Plan Mizèrikòd la

Ane pase nan Konferans Avril la, pa lontan apre bòn nouvèl rejwisan ke Legliz la te fè akizisyon Tanp Kirtland lan, Prezidan Russell M. Nelson te envite nou etidye priyè konsekrasyon Tanp Kirtland lan, ki anrejistre nan seksyon 109 Doktrin ak Alyans. Prezidan Nelson te di, priyè konsekrasyon an “se yon leson sou fason spirityalite tanp lan bay oumenm avèk mwen pouvwa pou nou simonte difikilte lavi yo nan dènye jou sa yo.”

Mwen sèten ke etid ou sou seksyon 109 la te ba ou ide ki te beni ou. Aprèmidi sa a, m ap pataje kèk bagay m te aprann lè m te swiv envitasyon pwofèt nou an. Chemen ki bay-lapè kote etid mwen an te mennen m nan te raple m ke Senyè a gen mizèrikòd epi plan sali Pè Selès nou an se vrèman yon plan mizèrikòd.

Kòm nou ka okouran, “yo ankouraje misyonè ki fèk aple yo pou yo resevwa dotasyon tanp la osito sa posib epi pou yo patisipe nan dotasyon tanp osi souvan sikonstans yo pèmèt yo.” Yon fwa yo dote, yo “ka sèvi kòm ouvriye … tanp tou anvan yo kòmanse sèvis misyonè” yo.

Tan yo pase nan tanp lan anvan yo antre nan Sant Fòmasyon Misyonè a kapab yon bèl benediksyon pou nouvo misyonè yo pandan y ap aprann plis sou alyans tanp yo anvan yo pataje benediksyon alyans sa yo avèk mond lan.

Men, nan etidye seksyon 109 la, m te aprann ke, nan tanp la, Bondye bay nouvo misyonè yo pouvwa—anfèt, nou tout—nan fason adisyonèl ki sakre. Nan priyè konsekrasyon an, ke l te resevwa pa revelasyon, Joseph te priye pou “lè sèvitè w yo pral sòti nan kay ou a … pou rann temwayaj non ou,” “kè“ ”tout moun” ap “adousi”—ni “gwo moun ki sou latè a” ak “tout pòv, ki nan nesesite, ak [moun] ki aflije” Li te priye pou “prejije ka fè bak devan laverite, epi pèp ou a ka jwenn favè devan tout moun; pou tout kwen latè a ka konnen ke nou, sèvitè ou yo, te tande vwa ou, epi ou te voye nou.”

Se yon bèl pwomès pou yon misyonè ki fèk aple—pou prejije “fè plas pou laverite,” pou yo “ jwenn favè devan je tout moun,” epi pou fè mond la konnen se Senyè a ki voye yo. Asireman, nou chak bezwen menm benediksyon sa yo. Ala yon benediksyon sa t ap ye pou kè nou ta adousi pandan n ap fè entèraksyon avèk vwazen nou ak kòlèg travay nou yo. Priyè konsekrasyon an pa eksplike egzakteman kouman tan nou nan tanp lan pral adousi kè lòt moun, men, m konvenki ke sa lye avèk fason tan nou nan kay Senyè a adousi kè pa nou nan santre nou sou Jezikri ak mezèrikòd Li.

Pandan m t ap etidye priyè konsekrasyon tanp la, sa te frape m tou ke Joseph te enplore plizè fwa pou mizèrikòd—pou manm Legliz yo, pou enmi Legliz yo, pou dirijan peyi yo, pou nasyon yo sou latè a. Epi, trè pèsonèlman, li te siplye Senyè a pou sonje li epi pou gen mizèrikòd pou Emma byeneme l la ak pitit li yo.

Kouman Joseph dwe te santi l lè, yon semèn apre, nan maten Pak 3 Avril 1836 la, nan tanp Kirtland nan, Sovè a te parèt devan li ak Oliver Cowdery epi, jan sa ekri nan seksyon 110 Doktrin ak Alyans la, pou di, “M aksepte kay sa a epi non mwen pral la a; epi m pral manifeste tèt mwen bay pèp mwen an avèk mizèrikòd nan kay sa a.” Pwomès mizèrikòd sa a te gen siyifikasyon spesyal pou Joseph. Epi, jan Prezidan Nelson te anseye an Avril pase a, pwomès sa a “aplike tou a chak tanp ki konsakre jodia.”

Gen tèlman anpil fason nou chak ka jwenn mizèrikòd nan kay Senyè a. Sa te toujou vrè depi premye fwa Senyè a te kòmande Izrayèl pou l te bati tabènak la epi plase “chèz mizèrikòd la” nan mitan li. Nan tanp la, nou jwenn mizèrikòd nan alyans nou fè yo. Alyans sa yo, ajoute sou alyans batèm nan, lye nou avèk Papa a ak Pitit Gason an epi ogmante aksè nou nan sa Prezidan Nelson te anseye ki se “yon kalite amou ak mizèrikòd spesyal … ki rele hesed” an Ebre.

Nou jwenn mizèrikòd nan opòtinite pou nou sele avèk fanmi nou yo pou letènite. Epi tou, nou vin konprann avèk pi gran klète ke Kreyasyon an, Chit la, sakrifis ekspyatwa Sovè a, ak kapasite nou pou nou antre nan prezans Papa nou ki nan syèl la—anfèt, chak pati nan plan sali a—se yon demonstrasyon mizèrikòd. Moun ka di ke plan sali a se yon plan bonè presizeman paske li se yon “plan mizèrikòd.”

Mwen rekonesan pou bèI pwomès nan seksyon 110 la ki di ke Senyè a pral manifeste Tèt Li avèk mizèrikòd nan tanp Li a. Mwen rekonesan tou pou sa ki revele sou fason Senyè a ap manifeste Tèt Li avèk mizèrikòd nenpòt lè, tankou Joseph, nou plede pou mizèrikòd.

Lè Joseph Smith te plede pou mizèrikòd nan seksyon 109 la, se pa t premye fwa pledwaye li pou mizèrikòd la te mennen revelasyon. Nan Boskè Sakre a, jèn Joseph te priye pa jis pou l te konnen ki Legliz ki te vrè, men, li te di tou ke li “te kriye devan Senyè a pou mizèrikòd, paske pa t gen okenn lòt moun m te ka al jwenn pou m jwenn mizèrikòd.” Nan yon sètèn fason, rekonèt ke li te bezwen mizèrikòd ke sèlman Senyè a te ka ofri a te ede ouvri fenèt syèl yo. Twazan apre, anj Moroni te parèt devan Joseph, apre sa Joseph te di ki sete “priyè ak siplikasyon devan Bondye Toupuisan an pou padon pou tout peche ak foli mwen yo.”

Modèl revelasyon sa a apre yon pledwaye pou mizèrikòd la se yonn ki familye nan ekriti yo. Enòs te tande vwa Senyè a sèlman apre l te fin priye pou padon. Konvèsyon papa Wa Lamoni an kòmanse avèk priyè li a: “M ap kite tout peche m yo pou m kapab konnen ou.” Nou ka pa beni avèk menm eksperyans ekstraòdinè sa yo, men, pou moun ki gen difikilte kèkfwa pou yo santi repons pou priyè yo, chèche mizèrikòd Senyè a se youn nan fason ki pi puisan pou nou santi temwayaj Sentespri a.

Yo anseye yon prensip similè mayifikman nan Mowoni 10:3–5. Souvan nou rakousi vèsè sa yo pou anseye ke, atravè priyè sensè, nou ka aprann si Liv Mòmon an vrè. Men, rakousi sa a ka neglije wòl enpòtan mizèrikòd jwe a. Koute kouman Moroni kòmanse egzòtasyon l la: “M vle egzòte nou pou lè nou li bagay sa yo, … pou nou kapab sonje kouman Seyè a te gen mizèrikòd pou pitit lèzòm, depi nan kreyasyon Adan jouk nan lè n ap resevwa bagay sa yo, e pou medite l nan kè nou.”

Mowoni ankouraje nou non sèlman pou nou li bagay sa yo—rejis li ta pral sele yo—men tou pou nou medite nan kè nou sa Liv Mòmon an revele konsènan “kouman Seyè a te gen mizèrikòd pou pitit lèzòm.” Se medite sou mizèrikòd Senyè a ki prepare nou pou nou “mande Bondye, Papa Etènèl la, nan non Kris la, si bagay sa yo pa vrè.”

Pandan n ap medite sou Liv Mòmon an, nou ta ka mande: èske se vre toutbon, jan Alma te anseye a, plan mizèrikòd Bondye a asire ke chak moun ki te janm viv sou latè a pral resisite epi yo pral “restore … pafètman nan kò a”? Èske Amilèk gen rezon—èske mizèrikòd Sovè a ka satisfè tout egzijans anmè lajistis ki reyèl ke nou t ap oblije peye, men poutan Li “[ansèkle nou] nan bra sekirite”?

Èske se vre, jan Alma te temwaye a, ke Kris la the soufri non sèlman pou peche nou men tou pou “doulè ak afliksyon” nou yo pou L te ka konnen … kouman pou L sekouri pèp Li a nan enfimite yo”? Èske Senyè si tèlma gen mizèrikòd, jan Wa Benjamen te anseye a, ke kòm yon kado gratis, Li ekspye “peche moun … ki te mouri san yo pa konnen volonte Bondye konsènan yo, oubyen ki peche nan iyorans”?

Èske se vre, jan Leyi te di a, “Adan te tonbe pou lèzòm te kapab fèt; e lèzòm te fèt pou yo kapab gen lajwa”? Epi èske se vre ke, jan Abinadi te temwaye a, lè l te site nan Ezayi a, Jezikri te “blese pou transgresyon nou yo, li te blese pou inikite nou yo; chatiman ki ban nou lapè a te sou li; epi anba kou li yo, nou geri”?

An rezime, èske plan Papa a, jan sa anseye nan Liv Mòmon an reyèlman mizèrikòdye konsa? Mwen temwaye ke se vre epi ansèyman sou mizèrikòd ki pote lapè ak esperans nan Liv Mòmon an se verite.

Men, m imajine ke kèk moun ka gen difikilte, malgre lekti ak priyè fidèl nou, pou n reyalize pwomès Moroni an ke Pè Selès la “ap montre nou laverite sa a, atravè pouvwa Sentespri a.” Mwen konnen difikilte sa a paske m te santi l, sa gen akèk ane, lè m premye lekti m te fè sou Liv Mòmon an de premye fwa yo pa t pote yon repons imedyat ak klè pou priyè m yo.

Si w ap lite, èske m ka envite w suiv konsèy Mowoni an pou w medite sou pil fason Liv Mòmon an anseye “kòman Senyè a te gen mizèrikòd [pou] pitit lèzòm”? Baze sou eksperyans mwen, m espere ke lè w fè sa, lapè Sentespri a ka antre nan kè w epi ou ka konnen, kwè, epi santi ke Liv Mòmon an ak plan mizèrikòd li anseye a se verite.

Mwen eksprime gratitid mwen pou gran plan mizèrikòd Papa a ak pou volonte Sovè a pou L te akonpli l la. Mwen konnen ke L ap manifeste tèt Li avèk mizèrikòd nan tanp sakre L la ak nan tout pati nan lavi nou si nou chèche Li. Nan non Jezikri, amèn.