèt epi te pale avèk yo dirèkteman. Poukisa Laman ak Lemyèl pa t ka pi enb ak pi obeyisan nan ansèyman papa yo, Leyi, ak jèn frè yo a, Nefi?

Mwen te jwenn youn nan repons pou kesyon sa a nan 1 Nefi, ki deklare ke Nefi te “gen lapenn poutèt kè di yo.” Nefi te mande gran frè l yo, “Kouman fè kè nou di konsa, epi panse nou tèlman avèg konsa?”

Kisa sa vledi pou yon moun gen kè di?

Tradiksyon Koreyen mo “andisi” a nan Liv Mòmon an se 완악 (Wan-Aak: 頑惡). Fraz sa a itilize karaktè Chinwa “Wan” (頑), ki siyifi “tèt di,” ak “Aak” (惡), ki siyifi “mechan.” Lè nou andisi kè nou, nou avegle, epi bon bagay pa ka vini nan kè nou ak nan lespri nou. Nou vin tèti epi nou kòmanse mete plis fokis sou dezi monden yo, e nou fèmen kè nou pou bagay Bondye yo. Nou chwazi fokis sèlman sou pwòp panse nou pandan nou pa vle aksepte opinyon ak gidans lòt moun. Nou chwazi pou n pa ouvri kè nou a bagay Bondye yo men olyesa nou ouvri l a enfliyans bagay mond lan ak advèsè a. Lè kè nou di, nou reziste anba enfliyans Sentespri a. Nou “lan pou nou sonje Senyè a,” epi avèk letan, nou vin “san sansiblite” pou pawòl Li yo.

Alma te anseye pèp la nan Amoniya ke gen moun ki “te rejte Lespri Bondye poutèt kè yo ki te di.” Li te anseye tou ke “moun ki fè kè di, yo resevwa pi piti pòsyon pawòl la jistan yo pa konnen anyen konsènan mistè li yo.” Alafen, Lespri a ale, epi Senyè a “pral wete pawòl [Li]” nan pami moun ki fè kè yo di, tankou Laman ak Lemyèl. Paske Laman ak Lemyèl te toujou ap andisi kè yo, reziste anba santiman Sentespri a, epi chwazi pou yo pa t aksepte pawòl ak ansèyman papa yo ak Nefi, yo te finalman rejte verite etènèl Bondye yo.

Kontrèman ak Laman ak Lemyèl, Nefi te kontinyèlman mete l enb, ap chèche gidans nan men Lespri Senyè a. An retou, Senyè a te adousi kè Nefi. Nefi pataje ke li “te kriye nan pye Senyè a; e li te vizite m, e li te touche kè m pou m te kapab kwè tout pawòl papa m te pale yo.” Senyè a te ede Nefi aksepte, konprann, ak kwè tout mistè Bondye yo ak pawòl Li yo. Nefi te vin kapab gen konpayi konstan Sentespri a.

Kisa nou ka fè pou nou pa fè kè nou di?

Premyèman, nou ka pratike repantans chak jou.

Sovè nou an te anseye, “Tout moun ki repanti e ki vin jwenn mwen tankou yon timoun piti, m ap resevwa l.” Pwofèt byenneme nou an, Prezidan Russell M. Nelson, te anseye:

“Repanti se kle pou pwogresyon. Lafwa pur ede nou avanse sou chemen alyans lan.

“Tanpri, pa pè ni pa ranvwaye repantans nou. Satan rejwi nan mizè nou. … Kòmanse jodia pou nou fè eksperyans lajwa a nan chase lòm natirèl la. Sovè a toujou renmen nou men espesyalman lè nou repanti.”

Lè nou fè eksperyans lajwa nan adousi kè nou ak nan vin jwenn Senyè a, nou vin “tankou yon timoun, obeyisan, dou, enb, pasyan, ranpli avèk lanmou ki vle soumèt tèt li anba tout bagay Senyè a jije nesesè pou fè l andire, menm jan yon timoun soumèt devan papa l.”

Dezyèmman, nou ka pratike imilite.

Repantans kotidyen ap pote imilite nan kè nou. Nou vle vin enb devan Senyè a, tankou yon timoun piti ki obeyi papa li. Epi lèsa a n ap toujou gen Sentespri a avèk nou, epi kè nou ap adousi.

Madan mwen, Sue, avèk mwen te konnen yon mari ak madanm mèveye pandan kat dènye ane sa yo. Lè nou te fèk rankontre yo, mari a sete yon nouvo manm nan Legliz la, epi madanm li t ap rankontre avèk misyonè yo pou l te etidye levanjil la. Anpil misyonè te rankontre avèk li pou te ede l vin jwenn Kris la. Nou te santi ke l te gen yon temwayaj vibran sou levanjil la epi l te konnen ke Legliz la te vrè. Li te santi Lespri a souvan pandan vizit nou yo epi l te patisipe aktivman nan tout reyinyon yo. Li te renmen pale avèk manm yo nan pawas la. Sepandan, li te twouve sa difisil pou l te pran angajman pou l te antre nan dlo batèm nan. Yon jou li t ap li Mowoni 7:43–44, ki di:

“Epi ankò, gade, m ap di nou, li pa kapab gen lafwa, si l pa dou epi si kè l pa bon.

“Si se sa, lafwa ak esperans [ou] pa gen valè, paske pèsonn pa akseptab devan Bondye, eksepte si li dou e gen kè poze.”

Apre l te fin li vèsè sa yo, li te reyalize kisa l te bezwen fè. Li te panse ke l te konprann kisa sa vledi pou yon moun dou ak enb. Men, konpreyansyon l lan pa te sifi pou l te gen lafwa ak esperans pou l te obeyi kòmandman Bondye yo. Li te oblije abandone tèt di l la ak pwòp sajès pa l la. Li te kòmanse imilye tèt li atravè repantans sensè. Li te kòmanse konprann imilite nan pèspektiv je Bondye. Li te konte sou Papa nou ki nan Syèl la epi l te adousi kè li. Atravè priyè sa yo, li te santi Lespri a temwaye l ke Papa nou ki nan Syèl la te vle pou l batize.

Mari a ak tout madanm nan te di ke plis yo te vin enb, se plis yo te ka konprann pawòl Bondye yo, epi kè yo te adousi pou yo te suiv ansèyman Senyè nou an, Jezikri.

Twazyèmman, nou ka mete konfyans nan Sovè a epi konte sou Li.

Nefi sete yon gwo egzanp sou yon moun ki pèmèt kè li adousi nan mete konfyans li nan Senyè a. Li te anseye, “M te konfye m nan ou, epi m ap konfye m nan ou pou tout tan. M p ap mete konfyans mwen nan ponyèt lachè.” Menmjan tou, nan yon revelasyon li te bay Pwofèt Joseph Smith, Senyè a te di, “Mete konfyans ou nan Lespri sa a ki dirije moun pou yo fè byen—wi, pou yo fè sa ki jis, pou yo mache avèk imilite.” Lè nou mete konfyans nou nan Senyè a epi nou apiye sou Li, L ap adousi kè nou, epi n ap vin jwenn sipò nan traka, pwoblèm, ak afliksyon nou yo.

Si nou sensèman repanti, nou imilye tèt nou, epi nou mete konfyans nan Senyè a epi nou apiye sou Li, kè nou ap adousi. Lèsa a, L ap devèse Lespri Li epi L ap montre nou mistè syèl yo. Nou va kwè tout pawòl Li anseye yo, epi konpreyansyon nou va apwofondi.

Sovè nou an, Jezikri, sete egzanp siprèm lan sou dousè. Nan 2 Nefi 31:7, nou li, “Men, malgre li sen, li montre pitit lèzòm fason li, daprè kò fizik la, li gen imilite devan Papa a, e li temwaye Papa a li t ap obeyisan devan l nan respekte kòmandman li yo.” Malgre ke Li te sen ak pafè, Li te imilye Tèt li devan Papa a epi te obeyisan devan Li nan vin batize.

Nan fen lavi Li nan mòtalite a, Jezikri te soumèt volonte Li anba volonte Papa Li nan bwè tas anmè a. Soufrans sa a te lakoz Li di “Mwen tranble anba doulè, epi ki te fè m senyen nan chak twou swè nan kò m, epi ki te fè m soufri nan ni kò m ni nan lespri m.” Sovè a te di ke “Li te swete pou l pa t bwè tas anmè a, epi tou l pa t fè bak.” “Sepandan”, Li te di, “laglwa pou Papa a, epi [Li] te bwè l epi [Li] te fini preparasyon [L] yo pou pitit lèzòm.”

Frè m ak sè m yo, yo ba nou libète moral. Nou kapab chwazi fè kè nou di, oubyen nou ka chwazi pou n adousi kè nou. Nan lavi kotidyèn nou, nou ka chwazi pou n fè bagay ki envite Lespri Senyè a pou L vini epi demere nan kè nou. Mwen konnen ke nan chwa sa yo, gen lapè ak lajwa.

An nou suiv egzanp Sovè nou an, Jezikri, ki te suiv volonte Papa a. Pandan n ap fè sa, Senyè a pwomèt nou, “Paske, gade, m pral rasanble yo menm jan yon manman poul rasanble ti poul li yo anba zèl li, si yo pa fè kè yo di.” Nan non Jezikri, amèn.