Gwo Kado Letènite yo: Ekspyasyon, Rezirèksyon, Retablisman Jezikri a

Sa gen kèk ane, klas levanjil nan maten nou an te memorize kèk vèsè nan Bib la. Natirèlman, se vèsè kout yo ki te atire mwen. Sa te enkli Jan 11:35—vèsè ki pi kout nan ekriti yo, de mo sèlman—“Jezi kriye.”

Pou mwenmenm, lefèt ke Jezi kriye nan tristès ak lajwa temwaye de reyalite mirakile sa a: Pitit Gason diven Bondye a te vini nan mòtalite fizik epi te aprann selon lachè kòman pou l toujou avèk nou ak beni nou.

Lè nou fè apèl a Li nan chagren oubyen lajwa, Jezikri konprann pafètman. Li ka prezan nan moman kote nou pi bezwen gwo kado letènite yo: Ekspyasyon, Rezirèksyon, retablisman Jezikri a.

Mari ak Mat kriye pou Laza, frè yo, ki mouri. Touche pa konpasyon, Jezi kriye. Li leve Laza fè l tounen vivan.

Jezi gade Jerizalèm nan lavèy Fèt Delivrans la. Li kriye, enkapab pou L rasanble pèp Li a tankou manman poul k ap sanble pitit li anba zèl li. Jodia, Ekspyasyon Li a ba nou lespwa lè nou tris akoz de sa ki ta ka rive.

Mèt Jaden an kriye pandan L ap mande sèvitè L yo, sa ki ka enkli noumenm kòm frè ak sè sèvis pastoral, “Kisa m ta kapab fè plis pou jaden m nan?”

Mari kanpe dekouraje bò tonm nan. Jezi mande l jantiman, “Poukisa w ap kriye konsa?” Li konnen “kriye ka dire pou yon nuit, men lajwa vini nan maten.” Rezirèksyon an pote douvanjou pou tout moun.

Nan peyi Liv Mòmon an, lè foul moun fidèl yo te monte al jwenn Li a, lajwa Jezi te total. Li te kriye.

“Epi li te pran timoun piti yo, youn apre lòt, li te beni yo, e li te priye Papa a pou yo.

“Epi lè l te fin fè sa, li te kriye avèk dlo nan je ankò.”

Sa se Pak nan Jezikri: Li reponn aspirasyon kè nou yo ak kesyon nanm nou yo. Li siye dlo nan je nou, eksepte dlo lajwa nou yo.

Lè dlo koule nan je nou, nou pafwa mande eskiz, nou jennen. Men, konnen ke Jezikri konprann ke lapenn ak lajwa lavi yo ka ba nou fòs ki depase pa nou lè n ap navige nan sa ki anmè ak plezan.

An Amerik Disid, yon papa kriye. Yon sous lajwa nan lavi li, pi jèn pitit fi l la, mouri. “Mwen ta bay tout bagay pou m ta wè l ankò,” li kriye nan bra mwen. Mwen kriye tou.

Nan konsekrasyon Tanp Puebla a nan Meksik, dlo lajwa te koule sou figi yon sè byenneme. Vizaj li demontre lafwa ak sakrifis. Li di, “Todos mis hijos estan aqui en el templo hoy”—“Tout pitit mwen yo isit la nan tanp lan jodia.” Jenerasyon yo ki te rasanble nan kay Senyè a pote dlo lajwa ak rekonesans.

Nan yon gè sivil kriyèl, fanmi ak vwazen te fè bagay enpansab youn kont lòt. Dlo amètim gradyèlman ap fè plas pou lespwa. Ak vwa li k ap tranble, yon fi nan yon ti vilaj di, “Vwazen, anvan m ale nan tonm mwen, mwen vle pou w konnen ki kote w ap jwenn manm fanmi w ki te disparèt yo.”

Yon bèl lamarye ak lemarye ap sele nan kay Senyè a. Fi a gen 70 an, gason an tou. Yon bèl lamarye, li te rete diy ap tann jou sa a. Li timidman souke wòb lamarye l la nan yon bò, apresa lòtbò a. Nou te kriye ak lajwa. Pwomès Bondye yo akonpli. Alyans Li yo pote benediksyon.

Pandan li t ap fè ansèyman nan fwaye yon sè ki te vèv, Boyd K. Packer, lè l te jèn, te aprann yon bèl leson. Apre yon dezakò avèk mari li, sè a te fè yon dènye remak douloure. Yon aksidan sanzatann te pran lavi mari li jou sa a. “Pandan senkant an,” vèv la di ak dlo nan je, “Mwen te viv nan lanfè paske dènye pawòl li te tande soti nan bouch mwen sete remak pikan ak mechan sa a.”

Pak nan Jezikri ede nou rekoud, rekonsilye, ak repare relasyon nou yo, sou toulède bò vwal la. Jezi ka geri chagren; Li ka rann padon posib. Li ka libere noumenm ak lòt yo anba sa nou di oubyen sa nou fè ki otreman kenbe nou prizonye.

Pak nan Jezikri fè nou santi apwobasyon Bondye. Mond sa a di nou ke nou twò wo, twò kout, twò laj, twò mens—pa entelijan, ni bèl, ni spirityèl ase. Atravè transfòmasyon spirityèl nan Jezikri, nou ka evite pèfeksyonis debilitan sa a.

Avèk lajwa Pak la, nou chante, “Death is conquered; man is free [Li konkeri lanmò; lòm libere] [Unoffical translation]. Kris pote viktwa.” Rezirèksyon Kris la libere nou anba lanmò, anba enfimite ak enpèfeksyon fizik lavi yo. Ekspyasyon Jezikri a restore nou spirityèlman. Li te senyen nan chak twou nan kò Li, ki t ap koule tankou gout san, pou pèmèt nou chape anba peche ak separasyon. Li reyini nou, antye ak sanktifye, youn ak lòt epi avèk Bondye. Nan tout bon bagay, Jezikri restore avèk abondans—non sèlman sa k te pase, men sa ki ka rive tou.

Lavi ak limyè Jezi temwaye de lanmou Bondye pou tout pitit Li yo. Paske Bondye Papa nou renmen tout pitit Li yo nan tout epòk ak tout peyi, nou jwenn envitasyon eman Li pou nou vin twouve lapè ak lajwa nan Li nan anpil tradisyon ak kilti. Kèlkeswa kote nou ye, kèlkeswa lè a, kèlkeswa kiyès nou ye, nou pataje yon idantite divin kòm pitit menm Kreyatè a. Nan menm espri a, disip Islam, Jidayis, ak Krisyanis yo pataje yon eritaj relijye nan Pè Abraram ak yon koneksyon alyans atravè evenman yo nan Ejip ansyen.

Pè Abraram te vini an Ejip epi l te beni.

Jozèf, ke yo te vann kòm esklav an Ejip la, te konnen rèv Farawon an te vledi sèt ane abondans ki t ap suiv pa sèt ane famin. Jozèf te sove fanmi li ak pèp li a. Jozèf te kriye lè l te wè gran plan Bondye a, kote tout bagay ap travay ansanm pou byen moun ki kenbe alyans yo.

Moyiz, ki te elve an Ejip nan kay Farawon an, te resevwa epi nan apre retabli kle pou rasanbleman pitit Bondye yo.

Pou akonpli pwofesi, Jozèf, Mari, ak Kris tibebe a te chèche refij nan peyi Ejip. Nan Caire, yon kwayan Mizilman devwe di avèk reverans: “Koran an anseye ke Jozèf, Mari ak tibebe Jezi te jwenn sekirite ak refij nan peyi mwen. Nan peyi m, Jezi, lè L te tou piti, Li te manje menm manje avèk nou, te fè premye pa Li, te di premye mo Li. Isit la nan peyi m, nou kwè ke pyebwa yo te bese ba pou yo te bay Limenm ak fanmi L fwi. Prezans Li nan peyi m te beni pèp nou ak peyi nou an.”

Plan Bondye sou libabit moral ak mòtèl la pèmèt nou aprann pa pwòp eksperyans pa nou. Kèk nan pi gwo leson lavi yo soti nan bagay ke nou pa t ap janm chwazi. Nan lanmou, Jezikri te desann pi ba pase tout bagay epi monte anlè tout bagay. Li rejwi nan kapasite divin nou pou kreyativite ak plezi, jantiyès san espere rekonpans, lafwa pou repantans ak padon. Epi Li kriye ak tristès devan imansite soufrans, kriyote, ak enjistis imèn yo—ki souvan se akoz chwa lòm—jan syèl la ak Bondye nan syèl la kriye avèk yo tou.

Chak sezon prentan Pak temwaye ke sekans ak konvèjans spirityèl fè pati modèl diven ekspyasyon, rezirèksyon, ak restorasyon atravè Jezikri a. Konvèjans sakre ak senbolik sa a vini non pa aksidan ni koyensidans. Dimanch Ramo, Semèn Sent, ak Pak selebre Ekspyasyon ak Rezirèksyon Kris la. Tankou jodia, chak 6 Avril, nou komemore etablisman ak òganizasyon Legliz Jezikri pou Sen Dènye Jou yo. Retablisman sa a se rezon k fè nou rasanble chak premye Dimanch Avril nan konferans jeneral.

Retablisman an te vini tou lè Jezikri resisite a, Moyiz, Elyas, ak Eli te retounen kle ak otorite prètriz yo nan Tanp Kirtland ki te fèk konsakre a nan Jou Dimanch Pak, an 1836 la. Nan kote sa a nan jou sa a, Legliz retabli Jezikri a te resevwa otorite ak benediksyon Bondye pou rasanble pitit Li yo, pou prepare pitit Li yo pou tounen al jwenn Li, epi ini fanmi yo pou letènite. Retablisman jou sa a te akonpli pwofesi paske li te rive alafwa nan Pak ak Fèt Delivrans la.

Enkli Tanp Kirtland nan, mwen te resaman vizite plizyè plas sakre nan Ohio kote Pwofèt Joseph ak lòt moun te wè nan yon vizyon, Bondye Papa a ak Pitit Gason L lan, Jezikri. Pwofèt la te wè sa syèl la sanble. Nan syèl la, Pè Selès la, atravè Jezikri, “sove tout zèv men li yo” nan yon wayòm laglwa. Sèl eksepsyon yo se moun ki volontèman “nye Pitit Gason an apre Papa a te fin revele l.”

Lè ministè Li nan mòtalite a te kòmanse, Jezi te deklare misyon Li pou beni nou chak avèk tout sa nou dispoze pou n resevwa—nan tout epòk, tout peyi, tout sikonstans. Apre l te fin jene pandan 40 jou, Jezi te ale nan sinagòg la epi Li te li: “Lespri Bondye a sou mwen, paske li chwazi m pou m anonse bòn nouvèl la bay pòv yo; pou m geri tout kè ki brize, pou fè tout prizonye yo konnen yo lage, pou m fè tout avèg yo konnen yo kapab wè ankò, pou m delivre moun y ap maltrete yo.”

Pòv, kè brize, kaptif, avèg, maltrete—sa se nou chak.

Liv Ezayi a kontinye pwomès Mesyanik lespwa, delivrans, asirans lan: “Pou bay moun mòn Siyon ki nan lafliksyon yo, … kè kontan nan plas lapenn yo, kontantman nan plas kè sere yo a. M ap mete nan bouch yo chante remèsiman nan plas chante plenyen.”

Konsa, nou kriye, “Se pa ti kontan kè m kontan pou sa Senyè a fè. M ap fè fèt pou Bondye mwen an; paske Li kouvri m ak pouvwa li pou l sove m, Li vlope m nan bra li pou l delivre m.”

Chak sezon Pak, nou selebre, kòm yon senbòl konplè, gwo kado letènite nou resevwa atravè Jezikri yo: Ekspyasyon L lan; Rezirèksyon Literal Li (ak pwomès pou nou); Retablisman Legliz dènye jou L la avèk kle ak otorite prètriz pou beni tout pitit Bondye yo. Nou rejwi nan gaman sali yo ak wòb lajistis la. Nou rele, “Ozana pou Bondye ak Ti Mouton an!”

“Paske Bondye sitèlman renmen lèzòm, li te bay sèl Pitit Gason Literal Li a pou yo. Tout moun ki va mete konfyans yo nan Li pap pèdi lavi yo. Okontrè y a gen lavi ki p ap janm fini an.”

Se pou nou chak jwenn nan ekspyasyon, rezirèksyon, ak retablisman Jezikri a—lapè, ak apatenans—konvnans ak yon santiman apatenans—sa ki rete reyèl ak jwaye, ki pote kontanman e pou tout tan, mwen priye, nan non sakre Li Jezikri, amèn.