Kenese 18–23

Mafaufau e faasoa atu le vaaiga faataitai lenei, pe fatu se isi vaaiga e sili atu ona fetaui ma manaoga o au tagata aoga:

Mafaufau e fesili atu i tagata aoga e mafaufau pe o latou po o se tasi latou te iloa sa iai ni lagona e faapei o Miguel. E mafai foi ona e valaaulia tagata aoga e tusi i lalo se faamanuiaga o loo latou faatalitali e maua mai le Alii (e pei o le faaipoipoga, aiga, aoga, tali i fesili, toomaga mai se tofotofoga, avanoa, ma isi mea faapena).

• O le a se mea e faigata ai le faatalitali mo faamanuiaga folafolaina ina ia faataunuuina?

Faamanatu i tagata aoga o se vaega o le feagaiga a le Atua ma Aperaamo o se folafolaga o le a maua e ia ma Sara se fanau e toatele (tagai i le Kenese 13:16; 15:5; 17:15–19). Na matua matutua lava Aperaamo ma Sara ma e le’i maua lava se fanau. Mafaufau e fesili atu:

• O a ni ou manatu po o ni fesili e te manatu e ono i ai pe ana faapea sa e i ai i le tulaga o Aperaamo ma Sara?

Faamatala atu na auina mai e le Alii ni avefeau se toatolu e asiasi ia Aperaamo ma Sara. Valaaulia tagata aoga e suesue fegalegaleaiga i le va o Aperaamo, Sara, ma avefeau a le Alii i le Kenese 18:9–14, faatasi ai ma mea na tutupu mulimuli ane i le Kenese 21:1–3.

A uma ona latou faitau, fai atu i tagata aoga e faasoa mai mea na latou aoaoina e uiga i le Alii ma Ana faamanuiaga folafolaina. (E mafai ona faailoa mai e tagata aoga upumoni faapenei: E leai se mea e faigata tele mo le Alii, ma E faataunuuina e le Alii Ana folafolaga ia i tatou i Lana taimi.) Mafaufau e talanoaina fesili e pei o nei:

• O a ni tulaga e te feagai e aoga ai le manatuaina o nei upumoni? E mafai faapefea e le manatuaina o nei upumoni ona faia se eseesega i nei tulaga?

• O a ni aafiaga na e maua na faaalia ai ia te oe e leai se mea e faigata tele mo le Alii?

I le taimi o la outou talanoaga, atonu e fesoasoani le faamamafa atu faapea o le faatalitali mo faamanuiaga folafolaina a le Alii, o nisi taimi e manaomia ai le onosai ma le faatuatuaina o le taimi a le Alii. Mafaufau e faasoa atu le faamatalaga lenei a Elder Gerrit W. Gong:

I le aluga o lenei olaga, o nisi taimi tatou te faatalitali ai i le Alii. Atonu tatou te lei oo lava i le mea tatou te moomoo i ai i le lumanai. Fai mai se tasi tuafafine tuuto, “O le faatalitali ma le faamaoni i le Alii mo Ana faamanuiaga o se tulaga e paia. E le tatau ona faia ma le manatu oi se pagā, manatu faasausili, po o le faamasinosino, ae nai lo lena ia faia ma le migao paia.” I le taimi lenei, o loo tatou ola nei, e le o faatalitali mo le olaga ia amata. (“Avanoa i le Faletalimalo,” Liahona, Me 2021, 27)

• E ono faapefea ona tatou manuia mai taimi e le vave faataunuuina ai folafolaga a le Alii i o tatou olaga?

• E mafai faapefea ona e mulimuli i le fautuaga a Elder Gong ia “ola nei” e tusa lava pe e te faatalitali mo folafolaga a le Atua ina ia faataunuuina?

Fai atu i tagata aoga e mafaufau i le faamanuiaga o loo latou faatalitali i ai, lea na latou tusia i lalo i le amataga o lenei gaoioiga e aoao ai. Valaaulia tagata aoga e fai se lisi o auala e mafai ona latou faaalia ai le faatuatua i le Alii a o latou faatalitali mo le faamanuiaga. E mafai ona e fai atu i tagata aoga e faasoa atu i le vasega ni manatu anoa na latou tusia i lalo e le patino tele e faasoa atu.

Toe foi i le “Filifiliga o Gaoioiga e Aoao Ai.”

Mafaufau e faasoa atu le saunoaga lenei mai ia Peresitene Jeffrey R. Holland:

O le taimi ua tuanai e ao ona aoaoina mai ai ae le o le ola ai. (“O le Mea Sili e Le’i I Ai,” Liahona, Ian. 2010, 18)

• O a ni auala e mafai ona fesoasoani ai le manatuaina o mea ua tuanai ia i tatou?

• Aisea e te manatu ai e taua le ‘aloese mai le ola ai i le tuanai?

A o suesue e tagata aoga le tala i le tuua e Lota ma lona aiga o lo latou aiga i Sotoma, valaaulia i latou e mafaufau pe i ai ni mea latou te iloa e faigata ona tuua i le taimi ua tuanai. E mafai ona e uunaia tagata aoga e tusi i lalo manatu ma lagona pe o i ai se tasi o nei mea e taofia ai i latou mai le mulimuli i le Alii.

Faasoa atu le faamalamalamaga lenei e fesoasoani ai i tagata aoga ia malamalama i le talaaga mo le tala o le a latou suesueina. E mafai foi ona e valaaulia se tagata aoga e faitau atu le faamalamalamaga.

O Lota o le tei tama o Aperaamo. Ina ua uma ona siitia atu faatasi ma Aperaamo mai Aikupito i le laueleele o Kanana, sa nonofo Lota ma lona aiga i le laufanua valevalenoa o Ioritana (tagai Kenese 13:1–11). Sa “faatuina [e Lota] lona fale ie, ua oo atu i Sotoma” (Kenese 13:12), o se aai ua lauiloa i le amioleaga (tagai i le Kenese 13:13). Na iu lava ina nonofo Lota ma lona aiga i Sotoma (tagai i le Kenese 14:12). I Lona alofa mutimutivale, na auina atu ai e le Alii o avefeau i Sotoma e lapatai Lota ma lona aiga e o ese a o lei faaumatiaina le aai (tagai i le Kenese 19:12–13).

Valaaulia tagata aoga e suesue le Kenese 19:14–19, 24–26 ma vaavaai pe na faapefea e Lota ma lona aiga ona tali atu i faatonuga a le Alii ia tuua le aai. (Ina ia fesoasoani i tagata aoga ia malamalama lelei i mea na tutupu i nei fuaiupu, mafaufau e suesue le “Kenese 19:15–26. Aisea na avea ai le avā a Lota ma tupua masima?” i le Fesoasoaniga mo Mau: Feagaiga Tuai.)

• O le a se mea na e matauina e uiga ia Lota ma lona aiga a o e suesueina nei fuaiupu? O ā ni mea na e matauina e uiga i le Alii?

Faamalamalama atu faapea i le Feagaiga Fou, sa faaaoga ai e le Faaola le tala i le aiga o Lota e aoao atu ai e uiga i le tulaga o le a i ai i le Afio Mai Faalua (tagai i le Luka 17:28–32). Valaaulia tagata aoga e faitau le Luka 17:32, ma vaavaai mo le lapataiga a le Faaola. Mafaufau e tuu atu i tagata aoga e maka lenei mau ia latou tusitusiga paia.

• O a nisi o lesona taua e mafai ona tatou aoaoina mai le tala i le avā a Lota? (O tali a tagata aoga e mafai ona aofia ai se upumoni faapenei: Ua poloaiina i tatou e le Alii ia sosola ese ma lafoai atoa le amioleaga.)

• O a ni faataitaiga o auala e ono faaosoosoina ai se tagata e “tilotilo i tua” i agasala ma tosinaga leaga sa avea muamua o se vaega o o latou olaga?

• E mafai faapefea ona fesoasoani le Faaola ia i tatou e tuua a tatou mea sese ua tuanai ma agai i luma ma le faatuatua?

Ina ia fesoasoani i la outou talanoaga, e mafai ona e faasoa atu le saunoaga lenei mai ia Peresitene Jeffrey R. Holland:

Aua e te ofo pe afai e maoae le toso o le taimi ua tuanai. Atonu e aofia ai uo tuai ma mausa tuai—o mausa malolosi atonu na matua mauaa i au amioga, e pei o vaisū o le tapaa, ava malosi, fualaau faasaina, ponokalafi, taaloga faitupe, solitulafono faalefeusuaiga, po o le le faamaoni, e ta’u atu na o ni nai mea. O nei mea na tuueseeseina ai oe mai le uunaiga a le Agaga Paia i lena taimi, ma o le a sili atu ona faaleagaina pe afai e te toe foi atu i ai i le taimi nei. Ae o le mana o a outou feagaiga e sili atu nai lo le mana o faaosoosoga. Aua nei faatagaina le fefe i solitulafono ua tuanai e faavaivaia ai lou faaiuga e salamo ma lafoai. Manatua! Ua folafola mai e le Atua e laveaiina oe “mai le lima o lē na inosia [oe], ma [togiolaina oe] mai lima o le fili” [Salamo 106:10]. (“What I Wish Every New Member Knew—and Every Longtime Member Remembered,” Ensign, Oke. 2006, 14)

Mafaufau e valaaulia tagata aoga e mafaufau filemu i ai ma tusifaamaumau a latou tali i le fesili lenei:

• O a ni nai mea e mafai ona ou faia e tuua ai agasala po o tosinaga leaga?

E mafai ona e valaaulia ni nai tagata aoga e molimau atu i lo latou gafatia e lafoai ai le agasala ma faatosinaga leaga faatasi ai ma le fesoasoani a le Alii.

Toe foi i le “Filifiliga o Gaoioiga e Aoao Ai.”

Valaaulia le vasega e mafaufau i ni osigataulaga taua na faia e isi mo i latou. E mafai ona e valaaulia ni nai tagata aoga e faasoa mai.

• O a ni ou lagona e uiga i tagata na ositaulaga mo oe?

E mafai ona e faaali atu le ata lenei o Aperaamo ma Isaako ma valaaulia se tagata aoga e aotele mai mea o loo faaalia mo le vasega.

• Aisea atonu na avea ai le poloaiga e ositaulaga ia Isaako ma se tofotofoga sili ona faigata o le faatuatua mo Aperaamo?

Faailoa atu o lenei tala ia Aperaamo ma Isaako e matuai faafaatusa lava. Mafaufau e valaaulia tagata aoga e faitau le Iakopo 4:5, ma vaavaai mo mea na aoao mai e le perofeta o le Tusi a Mamona o Iakopo e uiga i le faatusa o lenei tala. (Mo nisi faamatalaga e uiga i faatusa, tagai i le “Malamalama i Faatusa i Mau” i le Tomai mo le Suesueina o Tusitusiga Paia.)

Tuu atu i tagata aoga se taimi e suesue ai le Kenese 22:1–19, ma saili mo faamatalaga auiliili e mafai ona aoaoina faafaatusa ai i latou e uiga i le Tama Faalelagi ma Iesu Keriso. E mafai ona latou tusia ni faamatalaga o nei faatusa ma mea e tutusa ai i a latou tusitusiga paia.

A maea ona suesue tagata aoga, valaaulia ni nai tagata e faasoa atu i le vasega po o fea o faatusa po o faatusatusaga na faagaeetia ai i latou ma pe aisea. E mafai foi ona e fai atu ni fesili e pei o nei:

• E faapefea ona fesoasoani le tala ia Aperaamo ma Isaako ia te oe e te talisapaia atili ai le Tama Faalelagi ma Iesu Keriso?

• O a upumoni ua e aoaoina e uiga i le Tama Faalelagi ma Iesu Keriso mai lenei tala? (O se faataitaiga lenei o se upumoni e ono faailoa mai e tagata aoga: Na faaalia e le Tama Faalelagi Lona alofa atoatoa mo i tatou e ala i le taulaga naunautai a Lona Alo, o Iesu Keriso.)

Mafaufau e faaali atu le ata lenei ma valaaulia se tagata aoga e faitau le saunoaga a Sister J. Anette Dennis:

Ina ua ofoina mai e le Tama Lona Alo Pele e Toatasi e fai ma taulaga mo i tatou, sa avea Iesu Keriso lava Ia ma faatusa aupito taua o le alofa e le mavae o lo tatou Tama oi le Lagi mo i tatou taitoatasi. (“Ia Outou Ofu i le Alii o Iesu Keriso,” Liahona, Me 2024, 10)

• O a ni auala ua faaalia ai e le taulaga a Iesu Keriso le alofa o lo tatou Tama Faalelagi?

Tuu atu i tagata aoga se avanoa e mafaufau ai i le alofa o le Tama Faalelagi ma Iesu Keriso e ala i le taina po o le usuina o le pese “God Loved Us, So He Sent His Son,” “old the Wounds in Jesus’ Hands,“ po o se isi viiga e taulai atu i le alofa o le Atua (tagai Viiga—Mo Le Aiga ma le Ekalesia). E mafai ona valaaulia tagata aoga e faasoa mai upu po o fasifuaitau mai le pese e tulaga ese ia i latou.

Faaiu i le valaaulia o tagata aoga e toe mafaufau i mea na latou aoaoina pe lagonaina mai le Agaga Paia i le taimi o lenei gaoioiga e aoao ai. Tuu atu ia i latou sina taimi e tusifaamaumau ai manatu, lagona, po o uunaiga faaleagaga sa latou maua.

Toe foi i le “Filifiliga o Gaoioiga e Aoao Ai.”