2 Samuelu 11–12; 1 Tupu 3; 6–9; 11

Mafaufau e amata e ala i le talanoaina o le saunoaga lenei mai ia Peresitene Dieter F. Uchtdorf, o lē sa avea o se sui o le Au Peresitene Sili:

Manatu faapea e tatau ona e alu ese mai se malaevaalele i le ekueta, ma le faamoemoe e taamilo i le kelope, ae na o le tasi lava le tikeri na se ese ai mai lou ala. E oo atu i le taimi na e toe foi ai i le laina faalava lava lea e tasi, o le a le mamao o le a i ai oe? O ni nai maila? E selau maila? Atonu e faateia oe i le tali. O se mea sese i le na o le tasi le tikeri o le a tuu ai oe i le toeitiiti 500 maila (800 km) le mamao, po o le tasi le itula o le faigamalaga mo se vaalele. (“O Mataupu o ni Nai Faatusatusaga,” Liahona, Me 2008, 59)

• O a nisi o faaiuga e foliga mai e laiti tele e mafai ona tatou faia i o tatou olaga lea e iu lava ina taitai mamao atu ai i tatou mai le ala?

Valaaulia tagata aoga e mafaufau e uiga i faaosoosoga atonu latou te feagai e se ese ai, e oo lava i sina mea faigofie, mai poloaiga a le Atua. Uunaia i latou a o latou suesue i le asō e vaavaai mo upumoni e mafai ona fesoasoani ia i latou pe a latou feagai ma faaosoosoga.

Faamanatu atu i tagata o le vasega e faapea e faatasi ai ma le fesoasoani a le Alii, na faatoilalo ai e Tavita ia Koliata, fesoasoani ia Isaraelu e faatoilalo o latou fili i le taua, ma tuufaatasia ituaiga o Isaraelu o so latou tupu. Peitai, na iu lava ina faia e Tavita se faasologa o filifiliga na taitaieseina ai o ia mai le ala faaleagaga. Valaaulia tagata aoga e faitau le 2 Samuelu 11:1–17, 26–27, ma vaavaai mo filifiliga patino na faia e Tavita.

E mafai ona e fai atu ni fesili e pei o fesili nei e fesoasoani ai i tagata aoga e faasoa mai o latou malamalamaaga:

• O a nisi o faaiuga na faia e Tavita na taitai atu ai i agasala sili atu?

• O a ni filifiliga amiotonu semanu e mafai e Tavita ona faia i le ala e faasa’o ai le itu sa ia agai atu iai?

• O a upumoni e mafai ona tatou aoao mai le filifiliga a Tavita e faamalie ai manaoga tuinanau? (O se tasi o upumoni e mafai ona faailoa mai e tagata aoga o lenei: O le faafiafiaina o mafaufauga tuinanau ma le le talafeagai e mafai ona taitai atu ai i se agasala matuia.)

Mafaufau i manaoga o au tagata aoga a o e mafaufau pe faapefea ona faaauau lenei gaoioiga e aoao ai. E mafai ona e faaaogaina se tasi pe sili atu o manatu nei:

1. Tuu atu i tagata aoga se taimi e sue ai punaoa e mafai ona fesoasoani ia i latou e aloese atili ai mai agasala faalefeusuaiga. O faataitaiga o punaoa e mafai ona latou suesue i ai e aofia ai le “Taumafai ia Mama e Mafai ona Aumai ai Faamanuiaga Ofoofogia” i Autu ma Fesili, “Ola mama” (Taiala mo le Suesueina o le Talalelei); po o vaega ua faaautuina “O le mea e fai i le taimi nei” ma le “E paia lou tino” i le Mo Le Malosi o le Autalavou: O Se Taiala mo le Faia o Filifiliga (2022). E mafai e tagata aoga ona faasoa o latou aafiaga ma se paga, se vaega toalaiti, po o le vasega.

2. Matamata se tasi o vitio nei: “Watch Your Step” (2:35); “Why Do I Feel So Bad About Myself?” (3:45); or “Can I Do This On My Own?” (3:19). Valaaulia tagata aoga e talanoaina malamalama’aga na latou maua.

   

   2:47
   

   3:45
   

   3:19

3. Suesue le savali a Natano ia Tavita i le 2 Samuelu 12:1–10, ma tuu atu i tagata aoga e faasoa mai upumoni ua latou aoaoina mai ai. E mafai foi e tagata aoga ona talanoaina pe faapefea ona avea o se faamanuiaga le le mafai ona tatou nanaina a tatou agasala mai le Atua.

4. Fai i tagata aoga e mafaufau faapea ua latou iloa se tasi na faia ni agasala faalefeusuaiga ma ua le toe lagonaina le agavaa mo le alofa ma le faamagaloga a le Atua. Valaaulia tagata aoga e sue ma faasoa mai mau po o faamatalaga mai taitai o le Ekalesia e mafai ona fesoasoani i lenei tulaga. O faataitaiga o punaoa aoga e mafai ona aofia ai le Isaia 1:18; Mataupu Faavae ma Feagaiga 58:42–43; po o le saunoaga lenei a Elder Dale G. Renlund:

Pe a tatou salamo faamaoni, e leai se ma’ila faaleagaga e tumau, e tusa lava po o a mea sa tatou faia, pe matuiā, po o le a foi le tele o taimi tatou te toe faia ai. O le faatele ona tatou salamo ma saili le faamagaloga ma le loto i ai, e mafai lava ona faamagaloina i tatou. E maeu le ofoofogia o le meaalofa mai lo tatou Faaola, o Iesu Keriso! E mafai e le Agaga Paia ona faamautinoa mai ia i tatou ua faamagaloina i tatou. A o tatou lagonaina le olioli ma le filemu, o le a tafiesea le tausalaina, ma ua le toe faatigaina i tatou e a tatou agasala. (“O Lou Natura Pa’ia ma le Taunu’uga e Faavavau,” Liahona, Me 2022, 76)

Ina ia faaiu, valaaulia tagata aoga e faasoa mai mea sa latou aoaoina ma lagonaina latou te mananao e manatua. E mafai ona e fai atu ia i latou e tusi i lalo se fuafuaga patino ma le fuaina e faatino ai mea ua latou aoaoina.

Toe foi i le “Filifiliga o Gaoioiga e Aoao Ai.”

Mafaufau e valaaulia tagata aoga e faasoa mai se ata o se malumalu latou te fiafia i ai ma faamatala pe aisea e faapitoa ai le taua ia i latou. Pe e mafai foi ona latou ta’ua se malumalu ua fofogaina mai ua latou fiafia ma faamatala mai pe aisea. Ona mafaufau lea e talanoaina le saunoaga lenei a Peresitene Russell M. Nelson:

O Iesu Keriso o le mafuaaga lea tatou te fausia ai malumalu. O ia maota taitasi o Ona maota paia ia. O le osia o feagaiga ma le mauaina o sauniga taua i le malumalu, faapea foi ma le saili e faalatalata atili atu ia te Ia iina, o le a faamanuia ai lou olaga i auala e le mafai ona faia e se isi lava ituaiga o tapuaiga. Mo lenei mafuaaga, o loo matou faia ai mea uma i lo matou malosi e faafaigofie ai ona maua faamanuiaga o le malumalu mo o tatou tagata i le salafa o le lalolagi. (“O Iesū Keriso Lava le Tali,” Liahona, Me 2023, 127-28)

• O le a sou manatu e mafai faapefea e le tapuai i le malumalu ona faamanuiaina ai lou olaga i auala e leai se isi ituaiga o tapuaiga e mafai ona faia?

Faamalamalama atu ina ua avea Solomona ma tupu o Isaraelu, sa ia saili e faataunuu le manao o lona tama o Tavita e fausia se fale tumau mo le Alii (tagai i le 2 Samuelu 7:12–13). O lenei gaoioiga e aoao ai o le a taulai atu i taumafaiga a Solomona e fausia ma faapaia le malumalu i Ierusalema. Fautuaina tagata aoga a o latou suesue i le asō e vaavaai mo upumoni e mafai ona fesoasoani ia i latou e faateleina ai a latou molimau i le taua o le tapuai i le maota o le Alii.

Valaaulia tagata aoga e suesue le 1 Tupu 5:2–5 ma le 6:11–14, ma vaavaai mo upumoni o loo aoao mai e nei fuaiupu e uiga i le malumalu. Fai atu i tagata aoga e faasoa mai mea na latou maua. O faataitaiga o upumoni e mafai ona latou faailoa mai e aofia ai mea nei: O le malumalu o le maota o le Alii ma afai tatou te savavali i ala o le Alii, o le a Ia faataunuuina Ana folafolaga ma mau faatasi ma i tatou i Lona malumalu.

• E faapefea i lou manatu o le manatuaina o nei upumoni o le a mafai ona aafia ai lou tapuaiga i le malumalu?

Mafaufau e faaali atu ata nei:

Faamalamalama atu ina ua maea le malumalu, sa faapotopoto e Solomona le toatele o Isaraelu e auai i lona faapaiaga. Ina ua latou tuuina le atolaau o le feagaiga i le Paia o Paia, sa faaali mai le mamalu o le Alii o se ao na faatumulia ai le malumalu. Ona faia lea e Solomona o se tatalo e faapaia ai le malumalu i le Alii (tagai i le 1 Tupu 8:12–53).

Valaaulia tagata aoga e suesue le 1 Tupu 8:29–40, lea o loo i ai se vaega o le tatalo o le faapaiaga a Solomona. Fai atu ia i latou e vaavaai mo faamanuiaga na ole atu ai Solomona i le Alii e faaee atu i luga o tagata a o latou tapuai i le malumalu. Ina ia fesoasoani i tagata aoga e faasoa mai mea na latou aoaoina, mafaufau e fesili atu:

• O le a le mea e sili ona anoa ia te oe e uiga i lenei tatalo?

Ta’u i ai e pei lava o aso anamua, ua folafola mai e le Alii ia i tatou faamanuiaga silisili mo le tapuai i le malumalu. Ina ia fesoasoani i tagata aoga e aoao atili e uiga i nei faamanuiaga, mafaufau e valaaulia i latou e filifili se tasi o filifiliga nei, ma tuu atu ia i latou ni nai minute e:

1. Suesue vaega o le “O Le Malumalu Paia—o le Maota o le Alii” i Aoaoga a Peresitene ole Ekalesia: Russell M. Nelson. Saili faamanuiaga folafolaina mo le tapuai i le malumalu e faapitoa ona anoa ia te oe.

2. Suesue le tatalo o le faapaiaga mo se malumalu i la outou eria. E mafai ona e maua se tatalo o le faapaiaga e ala i le filifilia o se malumalu mai le “Lisi o Malumalu i le ChurchofJesusChrist.org/temples.

3. Suesue vaega o le tatalo o le faapaiaga o le uluai malumalu i la tatou tisipenisione—o le Malumalu o Katelani—e ala i le faitauina o nisi o fuaiupu nei: Mataupu Faavae ma Feagaiga 109:10–19, 22–26, 54–59, 72–80. Vaavaai mo faamanuiaga na tatalo iai le Perofeta o Iosefa Samita lea e te manaomia i lou olaga.

A uma le taimi na tuuina atu i tagata aoga e suesue ai, valaaulia i latou e faasoa o latou manatu ma se paga po o se vaega toalaiti. Ona valaaulia lea o ni nai tagata aoga e faasoa mea na latou aoaoina i le vasega. E mafai foi ona talanoaina fesili e pei o nei:

• O le a se mea o aoao atu ia te oe e le i ai o malumalu i le lalolagi e uiga i le alofa ma le alofa mutimutivale o le Atua?

• O le a se eseesega e faia e le tapuai i le malumalu i lau sootaga ma le Tama Faalelagi ma Iesu Keriso?

Molimau atu e uiga i upumoni na outou talanoaina i lenei aso. Uunaia tagata aoga e mafaufau i mea e mafai ona latou faia e faaleleia atili ai a latou tapuaiga i le malumalu. Valaaulia i latou e tusifaamaumau a latou fuafuaga po o uunaiga latou te maua mai le Agaga Paia.

Toe foi i le “Filifiliga o Gaoioiga e Aoao Ai.”

E mafai ona e faaali atu fesili nei ma valaaulia tagata aoga e mafaufau loloto ma tusi i lalo o latou manatu.

• O a nisi o gaoioiga e faaaoga ai le tele o lou taimi ma le malosi i le taimi nei?

• E faapefea ona e filifili po o le a le mea e sili ona gauai atu i ai lou olaga?

Faamanatu i le vasega ina ua mavae le maliu o Tavita, sa avea lona atalii o Solomona ma tupu o Isaraelu. I le amataga o le nofoaiga a Solomona, sa ia sailia ai ma le lotomaualalo le fesoasoani a le Alii ma sa faamanuiaina tele e ia (tagai i le 1 Tupu 3:5–14, 28). Sa faalua foi ona asia o ia e le Alii i le taimi o lana nofoaiga (tagai i le 1 Tupu 9:1–3). Peitai, i le aluga o taimi, na suia ai mea na faamuamua e Solomona, ma sa liliu ese lona loto mai le Alii. Fautuaina le vasega a o latou suesueina le tala i a Solomona e mafaufau ai e uiga i mea e finagalo le Alii latou te faia e puipuia ai i latou lava mai se taunuuga faapena.

Valaaulia tagata aoga e faitau le 1 Tupu 11:1–13, ma vaavaai mo faamatalaga e uiga i le olaga mulimuli ane o Solomona. (Faailoa atu o “fafine ese” i le 1 Tupu 11:1 o tamaitai e le o ni o le aiga o Isaraelu.) Uunaia tagata o le vasega e faailoga ia upu poo fasifuaitau e tulaga ese mai ia i latou. (E mafai ona avea lenei mea o se nofoaga e faataitai ai le tomai “Vaavaai mo Sootaga o le Mafuaaga-ma-le-Aafiaga i Tusitusiga Paia” i le Tomai mo le Suesueina o Tusitusiga Paia.)

Mafaufau e fai atu fesili e pei o fesili nei e fesoasoani ai i tagata aoga e faasoa mai mea na latou aoaoina:

• O le a le mea na saofagā i le suiga o le loto o Solomona?

• O a upumoni ua e aoaoina mai le to’ilalo faaleagaga o Solomona? (E mafai ona faailoa mai e tagata aoga se upumoni e pei o lenei: Afai tatou te liliu ese o tatou loto mai le Atua ma lē tausia Ana poloaiga, e mafai ona tatou le maua Ana faamanuiaga folafolaina.)

• O le a se mea e mafai ona fesoasoani ia i tatou e iloa ai le taimi e ono tafetafea ese ai o tatou lava loto mai le Atua?

Mafaufau e fai atu i le vasega e fai se lisi i luga o le laupapa o tosinaga po o tulaga e mafai ona taitai atu ai se talavou matua e liliu ese o latou loto mai le Atua.

Valaaulia tagata aoga e galulue ma se paga po o se vaega toalaiti e fatu ma tusi i lalo se ata faataitai e faavae i se tasi o aitema o loo i luga o le lisi. E mafai e tagata aoga ona pasi atu a latou vaaiga faataitai i se isi vaega pe tausia le ata na latou fatuina ona talanoaina lea o fesili nei:

• E mafai faapefea e faaiuga a le tagata i le ata faataitai ona aafia ai lo latou gafatia e maua faamanuiaga a le Atua i o latou olaga?

• O le a se fautuaga e mafai ona e tuuina atu, po o a mau e mafai ona e faasoa atu, e fesoasoani ai i le tagata o loo i le ata faataitai?

E mafai ona e valaaulia ni nai tagata aoga e faasoa mai a latou ata faataitai i le vasega, faatasi ai ma nisi o o latou manatu mai a latou talanoaga.

Valaaulia tagata aoga e mafaufau loloto pe mafai faapefea e upumoni sa latou suesueina ona faatatau i o latou tulaga patino. E mafai ona outou usuina faatasi pe faalogologo foi i le viiga “Faapa’ia Mai A’u” Viiga, 70) e fesoasoani ai ia i latou e toe manatunatu i mea latou te faamuamua faaleagaga o i ai nei.

E mafai foi ona e faasoa atu le saunoaga lenei a Elder David A. Bednar:

E tatau ona ta’itasi i tatou ma iloilo a tatou faamuamua faaletino ma faaleagaga ma le lototatalo ia faailoa mea i o tatou olaga e ono faalavelaveina ai le anoanoai o faamanuiaga ua naunau le Tamā Faalelagi ma le Faaola e faae’e mai i o tatou luga. O le mea mautinoa lava o le a fesoasoani le Agaga Paia ia i tatou ia tatou vaai ai i o tatou tulaga moni lava. (“Ia Oofu i Lou Malosi, E, Siona e,” Liahona, Nov. 2022, 94)

Valaaulia tagata aoga e tusifaamaumau soo se fetuunaiga latou te lagona le uunaia e fai i o latou olaga ina ia taulai atoatoa atu o latou loto i le Tama Faalelagi ma Iesu Keriso.

Toe foi i le “Filifiliga o Gaoioiga e Aoao Ai.”