Faatalitali mo le Folafolaga, saunia e Elspeth Young.

Iosua 1–8; 23–24

Na suitulaga Iosua ina ua mavae Mose, ma avea ma perofeta ma taitai o le nuu o Isaraelu. Sa faatonu e le Alii ia Iosua e taitai atu le fanauga a Isaraelu i le nuu o le folafolaga. Sa auina atu e Iosua ni tagata matavao se toalua i Ieriko. O iina, na faasaoina ai e Raava ia tagata matavao mai le pueina, ma mo lena mea sa latou folafola atu ai e faasaoina o ia ma lona aiga mai le faatafunaga o le a oo mai. Sa taofia e le Alii vai o le Vaitafe o Ioritana ina ia mafai ona sopoia e tagata Isaraelu le eleele matutu ma ulufale atu i le nuu o le folafolaga. Ina ua usiusitai autau a Isaraelu i le Alii, sa Ia faamanuiaina i latou ina ia manumalo i le taua. A o lei maliu o ia, sa faamanatu atu e Iosua i tagata Isaraelu mea uma na faia e le Alii mo i latou. Sa ia faatauanau i tagata e filifili e auauna atu i le Alii.

Punaoa Faaopoopo

Fesoasoaniga mo Mau: Feagaiga Tuai, “Iosua 1–8; 23--24 “

Manatua: O le “Faatomuaga i le Kosi” ua tuuina mai ai le taitaiga i le auala e faaaoga ai elemene faatulagaina o lesona o loo mulimuli mai.

Uunaia Suesuega Faaletagata Lava Ia

A o lei amataina le vasega, mafaufau e auina atu i tagata a’oga se tasi pe sili atu o sāvali nei po o nisi o au oe lava sāvali:

Na poloaiina e le Alii ia Iosua ia “faamalosi ma loto tele” (Iosua 1:9). A o e suesue i le Iosua 1, mafaufau pe mafai faapefea ona fesoasoani le Alii ia te oe ia maua le lototele i ou lava tulaga.
O a ni tulaga o feagai ma oe e manaomia ai lou faatinoina o le faatuatua ia Iesu Keriso? Mafaufau pe mafai faapefea ona e faamalosia lou faatuatua a o e suesue i le Iosua 2–3 ma le 6.
Pe i ai se taimi e te lagona ai le faamalosia o oe e mulimuli i faatosinaga amioletonu ae le o le Alii? Mafaufau i mea e mafai ona e aoaoina mai le Iosua 24 e mafai ona fesoasoani ia te oe po o isi i nei tulaga.

Fesili ma Fetufaa’iga

Tuu atu se taimi mo tagata aoga e fai ai fesili ma faasoa mai ni malamalama’aga ma upumoni na latou maua i a latou suesuega faaletagata lava ia o le Iosua 1–8; 23--24.

Aoaoga o Tomai

O le gaoioiga e aoao ai mo le Iosua 2 – 3; 6 atonu o se nofoaga aoga lea e faataitai ai le tomai “Vaaifaalemafaufau i Mau” i le Tomai mo le Suesueina o Tusitusiga Paia.

Filifiliga o Gaoioiga e Aoao Ai

E tele filifiliga e aoao ai ua tuuina atu mo oe ma au tagata a’oga. Filifili ma le agaga tatalo po o lē fea le filifiliga po o filifiliga o le a sili ona anoa mo lau vasega. E mafai foi ona e sailia manatu faaalia mai au tagata aoga.

Faaleleia o Lo Tatou Aoao Atu ma le Aoaoina mai

Uunaia tagata aoao ia iloa le Faaola e ala i le suesue i le talalelei i aso taitasi. O le suesueina o tusitusiga paia e aumaia ai ia i tatou se avanoa e faalogo ai i le siufofoga o le Faaola. O le valaaulia e faitau tusitusiga paia o se valaaulia ia iloa Iesu Keriso. A o e aoaoina au tagata aoga e uiga i le suesueina o tusitusiga paia, uunaia i latou e le gata ina saili mea o loo aoao mai e tusitusiga paia e uiga i le Faaola ae ia saili ia maua o Ia. Ina ia aoao atili, tagai “Na Uunaia e le Faaola Isi ia Latou Taumafai e Iloaina o Ia e Ala i le Aoaoina o Lana Upu” (Aoao Atu i le Ala a le Faaola, 25).

Iosua 1

E mafai faapefea ona fesoasoani le Alii ia ou maua le loto tele?

E mafai ona e faaali atu fasifuaitau nei ma valaaulia tagata aoga e tusi i lalo pe faapefea ona latou faaumaina se fuaiupu se tasi pe sili atu.

Ou te lagona le lofituina i …
Ou te lagona le le atoatoa pe a …
Ou te lagona le popole po o le fefe i …

Fautuaina le vasega e mafaufau i a latou tali a o latou suesue i fautuaga na tuuina mai e le Alii ia Iosua. Valaaulia i latou e vaavaai mo upumoni e mafai ona fesoasoani ia i latou pe a latou lagona faapena.

Faamalamalama atu sa i ai ia Iosua ni mafuaaga e lagona ai le lofituina, le atoatoa, ma le popole. Sa se solo le fanauga a Isaraelu i le vao mo le 40 tausaga. O Mose, le faitulafono sili ma le perofeta, ua leai. O le tiutetauave ma le avanoa o Iosua e taitai atu ai le fanauga a Isaraelu i le nuu folafolaina ma tau faasaga i tagata o e sa foliga mai e sili atu le malolosi nai lo i latou.

Valaaulia tagata aoga e suesue le Iosua 1:1–9 ma sue upu po o fasifuaitau atonu na faamafanafanaina ai Iosua. Atonu e te manao e ta’u i ai o le Tusi a Mamona o loo faamanino mai ai e lei maliu Mose ae sa faaliliuina (tagai Taiala i Tusitusiga Paia, “Tagata Ua Faaliliuina,” Gospel Library; tagai foi i le Alema 45:19). E mafai e tagata aoga ona faasoa atu i se paga po o le vasega mea na tulaga ese ia i latou mai fuaiupu sa latou suesueina ma pe aisea foi. E mafai foi ona e mafaufau e fesili atu:

O le a sou manatu i le mea na aoaoina e Iosua mai le fautuaga a le Alii? (E mafai ona faailoa mai e tagata aoga ni upumoni eseese, e aofia ai se mea e faapenei: A tatou iloa ua faatasi le Alii ma i tatou, e mafai ona tatou malolosi ma lototetele.)

Mafaufau e faaali atu faatonuga nei ma tuu atu i tagata aoga se taimi e faauma ai e i latou lava.

Tusi i lalo se tulaga se tasi pe sili atu o loo feagai ma oe e manaomia ai lou malosi ma le lototele.
Saili mau po o faamatalaga mai taitai o le Ekalesia e mafai ona fesoasoani ia te oe e maua ai le malosi ma le lototele mai le Alii i nei tulaga. O faataitaiga o mau e mafai ona e suesue i ai e aofia ai le Iosua 1:9; Salamo 27:1; Isaia 41:10; 2 Timoteo 1:7; ma le Mataupu Faavae ma Feagaiga 6:36.

A uma, valaaulia i latou e faasoa mai nisi o mau po o faamatalaga na latou maua i se paga po o se vaega toalaiti. Ona mafaufau lea e fai atu fesili nei:

O anafea na tuuina atu ai e le Alii ia te oe le malosi po o le lototele? O le a se mea ua aoao mai e lenei aafiaga ia te oe e uiga ia te Ia?

Ina ia faaiu, valaaulia tagata aoga e mafaufau pe mafai faapefea ona latou faaaogaina mea ua latou aoaoina i o latou olaga. Fautuaina i latou e tusifaamaumau o latou manatu po o uunaiga faaleagaga.

Toe foi i le “Filifiliga o Gaoioiga e Aoao Ai.”

Iosua 2–3; 6

O le a se eseesega e mafai ona faia e le faatinoina ma le faatuatua ia Iesu Keriso i lo’u olaga?

Mafaufau e tusi le fesili lenei i luga o le laupapa:

O a ni tulaga i le olaga e manaomia ai ona tatou faatinoina ma le faatuatua ia Iesu Keriso?

Mafaufau e tusi tali a tagata aoga i le fesili lenei i luga o le laupapa. E mafai foi ona e valaaulia i latou e talanoaina pe mafai faapefea ona tatou manuia mai nei ituaiga o tulaga.

Faamalamalama atu o le tusi a Iosua ua tatou aoao ai e uiga i le ulufale atu o Isaraelu i le nuu folafolaina ina ua mavae le 40 tausaga o se solo i le vao. O lenei tusi o loo faamatala mai ai le tele o tulaga na manaomia ai tagata taitoatasi e faaaoga le faatuatua i le Alii. Fautuaina le vasega e mafaufau pe mafai faapefea e faataitaiga latou te suesueina i le aso ona fesoasoani ia i latou e faaaoga atili ai le faatuatua ia Iesu Keriso i o latou olaga.

Valaaulia tagata aoga e fatu se siata faapenei:

Faatinoga faatuatua	Taunuuga o le faatinoina i le faatuatua

Tuu atu i tagata aoga se taimi e suesue ai se tasi pe sili atu o tala nei ma faamaea koluma uma e lua i le siata e faavae i mea latou te maua. E mafai foi ona avea lenei mea ma se avanoa e faailoa atu ai le tomai “Vaai faalemafaufau i Tusitusiga Paia” i Tomai o le Suesueina o Tusitusiga Paia. E mafai e tagata aoga ona vaai faalemafaufau ia i latou lava i le tala ma mafaufau po o a ni o latou manatu po o ni lagona atonu na i ai.

Raava ma tagata matavao (Iosua 2:1–21; 6:22–25)
O le ulufale atu o Isaraelu i le nuu folafolaina (Iosua 3:1–17)
O le taua o Ieriko (Iosua 6:1–20)

A uma ona suesue tagata aoga, valaaulia i latou e faasoa atu i se paga po o se vaega toalaiti mea na latou tusia i la latou siata. E mafai foi ona outou talanoaina faatasi fesili nei:

O le a se mea ua e a’oa’oina e uiga i le Alii mai le tala na e su’esu’eina?
E mafai faapefea ona fesoasoani lenei tala i tulaga e manaomia ai lou faatinoina o le faatuatua ia Iesu Keriso?

Afai e i ai ni fesili a tagata aoga e uiga i le poloaiga a le Alii e faaumatia tagata o Ieriko, e mafai ona e faasino atu i latou i le “Teuteronome 7:1–6, 16–24. Aisea na poloaiina ai e le Alii ia Isaraelu e faaumatia sa Kanana?” i le Fesoasoaniga i Tusitusiga Paia: Feagaiga Tuai.

Mafaufau e faasoa atu le saunoaga lenei a Elder Dale G. Renlund:

O le tele o faamanuiaga e finagalo le Atua e foai mai ia i tatou e manaomia ai le faatinoga o la tatou vaega—o faatinoga e faalagolago i lo tatou faatuatua ia Iesu Keriso. O le faatuatua i le Faaola o se mataupu faavae o faatinoga faapea foi ma le mana.  Muamua tatou te faatino i le faatuatua; ona oo mai lea o le mana—e tusa ma le finagalo ma le taimi a le Atua. E taua le faasologa. E ui i lea, o le faatinoga e laitiiti lava pe a faatusa i faamanuiaga tatou te maua mulimuli ane. (“E Tele Mea e Manuia Ai,” Liahona, Me 2019, 70)

Mafaufau e tusi le upumoni lenei i luga o le laupapa: A o tatou galulue ma le faatuatua ia Iesu Keriso, e mafai ona tatou maua le mana ma faamanuiaga a le Atua. Ona mafai lea ona e fai atu ni fesili faapenei:

Aisea e te manatu ai o le faasologa o le faatinoina i le faatuatua ona maua lea o le mana o le Atua e taua tele?
O a ni faataitaiga mai lou olaga na e maua ai le mana po o faamanuiaga a le Atua ona sa e faatinoina ma le faatuatua ia Iesu Keriso?

E mafai ona e faasoa atu le faamatalaga lenei mai ia Peresitene Russell M. Nelson:

O le a se mea e te faia pe afai ua ia te oe se faatuatua sili atu? Mafaufau i ai. Tusitusi e uiga i ai. Ona maua tele ai lea o le faatuatua e ala i le faia o se mea e manaomia tele ai le faatuatua. …

O le faatuatua ia Iesu Keriso o le mana silisili lea ua avanoa mo i tatou i lenei olaga. E mafaia mea uma ia i latou o ē talitonu.

O lou faatuatua tuputupu a’e ia te Ia o le a aveese ai mauga—e le o mauga o papa o loo faamatagofie ai le lalolagi ae o mauga o faanoanoaga i o outou olaga. O lou faatuatua uluuluola o le a fesoasoani ia te oe e liliu luitau i le tuputupu a’e ma avanoa lē mafaatusaliaina. (“Ua Toetu Keriso: O le Faatuatua ia te Ia o le a Aveese ai Mauga,” Liahona, Me 2021, 103, 104)

Tuu atu i tagata aoga se taimi e fatufatu ai se fuafuaga e faateleina ai ma faaaoga lo latou faatuatua. Afai e le patino tele, valaaulia tagata aoga e faasoa mai ni vaega o a latou fuafuaga i se paga po o le vasega.

Toe foi i le “Filifiliga o Gaoioiga e Aoao Ai.”

Iosua 24

O le ā se mea e mafai ona fesoasoani ia te a’u e filifili ai e auauna ai i le Ali’i?

O le ata faataitai lenei e mafai ona fesoasoani i tagata aoga ia iloa le taua o le faaaogaina o lo latou faitalia e fai ai mea lelei. Mafaufau e faasoa atu pe fatu se isi vaaiga e sili atu ona fetaui ma manaoga o au tagata aoga:

Sa siitia ese talu ai nei Walter mai le fale o ona matua. O lea la ua na o ia lava, ua faigata ia te ia ona faia mea na uunaia o ia e ona matua e fai, e pei o le auai i le lotu, suesue i tusitusiga paia, ma mulimuli i aoaoga ma tulaga faatonuina a le Faaola. O uo fou e potu faatasi ma Walter o ni tagata lelei ma malie le faatasi ai, ae ua ia matauina o le mulimuli ia Iesu Keriso e foliga mai e le o se faamuamua maualuga lea mo i latou.

O a nisi o fesili e mafai ona e fai atu ia Walter atonu e taua mo ia ona mafaufau i ai?

Faamalamalama atu e faapea, i le taufaaiuiuga o lona soifua, sa faasoa atu ai e Iosua se lauga faaiu ia Isaraelu. E ui lava i taumafaiga a Isaraelu e aveese faatosinaga leaga o siomia ai i latou ina ua uma ona ulufale atu i le nuu folafolaina, sa popole pea Iosua e uiga i faaosoosoga na feagai ma lona nuu.

Valaaulia tagata aoga e suesue le Iosua 24:1–18, ma vaavaai mo upumoni mai le fautuaga a Iosua e mafai ona fesoasoani i le vaaiga faataitai e uiga ia Walter ma tulaga latou te feagai i o latou lava olaga.

A uma ona suesue tagata aoga, mafaufau e valaaulia i latou e faasoa atu i se paga ni upu po o ni fasifuaitau mai nei fuaiupu e mafai ona fesoasoani ia Walter i lona tulaga. Ona mafai lea ona e fai atu ni fesili faapenei:

E fa’apefea ona e aoteleina le savali a Iosua o se fa’amatalaga o le upumoni? (E mafai e tagata aoga ona faailoa mai se upumoni faapenei: E mafai ona tatou filifili e auauna atu i le Alii tusa lava po o a mea e filifili e isi.)
O a nisi o faataitaiga o tulaga e feagai ma talavou matutua lea o le a fesoasoani ai le mulimuli i lenei mataupu faavae?

Mafaufau e faasoa atu le saunoaga lenei a Elder Dale G. Renlund, ona talanoaina lea o fesili o loo i lalo:

O le sini a lo tatou Tama Faalelagi i tulaga faamatua, o le lē tuu atu lea i Ana fanau ia faia le mea sa’o; ae o le tuu atu lea i Lana fanau e filifili e fai le mea sa’o ma mulimuli ane avea e faapei o Ia. …

O le mea moni, e finagalo le Atua, faamoemoe, ma faatonu mai ina ia filifili Ana fanau taitasi mo ia lava. O le a Ia le fosia i tatou. E ala atu i le meaalofa o le faitalia, ua faatagaina ai e le Atua Lana fanau e “fai mo i latou lava ae le faamalosia.” [2 Nifae 2:27]. O le faitalia e faatagaina i tatou e filifili ia i ai i luga o le ala, pe leai. E faatagaina i tatou e o ese, pe leai. E pei lava ona le mafai ona faamalosia i tatou ia usiusitai, e le mafai foi ona faamalosia i tatou ia lē usiusitai. E leai se tasi e mafai, e aunoa ma lo tatou maliega, ona aveesea i tatou mai le ala. …

E tatau ona tatou filifili po o ai tatou te auauna i ai. O le taunuuga sili o lo tatou fiafia e faavavau e faalagolago lea i le filifiliina o le Atua soifua ma auai faatasi ma Ia i Lana galuega. (“Ina Filifili Ia o Outou i le Aso Nei,” Liahona, Nov. 2018, 104–6)

O le a se mea na tulagaese ia te oe mai lenei saunoaga?
O le a se mea ua e iloa e uiga ia Iesu Keriso e mafai ona fesoasoani ia te oe e filifili ai o Ia nai lo isi faatosinaga?

Ina ia faaiu, valaaulia tagata aoga e mafaufau e uiga i uunaiga atonu o loo latou feagai i le taimi nei e mulimuli i faatosinaga amioletonu nai lo le Alii. Valaaulia i latou e mafaufau po o a fetuunaiga e mafai ona latou faia i o latou olaga e faaalia atoatoa ai ua latou filifili e auauna atu i le Alii. Uunaia i latou e tusifaamaumau a latou fuafuaga, faatasi ai ma soo se uunaiga ua latou maua mai le Agaga Paia.

Toe foi i le “Filifiliga o Gaoioiga e Aoao Ai.”