Lafwa: Yon Lyen Konfyans ak Lwayote
Lafwa boujonnen lè nou konfye nan Jezikri epi l fleri lè nou fidèl ak lwayal anvè Li.
Lè m te gen disètan, m te dakò avèk zanmi m nan, José Luis, pou m te aprann li naje. Konsa, yon maten nou te konsakre tan pou n te pratike. Lè leson nou an te fini epi m t ap kite pisin nan, mwen te tande zanmi m nan ki t ap rele mande èd. Li t ap nwaye nan kwen fon pisin nan.
Mwen te lage kò m nan dlo a epi m te naje nan direksyon li pandan m t ap priye pou èd. Pandan m te pran men l pou m te rale l monte anlè, zanmi dezespere m nan te grenpe sou do m epi l te ban m yon kle kou. Kounyea, nou toulède t ap nwaye. Pandan m t ap eseye tout sa m te kapab pou m te remonte sou sifas dlo a, mwen te priye avèk tout pouvwa m pou yon mirak Bondye. Apresa, dousman, men gradyèlman, pouvwa Bondye te manifeste pandan m te santi yon men ki te pouse m voye nan pati ki pi plat nan pisin nan, sa ki te mennen nou an sekirite.
Eksperyans sa a te konfime yon leson pwofon Prezidan Russell M. Nelson te anseye yon fwa: “Lè w chèche jwenn pouvwa Senyè a nan lavi ou avèk menm entansite yon moun k ap nwaye genyen nan eseye respire, w ap jwenn pouvwa Jezikri.”
Chè timoun ak jèn moun yo, jodia m vle pale avèk nou konsènan prensip esansyèl lafwa nan Jezikri a.
Lafwa nan Kris la Siyifi Fè l Konfyans
Kisa sa vledi pou w gen lafwa nan Kris? Èske sa vledi nou kwè nan Li oubyen nou gen temwayaj ke Li reyèl? Sa ka yon kòmansman, men se plis pase sa. Èske ou konn janm panse sou lafwa kòm konfyans? Panse a moun ou pi fè konfyans lan—petèt yon manm fanmi oubyen yon zanmi. Poukisa ou fè yo konfyans? Se pwobableman paske ou wè amou ak èd konstan yo.
Lè nou gen lafwa nan Kris la, nou rekonèt benediksyon L yo epi nou devlope yon relasyon konfyans avèk Li.
Kijan Ou Ka Ogmante Konfyans Ou nan Kris?
Nan yon devosyon resan pou jèn yo, yo te envite w pou w te medite sou yon lè nan lavi ou kote ou te resevwa yon reyon limyè selès. Eseye egzèsis sa a!
Pou kòmanse, medite sou Kris la ak sou bonè Sakrifis Ekspyatwa ak levanjil Li a pote nan lavi ou. Epitou, fè yon rejis sou “souvni ki espirityèlman enpòtan” kote Bondye toujou la pou ou, pou moun ou renmen yo, ak pou moun ki nan ekriti yo. Kounyea, temwayaj sa yo p ap pote pouvwa nan lavi w jiskaske Lespri a grave yo sou “tab lachè” ki nan kè w la. Donk medite epi anrejistre tout bagay Bondye mete an mouvman pou mirak sa yo ka vini nan lè ki apwopriye a.
Apresa, itilize egzèsis sa a kòm yon opòtinite pou w rapwoche w de Bondye. Priye Papa ou ki nan syèl la kòmsi sete pou lapremyè fwa. Eksprime amou ou ak gratitid ou pou benediksyon Li yo. Menm mande L kouman L santi L konsènan ou ak direksyon lavi w ap pran an.
Si w sensè ak enb, w ap tande repons Li epi w ap kòmanse yon relasyon pèsonèl ki dirab avèk Pè Selès la ak Jezikri. Non sèlman sa, men, abitid relijye w yo ap vin siyifikatif. Pa egzanp, ou pral konsidere priyè w yo, etid pèsonèl, ak adorasyon w nan tanp la kòm opòtinite pou vin konnen Yo epi pou ou avèk Yo.
Lafwa Fleri avèk Lwayote
Remake ke lafwa boujonnen lè nou konfye nan Jezikri epi l fleri lè nou fidèl ak lwayal anvè Li. Si w vle yon vrè relasyon avèk Kris la, montre L sa nan fè alyans epi onore yo avèk fidelite ak lwayote. Fè alyans avèk Jezikri bati esperans. Onore yo bati lafwa.
Kite m itilize yon egzanp pèsonèl: Pandan m te yon timoun, m te jwenn manman m ki t ap kriye poukont li yon jou. Lè m te mande l poukisa, li te di avèk jantiyès, “M vle pou w vin yon bon tigason.” Byenke m te konnen ke se pa t mwenmenm ki te lakoz detrès li a, mwen te renmen manman m epi m te fè l konfyans plis pase tout lòt moun epi m te vle rann lavi l mwens difisil. Konsa, avèk dlo nan je m epi avèk solanite ke yon timoun nevan te ka genyen, m te pwomèt li jou sa a ke m t ap toujou fè efò pou m pi bon tigason epi rann li fyè.
Èske w ka imajine pouvwa pwomès sa a te genyen—epi l toujou genyen—sou mwen?
Pwomès sa m te fè l la te gide lavi m. Anvan m te pran nenpòt desizyon, m te toujou konsidere si aksyon m yo t ap fè l plezi. Lyen pwomès sa a ak relasyon m avèk manman m nan sete ankraj pou konduit mwen atravè lavi m.
Dèzane apre, lè m te vin konnen Jezikri pi byen, m te deja konnen kouman pou m baze lafwa m nan Li. M te fè alyans avèk Senyè a, epi pandan m ap chèche onore yo, Li padone peche m yo, gide lavi m, epi “ranpli m avèk amou Li” jis nan fon kò mwen. Kris la distile nan mwen yon amou, respè ak lwayote pwofon pou Li.
Èske w konprann poukisa “lafwa se yon prensip aksyon, epi “san lafwa, li enposib pou fè [Bondye] plezi”?
Lè w eseye fè sa ki fè L plezi, ou pral di tankou Josèf an Ejip lè madanm Potifa te tante l la: “Kouman m ta ka fè gwo mechanste sa a, pou m peche kont Bondye?” Epi lè w ap fè fas a opozisyon, ou pral di, tankou jèn pwofèt la, Joseph: “M te konn sa, epi m te konnen Bondye te konnen sa epi m pat ka nye li … M te konnen si m te fè sa, m t ap ofanse Bondye.”
Konsa, lafwa nan Jezikri se yon lyen konfyans ki fòje nan lwayote ak lanmou. Otreman di, nan gratitid pou amou mizèrikòdye Bondye ki (hesed), nou montre amou lwayal nou (emunah) nan kenbe kòmandman Li yo.
Kris la pwomèt: “Yon moun ki gen kòmandman m yo, epi ki kenbe yo … Papa m ap renmen l, epi m ap renmen l, epi m pral manifeste tèt mwen ba li.” Si w angaje pou w lwayal anvè Li, L ap manifeste amou L pou ou.
Lafwa Devan Advèsite
Men, kouman pou w ta reponn a sityasyon defavorab ki mande mirak Li yo? Pandan ke difikilte se bagay ki inevitab epi kèkfwa efreyan, senpleman mache avèk kouraj al jwenn Li, tankou tèm FSY 2025 la envite nou an: “Gade sou mwen nan chak panse; pa doute, pa pè.”
Kouman Ou Ka Mache al Jwenn Li Ak Kouraj?
Imajine w se yon eksploratè nan yon teritwa enkoni. Pou w simonte obstak ki devan w yo, ou bezwen yon sous limyè. Fidelite w nan Bondye ak entèraksyon konstan ou avèk Li se gaz pou lanp ou an. Konsa, lè w rankontre sityasyon sonb ak danjere, tan pou w ta mache sou yo avèk bando sou je w, w ap limen lanp ou a ki chaje avèk gaz lafwa nan Kris la pou w mete ti limyè lafwa sou santye ki pa sèten an. Eksperyans pase w yo pral ogmante esperans ou ke Senyè a ap soutni w nan vwayaj ou a.
Ki Distans Ou Ka Ale avèk Esperans ak Lafwa ou nan Kris la?
Èske w sonje istwa pisin mwen an? Nan moman dezespwa sa a, mirak la te vini nan fason mwen te atann nan, men, Bondye pa garanti ke sa ap toujou fèt daprè volonte nou. Lafwa nou dwe santre sou Kris la epi esperans nou nan benediksyon L yo, jan L chwazi pou L voye yo. “Atann nou a mirak,” men, “kite Bondye gen priyorite nan lavi nou.”
Pwomès Bondye Fè Moun Ki Fidèl Li Yo
Jèn zanmi m yo, nou renmen nou epi nou fè nou konfyans! Nou fè pati fanmi Bondye a epi nou se pitit alyans lan. Kwè epi mete konfyans nan Jezikri. L ap reyèlman ede w vin tounen disip Li.
Mwen envite w jodia, pou w nouri relasyon ou avèk Jezikri. Pran angajman pou w pa janm abandone Li.
Lwayote ou, amou w, ak konfyans ou nan Kris la pral fòme karaktè w ak idantite ou tankou pa Li. W ap vin gen konfyans ak fòs pou w simonte atak Satan yo. Epi, lè w fè erè, ou pral aspire a padon Li. Finalman, esperans ou nan lefiti pral klè. Li pral konfye w pouvwa Li pou w akonpli nenpòt bagay Li atann nan men ou, menm pouvwa pou w retounen nan prezans Li.
Mwen temwaye ou konsènan lajwa ki soti nan chante “kantik amou redanmtè a” epi nan “ansèkle etènèlman nan bra lanmou Li.” Nan non sakre Jezikri, amèn.