Pag-aaral ng Lumang Tipan

Ang Espiritu Santo ay isang guro at tagapaghayag. Sa pamamagitan ng Espiritu, maliliwanagan ng Diyos ang ating pang-unawa at matutulungan Niya tayong malaman ang katotohanan. Mapanalanging hangaring makasama ang Espiritu Santo habang nag-aaral ka. Sa paggawa mo nito, lalawak ang iyong pag-unawa tungkol sa Lumang Tipan.

Ang Lumang Tipan ay nagpapatotoo tungkol kay Jesucristo. Naglalaman ito ng mga propesiya ng Kanyang mortal na ministeryo, nagbabayad-salang sakripisyo, at Ikalawang Pagparito. Sa pamamagitan ng mga kilos at salita ni Jehova sa Lumang Tipan, matututuhan natin ang tungkol sa Kanyang pagkatao, mga katangian, at mga turo. Makakahanap din tayo ng mga simbolong nagpapatotoo tungkol sa Kanya. Marami sa mga simbolong ito ang madaling maunawaan, at ang iba naman ay hindi gaanong madaling maunawaan. Habang pinag-aaralan mo ang Lumang Tipan, bigyang-pansin ang iyong natututuhan tungkol kay Jesucristo. Mas mapapalapit ka sa Kanya kapag natututo ka tungkol sa Kanyang pagmamahal, awa, at kapangyarihan sa buhay ng mga sinaunang tao.

Sa ating dispensasyon, pinagpala tayo ng Panginoon ng maraming banal na kasulatan na sumusuporta at nagbibigay-linaw sa mga turo sa Lumang Tipan. Halimbawa, ang Aklat ni Mormon ay naglalaman ng maraming pagbanggit at sipi mula sa Lumang Tipan. Ang inspiradong pagsasalin ng Biblia ni Propetang Joseph Smith ay nagbibigay sa atin ng mga nakatutulong na paglilinaw ng maraming passage sa Lumang Tipan. Ang mga aklat nina Moses at Abraham sa Mahalagang Perlas ay may kasamang mga detalye at mga pananaw mula sa doktrina na hindi nakatala sa Genesis. At ang ilan sa mga paghahayag ni Joseph Smith na nakatala sa Doktrina at mga Tipan ay nagpapaliwanag din o naglilinaw sa mga passage ng Lumang Tipan.

Ang paggamit ng mga banal na kasulatan ng Pagpapanumbalik ay makatutulong sa iyo na mas maunawaan ang Lumang Tipan at ang kahalagahan ng mensahe nito.

Ang mga Latter-day Saint edition ng Biblia ay naglalaman ng mga makatutulong na tool sa pag-unawa sa Lumang Tipan. Kabilang dito ang mga heading ng kabanata, footnote, Gabay sa mga Banal na Kasulatan, at mga mapa. Kasama rin sa Gospel Library app ang feature na “Kahulugan” para sa tulong sa pag-unawa sa kahulugan ng mga salita.

• Pagsasalin ni Joseph Smith (PJS). Mga sipi mula sa Pagsasalin ni Joseph Smith ng Biblia. Marami sa mas maiikling rebisyon ng Propeta ang kasama sa mga footnote, habang ang mas mahahabang sipi ay nasa Pagsasalin ni Joseph Smith ng Biblia (matatagpuan sa Mga Tulong sa Pag-aaral sa koleksyon ng mga Banal na Kasulatan ng Gospel Library).

Hindi nilalayon ng mga manunulat ng Lumang Tipan na magbigay ng isang komprehensibong makasaysayang salaysay sa kanilang mga isinulat. Ang kanilang layunin ay magturo tungkol sa Diyos at kung paano Siya nakikipag-ugnayan sa Kanyang mga tao. Itinuro ni Elder D. Todd Christofferson na “Ang pangunahing layunin ng lahat ng banal na kasulatan ay puspusin ang ating mga kaluluwa ng pananampalataya sa Diyos Ama at sa Kanyang Anak na si Jesucristo—pananampalataya na Sila ay buhay; pananampalataya sa plano ng Ama para sa ating kawalang-kamatayan at buhay na walang hanggan; pananampalataya sa Pagbabayad-sala at Pagkabuhay na Mag-uli ni Jesucristo, na nagsakatuparan sa planong ito ng kaligayahan; pananampalatayang maipamuhay ang ebanghelyo ni Jesucristo; at pananampalatayang makilala ‘ang iisang Dios na tunay, at siyang [Kanyang] sinugo, sa makatuwid baga’y si Jesucristo’ (Juan 17:3).”

Dahil nabubuhay tayo sa mundong ibang-iba sa mundo ng mga taong sumulat ng Lumang Tipan, maaari tayong magkamali sa paggamit ng sarili nating mga makabagong pananaw at pamantayan sa kultura sa ating binabasa. Ito ay maaaring humantong sa hindi pagkakaunawaan. Sikaping maunawaan ang iyong binabasa mula sa pananaw ng mga inspiradong may-akda sa kanilang orihinal na konteksto.