Teuteronome 6–8; 15; 18; 29–30; 34

E mafai ona e faasoa atu le ata faataitai lenei i au tagata aoga ma valaaulia i latou e mafaufau pe na i ai ni o latou manatu faapea:

O loo auai Isla i le sauniga faamanatuga i se tasi aoauli o le Aso Sa. A o faalogologo o ia i tatalo o le faamanatuga, o le fasifuaitau “manatua pea o Ia” e tulaga ese ia te ia. Ua ia mafaufau pe malamalama moni o ia i le uiga o le manatua pea o Iesu Keriso ma pe mafai faapefea ona ia faia lenei mea i mea uma sa ia faia i lona olaga.

E mafai ona e valaaulia tagata aoga e mafaufau pe o le a le lelei o lo latou tausia o le poloaiga ia manatua pea Iesu Keriso. Fautuaina i latou e tusi i lalo mea ua uunaia i latou e fai e manatua ai pea o Ia a o latou suesueina le Teuteronome 6–8.

E mafai ona e faamanatu atu i tagata aoga faapea ina ua mavae le 40 tausaga o se solo i le vao, o le a ulufale atu nei le fanauga a Isaraelu i le nuu folafolaina. O le tusi o Teuteronome o loo i ai le fautuaga mulimuli a Mose i lona nuu. O le tele o ana fautuaga sa taulai atu i mea taua na tutupu mai le vao na ia manao ia manatua e lona nuu.

Ina ia fesoasoani i tagata aoga e suesue fautuaga a Mose, faatulaga le vasega i ni paga po o ni vaega toalaiti. Faaali atu fuaitau ma faatonuga nei o mau, ma tuu atu ia lava se taimi i tagata aoga e suesue ai ma faia se talanoaga:

• Teuteronome 6:3–13, 20–25

• Teuteronome 8:1–18

1. Suesue a le o le Teuteronome 6:3–13, 20–25 po o le Teuteronome 8:1–18 taitoatasi.

2. Saili po o le a le mea na fautuaina e Mose ia tagata ia manatua. Mafaufau e faailoga mea na e mauaina.

3. Faasoa atu le fautuaga na e maua. Faamatala pe aisea e te lagona ai e ono taua lenei fautuaga mo le fanauga a Isaraelu i lena taimi.

A uma ona talanoaina e tagata aoga, valaaulia i latou e faasoa mai nisi o ō latou malamalamaaga i le vasega. E mafai foi ona e fesili atu:

• O le a se mea na e maua i aoaoga a Mose e mafai ona fesoasoani ia i tatou i aso nei? (E mafai ona faasoa mai e tagata aoga ni upumoni eseese, e aofia ai le upumoni lenei: Ua fetalai mai le Alii ia i tatou ia manatua o Ia ma le aafiaga sa Ia faia i o tatou olaga.)

Ina ia fesoasoani i tagata aoga ia malamalama pe mafai faapefea e le manatuaina o le Alii ona faamanuiaina i tatou, mafaufau e faasoa atu le saunoaga lenei a Elder Dale G. Renlund:

E finagalo lo tatou Tama Faalelagi ia i tatou ia manatuaina Lona agalelei ma le agalelei a Lona Alo Pele, e le mo le faamalieina o i La’ua lava, ae mo le aafiaga a lena manatuaga ia i tatou. E ala i le mafaufau i lo La’ua agalelei, e faateleina ai la tatou vaaiga ma le malamalamaaga. E ala i le manatunatu ai i lo La’ua agaalofa, o le a atili ai ona tatou lotomaualalo, lototatalo, ma tumau mausali. (“Mafaufau i le Agaglelei ma le Silisiliese o le Atua,” Liahona, Me 2020, 41)

Mafaufau e talanoaina ni nai fesili po o fesili uma foi:

• O le a se mea e mafai ona taofia tagata mai le manatuaina o le Alii i aso nei?

• O a nisi o mea patino e mafai ona fesoasoani ia i tatou e manatua ai le Atua ma Lana uunaiga i o tatou olaga? (Mafaufau e lisi tali a tagata aoga i luga o le laupapa. I le avea ai ma se vaega o lenei talanoaga, e mafai foi ona outou matamata i vitio “O Remember, Remember” [1:28] po o le “Spiritual Memories” [1:19].)

  

  1:34
  

  1:19

E mafai ona e valaaulia tagata aoga e faaalu sina taimi e manatua ai le agalelei o le Tama Faalelagi ma Iesu Keriso. E mafai ona latou faaaluina sina taimi e tusi ai a latou tali i se tasi po o fesili uma nei e lua:

• O le a le mea e oo mai i lou mafaufau pe a e mafaufau e uiga i le agalelei o le Tama Faalelagi ma Iesu Keriso i lou olaga po o olaga o isi?

• O a faamanuiaga ua e oo i ai a o e taumafai e manatua le uunaiga a le Tama Faalelagi ma Iesu Keriso i lou olaga?

Valaaulia tagata aoga e mafaufau i se auala se tasi latou te lagona ai le uunaiga e manatua atili le Alii i o latou olaga, ma uunaia i latou e tusifaamaumau o latou manatu. E mafai foi ona latou fatuina se faamanatu mo i latou lava e mafai ona tuu i se nofoaga o le a latou vaai soo i ai.

Toe foi i le “Filifiliga o Gaoioiga e Aoao Ai.”

Valaaulia tagata aoga e mafaufau i se tasi latou alolofa i ai. E mafai ona latou faaali atu se ata o lena tagata i le vasega po o se paga. Uunaia i latou e mafaufau pe na faapefea ona tuputupu ae pe suia le la sootaga ma lena tagata i le aluga o taimi. E mafai e tagata aoga ona faasoa pe aisea latou te alolofa ai i lena tagata po o mea ua latou faia e lagona ai le alofa sili atu mo i latou.

Faamalamalama atu e pei lava ona tatou faaaluina le taimi ma taumafaiga e faamalolosia ai a tatou sootaga ma e pele ia i tatou, e taua foi mo i tatou le taulai atu i le faamalolosia o a tatou sootaga ma le alofa mo le Atua. Fautuaina tagata aoga a o latou suesue i le aso e saili le taitaiga a le Agaga Paia e fesoasoani ai ia latou iloa pe mafai faapefea ona latou faamalosia lo latou alofa mo le Atua.

Faamanatu i le vasega o le tusi o Teuteronome o loo i ai le fautuaga mulimuli a Mose ia Isaraelu a o lei taitaiina atu i latou e Iosua i le nuu folafolaina. Valaaulia tagata aoga e faitau le Teuteronome 6:1–6 ma le 30:15–20, ma vaavaai mo nisi o fautuaga a Mose i tagata. Mafaufau e fai atu fesili e pei o fesili nei e fesoasoani ai i a i latou e faasoa mai mea na latou aoaoina:

• O le a se mea sa tulaga ese ia te oe mai fautuaga a Mose?

• E fa’apefea ona e aoteleina lenei fautuaga o se fa’amatalaga o le upumoni? (Atonu e faailoa mai e tagata aoga se upumoni e pei o lenei: Ua poloaiina i tatou e le Atua ia alolofa ia te Ia ma o tatou loto atoa, agaga, ma le malosi atoa.)

Faasino atu i le taimi o Lana galuega i le olaga nei, sa aoao mai ai e Iesu Keriso e faapea o le alofa i le Atua o “le poloaiga muamua ma le sili” (Mataio 22:38). E mafai ona e fautuaina tagata aoga e fesootai pe fefaasinoai le Teuteronome 6:5 i le Mataio 22:35–40.

Ina ia fesoasoani i tagata aoga ia malamalama atili i lenei poloaiga, mafaufau e faaali atu fesili nei ma valaaulia i latou e filifili se tasi pe sili atu e taulai i ai. (E mafai foi ona e folasiaatu le “Faia o Fesili e Valaaulia ai le Aoaoina ma le Filiga” i le Tomai o le Suesueina o Tusitusiga Paia ma fai atu i tagata aoga e o mai faatasi ma a latou lava fesili.) Tuu atu i tagata aoga se taimi e suesue ai tusitusiga paia, savali mai taitai o le Ekalesia, po o isi punaoa i le Potutusi o le Talalelei e sue ai malamalamaaga e faatatau i nei fesili.

• O le a le uiga o le alofa atu i le Atua ma lou loto atoa, agaga atoa, ma le malosi atoa?

• I le taimi o Lana galuega i le olaga nei, na faapefea ona faaalia e Iesu Keriso e alofa o Ia i le Tama Faalelagi?

• O le a se eseesega e mafai ona faia i le alofa i le Atua ma lo’u loto atoa, agaga, ma le malosi atoa e ono faia i lo’u olaga?

• O le a se mea e mafai ona taofia ai a’u mai le alofa i le Atua ma lo’u loto atoa, agaga, ma le malosi atoa?

• O le a se mea e mafai ona fesoasoani ia te au e lagona ai le alofa sili atu mo le Atua?

Afai e manaomia e tagata aoga se fesoasoani i le sailia o punaoa, e mafai ona e faia ni fautuaga e pei o nei: Taiala i Tusitusiga Paia, “Alofa,” Gospel Library; D. Todd Christofferson, “O Le Poloaiga Muamua” (na o tusiga faatekinolosi), Liahona, Fep. 2023, (Potutusi o le Talalelei); “Alofa i le Atua, alofa i lou tuaoi,” i le Mo le Malosi o le Autalavou: O Se Taiala mo le Faia o Filifiliga (2022), 10–12.

A uma suesuega a tagata aoga, valaaulia i latou e faasoa atu o latou malamalamaaga i ni vaega toalaiti. Ona tuu atu lea i ni nai tagata aoga e naunau e faasoa mai ni o latou malamalamaaga i le vasega. E mafai foi ona talanoaina ni nai fesili faapenei:

• O le a se mea na fesoasoani ia te oe e faalolotoina ai lou alofa mo le Atua?

• O le a se eseesega ua faia i lou olaga ona o lou alofa mo le Atua?

Toe foi i le “Filifiliga o Gaoioiga e Aoao Ai.”

Tusi upu mativama le manaomia le fesoasoani i le laupapa. Fai atu i tagata aoga e faasoa mai ni auala e ono manaomia ai e se tagata le fesoasoani—pe faaletino, faalelagona, pe faaleagaga. E mafai e oe po o se tagata o le vasega ona lisi a latou tali i luga o le laupapa. A o suesueina e tagata aoga le Teuteronome 15, fautuaina i latou e matau pe faapefea ona aoao i tatou e le Alii ia tausia tagata e manaomia le fesoasoani.

Faamalamalama atu mo le tai fitu tausaga na poloaiina ai e le Alii le fanauga a Isaraelu e tausia se tausaga faaSapati. I le avea ai ma se vaega o lo latou tausia o le tausaga faaSapati, sa tatau ai ona latou faamagalo atu i aitalafu, faamatuu atu tagata i le faapologaina, ma sii ae avega a isi. (Mo nisi faamatalaga, tagai i le “Teuteronome 15:1–18. O le a le tausaga o le faasaolotoina?” i le Fesoasoaniga mo Tusitusiga Paia: Feagaiga Tuai.)

Valaaulia tagata aoga e faitau le Teuteronome 15:1–11, ma vaavaai mo faatonuga a le Alii mo le tausaga faaSapati. Valaaulia tamaitai i le vasega e tali mai i le fesili nei:

• O a mea ua e aoaoina mai nei fuaiupu i uiga o le Atua?

• O le a sou manatu i le uiga o le “matua faamafola atu [o tatou] lima” pe a tatou foai atu i isi? O anafea na faaali atu ai e le Alii ia te oe Lana tausiga i se “lima mafola”?

• O a folafolaga na e maua i nei fuaiupu e mafai ona faatatau i a tatou taumafaiga e auauna atu i tagata e manaomia le fesoasoani? (E mafai ona faailoa mai e tagata aoga se upumoni faapenei: A o tatou naunau e fesoasoani i tagata e manaomia le fesoasoani, o le a faamanuiaina i tatou e le Alii i mea uma tatou te faia.)

Mafaufau e faaaoga se tasi pe sili atu o gaoioiga nei e fesoasoani ai i tagata aoga ia iloa atili auala e mafai ona latou mulimuli ai i le poloaiga a le Alii e tausia e matitiva ma tagata e manaomia le fesoasoani:

1. Faataitai le “Sailiga i Tusitusiga Paia ma i le Potutusi o le Talalelei” i le Tomai i Suesuega o Tusitusiga Paia. E mafai e tagata aoga ona faailoa mai ni nai upu autu mai le talanoaga, e pei o le “mativa,” “manaomia le fesoasoani,” “auauna atu,” “tausiga o isi,” ma isi mea faapena. Tuu atu i tagata aoga se taimi e faataitai ai le sailia o nei upu po o fasifuaitau i le Potutusi o le Talalelei. E mafai ona latou faailoa mai mau, faamatalaga mai taitai o le Ekalesia, po o isi punaoa o loo aoao ai i latou e uiga i le ala e tausia ai e le Alii ma Lana Ekalesia Lona nuu i aso nei.

2. Saili se faataitaiga mai le soifuaga o Iesu Keriso lea na Ia faamanuiaina ai tagata e manaomia le fesoasoani. E mafai ona e valaaulia le vasega e faasoa i le vasega mea na latou aoaoina.

3. Lisi vaega nei i luga o le laupapa: mea tautupe, faaletino, faaleagaga, faaleagafesootai, faalelagona. Valaaulia tagata aoga e talanoaina ni auala patino e mafai ona latou mulimuli ai i le poloaiga a le Alii e tausia tagata o e o i ai nei ituaiga o manaoga.

E mafai foi ona e talanoaina ni nai fesili faapenei:

• Ua faapefea ona faamanuiaina oe e le Tama Faalelagi mo le auauna atu ma le loto i ai i Ana fanau?

• O anafea na tausia ai oe e se tasi i se ala faaKeriso?

Mafaufau e valaaulia tagata aoga e tatalo i le Tama Faalelagi ia iloa pe mafai faapefea ona latou tausia se tasi o siomia i latou o loo manaomia le fesoasoani. Ia uunaia tagata aoga e tusifaamaumau ma galulue i soo se uunaiga latou te maua.

Toe foi i le “Filifiliga o Gaoioiga e Aoao Ai.”