Kenese 42–50

Tusi le fasifuaitau faamagalo atu i isi i le laupapa. Ona valaaulia lea o ni nai tagata aoga e o mai i luga ma tusi i luga o le laupapa upu latou te fesootaia ma le faamagalo atu i isi. E mafai foi ona e fesili:

• O le a se mea e faigata ai ona faamagalo atu i i isi?

Valaaulia tagata aoga e mafaufau i ni auala na latou tali atu ai ina ua faia e se tasi se mea faatiga ia i latou. Uunaia i latou a o latou suesue i le aso ina ia nofouta i uunaiga mai le Agaga Paia ia e mafai ona fesoasoani ia i latou e mulimuli atili ai i le faataitaiga a le Faaola o le faamagaloga.

Ina ia fesoasoani i tagata aoga ia malamalama i le talaaga o le Kenese 45, faamalamalama atu o Iosefa, ina ua uma ona faatauina atu e ona uso e avea ma pologa, sa faia mulimuli ane ma pule i Aikupito e Farao. Ina ua oo mai se oge, na malaga atu uso o Iosefa i Aikupito e faatau mai ni meaai. E le’i vave faailoa atu e Iosefa lona faasinomaga, ae nai lo lena, na ia tofotofoina i latou e iloa ai pe ua suia i latou i tausaga talu ona latou faia a latou amioga sauā iā te ia. Mulimuli ane, na filifili Iosefa e ta’u atu i ona uso o ai o ia.

Valaaulia tagata aoga e suesue le Kenese 45:1–15, ma vaavaai mo faailoga na faamagalo e Iosefa ona uso. (Afai e te manao ai, e mafai foi ona e valaaulia tagata aoga e suesue le Kenese 50:14–21, lea o loo faamatala ai se isi fegalegaleaiga a Iosefa ma ona uso i tausaga mulimuli ane.)

Ina ia fesoasoani i tagata aoga e faasoa mai mea na latou aoaoina mai nei fuaiupu, mafaufau e talanoaina fesili e pei o fesili nei:

• O a upu po o ni faatinoga a Iosefa sa tulaga ese ia te oe?

• O le a se mea ua tatou aoaoina mai le faataitaiga a Iosefa o le faamagalo atu? (E mafai ona faailoa mai e tagata aoga se mataupu faavae faapenei: O le faamagalo atu i isi e fesoasoani tatou te maua ai le faamalologa ma le filemu.)

Fai atu i tagata aoga e vaai faalemafaufau e faapea, latou te iloa se tasi o loo tauivi e faamagalo atu i se isi tagata. Valaaulia i latou e saili mo mau po o faamatalaga mai taitai o le Ekalesia e ono fesoasoani i lenei tagata. Mo tagata aoga o e manaomia le fesoasoani, e mafai ona e fautua atu ia latou suesue i nisi o mau nei ma le saunoaga a Elder Ulisses Soares:

• Mataio 6:14–15; Efeso 4:31–32; Kolose 3:13; Mataupu Faavae ma Feagaiga 64:9–11

O le lototele e faamagalo atu e oo mai ia i latou o e tuu atu lo latou faatuatua ma le faalagolago i le Alii. Faatasi ai ma Lana fesoasoani, e mafai ai ona tatou maua le malosi e faamagalo atu ai i isi, pe na faia e le tagata sese se agasala matuia po o se solitulafono e lei faamoemoeina. (“Fesili Atu, Saili, ma Tu’itu’i: O Se Mamanu Agaalofa” [faigalotu a le Iunivesite o Polika Iaga–Hawaii, 29 Ian., 2023], speeches.byuh.edu)

Valaaulia tagata aoga e faasoa atu se mau po o se faamatalaga na latou maua i ni vaega toalaiti. Fai atu ia i latou e faamatala mai pe mafai faapefea e a latou fuaitau filifilia ona fesoasoani i se tasi o loo tauivi e faamagalo atu.

A uma le talanoaga a vaega toalaiti, fuafua e fai atu fesili e pei o nei:

• E mafai faapefea e le mauaina o se malamalama loloto atu ia Iesu Keriso ma Lana Togiola ona fesoasoani ia i tatou e faamagalo atu ai i isi?

• O le a se taimi na e molimauina ai le faamalologa ma le filemu lea e oo mai i le faamagalo atu i isi? I le avea ai ma se vaega o lenei talanoaga, e mafai ona e faaali atu vitio “Forgiving Others: An Easter Message from President Russell M. Nelson” (5:01) po o le “With the Power of God in Great Glory” (matamata mai le taimi faailo 10:24 i le 12:13).

  

  5:2
  

  13:17

Valaaulia tagata aoga e mafaufau i lo latou lava manaomia o le faamagalo atu pe saili le faamagaloga. Tuu atu ia i latou se taimi e tusi ai i lalo laasaga o le a latou uia e faaaoga ai mea ua latou aoaoina ma lagonaina i le asō.

Toe foi i le “Filifiliga o Gaoioiga e Aoao Ai.”

Valaaulia le vasega e faasoa mai ituaiga o faamanuiaga faaleperisitua na latou tuuina atu pe mauaina. Lisi tali a tagata aoga i luga o le laupapa (o faataitaiga e aofia ai faamanuiaga faapeteriaka; faamanuiaga faatama; ma isi faamanuiaga o le faamalologa, faamafanafanaga, po o fautuaga). Afai e manaomia, fai atu i se tagata aoga e faamatala faapuupuu mai po o a faamanuiaga faaleperisitua. E mafai foi ona e valaaulia tagata aoga e mafaufau i le matafaioi na faia e faamanuiaga faaleperisitua i o latou olaga.

Mafaufau e faaali atu le ata o loo i lalo a o e faasoa atu le faamalamalamaga lenei o le Kenese 48–49:

I le faaiuga o lona soifua, sa tuuina atu ai e Iakopo faamanuiaga faaleperisitua i ona atalii taitoatasi e toasefululua. O faamanuiaga aupito auiliili a Iakopo e lua na tuu atu ia Iuta ma Iosefa.

Mafaufau e fa’aali atu le siata lenei. Valaaulia tagata aoga e suesue i faamanuiaga a le o Iuta po o Iosefa, faatasi ai ma ni nai punaoa faaopoopo e fesoasoani ai i lo latou malamalama. (Atonu o se nofoaga lelei lenei e faaaoga ai le tomai o le “Faaaogaina o Tusitusiga Paia o le Toefuataiga ia Malamalama ai i le Tusi Paia,” i le Tomai mo le Suesueina o Tusitusiga Paia.)

A uma ona suesue tagata aoga, fai atu ia i latou e faasoa mai mea na latou aoaoina. E mafai ona e faaaoga fesili nei e taiala ai le talanoaga:

• O a ni malamalamaaga na e maua mai i au suesuega?

• O a ni mea ua fesoasoani ai nei fuaiupu ia te oe e te malamalama ai e uiga i le Tama Faalelagi ma Iesu Keriso? (I le avea ai ma se vaega o lenei talanoaga, e mafai ona e fesoasoani i tagata aoga e faailoa mai se upumoni e pei o lenei: E ala i faamanuiaga faaleperisitua, e mafai ai e le Alii ona folafola mai ia i tatou faamanuiaga ma fesoasoani ia i tatou ia malamalama i o tatou avanoa i le lumanai.)

Mafaufau e faaaoga se tasi po o manatu nei e lua e fesoasoani ai i tagata aoga ia malamalama atili i le auala e mafai ai e faamanuiaga faaleperisitua ona faamanuiaina o latou olaga:

• Valaaulia ni nai tagata aoga e faasoa mai ni faataitaiga o taimi na faataunuuina ai e le Alii folafolaga na faia e ala i faamanuiaga faaleperisitua, a le o o latou lava olaga po o olaga o isi.

• Faamalamalama atu o faamanuiaga na faaee atu e Iakopo i luga o ona atalii sa talitutusa lava ma faamanuiaga faapeteriaka e mafai ona tatou maua i aso nei. E mafai ona e tuuina atu i tagata aoga se taimi e aoao atili ai e uiga i faamanuiaga faapeteriaka e ala i le suesueina o “Faamanuiaga Faapeteriaka” i le Autu ma Fesili (Gospel Library). O tagata aoga o e ua mauaina se faamanuiaga faapeteriaka ma o loo maua e mafai ona faitau i ai i le taimi lea. (E mafai e tagata o le ekalesia ona faaaoga o latou faamanuiaga faapeteriaka e ala i le saini i totonu i le ChurchofJesusChrist.org ma alu i le “Faamanuiaga Faapeteriaka” i le lisi autu e faasolo i lalo o “Punaoa”).

A uma ona suesueina, valaaulia tagata aoga e faasoa mai mea na latou aoaoina pe lagonaina. E mafai foi e tagata aoga o e ua mauaina se faamanuiaga faapeteriaka ona faasoa mai pe na faapefea ona aafia i latou ma la latou sootaga ma le Atua ona o o latou faamanuiaga. Ia mautinoa ua malamalama tagata aoga e le tatau ona latou faasoa mai ni faamatalaga patino e uiga i o latou faamanuiaga faapeteriaka (tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 18.17, Gospel Library).

Toe foi i le “Filifiliga o Gaoioiga e Aoao Ai.”

Mafaufau e faaali atu se ata o le Perofeta o Iosefa Samita. Valaaulia tagata aoga e mafaufau loloto i fesili nei ma tusi i lalo a latou tali:

• Mata o le a se eseesega o lou olaga pe ana le toefuatai mai e le Alii le talalelei e ala mai i le Perofeta o Iosefa Samita? Ua faapefea ona aafia ai lau sootaga ma le Tama Faalelagi ma Iesu Keriso.

Uunaia tagata aoga e faaauau pea ona mafaufau loloto i nei fesili i le gasologa o lenei gaoioiga e aoao ai. Faamalamalama atu o le a latou maua le avanoa e faasoa mai ai o latou manatu i se taimi mulimuli ane.

Faamalamalama atu a o lei maliu o ia, sa valoia e Iosefa o Aikupito o le a faatuina e le Alii ni perofeta maoae se toalua e laveai Lona nuu. O le perofeta muamua o Mose, o lē o le a leveaiina le fanauga a Isaraelu mai Aikupito. O le lona lua o se tagatavaai maoae o le a fesoasoani e aumai tagata mai le pogisa faaleagaga i aso e gata ai. O lenei tagatavaai maoae o le Perofeta o Iosefa Samita.

Ina ia saunia tagata aoga e suesue i le valoaga a Iosefa, fesoasoani ia i latou e sue le Faaliliuga a Iosefa Samita o le Kenese 50:24–38 i a latou tusitusiga paia. O nei fuaiupu e mafai ona maua i le faaopoopoga i le Tusi Paia o lomiga a le Au Paia o Aso e Gata Ai o tusitusiga paia po o le Gospel Library (alu i Tusitusiga Paia ona sosoo ai lea ma le Fesoasoaniga mo Suesuega e sue ai le “Faaopoopoga o le Faaliliuga a Iosefa Samita”). O tagata aoga e le mafai ona mauaina nei punaoa e mafai ona suesue i le aotelega a Liae o lenei valoaga i le 2 Nifae 3:4–11.

Valaaulia tagata aoga e suesue le Faaliliuga a Iosefa Samita o le Kenese 50:24–33. Ina ia taialaina a latou suesuega, faaali atu le siata lenei ma valaaulia tagata aoga e faatumu. E mafai foi e tagata aoga ona suesue i tusiga e faatatau i nei fuaiupu i le Fesoasoaniga mo Mau: Feagaiga Tuai e fesoasoani ia i latou e faatumu ai le siata.

A uma ona faatumu e tagata aoga le latou suesuega, valaaulia i latou e faasoa mai mea na latou aoaoina ma lagonaina. I le avea ai ma se vaega o lenei talanoaga, e mafai e tagata aoga ona faailoa mai upumoni faapenei: E ala mai i le Perofeta o Iosefa Samita, na toefuatai mai ai e le Alii Lana talalelei i le lalolagi ma aumaia le Tusi a Mamona. E aumaia e le Tusi a Mamona ma le Tusi Paia le filemu, upumoni ma se malamalama o le talalelei a Iesu Keriso i le lalolagi.

Ina ia fesoasoani i tagata aoga ia malamalama lelei i nei upumoni, mafaufau e fai atu fesili nei:

• O a ni auala ua faamanuia ai lou olaga ona ua toefuata’i mai e le Alii Lana talalelei e ala mai i a Iosefa Samita?

• Ua fesoasoani faapefea le Tusi a Mamona ma le Tusi Paia e te latalata atili atu ai i a Iesu Keriso?

E mafai foi ona tou talanoaina le faamatalaga mai ia Elder Neil L. Andersen ma fai atu fesili o loo mulimuli mai:

E manaomia e tagata talitonu taitasi se faamaoniga faaleagaga e uiga i le misiona paia ma le ituaiga tagata e i ai le Perofeta o Iosefa Samita. E moni lenei mea mo augatupulaga uma. …

O manatu faaalia le lelei e uiga i le Perofeta o Iosefa Samita o le a faateleina a o tatou agai atu i luma i le Afio Mai Faalua o le Faaola. O faamatalaga e le moni atoatoa ma tala pepelo maaleale o le a le faaitiitia. O le a i ai tagata o le aiga ma uo o le a manaomia lau fesoasoani. (“Iosefa Samita,” Liahona, Nov. 2014, 29–30)

• O le a le mea na fesoasoani ia te oe e faamalosia ai lau molimau ia Iosefa Samita?

• E mafai faapefea ona e fesoasoani i uo po o tagata o lou aiga o e atonu e manaomia lau fesoasoani?

Uunaia tagata aoga e mafaufau i ni auala e mafai ona latou faamalosia ai a latou molimau i le Perofeta o Iosefa Samita pe faasoa atu a latou molimau i isi. Valaaulia i latou e tusifaamaumau ia manatu ma uunaiga faaleagaga ua latou maua.

Toe foi i le “Filifiliga o Gaoioiga e Aoao Ai.”