Kenese 3–4; Mose 4–5

Mafaufau e faaali atu fesili nei ma valaaulia tagata aoga e talanoaina faatasi ma se paga. Afai e manaomia e tagata aoga se fesoasoani, e mafai ona latou suesueina Autu ma Fesili, “Faitalia ma le Tali Atu mo A’u Lava” (Gospel Library) ae latou te lei amataina la latou talanoaga.

• O le a le faitalia?

• Aisea e taua ai le faitalia?

Faamalamalama atu o le Mose 4 o loo faamatala ai le Fono i le muai olaga i le Lagi, lea na filifilia ai e le Tama Faalelagi ia Iesu Keriso e avea ma o tatou Faaola. O le faitalia o se tasi lea o mataupu autu sa tulai mai i lenei fono i le muai olaga. Valaaulia tagata aoga a o latou suesue i le asō e vaai po o le a se mea e mafai ona latou aoaoina e uiga i le taua o lo latou faitalia ma le auala e mafai ona latou puipuia ai.

Mafaufau e faaali atu le gaoioiga e aoao ai lenei ma valaaulia tagata aoga e faamae’a ma se paga pe ma ni vaega toaitiiti.

Suesue le Mose 4:1–4, ona talanoaina lea o fesili nei:

• O a nisi o eseesega na e matauina i le va o afioga a le Tama Faalelagi ma Iesu Keriso ma upu a Satani?

• Na faapefea ona e vaaia le faamamaluina po o le lē amanaiaina o le faitalia i nei fuaiupu?

Valaaulia tagata aoga eseese e faasoa mai i le vasega ni malamalama’aga na latou maua mai a latou suesuega ma talanoaga. A o latou faasoa mai, e mafai ona latou faailoa mai upumoni faapenei: O Iesu Keriso e faia ma le lotomaualalo le finagalo o lo tatou Tama oi le Lagi. E saili Satani e faaumatia lo tatou faitalia ma taitai atu i tatou i le faatagataotauaina.

• E faapefea ona saili Satani e faaumatia lo tatou faitalia i aso nei? I le avea ai o se vaega o la outou talanoaga, mafaufau e faasoa atu le saunoaga lenei a Elder Paul V. Johnson:

Ua faaseseina nei e Satani ma faatauasoina tagata, ma ua ia taitai faatagataotauaina i latou i lona loto. Afai o loo ia taitaia tagata faatagataotaua, pe le foliga mai ea o loo ia faaumatiaina le faitalia?

O le mea moni, e le mafai ona ia faaumatia le faitalia i le muai olaga, ma e le mafai foi ona ia faia i le taimi nei. Ae na te taitai faatagataotauaina i tatou e ala i le faatosinaina o i tatou e agasala. Pe a tatou agasala, ua tatou gaua’i atu iā te ia. O le mea moni, tatou te tuuina atu se vaega o lo tatou faitalia ia te ia. E le mafai ona Ia aveesea mai ia i tatou, ae e mafai ona tatou lafoaia. (“Saoloto e Filifili,” Liahona, Fep. 2019, 64)

Faamalamalama atu e ese mai ia Satani, o lē o loo saili e faaumatia lo tatou faitalia, e saili Iesu Keriso e faasaoina ma puipuia.

• Na faapefea e gaoioiga a le Tama Faalelagi ma Iesu Keriso i le Aufono i le Lagi ona puipuia lou faitalia?

• E faapefea ona faaauau pea ona puipuia e le Tama Faalelagi ma Iesu Keriso lou faitalia i aso nei? (E mafai ona e faasoa atu le saunoaga lenei a Elder Johnson o se vaega o lenei talanoaga:)

A tatou usitai ia Satani, ua tatou tuu atu ia te ia le mana. A tatou usitai i le Atua, Na te tuuina mai ia i tatou le mana. E le o le savali lenei tatou te maua mai le lalolagi, ae o le mea moni. O le mana moni, le mana e avea ai e faapei o le Faaola, e na o le usiusitai e maua ai. O le saolotoga moni e na o le usiusitai e maua ai—i le gauai atu ai o i tatou lava i le finagalo o le Atua nai lo le faanaunauga o le tino po o le manao o le tiapolo. O le usiusitai e aumaia ai le saolotoga, mana, olioli, filemu, ma le faamoemoe.

… E ala i le ola amiotonu, e mafai ai ona tatou saoloto mai soo se mana e manao le fili e faaaoga ia i tatou. E na o le pau le taimi e maua ai e ia le mana pe a tatou faatagaina e ala i a tatou filifiliga. Afai e i ai se mea i o tatou olaga e faalavelave ia i tatou ma taofiofia ai i tatou i lalo, ia tatou salamo. Ia tatou aveesea ma faateleina le saolotoga i o tatou olaga. (“Saoloto e Filifili,” 69)

Tuu atu i tagata aoga se taimi e mafaufau loloto ai i auala latou te lagona atonu o loo taumafai ai Satani e taitai i latou i le faatagataotauaina. Uunaia i latou e mafaufau i ni faatinoga e mafai ona latou faia ina ia faalagolago atoatoa atili ai ia Iesu Keriso ina ia mafai ona latou maua le saolotoga faateleina lea e sau mai ia te Ia. Valaaulia i latou e tusi i lalo manatu ma uunaiga latou te mauaina.

Toe foi i le “Filifiliga o Gaoioiga e Aoao Ai.”

Mafaufau e faasoa atu le vaaiga faataitai lenei:

• O a ni ou manatu e uiga i le tali a Lucas i lona tulaga?

Faamalamalama atu o amioga a Atamu ma Eva ina ua uma ona la aai i le fua faasaina e mafai ona aoaoina ai i tatou i lesona taua e uiga i le mea e liliu atu i ai pe a tatou solia poloaiga a le Atua. (Afai e manaomia, e mafai ona tou toe iloiloina le tala i le aai ai o Atamu ma Eva i le fua e ala i le suesueina o le Mose 3:15–17; 4:5–12.) Uunaia tagata aoga e saili le malamalama’aga mai le Tama Faalelagi e uiga i le auala e mafai ai e upumoni o loo latou suesueina i le asō ona faatatau i o latou olaga.

Suesue faatasi le Mose 4:12–19, 27. Valaaulia tagata aoga e vaavaai mo upumoni mai nei fuaiupu e ono fesoasoani ia Lucas e toe faatulaga ai le auala na te vaai ai i ana mea sese. Tuu atu i tagata aoga le avanoa e faasoa ai o latou malamalama’aga i faigapaaga po o ni vaega toalaiti. E mafai ona e faaali atu fesili e pei o nei e faatupuina atili ai se talanoaga:

• Aisea e te manatu ai na taumafai Atamu ma Eva e lalafi mai le Atua? E faapefea ona taumafai tagata i nisi taimi e “lalafi” mai le Atua i aso nei?

• O le a se mea e mafai ona e aoao mai le fesili a le Atua “O fea ua e alu i ai?” (fuaiupu 15)?

• Na faapefea ona fesoasoani le Atua ia Atamu ma Eva i le fuaiupu e 27? E mafai faapefea ona Ia fesoasoani ia i tatou pe a tatou pauu atu i le solitulafono?

A mae’a talanoaga a tagata aoga, faamalamalama atu o loo i ai se uiga faafaatusa taua i “ofu pa’u manu” na saunia e le Atua mo Atamu ma Eva. Faasoa atu le saunoaga lenei mai ia Sister J. Anette Dennis. (Pe mafai foi ona tou suesueina le “Kenese 3:21; Mose 4:27. O le a le uiga o le faaofuina e le Atua o Atamu ma Eva i ofu pa’u manu?” i le Fesoasoaniga mo Mau: Feagaiga Tuai.)

I le avea ai ma tagata o Le Ekalesia a Iesu Keriso o le Au Paia o Aso e Gata Ai, o i tatou ua filifili e osifeagaiga ma le Atua i le maota o le Alii, e ofuina i fafo ni laei paia faalesauniga i le taimi o le tapuaiga i le malumalu, o se faatusa o laei na ofuina i sauniga o le malumalu i aso anamua. Tatou te ofuina foi le ofusa o le perisitua paia, i le taimi o tapuaiga i le malumalu ma i o tatou olaga i aso uma.

O le ofusa o le perisitua paia e loloto le avea ma faatusa ma faasino atu foi i le Faaola. Ina ua ‘aai Atamu ma Eva i le fua ma ua tatau ai ona tuua le Faatoaga o Etena, sa tuu atu ia i la’ua ofu pa’u manu e fai mo la’ua ufiufi. E foliga mai sa taulagaina se manu ina ia faia ai na ofu pa’u manu—o se faatusa o le taulaga a le Faaola lava ia mo i tatou. O leKaphar o le upu faavae Eperu mo le togiola, ma o se tasi o ona faauigaga o le “e ufia’i.” O o tatou ofusa ua faamanatu mai ai ia i tatou e faapea, o le Faaola ma faamanuiaga o Lana Togiola ua ufia’i i tatou i o tatou olaga atoa. A o tatou ofuina le ofusa o le perisitua paia i aso taitasi, e avea lena faatusa matagofie o so tatou vaega. (“Ia Outou Oofu i le Alii o Iesu Keriso,” Liahona, Me 2024, 11)

Valaaulia tagata aoga e faasoa mai mea ua latou aoaoina e uiga ia Iesu Keriso ma ofusa o le malumalu mai le saunoaga a Sister Dennis (I le faaaogaina o a latou lava upu, e mafai ona latou faasoa mai ai se upumoni faapenei: O ofusa o le malumalu e faatusa faafaatusa ia Iesu Keriso ma faamanuiaga o Lana Togiola.)

• E mafai faapefea e le malamalama i lenei upumoni ona aafia ai lo tatou naunau e maua faamanuiaga o le malumalu ma ofuina le ofusa paia? E mafai faapefea ona faatosina ai ou lagona e uiga i le Tama Faalelagi ma Iesu Keriso?

Mafaufau e faasoa atu le saunoaga lenei a Peresitene Jeffrey R. Holland ma valaaulia tagata aoga e faasoa mai mea na tulaga ese ia i latou:

Pe a tatou ofuina le ofusa, ua tatou ofuina, e pei ona aoao mai e le Au Peresitene Sili, se faatusa paia o Iesu Keriso. I le tulaga lenā, aiseā tatou te sa’ili ai mo se alofaga e aveese ai lenā faatusa? Aisea o le a tatou aveesea ai i tatou lava mai le folafolaga o le mana, puipuiga, ma le alofa mutimutivale o loo suitulaga mai e le ofusa? Ae i le isi itu, soo se taimi lava tatou te aveesea ai mo se taimi lē tumau le ofusa, e tatau ona tatou naunau e toe ofuina, i se taimi vave lava, auā tatou te manatua uma folafolaga ma tulaga lamatia e tuuina mai ai se uiga i a tatou feagaiga. Ae sili atu i mea uma, tatou te manatua le satauro ma le tuugamau avanoa o Keriso.

Atonu e fai mai nisi, ‟E i ai isi auala ou te manatua ai Iesu.” Ma o le a ou tali atu, e ese le manaia. O le tele o le lelei foi lena. Sei o tatou mafaufau uma i le tele o auala tatou te mafaia e tausia ai la tatou tautinoga ia ‟manatua pea o ia.” Ae o le faia o lena mea, o se mea lē faamaoni le lē amana’iaina ma le mautinoa o le faamanatu na tuuina mai e le Alii lava Ia i ē ua faaeeina, le ofusa o le perisitua paia. (“O le Ofusa o le Perisitua Paia,” Liahona, Set. 2024, 7)

Molimau atu e uiga i upumoni sa outou talanoaina. Valaaulia tagata aoga e tusifaamaumau ni uunaiga faaleagaga atonu na latou maua mai le Agaga Paia e uiga i le auala e mafai ona latou faaaogaina ai upumoni sa latou suesueina. Uunaia i latou e faatino o latou uunaiga faaleagaga.

Toe foi i le “Filifiliga o Gaoioiga e Aoao Ai.”

A o lei taunuu mai tagata aoga, mafaufau e tusi upu e pei o le filemu, tuputupu ae, faamalieina, olioli, ma le fiafia i le tasi itu o le laupapa ma upu e pei o le tiga, popole, faanoanoa, manu’aga, ma le faanoanoa i le isi itu o le laupapa.

Fai atu i le vasega e mafaufau i ni taimi na latou oo talu ai nei i se tasi o nei mea. E mafai foi ona e fesili:

• O le a le matafaioi na faia e le Paū o Atamu ma Eva ia i tatou i le mauaina o nei lagona po o aafiaga?

I lenei gaoioiga e aoao ai, o le a suesue ai e tagata aoga auala e aafia ai i latou i le Paū, faapea ai foi ma le matafaioi taua a Iesu Keriso i le faatoilaloina o aafiaga o le Paū. Ae latou te lei amata suesue, atonu e aoga le tuu atu i ni nai tagata aoga e faasoa mai mea latou te iloa e uiga i mea na tutupu e tau atu i le Paū o Atamu ma Eva. (Afai e manaomia, e mafai ona e suesueina faatasi le Mose 3:15–17; 4:5–12 .)

Faaali atu le siata lenei ma valaaulia tagata aoga e fatu se latou lava lomiga. Tuu atu ia i latou se taimi e faatumu ai le siata e i latou taitoatasi pe ma se paga. (E mafai foi ona e fai atu ia i latou e suesue ia faamatalaga e faatatau i nei fuaiupu i le Fesoasoaniga mo Mau: Feagaiga Tuai.)

A lava le taimi, fai atu i tagata aoga e faasoa mai a latou tali mo koluma e lua o loo i le siata. O nisi o a latou tali e mafai ona aofia ai upumoni e pei o nei: O le Paū o se vaega taua o le fuafuaga o le faaolataga a le Tama Faalelagi. Pe ana le pauū Atamu ma Eva, semanu e le mafai ona la maua ni fanau. O se taunuuga o le Paū, ua oo ai tagata uma i le oti faaletino ma le oti faaleagaga. E ala mai ia Iesu Keriso, e mafai ai ona togiolaina i tatou mai le Paū.

Ina ia fesoasoani i tagata aoga ia malamalama lelei ma lagona le taua o nei upumoni, mafaufau e faiatu nisi o fesili nei:

• Aisea na avea ai le Paʼū o se vaega taua o le fuafuaga o le faaolataga a le Tama Faalelagi?

• E fesoasoani faapefea ia te oe le malamalama i le Pa’ū e malamalama atili ai i lou manaomia o le Togiola a Iesu Keriso?

• O le a se mea ua faaalia mai e le Pa’ū e uiga i le alofa ma faamoemoega o le Tama Faalelagi mo Ana fanau?

O nisi o faamatalaga nei e ono aoga e faaaoga i vaega eseese o le talanoaga:

E pei lava o se tagata e le manao i se meaai seiloga ua fiaai, na te le manao ai foi i le faaolataga a Keriso seiloga ua ia iloa le pogai na te manaomia ai Keriso. E leai se tasi na te iloa lelei ma le tonu pe aisea na te manaomia ai Keriso sei vagana ua ia malamalama ma talia le aoaoga faavae o le Pa’ū ma lona aafiaga i tagata uma. (Ezra Taft Benson, “The Book of Mormon and the Doctrine and Covenants,” Ensign, Apr. 1987, 85)

O le natura lava o le olaga faitino e oo mai ai le faaitu’au. I tulaga e lē talafeauga pe ua faapito’au, o se tasi o a tatou matafaioi e fai o le faatuatua lea “o mea uma e lē talafeauga e uiga i le olaga e mafai ona faasa’oina e ala i le Togiola a Iesu Keriso” [Talai La’u Talalelei: Taiala mo Auaunaga Faifeautalai (2018), 52]. Na manumalo Iesu Keriso i le lalolagi ma “miti’ia” ai faiga faaitu’au uma. Ona o Ia, ua mafai ai ona tatou maua le filemu i lenei lalolagi ma ia loto tetele. (Dale G. Renlund, “Faapito’au Faaosolilivau,” Liahona, Me 2021, 43)

Sa faatino e Atamu ma Eva mo i latou uma o e sa filifili e auai i le faatinoga o le fuafuaga sili a le Tama mo le fiafia. O lo la Pa’ū na afua ai tulaga sa manaomia mo lo tatou fanau mai faaletino, ma mo se aafiaga faaletino ma le aoaoina i fafo mai o le afioaga o le Atua. O le Pa’ū na oo mai ai ma se iloa o le lelei ma le leaga ma le mana na tuuina mai le Atua e filifili ai. O le mea mulimuli, o le Pa’ū na aumaia ai le oti faaletino lea e manaomia e fai ai lo tatou taimi i le olaga nei ma taimi e le tumau ina ia aua ai ne’i o tatou ola e faavavau i a tatou agasala. (D. Todd Christofferson, “Aisea e Faaipoipo ai, Aisea e Fai ai se Aiga,” Liahona, Me 2015, 51)

E mafai ona e faaiuina i le valaauliaina o tagata aoga e vaai faalemafaufau o loo latou talanoa ma se tasi o loo lagonaina o le Pa’ū o se mea leaga ma o le puna o mea leaga uma i le lalolagi, ma latou te mafaufau pe aisea e manatu ai tagata o le Ekalesia o se mea lelei. Mafaufau e tuu atu ia i latou se taimi e faataitai ai ma se paga pe faapefea ona latou tali atu.

Toe foi i le “Filifiliga o Gaoioiga e Aoao Ai.”